Служба во Святую и Вели́кую Субботу

После́дование у́трени

Свяще́нник: Благослове́н Бог наш, всегда́, ны́не, и при́сно, и во ве́ки веко́в.

Чтец глаго́лет: Ами́нь.

И про́чее нача́ло у́трени я́коже обы́чай есть ( зри сноску № 5 ).

По шестопса́лмии ектениа́ вели́кая: Ми́ром Го́споду помо́лимся.

И возгла́с: Яко подоба́ет Тебе́:

Лик: Ами́нь.

И начина́ют пе́ти во глас 2, велегла́сно и со сладкопе́нием, на о́ба ли́ка:

Бог Госпо́дь, и яви́ся нам, благослове́н гряды́й во И́мя Госпо́дне.

Стихи́ же глаго́лются сия́:

Стих 1: Испове́дайтеся Го́сподеви, я́ко Благ, я́ко в ве́к ми́лость Его́.

Стих 2: Обыше́дше обыдо́ша мя, и и́менем Госпо́дним противляхся им.

Стих 3: Не умру́, но жив бу́ду, и пове́м дела́ Госпо́дня.

Стих 4: Ка́мень, его́же небрего́ша зи́ждущии, сей бысть во главу́ угла́: от Го́спода бысть сей, и есть ди́вен во очесе́х на́ших.

И по ко́емждо стихе пою́т: Бог Госпо́дь: (Еди́ножды).

Посе́м пое́м тропа́рь, глас 2:

Благообра́зный Иосиф, с дре́ва снем Пречи́стое Те́ло Твое́, Плащани́цею чи́стою обви́в, и воня́ми во гробе но́ве покры́в положи́.

Сла́ва Отцу́, и Сы́ну, и Свято́му Ду́ху.

Егда́ снизше́л еси́ к сме́рти, Животе́ Безсме́ртный, тогда́ ад умертви́л еси́ блиста́нием Бо́жества. Егда́ же и уме́ршыя от преиспо́дних воскреси́л еси́, вся Си́лы Небе́сныя взыва́ху: Жизнода́вче Христе́ Бо́же наш, сла́ва Тебе́.

И ны́не и при́сно, и во ве́ки веко́в. Ами́нь.

Мироно́сицам же́нам, при гро́бе предста́в А́нгел вопия́ше: ми́ра ме́ртвым суть прили́чна, Христо́с же истле́ния яви́ся чуждь.

Во вре́мя пе́ния тропарей свяще́нник исходит Ца́рскими врата́ми на середи́ну хра́ма к Плащани́це и, взяв кади́ло, соверша́ет кажде́ние всего́ хра́ма.

И начина́ем пети непоро́чны со сладкопе́нием, Та́кожде по стиху, и похвалы́ возглаша́ет певец, во глас 5:

Благослове́н еси́, Го́споди, научи́ мя оправда́нием Твои́м.

Статиа́ пе́рвая

Блаже́ни непоро́чнии в путь, ходя́щии в зако́не Госпо́дни.

И похвалы́, во глас 5:

Жизнь во гро́бе положи́лся еси́, Христе́, и а́нгельская во́инства ужаса́хуся, снизхожде́ние сла́вяще Твое́.

Блаже́ни испыта́ющии свиде́ния Его́, всем се́рдцем взы́щут Его́.

Животе́, ка́ко умира́еши? Ка́ко и во гро́бе обита́еши? Сме́рти же Ца́рство разруша́еши, и от ада ме́ртвыя возста́вляеши?

Не де́лающии бо беззако́ния, в путе́х Его́ ходи́ша.

Велича́ем Тя, Иису́се Царю́, и чтем погребе́ние и страда́ния Твоя́, и́миже спасл еси́ нас от истле́ния.

Ты запове́дал еси́ за́поведи Твоя́ сохрани́ти зело́.

Ме́ры земли́ положи́вый, в ма́лом обита́еши, Иису́се Всецарю́, гро́бе днесь, от гробо́в ме́ртвыя возста́вляяй.

Да бы испра́вилися путие́ мой, сохрани́ти оправда́ния Твоя́.

Иису́се Христе́ мой, Царю́ всех, что ища к су́щым во а́де прише́л еси́? Или́ род отреши́ти челове́ческий?

Тогда́ не постыжуся, внегда́ призре́ти ми на вся за́поведи Твоя́.

Владыка всех зри́тся мертв, и во гро́бе но́вем полага́ется, истощи́вый гро́бы ме́ртвых.

Испове́мся Тебе́ в пра́вости се́рдца, внегда́ научи́ти ми ся судьбам пра́вды Твоея́.

Животе́ во гро́бе положи́лся еси́, Христе́: и сме́ртию Твое́ю смерть погуби́л еси́, и источи́л еси́ ми́рови жизнь.

Оправда́ния Твоя́ сохраню́, не оста́ви мене́ до зела.

Со злоде́и я́ко злоде́й, Христе́, вмени́лся еси́, оправда́я нас всех от злоде́йства дре́вняго запинателя.

В чесо́м испра́вит юне́йший путь свой? Внегда сохрани́ти словеса́ Твоя́.

Кра́сный добро́тою па́че всех челове́к, я́ко беззра́чен мертв явля́ется, естество́ украси́вый всех.

Всем се́рдцем мои́м взыска́х Тебе́, не отри́ни мене́ от за́поведей Твои́х.

Ад ка́ко стерпи́т, Спа́се, прише́ствие Твое́, а не па́че боле́знует омрача́емь, блиста́ния Све́та Твоего́ заре́ю ослепле́н.

В се́рдце мое́м скрых словеса́ Твоя́, я́ко да не согрешу́ Тебе́.

Иису́се, Сла́дкий мой и спаси́тельный Све́те, во гро́бе ка́ко те́мном скры́лся еси́? О несказа́ннаго и неизрече́ннаго терпе́ния!

Благослове́н еси́, Го́споди, научи́ мя оправда́нием Твои́м.

Недоумева́ет и естество́ у́мное, и мно́жество безпло́тное, Христе́, та́инства несказа́ннаго и неизрече́ннаго Твоего́ погребе́ния.

Устна́ма мои́ма возвести́х вся судьбы́ уст Твои́х.

О чуде́с стра́нных! О веще́й но́вых! Дыха́ния моего́ Пода́тель бездыха́нен но́сится, погреба́ем рука́ма Ио́сифовыма.

На пути́ свиде́ний Твои́х наслади́хся, я́ко о вся́ком богатстве.

И во гроб заше́л еси́, и недр, Христе́, Оте́ческих ника́коже отлучи́лся еси́: сие́ стра́нное и пресла́вное ку́пно.

В за́поведех Твои́х поглумлю́ся, и уразуме́ю пути́ Твоя́.

И́стинный Небесе́ и земли́ Царю́, а́ще и во гро́бе мале́йшей заключи́лся еси́, позна́лся еси́ всей тва́ри, Иису́се.

Во оправда́ниих Твои́х поучу́ся, не забу́ду слове́с Твои́х.

Тебе́ положе́ну во гро́бе. Созда́телю Христе́, а́дская подвиза́шася основа́ния, и гро́би отверзо́шася челове́ком.

Возда́ждь рабу́ Твоему́, живи́ мя, и сохраню́ словеса́ Твоя́.

Зе́млю Содержа́й дла́нию, умерщвле́н пло́тию, под земле́ю ны́не содержи́тся, ме́ртвыя избавля́я а́дова содержа́ния.

Открый о́чи мои́, и уразуме́ю чудеса́ от зако́на Твоего́.

Из истле́ния возше́л еси́ Животе́, Спа́се мой, Тебе́ уме́ршу, и к ме́ртвым прише́дшу, и сломи́вшу адовы вереи́.

Пришле́ц аз есмь на земли́, не скрый от Мене́ за́поведи Твоя́.

Я́коже све́та Свети́льник, ны́не плоть Бо́жия, под зе́млю я́ко под спуд крыется, и отгоняет су́щую во аде тьму.

Возлюби́ душа́ моя́ возжелати судьбы Твоя́ на вся́кое вре́мя.

У́мных стека́ется во́инств мно́жество со Ио́сифом и Никоди́мом, погребсти́ Тя невмести́маго во гро́бе мале.

Запрети́л еси́ го́рдым, про́кляти уклоня́ющийся от за́поведей Твои́х.

Умерщвле́н во́лею, и положе́н под земле́ю, Жизното́чне Иису́се мой, оживи́л еси́ умерщвле́на мя преступле́нием го́рьким.

Отыми́ от Мене́ поно́с и уничиже́ние, я́ко свиде́ний Твои́х взысках.

Изменя́шеся вся тварь стра́стию Твое́ю, вся бо Тебе́, Сло́ве, сострада́ху, Содержи́теля Тя ве́дуще всех.

Ибо седо́ша князи, и на мя клевета́ху: раб же Твой глумля́шеся во оправда́ниих Твои́х.

Живота́ Ка́мень во чре́ве прие́м ад всея́дец изблева́, от ве́ка я́же поглоти́ ме́ртвыя.

И́бо свиде́ния Твоя́ поуче́ние мое́ есть, и сове́ти мои́ оправда́ния Твоя́.

Во гро́бе но́ве положи́лся еси́, Христе́, и естество́ челове́ческое обнови́л еси́, воскре́с благоле́пно из ме́ртвых.

Прильпе́ земли́ душа́ моя́, живи́ мя по словеси́ Твоему́.

На зе́млю сшел еси́, да спасе́ши Адама, и на земли́ не обре́те сего́, Влады́ко, да́же до ада снизше́л еси́ ища́й.

Пути́ моя́ возвести́х, и услы́шал мя еси́, научи́ мя оправда́нием Твои́м.

Сотрясе́ся стра́хом, Сло́ве, вся земля́, и денни́ца лучы́ скры, велича́йшему в земли́ сокрове́нному Твоему́ све́ту.

Путь оправда́ний Твои́х вразуми́ ми, и поглумлю́ся в чудесе́х Твои́х.

Я́ко челове́к у́бо умира́еши во́лею, Спа́се, я́ко Бог же сме́ртныя возста́вил еси́ от гробо́в, и глубины́ грехо́вныя.

Воздрема́ душа́ моя́ от уны́ния, утверди́ мя в словесе́х Твои́х.

Слезото́чная рыда́ния на Тебе́, Чи́стая, Ма́терски, о Иису́се, накрапля́ющи вопия́ше: ка́ко погребу Тя, Сы́не?

Путь непра́вды отста́ви от Мене́, и зако́ном Твои́м поми́луй мя.

Я́коже пшени́чное зе́рно, заше́д в не́дра земна́я, многопе́рстный возда́л еси́ клас, возста́вив челове́ки, я́же от Ада́ма.

Путь и́стины изво́лих, и судьбы́ Твоя́ не забы́х.

Под земле́ю скры́лся еси́ я́ко со́лнце ны́не, и но́щию сме́ртною покрове́н был еси́, но возсия́й светле́йше, Спа́се.

Прилепи́хся свиде́нием Твои́м, Го́споди, не посрами́ мене́.

Я́коже со́лнечный круг, луна́, Спа́се, сокрыва́ет, и Тебе́ ны́не гроб скры, сконча́вшагося сме́ртию пло́тски.

Путь за́поведей Твои́х теко́х, егда́ разшири́л еси́ се́рдце мое́.

Живо́т сме́рти вкуси́вый Христо́с, от сме́рти сме́ртныя свободи́, и всем ны́не да́рует живо́т.

Законоположи́ мне, Го́споди, путь оправда́ний Твои́х и взыщу и́ вы́ну.

Умерщвле́на дре́вле Ада́ма зави́стно, возво́диши к животу́ умерщвле́нием Твои́м, но́вый, Спа́се, во пло́ти явле́йся Ада́м.

Вразуми́ мя, и испыта́ю зако́н Твой, и сохраню́ и́ всем се́рдцем мои́м.

У́мнии тя чи́ни, просте́рта ме́ртва зря́ще нас ра́ди, ужаса́хуся, покрыва́еми крилы́, Спа́се.

Наста́ви мя на стезю́ за́поведей Твои́х, я́ко ту́ю восхоте́х.

Снем тя, Сло́ве, от дре́ва ме́ртва, во гро́бе Ио́сиф ны́не положи́, но воста́ни спаса́яй вся я́ко Бог.

Приклони́ се́рдце мое́ во свиде́ния Твоя́, а не в лихои́мство.

А́нгельская, Спа́се, ра́дость быв, ны́не и печа́ли сим был еси́ вино́вен, ви́дим пло́тию бездыха́нен мертв.

Отврати́ о́чи мои́, е́же не ви́дети суеты́, в пути́ Твое́м живи́ мя.

Возне́слся еси́ на дре́ве, и живу́щыя челове́ки совозно́сиши: под земле́ю же быв, лежа́щыя под не́ю воскреша́еши.

Поста́ви рабу Твоему́ сло́во Твое́ в страх Твой.

Я́коже лев, Спа́се, уснув пло́тию, я́ко не́кий ски́мен мертв востае́ши, отложи́в ста́рость плотску́ю.

Отыми́ поноше́ние мое́, е́же непщева́х, я́ко судьбы Твоя́ благи.

В ре́бра прободе́н был еси́, ребро́ взе́мый Адамле, от него́же Е́ву созда́л еси́, и источи́л еси́ то́ки чисти́тельныя.

Се возжела́х за́поведи Твоя́, в пра́вде Твое́й живи́ мя.

Та́йно у́бо дре́вле жре́тся А́гнец, Ты же я́ве жрен быв, Незло́биве, всю тварь очи́стил еси́, Спа́се.

И да прии́дет на мя ми́лость Твоя́, Го́споди, спасе́ние Твое́ по словеси́ Твоему́.

Кто́ изрече́т о́браз стра́шный вои́стинну но́вый? Влады́чествуяй бо тва́рию, днесь страсть прие́млет, и умира́ет нас ра́ди.

И отвеща́ю поноша́ющым ми сло́во: я́ко упова́х на словеса́ Твоя́.

Живота́ Сокро́вище, ка́ко зри́тся ме́ртвый, ужаса́ющеся а́нгели взыва́ху? Ка́ко же во гро́бе заключа́ется Бог?

И не отыми́ от уст мои́х словесе́ и́стинна до зела, я́ко на судьбы́ Твоя́ упова́х.

Копие́м прободе́ннаго, Спа́се, из ребра Твоего́, живо́т живото́м из живота́ спа́сшаго мя иска́паеши, и живи́ши мя с ним.

И сохраню́ зако́н Твой вы́ну, в век и в век ве́ка.

Распросте́рт на дре́ве, собра́л еси́ челове́ки: в ре́бра же прободе́н, живото́чное всем оставле́ние источа́еши, Иису́се.

И хожда́х в широте́, я́ко за́поведи Твоя́ взысках.

Благообра́зный, Спа́се, образу́ет стра́шно, и погреба́ет Тя я́ко ме́ртва благообра́зно, и ужасается Твоего́ образа стра́шнаго.

И глаго́лах о свиде́ниих Твои́х пред цари́, и не стыдя́хся.

Под земле́ю хоте́нием низше́д я́ко мертв, возво́диши от земли́ к небе́сным отту́ду па́дшыя, Иису́се.

И поуча́хся в за́поведех Твои́х, я́же возлюби́х зело́.

А́ще и мертв ви́ден был еси́, но живы́й я́ко Бог возво́диши от земли́ к небе́сным отту́ду па́дшыя, Иису́се.

И воздвиго́х ру́це мои́ к за́поведем Твои́м, я́же возлюби́х.

А́ще и мертв ви́ден был еси́, но жив я́ко Бог, умерщвле́нныя челове́ки оживи́л еси́, моего́ умертви́в умертви́теля.

И глумля́хся во оправда́ниих Твои́х.

О, ра́дости, о́ныя! О, мно́гия сла́дости! И́хже во а́де напо́лнил еси́, во днах мра́чных свет возсия́в.

Помяни́ словеса Твоя́ рабу Твоему́, и́хже упова́ние дал ми еси́.

Покланя́юся стра́сти, воспева́ю погребе́ние, велича́ю Твою́ держа́ву, Человеколю́бче, и́миже свободи́хся страсте́й тлетво́рных.

То мя уте́ши во смире́нии мое́м, я́ко сло́во Твое́ живи́ мя.

На Тя меч обнажи́ся, Христе́, и меч кре́пкаго у́бо притупля́ется, и меч же обраща́ется Еде́мский.

Го́рдии законопреступова́ху до зела́, от зако́на же Твоего́ не уклони́хся.

А́гница А́гнца зря́щи в заколе́нии, острие́м пробода́ема рыда́ше, сподви́гши и ста́до вопи́ти.

Помяну́х судьбы́ Твоя́ от ве́ка, Го́споди, и уте́шихся.

А́ще и во гро́бе погреба́ешися, а́ще и во ад и́деши; но и гро́бы истощи́л еси́, и ад обнажи́л еси́, Христе́.

Печа́ль прия́т мя от гре́шник, оставля́ющих зако́н Твой.

Во́лею снизше́л еси́, Спа́се, под зе́млю, умерщвле́нный челове́ки оживи́л еси́, и возве́л еси́ во сла́ве О́тчей.

Пе́та бяху мне́ оправда́ния Твоя́ на ме́сте прише́льствия моего́.

Тро́ицы Еди́н во пло́ти нас ра́ди поно́сную претерпе́ смерть, ужаса́ется же со́лнце, и трепе́щет земля́.

Помяну́х в нощи́ И́мя Твое́, Го́споди, и сохрани́х закон Твой.

Я́ко от исто́чника го́рькаго, Иудова коле́на исча́дия в ро́ве положи́ша, пита́теля маннода́вца Иису́са.

Сей бысть мне, я́ко оправда́ний Твои́х взысках.

Судия́ я́ко суди́мь пред Пила́том судие́ю, и предста́, и сме́ртию непра́ведною осужде́н бысть, дре́вом кре́стным.

Часть моя́ еси́, Го́споди, Рех сохрани́ти зако́н Твой.

Го́рдый Изра́илю, уби́йственнии лю́дие, что пострада́вше, Вара́вву свободи́сте, и Спа́са преда́сте Кресту́?

Помоли́хся лицу́ Твоему́ всем се́рдцем мои́м, поми́луй мя по словеси́ Твоему́.

Руко́ю Твое́ю созда́вый Ада́ма от земли́, того́ ра́ди естество́м был еси́ Челове́к, и распялся еси́ во́лею Твое́ю.

Помыслих пути́ Твоя́, и возврати́х но́зе мои́ во свиде́ния Твоя́.

Послушав, Слове, Отца́ Твоего́, да́же до а́да лю́таго соше́л еси́, и воскреси́л еси́ род челове́ческий.

Угото́вихся, и не смути́хся сохрани́ти за́поведи Твоя́.

Увы мне, Све́те ми́ра, увы мне, Све́те Мой, Иису́се Мой возжеле́нный, вопия́ше Де́ва, рыда́ющи го́рько взыва́ше.

У́жя гре́шник обяза́шася мне, и зако́на Твоего́ не забых.

Зави́стливии, уби́йственнии и го́рдии лю́дие, поне́ плащани́цы и сударя́ Самаго́ да стыдятся, воскре́сшу Христу́.

Полу́нощи воста́х, испове́датися Тебе́ о судьба́х пра́вды Твоея́.

Прииди́ у́бо, скве́рный уби́йце учениче́, и нрав зло́бы Твоея́ покажи́ ми, и́мже был еси́ преда́тель Христо́в.

Прича́стник аз есмь всем боя́щымся Тебе́, и храня́щым за́поведи Твоя́.

Я́ко Человеколю́би́в не́кто притворя́ешися бу́е, и сле́пе всегуби́тельнейший, неве́рный, ми́ро прода́вый на цене́.

Ми́лости Твоея́, Го́споди, испо́лнь земли́, оправда́нием Твои́м научи́ мя.

Небе́снаго ми́ра ку́ю име́л еси́ це́ну многоце́ннаго? Ко́е прия́л еси́ противодосто́йное; неи́стовство обре́л еси́ прокля́тейший сатано́.

Бла́гость сотвори́л еси́ с рабо́м Твои́м, Го́споди, по словеси́ Твоему́.

А́ще нищелю́бец еси́, и о ми́ре печа́луеши истоща́емом во очище́ние души́, ка́ко на зла́те продае́ши светоза́рна?

Бла́гости, и наказа́нию и ра́зуму научи́ мя, я́ко за́поведем Твои́м ве́ровах.

О, Бо́жий Сло́ве! О, ра́досте моя́! Ка́ко претерплю́ тридне́вное Твое́ погребе́ние? Ны́не терза́юся утро́бою ма́терски.

Пре́жде да́же не смири́ти ми ся, аз прегреши́х, сего́ ра́ди сло́во Твое́ сохрани́х.

Кто даст Ми воду и слез исто́чники, Богоневе́стная Де́ва взыва́ше: да воспла́чу сла́дкаго Ми Иису́са.

Благ еси́ Ты, Го́споди, и бла́гостию Твое́ю научи́ мя оправда́нием Твои́м.

О го́ры и хо́лми, и челове́ков мно́жества воспла́читеся, и вся рыда́йте со Мно́ю Бо́га вашего Ма́терию.

Умно́жися на мя непра́вда го́рдых, аз же всем се́рдцем мои́м испыта́ю за́поведи Твоя́.

Когда́ ви́жду Тя, Спа́се, безле́тнаго Све́та, ра́дость и сла́дость се́рдца моего́? Де́ва го́рько вопия́ше.

Усыри́ся я́ко млеко́ се́рдце их, аз же зако́ну Твоему́ поучи́хся.

А́ще и я́ко ка́мень, Спа́се, краесеко́мый, Ты прия́л еси́ сече́ние, но источи́л еси́ живу́ю струю́, я́ко Исто́чник сый жи́зни.

Бла́го мне, я́ко смири́л мя еси́, я́ко да научу́ся оправда́нием Твои́м.

Я́ко от исто́чника еди́наго сугу́бою реко́ю ребро́м Твои́м излива́ющым напоя́ющеся, безсме́ртную приобрета́ем жизнь.

