Молитва Святому Духу
Царю́ Небе́сный, Уте́шителю, Ду́ше И́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́ и очи́сти ны́ от вся́кия скве́рны, и спаси́, Бла́же, ду́ши на́ша.
Трисвятое
Святы́й Бо́же, Святы́й Кре́пкий, Святы́й Безсме́ртный, поми́луй на́с (читается трижды, с крестным знамением и поясным поклоном).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Молитва ко Пресвятой Троице
Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, И́мене Твоего́ ра́ди.
Го́споди, поми́луй (трижды).
Сла́ва, и ны́не[1].
Молитва Господня
О́тче на́ш, И́же еси́ на Небесе́х! Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.
Го́споди поми́луй (12 раз). Сла́ва, и ны́не.
Прииди́те, поклони́мся Царе́ви на́шему Бо́гу. Прииди́те, поклони́мся и припаде́м Христу́, Царе́ви на́шему Бо́гу. Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 142
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Яко погна́ враг ду́шу мою, смири́л есть в зе́млю живо́т мой; посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ мо́я, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь, во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой; Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Припев: Бог Госпо́дь и яви́ся нам, благослове́н Гряды́й во и́мя Госпо́дне.
Стих 1: Испове́дайтеся Го́сподеви, я́ко Благ, я́ко в век ми́лость Его.
Припев: Бог Госпо́дь и яви́ся нам, благослове́н Гряды́й во и́мя Госпо́дне.
Стих 2: Обыше́дше обыдо́ша мя и и́менем Госпо́дним противля́хся им.
Припев: Бог Госпо́дь и яви́ся нам, благослове́н Гряды́й во и́мя Госпо́дне.
Стих 3: Не умру́, но жив бу́ду и пове́м дела́ Госпо́дня.
Припев: Бог Госпо́дь и яви́ся нам, благослове́н Гряды́й во и́мя Госпо́дне.
Стих 4: Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей и есть ди́вен во очесе́х на́ших.
Припев: Бог Госпо́дь и яви́ся нам, благослове́н Гряды́й во и́мя Госпо́дне.
Тропари, глас 4-й
Кто возмо́гл бы изрещи́, Богоро́дице,/ Cла́достное лобза́ние,/ стра́нная чуде́с Твоих/ чу́дныя ико́ны Твоея́,/ ди́вная и стра́шная?/ Всех бо исцеля́еши/ от лю́тых боле́зней,/ ско́ро предваряющи/ призыва́ющих Тя ве́рою./ Но и ны́не нас от лю́тых, предста́тельствы Твои́ми,/ спаси́, мо́лимся.
Слава: Не возмо́жем, чи́стая Богоро́дице,/ чудеса́ Твоя пе́ти по достоя́нию,/ аще не Ты дарова́ла бы по́мощь,/ кто бы нас изба́вил от тя́жких бед?/ Кто бы и очище́ние душа́м дарова́л?/ Не уда́лимся никогда́ от Тебе́,/ сла́достно лобза́ющая,// Тобо́ю бо спаса́емся.
И ныне: Не умолчи́м никогда́, Богоро́дице,/ си́лы Твоя глаго́лати, недосто́йнии:/ aще бо Ты не бы предстоя́ла моля́щи,/ кто бы нас изба́вил от тя́жких бед,/ кто же бы сохрани́л до ны́не свобо́дны?/ Не отсту́пим, Влады́чице, от Тебе:// Твоя бо рабы́ спаса́еши при́сно от вся́ких лю́тых.
Псалом 50
Поми́луй мя, Боже, по вели́цей ми́лости Твое́й, и по мно́жеству щедро́т Твои́х очи́сти беззако́ние мое. Наипа́че омы́й мя от беззако́ния моего́, и от греха́ моего́ очи́сти мя; яко беззако́ние мое аз зна́ю, и грех мой предо мно́ю есть вы́ну. Тебе еди́ному согреши́х и лука́вое пред Тобою сотвори́х; яко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя. Се бо, и́стину возлюби́л еси; безве́стная и та́йная прему́дрости Твоея́ яви́л ми еси. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое от грех моих и вся беззако́ния моя очи́сти. Се́рдце чи́сто сози́жди во мне, Бо́же, и дух прав обнови́ во утро́бе моей. Не отве́ржи мене́ от лица́ Твоего́ и Духа Твоего Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе обратя́тся. Изба́ви мя от крове́й, Бо́же, Бо́же спасе́ния моего, возра́дуется язы́к мой пра́вде Твое́й. Го́споди, устне́ мои отве́рзеши, и уста моя возвестя́т хвалу́ Твою́. Яко аще бы восхоте́л еси же́ртвы, дал бых убо: всесожже́ния не благоволи́ши. Же́ртва Богу дух сокруше́н; се́рдце сокруше́нно и смире́нно Бог не уничижи́т. Ублажи́ Господи, благоволе́нием Твоим Сиона, и да сози́ждутся сте́ны Иерусали́мския. Тогда благоволи́ши же́ртву пра́вды, возноше́ние и всесожега́емая; тогда возложа́т на олта́рь Твой тельцы́.
