Автор-составитель: архимандрит Афанасий (Соколов)
Кондак 1
Взбра́нной Воево́де и Засту́пнице рода христиа́нскаго, дарова́вшей нам Баркола́бовскую Свою ико́ну в покро́в и защище́ние, похва́льная воспису́ем Ти раби́ Твои, Всесвята́я. Ты жe, яко иму́щая держа́ву непобеди́мую, от всяких нас бед и искушений свободи́, да со умиле́нием зове́м Ти: Ра́дуйся, Богоро́дице Де́во, Баркола́бовскою иконою нас утеша́ющая!
Икос 1
Ангелов мно́жества восхваля́ют Тя, Цари́це Небе́сная, ми́лости безчи́сленныя ро́ду христиа́нскому явля́ющую. Мы же, земноро́днии, предста́тельством Твои́м при́сно утеша́емии, со дерзнове́нием вопие́м Ти благода́рственная:
Ра́дуйся, го́рними си́лы покланя́емая: ра́дуйся, земноро́дными благогове́йно почита́емая.
Ра́дуйся, превы́сшая вся́каго созда́ния: ра́дуйся, нас, гре́шных, непосты́дное упова́ние.
Ра́дуйся, арха́нгельское благове́стие прия́вшая: ра́дуйся, убо́гаго челове́ческаго гла́са не возгнуша́вшаяся.
Ра́дуйся, велича́ние пра́ведныя Елисаве́ты: ра́дуйся, вои́стину Богоотрокови́це и Ма́терь Све́та.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 2
Ви́дящи, Всеблага́я Засту́пнице, ско́рби и беды́ наро́да белору́сскаго, от бра́нных нахожде́ний мно́гажды страда́вшаго, благоволи́ла еси дарова́ти ему во утеше́ние икону Свою святу́ю, да вы́ну пребыва́ет зде яко зало́г Твоего́ всегда́шняго попече́ния и да прославляется в сем Боже́ственное смотре́ние хвале́бною пе́снию: Аллилу́иа.
Икос 2
Ра́зумом просвеще́н свы́ше князь Пожа́рский, я́ко подоба́ет во оби́тель Баркола́бовскую отнести́ чу́дную ико́ну Преблагослове́нныя Влады́чицы, потща́ся ско́ро испо́лнити наме́рение свое́ и со умиле́нием возопи́ та́ко:
Ра́дуйся, ко спасе́нию путеводя́щая: ра́дуйся, от поги́бели нас сохраня́ющая.
Ра́дуйся, земли́ сея́ похвало́ и украше́ние: ра́дуйся, преде́рзких и злых устраше́ние.
Ра́дуйся, душеспаси́тельным сове́том помога́ющая: ра́дуйся, душевре́дная поползнове́ния отверга́ющая.
Ра́дуйся, помраче́нныя умы́ просвети́вшая: ра́дуйся, ми́ром и безмяте́жием благослови́вшая.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 3
Си́лою неви́димою напра́вила еси ко́ни, ико́ну Твою святу́ю носи́вшия, во оби́тель Баркола́бовскую, Пречи́стая Де́во, да вси, ви́девше чудо Твоего́ промышле́ния, воспою́т Вседержи́телю Бо́гу: Аллилу́иа.
Икос 3
Иму́щи драгоце́нное сокро́вище – о́браз чудотво́рный Пресла́вныя Присноде́вы, оби́тель Баркола́бовская красу́ется от лет древних и со дерзнове́нием воспева́ет громогла́сно:
Ра́дуйся, Триипоста́снаго Бо́га благода́ть прия́вшая: ра́дуйся, Сы́ну Бо́жию плоть заимода́вшая.
Ра́дуйся, Пречи́стая, Всепе́тая Отрокови́це: ра́дуйся, Ду́ха Свята́го цевни́це.
Ра́дуйся, Марие Де́во, и́стинная Богоро́дице: ра́дуйся, небесе́ и земли́ Цари́це.
