Триодь, 1-я Неделя по Пасхе.
Глас 1
Песнь 1
Ирмос: Воскресе́ния день,/ просвети́мся, лю́дие,/ Па́сха, Госпо́дня Па́сха;/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия.
Припев: Пресвята́я Богоро́дице, спаси́ на́с.
Воскресе́ния день Влады́ки Христа́,/ и Ма́терь Того́, Де́ву Чи́стую,/ прииди́те, вси, и́же в Горе́ мона́шествующии,/ согла́сно ве́рно воспои́м,/ благода́рственное пою́ще.
Припев: Пресвята́я Богоро́дице, спаси́ на́с.
Воскресе́ние Спа́са Христа́/ и па́мять, е́же па́че наде́жды, чудоде́йствия Твоего́, Чи́стая,/ и́мже показа́ла еси́ нас сы́ны дне,/ тьму отгна́вши от честна́го жре́бия Твоего́,/ согла́сно ве́рно воспои́м,/ благода́рственное пою́ще.
Припев: Пресвята́я Богоро́дице, спаси́ на́с.
Очи́стим чу́вствия и у́зрим мы́сленными очесы́/ Бо́жий Про́мысл,/ и́бо Богоневе́стная из Горы́ Афо́нския/ ны́не во́инство христоненави́стное пресла́вно изгна́.
Припев: Пресвята́я Богоро́дице, спаси́ на́с.
Не́бо и земля́ ны́не да веселя́тся/ в Боже́ственном Христо́вом возста́нии,/ Де́ву же да пое́т лик безсупру́жных,/ и́бо днесь во́инство христоненави́стное из Горы́ изгна́.
Сла́ва Отцу́ и Сы́ну и Свято́му Ду́ху.
Исча́дие Ага́ри, вто́ргся к нам,–/ даде́ся Гора́,– рече́,– во власть ны́не мою́:/ но у́бо солга́ся лю́те,/ из Горы́ бо того́ Храни́тельница Богоро́дица изгна́.
И ны́не и при́сно и во ве́ки веко́в. Ами́нь.
Небеса́ у́бо досто́йно ны́не веселя́тся/ Боже́ственным Воскресе́нием Сы́на Твоего́, Чи́стая,/ мы же пра́здник соверша́ем и Тебе́,/ в не́мже посла́ла еси́ нам честны́й о́браз Твой.
Песнь 3
Ирмос: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся.
Припев: Пресвята́я Богоро́дице, спаси́ на́с.
Прииди́те, пи́во пие́м ра́дости,/ честна́я в безсупру́жных составле́ния,/ и́бо Де́ва Чи́стая печа́ль на́шу преложи́/ в весе́лие спаси́тельное.
Припев: Пресвята́я Богоро́дице, спаси́ на́с.
Прииди́те, пи́во пие́м но́вое,/ от исто́чника присноживо́тнаго Богома́тере,/ и́бо ве́сну нам благода́рную показа́,/ я́ко пре́жде и ны́не Богоневе́стная.
Припев: Пресвята́я Богоро́дице, спаси́ на́с.
Ны́не вся исполня́ются ра́дости,/ я́же в Горе́ Афо́нстей честна́я жили́ща,/ Богоро́дицу Чи́стую Предста́тельницу держа́вну иму́ще,/ Е́юже утверди́шася.
Припев: Пресвята́я Богоро́дице, спаси́ на́с.
Вчера́ порабо́тихомся лю́те,/ мучи́тельству неве́рных па́дше вси,/ ны́не же Предста́тельница на́ша/ све́тлое дарова́ нам возрожде́ние.
Сла́ва Отцу́ и Сы́ну и Свято́му Ду́ху.
Ны́не глаго́ли, Горо́ Честна́я:/ обновля́юся стра́нно Богома́терию,/ неве́рному бо во́инству бежа́вшу,/ торжество́ но́вое и све́тлое Той составля́ю.
И ны́не и при́сно и во ве́ки веко́в. Ами́нь.
Я́ко дре́вле Петра́ Твой Сын в воде́,/ Богоро́дице, удиви́,/ та́ко и Ты честну́ю Твою́ ико́ну/ в то́йже воде́ просла́вила еси́.