Благ мне зако́н уст Твои́х, па́че ты́сящ зла́та и сребра́.

Во́лею яви́лся еси́, Сло́ве, во гро́бе мертв, но живе́ши, и челове́ки, я́коже предре́кл еси́, воскресе́нием Твои́м, Спа́се мой, воздвиза́еши.

Сла́ва Отцу́, и Сы́ну, и Свято́му Ду́ху.

Воспева́ем, Сло́ве, Тебе́, всех Бо́га, со Отце́м и Святы́м Твои́м Ду́хом, и сла́вим Боже́ственное Твое́ погребе́ние.

И ны́не, и при́сно, и во ве́ки веко́в. Ами́нь.

Блажи́м Тя, Богоро́дице Чи́стая, и почита́ем тридне́вное погребе́ние Сы́на Твоего́, и Бо́га на́шего ве́рно.

И па́ки пе́рвый припе́в о́ба ли́ка вку́пе:

Жизнь во гро́бе положи́лся еси́, Христе́, и А́нгельская во́инства ужаса́хуся, снизхожде́ние сла́вяще Твое́.

Ектениа́ ма́лая: Па́ки и па́ки:

И возгла́с свяще́нника: Яко благослови́ся Твое́ И́мя, и просла́вися Твое́ Ца́рство, Отца́, и Сы́на, и Свята́го Ду́ха ны́не, и при́сно, и во ве́ки веко́в.

Лик: Ами́нь. И начина́ем втору́ю статию́, за е́же свяще́ннику соверша́ти кажде́ние ма́лое (Плащаницы, иконостаса, предстоящих).

Статиа́ втора́я

Вторы́й лик поет со сладкопе́нием тропа́рь:

Досто́йно есть велича́ти Тя Жизнода́вца, на Кресте́ ру́це просте́ршаго, и сокру́шшаго держа́ву вра́жию.

Ру́це Твои́ сотвори́сте мя, и создаете мя; вразуми́ мя, и научу́ся за́поведем Твои́м.

Досто́йно есть велича́ти Тя, всех Зижди́теля; Твои́ми бо страда́ньми и́мамы безстра́стие, изба́вльшеся тле́ния.

Боя́щиися Тебе́ у́зрят мя и возвеселя́тся, я́ко на словеса́ Твоя́ упова́х.

Ужасе́ся земля́, и со́лнце, Спа́се, скры́ся, Тебе́ Невече́рнему Свету, Христе́, заше́дшу во гро́бе пло́тски.

Разуме́х, Го́споди, я́ко пра́вда судьбы́ Твоя́, и вои́стинну смири́л мя еси́.

Усну́л еси́, Христе́, естественноживо́тным сном во гро́бе, и от тя́жкаго сна грехо́внаго воздви́гл еси́ род челове́ческий.

Бу́ди же ми́лость Твоя́, да уте́шит мя по словеси́ Твоему́ рабу́ Твоему́.

Еди́на жен кроме́ боле́зней роди́х Тя, Чадо, боле́зни же ны́не терплю́ стра́стию Твое́ю нестерпи́мыя, глаго́лаше Чи́стая.

Да прии́дут мне щедро́ты Твоя́, и жив бу́ду, я́ко зако́н Твой поуче́ние мое́ есть.

Горе́ Тя, Спа́се, неразлучно со Отце́м суща, до́ле же ме́ртва просте́рта на земли́ ужаса́ются зряще Серафи́ми.

Да постыдя́тся го́рдии, я́ко непра́ведно беззако́нноваша на мя, аз же поглумлю́ся в за́поведех Твои́х.

Раздира́ется церко́вная заве́са Твои́м распя́тием, покрыва́ют свети́ла, Сло́ве, свет, Тебе́ скры́вшуся со́лнцу под зе́млю.

Да обратя́т мя боя́щиися Тебе́, и ве́дящии свиде́ния Твоя́.

Земли́ из начала еди́нем ма́нием водрузи́вый круг бездыха́нен, я́ко челове́к, за́йде под зе́млю: ужасни́ся виде́нием не́бо.

Бу́ди се́рдце мое непоро́чно во оправда́ниих Твои́х, я́ко да не постыжу́ся.

Заше́л еси́ под зе́млю, руко́ю Твое́ю созда́вый челове́ка, да воздви́гнеши от паде́ния собо́ры челове́ческия всеси́льною держа́вою.

Исчеза́ет во спасе́ние Твое́ душа́ моя́, на словеса́ Твоя́ упова́х.

Плач свяще́нный прииди́те воспои́м Христу́ уме́ршему, я́ко дре́вле жены́ мироно́сицы, да и ра́дуйся услы́шим с ни́ми.

Исчезо́ша о́чи мои́ в сло́во Твое́, глаго́люще: когда́ уте́шиши мя?

Ми́ро вои́стинну еси́ Ты, Сло́ве, неистощи́мое: те́мже Ти и ми́ра приноша́ху, я́ко ме́ртву живо́му, жены́ мироно́сицы.

Зане́ бых я́ко мех на сла́не, оправда́ний Твои́х не забы́х.

А́дова у́бо погребе́н Ца́рствия, Христе́, сокруша́еши, сме́ртию же смерть умерщвля́еши, и тле́ния свобожда́еши земноро́дныя.

Коли́ко есть дней раба́ Твоего́? Когда́ сотвори́ши ми от гоня́щих мя суд?

То́ки жи́зни пролива́ющая Бо́жия Прему́дрость, во гроб заходя́щи животвори́т су́щыя, в незаходи́мых а́довых ме́стех.

Пове́даша мне законопресту́пницы глумле́ния, но не я́ко зако́н Твой, Го́споди.

Да челове́ческое обновлю́ сокруше́нное естество́, уя́звлен есмь сме́ртию хотя́ пло́тию, Ма́ти Моя́, не терза́йся рыда́ньми.

Вся за́поведи Твоя́ и́стина, непра́ведно погна́ша мя, помози́ ми.

Заше́л еси́ под зе́млю Светоно́сец пра́вды, и ме́ртвыя я́коже от сна воздви́гл еси́, отгна́в вся́кую тьму су́щую во аде.

Вма́ле не сконча́ша мене́ на земли́: аз же не оста́вих за́поведей Твои́х.

Зерно́ двоера́сленое, естественножи́зненное, в бока́ земна́я се́ется со слеза́ми днесь: но прозя́бше, мир ра́достносотвори́т.

По ми́лости Твое́й живи́ мя, и сохраню́ свиде́ния уст Твои́х.

Убоя́ся Адам, Бо́гу ходя́щу в раи́, радуется же ко аду соше́дшу, пады́й пре́жде, и ны́не воздвиза́емь.

Во век, Го́споди, сло́во Твое́ пребыва́ет на Небеси́.

Жрет Тебе́ же́ртвы сле́зныя Ро́ждшая Тя, Христе́, пло́тию положе́ну во гро́бе, вопию́щи: воста́ни, Ча́до, я́коже предре́кл еси́.

В род и род и́стина Твоя́, основал еси́ зе́млю и пребыва́ет.

Во гро́бе Ио́сиф благогове́йно Тя но́вем сокрыва́я, пе́сни исхо́дныя благоле́пныя пое́т Тебе́, смеше́ныя рыда́ньми, Спа́се.

Учине́нием Твои́м пребыва́ет день, я́ко вся́ческая рабо́тна Тебе́.

Гвоздьми́ Тя Кресту́ пригвожде́на, Ма́ти Твоя́, Сло́ве, зря́щи, гвоздьми́ печа́ли го́рькия пронза́ет, и стре́лами ду́шу.

Я́ко а́ще бы не зако́н Твой поуче́ние мое́ был, тогда́ у́бо поги́бл бых во смире́нии мое́м.

Тя всех Наслажде́ние Ма́ти зря́щи, питие́м напая́ема го́рьким, слеза́ми лице́ омака́ет го́рце.

Во век не забу́ду оправда́ний Твои́х, я́ко в них оживи́л мя еси́.

Уязвля́юся лю́те, и растерза́юся утро́бою, Сло́ве, зря́щи непра́ведное Твое́ заколе́ние, глаго́лаше Пречи́стая с пла́чем.

Твой есмь аз, спаси́ мя, я́ко оправда́ний Твои́х взыска́х.

О́ко сладкое, и устне́ Твои́ ка́ко заключу, Сло́ве? Ка́ко же Тя мертволе́пно погребу́? Ужаса́юся, вопия́ше Ио́сиф.

Мене́ жда́ша гре́шницы погуби́ти мя, свиде́ния Твоя́ разуме́х.

Пе́сни Ио́сиф и Никоди́м надгро́бныя пою́т Христу́ уме́ршему ны́не, пою́т же с ни́ми и Серафи́ми.

Вся́кия кончи́ны ви́дех коне́ц, широка́ за́поведь Твоя́ зело́.

Захо́диши под зе́млю, Спа́се, Со́лнце пра́вды; те́мже ро́ждшая Тя Луна́ печа́льми оскудева́ет, ви́да Твоего́ лиша́ема.

Коль возлюби́х зако́н Твой, Го́споди, весь день поуче́ние мое́ есть.

Ужасе́ся ад, Спа́се, зря Тя Жизнода́вца, бога́тство о́наго упражня́юща, и я́же от ве́ка ме́ртвыя возста́вляюща.

Па́че враг мои́х уму́дри́л мя еси́ за́поведию Твое́ю, я́ко в век моя́ есть.

Со́лнце свет возсиява́ет по но́щи, Сло́ве, и Ты же воскре́с, просиява́еши по сме́рти я́сно, я́ко от черто́га.

Па́че всех учащих мя разуме́х, я́ко свиде́ния Твоя́ поуче́ние мое́ есть.

Земля́ Тя, Созда́телю, в не́дра прие́мши, тре́петом содержи́ма, Спа́се, трясе́тся, успи́вши ме́ртвыя трясе́нием.

Па́че старец разуме́х, я́ко за́поведи Твоя́ взысках.

Ми́ры Тя, Христе́, Никоди́м и Благообра́зный, ны́не новоле́пно помазу́юще, ужасни́ся, вопия́ху, вся земля́.

От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́.

Заше́л еси́, Светотво́рче, и с Тобо́ю зайде свет со́лнца: тре́петом же тварь содержи́тся, всех Тя пропове́дающи Творца́.

От суде́б Твои́х не уклони́хся, я́ко Ты законоположи́л ми еси́.

Ка́мень углажде́нный краеуго́льный покрыва́ет ка́мень, челове́к же сме́ртный, я́ко сме́ртна Бо́га, покрыва́ет ны́не во гро́бе: ужасни́ся, земле́.

Коль сладка́ горта́ни Моему́ словеса Твоя́, па́че ме́да усто́м мои́м.

Виждь ученика́, его́же люби́л еси́, и Твою́ Ма́терь, Ча́до, и веща́ние даждь сладча́йшее, взыва́ше пла́чущи Чи́стая.

От заповедей Твои́х разуме́х, сего́ ра́ди возненави́дех всяк Путь непра́вды.

Ты, Слове, я́ко сый живота́ да́тель, иуде́ов, на Кресте́ простры́йся, не умертви́л еси́, но воскреси́л еси́ и сих ме́ртвыя.

Свети́льник нога́ма мои́ма зако́н Твой, и свет стезя́м мои́м.

Добро́ты, Слове, пре́жде не име́л еси́, ниже́ ви́да, егда́ страда́л еси́: но воскре́с провозсия́л еси́, удобри́в челове́ки Боже́ственными заря́ми.

Кля́хся, и поста́вих, сохрани́ти судьбы́ пра́вды Твоея́.

Заше́л еси́ пло́тию в зе́млю Невече́рний Светоно́сец, и не терпя́ зре́ти со́лнце поме́рче, полу́дни еще́ сущу.

Смири́хся до зела́, Го́споди, живи́ мя по словеси́ Твоему́.

Со́лнце вку́пе и луна́ поме́ркше, Спа́се, рабо́м благоразу́мным образова́хуся, и́же в че́рныя оде́жды облача́тся.

Во́льная уст мои́х благоволи́ же Го́споди, и судьба́м Твои́м научи́ мя.

Ви́де Тя, Бо́га, со́тник, а́ще и умертви́лся еси́, ка́ко Тя у́бо, Бо́же мой, осяжу́ рука́ма; ужаса́юся, вопия́ше Ио́сиф.

Душа́ моя́ в руку́ Твое́ю вы́ну, и зако́на Твоего́ не забы́х.

Усну́ Ада́м, но смерть из ребр изво́дит: Ты же ны́не усну́л еси́, Сло́ве Бо́жий, источа́еши от ребр Твои́х ми́рови жизнь.

Положи́ша гре́шницы сеть мне, и от за́поведей Твои́х не заблуди́х.

Усну́л еси́ ма́ло, и оживи́л еси́ уме́ршыя, и воскре́с, воскреси́л еси́ спя́щыя от ве́ка, Бла́же.

Насле́довах свиде́ния Твоя́ во век, я́ко ра́дование се́рдца моего́ суть.

Взят еси́ от земли́, но источи́л еси́ спасе́ния вино́, живото́чная лозо́: просла́вля́ю страсть и Крест.

Приклони́х се́рдце мое́, сотвори́ти оправда́ния Твоя́ в век за воздая́ние.

Ка́ко у́мная чинонача́лия Тя, Спа́се, пою́т, на́га, окрова́влена, осужде́на, терпя́ща де́рзость распина́телей?

Законопресту́пныя возненави́дех, зако́н же Твой возлюби́х.

Обруче́нный, стро́потнейший ро́де евре́йский, ве́дал еси́ воздви́жение хра́ма, почто́ осуди́л еси́ Христа́?

Помо́щник мой и Засту́пник мой еси́ Ты, на словеса́ Твоя́ упова́х.

Во оде́жду поруга́ния, украси́теля всех облека́еши, и́же не́бо утверди́, и зе́млю украси́ чу́дно.

Уклони́теся от Мене́ лука́внующии, и испыта́ю за́поведи Бо́га моего́.

Я́коже нея́сыть уя́звлен в ре́бра Твоя́, Сло́ве, о́троки Твоя́ уме́ршыя оживи́л еси́, иска́пав живо́тныя им то́ки.

Заступи́ мя по словеси́ Твоему́, и жив бу́ду, и не посрами́ мене́ от ча́яния моего́.

Со́лнце пре́жде уста́ви Иису́с, иноплеме́нники секи́й: Ты же скры́лся еси́, низлага́я тьмы нача́льника.

Помози́ ми, и спасу́ся, и поучу́ся во оправда́ниих Твои́х вы́ну.

Недр оте́ческих неисхо́ден пребы́в, Ще́дре, и челове́к бы́ти благоволи́л еси́, и во ад снизше́л еси́, Христе́.

Уничижи́л еси́ вся отступа́ющыя от оправда́ний Твои́х, я́ко непра́ведно помышле́ние их.

Взя́тся распны́йся, И́же на вода́х зе́млю пове́шей, и я́ко бездыха́нен в ней ны́не возлега́ет: я́же не терпя́щи тряса́шеся лю́те.

Преступа́ющыя непщева́х вся гре́шныя земли́, сего́ ра́ди возлюби́х свиде́ния Твоя́.

Увы Мне, о Сы́не! Неискусому́жная рыда́ше глаго́лющи: Его́же бо я́ко царя́ наде́яхся, осужде́на зрю ны́не на Кресте́.

Пригвозди́ стра́ху Твоему́ пло́ти моя́, от суде́б бо Твои́х убоя́хся.

Сия́ Гаврии́л мне возвести́, егда́ слете́, и́же Ца́рство ве́чное рече́, Сы́на Моего́ Иису́са.

Сотвори́х суд и пра́вду, не преда́ждь мене́ оби́дящым мя.

Увы, Симео́ново соверши́ся проро́чество: Твой бо меч про́йде се́рдце Мое́, Еммануиле.

Восприими́ раба́ Твоего́ во бла́го, да не оклевета́ют мене́ го́рдии.

Поне́ су́щих от ме́ртвых постыди́теся, о иуде́е! И́хже Животода́вец возста́ви, Его́же вы уби́сте зави́стно.

Очи мои исчезо́сте во спасе́ние Твое́, и в сло́во пра́вды Твоея́.

Ужасе́ся ви́девшее Неви́димый Све́те, Тебе́, Христе́ мой, во гро́бе сокрыва́ема, бездыха́нна же, и помрачи́ со́лнце свет.

Сотвори́ с рабо́м Твои́м по ми́лости Твое́й, и оправда́нием Твои́м научи́ мя.

Пла́каше го́рько Пренепоро́чная Мати Твоя́, Сло́ве, егда́ во гро́бе ви́де Тебе́ неизрече́ннаго и безнача́льнаго Бо́га.

Раб Твой есмь аз, вразуми́ мя, и уве́м свиде́ния Твоя́.

Ме́ртвость Твою́, нетле́нная, Христе́, Ма́ти Твоя́ зря́щи, го́рько к Тебе́ веща́ше: не косни́, Животе́, в ме́ртвых.

Вре́мя сотвори́ти Го́сподеви, разори́ша зако́н Твой.

Ад лю́тый потрепета́, егда́ Тя ви́де со́лнце сла́вы, Безсме́ртне, и издава́ше ю́зники тща́тельно.

Сего́ ра́ди возлюби́х за́поведи Твоя́, па́че зла́та и топа́зия.

Ве́лие и ужа́сное виде́ние ны́не зри́тся, живота́ сый вино́вный, смерть подъя́т, оживи́ти хотя́ всех.

Сего́ ра́ди ко всем за́поведем Твои́м направля́хся, всяк путь непра́вды возненави́дех.

Пробода́ешися в ре́бра, и пригвожда́ешися, Влады́ко, рука́ми, я́зву от ребра́ Ты исцеля́я, и невоздержа́ние рук праоте́ц.

Ди́вна свиде́ния Твоя́, сего́ ра́ди испыта́ я душа́ моя́.

Пре́жде Рахи́лина сы́на пла́каше всяк и́же в дому́, и Сы́на Де́выя рыда́ху учени́к лик с Ма́терию.

Явле́ние слове́с Твои́х просвеща́ет и вразумля́ет младе́нцы.

Ударе́ние рук да́ша Христо́вой лани́те, руко́ю челове́ка созда́вшаго, и че́люсти зве́ря сокруши́вшаго.

Уста́ моя́ отверзо́х, и привлеко́х дух, я́ко за́поведей Твои́х желах.

Пе́сньми Твое́, Христе́, ны́не распя́тие и погребе́ние, вси ве́рнии пра́зднуем, изба́вльшеся сме́рти погребе́нием Твои́м.

Сла́ва Отцу́, и Сы́ну, и Свято́му Ду́ху.

Безнача́льне Бо́же, Соприсносу́щне Сло́ве, и Ду́ше Святы́й, укрепи́ на ра́тныя, я́ко благ.

И ны́не и при́сно, и во ве́ки веко́в. А ми́нь.

Жизнь ро́ждшая, Пренепоро́чная Чи́стая Де́во, утоли́ церко́вныя собла́зны, и пода́ждь мир я́ко Блага́я.

И па́ки пе́рвый припе́в о́ба ли́ка вку́пе:

Досто́йно есть велича́ти Тя Жизнода́вца, на Кресте́ ру́це просте́ршаго, и сокру́шшаго держа́ву вра́жию.

Ектениа́ ма́лая: Па́ки и па́ки:

И возгла́с свяще́нника: Яко Свят еси́, Бо́же наш, И́же на престо́ле сла́вы херуви́мстем почива́яй, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в.

Лик: Ами́нь.

И начина́ем тре́тию статию́, за е́же свяще́ннику соверша́ти кажде́ние малое.

Статиа́ тре́тия

Пе́рвый лик пое́т со сладкопе́нием, во глас 3:

Ро́ди вси песнь погребе́нию Твоему́ прино́сят, Христе́ мой.

При́зри на мя и поми́луй мя, по суду лю́бящих И́мя Твое́.

Снем с дре́ва и́же от Аримафе́а, плащани́цею обви́в во гро́бе Тя погреба́ет.

Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние.

Мироно́сицы приидо́ша ми́ра Тебе́, Христе́ мой, нося́щыя прему́дро.

Изба́ви мя от клеветы́ челове́ческия, и сохраню́ за́поведи Твоя́.

Гряди́, вся тварь, пе́сни исхо́дныя принесе́м Зижди́телю.

Лице́ Твое́ просвети́ на раба́ Твоего́, и научи́ мя оправда́нием Твои́м.

Яко ме́ртва Жива́го, с мироно́сицами вси миропома́жем му́дренно.

Исхо́дища водна́я изведо́сте о́чи мои́, поне́же не сохрани́х зако́на Твоего́.

Ио́сифе треблаже́нне, погреби́ те́ло Христа́ Жизнода́вца.

Пра́веден еси́, Го́споди, и пра́ви суди́ Твои́.

И́хже воспита́ ма́нною, воздвиго́ша пяту́ на Благоде́теля.

Запове́дал еси́ пра́вду, свиде́ния Твоя́, и и́стину зело.

И́хже воспита́ ма́нною, прино́сят Спасу желчь ку́пно и о́цет.

Иста́яла мя есть ре́вность Твоя́, я́ко забы́ша словеса́ Твоя́ врази́ мои́.

О пребезу́мия и христоуби́йства пророкоуби́йц!

Разжже́но сло́во Твое́ зело́, и раб Твой возлюби́ е́.

Я́коже безу́мный служи́тель, предаде́ учени́к Бе́здну Прему́дрости.

Юне́йший аз есмь и уничиже́н, оправда́ний Твои́х не забых.

Изба́вителя оста́вив, пле́нник оста́вися льсти́вый Иу́да.

Пра́вда Твоя́ пра́вда во век, и зако́н Твой и́стина.

По Соломо́ну ров глубо́кий, уста́ евре́й беззако́нных.

Ско́рби и ну́жди обрето́ша мя, за́поведи Твоя́ поуче́ние мое́.

