Святого отца нашего Димитрия Ростовского святителя и чудотворца догматическое учение, выбранное из его сочинений

Несть иного благовещения, ни иные веры, кроме Апостолами проповеданныя, и Богоносными Отцы на различных Соборах извещенныя, и соборней Церкви преданныя. Не преложну сию, и непримесну всякия ереси храни даже до последнего издыхания. Вся же учения непорочней сей противляющаяся вере возненавиди, и чуждая вменяй быти от Бога, рече бо Апостол: яко аще и мы, или Ангел с небесе благовестит вам паче, еже баговестихом вам, анафема да будет (Гал.1:8)¹.

1) Их число. Из начала не точию Писании Евангельскими, Апостольскими, учительства великих Учителей, догматами Вселенских Соборов вера святая бе утверждаема: но и преданиями их законно полагаема. Еже видети есть от словес св. Апостола Павла, к Коринфянам глаголюща: хвалю вы, братие, яко вся моя помните, и якоже предах вам, предания держите (1Кор. 1:2), и к Фессалоникам глаголет: темже убо братие, стоите, и держите предания, имже научистеся или словом, или посланием нашим (2Сол.2:15). На кое место св. Златоуст пишет сице: отсюду явлено, яко не вся посланием предаша (Апостоли), но многая и без писания (Беседа 4), равне же оная, и сия достоверна суть. Тем же и предание церковное достоверно быти вменяем, то рек Златоуст святый возгласи: предание есть, ничтоже вящие ищи².

2) Разделение и важность преданий. Предания суть сугуба, ова к догматам веры надлежащая, якоже о семи таинствах, и о благочестном святынь Божиих почитании: ова же, к чину и обрядам (церемониям) церковным, якоже о праздновании праздников, о хранении постов, о памяти усопших, и о прочих чинах и уставах церковных, еже аще и не суть писана во Святом Евангелии и во Апостольской книге, ниже суть сама собою вера якоже вера во единого невидимого Бога: обаче, понеже суть церковная предания, и известное знамение правыя веры правоверного человека, того ради хранити я должни есмы, по Златоустову увещанию: предание есть, ничтоже вящше ищи³.

3) Важность вселенских Соборов. Все семь вселенских Соборов тверды были и суть, яко на них крайняя главизна нашей веры зависть⁴.

Не токмо до сложения Символов, но и от начала мира бе вера наченшаяся от Адама и семени его, в Бога всех Создателя, и в имущего прийти и воплотитися Сына Божия, Мессию именуемого. Таже вера бе во всех праотцах, патриархах и пророках даже до воплощения Сына Божия. По воплощении же Сына Божия, сам Христос веру проповедал, Апостолы научиша, после же святии Отцы на вселенских Соборах оную распространиша, и истолковаша и утвердиша Духом Святым⁵.

Верую, что токмо едина есть святая Соборная и Апостольская Церковь, которая кровию и учением Христовым, Апостольским и святых Отец, и мученик утверждена: ее же и врата адова не преодолеют, которой православное восточное исповедание держится во известное спасение, последуя узаконениям ее невозмущенным⁶.

Когда веруем в Церковь, веруем во Христа, главу Церкви, во учение Христово Евангельское и Апостольское, в тайны святые, Христом Церкви преданные⁷.

1) Церковь глаголется быть собрание верных, не на едином токмо месте, но и по вселенной сущих, и потому-то глаголется, и есть святая соборная Апостольская Церковь, еже от конца до конца вселенной, в коем либо роде и языке правоверно Христа Бога славить. Тоя Церкве основание сам Христос, стены закон Божий, столы Апостолы, Евангелисты, Учители, покров Дух Святой⁸.

2) Матерь наша истинная, не та есть, еже в мире сей плотски родит, но еже в вечную жизнь рождает духовно, еже Спасителю нашему есть обручена, Ангелами почтена, Пророками украшена, Апостолами прославлена, мучениками и исповедниками вознесена, ей же Христос Господь небесный чертог уготовал, еже от человек та святая матерь Церковь нарицается, ее же глас есть, яко глас горлицы, пекущейся о чадах, ее же устне извивают миро Апостольских учений, ее же очеса суть вера истинная и надежда несомненная в Боге, ее же руце искапают смирну благодеяний, от милости и любления творимых, ее же два сосца суть два Завета: Ветхий, Пророками учимый, и Новый, Апостолами проповедуемый: крещением же святым родит в бессмертие своя чада. Приступив убо, о сладчайшее чадо! еси сосцы тоя истинной матери⁹.

Господь даде Церкви своей твердую не погрешность, якоже глаголет Апостол: церкви Бога жива, столп и утверждение истины (1Тим. 3:15)¹⁰ О несмысленные Галаты! (св. отец разумеет здесь раскольников) Кто вы прельстил есть противитися истине? еда ли изменися Церковь? еда ли преста священство? не пребудет ли Церковь до дне судного, и врата адова (по глаголу Господню) не одолеют ей? еда ли Христос Господь уже оставил есть Церковь свою, юже искупил есть честною своею кровию? еда ли солга, рекий: аз есмь с вами во вся дни до скончания века. Небо и земля мимоидет, словеса же Господня не мимоидут¹¹.