Канон, глас 8-й
Его же краестрочие: Песньми воспеваю сладко лобзающую Деву, Иакова.
Песнь 1
Ирмос: Во́ду проше́д яко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Богу на́шему пои́м.
Пресвята́я Богоро́дице, спаси́ нас.
Да́руй мне благода́ть сло́ва и ра́зум,/ Влады́чице,/ воспева́ти стра́шная чудеса́/ честны́я Твоея́ ико́ны чудотво́рныя// Сла́достное лобза́ние.
Пресвята́я Богоро́дице, спаси́ нас.
Велича́йшая сла́ва Твоя вои́стинну/ есть, Дево,/ в мо́ре бо честну́ю ико́ну Твою́/ Боже́ственную изринове́нную,// в горе́ Афо́нстей спасла́ есть.
Сла́ва: О́блако, яко су́щи Боже́ственного Света/ показа́ла еси честну́ю ико́ну Твою́,/ яко о́блако, одожди́вшее чудеса́ Твоя́,/ Дево, Сла́достное лобза́ние,// ста́до Твое покрыва́ющее.
И ны́не: Боже́ственный храм Твой,/ Ма́ти Бо́жия,/ оби́тели Филофе́я/ о́браз Твой честны́й,/ я́ко ве́лие сокро́вище содержи́т,// чуде́с мно́жество всегда́ источа́ющий.
Песнь 3
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний Кра́ю, ве́рных Утвержде́ние,// еди́не Человеколю́бче.
Пресвята́я Богоро́дице, спаси́ нас.
В сокрове́нных святи́лищех,/ Влады́чице, начерта́ние ико́ны Твоея́/ Сла́достнаго лобза́ния/ сокро́виществуется,/ всем да́руя благода́ть исцеле́ний,// ю́же лобыза́юще освяща́емся.
Пресвята́я Богоро́дице, спаси́ нас.
Соше́дшеся ве́рою вси/ во оби́тели Филофе́я христолюби́вии,/ всечудотво́рную ико́ну/ Ма́тери Бога на́шего/ Сла́достное лобза́ние/ от души́ лобыза́йте// ко исцеле́нию страсте́й.
Сла́ва: Да пое́т чудо, Влады́чице,/ служи́тель честна́го хра́ма Твоего́/ мона́шествующий Иоанни́кий,/ я́ко узре́ Тя,/ ему открыва́ющую во сне,/ яково́е промышле́ние// и́маши ко ста́ду Твоему́.
И ны́не: Стра́нное чу́до соде́лала еси/ и стра́шное, Влады́чице,/ уста́вив в мо́ри кора́бль,/ несу́щ внутри́ похи́тившаго,/ злато́е украше́ние ико́ны,// до́ндеже отдаде́ е Твои́м служи́телем.
И тропари сия:
Спаси́ от бед рабы́ Твоя́, Богоро́дице,/ яко вси по Бо́зе к Тебе́ прибега́ем,// я́ко неруши́мей стене́ и предста́тельству. При́зри благосе́рдием, всепе́тая Богоро́дице,/ на мое лю́ тое телесе́ озлобле́ние,// и исцели́ души́ моея́ боле́знь.
Го́споди, поми́луй (трижды).
Иерей поминает живых:
Седален, глас 2-й
Моле́ние те́плое и кре́пкую по́мощь,/ мо́лим от Тебе́, Сла́достное Лобза́ние, Влады́чице,/ приле́жно вопию́ще и глаго́люще,/ Благосостра́дательне, предвари́/ и от бед изба́ви нас,// любо́вию чту́щих о́браз Твой.