Седален, глас 5
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Фео́филу ски́птры зле управля́ющу,/ свята́я Твоя́ ико́на, бежа́вши, идя́ше/ по воде́ пла́ванием над волна́ми,/ и, прише́дши любе́зно, приста́ держа́вно во оби́тели Твое́й Богоспаса́емей,/ и водрузи́ся, я́ко на престо́л Херуви́мский,/ в хра́ме Твое́м, Чи́стая.
Песнь 4
Ирмос: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко всеси́лен.
Припев: Пресвята́я Богоро́дице, спаси́ на́с.
На Боже́ственней стра́жи,/ ста́вше во Христе́, бра́тие,/ ума́ движе́ния и дея́ния испра́вляюще,/ вси в весе́лии рцем:/ днесь спасе́ние Горе́/ Де́вою Чи́стою, на́шею Предста́тельницею.
Припев: Пресвята́я Богоро́дице, спаси́ на́с.
На ста́до Твое́, Чи́стая,/ просте́рши взор благосе́рдно,/ призыва́ющия Тя спаса́еши от вся́ких скорбе́й,/ враги́ бо Твоя́, Влады́чице,/ днесь из Горы́ изво́диши,/ нам вопию́щим Ти, е́же очи́сти.
Припев: Пресвята́я Богоро́дице, спаси́ на́с.
При́сно смуща́ет мя мно́жество неча́емых напа́стей,–/ вопие́т вся, я́же во Афо́не, Твоя́ па́ства, Влады́чице,–/ не пре́зри у́бо, но предвари́, изми́ мя, Де́во,/ воспева́ющую при́сно вели́чия Твоя́.
Припев: Пресвята́я Богоро́дице, спаси́ на́с.
Я́ко Храни́тельницу свяще́нных на́ших оби́телей,/ Чи́стая, венча́ем Тя,/ ны́не от любве́ Боже́ственныя пе́сни плету́ще:/ приими́ пе́ние и па́ки ны в ру́ки беззако́нных не преда́ждь,/ Христа́ умилостивля́ющи.
Сла́ва Отцу́ и Сы́ну и Свято́му Ду́ху.
Богооте́ц у́бо Дави́д/ пред се́нным ковче́гом скака́ше, игра́я,/ лю́дие же Христо́вы безсупру́жнии, и́же в Горе́, Чи́стая,/ игра́юще пред о́бразом Твои́м,/ боже́ственно Тебе мо́лятся,/ я́коже Дави́д прорече́.
И ны́не и при́сно и во ве́ки веко́в. Ами́нь.
Богооте́ц у́бо Дави́д/ пред се́нным ковче́гом скака́ше, игра́я,/ ве́рнии же, мы днесь,/ пред све́тлым о́бразом Твои́м/ ли́ки соста́вльше песноно́сныя,/ Тебе́ ра́достно Сладколю́бящая зове́м.
Песнь 5
Ирмос: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща.
Припев: Пресвята́я Богоро́дице, спаси́ на́с.
У́тренюем вси боже́ственно/ и с пе́нием дея́ния принесе́м доброде́тельная, Де́ве вопию́ще:/ не преста́й, Влады́чице, су́щия в Горе́ храня́щи.
Припев: Пресвята́я Богоро́дице, спаси́ на́с.
У́тренюем днесь вси/ и Чи́стей Богоро́дице Тебе́ принесе́м Боже́ственную песнь,/ нас от скорбе́й изба́вльшей всех/ и от нечи́стаго сове́тования.
Припев: Пресвята́я Богоро́дице, спаси́ на́с.
Безме́рное Твое́ благоутро́бие/ к су́щим в Горе́ оби́телем со у́жасом зря́ще, Чи́стая,/ на Твое́ тве́рдое предста́тельство наде́ющеся,/ Па́сху пра́зднуем весе́лую.
Припев: Пресвята́я Богоро́дице, спаси́ на́с.
Безме́рное Твое́ благоутро́бие, и́же в Горе́, ны́не зря́ще,/ Тебе́ пригла́шаем:/ ра́дуйся, Храни́тельнице мона́шествующих, о Всечи́стая,/ ра́дуйся, Предста́тельнице и Побо́рнице.