В стро́потных ше́ствиих евре́ов беззако́нных, волчцы́ и се́ти.

Пра́вда свиде́ния Твоя́ в век, вразуми́ мя, и жив бу́ду.

Ио́сиф погреба́ет с Никоди́мом, мертволе́пно Зижди́теля.

Воззва́х всем се́рдцем мои́м, услы́ши мя, Го́споди, оправда́ния Твоя́ взыщу́.

Жизнода́вче, Спа́се, сла́ва держа́ве Твое́й, ад разо́ршей.

Воззва́х Ти, спаси́ мя, и сохраню́ свиде́ния Твоя́.

Лежа́ща Тя, Пречи́стая, ви́дящи, Сло́ве, матероле́пно пла́каше.

Предвари́х в безго́дии, и воззва́х, на словеса́ Твоя́ упова́х.

О сладча́йшая Моя́ Весно́, сладча́йшее Мое́ Чадо, где Твоя́ за́йде добро́та?

Предвари́сте о́чи мои́ ко утру, поучи́тися словесе́м Твои́м.

Плач сподвиза́ше Всечи́стая Твоя́ Ма́ти, Тебе́, Сло́ве, уме́ршу.

Глас мой услы́ши, Го́споди, по ми́лости Твое́й, по судьбе́ Твое́й живи́ мя.

Жены с ми́ры приидо́ша пома́зати Христа́, Боже́ственнаго ми́ра.

Прибли́жишася гоня́щии мя беззако́нием, от зако́на же Твоего́ удали́шася.

Смерть сме́ртию Ты умерщвля́еши, Бо́же мой, Боже́ственною си́лою Твое́ю.

Близ еси́ Ты, Го́споди, и вси путие́ Твои́ и́стина.

Прельсти́ся преле́стник, прельсти́выйся избавля́ется прему́дростию Твое́ю, Бо́же мой.

И спе́рва позна́х от свиде́ний Твои́х, я́ко в век основа́л я́ еси́.

Во дно а́дово низведе́н бысть преда́тель, в кладене́ц истле́ния.

Виждь смире́ние мое́, и изми́ мя, я́ко зако́на Твоего́ не забых.

Волчцы́ и се́ти путие́ треокая́ннаго безу́мнаго Иу́ды.

Суди́ суд мой, и изба́ви мя, словесе́ ра́ди Твоего́ живи́ мя.

Вси спогиба́ют распина́телие Твои́, Сло́ве, Сы́не Бо́жий Всецарю́.

Дале́че от гре́шник спасе́ние, я́ко оправда́ний Твои́х не взыскаша.

В кладене́ц истле́ния вси спогиба́ют му́жие крове́й.

Щедро́ты Твоя́ мно́ги, Го́споди, по судьбе́ Твое́й живи́ мя.

Сы́не Бо́жий Всецарю, Бо́же мой, Созда́телю мой, ка́ко страсть подъя́л еси́?

Мно́зи изгоня́щии мя и стужа́ющии ми, от свиде́ний Твои́х не уклони́хся.

Ю́ница тельца́ на дре́ве пове́шена взыва́ше зря́щи.

Ви́дех неразумева́ющыя и иста́ях, я́ко слове́с Твои́х не сохрани́ша.

Те́ло живоно́сное Ио́сиф погреба́ет с Никоди́мом.

Виждь, я́ко за́поведи Твоя́ возлюби́х, Го́споди, по ми́лости Твое́й живи́ мя.

Взыва́ше Отрокови́ца те́пле сле́зы точа́щи, утро́бою пробода́ема.

Нача́ло слове́с Твои́х и́стина, и во век вся судьбы пра́вды Твоея́.

Свете о́чию Мое́ю, сладча́йшее Мое́ Ча́до, ка́ко во гро́бе ны́не покрыва́ешися?

Кня́зи погна́ша мя ту́не, и от слове́с Твои́х убоя́ся се́рдце мое́.

Ада́ма и Е́ву свободи́ти, Ма́ти не рыда́й, сия́ стражду.

Возра́дуюся аз о словесе́х Твои́х, я́ко обрета́яй коры́сть мно́гу.

Просла́вля́ю Твое́, Сы́не Мой, кра́йнее благоутро́бие, его́же ра́ди сия́ страждеши.

Непра́вду возненави́дех и омерзи́х, зако́н же Твой возлюби́х.

О́цтом напое́н был еси́ и же́лчию, Ще́дре, дре́внее разреша́я вкуше́ние.

Седмери́цею днем хвали́х Тя, о судьба́х пра́вды Твоея́.

На Кресте́ пригвозди́лся еси́, дре́вле лю́ди Твои́ столпо́м о́блачным покрыва́яй.

Мир мног лю́бящым зако́н Твой, и несть им собла́зна.

Мироно́сицы, Спа́се, ко гро́бу прише́дшыя, ми́ра принесо́ша Тебе́.

Ча́ях спасе́ния Твоего́, Го́споди, и за́поведи Твой возлюби́х.

Воста́ни, Ще́дре, от про́пастей а́дских возставля́яй нас.

Сохрани́ душа́ мой свиде́ния Твоя́, и возлюби́ я́ зело́.

Воскресни́, Жизнода́вче, ро́ждшая Тя Ма́ти, сле́зы точа́щи, глаго́лет.

Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди.

Потщи́ся воскре́снути, печа́ль разреша́я, Сло́ве, чи́сто ро́ждшия Тя.

Да прибли́жится моле́ние мое́ пред Тя, Го́споди, по словеси́ Твоему́ вразуми́ мя.

Небе́сныя си́лы ужасо́шася стра́хом, ме́ртва Тя зряще.

Да вни́дет проше́ние мое́ пред Тя, Го́споди, по слове́си Твоему́ изба́ви мя.

Любо́вию же и стра́хом стра́сти Твоя́ почита́ющым, даждь прегреше́ний разреше́ние.

Отры́гнут устне́ мои́ пе́ние, егда́ научи́ши мя оправда́нием Твои́м.

О ужа́снаго и стра́ннаго виде́ния, Бо́жий Сло́ве! Ка́ко земля́ Тя спокрыва́ет?

Просвеща́ет язык мой словеса́ Твоя́, я́ко вся за́поведи Твоя́ пра́вда.

Носяй Тя дре́вле, Спа́се, Ио́сиф бе́гает, и ны́не Тя ины́й погреба́ет.

Да бу́дет рука Твоя́ е́же спасти́ мя, я́ко за́поведи Твоя́ изво́лих.

Пла́чет и рыда́ет Тя Пречи́стая Ма́ти Твоя́, Спа́се мой, умерщвле́ннаго.

Возжела́х спасе́ние Твое́, Го́споди, и зако́н Твой поуче́ние мое́ есть.

Ужаса́ются умы стра́ннаго и ужаснаго, Тебе́ всех Созда́теля, погребе́ния.

Жива́ бу́дет душа́ моя́, и восхва́лит Тя, и судьбы́ Твоя́ помо́гут мне.

Излия́ша на гроб мироно́сицы ми́ра, зело́ ра́но прише́дшыя.

Заблуди́х я́ко овча́ поги́бшее, взыщи́ раба́ Твоего́, я́ко за́поведей Твои́х не забых.

Мир Це́ркви, лю́дем Твои́м спасе́ние да́руй воста́нием Твои́м.

Сла́ва Отцу́, и Сы́ну, и Свято́му Ду́ху.

О, Тро́ице Бо́же мой, О́тче, Сы́не и Ду́ше, поми́луй мир.

И ны́не, и при́сно, и во ве́ки веко́в. Ами́нь.

Ви́дети Твоего́ Сы́на воскресе́ние, Де́во, сподо́би Твоя́ рабы.

И а́бие соверша́ет свяще́нник кажде́ние всего́ хра́ма.

Лик же пое́т тропари́ сия́, во глас 5:

Благослове́н еси́, Го́споди, научи́ мя оправда́нием Твои́м.

А́нгельский собо́р удиви́ся, зря Тебе́ в ме́ртвых вмени́вшася, сме́ртную же, Спа́се, кре́пость разори́вша, и с собо́ю Ада́ма воздви́гша, и от ада вся свобо́ждша.

Благослове́н еси́, Го́споди, научи́ мя оправда́нием Твои́м.

Почто́ ми́ра с ми́лостивными слеза́ми, о ученицы́, растворяете? Блиста́яйся во гро́бе А́нгел, мироно́сицам веща́ше: ви́дите вы гроб, и уразуме́йте, Спас бо воскре́се от гро́ба.

Благослове́н еси́, Го́споди, научи́ мя оправда́нием Твои́м.

Зело́ ра́но мироно́сицы теча́ху ко гро́бу Твоему́ рыда́ющыя, но предста́ к ним А́нгел, и рече́; рыда́ния вре́мя преста́, не пла́чите, воскресе́ние же апо́столом рцы́те.

Благослове́н еси́, Го́споди, научи́ мя оправда́нием Твои́м.

Мироно́сицы жены, с ми́ры прише́дшыя ко гро́бу Твоему́, Спа́се, рыда́ху, А́нгел же к ним рече́, глаго́ля: что́ с ме́ртвыми жива́го помышля́ете? я́ко Бог бо воскре́се от гро́ба.

Сла́ва Отцу́, и Сы́ну, и Свято́му Ду́ху.

Поклони́мся Отцу́, и Его́ Сы́нови, и Свято́му Ду́ху, Святе́й Трои́це во Еди́ном Существе́, с Серафи́мы зовуще: Свят, Свят, Свят еси́, Го́споди.

И ны́не, и при́сно, и во ве́ки веко́в. Ами́нь.

Жизнода́вца ро́ждши, и греха́, Де́во, Ада́ма изба́вила еси́, ра́дость же Е́ве в печа́ли ме́сто подала́ еси́, па́дшыя же от жи́зни, к сей напра́ви, из Тебе́ воплоти́выйся Бог и Челове́к.

Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды).

Та́же, ектениа́ ма́лая: Па́ки и па́ки:

Возгла́с свяще́нника: Ты бо еси́ Царь ми́ра, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в.

Лик: Ами́нь.

И пое́м седа́лен дне, глас 1:

Подо́бен: Гроб Твой, Спа́се:

Плащани́цею чи́стою и арома́ты Боже́ственными Те́ло Честно́е, испроси́в у Пила́та, миропомазу́ет и полага́ет Ио́сиф в но́вом гробе. Те́мже ура́нше мироно́сицы же́ны, возопи́ша: покажи́ нам, я́коже предре́кл еси́, Христе́, воскресе́ние.

Сла́ва Отцу́, и Сы́ну, и Свято́му Ду́ху.

Плащани́цею чи́стою и арома́ты:

И ны́не и при́сно, и во ве́ки веко́в. Ами́нь.

Ужасо́шася ли́цы А́нгельстии зря́ще Седя́щаго в не́дрех О́тчих, ка́ко во гроб полага́ется я́ко мертв, Безсме́ртный, Его́же чи́ни А́нгельстии окружа́ют, и сла́вят с ме́ртвыми во аде, я́ко Зижди́теля и Го́спода.

И а́бие чтец: Псало́м 50.

И пое́м кано́н, глас 6. Песнь 1

Ирмо́с: Волно́ю морско́ю Скрывшаго дре́вле гони́теля мучи́теля, под земле́ю скры́ша спасе́нных о́троцы: но мы я́ко отрокови́цы Го́сподеви пои́м, сла́вно бо просла́вися. (Два́жды).

Сла́ва Тебе́, Бо́же наш, сла́ва Тебе́.

Го́споди Бо́же мой, исхо́дное пе́ние, и надгро́бную Тебе́ песнь воспою́, погребе́нием Твои́м жи́зни моея́ вхо́ды отве́рзшему, и сме́ртию смерть и ад умертви́вшему. (4 раза).

Сла́ва Тебе́, Бо́же наш, сла́ва Тебе́.

Горе́ Тя на престо́ле, и до́ле во гро́бе, преми́рная и подзе́мная помышля́ющая, Спа́се мой, зы́бляхуся умерщвле́нием Твои́м: па́че ума бо, ви́ден был еси́ мертв. Живонача́льниче. (4 раза).

Сла́ва Тебе́, Бо́же наш, сла́ва Тебе́.

Да Твоея́ сла́вы вся испо́лниши, сшел еси́ в ни́жняя земли́: от Тебе́ бо не скры́ся соста́в мой и́же во Ада́ме, и погребе́н истле́вша мя обновля́еши, Человеколю́бче. (Два́жды).

Сла́ва: Да Твоея́ сла́вы:

И ны́не: Да Твоея́ сла́вы:

Та́же о́ба ли́ка пою́т вку́пе: Волно́ю морско́ю:

Песнь 3

Ирмо́с: Тебе́, на водах Пове́сившаго всю зе́млю неодержи́мо, тварь ви́девши на Ло́бнем ви́сима, у́жасом мно́гим содрога́шеся, несть Свят, ра́зве Тебе́, Го́споди, взыва́ющи. (Два́жды).

Сла́ва Тебе́, Бо́же наш, сла́ва Тебе́.

О́бразы погребе́ния Твоего́ показа́л еси́, виде́ния умно́жив: ны́не же сокрове́нная Твоя́ Богому́жно уясни́л еси́, и су́щым во аде Влады́ко, несть Свят, разве Тебе́, Го́споди, взыва́ющым. (4 раза).

Сла́ва Тебе́, Бо́же наш, сла́ва Тебе́.

Просте́рл еси́ дла́ни, и соедини́л еси́ дре́вле разстоя́щаяся: одея́нием же, Спа́се, е́же в плащани́це и во гро́бе, окованныя разреши́л еси́, несть Свят, разве Тебе́, Го́споди, взыва́ющыя. (4 раза).

Сла́ва Тебе́, Бо́же наш, сла́ва Тебе́.

Гро́бом и печа́тьми, Невмести́ме, содержи́мь был еси́ хоте́нием: и́бо си́лу Твою́ де́йствы показа́л еси́, богоде́йственно пою́щым: несть Свят, ра́зве Тебе́, Го́споди Человеколю́бче. (Два́жды).

Сла́ва: Гро́бом и печа́тьми:

И ны́не: Гро́бом и печа́тьми:

Та́же о́ба ли́ка пою́т вку́пе: Тебе́, на вода́х:

Ектениа́: Па́ки и па́ки:

Возгла́с: Я́ко Ты еси́ Бог наш:

Лик: Ами́нь.

Седа́лен, глас 1:

Гроб Твой, Спа́се, во́ини стрегу́щии, ме́ртви от облиста́ния явльша́гося А́нгела бы́ша, пропове́дающа жена́м воскресе́ние. Тебе́ сла́вим тли Потреби́теля, Тебе́ припа́даем воскре́сшему из гро́ба, и Еди́ному Бо́гу на́шему.

Сла́ва, и ны́не: Гроб Твой, Спа́се:

Песнь 4

Ирмо́с: На Кресте́ Твое́ Боже́ственное истощание прови́дя Авваку́м, ужа́сся вопия́ше: Ты си́льных пресе́кл еси́ держа́ву, Бла́же, приобща́яся су́щым во а́де, я́ко Всеси́лен. (Два́жды).

Сла́ва Тебе́, Бо́же наш, сла́ва Тебе́.

Седмы́й день днесь освяти́л еси́, его́же дре́вле благослови́л еси́ упокое́нием дел: прево́диши бо вся́ческая и обновля́еши, суббо́тствуя, Спа́се мой, и назидая. (4 раза).

Сла́ва Тебе́, Бо́же наш, сла́ва Тебе́.

Си́лою лу́чшаго, победи́вшаго Тебе́, от пло́ти душа́ Твоя́ раздели́ся: растерза́ющи бо обоя́ у́зы, сме́рти и а́да, Сло́ве, держа́вою Твое́ю. (4 раза).

Сла́ва Тебе́, Бо́же наш, сла́ва Тебе́.

Ад, Сло́ве, срет Тя огорчи́ся, Челове́ка зря обоже́на, уя́звлена ра́нами, и Всеси́льноде́теля, Стра́шным же зра́ком поги́бе. (Два́жды).

Сла́ва: Ад, Сло́ве, срет Тя:

И ны́не: Ад, Сло́ве, срет Тя:

Та́же ирмо́с о́ба ли́ка пою́т вку́пе: На Кресте Твое́ Боже́ственное истоща́ние:

Песнь 5

Ирмо́с: Богоявле́ния Твоего́, Христе́, к нам ми́лостивно бы́вшаго, Иса́иа Свет ви́дев Невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси земноро́днии возра́дуются. (Два́жды).

Сла́ва Тебе́, Бо́же наш, сла́ва Тебе́.

Новотвори́ши земныя Создателю, пе́рстен быв, и плащаница и гроб явля́ют е́же в Тебе́, Сло́ве, та́инство: благообразный бо сове́тник, Тебе́, ро́ждшаго сове́т, образу́ет, в Тебе́ велеле́пно новотво́рящаго мя. (4 раза).

Сла́ва Тебе́, Бо́же наш, сла́ва Тебе́.

Сме́ртию сме́ртное, погребе́нием тле́нное прелага́еши, нетле́нно твори́ши бо, благоле́пно безсме́ртно творя́ прия́тие: плоть бо Твоя́ истле́ния не ви́де, Влады́ко, ниже́ душа́ Твоя́ во аде стра́нноле́пно оставле́на бысть. (4 раза).

Сла́ва Тебе́, Бо́же наш, сла́ва Тебе́.

Из Небра́чныя проше́д, и прободе́н в ре́бра, Соде́телю мой, из Нея́ соде́лал еси́ обновле́ние Е́вино, Ада́м быв, усну́в па́че естества́ сном есте́ственным, и жизнь воздви́гнув от сна и тле́ния я́ко Всеси́лен. (Два́жды).

Сла́ва: Из Небра́чныя проше́д:

И ны́не: Из Небра́чныя проше́д:

Та́же ирмо́с о́ба ли́ка пою́т вку́пе: Богоявле́ния Твоего́, Христе́:

Песнь 6

Ирмо́с: Ят бысть, но не удержа́н в пе́рсех кито́вых Ио́на: Твой бо о́браз нося, страда́вшаго, и погребе́нию да́вшагося, я́ко от черто́га от зве́ря изыде, приглаша́ше же кустоди́и: храня́щим су́етная и ло́жная, ми́лость сию́ оста́вили есте́. (Два́жды).

Сла́ва Тебе́, Бо́же наш, сла́ва Тебе́.

Бие́н был еси́, но не раздели́лся, еси́, Сло́ве, ея́же причасти́лся еси́ пло́ти: а́ще бо и разори́ся Твой храм во вре́мя стра́сти, но и та́ко еди́н бе соста́в Бо́жества и пло́ти Твоея́. Во обои́х бо еди́н еси́ Сын, Сло́во Бо́жие, Бог и Челове́к. (4 раза).

Сла́ва Тебе́, Бо́же наш, сла́ва Тебе́.

Человекоуби́йственно, но не богоуби́йственно бысть прегреше́ние Ада́мово: а́ще бо и пострада́ Твоея́ пло́ти пе́рстное существо́, но Бо́жество́ безстра́стно пребы́сть: тле́нное же Твое́ на нетле́ние преложи́л еси́, и нетле́нныя жи́зни показа́л еси́ Исто́чник воскресе́нием. (4 раза).

Сла́ва Тебе́, Бо́же наш, сла́ва Тебе́.

Ца́рствует ад, но не ве́чнует, над ро́дом челове́ческим: Ты бо поло́жся во гро́бе держа́вне. Живонача́льною дла́нию, сме́рти ключи́ разве́ргл еси́, и пропове́дал еси́ от ве́ка та́мо спя́щым избавле́ние нело́жное, быв Спа́се ме́ртвым Пе́рвенец. (Два́жды).

Сла́ва: Ца́рствует ад, но не ве́чнует:

И ны́не: Ца́рствует ад, но не ве́чнует:

Та́же ирмо́с о́ба ли́ка пою́т вку́пе: Ят бысть, но не уде́ржан:

Посе́м ектениа́ ма́лая: Па́ки и па́ки:

Возгла́с свяще́нника: Ты бо еси́ Царь ми́ра:

Лик: Ами́нь.

Та́же конда́к, глас 6:

Бе́здну заключи́вый, мертв зри́тся, и сми́рною и плащани́цею обви́вся, во гро́бе полага́ется я́ко сме́ртный Безсме́ртный: же́ны же приидо́ша пома́зати Его́ ми́ром, пла́чущыя го́рько и вопию́щыя: сий суббо́та есть преблагослове́нная, в не́йже Христо́с усну́в воскре́снет тридне́вен.

И́кос: Содержа́й вся на Кресте́ вознесе́ся, и рыда́ет вся тварь, Того ви́дящи на́га ви́сяща на дре́ве, со́лнце лучы́ сокры́, и зве́зды отложи́ша свет, земля́ же со мно́гим стра́хом поколеба́ся, и мо́ре побеже́, и каме́ние распаде́ся, гро́бы же мно́зи отверзо́шася, и телеса́ воста́ша святы́х муже́й. Ад ни́зу стене́т, и иуде́е сове́туют оклевета́ти Христо́во Воскресе́ние, жены же взыва́ют: Сия́ суббо́та есть преблагослове́нная, в не́йже Христо́с усну́в воскре́снет тридне́вен.

Песнь 7

Ирмо́с: Неизрече́нное чудо, в пещи́ Изба́вивый преподо́бныя о́троки из пла́мене, во гро́бе мертв бездыха́нен полага́ется, во спасе́ние нас пою́щих: Изба́вителю Бо́же, благослове́н еси́. (Два́жды).

Сла́ва Тебе́, Бо́же наш, сла́ва Тебе́.

Уязви́ся ад, в се́рдце прие́м Уязве́ннаго копие́м в ре́бра, и воздыха́ет огне́м Боже́ственным иждива́емь, во спасе́ние нас пою́щих: Изба́вителю Бо́же, благослове́н еси́. (Три́жды).

Сла́ва Тебе́, Бо́же наш, сла́ва Тебе́.

