Минея, 9 Мая, Кано́н
Глас 8
Песнь 1
Ирмос: Внеза́пу дре́вле мо́ре Изра́иль,/ я́ко в пусты́ни, ного́ю пра́шною32 проше́д, вопия́ше:/ Го́сподеви Бо́гу на́шему, кре́пкому в бране́х, пои́м песнь но́вую.
Припев: Преподо́бне о́тче Ши́о, моли́ Бо́га о на́с.
Осени́ твое́ю благода́тию от сокро́вищ Госпо́дних,/ и́хже прия́л еси́ бога́тно,/ во е́же плод усте́н мои́х жела́нием ду́ха принести́ ти, Ши́о.
Припев: Преподо́бне о́тче Ши́о, моли́ Бо́га о на́с.
Десни́ца Госпо́дня пома́за тя,/ Его́же Дух даде́ ти жизнь/ и наста́ви тя позна́ти испыта́ния та́инств Его́ и храни́ти за́поведи Его́,/ и́хже в свя́тости соблю́л еси́, Ши́о.
Припев: Преподо́бне о́тче Ши́о, моли́ Бо́га о на́с.
Я́коже А́вель, пе́рвыя плоды́ прине́сл еси́ Го́споду,/ дух и ра́зум со все́ю пра́вдою,/ да яви́шися побо́рник с пе́рвыми, треблаже́нный о́тче Ши́о.
Сла́ва Отцу́ и Сы́ну и Свято́му Ду́ху.
Ны́не, обстоя́ще ра́ку моще́й твои́х, преподо́бне Ши́о,/ про́сим тя умоли́ти Бо́га,/ воздежи́ святы́я ру́це твои́ и вознеси́ Ему́ на́ша моле́ния.
И ны́не и при́сно и во ве́ки веко́в. Ами́нь.
Богородичен: Сло́ва О́тчаго селе́ние, Мари́е,/ Тобо́ю бо Челове́ком Бог среди́ челове́ки яви́ся,/ Всесвята́я Богоро́дице, бу́ди ми́лостива к нам, Тебе́ покланя́ющимся.
Песнь 3
Ирмос: Утвержде́й, Сло́ве, Небеса́ сло́вом,/ утверди́ наш ум и се́рдце,/ во е́же сла́вити Тя, Спа́са душ на́ших.
Припев: Преподо́бне о́тче Ши́о, моли́ Бо́га о на́с.
Ено́ха Бог просла́ви, и сей преста́вися во сла́ве еди́ножды;/ ты же, ди́вне, ки́йждый день преставля́лся еси́, сме́ртный час во уме́ помышля́я,/ и сло́вом Бо́жиим спаса́лся еси́.
Припев: Преподо́бне о́тче Ши́о, моли́ Бо́га о на́с.
Я́коже Но́я, пра́ведна тя обре́те Бог/ и яви́ отца́ тя втора́го ми́ра, блаже́нне,/ И́же спасе́ лю́ди ковче́гом,/ и тогда́ уте́рянных подвиго́в Новозда́тель благовести́ тя ми́ру голуби́цею.
Припев: Преподо́бне о́тче Ши́о, моли́ Бо́га о на́с.
Си́мово благослове́ние и благу́ю часть прия́л еси́, о Ши́о досто́йне,/ оте́ческим разделе́нием разда́л еси́ нам, сыно́м твои́м,/ при́сно лику́ющим изоби́лием уче́ний твои́х, о́тче.
Сла́ва Отцу́ и Сы́ну и Свято́му Ду́ху.
Упова́я на тя, тве́рдаго моли́твенника и защи́тника, да не постыди́мся,/ дерзнове́ние бо и́маши пред Бо́гом, о сла́вный о́тче,/ приими́ я́ко же́ртву на́ша моли́твы и испроси́ у Христа́ Бо́га нам ве́лию ми́лость.
И ны́не и при́сно и во ве́ки веко́в. Ами́нь.
Богородичен: Сла́внейшая всех Ма́ти Бо́жия, Ра́досте ми́ра,/ принося́щия ве́рно же́ртву Бо́гу и испове́дующия Тя Богоро́дицу/ осени́ Твое́ю благода́тию и моли́твы на́ша испра́ви ко Го́споду.
Песнь 4
Ирмос: Услы́шах, Го́споди, слух Твой и убоя́хся,/ разуме́х неизрече́нное Твое́ смотре́ние/ и просла́вих, Сло́ве, снизхожде́ние Твое́.
Припев: Преподо́бне о́тче Ши́о, моли́ Бо́га о на́с.