Сла́ва Отцу́ и Сы́ну и Свято́му Ду́ху.
Присту́пим, свещено́снии,/ исходя́щу Христу́ из Гро́ба, я́ко Жениху́,/ и торжеству́ем, Богоро́дице взыва́юще:/ ра́дуйся, Горы́ Спаси́тельнице.
И ны́не и при́сно и во ве́ки веко́в. Ами́нь.
Присту́пим, свещено́снии,/ к прише́дшей нам Богоро́дицы Чи́стыя ико́не,/ и тоя́ удиви́мся о́браза подо́бию,/ и чуде́с волна́м.
Песнь 6
Ирмос: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба.
Припев: Пресвята́я Богоро́дице, спаси́ на́с.
Снидо́хом во грехи́ мно́гия/ и пра́ведное на ся Бо́жие негодова́ние привлека́хом./ Но, о Влады́чице,/ Ты исхи́тила еси́ нас из ро́ва поги́бели.
Припев: Пресвята́я Богоро́дице, спаси́ на́с.
Сни́де, я́ко в преиспо́дняя земли́,/ нечи́стое во́инство,/ прогна́но све́том Твои́м, Богоро́дице,/ сего́ ра́ди мона́шествующии/ благода́рственную песнь Тебе́ прино́сят, Отрокови́це.
Припев: Пресвята́я Богоро́дице, спаси́ на́с.
Храня́щи, о Влады́чице, Го́ру Твою́ невреди́му/ от враг мы́сленных и чу́вственных же/ и спаса́еши на́ше жи́тельство,/ прие́мши пе́сни от нас всегда́.
Припев: Пресвята́я Богоро́дице, спаси́ на́с.
Храня́щи, Чи́стая, Го́ру Твою́,/ наше́дшим неве́рным,/ в наказа́нии лю́тых на́ших грехопаде́ний,/ не пре́дала еси́ нас в ру́ки их,/ но истреби́ в коне́ц.
Сла́ва Отцу́ и Сы́ну и Свято́му Ду́ху.
Спа́се наш Христе́,/ воскресе́ние душ на́ших,/ мольба́ми Ро́ждшия Тя/ изба́ви всех от бед и скорбе́й/ и сподо́би нас неизрече́нныя Твоея́ Сла́вы.
И ны́не и при́сно и во ве́ки веко́в. Ами́нь.
Спаси́тельницу на́шу же и Храни́тельницу,/ о Всенепоро́чная Чи́стая, Тя ве́мы вся,/ я́же в Горе́ оби́тели,/ сего́ ра́ди Тебе́ согла́сно составля́ем пе́ние.
Кондак, глас 8
Иже в хра́ме и оби́тели Твое́й приходя́щия Ти/ и богоуго́дно спаси́тельная гоня́щия/ и почита́ющия Твой святы́й о́браз,/ сим да́руй, Де́во, Твоя́ ми́лости,/ от вся́ких изба́вльши сих скорбе́й, Тебе́ вопию́щия:/ ра́дуйся, Еди́на Богоневе́стная.
Икос
А́нгели неви́димо со стра́хом окружа́ют Боже́ственную Твою́, Де́во, ико́ну/ сию́, уди́вльши до́бре, чрез мо́ре во Твою́ оби́тель посла́ла еси́./ Мы же, ра́дующеся сла́ве Твое́й, вопие́м Ти, е́же ра́дуйся, си́це:/ ра́дуйся, Христа́ Сладколю́бящая;/ ра́дуйся, на объя́тиих Того́ нося́щая./ Ра́дуйся, стоя́щая в хра́ме, я́ко Всецари́ца;/ ра́дуйся, соблюда́ющая нас, я́ко Храни́тельница./ Ра́дуйся, я́ко приклони́лася еси́, е́же соблюда́ти Твою́ оби́тель;/ ра́дуйся, я́ко зде суди́ла еси́ присели́тися, и до ны́не пребыва́еши./ Ра́дуйся, спасе́ние ве́рных раб Твои́х;/ ра́дуйся, благоукраше́ние свята́го хра́ма Твоего́./ Ра́дуйся, Е́юже от ва́рвар избавля́емся;/ ра́дуйся, Е́юже от бед спаса́емся./ Ра́дуйся, на́ша Предста́тельнице и Покро́ве;/ ра́дуйся, всем упова́ние изве́стное./ Ра́дуйся, Еди́на Богоневе́стная.