Бога́т гроб, в себе́ бо прии́м я́ко спя́ща Соде́теля, жи́зни Боже́ственное сокро́вище показа́ся, во спасе́ние нас пою́щих: Изба́вителю Бо́же, благослове́н еси́. (Три́жды).

Сла́ва Тебе́, Бо́же наш, сла́ва Тебе́.

Зако́ном уме́рших еже во гро́бе положе́ние, всех прие́млет жизнь, и сего́ исто́чника показу́ет воста́ния, во спасе́ние нас пою́щих: Изба́вителю Бо́же, благослове́н еси́. (Три́жды).

Сла́ва Тебе́, Бо́же наш, сла́ва Тебе́.

Еди́но бя́ше неразлу́чное, е́же во аде, и во гро́бе, и во Еде́ме, Бо́жество́ Христо́во, со Отце́м и Ду́хом, во спасе́ние нас пою́щих: Изба́вителю Бо́же, благослове́н еси́.

Сла́ва: Еди́но бя́ше неразлу́чное:

И ны́не: Еди́но бя́ше неразлу́чное:

Та́же ирмо́с о́ба ли́ка пою́т вку́пе: Неизре́ченное чудо:

Песнь 8

Ирмо́с: Ужасни́ся боя́йся не́бо, и да подви́жатся основа́ния земли́: се бо в мертвеце́х вменя́ется в Вы́шних живы́й, и во гроб мал странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся ве́ки. (Два́жды).

Сла́ва Тебе́, Бо́же наш, сла́ва Тебе́.

Разруши́ся Пречи́стый Храм, па́дшую же совозставля́ет ски́нию: Ада́му бо пе́рвому Вторы́й, И́же в Вы́шних живы́й, сни́де да́же до а́довых сокро́вищ. Его́же о́троцы благослови́те, свяще́нницы воспо́йте, лю́дие превозноси́те во вся ве́ки. (4 раза).

Сла́ва Тебе́, Бо́же наш, сла́ва Тебе́.

Преста де́рзость ученико́в, Аримафе́й же изря́дствует Ио́сиф: ме́ртва бо и на́га зря над все́ми Бо́га, про́сит и погреба́ет, зовы́й: о́троцы благослови́те, свяще́нницы воспо́йте, лю́дие превозноси́те во вся ве́ки. (4 раза).

Сла́ва Тебе́, Бо́же наш, сла́ва Тебе́.

О чуде́с но́вых! О бла́гости! О неизрече́ннаго терпе́ния! Во́лею бо под земле́ю печатле́ется, И́же в Вы́шних живы́й, и я́ко льстец, Бог оклевета́ется. Его́же о́троцы благослови́те, свяще́нницы воспо́йте, лю́дие превозноси́те во вся ве́ки. (Два́жды).

Благослови́м Отца́ и Сы́на и Свята́го Ду́ха, Го́спода.

О чуде́с но́вых! О бла́гости! О неизрече́ннаго:

И ны́не: О чуде́с но́вых! О бла́гости! О неизрече́ннаго:

Хвалим, благослови́м, покланя́емся Го́сподеви, пою́ще и превознося́ще во вся веки́.

Та́же ирмо́с о́ба ли́ка пою́т вку́пе: Ужасни́ся боя́йся не́бо:

Песнь 9

Ирмо́с: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно, я́ко Бог, ве́рою и любо́вию Тя велича́ющыя. (Два́жды).

Сла́ва Тебе́, Бо́же наш, сла́ва Тебе́.

В стра́ннем Твое́м рождестве́, боле́зней избежа́вши па́че естества, ублажи́хся Безнача́льне Сы́не: ны́не же Тя, Бо́же Мой, бездыха́нна зря́щи ме́ртва, ору́жием печа́ли растерза́юся лю́те, но воскресни́, я́ко да возвели́чуся. (4 раза).

Сла́ва Тебе́, Бо́же наш, сла́ва Тебе́.

Земля́ покрыва́ет Мя хотя́ща, но устраша́ются а́довы вра́тницы, оде́яна ви́дяще оде́ждею окровавле́ною Ма́ти, отмще́ния: враги́ бо Кресто́м порази́в я́ко Бог, воскре́сну па́ки, и возвели́чу Тя. (4 раза).

Сла́ва Тебе́, Бо́же наш, сла́ва Тебе́.

Да радуется тварь, да веселя́тся вси земноро́днии, враг бо плени́ся ад: с ми́ры же́ны да срета́ют, Ада́ма со Е́вою избавля́ю всеро́дна, и в тре́тий день воскре́сну. (Два́жды).

Сла́ва: Да ра́дуется тварь:

И ны́не: Да ра́дуется тварь:

Та́же ирмо́с о́ба ли́ка пою́т вку́пе: Не рыда́й Мене́, Ма́ти:

Посем ектениа́ ма́лая: Па́ки и па́ки:

Возгла́с: Я́ко Тя хва́лят вся Си́лы Небе́сныя:

Лик: Ами́нь.

Та́же диа́кон глаго́лет вме́сто свети́льна, во глас 2:

Свят Госпо́дь Бог наш.

Лик: Свят Госпо́дь Бог наш.

Стих: Я́ко Свят Госпо́дь Бог наш.

Лик: Свят Госпо́дь Бог наш.

Стих: Над все́ми людьми́ Бог наш.

Лик: Свят Госпо́дь Бог наш.

И а́бие пою́т: Вся́кое дыха́ние: на о́ба ли́ка во глас то́йже.

Вся́кое дыха́ние да хва́лит Го́спода. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу.

Хвали́те Его́ вси А́нгели Его́, хвали́те Его́ вся си́лы Его́. Тебе́ подоба́ет песнь Бо́гу.

И по чи́ну вся стихи́: Хвали́те Его́ со́лнце и луна́, хвали́те Его́ вся зве́зды и свет. Хвали́те Его́ Небеса́ небе́с, и вода́ я́же превы́ше небе́с, да восхва́лят И́мя Госпо́дне. Я́ко Той рече́ и бы́ша: Той повеле́ и созда́шася. Поста́ви я́ в век и в век ве́ка: повеле́ние положи́ и не ми́мо и́дет. Хвали́те Го́спода от земли́, зми́еве и вся бе́здны. Огнь, град, снег, го́лоть, дух бу́рен, творя́щая сло́во Его́. Го́ры и вси хо́лми, древа́ плодоно́сна и вси ке́дри. Зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси суди́и зе́мстии. Ю́ноши и де́вы, старцы с ю́нотами. Да восхва́лят И́мя Госпо́дне: я́ко вознесе́ся И́мя Того́ Еди́наго. Испове́дание Его́ на земли́ и на небеси́. И вознесе́т рог люде́й Свои́х: песнь всем преподо́бным Его́, сыново́м Изра́илевым, лю́дем приближа́ющымся Ему́.

Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о сотво́ршем Его́, и сы́нове Сио́ни возра́дуются о Царе свое́м. Да восхва́лят И́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве, и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их: Сотвори́ти отмще́ние во язы́цех, обличе́ния в лю́дех. Связа́ти цари́ их пу́ты, и сла́вныя их ручны́ми око́вы желе́зными. Сотвори́ти в них суд напи́сан: сла́ва сия́ бу́дет всем преподо́бным Его́. Хвали́те Бо́га во святы́х Его́, хвали́те Его́ во утверже́нии си́лы Его́.

Зде пое́м на хвали́тех стихи́ры самогла́сны 4, глас 2:

Стих: Хвали́те Его́ на си́лах Его́, хвали́те Его́ по мно́жеству вели́чествия Его́.

Днесь соде́ржит гроб Содержа́щаго дла́нию тварь, покрыва́ет ка́мень Покры́вшаго доброде́телию Небеса́, спит Живо́т, и ад трепе́щет, и Ада́м от уз разреша́ется. Сла́ва Твоему́ смотре́нию, и́мже соверши́в все упокое́ние ве́чное, дарова́л еси́ нам, Бо́же, всесвято́е из ме́ртвых Твое воскресе́ние.

Стих: Хвали́те Его́ во гласе тру́бнем, хвали́те Его́ во псалти́ри и гуслех.

Что́ зри́мое виде́ние? Ко́е настоящее упокое́ние? Царь веко́в, И́же стра́стию соверши́в смотре́ние, во гро́бе суббо́тствует, но́вое нам пода́й суббо́тство, Тому возопии́м: воскресни́, Бо́же, судяй земли́, я́ко Ты Ца́рствуеши во ве́ки, неизме́рную име́яй ве́лию ми́лость.

Стих: Хвали́те Его́ в тимпане и ли́це, хвали́те Его́ во стру́нах и орга́не.

Прииди́те ви́дим Живо́т наш во гро́бе лежа́щ, да во гробе́х лежа́щыя оживи́т. Прииди́те днесь и́же из Иу́ды спя́ща зря́ще, проро́чески Ему́ возопии́м: возле́г уснул еси́ я́ко лев, кто воздви́гнет Тя, Царю́? Но воста́ни самовла́стно, да́вый Себе́ о нас во́лею, Го́споди, сла́ва Тебе́.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Глас 6: Проси́ Ио́сиф те́ло Иису́сово, и положи́ Е́ в но́вем свое́м гро́бе: подоба́ше бо Ему́ из гро́ба, я́ко из черто́га пройти́. Сокруши́вый держа́ву сме́рти, и отве́рзый врата райская челове́ком, Го́споди, сла́ва Тебе́.

Сла́ва Отцу́, и Сы́ну, и Свято́му Ду́ху,

Глас 6: Дне́шний день та́йно вели́кий Моисе́й прообразова́ше, глаго́ля: и благослови́ Бог день седмы́й: сия́ бо есть благослове́нная суббо́та, сей есть упокое́ния день, в о́ньже почи́ от всех дел Свои́х Единоро́дный Сын Бо́жий, смотре́нием еже на смерть, пло́тию суббо́тствовав: и во е́же бе, па́ки возвра́щся воскресе́нием, дарова́ нам живо́т ве́чный, я́ко Еди́н Благ и Человеколю́бец.

И ны́не и при́сно, и во ве́ки веко́в. Ами́нь.

Глас 2: Преблагослове́нна еси́, Богоро́дице Де́во:

При пе́нии хвали́тных стихи́р настоя́тель облача́ется во вся свяще́нныя оде́жды и при пе́нии стихи́ры: Преблагослове́нна еси́, Богоро́дице Де́во: Ца́рскими врата́ми исходит с про́чими клириками на среди́ну храма к Плащани́це и возглаша́ет:

Сла́ва Тебе́, показа́вшему нам свет.

Лик пое́т: Сла́ва в вы́шних Бо́гу:

В конце́ же славосло́вия высоча́йшим гла́сом: Святы́й Бо́же, Святы́й Кре́пкий, Святы́й Безсме́ртный, поми́луй нас.

Пое́му же вели́кому славослови́ю, предстоя́тель кади́т с диа́коном о́крест Плащани́цы. Егда́ же певцы́ пою́т заключи́тельное Святы́й Бо́же, предстоя́тель взе́млет с Плащани́цы Ева́нгелие, полага́ет Его́ себе на главу́, а пове́рх Него́ Плащани́цу, ю́же подде́рживают прочии́ священницы. И обно́сят Плащани́цу вокру́г хра́ма при многокра́тном пе́нии Святы́й Бо́же. При вхо́де в храм Плащани́цу подно́сят к Ца́рским врата́м, и предстоя́тель возглаша́ет: Прему́дрость, про́сти. И возвраща́ются с Плащани́цею на среди́ну хра́ма, полага́юще ю́ на пре́жнем ме́сте. Предстоя́тель соверша́ет кажде́ние о́крест Плащани́цы еди́ножды. Кли́рицы же пою́т тропа́рь еди́ножды:

Благообра́зный Ио́сиф, с дре́ва снем Пречи́стое Те́ло Твое́, Плащани́цею чи́стою обви́в, и воня́ми во гро́бе но́ве покры́в положи́.

Посе́м, тропа́рь проро́чества во глас 2:

Содержа́й концы́, гро́бом содержа́тися изво́лил еси́, Христе́, да от а́дова поглоще́ния изба́виши челове́чество, и воскре́с оживи́ши нас, я́ко Бог Безсме́ртный.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Содержа́й концы́, гро́бом содержа́тися:

Та́же диа́кон: Во́нмем.

Чтец же: Проки́мен, глас четве́ртый: Воскресни, Го́споди, помози́ нам и изба́ви нас И́мене ра́ди Твоего́.

Лик: Воскресни́, Го́споди, помози́ нам и изба́ви нас И́мене ра́ди Твоего́.

Чтец, стих: Бо́же, уши́ма на́шима услы́шахом, и отцы́ на́ши возвести́ша нам.

Лик: Воскресни́, Го́споди, помози́ нам:

Чтец: Воскресни́, Го́споди, помози́ нам.

Лик: И изба́ви нас И́мене ра́ди Твоего́.

Диа́кон: Прему́дрость.

Чтец: Проро́чества Иезеки́илева чте́ние.

Диа́кон: Во́нмем.

Чтец: Бысть на мне́ рука Госпо́дня, и изведе́ мя в ду́се Госпо́дни, и поста́ви мя среде́ по́ля, се же бя́ше по́лно косте́й челове́ческих. И обведе́ мя о́крест их о́коло, и зело́ на ли́цы по́ля, и се су́хи зело́. И рече́ ко мне: Сы́не челове́чь, оживу́т ли ко́сти сия́? И реко́х: Го́споди Бо́же, Ты ве́си сия́. И рече́ ко мне: Сы́не челове́чь, прорцы́ на ко́сти сия́, и рече́ши им: ко́сти сухи́я, слы́шите сло́во Госпо́дне. Се глаго́лет Адона́й Госпо́дь косте́м сим: се Аз введу́ в вас дух живо́тен. И дам на вас жи́лы, и введу́ на вас плоть, и простру́ по вам ко́жу, и дам дух Мой в вас, и оживете́, и уве́сте, я́ко Аз есмь Госпо́дь. И прореко́х, я́коже запове́да ми Госпо́дь, и бысть глас внегда́ ми проро́чествовати, и се трус, и совокупля́хуся ко́сти; кость к ко́сти ка́яждо к соста́ву своему́. И ви́дех, и се бы́ша им жи́лы и плоть растя́ше, и восхожда́ше, (и протяже́ся) им ко́жа верху́, Ду́ха же не бя́ше в них. И рече́ ко мне: прорцы́ о ду́се, прорцы́, сы́не челове́чь, и рцы ду́хови: Сия́ глаго́лет Адона́й Госпо́дь: от четы́рех ве́тров прииди́, Ду́ше, и вдуни на ме́ртвыя сия́, и да оживут. И прореко́х, я́коже повеле́ ми, и вни́де в ня дух жи́зни, и ожи́ша, и ста́ша на нога́х свои́х, собо́р мног зело́. И рече́ Госпо́дь ко мне, глаго́ля: Сы́не челове́чь, сия́ ко́сти весь дом Изра́илев есть: ти́и бо глаго́лют, су́хи бы́ша ко́сти на́ша, поги́бе наде́жда на́ша, убие́ни бы́хом. Того́ ра́ди прорцы́ (сы́не челове́чь), и рцы к ним: сия́ глаго́лет Адона́й Госпо́дь: се Аз отве́рзу гро́бы ва́ша, и изведу́ вас от гроб ваших, лю́дие Мои́, и введу́ вы в зе́млю Изра́илеву. И уве́сте, я́ко Аз есмь Госпо́дь, внегда́ отве́рсти ми гро́бы ва́ша, е́же возвести́ Ми вас от гробо́в ва́ших, лю́дие Мои́: и дам дух Мой в вас, и жи́ви бу́дете. И поста́влю вы на земли́ ва́шей и уве́сте, я́ко Аз Госпо́дь: глаго́лах, и сотворю, глаго́лет Адонай Госпо́дь.

Та́же диа́кон возглаша́ет: Во́нмем.

Чтец: Проки́мен, глас седмый: Воскресни́, Го́споди, Бо́же мой, да вознесе́тся рука Твоя́, не забу́ди убо́гих Твои́х до конца́.

Лик: Воскресни́, Го́споди, Бо́же мой, да вознесе́тся рука Твоя́, не забу́ди убо́гих Твои́х до конца́.

Чтец, стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Лик: Воскресни́, Го́споди, Бо́же мой, да вознесе́тся рука Твоя́, не забу́ди убо́гих Твои́х до конца́.

Чтец: Воскресни́, Го́споди, Бо́же мой, да вознесе́тся рука Твоя́.

Лик: Не забу́ди убо́гих Твои́х до конца́.

Диа́кон: Прему́дрость.

Чтец: К Кори́нфяном послания Свята́го апо́стола Павла чте́ние.

Диа́кон: Во́нмем.

Чтец: Бра́тие, мал квас все смеше́ние ква́сит. Очи́стите у́бо ве́тхий квас, да бу́дете но́во смеше́ние, я́коже есте́ безква́сни: и́бо Па́сха на́ша за ны пожре́н бысть Христо́с. Те́мже да пра́зднуем не в ква́се ве́тсе, ни в ква́се зло́бы и лука́вства, но в безква́сиих чистоты́ и и́стины. Христо́с ны искупи́л есть от кля́твы зако́нныя, быв по нас кля́тва. Пи́сано бо есть: про́кля́т всяк ви́сяй на дре́ве. Да в язы́цех благослове́ние Авраа́мле бу́дет о Христе́ Иису́се, да обетова́ние Ду́ха прии́мем ве́рою.

Свяще́нник: Мир ти.

Чтец: И ду́хови твоему́.

Диа́кон: Прему́дрость.

Чтец: Аллилу́иа.

И а́бие пою́т во глас 5 Аллилу́иа. (Три́жды).

Чтец же глаго́лет стихи сия́.

Стих: Да воскре́снет Бог, и расточа́тся врази́ Его́, и да бежа́т от лица́ Его́ ненави́дящии Его́.

Стих: Я́ко исчеза́ет дым, да исче́знут, я́ко та́ет воск от лица́ огня́.

Стих: Та́ко да поги́бнут гре́шницы от лица́ Бо́жия, а пра́ведницы да возвеселя́тся.

Посе́м возглаша́ет диа́кон: Прему́дрость, про́сти, услы́шим Свята́го Ева́нгелиа.

Свяще́нник: Мир всем.

Лик: И ду́хови твоему́.

Свяще́нник: От Матфе́а Свята́го Ева́нгелиа чте́ние.

Лик: Сла́ва Тебе́, Го́споди, сла́ва Тебе́.

Диа́кон: Во́нмем.

И чтет свяще́нник Ева́нгелие:

Во у́трий день, и́же есть по пятце́, собра́шася архиере́е и фарисе́е к Пила́ту, глаго́люще: Го́споди, помяну́хом, я́ко льстец он рече́ еще́ сый жив: по трие́х днех воста́ну. Повели́ у́бо утверди́ти гроб до тре́тияго дне: да не ка́ко прише́дше ученицы́ Его́ но́щию, украду́т Его́ и реку́т людем: воста от ме́ртвых. И бу́дет после́дняя лесть го́рша пе́рвыя. Рече́ же им Пила́т: и́мате кустоди́ю, иди́те утверди́те, я́коже ве́сте. Они́ же ше́дше утверди́ша гроб, знамена́вше ка́мень с кустоди́ею.

Лик: Сла́ва Тебе́, Го́споди, сла́ва Тебе́.

Посе́м ектениа́ сугубая: Рцем вси:

Возгла́с: Я́ко ми́лостив и Человеколю́бец Бог еси́:

Лик: Ами́нь.

Диа́кон: Испо́лним у́треннюю моли́тву на́шу Го́сподеви.

По возгла́се проси́тельной ектений:

Лик: Ами́нь:

Диа́кон: Прему́дрость.

Лик: Благослови́.

Свяще́нник: Сый благослове́н Христо́с Бог наш, всегда́, ны́не и при́сно, и во ве́ки веко́в.

Лик: Ами́нь. Утверди́, Бо́же, Святу́ю правосла́вную ве́ру, правосла́вных христиа́н во век ве́ка.

Свяще́нник: Пресвята́я Богоро́дице, спаси́ нас.

Лик: Честне́йшую Херуви́м:

Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй. (Три́жды). Благослови́.

Свяще́нник твори́т отпу́ст:

И́же нас ра́ди челове́ков и на́шего ра́ди спасе́ния, стра́шныя стра́сти и Животворя́щий Крест, и во́льное погребе́ние пло́тию изво́ливый, Христо́с, И́стинный Бог наш, моли́твами Пречи́стыя Своея́ Матере, святы́х сла́вных и всехва́льных апо́стол, святы́х и пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Посе́м лик пое́т многоле́тие: Вели́каго Го́сподина:

И быва́ет целова́ние Плащани́цы, а иде́же несть Плащани́цы, целу́ют о́браз: певцы́ же пою́т стихи́ру, глас 5:

Прииди́те, ублажи́м Ио́сифа приснопа́мятнаго, в нощи́ к Пила́ту прише́дшаго, и Живота́ всех испроси́вшаго: даждь ми Сего́ Стра́ннаго, И́же не име́ет где главы́ подклони́ти: даждь ми Сего́ Стра́ннаго, Его́же учени́к лука́вый на смерть предаде́: даждь ми Сего́ Стра́ннаго, Его́же Ма́ти зря́щи на Кресте́ ви́сяща, рыда́ющи вопия́ше и ма́терски восклица́ше: увы́ Мне, Ча́до Мое́! Увы́ Мне, Све́те Мой, и Утро́ба Моя́ возлю́бленная! Симео́ном бо предрече́нное в це́ркви днесь собы́стся: Мое́ се́рдце ору́жие про́йде, но в ра́дость воскресе́ния Твоего́ плач преложи́. Покланя́емся страсте́м Твои́м, Христе́, покланя́емся страсте́м Твои́м, Христе́, покланя́емся страсте́м Твои́м, Христе́, и Свято́му Воскресе́нию.

После́дование часо́в во Святу́ю и Вели́кую суббо́ту

Час пе́рвый

Чтец глаго́лет: Прииди́те, поклони́мся: (Три́жды). И творим последование часа́ по обычаю. Тропа́рь и конда́к – суббо́ты.