Я́коже Авраа́м, услади́лся еси́ хва́льным отше́льничеством,/ и Бог посети́ тя, Ши́о,/ и обетова́ния Его́ удосто́ился еси́,/ и препо́дал еси́ Его́ благослове́ние умноже́нию пото́мства.
Припев: Преподо́бне о́тче Ши́о, моли́ Бо́га о на́с.
Я́коже Исаа́к, ди́вною си́лою свя́зан бысть ра́ди же́ртвы всесожже́ния Бо́гу,/ возве́л еси́ горе́ ра́зум твой,/ отоню́дуже и получи́л еси́ му́дрость.
Сла́ва Отцу́ и Сы́ну и Свято́му Ду́ху.
О́тче, предста́телю и моли́твенниче, непоколеби́мый Ши́о,/ вознеси́ моле́ния чад твои́х Ми́лостивому Бо́гу/ и испроси́ нам ве́лию ми́лость.
И ны́не и при́сно и во ве́ки веко́в. Ами́нь.
Богородичен: Вы́шшая небе́с Ты еси́, Всесвятая Влады́чице, Ма́ти Бо́жия,/ ка́ко хвали́ти Тя земны́м язы́ком?/ То́кмо жела́нием хва́лим Тебе́, Де́во.
Песнь 5
Ирмос: У́тренююще к Тебе́, Человеколю́бцу,/ воспева́ем Тя, Христе́ Бо́же,/ да́руй нам ми́лости Твоя́.
Припев: Преподо́бне о́тче Ши́о, моли́ Бо́га о на́с.
Целому́дрие и свя́тость Ио́сифову услади́л еси́/ и разшири́л еси́ попра́нием еги́петских су́етных страсте́й/ и раздели́л еси́ хлеб пра́вды, Ши́о.
Припев: Преподо́бне о́тче Ши́о, моли́ Бо́га о на́с.
Уподо́бися Моисе́ю любо́вию к бра́тии и ученико́м,/ егда́ умертви́л еси́ еги́петскую не́нависть/ и па́стве твое́й дал еси́ пи́ти от исто́чника жи́зни, Богоподо́бне.
Сла́ва Отцу́ и Сы́ну и Свято́му Ду́ху.
Бо́га узре́л еси́ в же́стости жи́зни, я́ко в купине́,/ и запеча́тал еси́ в се́рдцы свое́м/ Бо́гом пи́санную скрижа́ль, Богому́дре о́тче.
И ны́не и при́сно и во ве́ки веко́в. Ами́нь.
Богородичен: От Тебе́ рожде́ннаго Христа́ Бо́га моли́ о нас, Богома́ти,/ сохрани́ти лю́ди Твоя́,/ испове́дающия Тя и покланя́ющияся о́бразу Твоему́.
Песнь 6
Ирмос: Я́ко Ио́ну проро́ка от ки́та возве́л еси́, Го́споди,/ изба́ви мя от лови́твы чужда́го/ и спаси́ мя, Ще́дре, я́ко Многоми́лостив.
Припев: Преподо́бне о́тче Ши́о, моли́ Бо́га о на́с.
Ааро́н Бо́жественным огне́м небе́сным священножря́ше,/ ты же сугу́бо приноси́л еси́ Бо́гу/ пла́мень стра́ха Бо́жия, тобо́ю одушевле́нный, жела́нный Ши́о.
Припев: Преподо́бне о́тче Ши́о, моли́ Бо́га о на́с.
Финее́су уподо́бися, ре́вностию ко Христу́ испо́лненный,/ и порази́л еси́ копие́м жела́ния велиа́ра возста́вшая,/ велича́емый о́тче Ши́о.
Сла́ва Отцу́ и Сы́ну и Свято́му Ду́ху.
По стопа́м Илии́ ше́ствуя и ре́вность того́ восприя́в,/ возлюби́л еси́ пусты́ню, я́ко той, порази́в служи́телей Ваа́ла,/ и пра́вде Госпо́дней сле́довал еси́.
И ны́не и при́сно и во ве́ки веко́в. Ами́нь.
Богородичен: Упова́ние тве́рдое и непоколеби́мое Ты еси́ ве́рным, о Ма́ти Бо́жия,/ к Тебе́ прибега́ющия спаси́ от бед ны́нешних и гряду́щих.
Кондак, глас 4
Житие́ твое́ служе́нием Госпо́дним испра́вил еси́/ и, взем крест, оста́вил еси́ вся жите́йская,/ красото́ пусты́ни, преподо́бне Ши́о./ Кого́ убо па́че тя, и по сме́рти жи́ва су́ща/ страна́ И́верская почита́ет/ и мощми́ твои́ми, от гро́ба явле́нными услажда́ется,/ те́мже не преста́й моля́ся о нас ко Го́споду.