Ра́дуйся, послуша́нию навы́кшая: ра́дуйся, смире́нная Рабо́ Госпо́дня.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 4
Бу́рю гоне́ний, на Свято́е Правосла́вие воздви́гнутую, утоли́ти тщася святи́тель Могиле́вский Георгий, все упова́ние свое на Бо́га возложи́ и ко предста́тельству Засту́пницы рода христиа́нскаго притече́, зовы́й: Аллилу́иа.
Икос 4
Слы́шаша бли́жнии и да́льнии, яко Церковь Белору́сская, в гоне́нии зло́бнем пребыва́ющи, соблюда́ется ненаве́тно, восхва́лиша Бо́га и просла́виша Ма́терь Его, пою́ще си́це:
Ра́дуйся, сокровище жизни ве́чныя: ра́дуйся, домострои́тельнице на́шего спасе́ния.
Ра́дуйся, проро́ком Моисе́ем в ско́рби дре́вле зри́мая: ра́дуйся, проявле́нная Купино́ Неопали́мая.
Ра́дуйся, утоле́ние вся́кия печа́ли: ра́дуйся, скорбя́щих при́сное радование.
Ра́дуйся, правосла́вныя веры утвержде́ние: ра́дуйся, от ересе́й и нестрое́ний огражде́ние.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 5
Боготе́чней звезде́ подо́бящися, яви́ся свята́я ико́на Баркола́бовская пра́отцем нашим, ко спасе́нию их направля́ющи, та́же и дне́сь нам, недосто́йным, пути́ указу́ет, да греховный сон оттря́сше, пое́м Спаси́телю Бо́гу: Аллилу́иа.
Икос 5
Ви́дяще, яко от пречу́дныя ико́ны Цари́цы Небе́сныя благода́тныя струи́ истека́ют, гре́шнии ко исправле́нию прихо́дят, многоразли́чныя стра́сти и неду́ги исцеля́ются, кто не умили́тся и со благогове́нием не воззове́т такова́я:
Ра́дуйся, Премилосе́рдная Де́во и Ма́ти: ра́дуйся, неисчерпа́емый исто́чниче благода́ти.
Ра́дуйся, суеве́рия и безу́мныя обы́чаи упраздня́ющая: ра́дуйся, ко благоче́стию нас возвраща́ющая.
Ра́дуйся, злых сердец умягче́ние: ра́дуйся, избавля́ющая от бесо́вскаго муче́ния.
Ра́дуйся, чистоты́ сосу́де неиждива́емый: ра́дуйся, целому́дрия цве́те неувяда́емый.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 6
Пропове́дницы и́стиннаго богопозна́ния яви́шася и́нокини баркола́бовския и вси лю́дие, на поклоне́ние Влады́чице Богоро́дице во оби́тель притека́ющии, да в ро́ды родо́в на земли́ на́шей прославля́ется Имя Бо́жие богокра́сною пе́снию: Аллилу́иа.
Икос 6
Возсия́вый в стране́ на́шей исто́чник приснотеку́щий, не то́кмо исцеления теле́сных неду́гов, но наипа́че духо́внаго просвеще́ния и вразумле́ния, от о́браза Неве́сты Неневе́стныя исходя́щий, озаря́ет все́х, с ве́рою и любо́вию зову́щих и глаго́лющих:
Ра́дуйся, всего́ ми́ра наде́ждо и заступле́ние: ра́дуйся, земли́ Белору́сския непоколеби́мое утвержде́ние.
Ра́дуйся, гра́де прибе́жища ве́рным: ра́дуйся, грехо́вную отъе́млющая скве́рну.
Ра́дуйся, ба́не, омыва́ющая со́весть: ра́дуйся, услажда́ющая вся́кую го́ресть.
