Канон Рождеству Пресвятой Богородицы


Икона «Рождество Пресвятой Богородицы»

Минея, 8 Сентября, Кано́н пе́рвый

Глас 2

Песнь 1

Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися. 

Припев: Пресвята́я Богоро́дице, спаси́ на́с.

Гряди́те, ве́рнии, Ду́хом Боже́ственным ра́дующеся,/ Юже от непло́дове днесь прише́дшую челове́ков на спасе́ние/ Присноде́ву Отрокови́цу пе́сньми почти́м. 

Сла́ва Отцу́ и Сы́ну и Свято́му Ду́ху.

Ра́дуйся, Чи́стая, Ма́ти и Рабо́ Христа́ Бо́га,/ я́же пе́рвому Хода́таица блаже́нству,/ челове́ческий род, Тя вси досто́йно пе́сньми сла́вим. 

И ны́не и при́сно и во ве́ки веко́в. Ами́нь.

Жи́зни ражда́ется днесь мост,/ и́мже челове́цы, воззва́ние паде́ния, я́же от а́да, обре́тшии,/ Христа́ Жизнода́вца пе́сньми прославля́ют. 

Песнь 3

Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя. 

Припев: Пресвята́я Богоро́дице, спаси́ на́с.

Непоро́чно Бо́гу пожи́вшии,/ всех роди́сте Спасе́ние,/ богому́дрии роди́теле/ Зижди́теля Ро́ждшия и Бо́га на́шего. 

Сла́ва Отцу́ и Сы́ну и Свято́му Ду́ху.

Всем жизнь источа́яй Госпо́дь/ от непло́дове произведе́ Де́ву,/ в Ню́же всели́тися изво́ли,/ и по Рождестве́ сохрани́в нетле́нну. 

И ны́не и при́сно и во ве́ки веко́в. Ами́нь.

А́ннин плод, Мари́ю, днесь,/ Грозд ро́ждшую живоно́сный,/ я́ко Богоро́дицу воспои́м,/ Предста́тельницу же всех и Помо́щницу. 

Седален, глас 4

Де́ва Мари́я и Богоро́дица и́стинно,/ я́ко о́блак све́та, днесь возсия́ нам/ и от пра́ведных предгряде́т в сла́ву на́шу./ Не ктому́ Ада́м осужда́ется,/ и Ева от уз свободи́ся,/ и сего́ ра́ди зове́м, вопию́ще со дерзнове́нием еди́ней Чи́стей:/ ра́дость возвеща́ет рождество́ Твое́ всей вселе́нней.

Песнь 4

Ирмос: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче. 

Припев: Пресвята́я Богоро́дице, спаси́ на́с.

Воспева́ем Тя, Го́споди,/ ве́рным спаси́тельное приста́нище пода́вшаго всем,/ Тебе́ Ро́ждшую. 

Сла́ва Отцу́ и Сы́ну и Свято́му Ду́ху.

Тя, Богоневе́сто,/ похвалу́ всем Христо́с яви́ и держа́ву/ пою́щим ве́рно Твое́ та́инство. 

И ны́не и при́сно и во ве́ки веко́в. Ами́нь.

Неискусобра́чная Влады́чице,/ Твои́ми моли́твами избавля́еми прегреше́ний,/ благоразу́мно вси Тя ублажа́ем. 

Песнь 5

Ирмос: Сеннопи́санный мрак гада́ний разори́в/ и ве́рных прибы́тием и́стины,/ Богоотрокови́цею, озари́в сердца́,// и нас све́том Твои́м, Христе́, наста́ви. 

Сла́ва Отцу́ и Сы́ну и Свято́му Ду́ху.

Воспои́м, лю́дие, всех вину́/ су́щаго по нам бы́ти Вино́внаго:/ Ея́же о́бразу ра́довахуся сподобля́еми проро́цы,/ явле́нное спасе́ние от Тоя́ плодя́ще. 

И ны́не и при́сно и во ве́ки веко́в. Ами́нь.

От су́ха прозябе́ние жезла́ иере́ева/ Изра́илю показа́ проразсужде́ние,/ и ны́не све́тлость прозя́бших пресла́вно све́тит,/ от непло́дове всесла́вное рожде́ние. 

Песнь 6

Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю, во гла́се хвале́ния, // и́стины же ду́хом пожру́ Тебе́. 

Сла́ва Отцу́ и Сы́ну и Свято́му Ду́ху.

