Триодь, 1-я Неделя Великого Поста.
Глас 4
Песнь 1
Пле́щуще с весе́лием днесь ве́рнии возопии́м: / коль чу́дна дела́ Твоя́ Христе́, и вели́ка си́ла, / на́ше единомы́слие и согла́сие соде́лавый!
Припев: Сла́ва Тебе́, Бо́же на́ш, сла́ва Тебе́.
День ра́достный богому́дреннии / прииди́те соверши́м, / ны́не не́бо и земля́ весели́тся, и а́нгелов чи́ни, / и челове́ков собра́ния изря́дно пра́зднующе.
Припев: Сла́ва Тебе́, Бо́же на́ш, сла́ва Тебе́.
Преве́лие благодея́ние ви́дяще, рука́ми воспле́щим, / разстоя́щияся у́ды Христо́вы, совоку́плены во еди́нство, / и Бо́га похва́лим мир пода́вшаго.
Сла́ва Отцу́ и Сы́ну и Свято́му Ду́ху.
Да́шася Це́ркви днесь победи́тельная, / Богодви́жным манове́нием и сове́том, / Михаи́ла же и Феодо́ры, / благоче́стно ве́ру содержа́щих царе́й на́ших.
И ны́не и при́сно и во ве́ки веко́в. Ами́нь.
Богородичен: Ору́жия злочести́вых исчезо́ша я́ве ересе́й, / храм бо Твой Пречи́стая Чи́стая, / во образе́х украша́емый всеблаголе́пно зря́ще, / ны́не всесвяще́нно ра́дуемся.
Песнь 3
Не ктому́ нечести́вых еретико́в ны́не бровь взе́млется: / Бо́жия бо си́ла правосла́вие удержа́ла есть.
Припев: Сла́ва Тебе́, Бо́же на́ш, сла́ва Тебе́.
О́блацы проро́честии, / животворя́щую с небесе́ днесь ро́су нам да кропя́т, / на воста́ние ве́ры.
Припев: Сла́ва Тебе́, Бо́же на́ш, сла́ва Тебе́.
Благогла́сно та́йныя апо́столов Христо́вых трубы́, / па́че естества́ да вопию́т, / честны́х образо́в исправле́ние.
Сла́ва Отцу́ и Сы́ну и Свято́му Ду́ху.
Воспои́м Христа́, показа́вшаго нам / цари́цу благочести́вую, христолюби́вую, / с Боговенча́нною о́траслию.
И ны́не и при́сно и во ве́ки веко́в. Ами́нь.
Богородичен: Селе́ние Твое́ свяще́нное / дости́гше ве́рнии, Пречи́стая, / светови́дною благода́тию ны́не озари́тися, мо́лимся.
Седален, глас 1
Боже́ственный Твой зрак, во о́бразе образу́юще, Христе́, / я́сно вопие́м Рождество́, / чудеса́ неизглаго́ланная, во́льное распя́тие. / Отону́дуже бе́сове отго́нятся стра́хом, / и злосла́внии в посупле́нии рыда́ют, / я́ко сих соприча́стницы.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Любо́вию, Чи́стая, Твою́ святу́ю ико́ну почита́ющим, / и Бо́жию Тя и́стинную Ма́терь согла́сно возвеща́ющим, / и ве́рно покланя́ющимся Ти, / храни́тельница яви́лася еси́, и держа́вное предста́тельство, / отвраща́ющи вся́кое лю́тое дале́че сих, / я́ко вся могу́щая.
Песнь 4
Наи́тием Боже́ственным Уте́шителя, Твой храм освяти́, / и прише́ствием Сего́ ерети́ческую пре́лесть отжени́, / Сло́ве Бо́жий многоми́лостиве.
Припев: Сла́ва Тебе́, Бо́же на́ш, сла́ва Тебе́.
Ну́жднейшаго изба́вивый злоче́стия Твоя́ лю́ди, / покажи́ благоче́стия ре́вностию разжже́ны, / и ве́рою взыва́ющия: / сла́ва си́ле Твое́й, Го́споди.
Припев: Сла́ва Тебе́, Бо́же на́ш, сла́ва Тебе́.
Священнообра́зными изображе́ньми, / образо́в Христо́вых зря́ще и Богоро́дицы, / сия́ющая Боже́ственная селе́ния, / священноле́пно ра́дуемся.