Сла́ва, и ны́не[2], тойже.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Пресвята́я Богоро́дице, спаси́ нас.
Яви́лася еси́ Дом Святы́ни,/ Богоневе́сто, и освяще́ние о́бразом Твои́м источи́ла еси,// иде́же избра́ла еси жи́тельствовати во ве́ки.
Пресвята́я Богоро́дице, спаси́ нас.
Раздае́т исцеле́ния/ и изгоня́ет ду́хи/ святы́й Твой о́браз Сладостно лобза́ющия, Влады́чице// всегда́ всем тре́бующим.
Сла́ва: Украси́лася еси, во чре́ве носи́вшая/ добро́тою кра́снаго па́че всех челове́к/ и прекра́сная всем яви́ся ико́на Твоя,// Сла́достное лобза́ние, о Пречи́стая.
И ны́не: Ро́ди тя превозно́сят,/ непоро́чная Марие,/ якоже предрекла́ еси,/ оби́тель Филофе́я же,// поет превы́ше всех Твоя чудеса́.
Песнь 5
Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою// Твой мир пода́ждь нам, Человеколю́бче.
Пресвята́я Богоро́дице, спаси́ нас.
Возсия́й твоя лучи́/ ны́не нам, покланя́ющимся Твоему́/ запечатле́нию ико́ны Твоея́ честны́я Сла́достнаго лобза́ния,// солнцезра́чная Всевлады́чице.
Пресвята́я Богоро́дице, спаси́ нас.
Пе́сньми Тя, Чистая,/ пред лице́м честна́го о́браза Твоего́ боже́ственно восхваля́ем,/ вели́чия Твоя вознося́ще.
Сла́ва: Мир возвеща́ет стра́шная чудеса́ Твоя́/ я́же на всяк день призыва́ющим Тя,/ Сла́достное лобза́ние,// сверша́еши всем тре́бующим.
И ны́не: Егда́ Твое́, Пречи́стая,/ начерта́ние всечу́дное созерца́ю,/ Сла́достно лобза́ющая,/ ра́дости безме́рныя// се́рдце мое́ исполня́ется.
Песнь 6
Ирмос: Моли́тву пролию́ ко Го́споду,/ и Тому возвещу́ печа́ли моя,/ я́ко зол душа моя́ испо́лнися,/ и живо́т мой а́ду прибли́жися,/ и молю́ся, яко Иона:// от тли, Боже, возведи́ мя.
Пресвята́я Богоро́дице, спаси́ нас.
Боголю́бцы небрачнии,/ во оби́тель Филофе́я достосла́вную сте́кшеся,/ рука́ми ва́шими, пле́щуще, пойте/ Сла́достно Лобза́ющия о́браз всечестны́й/ и по́йте ра́достно,// почерпа́юще тоя благода́ти.
Пресвята́я Богоро́дице, спаси́ нас.
Узре́вше Твое чу́до стра́шное,/ егда́ спасла́ еси пре́жде неве́ровавшаго,/ пало́мника, с тре́тьяго жилья́ па́дшаго[3]/ и безвре́дна чуде́сно пребы́вшаго,/ просла́виша вси воеди́но// стра́шная чудеса́ о́браза Твоего́.
Сла́ва: Глаго́лятся Твоя́ чудеса́,/ Дево, во вся́ком гра́де и стране́,/ яже сверша́еши во оби́тели Твое́й,/ и повсю́ду призыва́ющим Тя, Влады́чице,// боле́зни бо тя́жкия исцеля́еши и де́моны отгоня́еши.
И ны́не: До́лжни есмы́ воспева́ти на всяк день/ мно́гая вели́чия Твоя, Дево,/ и стра́шная чудеса́ Твоея́ ико́ны Сла́достно лобза́ющия,/ яже соде́лала еси всем,// ве́рою прося́щим Твоея́ по́мощи и заступле́ния, Влады́чице.
И тропари
Спаси́ оби́тель Твою́ и ста́до/ от вся́каго нало́га сопроти́внаго невреди́му,/ яко вси в беда́х Твои́м о́бразом обогаща́емся,// яко неруши́мою стено́ю и предста́тельством. Пречи́стая, сло́вом Сло́во,/ неизрече́нно ро́ждшая в после́дния дни, умоли́,// яко иму́щая ма́тернее дерзнове́ние.
Иерей поминает живых.
