Канон Предпразднству Просвещения (Богоявления Господня) (2‑й)


Минея, 3 Января, Кано́н предпра́зднства

Глас 4

Песнь 1

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери/ и явлю́ся, све́тло торжеству́я,/ и воспою́, ра́дуяся, Тоя́ чудеса́. 

Припев: Сла́ва Тебе́, Бо́же наш, сла́ва Тебе́.

Бе́здны повеле́нием сотвори́в, Человеколю́бче,/ И́же зе́млю на вода́х пове́сивый, Го́споди,/ смиря́яся, предгряде́ши крести́тися ре́чными струя́ми,/ омыва́я мя от скве́рных страсте́й. 

Припев: Сла́ва Тебе́, Бо́же наш, сла́ва Тебе́.

Хоте́нием обнища́л еси́,/ самово́льно обнища́вшаго злы́ми дея́ньми мене́ обогаща́я, Христе́,/ и к вода́м предгряде́ши Иорда́нским, Креще́ния прося́, Безгре́шный. 

Сла́ва Отцу́ и Сы́ну и Свято́му Ду́ху.

Обветша́вший прегреше́ньми мир обновля́я, Человеколю́бче,/ стра́нно поро́ждение гряде́ши сотвори́ти водо́ю и Ду́хом челове́ком./ Те́мже Твое́ сла́вим явле́ние. 

И ны́не и при́сно и во ве́ки веко́в. Ами́нь.

Дави́д, Боже́ственным Ду́хом провозглаша́я, веща́ше:/ что ти есть мо́ре, я́ко побе́гло еси́?/ И ты же, я́ко возврати́лся еси́, Иорда́не,/ Христа́ ви́дев, на́га стоя́ща в тебе́? 

Песнь 3

Ирмос: Твоя́ песносло́вцы, Богоро́дице,/ живы́й и ненави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. 

Припев: Сла́ва Тебе́, Бо́же наш, сла́ва Тебе́.

Возвесели́ся, пусты́ня жа́ждущая, челове́ческое естество́ все:/ се вода́ явля́ется жи́зненная, напая́ющи тя новора́сленною благода́тию,/ Христо́с, всех обновле́ние. 

Сла́ва Отцу́ и Сы́ну и Свято́му Ду́ху.

Взыска́ти мя, ра́зумом заблу́ждшаго, предгряде́ши на во́ды, Христе́,/ в ня́же вшед, потопля́еши моя прегреше́ния/ и из глубины́ возво́диши мя вся́кия зло́бы, я́ко Благоутро́бен. 

И ны́не и при́сно и во ве́ки веко́в. Ами́нь.

Со́лнце, зре́ти Тя иму́щее, Сло́ве, обнаже́на, сокрыва́ет зари́:/ гряде́ши бо обнаже́на мя ле́стию змии́ною/ честны́м Креще́нием во оде́жду облещи́ спаси́тельную. 

Седален, глас 8

Лик проро́ческий, пропове́дуя, ра́дуется, Креще́ние Христо́во, живо́т источа́ющее./ Зове́т Иса́ия:/ почерпи́те во́ду чисти́тельную./ Пи́шет Богооте́ц:/ ка́ко от лица́ бежи́т мо́ре/ благоволе́нием спаса́ющаго Бо́га род челове́ческий?

Песнь 4

Ирмос: Неизсле́дный Бо́жий сове́т,/ е́же от Де́вы воплоще́ния Тебе́, Вы́шняго,/ проро́к Авваку́м усмотря́я, зовя́ще;/ сла́ва си́ле Твое́й, Го́споди. 

Припев: Сла́ва Тебе́, Бо́же наш, сла́ва Тебе́.

У́жасом содержи́тся не́бо и А́нгельская во́инства,/ раболе́пно Тя иду́ща, Христе́, к Твоему́ рабу́ ви́дяще и прося́ща Креще́ния. 

Припев: Сла́ва Тебе́, Бо́же наш, сла́ва Тебе́.

Иоа́нне, взыгра́й, гряде́т бо всех избавляяй Госпо́дь/ преклони́тися руце́ твое́й смире́нно,/ я́ко да смире́ннаго мя Боже́ственным вознесе́т Креще́нием. 

Сла́ва Отцу́ и Сы́ну и Свято́му Ду́ху.

Преклони́в Небеса́, сшел еси́ в Де́ву, Человеколю́бче,/ и Иоа́нну прекланя́еши верх, прося́ Креще́ния.,/ Сла́ва мно́гому благоутро́бию Твоему́. 