Песнь 7
Ирмос: О́троки от пе́щи изба́вивый,/ быв Челове́к,/ стра́ждет, яко сме́ртен,/ и стра́стию сме́ртное/ в нетле́ния облачи́т благоле́пие,/ еди́н благослове́н/ отце́в Бог и препросла́влен.
Припев: Пресвята́я Богоро́дице, спаси́ на́с.
О́троки от пе́щи изба́вивый,/ призре́л еси́, Го́споди, я́ко Милосе́рд, прегреше́ния на́ша/ и изба́вил ны еси́ от лю́таго обстоя́ния Ма́тери Твоея́ мольба́ми,/ я́ко Бог препросла́вленный.
Припев: Пресвята́я Богоро́дице, спаси́ на́с.
О́троки от пе́щи изба́вивый,/ изба́ви, Влады́чице, Го́ру, Тобо́ю Святоиме́нную, Чи́стая,/ от неве́рных враг Человеколю́бец,/ Еди́н благослове́нный отце́в Бог и препросла́вленный.
Припев: Пресвята́я Богоро́дице, спаси́ на́с.
Же́ны с ми́ры Богому́дрыя вслед Тебе́ теча́ху, Влады́ко Христе́,/ Небе́сное Тя Ми́ро ро́ждшую,/ вся, я́же в Горе́, оби́тели, иму́щи Боже́ственную Блюсти́тельницу,/ нечести́вых злово́ния изба́вихомся.
Припев: Пресвята́я Богоро́дице, спаси́ на́с.
Сме́рти пра́зднуем умерщвле́ние,/ а́дово разруше́ние,/ стра́нное же нечести́вых бе́гство,/ от пребыва́ния Твоего́ в Святе́й Горе́, Всенепоро́чная./ Те́мже пое́м Тя,/ Боже́ственное на́ше предста́тельство, Богоневе́стная.
Сла́ва Отцу́ и Сы́ну и Свято́му Ду́ху.
Сме́рти пра́зднуем умерщвле́ние, Христо́во Воскресе́ние,/ нечести́вых люде́й посрамле́ние и бе́гство/ и, взыгра́юще, пое́м Тя, Влады́чице,/ Еди́ну в жена́х Благослове́нную и Богоро́дицу пресла́вную.
И ны́не и при́сно и во ве́ки веко́в. Ами́нь.
Я́ко вои́стинну свяще́нный и ра́достный сей/ спаси́тельный, Боже́ственный пра́здник,/ воспомина́ние безбо́жных от нас бе́гство,/ в оньже Боже́ственное, я́ко свет, Пречи́стая, умилостивле́ние всем возсия́.
Песнь 8
Ирмос: Сей нарече́нный и Святы́й День–/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа́ во ве́ки.
Припев: Пресвята́я Богоро́дице, спаси́ на́с.
Сей нарече́нный и святы́й день,/ в о́ньже мы пое́м Цари́це пе́ние:/ неча́емых бо реши́тельница бысть нам Всенепоро́чная,/ те́мже благослови́м Сию́ во ве́ки.
Припев: Пресвята́я Богоро́дице, спаси́ на́с.
Сей нарече́нный и святы́й день,/ Воста́ния Госпо́дня и Чи́стыя Богоро́дицы,/ соде́яннаго Ею нам па́че наде́жды чу́да,/ Е́юже благослови́м Христа́ во ве́ки.
Припев: Пресвята́я Богоро́дице, спаси́ на́с.
Прииди́те, и́ночестии, и́же во Афо́не, собо́ри,/ с любо́вию благода́рственно Богоро́дицу воспое́м,/ Влады́чицу, Предста́тельницу на́шу и Храни́тельницу,/ Пита́тельницу, вра́ча и сокро́вище во ве́ки.
Припев: Пресвята́я Богоро́дице, спаси́ на́с.
Возведи́ о́крест о́чи Твои́, Чи́стая,/ и виждь ча́да Твоя́,/ лю́те сотре́нная десятиле́тним мучи́тельством Исма́иля нечести́ваго, и́же от Ага́ри,/ и сохраня́й сия́,/ Тобо́ю благословя́щая Христа́ во ве́ки.