Тропа́рь, глас 4:

Благообра́зный Ио́сиф, с дре́ва снем Пречи́стое Те́ло Твое́, плащани́цею чи́стою обви́в, и воня́ми во гро́бе но́ве покры́в положи́.

Конда́к, глас 2:

Бе́здну заключи́вый, мертв зри́тся, и сми́рною и плащани́цею обви́вся, во гро́бе полага́ется я́ко сме́ртный Безсме́ртный; жены же приидо́ша пома́зати Его́ ми́ром, пла́чущыя го́рько и вопию́щыя: Сия́ суббо́та есть преблагослове́нная, в не́йже Христо́с, усну́в, воскре́снет тридне́вен.

Оконча́ние, я́коже обы́чно.

Час тре́тий

Начина́ет свяще́нник: Благослове́н Бог наш, всегда́, ны́не и при́сно, и во ве́ки веко́в.

Чтец: Ами́нь. И обы́чное после́дование часа́.

Тропа́рь и конда́к, как на пе́рвом часе́.

Час шесты́й

Прииди́те, поклони́мся: (Три́жды).

На шесто́м часе́ чтем тропа́рь и конда́к те же.

Час девя́тый

Прииди́те, поклони́мся: (Три́жды).

Час девя́тый чита́ется по обы́чаю, тропа́рь и конда́к суббо́ты, я́коже написа́ся на часе́ пе́рвом.

По девя́том часе́ чтем Блаже́нны, ско́ро, без пе́ния:

Во Ца́рствии Твое́м помяни́ нас, Го́споди, егда́ прии́деши во Ца́рствии Твое́м.

Блаже́ни ни́щии ду́хом, я́ко тех есть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тцыи, я́ко ти́и насле́дят землю.

Блаже́ни а́лчущии и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Блаже́ни чи́стии се́рдцем, я́ко ти́и Бога у́зрят.

Блаже́ни миротво́рцы, я́ко ти́и сы́нове Бо́жии нареку́тся.

Блаже́ни изгна́ни пра́вды ра́ди, я́ко тех есть Ца́рство Небе́сное.

Блаже́ни есте́, егда́ поно́сят вам, и изжену́т, и реку́т всяк зол глаго́л на вы лжу́ще, Мене́ ра́ди.

Ра́дуйтеся и весели́теся, я́ко мзда ва́ша мно́га на Небесе́х.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Помяни́ нас, Го́споди, егда́ прии́деши во Ца́рствии Твое́м.

Помяни́ нас, Влады́ко, егда́ прии́деши во Ца́рствии Твое́м.

Помяни́ нас, Святы́й, егда́ прии́деши во Ца́рствии Твое́м.

Лик Небе́сный пое́т Тя и глаго́лет: Свят, Свят, Свят Госпо́дь Савао́ф, испо́лнь не́бо и земля́ сла́вы Твоея́.

Стих: Приступи́те к Нему́ и просвети́теся, и ли́ца ва́ша не постыдя́тся.

Лик Небе́сный пое́т Тя и глаго́лет: Свят, Свят, Свят Госпо́дь Савао́ф, испо́лнь не́бо и земля́ сла́вы Твоея́.

Сла́ва Отцу́, и Сы́ну, и Свято́му Ду́ху.

Лик Святы́х А́нгел и Арха́нгел, со все́ми Небе́сными Си́лами, пое́т Тя и глаго́лет: Свят, Свят, Свят Госпо́дь Савао́ф, испо́лнь не́бо и земля́ сла́вы Твоея́.

И ны́не и при́сно, и во ве́ки веко́в. Ами́нь.

Ве́рую:

Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, и́же во дни и в нощи́, я́же во уме́ и в помышле́нии, вся нам прости́, я́ко Благ и Человеколю́бец.

О́тче наш:

Свяще́нник: Я́ко Твое́ есть Ца́рство:

Чтец: Ами́нь.

Конда́к: Бе́здну заключи́вый, мертв зри́тся:

Го́споди, поми́луй. ( 12 ).

И моли́тва:

Всесвята́я Тро́ице, Единосу́щная Держа́ва, Неразде́льное Ца́рство, всех благи́х Вина́: благоволи́ же и о мне, гре́шнем, утверди́, вразуми́ се́рдце мое́, и всю мою́ отыми́ скве́рну, просвети́ мою́ мысль, да вы́ну сла́влю, пою, и покланя́юся, и глаго́лю: Еди́н Свят, Еди́н Госпо́дь Иису́с Христо́с, во сла́ву Бо́га Отца́. Ами́нь.

Диа́кон: Прему́дрость.

Лик: Досто́йно есть:

Свяще́нник: Пресвята́я Богоро́дице, спаси́ нас.

Лик: Честне́йшую Херуви́м:

Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй. (Три́жды). Благослови́.

Свяще́нник творит отпуст: Христо́с, И́стинный Бог наш:

Лик пое́т многоле́тие: Вели́каго Господи́на:

После́дование вече́рни во Святу́ю и Вели́кую суббо́ту

Собра́вшеся во храм, начина́ем вечерню си́це:

Диа́кон возглаша́ет: Благослови́, Влады́ко.

Свяще́нник: Благослове́но Ца́рство Отца́, и Сы́на, и Свята́го Ду́ха ны́не, и при́сно, и во ве́ки веко́в.

Лик: Ами́нь.

Чтец: обы́чное нача́ло и вече́рний псало́м 103 ( зри сноску № 1 ).

Посе́м ектениа́ вели́кая: Ми́ром Го́споду помо́лимся.

И возгла́с свяще́нника: Я́ко подоба́ет Тебе́ всякая сла́ва:

Лик: Ами́нь. Та́же пою́т: Го́споди воззва́х, на о́ба ли́ка во глас 1 .

Го́споди, воззва́х к Тебе́, услы́ши мя, услы́ши мя, Го́споди: Го́споди, воззва́х к Тебе́, услы́ши мя: вонми́ гла́су моле́ния моего́, внегда́ воззвати ми к Тебе́. Услы́ши мя, Го́споди.

Да испра́вится моли́тва моя́, я́ко кади́ло пред Тобо́ю: воздея́ние руку́ мое́ю же́ртва вече́рняя. Услы́ши мя, Го́споди.

И по чи́ну стихи́:

Положи́, Го́споди, хране́ние усто́м мои́м:

Зде пое́м стихи́ры воскре́сныя осмогла́сника 3 и от стихо́вны, глас 1:

Из глубины́ воззва́х к Тебе́, Го́споди, Го́споди, услы́ши глас мой.

Вече́рния на́ша моли́твы приими́, Святы́й Го́споди, и пода́ждь нам оставле́ние грехо́в, я́ко еди́н еси́ явле́й в ми́ре воскресе́ние.

Да бу́дут у́ши Твои́ вне́млюще гла́су моле́ния моего́.

Обыди́те лю́дие Сио́н, и обыми́те его́, и дади́те сла́ву в нем воскре́сшему из ме́ртвых: я́ко Той есть Бог наш, избавле́й нас от беззако́ний на́ших.

А́ще беззако́ния на́зриши, Го́споди, Го́споди, кто́ постои́т? Я́ко у Тебе́ очище́ние есть.

Прииди́те, лю́дие, воспои́м, и поклони́мся Христу́, сла́вяще Его́ из ме́ртвых воскресе́ние, я́ко Той есть Бог наш, от ле́сти вра́жия мир избавле́й.

И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стра́стию Твое́ю, Христе́, от страсте́й свободи́хомся, и воскресе́нием Твои́м из истле́ния изба́вихомся; Го́споди, сла́ва Тебе́.

И́ны стихи́ры самогла́сны 4, глас 8:

От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Днесь ад стеня́ вопие́т: у́не мне бя́ше, а́ще бых от Мари́и Ро́ждшагося не прия́л: прише́д бо на мя держа́ву мою́ разруши́, врата́ ме́дная сокруши́: ду́шы, я́же содержа́х пре́жде, Бог сый воскреси́. Сла́ва, Го́споди, Кресту́ Твоему́ и Воскресе́нию Твоему́.

Я́ко у Го́спода ми́лость, и мно́гое у Него́ избавле́ние: и Той изба́вит Изра́иля от всех беззако́ний его́.

Днесь ад стеня́:

Хвали́те Го́спода, вси язы́цы, похвали́те Его́, вси лю́дие.

Днесь ад стеня́ вопие́т: разруши́ся моя́ власть, прия́х Ме́ртваго я́ко Еди́наго от уме́рших: сего́ бо держа́ти отню́д не могу́, но погубля́ю с Ним, и́миже ц́рствовах: аз име́х мертвецы́ от ве́ка, но Сей (Се) всех воздвиза́ет. Сла́ва, Го́споди, Кресту́ Твоему́ и Воскресе́нию Твоему́.

Я́ко утверди́ся ми́лость Его́ на нас, и и́стина Госпо́дня пребыва́ет во век.

Днесь ад стеня́ вопие́т: поже́рта моя́ бысть держа́ва, Па́стырь распя́тся и Ада́ма воскреси́. И́миже ца́рствовах, лиши́хся, и я́же пожро́х возмоги́й, всех изблева́х: истощи́ гро́бы Распны́йся, изнемога́ет сме́ртная держа́ва. Сла́ва, Го́споди, Кресту́ Твоему́ и Воскресе́нию Твоему́.

Сла́ва Отцу́, и Сы́ну, и Свято́му Ду́ху.

Глас 6: Дне́шний день та́йно вели́кий Моисе́й прообразова́ше, глаго́ля: и Благослови́ Бог день седмый: сия́ бо есть благослове́нная суббо́та, сей есть упокое́ния день, В о́ньже почи́ от всех дел Свои́х Единоро́дный Сын Бо́жий, смотре́нием е́же на смерть, пло́тию суббо́тствовав: и во е́же бе, па́ки возвра́щся воскресе́нием, дарова́ нам живо́т ве́чный, я́ко Еди́н Благ и Человеколю́бец.

И ны́не и при́сно, и во ве́ки веко́в. Ами́нь.

Богоро́дичен, глас 1:

Всеми́рную Сла́ву от челове́к прозя́бшую, и Влады́ку ро́ждшую, Небе́сную Дверь воспои́м Мари́ю Де́ву, безпло́тных Песнь и ве́рных Удобре́ние, Сия́ бо яви́ся Не́бо и Храм Бо́жества: Сия́ прегражде́ние вражды́ разруши́вши, мир введе́ и Ца́рствие отве́рзе. Сию́ у́бо иму́ще ве́ры утвержде́ние, Побо́рника и́мамы из Не́я ро́ждшагося Го́спода. Дерза́йте у́бо, дерза́йте, лю́дие Бо́жии: и́бо Той победи́т враги́ я́ко Всеси́лен.

И вход со Ева́нгелием.

Диа́кон: Прему́дрость, про́сти.

Лик: Свете Ти́хий:

Диа́кон: Прему́дрость.

Чтец: Бы́тия чте́ние.

Диа́кон: Во́нмем.

Чтец: В начале сотвори́ Бог не́бо и зе́млю. Земля́ же бе неви́дима и неустро́ена, и тьма верху́ бе́здны: и дух Бо́жий ноша́шеся верху́ воды́. И рече́ Бог: да бу́дет свет, и бысть свет. И ви́де Бог свет, я́ко добро́: и разлучи́ Бог между све́том и между тьмо́ю. И нарече́ Бог свет день, а тьму нарече́ нощь. И бысть ве́чер, и бысть утро, день еди́н. И рече́ Бог: да бу́дет твердь посреде́ воды, и да бу́дет разлуча́ющи посреде́ воды и воды́: и бысть та́ко. И сотвори́ Бог твердь: и разлучи́ Бог между водо́ю, я́же бе под тве́рдию, и между водо́ю, я́же бе над тве́рдию. И нарече́ Бог твердь не́бо, и ви́де Бог, я́ко добро́: и бысть ве́чер, и бысть утро, день вторы́й. И рече́ Бог: да собере́тся вода, я́же под небесе́м, в собра́ние еди́но, и да яви́тся су́ша: и бысть та́ко. И собра́ся вода, я́же под небесе́м, в собра́ния Своя́, и яви́ся суша. И нарече́ Бог сушу зе́млю, и собра́ния вод нарече́ моря, и ви́де Бог, я́ко добро́. И рече́ Бог: да прорасти́т земля́ былие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же семя его́ в нем по роду на земли́: и бысть та́ко. И изнесе́ земля́ былие́ травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя Его́ в нем по роду на земли́: и ви́де Бог, я́ко добро́. И бысть ве́чер, и бысть утро, день тре́тий.

Диа́кон: Прему́дрость.

Чтец: Проро́чества Иса́иина чте́ние.

Диа́кон: Во́нмем.

Чтец: Свети́ся, свети́ся, Иерусали́ме, прии́де бо твой свет, и сла́ва Госпо́дня на тебе́ возсия́. Се тьма покры́ет зе́млю и мрак на язы́ки, на тебе́ же яви́тся Госпо́дь, и сла́ва Его́ на тебе́ у́зрится. И по́йдут царие све́том твои́м и язы́цы све́тлостию твое́ю. Возведи́ о́крест о́чи твои́, и виждь собра́ная чада твоя́: се приидо́ша вси сы́нове твои́ издале́ча, и дще́ри твои́ на ра́мех во́змутся. Тогда́ у́зриши, и возра́дуешися, и убои́шися, и ужасне́шися се́рдцем, я́ко преложи́тся к тебе́ бога́тство морско́е, и язы́ков, и люде́й. И прии́дут к тебе́ стада́ вельблю́д, и покры́ют тя вельблю́ди Мадиа́мстии и Гефа́рстии: вси от Са́вы прии́дут, нося́ще зла́то, и Лива́н принесу́т, и ка́мень че́стен, и спасе́ние Госпо́дне благовозвестя́т. И вся о́вцы Кида́рския соберу́тся тебе́, и о́вии Навео́фстии прии́дут к тебе́, и вознесу́тся прия́тная на же́ртвенник Мой, и дом моли́твы Мое́й просла́вится. Ки́и суть, и́же я́ко о́блацы летят, и я́ко го́луби со птенцы́ ко Мне? Мене́ о́строви жда́ша, и корабли́ Фарси́йстии в пе́рвых, привести́ ча́да Твоя́ издале́ча, и сре́бро и зла́то их с ни́ми, И́мене ра́ди Госпо́дня Свята́го, и за е́же Свято́му Изра́илеву сла́вну бы́ти. И сози́ждут сы́нове иноро́днии сте́ны Твоя́, и ца́рие их предстоя́ти бу́дут тебе́; за гнев бо Мой порази́х тя, и за ми́лость Мою́ возлюби́х тя. И отве́рзутся врата́ Твоя́ при́сно, день и нощь не затворя́тся, ввести́ к тебе́ си́лу язы́к, и цари́ их ведо́мыя. Язы́цы бо и царие, и́же не порабо́тают ти, поги́бнут, и язы́цы запусте́нием запусте́ют. И сла́ва Лива́нова к тебе́ прии́дет, кипари́сом, и пе́вгом, и ке́дром, вку́пе просла́вити ме́сто свято́е Мое́, и ме́сто ног Мои́х просла́влю. И по́йдут к тебе́ боя́щеся сы́нове смири́вших тя и раздражи́вших Тя и покло́нятся следа́м ног твои́х вси прогне́вавшии тя: и нарече́тся град Госпо́день, Сио́н Свята́го Изра́илева. За сие́, я́ко был еси́ оставле́н и возненави́ден, и не бе помога́ющаго ти: положу́ тя в ра́дость ве́чную, весе́лие родо́м родо́в. И изсее́ши млеко́ язы́ков, и бога́тство царе́й сне́си, и уразуме́еши, я́ко Аз Госпо́дь спаса́яй тя, и избавля́яй тя Бог Изра́илев.

Диа́кон: Прему́дрость.

Чтец: Исхо́да чте́ние.

Диа́кон: Во́нмем.

Чтец: Рече́ Госпо́дь к Моисе́ю и Ааро́ну в земли́ Еги́петстей, глаго́ля: ме́сяц сей вам нача́ло ме́сяцей, пе́рвый бу́дет вам в ме́сяцех ле́та. Рцы ко всему со́нму сыно́в Изра́илевых, глаго́ля: в деся́тый ме́сяца сего́ да во́змет ки́йждо овча́ по домо́м оте́честв, ки́йждо овча́ по до́му. А́ще же ма́ло их есть в дому́, я́ко недово́льным бы́ти на овча́, да во́змет с собо́ю сосе́да бли́жняго своего́ по числу́ душ, ки́йждо дово́льное себе сочте́т на овча́. Овча́ соверше́нно, му́жеск пол, непоро́чно и единоле́тно бу́дет вам, от А́гнец и от ко́злищ прии́мете. И бу́дет вам соблюде́но да́же до четвертагона́десять дне ме́сяца сего́: и зако́лют то все мно́жество собо́ра сыно́в Изра́илевых к ве́черу. И прии́мут от кро́ве, и пома́жут на обою́ подво́ю, и на пра́гах в доме́х, в ни́хже снедя́т то́е. И снедя́т мя́са в нощи́ той пече́на огне́м, и опре́сноки с го́рьким зе́лием снедя́т. Не сне́сте от них суро́во, ниже́ варе́но в воде́, но пече́ное огне́м, главу́ с нога́ми и со утро́бою. Не оста́вите от него́ до у́трия, и ко́сти не сокруши́те от него́: оста́нки же от него́ до утра́ огне́м сожже́те. Си́це же сне́сте е́: чре́сла ва́ша препоя́сана, и сапози́ ва́ши на нога́х ва́ших, и же́злы ва́ши в рука́х ва́ших: и сне́сте е́ со тща́нием: Па́сха есть Госпо́дня.

Диа́кон: Прему́дрость.

Чтец: Проро́чества Ио́нина чте́ние.

Диа́кон: Во́нмем.

Чтец: Бысть сло́во Госпо́дне ко Ио́не, Сы́ну Амафи́ину, глаго́ля: воста́ни и иди́ в Ниневи́ю, град вели́кий, и пропове́ждь в нем, я́ко взы́де вопль зло́бы его́ ко Мне. И воста Ио́на, е́же бежа́ти в Фарси́с от лица́ Госпо́дня: и сни́де во Иоппи́ю, и обре́те кора́бль иду́щ в Фарси́с: и даде́ нае́м свой, и вни́де в онь плы́ти с ни́ми в Фарси́с от лица́ Госпо́дня. И Госпо́дь воздви́же ветр ве́лий на мо́ри, и бысть бу́ря вели́кая в мо́ри, и кора́бль бе́дствоваше е́же сокруши́тися. И убоя́шася корабе́льницы, и возопи́ша ки́йждо к Бо́гу своему́, и измета́ние сотвори́ша сосу́дов, и́же в корабли́ в мо́ре, еже облегчи́тися от них; Ио́на же сни́де во дно корабля́, и спа́ше ту и храпля́ше. И прии́де к Нему́ ко́рмчий и рече́ ему́: что́ ты хра́плеши? Воста́ни и моли́ Бо́га твоего́, я́ко да спасе́т ны Бог, да не поги́бнем. И рече́ ки́йждо ко и́скреннему своему́: Прииди́те ве́ржем жре́бия, и уразуме́ем, кого́ ра́ди есть зло сие́ на нас; и метну́ша жре́бия, и паде́ жре́бий на Ио́ну. И ре́ша к нему́: возвести́ нам, кого́ ра́ди сие́ зло на нас, и что́ твое́ де́лание есть, и отку́ду гря́деши, и ка́мо и́деши, и от коея́ страны́, и от ки́их люде́й еси́ ты. И рече́ к ним: раб Госпо́день есмь аз и Го́спода Бо́га Небе́снаго аз чту, И́же сотвори́ мо́ре и су́шу. И убоя́шася му́жие стра́хом вели́ким и ре́ша к нему́: что́ сие́ сотвори́л еси́? Зане́ разуме́ша му́жие, я́ко от лица́ Госпо́дня бежа́ше, я́ко возвести́ им. И ре́ша к Нему́: что́ тебе́ сотвори́м, и утоли́тся мо́ре от нас? Зане́ мо́ре восхожда́ше, и воздвиза́ше па́че волне́ние. И рече́ к ним Ио́на: возми́те мя, и вве́рзите в мо́ре, и утоли́тся мо́ре от вас: поне́же позна́х аз, я́ко мене́ ра́ди волне́ние сие́ вели́кое на вы есть. И нужда́хуся му́жие возврати́тися к земли́ и не можа́ху, я́ко мо́ре восхожда́ше и воздвиза́шеся па́че на них. И возопи́ша к Го́сподеви, и ре́ша: ника́коже, Го́споди, да не поги́бнем души́ ра́ди челове́ка сего́, и не даждь на нас кро́ве пра́ведныя: зане́ Ты, Го́споди, я́коже восхоте́л, сотвори́л еси́. И взя́ша Ио́ну и вверго́ша его́ в мо́ре, и преста́ мо́ре от волне́ния своего́. И убоя́шася му́жие стра́хом вели́ким Го́спода, и пожро́ша же́ртву Го́сподеви, и помоли́шася моли́твами. И повеле́ Госпо́дь ки́ту вели́кому пожре́ти Ио́ну: и бе Ио́на во чре́ве ки́тове три дни и три но́щи. И помоли́ся Ио́на ко Го́споду Бо́гу своему́ от чре́ва ки́това, и рече́:

