Минея, 7 Октября.
Глас 2
Песнь 1
Ирмос: Во глубине́ постла́ иногда́/ фараони́тское всево́инство преоруже́нная си́ла,/ Вопло́щшееся же Сло́во всезло́бный грех потреби́ло есть,/ препросла́вленный Господь, славно бо просла́вися.
Припев: Преподо́бне о́тче Се́ргие, моли́ Бо́га о на́с.
Тленная яже на земли оставив, востече́ к Небе́сным обителем,/ Престо́лу всех Владыки предстои́ши,/ Емуже о нас моли́ся, преподо́бне Сергие, восхваляющих при́сно па́мять твою́.
Припев: Преподо́бне о́тче Се́ргие, моли́ Бо́га о на́с.
От ю́ности Бо́гови освятися, преподо́бне,/ и к Нему́ приближаяся доброде́тельми, полки́ бесо́вския потребил еси́,/ но и ны́не отгоня́еши нечистыя ду́хи от человек, молящихтися с верою.
Сла́ва Отцу́ и Сы́ну и Свято́му Ду́ху.
Я́ко крин, в пустыне Дави́дски процве́л еси́, преподо́бне,/ оби́тель яви́ся Пресвятому Духу и сего ра́ди славна показа тя вселенней,/ у Негoже нам испроси́ оставле́ние прегрешением нашим, тя, преподо́бне, восхваляющим.
И ны́не и при́сно и во ве́ки веко́в. Ами́нь.
Богородичен: Всесвятая Богоро́дице, Соде́теля и Спа́са всех рождши, поющим Тя,/ спаси́ град Свой и оби́тель Свою,/ не престай моля́щи за ны Сы́на Своего́ и Бо́га на́шего.
Песнь 3
Ирмос: Процвела есть пустыня, я́ко крин, Го́споди,/ языческая неплодящая Церковь/ пришествием Твоим,/ в нейже утвердися мое сердце.
Припев: Преподо́бне о́тче Се́ргие, моли́ Бо́га о на́с.
Я́ко фи́ник, процвете во юдо́ле плаче́вне,/ в месте, идеже источники слез проливая,/ возраста́я Ду́хом Святы́м,/ от Него же незави́стная чудеса́ подаваеши нам.
Припев: Преподо́бне о́тче Се́ргие, моли́ Бо́га о на́с.
Не восхоте́ славы сия́ тленныя, но взыску́я Небесныя/ и сего ради оставль вся, в пустыню вселися,/ постом и моли́твами угождаше Бо́гови/ и сего ради прият от Него нетленную почесть трудов своих.
Сла́ва Отцу́ и Сы́ну и Свято́му Ду́ху.
Тесный и прискорбный путь на земли ше́ствовавше, Богомудре,/ простра́нствия онаго Небе́снаго достигл еси́,/ отнюдуже с верою приходящим ти источаеши чудеса́ преславная.
И ны́не и при́сно и во ве́ки веко́в. Ами́нь.
Богородичен: Спасение Тя на вся́ко время и место призываю,/ не пре́зри мене́, Всенепоро́чная,/ Яже Бо́га рождшая, Изба́вителя, вку́пе и Спа́са моего.
Седален, глас 4
Житейских молв удалися в пустыню, Го́спода, избавльшаго тя от лют, преподо́бне, при́сно чая,/ и Тому прилепися, жизнь А́нгельскую на земли поживе́ с плотию/ и сего ради приял еси́ нестареющееся блаженство,/ в немже ны́не водворяяся, поминай нас, чту́щих пресвятую па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Пречи́стеи руце Твои, Богоро́дице, Де́во Мати, просте́рши,/ покрый уповающия на Тя, Сыну Твое́му зовущия,/ всем же подай милости Твоя́.
Песнь 4
Ирмос: Пришел еси́ от Девы не ходатай, ни А́нгел,/ но Сам, Го́споди, воплощся,/ и спасл еси́ всего мя человека./ Тем зову Ти: сла́ва си́ле Твое́й, Го́споди.
Припев: Преподо́бне о́тче Се́ргие, моли́ Бо́га о на́с.
Я́ко птищ, обрете себе пусты́ню безмолвия,/ в нейже подвизася, в слезах и умилении препроводи жизнь свою,/ те́мже свету и радости о́ноя сын бысть, моли́ о чту́щих тя.
Припев: Преподо́бне о́тче Се́ргие, моли́ Бо́га о на́с.
Я́ко жив, с нами водворяяся,/ тако и ны́не, с преподобными Влады́це предстоя,/ моли́ избавитися всем всякаго гнева, и прещения,/ и будущаго грешных томления.
Сла́ва Отцу́ и Сы́ну и Свято́му Ду́ху.
Стадо, еже стяжа́ труды своими, отче,/ не остави, но посещай я́ко отец чадолюбив,/ всем же, притекающим к чудотворным твои́м моли́твам,/ подаждь согреше́нием разрешение.