Кондак, глас 4-й
Предста́тельство в беда́х Тя стяжа́хом/ и Хода́таицу к Сы́ну Твоему́ предлага́ем,/ смире́ннии служи́тели Твои, Мати Божия./ И ны́не предвари́, яко блага́я,/ на по́мощь нам, те́пло вопию́щим Тебе,/ ускори́ на моли́тву и изба́ви от вся́кия ско́рби// ста́до Твое, моля́щееся Тебе.
Прокимен
Помяну́ имя Твое во вся́ком ро́де и ро́де.
Стих: Слы́ши, Дщи, и виждь, и приклони́ ухо Твое.
Евангелие от Луки (зачало 4, Лк 1:39–49, 56)
Во дни о́ны, воставши, Мариам, иде в горняя со тщанием, во град Иудов. И вниде в дом Захариин, и целова Елисавет. И бысть, яко услыша Елисавет целование Мариино, взыграся младенец во чреве ея, и исполнися Духа Свята Елисавет. И возопи гласом велиим, и рече: благословенна Ты в женах, и благословен плод чрева Твоего. И откуду мне сие, да прииде Мати Господа моего ко мне? Се бо, яко бысть глас целования Твоего во ушию моею, взыграся младенец радощами во чреве моем. И блаженна Веровавшая, яко будет совершение глаголанным Ей от Господа. И рече Мариам: величит душа Моя Господа, и возрадовася дух Мой о Бозе Спасе Моем. Яко призре на смирение Рабы Своея, се бо, отныне ублажат Мя вси роди. Яко сотвори, Мне величие Сильный, и свято имя Его. Пребысть же Мариам с нею яко три месяцы, и возвратися в дом Свой.
Сла́ва: Отче, Слове и Ду́ше,/ Тро́ице во Еди́нице,// очи́сти мно́жество моих беззако́ний.
И ны́не: Моли́твами Пречи́стыя Матери/ Сла́достно Лобза́ющия,/ Ми́лостиве, очи́сти// мно́жество беззако́ний моих.
Поми́луй мя Боже,/ по вели́цей ми́лости Твоей/ и по мно́жеству щедро́т Твоих// очи́сти беззако́ние мое.
Стихира, глас 6-й
Подобен: Все отложивше житейское томление. Ве́лие прибе́жище/ Твою́ ико́ну, Дево стяжа́вши,/ оби́тель Твоя спаса́ется/ всегда́ от вся́ких лю́тых/ и ве́рно пе́сньми благохва́лит, ра́дующися/ покланя́ющися и вопию́ щи Тебе/ душе́ю и язы́ком же, о Сла́достно лобза́ющая, Всевлады́чице,/ спаси́ нас от скорбо́й, боле́зней и лю́тых обстоя́ний./ Ма́ти Вы́шняго,/ к Тебе́ бо прибега́ем всегда́,// не пре́зри моле́ния призыва́ющих Тя.
Иерей или диакон: Спаси́, Боже, лю́ди Твоя́ и благослови́ достоя́ние Твое, посети́ мiр Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста, Святаго Архистратига Божия Михаила и предста́тельством честны́х Небе́сных Сил безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, иже во святы́х отец на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, иже во святы́х отца нашего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго князя Влади́мира и вели́кия княги́ни Ольги, иже во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны, Фили́ппа и Ермоге́на и святы́х преподо́бных Зоси́мы, Савва́тия и Ге́рмана Солове́цких и святы́х сла́вных и добропобе́дных му́чеников, преподо́бных и богоно́сных оте́ц на́ших святых равноапостольного Косма Этолийского, преподобных Филофея, Симеона, Дионисия, Луки, Афана́сия Афо́нского, препо́добного Паисия Светогорца, и всех преподо́бных оте́ц, в по́двизе на Святе́й Горе́ просия́вших, святы́х и пра́ведных богооте́ц Иоаки́ма и Анны (и свята́го имяре́к, его́же есть храм и его́же есть день), и всех святы́х. Мо́лим Тя, многоми́лостиве Го́споди, услы́ши нас, гре́шных, моля́щихся Тебе, и поми́луй нас.
Господи помилуй (12 раз)
Песнь 7
Ирмос: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Боже, благослове́н еси.
Пресвята́я Богоро́дице, спаси́ нас.