Ко Го́споду в ско́рби непло́дства возопи́ша/ Богома́тере богому́дрии роди́тели/ и Сию́ в ро́ды родо́в роди́ша,/ на о́бщее спасе́ние и похвалу́. 

И ны́не и при́сно и во ве́ки веко́в. Ами́нь.

Прия́ша Небе́сный дар от Бо́га досто́ин/ Богома́тере богому́дрии роди́тели,/ саме́х Херуви́мов превы́шшее носи́ло,/ Сло́ва и Зижди́теля Роди́тельницу. 

Кондак, глас 4

Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.

Икос

Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное/ и во у́ши Госпо́дни вни́де, и прозябе́ плод живоно́сен ми́ру./ Ов бо моли́тву на горе́ творя́ше, о́ва же в саде́ поноше́ние ноша́ше,/ но с ра́достию непло́ды ражда́ет Богоро́дицу и Пита́тельницу Жи́зни на́шея.

Песнь 7

Ирмос: Купина́ в горе́ огненеопа́льная и росоно́сная пещь халде́йская/ я́ве предписа́ Тя, Богоневе́сто,/ Боже́ственный бо невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:// благослове́н еси́, Бо́же оте́ц на́ших. 

Сла́ва Отцу́ и Сы́ну и Свято́му Ду́ху.

Твое́ в веще́ственных явле́ниих/ законополо́жник возбрани́ся разуме́ти/ и вели́кое, Пречи́стая, та́инство,/ не му́дрствовати земноре́вностная обра́зно наказуем иногда́./ Те́мже, уди́влься чудеси́, глаго́лаше:/ благослове́н Бог оте́ц на́ших. 

И ны́не и при́сно и во ве́ки веко́в. Ами́нь.

Го́ру и дверь Небе́сную и мы́сленную Тя ле́ствицу/ боголе́пно лик боже́ственный пронарече́,/ от Тебе́ бо Ка́мень отсече́ся не рука́ми му́жескими,/ и дверь, Е́юже про́йде Госпо́дь, Иже чуде́с Бог оте́ц на́ших. 

Песнь 8

Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше неопа́льно входя́щия,/ ю́же пое́м, я́вльшуюся Тобо́ю конце́м днесь,// и превозно́сим во вся ве́ки. 

Сла́ва Отцу́ и Сы́ну и Свято́му Ду́ху.

Яже к Бо́гу на́шего примире́ния предопределе́нная ски́ния/ е́же бы́ти ны́не начина́ет,/ иму́щи роди́ти Сло́ва, нам дебельство́м Пло́ти я́вльшася,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки. 

И ны́не и при́сно и во ве́ки веко́в. Ами́нь.

Непло́дства преложе́ние мирско́е благи́х разреши́ непло́дство/ и я́сно чу́до Христа́ показа́, к земны́м прише́дша,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки. 

Песнь 9

Ирмос: Яже пре́жде Со́лнца Свети́льника Бо́га возсия́вшаго,/ пло́тски к нам прише́дшаго,/ из боку́ Деви́чу неизрече́нно воплоти́вшая,/ Благослове́нная Всечи́стая,// Тя, Богоро́дице, велича́ем. 

Сла́ва Отцу́ и Сы́ну и Свято́му Ду́ху.

И́же непокори́вым лю́дем из ка́мене источи́в во́ду,/ благопокори́вым же язы́ком да́рует от чресл непло́дных плод на весе́лие нам,/ Тя, Богома́ти Пречи́стая,/ ю́же досто́йно велича́ем. 

И ны́не и при́сно и во ве́ки веко́в. Ами́нь.

Напра́снаго дре́вняго Отъя́тельницу осужде́ния и прама́тере исправле́ние,/ Юже ро́да к Бо́гу вину́ присвое́ния, к Зижди́телю мост,/ Тя, Богоро́дице, велича́ем. 

Светилен

От непло́дныя днесь А́нны цвет произы́де, Богоро́дица,/ вся благово́ния Боже́ственнаго исполня́ющи концы́ ми́ра/ и ра́дости всю наполня́ющи тварь,/ ю́же пою́ще, досто́йно восхваля́ем,/ я́ко су́щу земноро́дных превы́шшую.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Ада́ме, обнови́ся, и Е́ва, возвели́чися,/ проро́цы, со апо́столы лику́йте и пра́ведными,/ о́бщая бо ра́дость возсия́ А́нгелов же и челове́ков/ от пра́ведных днесь Иоаки́ма и А́нны, Богоро́дица Мари́я.

Комментировать

«Азбука молитвы»
в Telegram.
t.me/azprayer