И ны́не и при́сно и во ве́ки веко́в. Ами́нь.
Богородичен: Евина клятва упразднися Тобою, Богомати Всенепоро́чная,/ Воплоще́нно Слово родила еси́ Присносу́щное,/ И́же благословеньми мир венчавшаго.
Песнь 5
Ирмос: Ходатай Бо́гу и человеком был еси́, Христе́ Боже;/ Тобо́ю бо, Влады́ко, к Светоначальнику Отцу́ Твое́му/ от но́щи неве́дения/ приведе́ние и́мамы.
Припев: Преподо́бне о́тче Се́ргие, моли́ Бо́га о на́с.
Ум свой к Бо́гу впери́в, вся, яже на земли сущая, преоби́дел еси́/ и сего ради, водворяяся ны́не во обителех Небесных,/ подавай нам при́сно спасе́ние и избавление,/ да вси тя, блаже́нне, воспеваем присно.
Припев: Преподо́бне о́тче Се́ргие, моли́ Бо́га о на́с.
Светлость жити́я твоего, преподо́бне Се́ргие, всех просвещает,/ слепым прозрение, хромым течение дарует,/ всем же, празднующим пресвятую па́мять Твою́, от грех разрешение.
Сла́ва Отцу́ и Сы́ну и Свято́му Ду́ху.
Потоки сле́зныя гаси́ло стяжа стра́стных разгорений,/ огнем же любве́ Бо́жия росе́ совокупи́ся безстрастия,/ Христу́ Бо́гу нашему,/ Емуже непрестанно о нас моли́ся, подавай нам ве́лию ми́лость.
И ны́не и при́сно и во ве́ки веко́в. Ами́нь.
Богородичен: Се во чреве, Богоро́дице Пречистая,/ Христа́ Бо́га па́че слова имела еси́, я́коже Исаия предъизрече́,/ па́че естества́ бо Сего, Богородительнице, родила еси́.
Песнь 6
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Преподо́бне о́тче Се́ргие, моли́ Бо́га о на́с.
От ю́ности, блаже́нне, имел еси́ житие свое́ чисто и того ради Пречистому Влады́це прилепи́ся,/ предстои́ши ны́не со А́нгельскими лики,/ при́сно источа́еши преславная чудеса́ и исцеления/ с верою приходящим к тебе́.
Припев: Преподо́бне о́тче Се́ргие, моли́ Бо́га о на́с.
Всякаго навета вражия избавити потщися,/ я́ко да твою́ всесвяту́ю па́мять светло празднуем.
Сла́ва Отцу́ и Сы́ну и Свято́му Ду́ху.
В пустыни безмолвия единствующу ти, Богоносе,/ лукавый враг злонравных разбойник на тя воображает, хотя изловити Боголюбивую твою́ душу,/ Бог же внят молитве твое́й/ победити того и ловления его.
И ны́не и при́сно и во ве́ки веко́в. Ами́нь.
Богородичен: Во утробу Твою́ вселися/ и, все человеческое существо восприим, обожи́, Чи́стая,/ преподобных множество священное привлече́.
Кондак, глас 8
Я́ко звезда пресветлая, от Святыя Горы провозшедши,/ добро́ты чудес твои́х весь просветил мир,/ Христов бо крест взем, последова Ему,/ в пустынном озлобле́нии, в моли́твах же и пощениих,/ во бде́ниих же и злостраданиих изнурив плоть свою,/ тем и Христос даром чудес одари́ тебе́,/ Емуже о нас моля́ся, посещай чад своих, да зовем ти:/ ра́дуйся, Сергие о́тче наш, пустынный жителю.
Икос
Закону Божию повину́яся, от младе́нства путем прискорбным, блаже́нне, шествовал еси́,/ вся бо, яже в мире сладкая и красная, преобидев, вселися в пустыню,/ в ней же крест свой взят, распя себе ми́рови, и мир тебе́ бысть ра́спят./ Темже от всех слышаще:/ ра́дуйся, я́ко презрел еси́ текущая и тленная;/ ра́дуйся, я́ко, Богом наставляем, пустыню достигл еси́;/ ра́дуйся, я́ко в Нем подвизався, Бо́гу угодил еси́ и врага победил еси́;/ ра́дуйся, я́ко собра ученик ста́до, имиже и доны́не Бог прославляем есть;/ ра́дуйся, я́ко пресве́тлым житием свои́м святы́х А́нгел удиви́ и человек по́льзова;/ ра́дуйся, я́ко на Небеси со А́нгелы ликовствуе́ши, Троице предстоя, и о нас мо́лишися;/ ра́дуйся, источниче чудесем неисчерпаемым;/ ра́дуйся, Сергие о́тче наш, пустынный жителю.
Песнь 7
Ирмос: Богопроти́вное веле́ние беззако́ннующаго мучи́теля/ высо́к пламень вознесло́ есть,/ Христос же простре́ Богочести́вым отроко́м ро́су духо́вную,/ Сый благословен и препрославлен.