Песнь 7
Ирмос: От Иуде́и доше́дше, о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Припев: Преподо́бне о́тче Ши́о, моли́ Бо́га о на́с.
Я́коже на Елиссе́я,/ сугу́бо на́йде на тя дух проро́чества и чудотворе́ния,/ вели́кий Ши́о, слуго́ Госпо́день.
Припев: Преподо́бне о́тче Ши́о, моли́ Бо́га о на́с.
Я́коже Дании́л, от ю́ности испо́лнися Ду́ха Бо́жия,/ И́же соде́ла тя судие́ю зако́на ду́ха ра́ди изнуре́ния пло́ти,/ и, я́ко той, и ты покори́ зве́ри.
Сла́ва Отцу́ и Сы́ну и Свято́му Ду́ху.
Иереми́и и Иса́ии подража́л еси́, о́тче:/ о́вому – низхожде́нием в гроб во́лею и ско́рбию жела́нною,/ о́вому же – досто́йным возвыше́нием.
И ны́не и при́сно и во ве́ки веко́в. Ами́нь.
Богородичен: Вочелове́чся во́лею от Тебе́,/ спасл есть Госпо́дь всю вселе́нную,/ Мари́е, Всесвята́я Мати Бо́жия,/ и дарова́ Тя нам отра́ду, гре́шным, Всепе́тая.
Песнь 8
Ирмос: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.
Припев: Преподо́бне о́тче Ши́о, моли́ Бо́га о на́с.
Я́коже Самуи́л, Ду́хом бысть зрим и царе́й пома́заше, о́тче,/ вооружи́выйся свои́м уче́нием и бо́дренными моли́твами,/ чудотво́рче Ши́о, Иве́рии свети́ло.
Припев: Преподо́бне о́тче Ши́о, моли́ Бо́га о на́с.
Дави́ду уподо́бися непоро́чностию и прямоду́шием/ и уби́ Голиа́фа страсте́й мета́нием камне́й смире́ния, Боговенча́нный Ши́о,/ и спасл еси́ от сме́рти твоя́ послу́шники.
Сла́ва Отцу́ и Сы́ну и Свято́му Ду́ху.
Соломо́нову му́дрость обре́те, досто́йне,/ и Бо́гу моли́твенный храм созда́л еси́ в телесе́ свое́м,/ и красото́ю ду́ха твоего́ украси́л еси́,/ во е́же велича́ти Святу́ю Тро́ицу во ве́ки.
И ны́не и при́сно и во ве́ки веко́в. Ами́нь.
Богородичен: Ма́ти Бо́жия, Помо́щнице и Покрови́тельнице моля́щихся Тебе́,/ услы́ши моле́ния на́ша, раб Твои́х, и принеси́ ко Христу́,/ да спасе́т нас от бед, скорбе́й и страда́ний.
Песнь 9
Ирмос: Чи́стую сла́вно почти́м, лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.
Припев: Преподо́бне о́тче Ши́о, моли́ Бо́га о на́с.
Я́коже Иоа́нн Крести́тель, по стопа́м его́ ше́ствуя,/ яви́лся еси́ в пусты́ни А́нгел, пропове́дник покая́ния,/ омыва́я слеза́ми ду́ши, я́дом поро́ка поврежде́нныя,/ пра́вило доброде́телей, Ши́о.
Припев: Преподо́бне о́тче Ши́о, моли́ Бо́га о на́с.
Узре́ша вселе́нскаго наста́вника тя,/ Христо́вым апо́столом и ученико́м подо́бна,/ безчи́сленное бо мно́жество люде́й призва́л еси́ рабо́тати Го́споду,/ па́дшия возставля́я, стоя́щия утвержда́я,/ и вся вку́пе приве́л еси́ Богу.
Сла́ва Отцу́ и Сы́ну и Свято́му Ду́ху.
Я́коже страстоте́рпец и му́ченик подвиза́лся еси́, о́тче,/ и украси́л еси́ ликостоя́ния преподо́бных, я́ко глава́ их,/ всех осия́л еси́, Бо́жие достоя́ние,/ защи́тник всем бу́ди, о Ши́о.
И ны́не и при́сно и во ве́ки веко́в. Ами́нь.
Богородичен: О благода́тная Мари́е, Мати Бо́жия, упова́ние всех христиа́н,/ укрепи́ му́жеством ве́рныя проти́ву ага́рян/ и лю́ди Твоя́ и град Твой спаси́ от вся́каго зла.