Па́че естества́ и сло́ва/ Сы́на Безнача́льнаго Отца́ ро́ждшая,/ чадоле́пно лобза́ющи,/ оста́вила еси ста́ду Твоему́ ико́ну честну́ю Твою́,// ейже покланя́емся, Чи́стая с любо́вию во веки.
Пресвята́я Богоро́дице, спаси́ нас.
Тя приста́нище и сте́ну,/ благостяжа́вше,/ Влады́чице, охраня́емся, прибега́юще к покро́ву/ Образа Твоего́ Боже́ственнаго,/ и согла́сно вопие́м Ти:// благослове́нна Ты еси, Чи́стая, в жена́х.
Сла́ва: Необори́мую сте́ну,/ стяжа́вше Тя вси, Чи́стая, восхваля́ем./ изба́вити оби́тель Твою́ умоли́,/ от бед, я́звы, тру́са, меча́/ яко да пое́м всегда́// Твой покро́в необори́мый.
И ны́не: Яко вино́ сла́достное, прие́млюще, Дево, чудеса́ Твоя, почита́ем ико́ну Твою́/ Сла́достное лобза́ние, юже нам бога́тство неиждева́емое/ дарова́ла еси, Ма́терь Бо́жия,// утвержде́ние и покро́в.
Песнь 8
Ирмос: Царя́ Небе́снаго,/ Его́же пою́т во́и Ангельстии,/ хвали́те и превозноси́те// во вся веки.
Пресвята́я Богоро́дице, спаси́ нас.
Тя прибе́жище и спасе́ние обре́тше/ жи́тельствующии во оби́тели Филофе́я,/ о Сла́достно лобза́ющая,// поем во веки.
Пресвята́я Богоро́дице, спаси́ нас.
Не́когда на кре́стном хо́де от пия́нства па́вших, Чи́стая,/ сих чрез неподви́жность ико́ны Твоея́// ко трезве́нию возвела́ еси.
Сла́ва: Укрепле́ние да́руеши, Влады́чице, боля́щим,/ и всем да́руеши проси́мое/ любо́вию лобыза́ющим// Боже́ственный Твой о́браз.
И ны́не: Да́руеши благода́ть Твою́ нам Тебе пою́щим,/ Сла́достно лобза́ющая,/ и спаса́еши от бед славосло́вящих// безсе́менное Твое Рождество́.
Песнь 9
Ирмос: Вои́стинну Богородицу/ Тя испове́дуем,/ спасе́ннии Тобо́ю, Дево чи́стая,// с безпло́тными ли́ки Тя велича́юще.
Пресвята́я Богоро́дице, спаси́ нас.
Се ны́не, яко предрекла́ еси,/ ро́ди Тя вси, Сла́достно лобза́ющая,/ при́сно ублажа́ем,// и честны́й Твой образ лобыза́ем.
Пресвята́я Богоро́дице, спаси́ нас.
Чи́стая, и до рождества́/ и в рождестве́ яви́лася еси,/ и по рождестве́ Дева пребыла́ еси,/ сего ради вси// образ Твой Боже́ственный почита́ем.
Пресвята́я Богоро́дице, спаси́ нас.
О, Сла́достно лобза́ющая,/ приими́ преподо́бныя/ и иера́рхи оби́тели Твоея́ предста́тели наши/ в сомоли́твенники// и Творца́ на́шего уми́лостиви.
Сла́ва: Цари́це Дево,/ яви́лася еси ро́ждшая Царя́ сла́вы и Го́спода,/ его́же умоли́// спасти́ся пою́щим Тя.
И ны́не: Онебеси́вши[4] естество́ челове́ков, Дево,/ Царя небе́снаго ро́ждшая./ Ца́рствия сего нас сподо́би. Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бога на́шего. Честне́йшую Херуви́м и сла́внейшую без сравне́ния Серафи́м, без истле́ния Бога Слова ро́ждшую, су́щую Богородицу Тя велича́ем.
И похвалы:
Всепречу́дный Твой о́браз,/ от Ца́рствующаго гра́да прише́дый к нам/, я́ко со́лнце всем лучи́ чуде́с// и нощь скорбе́й отгоня́ет.
Филофе́я славу све́тлую/ и горы́ Афо́нския щит и око,/ Сла́достное лобза́ние, ико́ну Пречи́стыя,// ра́достию и благогове́нием облобыза́им.