Сла́ва Отцу́ и Сы́ну и Свято́му Ду́ху.
О́тче Вседержи́телю, и Сло́ве, и Ду́ше,/ оби́тели, и́же во Афо́не,/ сохраня́й невреди́мы от враго́в лю́таго нало́га,/ на Тя бо упова́ем и благослови́м, в них живу́щии, во ве́ки.
И ны́не и при́сно и во ве́ки веко́в. Ами́нь.
О́тче Вседержи́телю, и Сло́ве, и Ду́ше,/ Безнача́льное Существо́, Непостижи́мое Естество́, Бо́же всех,/ Твоя́ лю́ди изми́ вся́кия ско́рби/ Святы́я Богоро́дицы моли́твами.
Песнь 9
Ирмос: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.
Припев: Велича́й, душе́ моя́,/ Чи́стую Де́ву и Еди́ну Богоро́дицу/ Предста́тельницу мона́шествующих во Афо́не.
Свети́ся, свети́ся,/ Но́вый Иерусали́ме,/ и ты, Горо́ Афо́нская,/ Предста́тельница бо твоя́ ны́не/ добро́ту пе́рвую да́рует тебе́/ и тьмы отгоня́ет нечести́вых Богоневе́стная.
Припев: Велича́й, душе́ моя́,/ Ю́же велича́ют вся́ческая, Де́ву,/ и трепе́щут безбо́жных ага́рян собра́ния.
Свети́ся ны́не,/ свяще́нная Горо́ Афо́нская,/ Боже́ственная бо в тебе́ Предста́тельница Всенепоро́чная/ неве́рнаго во́инства я́же на нас ловле́ния/ ма́нием Боже́ственным разруши́, мир нам дарова́вши.
Припев: Днесь всяк чин мона́шествующих Горы́/ па́мять творя́щий благода́ти Твоея́,/ сликовству́ет, Де́во Богоро́дице.
О, Боже́ственнаго, о, любе́знаго,/ о, обеща́ния кра́снаго!/ Оби́телем бо, су́щим во Афо́не, обеща́лася еси́ бы́ти Предста́тельницею,/ Храни́тельницею и Блюсти́тельницею,/ Ю́же, ве́рнии, иму́ще наде́жду, многи́х лю́тых избавля́емся.
Припев: Днесь ра́дуется весь мона́шествующих лик/ воста́нием Христо́вым/ и па́мять твори́т Твоего́ чудесе́, Де́во.
О, Боже́ственныя и еди́ныя сла́вы Го́рния,/ ю́же наслажда́ешися, Богоро́дице Де́во, я́ко Всецари́ца,/ красу́йся про́чее и моле́ние твори́ всегда́ о Твое́м жре́бии,/ подпа́вшем злоде́йственному.
Припев: Пресвята́я Богоро́дице, спаси́ на́с.
Тебе́, Бо́га Отца́, Бо́га Сы́на и Сло́ва и Бо́га Ду́ха,/ Еди́наго в Тро́ице Бо́га/ сла́влю Еди́наго.
Сла́ва Отцу́ и Сы́ну и Свято́му Ду́ху.
О О́тче, и Сло́ве, и Боже́ственный Ду́ше и Честны́й,/ о Тро́ице, Бо́же мой,/ Боже́ственными моли́твами Твои́х слуг Афо́нския Горы́,/ нас, почита́ющих Тя, Ца́рствия Твоего́ сподо́би.
И ны́не и при́сно и во ве́ки веко́в. Ами́нь.
О Всечи́стая Отрокови́це,/ о Ма́ти, Де́во Чи́стая,/ не преста́й Го́ру Афо́нскую всегда́ покрыва́ти благода́тию Твое́ю, Влады́чице,/ и Сы́на Твоего́ о нас умилостивля́ти, Присноде́во.
Светилен
Твое́ю, Богоро́дице, благода́тию/ покрыва́еши и соблюда́еши всех, су́щих в жре́бии Твое́м,/ от наше́ствия нечести́вых/ и са́мым о́бразом Твои́м утеша́еши лю́ди Твоя́.