Возопи́х в ско́рби мое́й ко Го́споду Бо́гу Моему́, и услы́ша мя: из чре́ва а́дова вопль мой, услы́шал еси́ глас мой. Отве́ргл мя еси́ в глубины́ се́рдца морска́го, и ре́ки обыдо́ша мя: вся высо́ты Твоя́, и во́лны Твоя́ на мне преидо́ша. И аз рех: отри́нухся от о́чию Твое́ю, еда́ приложу́ призре́ти ми к хра́му свято́му Твоему́. Возлия́ся на мя вода́ до души́ моея́, бе́здна обы́де мя после́дняя, понре́ глава́ моя́ в разсе́лины гор. Снидо́х в зе́млю, ея́же вереи́ ея́ закле́пи ве́чнии. И да взы́дет из истле́ния живо́т мой к Тебе́, Го́споди Бо́же мой. Внегда́ скончава́тися от Мене́ души́ моея́, Го́спода помяну́х, и да прии́дет к Тебе́ моли́тва моя́ к храму свято́му Твоему́. Храня́щий су́етная и ло́жная, ми́лость свою́ оста́виша. Аз же со гла́сом хвале́ния и испове́дания пожру́ Тебе́, ели́ка обеща́х, возда́м Тебе́ во спасе́ние мое́, Го́сподеви. И повеле́ Госпо́дь ки́тови, и изве́рже Ио́ну на су́шу. И бысть сло́во Госпо́дне ко Ио́не втори́цею, глаго́ля: воста́ни и иди́ в Ниневи́ю, град вели́кий, и пропове́ждь в нем по про́поведи пре́ждней, юже Аз глаго́лах тебе́. И воста Ио́на и и́де в Ниневи́ю, я́коже глаго́ла Госпо́дь: Ниневи́а же бя́ше град вели́к Бо́гу, я́ко ше́ствия пути́ трех дней. И на́чат Ио́на входи́ти во град, я́ко ше́ствие пути́ дне еди́наго, и пропове́да и рече́: еще́ три дни, и Ниневи́а преврати́тся. И ве́роваша му́жие ниневи́йстии Бо́гови, и запове́даша пост, и облеко́шася во вре́тища от вели́ка их да́же до ма́ла их. И́ до́йде сло́во к Царю́ Ниневи́йскому, и воста́ с престо́ла своего́, и све́рже ри́зы своя́ с себе́, и облече́ся во вре́тище, и се́де на пе́пеле. И пропове́дася, и рече́но бысть в Ниневи́и от царя́, и вельмо́ж его́, глаго́лющих: челове́цы, и ско́ти, и воло́ве, и о́вцы, да не вкуся́т ничесо́же, ни да пасу́тся, ниже́ воды́ да пию́т. И облеко́шася во вре́тища челове́цы, и ско́ти, и возопи́ша приле́жно к Бо́гу: и возврати́ся ки́йждо от пути́ своего́ лука́ваго, и от непра́вды су́щия в рука́х их, глаго́люще: кто весть, а́ще раска́ется и умоле́н бу́дет Бог, и обрати́тся от гне́ва я́рости своея́, и не поги́бнем; и ви́де Бог дела их, я́ко обрати́шася от путе́й свои́х лука́вых: и раска́яся Бог о зле, е́же глаго́лаше сотвори́ти им, и не сотвори́. И опеча́лися Ио́на печа́лию вели́кою, и смути́ся. И помоли́ся ко Го́споду, и рече́: О, Го́споди, не сия́ ли у́бо словеса́ моя́, я́же глаго́лах, еще́ сущу ми на земли́ мое́й? Сего́ ра́ди предвари́х бежа́ти в Фарси́с, зане́ разуме́х, я́ко ми́лостив Ты еси́ и щедр, долготерпели́в и многоми́лостив, и кая́йся о зло́бах (челове́ческих). И ны́не, Влады́ко Го́споди, приими́ ду́шу мою́ от Мене́, я́ко у́не ми умре́ти, не́жели жи́ти. И рече́ Госпо́дь ко Ио́не: а́ще зело опеча́лился еси́ ты? И изы́е Ио́на из гра́да, и се́де пря́мо гра́да, и сотвори́ себе́ ку́щу, и седя́ше под не́ю в се́ни, до́ндеже уви́дит, что́ бу́дет гра́ду. И повеле́ Госпо́дь Бог ты́кве, и возрасте́ над главо́ю Ио́ниною, да бу́дет сень над главо́ю его́, е́же осени́ти его́ от злых его́, и возра́довася Ио́на о ты́кве ра́достию вели́кою. И повеле́ Го́сподь Бог че́рвию ра́ннему во у́трие, и подъяде́ ты́кву, и и́зсше. И бысть вку́пе внегда́ возсия́ти со́лнцу, и повеле́ Бог ве́тру зно́йному жегу́щу, и порази́ со́лнце на главу́ Ио́нину: и малоду́шствоваше, и отрица́шеся ду́ши своея́, и рече́: у́не ми умре́ти, не́жели жи́ти. И рече́ Госпо́дь Бог ко Ио́не: зело́ ли опеча́лился еси́ ты о ты́кве? И рече́ (Ио́на): зело́ опечалихся аз да́же до сме́рти. И рече́ Госпо́дь: ты оскорби́лся еси́ о ты́кве, о не́йже не труди́лся еси́, ни воскорми́л еси́ ей, и́же роди́ся обно́щь и обно́щь поги́бе. Аз же не поща́жду ли Ниневи́и гра́да вели́каго, в не́мже живу́т мно́жайшии не́же двена́десять тем челове́к, и́же не позна́ша десни́цы своея́, ниже́ шу́йцы своея́ и ско́ти их мно́зи?

Диа́кон: Прему́дрость.

Чтец: Иису́са Нави́на чте́ние.

Диа́кон: Во́нмем.

Чтец: Ополчи́шася сы́нове Изра́илевы в галга́лех, и сотвори́ша Пасху в четвертыйна́десять день ме́сяца от ве́чера на за́паде на по́ли Иерихо́нском. И ядо́ша от пшени́цы земли́ о́ноя опресно́ки и но́вая. В той день преста ма́нна, повнегда́ ядо́ша от пшени́цы земли́, и ктому́ не бысть сыно́м Изра́илевым ма́нны, но ядо́ша от плодо́в земли́ Фини́ческия в ле́то о́ное. И бысть егда́ би́ше Иису́с у Иерихо́на, и воззре́в очи́ма свои́ма, ви́де челове́ка стоя́ща пред ним, и меч его́ обнаже́н в руце́ его́. И приступи́в Иису́с, рече́ ему́: наш ли еси́, или́ от сопоста́т на́ших. Он же рече́ ему́: аз Архистрати́г си́лы Госпо́дни, ны́не приидо́х (се́мо). И Иису́с паде́ лице́м свои́м на зе́млю, и поклони́ся ему́, и рече́: Го́споди, что повелева́еши рабу́ твоему́. И рече́ Архистрати́г Госпо́день ко Иису́су: иззу́й сапо́г с но́гу твое́ю, ме́сто бо, на не́мже ты стои́ши, свя́то есть: и сотвори́ Иису́с та́ко.

Диа́кон: Прему́дрость.

Чтец: Исхо́да чте́ние.

Диа́кон: Во́нмем.

Чтец: Воздви́гшеся сы́нове Изра́илевы от Сокхо́фа, ополчи́шася во Офо́ме при пусты́ни. Бог же вожда́ше их в день у́бо столпо́м о́блачным, показа́ти им путь: но́щию же столпо́м о́гненным свети́ти им. И не оскуде́ столп о́блачный во дни, и столп о́гненный но́щию, пред все́ми людьми́. И рече́ Госпо́дь к Моисе́ю, глаго́ля: рцы сыно́м Изра́илевым и обрати́вшеся да ополча́тся прямо придво́рию, ме́жду Магдо́лом и ме́жду мо́рем, пря́мо Веельсепфо́ну: пред ни́ми ополчи́шися при мо́ри. И рече́т фарао́н лю́дем свои́м о сыне́х Изра́илевых: заблужда́ют си́и по земли́, затвори́ бо их пусты́ня. Аз же ожесточу́ се́рдце фарао́ново, и пожене́т созади́ их: и просла́влюся в фарао́не, и во всем во́инстве его́, и уразуме́ют вси еги́птяне, я́ко Аз есмь Госпо́дь: и сотвори́ша та́ко. И возвеще́но бысть Царю́ Еги́петскому, я́ко бежа́ша лю́дие. И преврати́ся се́рдце фарао́ново, и рабо́в его́ на лю́ди, и реко́ша: что́ сие́ сотвори́хом, отпусти́вше сы́ны Изра́илевы, да не рабо́тают нам? Впряже́ у́бо фарао́н колесни́цы своя́, и вся лю́ди своя́ собра́ с собо́ю. И поя́т шесть сот колесни́ц избра́нных, и вся ко́ни Еги́петския, и триста́ты над все́ми. И ожесточи́ Госпо́дь се́рдце фарао́на царя Еги́петскаго, и рабо́в его́, и погна́ созади́ сыно́в Изра́илевых: сы́нове же Изра́илевы исхожда́ху руко́ю высо́кою. И погнаша еги́птяне в след их, и обрето́ша их ополчи́вшихся при мо́ри: и вся ко́ни и колесни́цы фарао́новы и ко́нницы, и во́инство Его́ пря́мо придво́рию, проти́ву Веельсепфо́на. И фарао́н приближа́шеся: воззре́вше же сы́нове Изра́илевы очи́ма, ви́деша: и се еги́птяне ополчи́шася в след их: и убоя́шася зело́, и возопи́ша сы́нове Изра́илевы ко Го́споду. И реко́ша к Моисе́ю: за е́же не бы́ти гробо́м во Еги́пте, изве́л еси́ нас умертви́ти в пустыни: что́ сие́ сотвори́л еси́ нам, изве́д нас из Еги́пта. Не сей ли бя́ше глаго́л, его́же реко́хом к тебе́ во Еги́пте, глаго́люще: оста́ви нас, да рабо́таем еги́птяном? Лучше бо бя́ше нам рабо́тати еги́птяном, не́жели умре́ти в пусты́ни сей. Рече́ же Моисе́й к лю́дем: дерза́йте, сто́йте, и зри́те спасе́ние е́же от Го́спода, е́же сотвори́т нам днесь. И́мже бо о́бразом ви́десте еги́птян днесь, не приложите́ ктому́ ви́дети их в ве́чное вре́мя. Госпо́дь побо́рет по вас, вы же умо́лкните. И рече́ Госпо́дь к Моисе́ю: что́ вопие́ши ко Мне́? Рцы сыно́м Изра́илевым, и да путеше́ствуют. Ты же возми́ жезл твой, и простри́ руку́ твою́ на мо́ре, и расто́ргни е́, и да вни́дут сы́нове Изра́илевы посреде́ мо́ря по суху. И се Аз ожесточу́ се́рдце фарао́ново, и всех еги́птян, и вни́дут в след их, и просла́влюся в фарао́не, и во всем во́инстве его́, и в колесни́цах и в ко́нех его́. И уве́дят вси еги́птяне, я́ко Аз есмь Госпо́дь, егда́ просла́влюся в фарао́не, и в колесни́цах, и в ко́нех Его́. Взя́тся же А́нгел Бо́жий ходя́й пред полко́м сыно́в Изра́илевых, и по́йде созади́ их: взя́тся же и столп о́блачный от лица́ их, и ста созади́ их. И вни́де посреде́ полка́ еги́петска, и посреде́ полка́ сыно́в Изра́илевых, и ста: и бысть тьма и мрак, и прии́де нощь, и не смеси́шася друг с другом во всю нощь. Простре́ же Моисе́й руку́ на мо́ре: и возгна́ Госпо́дь мо́ре ве́тром южным си́льным всю нощь, и сотвори́ мо́ре су́шу, и разступи́ся вода́. И внидо́ша сы́нове Изра́илевы посреде́ мо́ря по су́ху: и вода им стена бысть одесну́ю, и стена́ ошу́юю. Погна́ша же еги́птяне, и внидо́ша в след их, и всяк конь фарао́нов, и колесни́цы, и всадники посреде́ мо́ря. Бысть же в стражу у́треннюю, и воззре́ Госпо́дь на полк Еги́петский в столпе́ о́гненном и облачном, и смяте́ полк еги́петский. И связа́ о́си колесни́ц их, и ведя́ше их с ну́ждею. И реко́ша еги́птяне: бежи́м от лица́ Изра́илева, Госпо́дь бо побора́ет по них на еги́птяны. И рече́ Госпо́дь к Моисе́ю: простри́ руку́ твою́ на мо́ре, и да совокупи́тся вода, и да покры́ет еги́птяны, колесни́цы же и вса́дники. Простре́ же Моисе́й руку́ на мо́ре, и устро́ися вода ко дню на ме́сто: еги́птяне же бежаша под водо́ю: и истрясе́ Госпо́дь еги́птяны посреде́ мо́ря. И обрати́вшися вода́, покры́ колесни́цы и вса́дники, и всю си́лу фарао́нову, вше́дши в след их в море, и не оста́ от них ни еди́н. Сы́нове же Изра́илевы проидо́ша по су́ху посреде́ мо́ря: вода́ же им стена́ (бысть) одесну́ю, и стена́ ошу́юю. И изба́ви Госпо́дь Изра́иля в день он из руки́ Еги́петския: и ви́деша сы́нове Изра́илевы еги́птян изме́рших при краи́ моря. Ви́де же Изра́иль руку́ вели́кую, я́же сотвори́ Госпо́дь еги́птяном: и убоя́шася лю́дие Го́спода, и ве́роваша Бо́гу, и Моисе́ю уго́днику Его́. Тогда́ воспе́ Моисе́й, и сы́нове Изра́илевы песнь сию́ Го́сподеви, и реко́ша глаго́люще:

Чтец глаго́лет: Пои́м Го́сподеви:

Отверза́ются Ца́рския врата́.

Лик, во глас 5: Сла́вно бо просла́вися:

Чтец к коему́ждо ли́ку предглаго́лет стихи́:

Коня́ и вса́дника вве́рже в мо́ре. Пои́м Го́сподеви:

И пою́т на о́ба ли́ка: Сла́вно бо просла́вися.

Чтец: Помо́щник и покрови́тель бысть мне во спасе́ние. Пои́м Го́сподеви:

Лик: Сла́вно бо просла́вися.

Чтец: Се мой Бог, и просла́влю Его́, Бог Отца́ моего́ и вознесу́ Его́. Пои́м Го́сподеви:

Лик: Сла́вно бо просла́вися.

Чтец: Госпо́дь сокруша́яй бра́ни, Госпо́дь И́мя Ему́. Колесни́цы фарао́новы и си́лу его́ вве́рже в мо́ре. Пои́м Го́сподеви:

Лик: Сла́вно бо просла́вися.

Чтец: Избра́нныя вса́дники триста́ты потопи́ в Чермне́м мо́ри. Пои́м Го́сподеви:

Лик: Сла́вно бо просла́вися.

Чтец: Пучи́ною покры́ их, погрязо́ша во глуби́не́ я́ко ка́мень. Пои́м Го́сподеви:

Лик: Сла́вно бо просла́вися.

Чтец: Десни́ца Твоя́, Го́споди, просла́вися в кре́пости. Пои́м Го́сподеви:

Лик: Сла́вно бо просла́вися.

Чтец: Десна́я Твоя́ рука́, Го́споди, сокруши́ враги́, и мно́жеством сла́вы Твоея́ стерл еси́ сопроти́вных. Пои́м Го́сподеви:

Лик: Сла́вно бо просла́вися.

Чтец: Посла́л еси́ гнев Твой, пояде́ я я́ко сте́блие, и ду́хом я́рости Твоея́ разступи́ся вода́. Пои́м Го́сподеви:

Лик: Сла́вно бо просла́вися.

Чтец: Огусте́ша я́ко стена́ во́ды, огусте́ша и во́лны посреде́ мо́ря. Пои́м Го́сподеви:

Лик: Сла́вно бо просла́вися.

Чтец: Рече́ враг: гнав пости́гну, разделю́ коры́сть, испо́лню ду́шу мою́, убию́ мече́м мои́м, госпо́дствовати бу́дет рука моя́. Пои́м Го́сподеви:

Лик: Сла́вно бо просла́вися.

Чтец: Послал еси́ ду́ха Твоего́, покры́ я мо́ре: погрязо́ша я́ко о́лово в воде́ зе́льней. Пои́м Го́сподеви:

Лик: Сла́вно бо просла́вися.

Чтец: Кто́ подо́бен Тебе́ в бозе́х, Го́споди? Кто́ подо́бен Тебе́? Просла́влен во святы́х, ди́вен в славе твори́й чудеса́. Пои́м Го́сподеви:

Лик: Сла́вно бо просла́вися.

Чтец: Просте́рл еси́ десни́цу Свою́, пожре́ я земли́. Наста́вил еси́ пра́вдою Твое́ю лю́ди Твоя́ сии́, и́же изба́вил еси́. Пои́м Го́сподеви:

Лик: Сла́вно бо просла́вися.

Чтец: Уте́шил еси́ кре́постию Твое́ю во оби́тель Святу́ю Твою́. Слы́шаша язы́цы, и прогне́вашася, боле́зни прия́ша живу́щии в Филисти́ме. Пои́м Го́сподеви:

Лик: Сла́вно бо просла́вися.

Чтец: Тогда́ потща́шася Влады́ки Едо́мстии, и кни́зи Моави́тстии, прия́т я́ тре́пет: раста́яша вси живущии в Ханаа́не. Пои́м Го́сподеви:

Лик: Сла́вно бо просла́вися.

Чтец: Да нападе́т на ня страх и тре́пет: вели́чием мышцы Твоея́ да окаменятся. Пои́м Го́сподеви:

Лик: Сла́вно бо просла́вися.

Чтец: До́ндеже про́йдут лю́дие Твои́, Го́споди, до́ндеже про́йдут лю́дие Твои́ си́и, и́же стяжа́л еси́. Пои́м Го́сподеви:

Лик: Сла́вно бо просла́вися.

Чтец: Введ насади́ я в по́ру достоя́ния Твоего́, в гото́вое жили́ще Твое́, е́же соде́лал еси́, Го́споди, святы́ню, Го́споди, ю́же утото́васте ру́це Твои́. Пои́м Го́сподеви:

Лик: Сла́вно бо просла́вися.

Чтец: Госпо́дь, Ца́рствуяй ве́ки, и на век, и еще́. Егда́ вни́де ко́нница фарао́нова с колесни́цами и вса́дники в мо́ре: и наведе́ на них Госпо́дь во́ду морску́ю. Пои́м Го́сподеви:

Лик: Сла́вно бо просла́вися.

Чтец: Сы́нове же Изра́илевы проидо́ша су́шею посреде́ мо́ря. Пои́м Го́сподеви:

Лик: Сла́вно бо просла́вися.

Чтец: Сла́ва Отцу́, и Сы́ну, и Свято́му Ду́ху. Пои́м Го́сподеви.

Лик: Сла́вно бо просла́вися.

Чтец: И ны́не, и при́сно, и во ве́ки веко́в. Ами́нь. Пои́м Го́сподеви:

Лик: Сла́вно бо просла́вися.

И последи́ чтец пое́т то́йжде, еди́н: Сла́вно бо просла́вися.

Диа́кон: Прему́дрость.

Чтец: Проро́чества Софо́ниева чте́ние.

Диа́кон: Во́нмем.

Ца́рския врата́ закрыва́ются.

Чтец: Та́ко глаго́лет Госпо́дь: потерпи́ Мене́ в день воскресе́ния Моего́, во свиде́тельство: зане́ суд Мой в со́нмища языков е́же прия́ти царе́й, е́же излия́ти на ня гнев Мой, весь гнев я́рости Моея́: зане́ огне́м рве́ния Моего́ пояде́на бу́дет вся земля́. Я́ко тогда́ обра́щу к лю́дем язы́к в род его́, е́же призыва́ти всем И́мя Госпо́дне, рабо́тати Ему́ под и́гом еди́нем. От коне́ц рек Ефио́пских прии́му моля́щыя Мя, в разсе́янных Мои́х принесу́т же́ртвы Мне. В день он не и́маши постыди́тися от всех начина́ний твои́х, и́миже нече́ствовал еси́ в Мя: я́ко тогда́ отыму́ от Тебе́ укори́зны досажде́ния твоего́, и ктому не и́маши приложи́ти велича́тися на горе́ святе́й Мое́й. И оста́влю в тебе́ лю́ди кро́тки и смире́нны, и бу́дут благогове́ти о И́мени Госпо́дни. Оста́нцы Изра́илевы, и не сотворя́т непра́вды, и не возглаго́лют су́етных, и не обря́щется во усте́х их язык льстив: Зане́ ти́и пожиру́ют и угнездя́тся, и не бу́дет устраша́яй их. Ра́дуйся, дщи Сио́нова, зело́, пропове́дуй, дщи Иерусали́мова, весели́ся, и преукраша́йся от всего́ се́рдца твоего́, дщи Иерусали́мля. Отъят Госпо́дь непра́вды Твоя́, изба́вил тя есть из руки́ враг твои́х; воцари́тся Госпо́дь посреде́ тебе́ и не у́зриши зла ктому́.

Диа́кон: Прему́дрость.

Чтец: Ца́рств тре́тиих чте́ние.

Диа́кон: Во́нмем.

