Минея, 18 Декабря.
Глас 1
Песнь 1
Ирмос: Горькия работы избавлься Израиль, непроходимое пройде яко сушу: врага зря потопляема, песнь яко Благодетелю поет Богу, чудодеющему мышцею высокою, яко прославися.
Припев: Священному́чениче Фадде́е, моли́ Бо́га на́с.
Греху не поработився, мудре Фаддее, движения вся душевная силою духа запечатствовал еси, посту навык, всяко злострадание терпел еси, любви истинней от Христа научаяся, Егоже ныне на Небесех поеши, яко прославися.
Припев: Священному́чениче Фадде́е, моли́ Бо́га на́с.
Духа скрижаль, Германа преподобнаго, наставника имел еси, Фаддее богозванне, ко отеческим писанием, яко елень к водам, притекая, душу слезами обновив, Утешителя приял еси, Емуже покланяемся вси, яко прославися.
Сла́ва Отцу́ и Сы́ну и Свято́му Ду́ху.
Повиваемаго рубищи, яко младенца, и исцеления Подающаго прикосновением риз, Христа, кротким сердцем возлюбив, святе Фаддее, во иночестем нищетнем образе подвизался еси: темже риза души, честныя мощи твоя, чудесы прославишася.
И ны́не и при́сно и во ве́ки веко́в. Ами́нь.
Богородичен: Не отлучаешися иноков боговидцев, новаго Израиля, иже мысленное море страстей преидоша, и тии по долгу Тя, Дево, именуют столп огнен, ко Отцу Светов приводяй от тьмы, Егоже поют вернии, яко прославися.
Песнь 3
Ирмос: Не мудростию и богатством да хвалится смертный своим, но верою Господнею, православно взывая Христу Богу, и поя присно: на камени Твоих заповедей утверди мя, Владыко.
Припев: Священному́чениче Фадде́е, моли́ Бо́га на́с.
Не яко едину некую от добродетелей стяжал еси, но, подвигом крайним себе очистив, образ Христа в души явил еси, Емуже и воззвал еси: во еже пасти словесное стадо Твое утверди мя, Владыко.
Припев: Священному́чениче Фадде́е, моли́ Бо́га на́с.
Иже из глубины веков корень веры от юности насадил еси во глубину сердечную и плоды духовныя принесл еси Богу, взывая: во словесех живоносных Твоих утверди мя, Владыко.
Сла́ва Отцу́ и Сы́ну и Свято́му Ду́ху.
Крещения благодати отпадающим второе апостольски Христа проповедал еси, страж быв веры Православныя, и сердцем, скорбию терзаемым, Богу взывал еси: утверди Церковь Русскую, Владыко.
И ны́не и при́сно и во ве́ки веко́в. Ами́нь.
Богородичен: Чистота девства Твоего, Марие Богоневесто, силы души Твоея в крепости сохрани, сердце же откры любви к Богу и человеком, от нихже уневеститися Христу хотящия утверди, Святая Владычице.
Седален, глас 4
Весь огнен быв чистоты ради жития твоего и ревности о угождении Богу исполнен, всех призывал еси, якоже праведный Иоанн иногда, к Чаши Христове спасительней, обаче в разуме глаголал еси: ныне семя безсмертия точию восприемлем, егда же страсти умертвити потщимся, тое возрастати начнет в сердцах наших таинственно.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Безплотный воплощается, и Безлетный в лето бывает, и пеленами повивается нас ради, Иже землю повиваяй Господь мглою, плоть Сам паче постижения неизменно явився от Неискусобрачныя, темже, дивящеся, поклонимся великому таинству.
Песнь 4
Ирмос: Слыша древле Аввакум, Христе, чудный Твой слух, и страхом взываше: от юга Бог приидет, и Святый от горы приосененныя чащи, спасти помазанныя, слава силе Твоей Господи.
Припев: Священному́чениче Фадде́е, моли́ Бо́га на́с.
Архиерейство приим, труды усугубил еси, во одеяниих рубищем Великаго Василия подражая, в постех Златоустому, во бдениих Богодохновенному Григорию; темже, и естество превозшед, взывал еси: слава силе Твоей, Господи.
Припев: Священному́чениче Фадде́е, моли́ Бо́га на́с.
Кое помышление, кое чувство имел еси, на всяк день принося Жертву Безкровную, рцы нам, святителю Фаддее, да, сими обогатившеся, Троице воззовем: слава еже о нас смотрению Твоему, Господи.
Сла́ва Отцу́ и Сы́ну и Свято́му Ду́ху.
С болезнию остен греха из души исторгающе, Церкви Матери припадаем по слову твоему, услаждает бо горесть Духом Святым, в Ней живущим, темже и славныя мира зовем пети с нами: слава снизхождению Твоему, Господи.
И ны́не и при́сно и во ве́ки веко́в. Ами́нь.