Вси ико́ну Твою́ чу́дную,/ Сла́достнаго лобза́ния, зря́ще,/ покланя́емся благоче́стно,/ чрез нея́же благода́ть источа́ется,/ рой страсте́й скве́рный попаляющая// ве́рою припа́дающим к ней.
Лобыза́ющия тя благогове́йно,/ о Сладостное лобзание, сохрани́ неврежде́нны/ от всякия напа́сти/ и да́руй благомо́щность,// душ же спасе́ние и избавле́ние.
Вои́стину всепрекра́сный Твойобраз,/ Богоневе́сто Мариа́м,/ источа́ет чуде́с/ мно́жество приходя́щим// стремле́ние боле́зней изгоня́ющи.
Да́руй чту́щим храм Твой сей/ по проше́нию их/ и сподо́би жи́зни небе́сней,/ Сладостное лобзание, Де́во,// и сла́вную оби́тель Твою сохрани́.
«Ми́лостива ми бу́ди» — вопие́т оби́тель Твоя сия́,/ Сладостному лобзанию Ма́тери Влады́ки,/ упова́ющая на Тя,/ ю́ же сохрани́ и покры́й// от нападе́ния лю́тых.
Ве́лие чу́до и стра́шное/ сверши́ла еси вои́стину,/ егда́ уста́вила еси́ стремле́ние/ огня́ всепожира́ющаго/ в де́бри оби́тели Твоея,/ сего ра́ди Тя благословля́ем,// Горохрани́тельнице.
Вси поража́ются, о Чи́стая,/ зряще зде Твоя чудеса́ стра́шная,/ я́же на всяк час твори́ши/ во оби́тели Твоей,/ сего ра́ди Сладостное лобзание,// Тя велича́ем.
Приими́ моле́ния, Всецарю́,/ Присноде́вы Пречи́стыя Твоея Ма́тери/ и ста́до сие неврежде́нно сохрани́/ от враго́в и всякого вре́да,// я́ко сла́вит Тя. Филофе́я устрои́теля оби́тели, Боже́ственнаго/ Феодо́сия, Симео́на с Диони́сием,/ Космо́ю и Дамиа́ном,/ с Доме́тием вси пе́снми почти́м.
Прииди́те, восхва́лим ве́рнии,/ два свети́льника ве́лия и светоза́рныя,/ Михаи́ла вели́каго и Гаври́ила боже́ственнаго,// два чинонача́льника Вседержи́теля.
Мегалинарий[5] преподобного Антония.
Ра́дуйся, преподо́бных нача́льниче/ и равноа́нгельнаго жития́ учи́телю,/ ра́дуйся, пустыни столпови́дное о́блако,/ Анто́ние всеблаже́нне,// отече́ская похвало́.
Мегалинарий святого Нектария.
Благода́тию чуде́с у Христа́/ све́тло просла́вился еси/ до кончи́ны твоея́ честны́я,/ сего ра́ди ра́ка моще́й твои́х/ источа́ет чудеса́ мно́гия,// Некта́рие, стра́ждущим.
Затем мегалинарий Святого, празднуемого сего дня.
Вся Ангелов во́инства,/ Предте́че Госпо́день,/ Апо́столов двунадеся́тице,/ святи́и всис Богоро́дицею, сотвори́те моли́тву// во еже спасти́ся нам.
Трисвятое по Отче наш
И тропари:
Поми́луй нас, Господи, поми́луй нас;/ вся́каго бо отве́та недоуме́юще,/ сию́ Ти моли́тву/ яко Влады́це гре́шнии прино́сим:// поми́луй нас.
Сла́ва: Господи, поми́луй нас,/ на Тя бо упова́хом;/ не прогне́вайся на ны зело́,/ ниже́ помяни́ беззако́ний на́ших,/ но при́зри и ны́не яко благоутро́бен,/ и изба́ви ны от враг на́ших;/ Ты бо еси Бог наш,/ и мы лю́дие Твои,/ вси дела руку́ Твое́ю,// и имя Твое призыва́ем.
И ны́не: Милосе́рдия две́ри отве́рзи нам,/ благослове́нная Богоро́дице,/ наде́ющиися на Тя да не поги́бнем,/ но да изба́вимся Тобо́ю от бед:// Ты бо еси спасе́ние рода христиа́нскаго.