Ра́дуйся, духо́вную жа́жду утоля́ющая: ра́дуйся, Ча́шею Жи́зни нас напоя́ющая.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 7
Хотя́ще упраздни́ти Це́рковь Христо́ву, воста́ша в стране́ на́шей безбо́жницы и слуги́ сатани́нския, суето́ю и зло́бою помраче́ннии, оби́тели и храмы разори́ша, святы́ни поруга́ша, архиере́и и свяще́нницы уби́ша, ве́рныя лю́ди разсе́яша, оба́че ничто́же возмого́ша в гоне́нии свое́м, ибо па́че их лжемудрова́ния вопие́м пе́снь Победи́телю Бо́гу: Аллилу́иа.
Икос 7
Но́ваго не́ба ча́ем, иде́же пра́вда живе́т, и не и́мамы зде пребыва́ющаго гра́да, но гряду́щаго взыску́ем, – глаго́лаша ве́рнии гони́телем и мучи́телем. – Стра́ха же ва́шаго не убои́мся, ниже́ смути́мся». Та́кожде и и́нокини баркола́бовския, пред разоре́нием оби́тели взя́ша ико́ну Пречи́стыя Влады́чицы и сохрани́ша ю невреди́мо. Сего́ ра́ди зове́м Цари́це Небе́сней та́ко:
Ра́дуйся, от уби́йцы Ирода преди́вно спа́сшаяся: ра́дуйся, от богобо́рцев-и́родов ико́ну Свою́ сохрани́вшая.
Ра́дуйся, многоско́рбная Ма́ти Бо́жия, Симео́ново прорече́ние: ра́дуйся, яко ду́шу Твою́ про́йде ору́жие.
Ра́дуйся, у Креста́ Сы́на Бо́жия изнемога́вшая: ра́дуйся, Воскресе́ния ра́дость пе́рвая прия́вшая.
Ра́дуйся, правове́рия Побе́до Непобеди́мая: ра́дуйся, Це́ркве Христо́вы Стено́ Неруши́мая.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 8
Стра́нно и сумни́тельно неве́рным слы́шати о чудесе́х от ико́н Твои́х, Всецари́це Богоро́дице. Мы же ве́рнии, вразумля́емии Твои́м всегда́шним покро́вом и предста́тельством, несумне́нно почита́ем Тя по достоя́нию и вопие́м Богу: Аллилу́иа.
Икос 8
Вы́шняя му́дрствующе, а не земна́я, жите́йскою стезе́ю ше́ствуют ве́рнии, ду́ху вре́мени сего́ не раболе́пствующе, яко дни на́ши лука́ви суть. Ты же, Ма́ти и Де́во, Всеблага́я Одиги́трие и Скоропослу́шнице, приими́ от недосто́йных, оба́че благода́рных усте́н на́ших похвалы́ сия́:
Ра́дуйся, ве́рных рабо́в Бо́жиих покрови́тельнице: ра́дуйся, ко спасе́нию на́ша руководи́тельнице.
Ра́дуйся, похвало́ иере́ев благогове́йных: ра́дуйся, от бед и клеветы́ покрыва́ющая их Свои́м омофо́ром.
Ра́дуйся, и́ноков и и́нокинь при́сно утеша́ющая: ра́дуйся, на моли́тву и безмо́лвие благословля́ющая.
Ра́дуйся, до́бре подвиза́ющихся укрепле́ние: ра́дуйся, лени́вых подвига́ющая к исправле́нию.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 9
Вся́каго челове́ка проше́ния прие́млеши и Сы́на Твоего́ и Бо́га за него́ ми́лостивно умоля́еши, Благода́тная, да вси́, спасе́ние получи́вше, в ра́зуме и́стины Бо́гови воззову́т: Аллилу́иа.
Икос 9
Вети́и многовеща́нныя суть безчи́сленныя о́бразы Влады́чицы Богоро́дицы, во всем ми́ре возвеща́ющия вели́чия Ея. Мы же, Пречи́стая Де́во, Баркола́бовский святы́й о́браз почита́юще, сo усе́рдием пое́м святы́ню Твою́:
Ра́дуйся, чудотво́рными ико́нами всю вселе́нную обогати́вшая: ра́дуйся, зе́млю на́шу те́ми просвети́вшая.
