Е

Дева Мария нам Еммануила¹

во Вифлееме нетленно родила,

Еже С нами Бог имя ся толкует,

и самем делом то ся изводствует.

Есть² бо³ Бог с нами, ибо воплотися

и нам подобен человек явися.

Есть⁴ еще с нами в тайнах божественных,

из хлеба, вина, в плоть⁵, в кровь преложенных,

Иде же тако есть человечество

и всесилное Христово Божество,

Яко на земли древле⁶ в плоти бяше,

егда во мире⁷ Господь странствоваше,

И яко ныне в небе пребывает,

седя во десных, и славим бывает.

Тем же и нам зде хвалити И требе,

яко аггели Его славят в небе.

Той же бо един зде есть и онамо,

тажде кровь сама, тожде тело само,

Аще инако, зде бо покровенно,

видами вещей, в небе всеявленно.

Но се не творит не Тогожде быти,

тем же всеточне требе есть хвалити.

Еще⁸ есть с нами и по благодати,

елма безгрешно тщимся пребывати,

Ею же Он ны светло⁹ просвещает

и от немощей силно воздвизает,

И падших во грех зовет, да востанем,

увещает же, да от злых предстанем¹⁰.

Наконец¹¹, с нами Бог днесь бывает¹²,

ибо Церковь Си хранит, защищает.

Глава – Христос ей, она – Ему тело,

Он защищает, да то будет цело.

Кая бо глава не любит си тела,

ли не печется, да плоть будет цела?

Есть убо с нами Бог и хощет¹³ быти,

токмо мы тщимся благочестно жити.

Аще ж¹⁴ Бог с нами, кто на ны возможет,

на вся нам враги Господь Бог поможет.

Помогай, Спасе, и настави жити,

да бы нам к тому Тебе не грешити.

Царь великий Константин тако почиташе

сан епископский, даже сице глаголаше:

Аще бых епископа усмотрел блудяща,

ризою си покрил бых от мира, на нь зряща.

Не тако днесь деется, невинных клевещут,

отмщения Божия руки не трепещут.

2

Егда собор в Никей¹⁵ отци совершаху,

на епископы неки челобитны бяху

Ко царю Константину. Он их не читаше,

но абие всеядцу огневи предаше,

Глаголя: Не хощу аз тех судия быти,

их же благословенства нужда ми просити.

Днесь и тайных взыскуют¹⁶ и лжы промышляют¹⁷

всяких санов людие, и тех обличают:

Но таким клеветником Сам Христос Спаситель

имать быти праведный за то зло отмститель.

3

Епископ¹⁸ некто с царем на трапезе бяше,

его же царь ко правде словом увещаше.

Он, ублажив царское слово, рече к нему:

Изволи богомолцу сказати своему,

Рыбу предлежащую откуду начата?

От главы, ли ошиба? Аз не могу знати.

Царь отвеща: От главы. Он же подложил есть:

Право твой царский разум сие осудил есть.

И сотвори такожде, изволи начати

от царскаго ти лица правду совершати.

Отпусти сродницу си, несть та жена тебе¹⁹,

довле сотвори плотстей законно потребе.

Таковым епископом быти подобает,

да ся и царю реши правды не страшает.

Яко же²⁰ и Креститель древле сотворил есть,

о законе Божием главу положил есть.

4

Царь некто епископа сице вопросил есть:

Вскую днесь епископы Дух Святый лишил есть,

Не деет чюдес ими, яко древле бяше,

внегда чрез епископы чюдодеиствоваше?

Даде ответ епископ: Тогда на степени

духовныя чрез Дух Свят бяху возведени,

Ему же есть свойственно чюдеса творити,

тем же им дароваше чюдотворцем быти.

Днесь же на епископство царие возводят,

ини родом, богатством на оно восходят,

В нем же не благоволит Дух Пребожественный,

за то днесь епископи не чюдодейственни²¹.

5

Епископ не господин имать стаду быти,

но отца себе чадом должен есть творити,

Словом паче разеудным грешныя смиряти,

неже духовным мечем оны ударяти.

Аще же и жестоты нужда проявится,

та не мучителская²², отчя да творится.

Пустынножитель некто сродника имяше,

иже епископ быти вседушно желаше.

Он его увещал есть мысль ту отложити,

яко бедственно зело на высоте быти.

Послушал²³ сродник старца, мысль ону лишил есть,

Потом мало жив, век сей на ин пременил²⁴ есть.

Явив же ся старцеви, слово глаголаше

благодарное, яко совет ему даше,

Еже бы епископска сана не желати,

но в смирении век свой выну провождати,

И рече: Веждь то, яко был бым осужденны,

аще на епископство был бых возвыжшенный²⁵.

Оле бедства страшнаго²⁶ во сане велице!

Ну ж дно есть спасение кому ж до владыце,

Яко за многи душы имать отвещати,

уне убо на той сан самем не желати.

Но аще возведет Бог, тогда бодрым²⁷ быти,

а, яко на стражнице, неусыпно жити.

И Златоустый святый: Чюждуся²⁸, глаголет,

аще кто от началных спасен быти может.

Аще тако началство беду имать многу,

в подначалстве трудимся истинному Богу.