Чтец: Бысть глаго́л Госпо́день ко Илии́, глаго́ля: воста́ни, и иди́ в Саре́пту Сидо́нскую, и пребу́ди тамо: се бо запове́дах та́мо жене́ вдови́це препита́ти тя. И воста́, и и́де в Саре́пту Сидо́нскую, и прии́де ко врато́м гра́да: и се та́мо жена́ вдова́ собира́ше дрова́. И возопи́ Илиа́ в след ея́, и рече́ ей: принеси́ ны́не ми ма́ло воды́ в сосу́де, и испию́. И и́де взя́ти, и возопи́ в след ея́ Илиа́, и рече́ ей: приими́ у́бо мне и укру́х хле́ба в руце́ свое́й, да ям. И рече́ жена́: жив Госпо́дь Бог твой, а́ще есть у мене́ опресно́к, но то́кмо горсть муки́ в водоно́се, и мало еле́а в чва́нце: и се аз соберу́ два поле́нца, и вни́ду, и сотворю́ е́ себе́ и де́тем мои́м, и сне́мы е́, и у́мрем. И рече́ к ней Илиа́: дерза́й, вни́ди, и сотвори́ по глаго́лу твоему́: но сотвори́ ми отту́ду опресно́к мал пре́жде, и принеси́ ми; себе́ же и чадо́м свои́м да сотвори́ши по́слежде. Я́ко та́ко глаго́лет Госпо́дь Бог Изра́илев: водоно́с муки́ не оскуде́ет, и чва́нец еле́а не ума́лится до дне, до́ндеже даст Госпо́дь дождь на зе́млю. И и́де жена́, и сотвори́ по глаго́лу Илии́ну, и даде́ ему́, и яде́ той и та, и ча́да ея́. И от того́ дне водоно́с муки́ не оскуде́, и чва́нец еле́а не ума́лися, по глаго́лу Госпо́дню, его́же глаго́ла руко́ю Илиино́ю. И бысть по сих, и разболе́ся сын жены госпожи до́му, и бе боле́знь его́ крепка́ зело́, до́ндеже не оста́ся в нем дух Его́. И рече́ ко Илии́: что́ мне и тебе́, челове́че Бо́жий, вшел еси́ ко мне воспомяну́ти непра́вды моя́, и умори́ти сы́на моего́? И рече́ Илиа́ к жене́: даждь ми сы́на твоего́: и взят его́ от не́дра ея́, и вознесе́ его́ в го́рницу, иде́же сам почива́ше, и положи́ его́ на одре́ свое́м. И возопи́ Илиа́ ко Го́споду и рече́: увы́ мне, Го́споди, свиде́телю вдовы́, у нея́же аз ны́не пребыва́ю. Ты озло́бил еси́, е́же умори́ти сы́на ея́. И ду́ну на о́трочища три́жды, и призва́ Го́спода, и рече́: Го́споди, Бо́же мой, да возврати́тся у́бо душа́ о́трочища сего́ в онь, и бысть та́ко. И возопи́ о́трочищь, и сведе́ его́ с го́рницы в дом, и даде́ его́ ма́тери его́. И рече́ Илиа́: виждь, жив сын твой. И рече́ жена́ ко Илии́: се уразуме́х, я́ко челове́к Бо́жий еси́ ты, и глаго́л Госпо́день во усте́х твои́х и́стинен.

Диа́кон: Прему́дрость.

Чтец: Проро́чества Иса́иина чте́ние.

Диа́кон: Во́нмем.

Чтец: Да возра́дуется душа́ моя́ о Го́споде: облече́ бо мя в ри́зу спасе́ния, и оде́ждею весе́лия (одея́ мя) я́ко на жениха́ возложи́ на мя вене́ц, и я́ко неве́сту украси́ мя красото́ю. И я́ко земля́ растя́щая цвет свой, и я́ко вертогра́д се́мена своя́ прозябает: та́ко возрасти́т Госпо́дь, Госпо́дь пра́вду, и весе́лие пред все́ми язы́ки. Сио́на ра́ди не умолчу́, и Иерусали́ма ра́ди не попущу́, до́ндеже изы́дет я́ко свет пра́вда моя́, и спасе́ние мое́ я́ко свети́ло разжже́тся. И у́зрят язы́цы пра́вду твою́, и ца́рие сла́ву твою́, и прозову́т тя и́менем но́вым, и́мже Госпо́дь наимену́ет е́. И бу́деши вене́ц добро́ты в руце́ Госпо́дни, и диади́ма Ца́рствия в руце́ Бо́га твоего́. И не прозове́шися ктому́ оставле́н, и земля́ Твоя́ ктому́ не нарече́тся пуста́: тебе́ бо прозове́тся во́ля Моя́, и земля́ Твоя́ вселе́нная: я́ко благоволи́ Госпо́дь в тебе́, и земля́ Твоя́ вку́пе насели́тся. И я́коже живя́й ю́ноша с де́вою, та́ко поживу́т сы́нове твои́ с тобо́ю: и бу́дет я́коже ра́дуется жени́х о неве́сте, та́ко возра́дуется Госпо́дь о тебе́.

Диа́кон: Прему́дрость.

Чтец: Бы́тия чте́ние.

Диа́кон: Во́нмем.

Чтец: Бысть по глаго́лех сих, Бог искуша́ше Авраа́ма, и рече́ ему́: Авраа́ме, Авраа́ме. И рече́: се аз. И рече́: поими́ сы́на твоего́ возлю́бленнаго, его́же возлюби́л еси́, Исаа́ка, и иди́ на зе́млю высо́ку, и вознеси́ Его́ тамо во всесожже́ние, на еди́ну от гор, и́хже ти реку́. Воста́в же Авраа́м у́тро, оседла́ осля́ свое́. Поя́т же с собо́ю два о́трочища, и Исаа́ка сы́на своего́, и растни́в дрова́ во всесожже́ние, воста́в и́де и прии́де на ме́сто, е́же рече́ ему́ Бог, в тре́тий день. И воззре́в Авраа́м очи́ма свои́ма, ви́де ме́сто издале́че. И рече́ Авраа́м отроко́м свои́м: сяди́те зде со осля́тем, аз же и де́тищ по́йдем до о́нде, и поклони́вшеся возврати́мся к вам. Взя же Авраа́м дрова́ всесожже́ния и возложи́ на Исаа́ка Сы́на своего́: взя же в ру́ки и огнь и нож, и идо́ста о́ба вку́пе. Рече́ же Исаа́к ко Авраа́му Отцу́ своему́: отче; он же рече́: что́ есть чадо́? Рече́ же: се огнь и дрова́, где́ есть овча́ е́же во всесожже́ние. Рече́ же Авраам: Бог у́зрит Себе овча́ во всесожже́ние, ча́до. Ше́дше же о́ба вку́пе, приидо́ста на ме́сто, е́же рече́ ему́ Бог: и созда тамо Авраа́м же́ртвенник, и возложи́ дрова: и связа́в Исаа́ка сы́на своего́, возложи́ его́ на же́ртвенник верху́ дров. И простре́ Авраа́м руку́ свою́ взяти́ нож, закла́ти сы́на своего́. И воззва́ и А́нгел Госпо́день с небесе́, и рече́: Авраа́ме, Авраа́ме. Он же рече́: се аз. И рече́: да не возложи́ши руки́ твоея́ на о́трочища, ниже́ да сотвори́ши ему́ что: ны́не бо позна́х, я́ко бои́шися ты Бо́га, и не пощаде́л еси́ сы́на твоего́ возлю́бленнаго Мене́ ра́ди. И воззре́в Авраа́м очи́ма свои́ма, ви́де: и се о́вен еди́н держи́мый рога́ма в са́де Саве́к. И и́де Авраа́м, и взя овна́, и вознесе́ его́ во всесожже́ние, вме́сто Исаа́ка сы́на своего́. И нарече́ Авраа́м и́мя ме́сту тому: Госпо́дь ви́де. Да реку́т днесь: на горе́ Госпо́дь яви́ся. И воззва́ А́нгел Госпо́день Авраа́ма втори́цею с небесе́, глаго́ля: Мно́ю Саме́м кля́хся, глаго́лет Госпо́дь, Его́же ради́ сотвори́л еси́ глаго́л сей, и не пощаде́л еси́ сы́на твоего́ возлю́бленнаго Мене́ ра́ди. Вои́стинну благословя́ благословлю́ тя, и умножа́я умно́жу се́мя твое́, я́ко зве́зды небе́сныя, и я́ко песо́к вскрай мо́ря: и насле́дит се́мя твое́ гра́ды супоста́тов. И благословя́тся о се́мени твое́м все язы́цы земни́и, зане́же послу́шал еси́ гла́са Моего́.

Диа́кон: Прему́дрость.

Чтец: Проро́чества Иса́иина чте́ние.

Диа́кон: Во́нмем.

Чтец: Дух Госпо́день на мне, его́же ра́ди пома́за мя, благовести́ти ни́щым посла́ мя, исцели́ти сокруше́нныя се́рдцем, пропове́дати пле́нником отпуще́ние, и слепы́м прозре́ние. Нарещи́ ле́то Госпо́дне прия́тно и день воздая́ния, уте́шити вся пла́чущыя. Да́ти пла́чущым Сио́на сла́ву вме́сто пе́пела, пома́зание весе́лие пла́чущым, украше́ние сла́вы вме́сто ду́ха уны́ния: и нареку́тся ро́дове пра́вды, насажде́ние Госпо́дне в сла́ву. И сози́ждут пусты́ни ве́чныя, запусте́вшыя пре́жде воздви́гнут, и обновя́т грады́ пусты́я, опустоше́нныя в ро́ды. И прии́дут иноро́днии, пасу́щии о́вцы твоя́, и иноплеме́нницы ора́тели, и виногра́дари ва́ши. Вы же свяще́нницы Госпо́дни нарече́теся, служи́телие Бо́га ва́шего, рече́тся вам: кре́пость язык сне́сте и в бога́тстве их чу́дни бу́дете. Си́це зе́млю свою́ втори́цею насле́дят, и весе́лие ве́чное над главо́ю их. Аз бо есмь Госпо́дь, любя́й пра́вду и ненави́дяй грабле́ния от непра́вды: и дам труд их пра́ведником, и заве́т ве́чен завеща́ю им. И познается во языцех се́мя их, и вну́цы их посреди́ люде́й: всяк ви́дяй я́, позна́ет я́, я́ко си́и суть се́мя благослове́нное от Бо́га, и ра́достию возра́дуются о Го́споде.

Диа́кон: Прему́дрость.

Чтец: Ца́рств четве́ртых чте́ние.

Диа́кон: Во́нмем.

Чтец: Бысть во еди́н день, и пре́йде Елиссе́й в Сома́н, и ту жена́ ве́лия, и удержа́ его́ сне́сти хле́ба, и бысть ему́ входи́ти, и исходи́ти мно́жицею, и уклоня́шеся та́мо я́сти хле́ба. И рече́ жена́ к му́жу своему́: се ны́не разуме́х, я́ко челове́к Бо́жий свят сей ми́мо хо́дит нас при́сно. Сотвори́м у́бо ему́ го́рницу, ме́сто ма́ло, и поста́вим ему́ та́мо одр, и трапе́зу, и престо́л, и све́щник: и бу́дет внегда́ входи́ти ему́ к нам, и уклоня́ется та́мо. И бысть во еди́н день, и вни́де та́мо, и уклони́ся в го́рницу, и спа та́мо. И рече́ ко Гиези́ю о́трочищу своему́: призови́ ми сомани́тяныню сию́. И призва́ ю́, и ста пред ним. И рече́ ему́: рцы у́бо ей, се удиви́ла еси́ нас всем попече́нием сим, что́ подоба́ет сотвори́ти тебе́? А́ще есть тебе́ сло́во к царю́, или́ ко кня́зю си́лы; она же рече́: (несть) посреде́ люде́й мои́х аз есмь живу́щи. И рече́ ко Гиези́ю: что подоба́ет сотвори́ти ей? И рече́ Гиези́й о́трочищь его́: вои́стинну сы́на несть у нея́, и муж ея́ стар. И рече́: призови́ ю́. И призва ю́, и ста при две́рех. И рече́ Елиссе́й к ней: во вре́мя сие, я́коже час сей, живу́щи ты зачне́ши сы́на. Она же рече́: ни, господи́не, не солжи́ рабе́ твое́й. И зача́т во чре́ве жена́, и роди́ сы́на во вре́мя сие́, я́коже час сей живу́щи, я́коже глаго́ла к ней Елиссе́й. И возмужа́ о́трочищь: и бысть, егда́ изы́де ко отцу́ своему́, к жну́щым, и рече́ ко отцу́ своему́: глава́ моя́, глава́ моя́ (боли́т). И рече́ ко о́троку: неси́ его́ к ма́тери его́. И несе́ его́ к ма́тери его́, и лежа́ше на коле́ну ея́ до полу́дни, и умре́. И вознесе́ его́, и положи́ его́ на одре́ челове́ка Бо́жия: и затвори́ его́, и изы́де, и призва́ му́жа своего́, и рече́ ему́: Посли́ ми у́бо еди́наго от о́трок, и еди́но от осля́т, и теку́ до челове́ка Бо́жия, и возвращу́ся. И рече́: что́ я́ко ты и́деши к нему́ днесь? Не нов ме́сяц, ниже́ суббо́та. Она же рече́, мир. И оседла́ осля́, и рече́ ко о́трочищу своему: веди́, и иди́, да не удержи́ши мене́, е́же все́сти, я́коже реку́ тебе́. Гряди́ и иди́, и прииди́ к челове́ку Бо́жию на го́ру Карми́льскую. И и́де, и прии́де до челове́ка Бо́жия в го́ру Карми́льскую. И бысть я́ко ви́де ю́ Елиссе́й гряду́щую, и рече́ к Гиези́ю о́трочищу своему́: се у́бо сомани́тяныня о́ная! Ны́не тецы в сре́тение ея́ и рече́ши ей: мир ли тебе́? И тече́ во сре́тение ей и рече́ ей: мир ли тебе́? Мир ли му́жу твоему́? Мир ли о́трочищу твоему́; она же рече́, мир. И прии́де к Елиссе́ю на го́ру, и я́тся за но́зе Его́: и прибли́жися Гиези́й отри́нути ю́. И рече́ Елиссе́й: оста́ви ю́, я́ко душа́ ея́ боле́зненна в ней, и Госпо́дь укры́ от Мене́, и не возвести́ мне. Она́ же рече́: еда́ проси́х сы́на у господи́на моего́? Я́ко реко́х: не прельсти́ мене́. И рече́ Елиссе́й ко Гиези́ю: препоя́ши чре́сла тво́я, и возми́ жезл мой в ру́це твои́ и иди́, я́ко а́ще обря́щеши му́жа, да не благослови́ши его́, и а́ще благослови́т тя муж, не отвеща́й ему́; и возложи́ жезл мой на лице́ о́трочища. И рече́ мати о́трочища: жив Госпо́дь, и жива́ душа́ твоя́, а́ще оста́влю тебе́. И воста́ Елиссе́й, и и́де в след ея́. И Гиези́й и́де пред не́ю, и возложи́ жезл на лице́ о́трочища, и не бе гла́са, и не бе слы́шания. И возврати́ся в срете́ние его́, и пове́да ему́, глаго́ля: не воста́ о́трочищь. И вни́де Елиссе́й в хра́мину, и се о́трочищь уме́рый положе́н на одре́ его́. И вни́де Елиссе́й в дом, и затвори́ дверь за двою́ собо́ю, и помоли́ся Го́споду. И взы́де, и ля́же на о́трочищи, и положи́ уста́ своя́ на усте́х его́, и о́чи свои́ на о́чи его́, и ру́це свои́ на ру́це его́, и плесне́ свои́ на плесну́ его́: и сляче́ся над ним, и ду́ну на него́, и согре́яся плоть о́трочища. И обрати́ся, и походи́ в хра́мине сю́ду и сю́ду: и взы́де, и сляче́ся над о́трочищем седми́жды: и отве́рзе о́трочищь о́чи свои́. И возопи́ Елиссе́й ко Гиези́ю и рече́: призови́ ми сомани́тяныню сию́. И призва́ ю́, и вни́де к нему́, и рече Елиссе́й: приими́ сы́на твоего́. И вни́де жена́, и паде́ на но́гу его́, и поклони́ся ему́ до земли́: и прия́т сы́на своего́, и изы́де.

Диа́кон: Прему́дрость.

Чтец: Проро́чества Иса́иина чте́ние.

Диа́кон: Во́нмем.

Чтец: Та́ко глаго́лет Госпо́дь: где Возведый от земли́ па́стыря ове́ц Свои́х? где есть Вложи́вый в них Ду́ха Свята́го? Возве́дшая десни́цею Моисе́а мы́шца сла́вы Его́, раздели́ во́ду пред лице́м его́, сотвори́ти Ему́ И́мя ве́чно. Проведе́ их сквозе́ бе́здну, я́коже коня́ сквозь пусты́ню, и не утруди́шася. И я́ко скоты́ по по́лю, и сни́де Дух от Го́спода и наста́ви их: та́ко прове́л еси́ лю́ди Твоя́, сотвори́ тебе́ самому И́мя сла́вно. Обрати́ся, Го́споди, от небесе́, и виждь от до́му свята́го Твоего́ и сла́вы Твоея́: где есть ре́вность Твоя́ и кре́пость Твоя́? Где есть мно́жество ми́лости Твоея́, и щедро́т Твои́х, я́ко терпе́л еси́ нам. Ты бо еси́ Оте́ц наш, поне́же Авраа́м не уве́де нас, и Изра́иль не позна́ нас: но Ты, Го́споди, Оте́ц наш, изба́ви ны; испе́рва И́мя Твое́ на нас есть. Что́ уклони́л еси́ нас, Го́споди, от пути́ Твоего́, и ожесточи́л еси́ сердца на́ша, е́же не боя́тися Тебе́? Обрати́ся ра́ди раб Твои́х, ра́ди племе́н достоя́ния Твоего́. Да (поне́) мало насле́дим горы святы́я Твоея́. Проти́вницы на́ши попра́ша святы́ню Твою́. Бы́хом я́ко испе́рва, егда́ не владе́л еси́ на́ми, ниже́ бе нарече́нно И́мя Твое́ на нас. А́ще отве́рзеши не́бо, тре́пет прии́мут от Тебе́ го́ры и растают. Я́ко тает воск от лица́ огня́, и попали́т огнь супоста́ты и я́влено бу́дет и́мя Твое́ в сопроти́вных Твои́х: от Лица́ Твоего́ язы́цы возмяту́тся, егда́ сотвори́ши сла́вная тре́пет прии́мут от Тебе́ го́ры. От ве́ка не слы́шахом ниже́ о́чи на́ши ви́деша Бо́га, разве Тебе́, и дела Твоя́, я́же сотвори́ши жду́щым ми́лости. Ми́лость бо сря́щет творя́щих правду, и пути́ Твоя́ помяну́тся.

Диа́кон: Прему́дрость.

Чтец: Проро́чества И́ереми́ина чте́ние.

Диа́кон: Во́нмем.

Чтец: Та́ко глаго́лет Госпо́дь: се дни́е гряду́т, и завеща́ю до́му Изра́илеву, и до́му Иу́дину заве́т нов: Не по заве́ту, его́же завеща́х отце́м их, в день, во́ньже е́мшу Ми за руку́ их, извести́ я от земли́ Еги́петския, я́ко ти́и не пребы́ша в заве́те Мое́м, и Аз небрего́х их, глаго́лет Госпо́дь. Я́ко сей заве́т, его́же завеща́ю до́му Изра́илеву, по днех о́нех, глаго́лет Госпо́дь: дая зако́ны Моя́ в мысли их, и на сердца́х их напишу́ я, и буду им в Бо́га, и ти́и бу́дут Ми в лю́ди. И не научи́т ки́йждо бли́жняго своего́ и ки́йждо брата своего́, глаго́ля: познай Го́спода, я́ко вси позна́ют Мя от мала да́же и до вели́каго их: я́ко ми́лостив буду непра́вдам их, и грехо́в их не помяну ктому́.

Диа́кон: Прему́дрость.

Чтец: Проро́чества Дании́лова чте́ние.

Диа́кон: Во́нмем.