Сла́ва Отцу́ и Сы́ну и Свято́му Ду́ху.
Цари́ца по обоему́ укра́шена, / и́стиннаго возжеле́вши Христо́ва Ца́рства, / Сего́ написа́ о́браз пречи́стый, / и святы́х изображе́ния.
И ны́не и при́сно и во ве́ки веко́в. Ами́нь.
Богородичен: Воплоще́нна роди́вши Боже́ственнаго Сло́ва, / Боголе́пное освяще́ние Благода́тная, Сего́ показа́ла еси́, / те́мже Твой храм светови́дный обновля́ем.
Песнь 5
Положи́, Го́споди, Твое́й Це́ркви утвержде́ние, / непрекло́нней пребы́ти в век ве́ка / от смяте́ний ересе́й.
Припев: Сла́ва Тебе́, Бо́же на́ш, сла́ва Тебе́.
Во всю зе́млю све́тлость возсия́ свы́ше, / да́ннаго ве́рным весе́лия, / и Боже́ственнаго заступле́ния.
Припев: Сла́ва Тебе́, Бо́же на́ш, сла́ва Тебе́.
Еди́не Благи́й, и исто́чниче бла́гости, / Ты возвы́си правосла́вных рог, / чту́щих о́браз Твой.
Сла́ва Отцу́ и Сы́ну и Свято́му Ду́ху.
Свет незаходи́мый нам благоче́стия возсия́, / веле́нием Богодухнове́нным ве́рных па́стырей, / и ма́нием Богому́дрым.
И ны́не и при́сно и во ве́ки веко́в. Ами́нь.
Богородичен: Обнови́ нам дре́внее благоле́пие, / Пречи́стая Богома́ти, / и дом Твой сей освяти́ / Твое́ю благода́тию.
Песнь 6
Пи́шется и почита́ется ве́рно / покланя́емый о́браз Влады́ки, / и прие́млет па́ки Це́рковь дерзнове́ние, / благоче́стно Спа́са прославля́ющи.
Припев: Сла́ва Тебе́, Бо́же на́ш, сла́ва Тебе́.
Обнажа́ется се́тования, и тьмы ересе́й Христо́ва Це́рковь, / и но́сит ри́зу весе́лия, / и Боже́ственною и светоно́сною покрыва́ется благода́тию.
Сла́ва Отцу́ и Сы́ну и Свято́му Ду́ху.
Благосла́вия дре́вняго осия́ния получи́ правосла́вных собо́р, / Феодо́ры манове́нием цари́цы, / и ея́ сы́на благочести́ваго Михаи́ла самоде́ржца.
И ны́не и при́сно и во ве́ки веко́в. Ами́нь.
Богородичен: Дре́вле свиде́ния повеле́вый бы́ти ски́нии, / я́ко в ски́нии слове́сней, в Тебе́ живе́т Еди́н Препросла́вленный, / прославля́яй храм Твой, Де́во, чудесы́.
Кондак, глас 2
Неописанное Слово Отчее, / из Тебе, Богородице, описася воплоща́емь: / и оскве́рншийся о́браз в дре́внее вообрази́в, / Божественною добротою смеси. / Но исповедающе спасение, // де́лом и сло́вом, сие вообража́ем.
Икос
Сие́ смотре́ния та́инство, / дре́вле проро́цы Богови́дно вдохнове́ни бы́вше, / нас ра́ди в концы́ веко́в дости́гших предвозвести́ша, / получи́вше сего́ сия́ния. / Ра́зум у́бо Боже́ственный от него́ взе́мше, / Еди́наго Го́спода Бо́га зна́ем, / в трие́х Ипоста́сех покланя́емаго, / и Тому́ еди́ному служа́ще, / еди́ну ве́ру, и еди́но креще́ние иму́ще, / во Христа́ облеко́хомся, / но испове́дающе спасе́ние, де́лом и сло́вом, / сие́ вообража́ем.
Песнь 7
Да сликовству́ет церко́вней све́тлости / любо́вию Боже́ственною а́нгельское во́инство, / Богому́дренно воспева́ющее: / благослове́н еси́ в хра́ме сла́вы Твоея́, Го́споди.
Припев: Сла́ва Тебе́, Бо́же на́ш, сла́ва Тебе́.