Богородичен: В начале мир к бытию воззвав, глас Божий возгреме: да будет небо, и земля, и свет, слово же Девы Чистыя вселенную обновляет: да будет Ми по глаголу Архангелову, се бо раба Твоя, Всесильне Господи.
Песнь 5
Ирмос: Свет Твой незаходимый воссияй, Христе, в сердца верно поющих Тя, мир подавай нам паче ума, тем от нощи неведения ко дню светом Твоим текуще, славословим Тя, Человеколюбче.
Припев: Священному́чениче Фадде́е, моли́ Бо́га на́с.
Свет Христов показал еси чадом твоим, воспламеняя чувствия ко святым помышлением, и, якоже Павел с народом Божиим сердцем соединен, всем вождь духовный был еси, коемуждо старец утешитель, Христу подобяся, Человеколюбцу.
Припев: Священному́чениче Фадде́е, моли́ Бо́га на́с.
Ум чист покаянием непрестанным стяжевати учил еси, глаголя, яко сие не пустынным точию подобает, Христос бо Царство Божие внутрь сердца указа и служити Ему в Дусе и истине вся призва, яко Судии Праведному и Человеколюбцу.
Сла́ва Отцу́ и Сы́ну и Свято́му Ду́ху.
Словесем Божиим внимати повелел еси, да окропится сердце коегождо и помажется сими и питие благодати Христовы да приимет; душа же да изведет токи покаяния, смирения и любве, яже водами Богоявления одожди Христос Человеколюбец.
И ны́не и при́сно и во ве́ки веко́в. Ами́нь.
Богородичен: Не сами в себе образ Божий воскресихом, обаче смирение Твое, Дево, привлече благодать, темже со Ангелом Ти взываем: радуйся, Обрадованная, Мати Христа Человеколюбца.
Песнь 6
Ирмос: Во глубину погибели/ окаянное естество, Христе мой Спасе, достигшее древле/ лежаше, – увы мне! – в темных глубоких,/ понеже Твоею Божественною силою к Небеси взыде,/ краснейшим добротам,/ пожру Тебе, Спасе, вопиет,/ жертву хваления.
Припев: Священному́чениче Фадде́е, моли́ Бо́га на́с.
Людем российским, учения Церкве отметающимся и глаголющим, яко прейде время покаяния, время приближающагося суда со слезами возвестил еси, и гром всемирных бедствий предглаголал еси не хотящим Богови воздати жертву хваления.
Припев: Священному́чениче Фадде́е, моли́ Бо́га на́с.
Мечтания лукавых проповедников обличая, рекл еси, святителю: почто страстьми держимых кроме подвига зовете в свободу Христову, и Церковь, яко жизни мира не внемлющую, уничижаете! Темже и пророчествовати сим возбранил еси, яко Духа Божия не имущим и не хотящим Богови воздати жертву хваления.
Сла́ва Отцу́ и Сы́ну и Свято́му Ду́ху.
Отягченным куплями житейскими, покоем же телесным омраченным невозможно Богови поспешествовати во благая, рекл еси, святителю, глагол Павлов поминаяй и, яко воин доблий Христов, на страдания исходяй.
И ны́не и при́сно и во ве́ки веко́в. Ами́нь.
Богородичен: Брение и персть есмы человецы, обаче Тобою, Дево Богородице, во едино Тело Христово совокупихомся, Иже есть Церковь Божия, на всяк день Отцу Небесному приносящая жертву хваления.
Кондак, глас 4
Духа небоязни, силы, любве и упования / даде Пастыреначальник ти, святителю Фаддее, / во страдании бо твоем благодарение Богу воздавал еси / и в гонениях страждущия утешал еси, // глаголя: не унывайте, Христос бо с нами есть.
Икос
Во дни лукавыя и беззаконныя во стране нашей яко Ангел светел явился еси, святителю; дыхание же смерти повсюду видев, путь спасения верным указал еси, глаголя: якоже капли водныя в мори стремление имут, тако и мы души да направим ко источником любве Божия, и по апостолу друг друга приимем, якоже Христос ны прият, тогда и ангелов послет оградити ны от печалей о зле мира сего, напоследок же и Сам внидет вечеряти с нами: не унывайте, Христос бо с нами есть.
Песнь 7
Ирмос: Проидоша яко чертог пещный пламень нестерпимый, иже за благочестие иногда, отроцы святии показавшеся яве, и согласно воспевающе песнь пояху: отцев Боже, благословен еси.
Припев: Священному́чениче Фадде́е, моли́ Бо́га на́с.
Лжепастыри, аки пагубныя волки, отгнати научи богомудрый Фаддей своя чада духовная; и якоже Христос взором кротким воздвиже Петра к покаянию иногда, такожде святитель заблуждшыя приведе во ограду Церкве, взывающия: отцев Боже, благословен еси.
Припев: Священному́чениче Фадде́е, моли́ Бо́га на́с.