Припев: Преподо́бне о́тче Се́ргие, моли́ Бо́га о на́с.
Сердце стяжа́в чисто, вмести́лище бысть Свята́го Духа,/ и сего ради многоцеле́бныя ти мощи святыя/ источник исцелений изливают поющим:/ отец на́ших Бо́же, благослове́н еси́.
Припев: Преподо́бне о́тче Се́ргие, моли́ Бо́га о на́с.
Молитвенника Ти, Владыко, приводим преподо́бнаго Сергия,/ тем просяще от грех свободи́тися/ и Твоим всеору́жием сохране́ным бы́ти от наве́т вражиих.
Сла́ва Отцу́ и Сы́ну и Свято́му Ду́ху.
Плотско́е взыгра́ние воздержа́нием увяди́л еси́, блаже́нне,/ тем пастырь показа́ся Боголюбе́знаго ти ста́да,/ о немже не преста́й моляся Христу́ Бо́гу.
И ны́не и при́сно и во ве́ки веко́в. Ами́нь.
Богородичен: Святых Свята́го, И́же во святы́х Почивающаго, свято породи́ла еси́, Де́во Всенепоро́чная,/ за милосердие многое Человека бывша,/ из Тебе́ воплощенна прежде Безплотнаго.
Песнь 8
Ирмос: В пещь о́гненную ко отроко́м евре́йским снизше́дшаго/ и пламень в ро́су прело́жшаго Бога,/ пойте дела́ я́ко Го́спода,/ и превозноси́те во вся ве́ки.
Припев: Преподо́бне о́тче Се́ргие, моли́ Бо́га о на́с.
Твердым помыслом на ра́мо крест взем, последова Христу́ я́ко инок преблаг,/ и сего ради благода́ть твоя́ изливает преславная чудеса/ благоче́стно Христа́ славословящим, блаже́нне Сергие.
Припев: Преподо́бне о́тче Се́ргие, моли́ Бо́га о на́с.
Утверждься крепостию Духа, всю вражию си́лу смирил,/ кре́пость и победи́тель быв,/ верных души просвещаеши Божественными чудесы и знаменьми.
Сла́ва Отцу́ и Сы́ну и Свято́му Ду́ху.
Подвигом Божественным, отче, в пусты́ни подвизася/ и сего ради предлежит тебе́, преподо́бне, добраго делания венец,/ тем Христу́ моляся не престай о и́же верою чту́щих тя.
И ны́не и при́сно и во ве́ки веко́в. Ами́нь.
Богородичен: Уныл имея помысл и душу, сластьми отягчену,/ к Тебе́ прибегаю, Богородительнице Чи́стая, вопию Ти:/ воздвигни и спаси́ у́бо мя, отчаяннаго и осужденнаго.
Песнь 9
Ирмос: Безнача́льна Роди́теля Сын, Бог и Господь,/ вопло́щся от Де́вы нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Припев: Преподо́бне о́тче Се́ргие, моли́ Бо́га о на́с.
На горы святы́х заповедей восте́к, я́коже Моисей древле,/ тем Христа́ зриши ны́не яве, я́ко и́же в купине он,/ отнюду источаеши нам, я́ко миро благода́тное, животворныя воды исцелений.
Припев: Преподо́бне о́тче Се́ргие, моли́ Бо́га о на́с.
Манове́нием Боже́ственным удобряем, Сергие,/ страсти всякия бысть непричастен и безстрастием, я́ко во одежду, облечеся,/ тем и ны́не пречистому Све́ту причащаяся, поминай нас, верно блажащих тя.
Сла́ва Отцу́ и Сы́ну и Свято́му Ду́ху.
Освященный сосу́де Христа́ Бо́га на́шего,/ А́нгелом собеседниче и преподобным единокровниче и праведным,/ приими́ сие, и́же от недостойных уст приносимое,/ испроси от грех моих избавление.
И ны́не и при́сно и во ве́ки веко́в. Ами́нь.
Богородичен: Светоносну дверь Тя предзрящи Иезекииль,/ Еюже про́йде Свет Истинный, Христос Бог наш,/ Егóже прилежно моли́, Чи́стая, покаяния ми дверь отверзти, молюся.
Светилен
Мирска́го веселия я́ко от скверны уклонился еси́,/ постом и моли́твами плоть увя́дил,/ души своей кре́пость, преподо́бне, обновил еси́,/ славою обогатился еси́ Небесною, славне,/ те́мже моля не престай о нас Го́спода.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Воистину Тя, Богоро́дице, исповедуем, Влады́чице,/ и́же Тобо́ю спасшиися,/ и Бо́га неизреченно родила еси́, разоршаго Крестом смерть,/ к Себе же привлекши преподобных соборы,/ с ними же Тя восхваляем, Де́во.