Ра́дуйся, при́сное к Бо́гу дерзнове́ние: ра́дуйся, небе́сных та́ин открове́ние.
Ра́дуйся, чту́щия Тя прославля́ющая: ра́дуйся, непочита́ющих Тя посрамля́ющая.
Ра́дуйся, а́лчущих и жа́ждущих пита́тельнице: ра́дуйся, благ ве́чных пода́тельнице.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 10
Спасти́ хотя́щи всех нас, Пренепоро́чная Богома́ти, благоволи́ па́ки процвести́ оби́тели Твое́й, да из ме́ртвых воскре́снет ме́сто свято́е сие́ и о́бразом Твои́м украше́нное, до сконча́ния ве́ка прославля́ет Бо́га побе́дно: Аллилу́иа.
Икос 10
Стена́ еси́ не то́кмо оби́тели Твое́й, Всеблаже́нная, но и вся́кому ме́сту, иде́же к Твоему́ покро́ву лю́дие прибега́ют. Та́ко ве́рующе, мы гре́шнии днесь Тя прославля́ем:
Ра́дуйся, Зако́на Госпо́дня усе́рдная исполни́тельнице: ра́дуйся, нас ко исполне́нию Бо́жиих за́поведей учи́тельнице.
Ра́дуйся, милосе́рдия две́ри нам отверза́ющая: ра́дуйся, к дело́м милосе́рдия нас побужда́ющая.
Ра́дуйся, сохраня́ющая от бли́жних осужде́ния: ра́дуйся, науча́ющая духо́вному трезвомы́слию и разсужде́нию.
Ра́дуйся, благочести́выя супру́жества украша́ющая: ра́дуйся, роди́телей со ча́ды примиря́ющая.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 11
Пе́ние всеумиле́нное прино́сят Ти, Де́во, архиере́ев сосло́вие, свяще́ннический и мона́шеский чин и вси лю́дие, от о́браза Твоего́ преди́вное поможе́ние прие́млющии, из глубины́ серде́ц пою́ще Сы́ну Твоему́ и Бо́гу: Аллилу́иа.
Икос 11
Светоприе́мную свещу́, во мра́це искушений дре́вле просия́вшую и доны́не благода́тию нас озаря́ющую, зрим святу́ю ико́ну Баркола́бовскую. Сего ра́ди взира́юще на ню, ко Влады́чице а́нгелов и челове́ков глаго́лем:
Ра́дуйся, заре́, пред Со́лнцем пра́вды возсия́вшая: ра́дуйся, мракобе́сие ско́ро отгна́вшая.
Ра́дуйся, ле́ствице, патриа́рха Иа́кова виде́ние: ра́дуйся, проро́ков мно́гое возвеще́ние.
Ра́дуйся, столпо́м о́гненным прообразова́нная: ра́дуйся, от ве́ка предызбра́нная.
Ра́дуйся, житие́ на́ше земно́е устроя́ющая: ра́дуйся, две́ри ра́йския ве́рным отверза́ющая.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 12
Благода́ти исто́чник о́браз Баркола́бовский Ма́тери Твоея́, Го́споди, не отыми́ от нас, да не поги́бнем лю́те во гресе́х на́ших, но долготерпе́нием Твои́м подви́гни нас на покая́ние, зову́щих: Аллилу́иа.
Икос 12
Пою́ще Твоя́ чудеса́, Ма́ти Бо́жия, пред пречи́стым о́бразом Твои́м, смире́нно лобыза́ем его, воспомина́юще Твоя́ ми́лости, и со стра́хом и благодаре́нием глаго́лем Ти песнь сию́:
Ра́дуйся, от враг ви́димых и неви́димых нас избавля́ющая: ра́дуйся, от смертоно́сныя я́звы сохраня́ющая.