Це́рковь перворожде́нных, и торжество́ ра́дуется, / зря́ще ны́не боже́ственныя лю́ди, единому́дренно воспева́ющия: / благослове́н еси́ в хра́ме сла́вы Твоея́, Го́споди.
Сла́ва Отцу́ и Сы́ну и Свято́му Ду́ху.
Изба́влени пре́жде мра́чныя е́реси, / ма́нием Феодо́ры достоле́пныя цари́цы, воспева́ем: / благослове́н еси́ в хра́ме сла́вы Твоея́, Го́споди.
И ны́не и при́сно и во ве́ки веко́в. Ами́нь.
Богородичен: Па́че вы́шних ликостоя́ний, вознесла́ся еси́ Всечи́стая, / еди́на бы́вши Ма́ти Вседе́теля. / Ра́дующеся у́бо взыва́ем: / благослове́нна Ты еси́ в жена́х, всенепоро́чная Влады́чице.
Песнь 8
Зако́ны Це́ркве оте́ческия сохраня́юще, о́бразы пи́шем, / и лобза́им усты́, и се́рдцем, и хоте́нием / Христо́вы, и Его́ святы́х, зову́ще: / благослови́те вся дела́ Госпо́дня Го́спода.
Припев: Сла́ва Тебе́, Бо́же на́ш, сла́ва Тебе́.
На первообра́зное я́ве о́браза, / по́честь и поклоне́ние вознося́ще, / чтим, Богоглаго́ливых уче́нием после́дующе, / и Христу́ ве́рою зове́м: / благослови́те вся дела́ Госпо́дня Го́спода.
Благослови́м Отца́ и Сы́на и Свята́го Ду́ха, Го́спода.
Ум озари́вши просвеще́нием Боже́ственнаго Ду́ха, / честна́я цари́ца, плоды́ Богому́дренныя иму́щи, / благоле́пие возлюби́ Це́ркве Христо́вы, и красоту́, / благословя́щи ку́пно с ве́рными Иису́са Богочелове́ка.
И ны́не и при́сно и во ве́ки веко́в. Ами́нь.
Богородичен: Луча́ми све́та у́мнаго, освеща́емый Боже́ственный дом Твой, / осеня́ет ны́не всех о́блаком Ду́ха, / и освяща́ет ве́рныя согла́сно пою́щия: / благослови́те вся дела́ Госпо́дня Го́спода.
Песнь 9
Священнописа́ньми образо́в укра́шеную, / зря́ще па́ки честну́ю Це́рковь, / со благогове́нием вси притеце́м и Бо́гу возопии́м: / Тебе́ велича́ем, Трисвяты́й.
Припев: Сла́ва Тебе́, Бо́же на́ш, сла́ва Тебе́.
Честь и сла́ву стяжа́вши Це́рковь, / Крест Твой и честны́я ико́ны, и святы́х изображе́ния, / с весе́лием, Влады́ко, и ра́достию велича́ет Тя.
Сла́ва Отцу́ и Сы́ну и Свято́му Ду́ху.
Освети́ Боже́ственною Твое́ю сла́вою лю́ди на́ши Ще́дрый, / и ополче́ньми а́нгельскими, и всеору́жествы сия́ огради́, / язы́ков свире́пство покаря́я им, Влады́ко.
И ны́не и при́сно и во ве́ки веко́в. Ами́нь.
Богородичен: Взя́тся прама́тере Е́вы осужде́ние, Богоро́дице, / я́ко Ты всех Влады́ку несказа́нно, Чи́стая, родила́ еси́. / Его́же и ны́не подо́бие на ико́нах целу́ем.
Светилен
Взыгра́йте, восплещи́те, с весе́лием воспо́йте: / коль чу́дная и стра́нная Твоя́, Христе́, вопию́ще, дела́! / И кто возмо́жет изрещи́, Спа́се, могу́тства Тебе́, / на́ше единомы́слие и согла́сие / во еди́ну соедини́вшаго це́рковь?
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Ору́жия ны́не оскуде́ша вражде́бныя е́реси, / и па́мять ея́ исчезе́ с шу́мом: / храм бо Твой, Всечи́стая, всеблаголе́пно зря́ще, / укра́шенный благода́тьми честны́х ико́н, / ра́дости исполня́емся вси.
Комментировать