Чтец: В ле́то осмонадесятое Навуходоно́сор царь сотвори́ те́ло зла́то, высота́ его́ лакте́й шести́десяти, и широта́ его́ лакте́й шести́: и поста́ви е́ на по́ли Де́ире, во стране́ Вавило́нстей. И посла́ (Навуходоно́сор царь) собра́ти ипа́ты, и воево́ды, и местонача́льники, вожди́ же и мучи́тели, и су́щыя на власте́х. И вся кня́зи стран, приити́ на обновле́ние куми́ра, его́же поста́ви Навуходоно́сор царь. И собра́шася местонача́льницы, ипа́ты, воево́ды, вожди́, мучи́тели вели́цы, и́же над властьми́, и вси начальницы стран, на обновле́ние те́ла, е́же поста́ви Навуходоно́сор царь: и ста́ша пред те́лом, еже поста́ви Навуходоно́сор царь. И пропове́дник вопия́ше с кре́постию: вам глаго́лется, наро́ди, лю́дие, племена́, язы́цы. В о́ньже час а́ще услы́шите глас трубы́, свире́ли же и гу́сли, самви́ки же и псалти́ри, и согла́сия, и вся́каго рода мусики́йска, па́дающе покланя́йтеся те́лу злато́му, е́же поста́ви Навуходоно́сор царь. И и́же а́ще не пад поклони́тся, в той час вве́ржен бу́дет в пещь огне́м горя́щую. И бысть егда́ услы́шаша лю́дие глас трубы́, свире́ли же и гу́сли, самви́ки же и псалти́ри, и согла́сия, и вся́каго рода мусики́йскаго, па́дающе вси лю́дие, племена, язы́цы, покланя́хуся те́лу злато́му, е́же поста́ви Навуходоно́сор царь. Тогда́ приступи́ша му́жие халде́йстии и оболга́ша иуде́ев, отвеща́вше ре́ша Навуходоно́сору царе́ви: царю́, во ве́ки живи́. Ты, царю́, положи́л еси́ повеле́ние, да всяк челове́к, и́же а́ще услы́шит глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йска, и не пад покло́нится те́лу злато́му, вве́ржен бу́дет в пещь огне́м горя́щую. Суть у́бо му́жи иуде́е, и́хже поста́вил еси́ над де́лы страны́ вави́лонския, Седра́х, Миса́х и Авденаго́, и́же не послу́шаша за́поведи твоея́, царю́, и бого́м твои́м не слу́жат, и те́лу злато́му, е́же поста́вил еси́, не покланя́ются. Тогда́ Навуходоно́сор в я́рости и гне́ве рече́ привести́ Седра́ха, Миса́ха и Авденаго́: и приведе́ни бы́ша пред царя́. И отвеща́ Навуходоно́сор, и рече́ им: а́ще вои́стинну, Седра́х, Миса́х и Авденаго́, бого́м мои́м не слу́жите, и те́лу злато́му, е́же поста́вих, не покланя́етеся. Ны́не у́бо а́ще есте́ гото́ви, да егда́ услы́шите глас трубы́, свире́ли же и гу́сли, самви́ки же и псалти́ри, и согла́сия, и вся́каго рода мусики́йскаго, па́дше поклони́теся те́лу злато́му, е́же сотвори́х. А́ще же не поклони́теся, в той час вве́ржени бу́дете в пещь огне́м горя́щую: и кто́ есть Бог, И́же и́змет вы из руки́ моея́? И отвеща́ша Седра́х, Миса́х и Авденаго́, глаго́люще царю́ Навуходоно́сору: не тре́бе нам о глаго́ле сем отвеща́ти тебе́. Есть бо Бог наш на Небесе́х, Ему́же мы слу́жим, си́лен изъя́ти нас от пе́щи огне́м горя́щия, и от руку́ твое́ю изба́вити нас, царю́. А́ще ли ни, ве́домо да бу́дет тебе́, царю́, я́ко бого́м твои́м не слу́жим, и те́лу злато́му, еже поста́вил еси́, не кла́няемся. Тогда́ Навуходоно́сор испо́лнися я́рости, и зрак лица́ его́ измени́ся на Седра́ха, Миса́ха и Авденаго́, и рече: разжжи́те пещь седмери́цею, до́ндеже до конца́ разгори́тся. И му́жем си́льным кре́постию рече́: окова́вше Седра́ха, Миса́ха и Авденаго́, вве́рзите в пещь огне́м горя́щую. Тогда́ мужие о́нии око́вани бы́ша с гащами свои́ми, и покрыва́лы, и сапогми́, и со оде́ждами свои́ми, и вве́ржени бы́ша посреде́ пе́щи огне́м горя́щия. Поне́же глаго́л царе́в превозмо́же, и пещь разжже́на бысть преизли́шше: и муже́й о́ных, и́же вверго́ша Седра́ха, Миса́ха и Авденаго́, уби́ пла́мень о́гненный. И мужие ти́и трие́, Седра́х, Миса́х и Авденаго́, падо́ша посреде́ пе́щи огне́м горя́щия окова́ни. И хожда́ху посре́де пла́мене пою́ще Бога, и благословя́ще Го́спода. И став с ни́ми Аза́риа помоли́ся си́це, и отве́рз уста́ своя́ посреде́ огня, рече́: Благослове́н еси́, Го́споди, Бо́же оте́ц на́ших, хва́льно и просла́влено И́мя Твое́ во ве́ки. Я́ко пра́веден еси́ о всех я́же сотвори́л еси́ нам и вся дела́ Твоя́ и́стинна, и пра́ви путие́ Твои́, и вси суди́ Твои́ и́стинны. И судьбы́ и́стинны сотвори́л еси́ по всем, я́же наве́л еси́ на ны, и на град Святы́й оте́ц на́ших, Иерусали́м: я́ко и́стиною и судо́м наве́л еси́ сия́ вся на ны грех ра́ди на́ших. Я́ко согреши́хом и беззако́нновахом отступи́вше от Тебе́, и прегреши́хом во всех. И за́поведей Твои́х не послу́шахом, ниже́ соблюдо́хом, ниже́ сотвори́хом, я́коже запове́дал еси́ нам, да бла́го нам бу́дет. И вся, ели́ка сотвори́л еси́ нам, и вся, ели́ка наве́л еси́ на ны, и́стинным судо́м сотвори́л еси́. И пре́дал еси́ нас в ру́ки враго́в беззако́нных, ме́рзких отсту́пников: и царю́ непра́ведну, и лука́внейшу па́че всея́ земли́. И ны́не несть нам отве́рсти уст, студ и поноше́ние бы́хом рабо́м Твои́м, и чту́щым Тя. Не преда́ждь у́бо нас до конца́ И́мене Твоего́ ра́ди, и не разори́ Заве́та Твоего́, и не отста́ви ми́лости Твоея́ от нас, Авраа́ма ра́ди возлю́бленнаго от Тебе́, и за Исаа́ка раба́ Твоего́, и Изра́иля Свята́го Твоего́. И́мже глаго́лал еси́ умно́жити се́мя их, я́ко зве́зды небе́сныя, и я́ко песо́к вскрай мо́ря. Я́ко, Влады́ко, умалихомся па́че всех язы́к, и есмы́ смире́ни по всей земли́ днесь грех ра́ди на́ших. И несть во вре́мя сие́ кня́зя, и проро́ка, и вожда́: ниже́ всесожже́ния, ниже́ же́ртвы, ниже́ приноше́ния, ниже́ кади́ла, ни ме́ста, е́же пожре́ти пред Тобо́ю. И обрести́ ми́лость: но душе́ю сокруше́нною и Ду́хом смире́нным, да прия́ты бу́дем. Я́ко во всесожже́ниих о́вних и ю́нчих, и я́ко во тмах а́гниц ту́чных: та́ко да бу́дет же́ртва на́ша пред Тобо́ю днесь, и да соверши́тся по Тебе́, я́ко несть студа́ упова́ющым на Тя. И ны́не возсле́дуем всем се́рдцем, и бои́мся Тебе́, и и́щем лица́ Твоего́. Не посрами́ нас, но сотвори́ с на́ми по кро́тости Твое́й, и по мно́жеству ми́лости Твоея́. И изми́ нас по чудесе́м Твои́м, и даждь сла́ву И́мени Твоему́, Го́споди. И да посра́мятся вси явля́ющии рабо́м Твои́м зла́я, и да постыдя́тся от вся́кия си́лы, и кре́пость их да сокруши́тся. И да разуме́ют, я́ко Ты еси́ Госпо́дь Бог еди́н, и славен по всей вселе́нней. И не преста́ша, вве́ргшии их, слуги́ царе́вы жгу́ще пещь на́ффою и смоло́ю, и изгре́бми и хвра́стием. И разлива́шеся пла́мень над пе́щию на ла́ктии четы́редесять де́вять. И обы́де и пожже́, и́хже обре́те о́крест пещи́ халде́йския. А́нгел же Госпо́день сни́де ку́пно с сущими со Аза́риею в пещь. И отрясе́ пла́мень о́гненный от пещи́. И сотвори́ сре́днее пещи́ я́ко дух росы́ шумя́щ и не прикосну́ся их отню́д огнь, и не оскорби́, ниже́ стужи́ им. Тогда́ ти́и трие́ я́ко еди́ными усты поя́ху, и благословля́ху, и славля́ху Бо́га в пещи́, глаго́люще: Благослове́н еси́, Го́споди, Бо́же оте́ц на́ших, и препе́тый и превозноси́мый во ве́ки, и благослове́но И́мя сла́вы Твоея́ свято́е, и препе́тое и превозноси́мое во ве́ки. Благослове́н еси́ в храме Святы́я сла́вы Твоея́, и препе́тый и превозноси́мый во ве́ки. Благослове́н еси́ ви́дяй бе́здны, седи́й на Херуви́мех, и препе́тый и превозноси́мый во ве́ки. Благослове́н еси́ на престо́ле сла́вы Ца́рствия Твоего́, и препе́тый и превозноси́мый во ве́ки. Благослове́н еси́ на тве́рди Небе́сней, и препе́тый, и превозноси́мый во ве́ки.

Зде же востают и пою́т на о́ба ли́ка.

Чтец: Го́спода по́йте и превозноси́те во вся ве́ки.

Лик то́жде: Го́спода по́йте и превозноси́те во вся ве́ки.

Чтец же глаго́лет стихи́ поряду:

Благослови́те, вся дела́ Госпо́дня.

Лик: Го́спода, пои́те и превозноси́те Его́ во ве́ки. Чтец: Благослови́те, А́нгели Госпо́дни.

Лик: Го́спода, по́йте и превозноси́те Его́ во ве́ки.

Чтец: Благослови́те, Небеса́.

Лик: Го́спода, по́йте и превозноси́те Его́ во ве́ки.

Чтец: Благослови́те, во́ды вся, я́же превыше небе́с.

Лик: Го́спода, по́йте и превозноси́те Его́ во ве́ки.

Чтец: Благослови́те, вся Си́лы Госпо́дни,

Лик: Го́спода, по́йте и превозноси́те Его́ во ве́ки.

Чтец: Благослови́те, со́лнце и луна.

Лик: Го́спода, по́йте и превозноси́те Его́ во ве́ки.

Чтец: Благослови́те, зве́зды небе́сныя.

Лик: Го́спода, по́йте и превозноси́те Его́ во ве́ки.

Чтец: Благослови́те, всяк дождь и роса́.

Лик: Го́спода, по́йте и превозноси́те Его́ во ве́ки.

Чтец: Благослови́те, вси дуси.

Лик: Го́спода, по́йте и превозноси́те Его́ во ве́ки.

Чтец: Благослови́те, огнь и вар.

Лик: Го́спода, по́йте и превозноси́те Его́ во ве́ки.

Чтец: Благослови́те, студь и зной.

Лик: Го́спода, по́йте и превозноси́те Его́ во ве́ки.

Чтец: Благослови́те, ро́сы и и́ней.

Лик: Го́спода, по́йте и превозноси́те Его́ во ве́ки.

Чтец: Благослови́те, но́щи и дни́е.

Лик: Го́спода, по́йте и превозноси́те Его́ во ве́ки.

Чтец: Благослови́те, свет и тьма.

Лик: Го́спода, по́йте и превозноси́те Его́ во ве́ки.

Чтец: Благослови́те, лед и мраз.

Лик: Го́спода, по́йте и превозноси́те Его́ во ве́ки.

Чтец: Благослови́те, сланы и сне́зи.

Лик: Го́спода, по́йте и превозноси́те Его́ во ве́ки.

Чтец: Благослови́те, мо́лния и о́блацы.

Лик: Го́спода, по́йте и превозноси́те Его́ во ве́ки.

Чтец: Да Благослови́т земля́.

Лик: Го́спода, да по́ет и превозно́сит Его́ во ве́ки.

Чтец: Благослови́те, го́ры и хо́лми

Лик: Го́спода, по́йте и превозноси́те Его́ во ве́ки.

Чтец: Благослови́те, вся прозяба́ющая на земли́.

Лик: Го́спода, по́йте и превозноси́те Его́ во ве́ки.

Чтец: Благослови́те, исто́чницы.

Лик: Го́спода, по́йте и превозноси́те Его́ во ве́ки.

Чтец: Благослови́те, моря и ре́ки.

Лик: Го́спода, по́йте и превозноси́те Его́ во ве́ки.

Чтец: Благослови́те, ки́ти и вся дви́жущаяся в вода́х.

Лик: Го́спода, по́йте и превозноси́те Его́ во ве́ки.

Чтец: Благослови́те, вся пти́цы небе́сныя.

Лик: Го́спода, по́йте и превозноси́те Его́ во ве́ки.

Чтец: Благослови́те, зве́рие и вси ско́ти.

Лик: Го́спода, по́йте и превозноси́те Его́ во ве́ки.

Чтец: Благослови́те, сы́нове челове́честии.

Лик: Го́спода, по́йте и превозноси́те Его́ во ве́ки.

Чтец: Да благослови́т Изра́иль.

Лик: Го́спода, по́йте и превозноси́те. Его́ во ве́ки.

Чтец: Благослови́те, иере́и Госпо́дни.

Лик: Го́спода, по́йте и превозноси́те Его́ во ве́ки.

Чтец: Благослови́те, раби́ Госпо́дни.

Лик: Го́спода, по́йте и превозноси́те Его́ во ве́ки.

Чтец: Благослови́те, дуси и ду́шы пра́ведных.

Лик: Го́спода, по́йте и превозноси́те Его́ во ве́ки.

Чтец: Благослови́те, преподо́бнии и смире́ннии се́рдцем.

Лик: Го́спода, по́йте и превозноси́те Его́ во ве́ки.

Чтец: Благослови́те, Ананиа, Азариа и Мисаил.

Лик: Го́спода, по́йте и превозноси́те Его́ во ве́ки.

Чтец: Благослови́те, апо́столи, проро́цы и му́ченицы Госпо́дни.

Лик: Го́спода, по́йте и превозноси́те Его́ во ве́ки.

Чтец: Благослови́м Отца́, и Сы́на, и Свята́го Ду́ха.

Лик: Го́спода, поем и превозно́сим Его́ во ве́ки.

Чтец: И ны́не, и при́сно, и во ве́ки веко́в. Ами́нь.

Лик: Го́спода по́йте и превозноси́те Его́ во ве́ки.

Чтец: Хвалим, благослови́м, покланяемся Го́сподеви.

Лик: Пою́ще и превознося́ще во вся ве́ки.

Та́же ектениа́ ма́лая: Па́ки и па́ки:

Иерей Возгла́с: Я́ко Свят еси́, Бо́же наш, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно.

Диа́кон: И во ве́ки веко́в.

Лик: Ами́нь.

Та́же вме́сто Трисвята́го:

Ели́цы во Христа́ крести́стеся: на о́ба ли́ка.

Лик пе́рвый: Ели́цы во Христа́ крести́теся, во Христа́ облеко́стеся. Аллилу́иа.

Лик вторы́й: Ели́цы во Христа́ крести́стеся:

Лик пе́рвый: Ели́цы во Христа́ крести́стеся:

Лик вторы́й: Сла́ва, и ны́не: Во Христа́ облеко́стеся. Аллилу́иа.

Лик пе́рвый: Ели́цы во Христа́ крести́стеся:

Та́же диа́кон: Во́нмем.

Свяще́нник: Мир всем.

Чтец: И ду́хови твоему́.

Диа́кон: Прему́дрость.

Чтец: Проки́мен, глас пятый: Вся земля́ да покло́нится Тебе́ и пое́т Тебе́, да поет же И́мени Твоему́, Вы́шний.

Лик: Вся земля́ да покло́нится Тебе́:

Чтец, стих: Воскли́кните Господеви вся земля́, по́йте же И́мени Его́.

Лик: Вся земля́ да покло́нится Тебе́:

Чтец: Вся земля́ да покло́нится Тебе́ и поет Тебе́.

Лик: Да пое́т же И́мени Твоему́, Вы́шний.

Диа́кон: Прему́дрость.

Чтец: К Ри́мляном послания Свята́го апо́стола Па́вла чте́ние.

Диа́кон: Во́нмем.

Чтец: Бра́тие, ели́цы во Христа́ Иису́са крести́хомся, в смерть Его́ крести́хомся. Спогребо́хомся у́бо Ему́ креще́нием в смерть: да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти начне́м. А́ще бо сообра́зни бы́хом подо́бию сме́рти Его́, то и Воскресе́нию бу́дем. Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо, оправди́ся от греха́. А́ще ли умро́хом со Христом, ве́руем, я́ко и жи́ви бу́дем с Ним. Ве́дяще, я́ко Христо́с воста́ от ме́ртвых, ктому́ уже́ не умира́ет: смерть Ему́ кто́му не облада́ет. Еже бо у́мре, греху́ у́мре еди́ною: а е́же живе́т, Бо́гови живе́т. Та́кожде и вы помышля́йте себе́, ме́ртвым у́бо бы́ти греху́, живы́м же Бо́гови: о Христе́ Иису́се Господе на́шем.

Свяще́нник: Мир ти.

Чтец: И ду́хови твоему́.

И глаго́лет чтец вместо Аллилу́иа, на глас 7: Воскресни́, Бо́же, суди́ земли́, я́ко Ты насле́диши во всех язы́цех.

Лик пое́т: Воскресни́, Бо́же, суди́ земли́, я́ко Ты насле́диши во всех язы́цех.

Чтец: Бог ста в со́нме бого́в, посреде́ же бо́ги разсу́дит.

Лик: Воскресни́, Бо́же, суди́ земли́:

Чтец: Доко́ле су́дите непра́вду, и ли́ца гре́шников прие́млете?

Лик: Воскресни́, Бо́же, суди́ земли́:

Чтец: Суди́те си́ру и убо́гу, смире́нна и ни́ща оправда́йте.

Лик: Воскресни́, Бо́же, суди́ земли́:

Чтец: Изми́те ни́ща и убо́га, из руки́ гре́шничи изба́вите его́.

Лик: Воскресни́, Бо́же, суди́ земли́:

Чтец: Не позна́ша, ниже́ уразуме́ша, во тьме хо́дят.

Лик: Воскресни́, Бо́же, суди́ земли́:

Чтец: Да подви́жатся вся основа́ния земли́. Аз рех: бо́зи есте́, и сы́нове Вы́шняго вси. Вы же я́ко челове́цы умира́ете и я́ко еди́н от князе́й па́даете.

Лик: Воскресни́, Бо́же, суди́ земли́:

Чтец: Воскресни́, Бо́же, суди́ земли́.

Лик: Я́ко Ты насле́диши во всех языцех.

Тогда́ иере́и и диа́кони извлача́ются че́рных одежд и облача́ются в бе́лыя.

По облаче́нии же исхо́дит диа́кон со Ева́нгелием на амво́н и возглаша́ет:

Благослови́, Влады́ко, благовести́теля свята́го апо́стола и ева́нгели́ста Матфе́а.

Свяще́нник, знаменуя Его́, глаго́лет:

Бо́г, моли́твами Свята́го сла́внаго и всехва́льнаго апо́стола и ева́нгели́ста Матфе́а, да даст тебе́ глаго́л благовеству́ющему си́лою мно́гою, во исполне́ние Ева́нгелиа возлю́бленнаго Сы́на Своего́ Го́спода на́шего Иису́са Христа́.

Диа́кон: Ами́нь.

Свяще́нник: Прему́дрость, про́сти, услы́шим Свята́го Ева́нгелиа. Мир всем.

Лик: И ду́хови твоему́.

Диа́кон: От Матфе́а Свята́го Ева́нгелиа чте́ние. (Зачало 115).

Лик: Сла́ва Тебе́, Го́споди, сла́ва Тебе́.

Свяще́нник: Во́нмем.

Диа́кон: В ве́чер суббо́тный, свита́ющи во еди́ну от суббо́т, прии́де Мари́а Магдали́на и другая Мари́а, ви́дети гроб. И се трус бысть ве́лий: а́нгел бо Госпо́день сшед с небесе́, присту́пль отвали́ ка́мень от две́рий гро́ба и седя́ше на нем. Бе же зрак его́ я́ко мо́лния и одея́ние его́ бело́ я́ко снег. От стра́ха же его́ сотрясо́шася стрегу́щии и бы́ша я́ко ме́ртвии. Отвеща́в же а́нгел рече́ жена́м; не бо́йтеся вы, вем бо, я́ко Иису́са распя́таго и́щете. Несть зде: воста́ бо, я́коже рече́. Прииди́те, ви́дите ме́сто, иде́же лежа́ Госпо́дь. И ско́ро ше́дше рцы́те ученико́м Его́, я́ко воста́ от ме́ртвых, и се варя́ет вы в Галиле́и: та́мо Его́ у́зрите, се Рех вам. И изше́дше ско́ро от гро́ба, со стра́хом и ра́достию ве́лиею, теко́сте возвести́ти ученико́м Его́. Я́коже идя́сте возвести́ти ученико́м Его́. И се Иису́с сре́те я́, глаго́ля: ра́дуйтеся. Оне́ же присту́пльше, я́стеся за но́зе Его́, и поклони́стеся Ему́. Тогда́ глаго́ла и́ма Иису́с: не бо́йтеся, иди́те, возвести́те бра́тии Мое́й, да и́дут в Галиле́ю, и ту Мя ви́дят. Иду́щема же и́ма, се не́цыи от кусто́диа прише́дше во град, возвести́ша архиере́ом вся бы́вшая. И собра́вшеся со ста́рцы сове́т сотвори́ша, сре́бреники дово́льны да́ша во́ином, глаго́люще: рцы́те, я́ко ученицы́ Его́ но́щию прише́дше украдо́ша Его́, нам спя́щым. И а́ще сие́ услы́шано бу́дет у иге́мона, мы утоли́м его́ и вас безпеча́льны сотвори́м. Они́ же прие́мше сре́бреники, сотвори́ша я́коже нау́чени бы́ша. И промче́ся сло́во сие́ во иуде́ех, да́же до сего́ дне. Еди́нии же на́десяте ученицы́ идо́ша в Галиле́ю, в го́ру, а́може повеле́ им Иису́с. И ви́девше Его́ поклони́шася Ему́: о́ви же усумне́шася. И присту́пль Иису́с рече́ им, глаго́ля: даде́ся Ми вся́ка власть на Небеси́ и на земли́. Ше́дше у́бо научи́те вся язы́ки, крестя́ще их во И́мя Отца́, и Сы́на, и Свята́го Ду́ха. Уча́ще их блюсти́ вся, ели́ка запове́дах вам. И се Аз с ва́ми есмь во вся дни, до сконча́ния ве́ка. Ами́нь.

Лик: Сла́ва Тебе́, Го́споди, сла́ва Тебе́.

И по чи́ну бо́жественная литурги́а Вели́каго Васи́лиа. Вме́сто же херуви́мския пе́сни пое́тся настоя́щий тропа́рь, глас 8:

Да молчи́т вся́кая плоть челове́ча, и да стои́т со стра́хом и тре́петом, и ничто́же земно́е в себе́ да помышля́ет: Царь бо Ца́рствующих и Госпо́дь госпо́дствующих прихо́дит закла́тися и да́тися в снедь ве́рным. Предхо́дят же сему ли́цы А́нгельстии со вся́ким Нача́лом и Вла́стию, многоочи́тии Херуви́ми и шестокрила́тии Серафи́ми, ли́ца закрыва́юще и вопию́ще песнь: Аллилу́иа, Аллилу́иа, Аллилу́иа.

Вме́сто Достойно: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бог, ве́рою и любо́вию Тя велича́ющыя.

Прича́стен, глас 4: Воста́ я́ко спя Госпо́дь, и воскре́се, спаса́яй нас. Аллилу́иа. (Три́жды).

И обы́чный отпу́ст.


Источник: Службы Страстной седмицы Великого поста. - М. : Моск. патриархия, 1994. - 357 с.

Комментарии для сайта Cackle