И ны́не и при́сно и во ве́ки веко́в. Ами́нь.

Разреша́я безме́рныя моя́, Сло́ве, плени́цы согреше́ний,/ на во́ды Иорда́нския тщи́шися приити́ и крести́тися, Влады́ко./ Сла́ва мно́гому благоутро́бию Твоему́. 

Песнь 5

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. 

Припев: Сла́ва Тебе́, Бо́же наш, сла́ва Тебе́.

Дале́че челове́чество от Бо́га бы́вшее, Сло́во Бо́жие, уще́дрив, Челове́к яви́ся,/ и Креще́нием Богоде́льным сие́ присвоя́ет боголе́пно,/ и к первообра́зному возво́дит достоя́нию. 

Сла́ва Отцу́ и Сы́ну и Свято́му Ду́ху.

Ме́ртвы бы́вшия ны преступле́ньми/ гряде́ши, Живода́вче Всеще́дрый, оживи́ти Иорда́нскими струя́ми./ Те́мже Твое́ сла́вим ве́рно ны́не явле́ние и неизрече́нную ми́лость. 

И ны́не и при́сно и во ве́ки веко́в. Ами́нь.

Диви́тся вся́ка душа́, помышля́ющи Твое́, Сло́ве, стра́шное смотре́ние:/ ка́ко, назда́ти вся хотя́, гряде́ши вни́ти в ре́чныя струи́ обнаже́н,/ И́же све́том одева́яйся. 

Песнь 6

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ приидите, рука́ми воспле́щим,/ от Нея́ ро́ждшагося, Бо́га сла́вим. 

Припев: Сла́ва Тебе́, Бо́же наш, сла́ва Тебе́.

И́же во тьме дре́вле седя́щии Свет прише́дш зря́ще, ра́дости испо́лнитеся:/ се яви́ся Госпо́дь, Иорда́нскими струя́ми оде́ян. 

Сла́ва Отцу́ и Сы́ну и Свято́му Ду́ху.

Ка́ко у́зрит Тя, иду́ща, Предте́ча, Спа́се,/ и прося́ща Боже́ственнаго Креще́ния?/ Ка́ко Тя во́ды прии́мут Иорда́нския,/ Во́ду су́щу оставле́ния? 

И ны́не и при́сно и во ве́ки веко́в. Ами́нь.

Да кропя́т, веселя́щеся, о́блацы мы́сленное ра́дование:/ се прии́де крести́тися Госпо́дь,/ разоря́я те́мныя о́блаки серде́ц на́ших. 

Кондак, глас 4

Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

Икос

Не истязу́ю тя, Крести́телю, преде́лы преходи́ти,/ не глаго́лю тебе:/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния:/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От о́ных у́бо ни еди́н я́ве Мя ви́де,/ но во о́бразех, и се́нех, и гада́ниих,/ ты же пред тобо́ю стоя́ща ви́дел еси́,/ спасти́ бо приидо́х Ада́ма первозда́нного.

Песнь 7

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. 

Припев: Сла́ва Тебе́, Бо́же наш, сла́ва Тебе́.

Сокруше́на мя прегреше́ньми и лежа́ща во тьме, Го́споди, преступле́ния,/ поми́ловав, уще́дрил еси́ за благосты́ню/ и в вода́х Иорда́нских, Влады́ко, гряде́ши крести́тися. 

Сла́ва Отцу́ и Сы́ну и Свято́му Ду́ху.

Что́ стра́нное сие́ виде́ние? -/ возопи́ша А́нгельстии чи́ни:/ езе́ра и ре́ки сотвори́вый веле́нием Иорда́нскими струя́ми гряде́т оде́ятися,/ си́ми бо Ада́ма обновля́ет. 

И ны́не и при́сно и во ве́ки веко́в. Ами́нь.

Высота́ неизрече́нна и глубина́ неизме́рна есть, Влады́ко, смотре́ния Твоего́,/ вся́ко преходя́ ума́ постиже́ние:/ ка́ко водо́ю и Всесвяты́м Ду́хом земны́я очища́еши? 

Песнь 8

Ирмос: Отроки благочести́выя в пещи́/ Рождество́ Богоро́дичо спасло́ есть,/тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. 

Припев: Сла́ва Тебе́, Бо́же наш, сла́ва Тебе́.