Молитва ко Пресвятой Богородице пред иконой «Сладостное лобзание»
О Пресвята́я Влады́чице Богоро́дице! Со стра́хом, ве́рою и любо́вию предстоя́ще пред святе́й ико́ною Твоею, Сладостное лобза́ние имену́емой, моли́твенно взыва́ем Ти: Не отве́ржи нас от Твоего лица́, но возврати́ нас от плене́ния грехо́внаго на́шего и принеси́ моле́ния на́ша Пречи́стому Сы́ну и Бо́гу на́шему, да спасе́т ду́ши на́ша. Утверди́ нас в любви́ к Богу и бли́жнему, наста́ви нас на путь за́поведей Бо́жиих, да́руй на́шим душа́м умиле́ние и всели́ в них моли́твою Твое́ю свет богоразу́мия. О Пречи́стая Богоро́дице! Моле́нием Твоим ю́ность наста́ви, ста́рость поддержи́, малоду́шныя уте́ши, неду́жныя исцели́! Да да́рует нам Твои́м предста́тельством Сы́н Твой и Сло́во Бо́жие мир Свой, и́же превы́ше вся́каго ума́, и приведе́т нас в Ца́рствие Свое́, иде́же глас несказа́ннаго ра́дования во ве́ки веко́в. Ами́нь.
Молитва ко Пресвятой Богородице
Цари́це моя́ Преблага́я, Наде́ждо моя́, Богоро́дице, Прия́телище си́рых и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мо́ю беду́, зри́ши мою́ ско́рбь; помози́ ми́, я́ко не́мощну, окорми́ мя́ я́ко стра́нна! Оби́ду мою́ ве́си, разреши́ ту́, я́ко во́лиши: я́ко не и́мам и́ныя по́мощи ра́зве Тебе́, ни ины́я Предста́тельницы, ни благи́я Уте́шительницы, то́кмо Тебе́, о Богомати; я́ко да сохрани́ши мя́ и покры́еши во веки ве́ков. Аминь.
И поминает иерей живых. Затем отпуст. На целование же святыя иконы Гликофилусы, Тропарь:
Глас 2-й, Всем предстательствуеши
Всех нас уще́дри, Чи́стая,/ Ма́ти Бо́жия и Дево,/ прибега́ющих к Тебе́/ и Твое́ предста́тельство взыску́ющих те́пле,/ и оби́тель Твою́, чту́щую Тя,/ Сла́достное Лобза́ние,/ покры́й и сохрани́ от напа́сти лю́тых,/ изба́ви от тле́ния и бед,// и улучи́ти Ца́рствия, Де́во, Сы́на Твоего́ сподо́би.
Глас 8-й
Влады́чице, приими́ моли́твы раб Твои́х/ и изба́ви ны// от вся́кия ну́жды и печа́ли.
Глас 2-й
Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.
Иерей: Моли́твами святы́х оте́ц на́ших, Го́споди Иису́се Христе́ Боже наш, поми́луй нас. Ами́нь.
Тропарь, глас 7
Одержащей ереси, о честности иконе Твоей, Дево, яве промышляеши: морешествием Твоей обители, яко дар достоин приношаеши. Сию же мы Сладостно лобзающую праве нарицающе, Тя ублажаем.
Кондак, глас 8
Иже в храме и обители Твоей приходящия Ти и богоугодно спасительная гонящия и почитающия Твой святый образ сим даруй, Дево. Твоя милости, от всяких избавльши сих скорбей, Тебе вопиющия: радуйся, Едина Богоневестная.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.
О монастыре Филофей
Монастырь Филофей – один из старейших на Святой Горе Афон. Он основан в конце Х века одним из учеников святого Афанасия Афонского – святым Филофеем, и посвящен Благовещению Пресвятой Богородицы.
Соборный храм Филофея был построен в 1746 году на месте существовавшего здесь ранее храма X века. Он был расписан в 1752 году. Фрески литийного притвора относятся к более позднему периоду (1765). Иконостас, находящийся в кафоликоне, сохраняется от старого храма.
В соборе на левом клиросе находится известная чудотворная икона Божией Матери «Сладостное лобзание» (греч. «Гликофилуса»). Во времена иконоборчества благочестивая жительница Константинополя Виктория, супруга известного патрикия (знатного царедворца) Симеона, спасая икону от уничтожения, опустила её в море, попросив Пресвятую Богородицу, чтобы Она Сама спасла икону. Так образ прибыл на Святую Гору, о чём чудесным образом был предупрежден игумен Филофея. На месте обретения иконы, рядом с пристанью монастыря и на самой кромке моря, открылся святой источник, текущий по сей день.