Ра́дуйся, оста́вленных врача́ми исцеле́ние: ра́дуйся, ми́лостивное наше посеще́ние.
Ра́дуйся, во время глада насыща́ющая: ра́дуйся, от внеза́пныя поги́бели сохраня́ющая.
Ра́дуйся, безмяте́жное превожде́ние до сме́рти: ра́дуйся, непосты́дное упова́ние по сме́рти.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 13
О Всепе́тая Ма́ти, Госпоже́ Богоро́дице! Приими́ сие́ ма́лое моле́ние на́ше, от усе́рдия к Тебе́ приноси́мое, и да́руй нам вся потре́бная ко благоче́стию, наипа́че же ве́чнаго спасе́ния сподо́би в Ца́рстве Сы́на Твоего́ и Бо́га, о Тебе́ вопию́щих: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
Ангелов мно́жества восхваля́ют Тя, Цари́це Небе́сная, ми́лости безчи́сленныя ро́ду христиа́нскому явля́ющую. Мы же, земноро́днии, предста́тельством Твои́м при́сно утеша́емии, со дерзнове́нием вопие́м Ти благода́рственная:
Ра́дуйся, го́рними си́лы покланя́емая: ра́дуйся, земноро́дными благогове́йно почита́емая.
Ра́дуйся, превы́сшая вся́каго созда́ния: ра́дуйся, нас, гре́шных, непосты́дное упова́ние.
Ра́дуйся, арха́нгельское благове́стие прия́вшая: ра́дуйся, убо́гаго челове́ческаго гла́са не возгнуша́вшаяся.
Ра́дуйся, велича́ние пра́ведныя Елисаве́ты: ра́дуйся, вои́стину Богоотрокови́це и Ма́терь Све́та.
Ра́дуйся, Богоро́дице Де́во, Баркола́бовскою ико́ною нас утеша́ющая!
Кондак 1
Взбра́нной Воево́де и Засту́пнице рода христиа́нскаго, дарова́вшей нам Баркола́бовскую Свою ико́ну в покро́в и защище́ние, похва́льная воспису́ем Ти раби́ Твои, Всесвята́я. Ты жe, яко иму́щая держа́ву непобеди́мую, от всяких нас бед и искушений свободи́, да со умиле́нием зове́м Ти: Ра́дуйся, Богоро́дице Де́во, Баркола́бовскою иконою нас утеша́ющая!
Молитва
О Пресвята́я Влады́чице Богоро́дице, пред Бо́гом Засту́пнице, Моли́твеннице и Хода́таице ро́да христиа́нскаго! Благодари́м Тя, безчи́сленная бла́га моли́твою Свое́ю нам испроси́вшая. Благодари́м Тя, мно́жество икон Твои́х чудотво́рных всему́ ми́ру яви́вшая. Благодари́м Тя, ди́вный о́браз Баркола́бовский в годи́ну скорбе́й кра́ю Приднепро́вскому дарова́вшая и до конца́ нас его не лиши́вшая. Во оби́тели святе́й пребыва́ти пожела́вшая, Непоро́чная Голуби́це, наста́ви и нас на пути́ чистоты́ и целому́дрия, да угото́вим ду́ши и телеса́ своя во оби́тели Ду́ха Бо́жия. Ми́лости и щедро́ты Твоя́ от чудотво́рныя ико́ны неизче́тно излива́ющая, помози́ и нам твори́ти до́брая дела непреста́нно, и вся́кому бли́жнему без разсужде́ния благоде́яти. Лик Свой кро́ткий и смире́нный нам, недосто́йным, омраче́нным грехо́м, при́сно явля́ющая, просвети́ тьму на́шу душе́вную, освяти́ пути́ жи́зни на́шея и приведи́ к ти́хому приста́нищу в ве́чныя оби́тели, угото́ванныя Го́сподем лю́бящим Его и Тя, Пречи́стую Ма́терь, почита́ющим, во ве́ки веко́в. Ами́нь.