Глас Роди́телей с высоты́ Сы́на свиде́тельствует Единосу́щна, входя́ща в во́ды/ и благослове́ние Твое́ сим предпосыла́юща, Благослове́нне Христе́,/ и Дух Тя Святы́й всем пропове́дует Бо́га воплоще́нна. 

Припев: Сла́ва Тебе́, Бо́же наш, сла́ва Тебе́.

Лику́й, тва́ре, уви́девши Бо́жие свято́е явле́ние,/ А́нгели, по́йте,/ мо́ре, весели́ся, езе́ра и исто́чницы, взыгра́йте,/ и ре́ки, та́йно восплещи́те пе́сньми:/ предста́ благослове́ньми вас Христо́с просвеща́яй. 

Сла́ва Отцу́ и Сы́ну и Свято́му Ду́ху.

Пое́м Го́споду во хвале́нии, я́вльшемуся на вода́х,/ и сокруше́ние на́ше си́ми обно́вльшему,/ и главы́ сте́ршему неви́димых враго́в, и воззове́м:/ по́йте, дела́, Го́спода и превозноси́те Его́ во вся ве́ки. 

И ны́не и при́сно и во ве́ки веко́в. Ами́нь.

О, чу́до чуде́с!/ Ка́ко, вся́кая тва́ри вы́шши, Бог наш зи́ждется/ и обновля́ется от Богороди́тельницы, и обновля́ет во́лею,/ и назида́ет нас водо́ю и Ду́ха обновле́нием чу́дным,/ Еди́ный Благоде́тель? 

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжествуе́т же безпло́тных умо́в естество́,/ почита́ющее свяще́нное торжество́ Богома́тери и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. 

Припев: Сла́ва Тебе́, Бо́же наш, сла́ва Тебе́.

Се А́гнец взе́мляй прегреше́ния челове́чества,/ прии́де и предста́ к рабу́, прося́ Креще́ния,/ раболе́пно предстои́т свободи́ти ища́й порабоще́нныя ны от льсти́ваго/ и добро́ту пе́рвую погу́бльшия. 

Припев: Сла́ва Тебе́, Бо́же наш, сла́ва Тебе́.

Яви́ся я́вственно Бог, воплоща́емь за бла́гость,/ и Иорда́нскими оде́ятися гряде́т вода́ми, одева́яй Не́бо о́блаки вои́стинну:/ Сего́ вси ны́не предпра́зднуим честно́е ра́достию явле́ние. 

Припев: Сла́ва Тебе́, Бо́же наш, сла́ва Тебе́.

Взыгра́й ра́достно и предугото́вися подъя́ти во́ду теку́щую, о Иорда́не, в ве́чную жизнь;/ ре́ки, лику́йте, ви́дяще ны́не пи́щнаго Пото́ка,/ во струи́ Иорда́нския входя́ща и зло́бы излия́ние изсуша́юща. 

Сла́ва Отцу́ и Сы́ну и Свято́му Ду́ху.

Озари́ся нам день спаси́тельный, в нощи́ лю́тых всегда́ спя́щим,/ и́бо предста́ Христо́с Госпо́дь, пра́вды Со́лнце сый и разумева́емый,/ подклони́ти главу́ Свою́ рабу́ и пло́тию крести́тися во́лею. 

И ны́не и при́сно и во ве́ки веко́в. Ами́нь.

Ужаса́ются Херуви́ми и все Небе́сное естество́, Всенепоро́чная,/ па́че постиже́ния Честна́го Твоего́ Рождества́,/ уподо́бльшагося нам за благоутро́бие неизглаго́ланное и кре́щшагося пло́тию,/ Его́же Боже́ственное вси явле́ние пра́зднуем ны́не, ра́дующеся. 

Светилен

Вифлее́м оста́вивше, пресла́вное чу́до, ко Иорда́ну теце́м душе́ю те́плою/ и та́мо у́зрим стра́шное та́инство:/ боголе́пно бо предста́, обнажи́вся, Христо́с мой,/ одева́я мя во о́дежду Небе́снаго Ца́рствия.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Вифлее́м оста́вивше, пресла́вное чу́до, ко Иорда́ну теце́м душе́ю те́плою/ и та́мо у́зрим стра́шное та́инство:/ боголе́пно бо предста́, обнажи́вся, Христо́с мой,/ одева́я мя во о́дежду Небе́снаго Ца́рствия.

«Азбука молитвы»
в Telegram.
t.me/azprayer