От неприязни соблюсти ученики Христос Отца умоли, да послушавшии сих уверуют чистоты их ради; святитель же Фаддей, апостолом поревновав, себе очисти, и светом души своея ко спасению многия люди приведе зовущия: отцев Боже, благословен еси.
Сла́ва Отцу́ и Сы́ну и Свято́му Ду́ху.
Уведев путь крестный Христа, восходяща в славу Свою, темничное страдание и изгнание облобыза Фаддей крепчайший, присно радуяся и всем утешение подавая, злобу человечу претерпеваше с кротостию, глаголя: отцев Боже, благословен еси.
И ны́не и при́сно и во ве́ки веко́в. Ами́нь.
Богородичен: Постом пламень страстей победиша отроцы: девственная бо телеса их не опали пещь Вавилонская во образ вселения, Богоотроковице, в девственную утробу Твою, не опалившуюся огнем Божества, отцев Бога благословеннаго.
Песнь 8
Ирмос: Чуда преестественнаго показа образ, огнеросная пещь древле: огнь бо не опали юныя дети, Христово являя от Девы Божественное Рождество, тем воспевающе воспоим: да благословит тварь вся Господа и превозносит во вся веки.
Припев: Священному́чениче Фадде́е, моли́ Бо́га на́с.
Взыскал еси дар Божий, еже истинней вере учити чада церковная; егда же нецыи, во зло низпадше, тя преогорчиша, уповал еси на Бога, Иже мертвыя возставляет, и, плача горце о народе Российстем, дело Христово на земли совершил еси: темже на Небесех славословиши Его во вся веки.
Припев: Священному́чениче Фадде́е, моли́ Бо́га на́с.
Плоть воздержанием крайним истончил еси, не хлебом, но словом Божиим душу животворя, темже явил еси в злостраданиих крепость, подавая юзником в темнице от избытков своих, пищу и одежду, паче же слово утешения; и будущих судеб откровением сих утвердил еси верность Христу сохранити во веки.
Сла́ва Отцу́ и Сы́ну и Свято́му Ду́ху.
К тебе, святителю, ныне прибегаем, да уврачуеши скорби и болезни состраждущею любовию, ейже от Пастыреначальника Христа научился еси, ревностию исполнився о очищении сердец наших; сего ради мученическим венцем украшенный, якоже венцем любве твоея ко Господу, со Ангелы воспеваеши Его во вся веки.
И ны́не и при́сно и во ве́ки веко́в. Ами́нь.
Богородичен: Слава Твоя, Дщи Царева, внутрь есть, в сокровенных добротах сердца Твоего: во смирении и верности воли Божией, в вере, еюже явилася еси Совета неизреченнаго таинница, чудес же Христовых начало; темже род человеческий превозносит Тя во вся веки.
Песнь 9
Ирмос: Неизглаголанные Девы таинство: небо бо сия и престол Херувимский и светоносный показася, Христа Бога Вседержителя, Сию благочестно яко Богородицу величаем.
Припев: Священному́чениче Фадде́е, моли́ Бо́га на́с.
Себе отвергнувся, поревновал еси о Церкви Божией, милость же неизреченную и любовь к людем являя, глаголал еси: не убогия одежды своея стыждуся, но студ ми есть, аще скорбящаго не утешу словом. Темже тя усердно, яко пастыря добраго, величаем.
Припев: Священному́чениче Фадде́е, моли́ Бо́га на́с.
Друг искренний Святаго Патриарха был еси, иже, красоте души твоея дивяся, рече: видите ли сей светильник Церкве Русския? Не всем, но избранным точию, таковую силу духа подает Христос! Темже тя верно яко славу Церкви величаем.
Сла́ва Отцу́ и Сы́ну и Свято́му Ду́ху.
Ум свой в жизнь будущаго века вперив, Сына Божия житию притрудному еже на земли поревновал еси, на всяк день подвигов исполнением себе до смерти утесняя, сего ради в день осмый безпечальный, ликуя, вшел еси; темже тя преславно яко мученика величаем.
И ны́не и при́сно и во ве́ки веко́в. Ами́нь.
Богородичен: Мучеников похвала Ты еси, Дево Чистая, Тобою бо укрепляеми, ко страданию дерзнуша, ведуще, яко душу Твою пройде оружие в распятии вольнем Сына и Бога Твоего: темже тии яко Взбранную Воеводу Тя величают.
Светилен
Светиши Отечеству нашему всегда, светильниче Церкве Русския, славне Фаддее, умерщвление бо страстей подъял еси волею и всыновления Богу сподобился еси благодатию, темже молим тя, блаженне: слепоту духовных очей наших прожени, да сынове света явимся в День Судный.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Не на кровех проповедана бысть Боговоплощения тайна, но сию Тебе Единей, Марие, во граде Назарете Архангел возвести, зане мир слышания бе недостоин, Твои же очи выну в руку Господа Твоего. Темже молим Тя, Пречистая: слепоту духовных очей наших прожени, да сынове света явимся в День Судный.