По молитвам у иконы Богородицы свершилось множество чудес. В 1801 году один сребролюбивый паломник похитил привешенные к образу приношения благочестивых паломников. Совершив святотатство, он сел на корабль, отправлявшийся от Иверской пристани. Но судно, отплыв немного от берега, стало на месте, несмотря на попутный ветер. Между тем, когда в Филофее узнали о пропаже, послали во все стороны людей, чтобы догнать вора. Один из них подплыл на лодке к кораблю, стоявшему недалеко от Иверской пристани. Тем временем преступник, вразумлённый чудесной остановкой корабля, сам раскаялся в святотатстве и поспешил добровольно возвратить приношения, после чего корабль свободно продолжил плаванье.
Одно из чудес произошло в годы немецкой оккупации. Пшеница в обители закончилась и было решено прекратить приём паломников. Один из монахов по имени Савва настойчиво просил не делать этого, так как монастырь оставит Божие благословение. Когда закончились последние зёрнышки пшеницы и не из чего уже было готовить хлеб, в Филофее появился капитан из Кавалы. Он приплыл на судне, трюмы которого были полны пшеницы.
Чудесным образом в Филофей из греческой провинции Македония прибыла икона «Геронтисса» (Старица или Милующая). Чудотворному образу можно поклониться в соборном храме монастыря.
В монастыре хранятся часть Честного Животворящего Креста Господня – дар монастырю сербского царя Стефана Душана, Честной Гвоздь, один из тех, которыми Спаситель был пригвожден ко Кресту, десница свт. Иоанна Златоуста, частицы мощей вмч. Пантелеимона дар монастырю последнего византийского императора Константина Палеолога, мощи сщмч. Харалампия, вмц. Марины, св. Исидора Хиосского, св. Мардария, мц. Параскевы, св. Луки Элладского, св. равноапостольного Космы Этолийского и других святых, а также земля и миро от гроба святого вмч. Димитрия Солунского.
В обители подвизались многие святые: святой Филофей – ктитор монастыря, святой Феодосий (+1410), святые Симеон и Дионисий Олимпийский (XVI в.), сщмч. Дамиан (+1568) и его сподвижник преподобный Дометий, святой Дионисий, основатель афонского монастыря Дионисиат. В Филофее монашествовал на протяжении 17 лет великий святой Нового времени, равноапостольный Косма Этолийский. Также здесь несколько лет подвизался святой Паисий Святогорец.
1973 год – время возвращения Филофея к общежительному уставу. Это событие связано с именем Старца Ефрема Филофейского – ученика Преподобного Старца Иосифа Исихаста, великого подвижника, аскета и учителя умной молитвы на Святой Горе Афон в 20-м веке.
Пребывая в келлии Святого Артемия в Провате и имея братство около 25 монахов, старец Ефрем был приглашен старцами Монастыря Филофей для укрепления его монахами (в это время там оставалось совсем мало насельников). После своего прихода в монастырь и поставления в кафигумена, старец Ефрем ввел в нем общежительный устав. От этого братства под руководством Старца Ефрема впоследствии были укреплены монахами еще три афонских монастыря: в 1979 году Монастырь Констамонит, в 1980 – Монастырь Ксиропотам и в 1981 – Монастырь Каракалл.
В 1991 году Старец Ефрем, уйдя с поста Кафигумена, отправился в Северную Америку, где основал 17 монастырей мужских и женских, рассеянных по всем Соединенным Штатам Америки и Канаде, принеся в эту духовную пустыню свет Православия и древние традиции святогорского монашества.
Перевод с греческого, редакция протодиакона, д.и.н., кандидата богословия, профессора СПбГУ В. В. Василика
Канон издан семьей Новиковых и семьей Еремеевых при содействии Д. С. Орешниковой
[1] Когда написано «Слава, и ныне», следует читать полностью: «Слава Отцу и Сыну и Святому Духу, и ныне и присно и во веки веков. Аминь».
[2] Повторение седальна.
[3] с третьего уровня, этажа.
[4] Соединившая с небом.
[5] Мегалинарием (букв. «величален») называются тропари после «Величит» — 9 песни Канона.