Кроме Церкве святыни негде взять¹². Та, еже вне православной Церкве, делаются добрые дела, аще и зело будут добрая, обаче суть бесплодна, не заслугующая себе спасения, понеже вне Церкви, ей же глава Христос, глаголяй: иже несть со Мною, на Мя есть, и иже не собирает со мною, расточает (Лук. 11:23). Иже бо придержется Христовы Церкве, придержется самого Христа, припрягшагося Церкви своей, яко глава телу, и выну присутствующего оней. Чуждаяйся же Христовы Церкве, чуждается самого Христа, главы церковныя, без Христа же вся, еже мнится собирать добрая дела во спасение: не собирает, но расточает, ни заслуживает себе спасения. Член, от тела главою оживляемого и управляемого отсеченный, может ли жив и действен быти? Розга, от лозы виноградной отрезанная, и ветвь от яблони отломившаяся, могут ли плодотворити? никакоже. Сице и человек Христианский, аще бы и добродетельное житие проходил, егда отлучится от соединения православные Христовы Церкве, не может спасения получити. Внемлите, еже святейший Афанасий, Патриарх Александрийский, в своем Символе в начале глаголет: иже хощет спастися, прежде всех подобает ему держати Кафолическую веру, еяже аще кто целы и непорочны не соблюдет, кроме всякого недоумения, во веки погибнет. Такожде и на конце галголет: сия есть Кафолическая вера, еяже аще кто верно и известно верити не будет, спастися не возможет. До зде Афанасий. От коих его словес яве видети есть, яко никтоже может спасен быти вне православныя Кафолическия Церкве, якоже во дни Ноевы киктоже спасеся от потопа, иже вне корабля Ноева обретеся, но токмо тии спасошася, иже в корабль внидоша, не вшедшии же вси погибоша: сице разумети есть, и о святей Христовой Церкви (тоя бо корабль Ноев бе прообразованием), яко ни един от тех получит спасение, иже не обретается внутрь ея: не достоин бо той имети Бога во отца себе, (глаголет Киприан святый)¹³, иже Церкве не имеет в матерь, и Евангелие глаголет: аще кто не слушает Церкве, буди тебе яко язычник и мытарь (Мф.18:17). Не смотри на добрая дела его, егда несть Церкви послушен. Многие и во Агарянех обретаются добродетельные человецы, правду хранящие, милосердие показующии, никого же обидящии, любовь же и благодеяние, не токмо своим, но и Христианом творящии, обаче та их добрая дела спасения им не соделовают, понеже чужды суть Христа и Христовы Церкве. Подобне и тии, иже имя Христово на себе носят, Христиане нарицающеся, Церкве же Христовы чуждаются, погибнут со своими (аще я имеют) добрыми делы. Яве то извествует Златоуст святый в толковании на Павлово к Филипписием послание, на главу 1, в беседе 2, глаголя: ничтоже диавола сквернейшее, сице везде труды неполезными своих си облагает и растерзает. И не токмо патрижнений (мзды) небесные не оставляет получити, по и муце повинных творити весть. Не точию бо проповедь, но и пост сицевый, и девство им законополагает, еже не точию мзды лишит, но и велие зло наведет то проходящим, о нихже глаголет инде: сожжени своею совестию (1Тим.4:2). До зде Златоуст. Мы же внемлем, яко и пост, и чистота, аще и девственная, и проповедь еретичествующих, и прочие их подвиги и труды, не точию им спасения не приносят, но и муку вечную ходатайствуют. Неложная уста Златоустовы то известиша¹⁴.

Бог Святая Троица, Отец и Сын и Святый Дух. Веруй убо во Отца и Сына и Святаго Духа, во Святую и Живоначальную Троицу, в триех ипостасех, и во едином Божестве славимую, раздельну убо ипостасьми, и ипостасными свойствы, соединенну же существом. Тако убо покланяйся Отцу и Сыну и Святому Духу, в триех ипостасех с свойствы их, и в Божестве едином¹⁵.

1) Не три Бога, но един Бог, в трех ипостасех поклоняемый¹⁶. Един имать быти таковый Бог, его же не зиждет рука человеческая, но Он сам имать бытие свое, и вся рукою своею созидает: един имать быти, иже простре широту небесную, основа тяготу земную, и просвещает свыше всю вселенную лучами солнечными, сиянием лунным и звездным блистанием, доле же украшает землю древесы и цветы различными, и напаяет ю реками и источники водными, един имать быти таковый Бог, иже вся содержит, вся устрояет, вся оживляет, и о всех промышляет¹⁷.

2) Едино в Нем естество, которое есть Божество, едино существо, которое есть вещь самобытная, не требующая иного к своему составлению, един образ: яков бо Отец, таков и Сын, таков и Дух Св., то есть Отец света или сияние и Дух Святый таковой же свет или сияние, едина воля¹⁸, едина слава, едино царство, едина сила, едина власть, общее же есть Сыну, и Святому Духу, яко от Отца суть¹⁹. Но будучи единствен по Божеству, Он.

1) Три ипостаси, или три лица: Отец, Сын и Святый Дух. Отец не рожден. Сын от Отца прежде век рожден, Дух Святый от Отца прежде век исходящь: святая, единосущная и нераздельная Троица. Сын рожден по Божеству от Отца прежде всех век так, как свет от света, образом духовным, а не плотским, или паче неизглаголанным. Дух Святый исходящь от того же Отца, как учит Евангелие и Символ св. Веры²⁰. Итак.

2) Свойство Отцу есть, еже родити Сына, и испускати Духа. Свойство Сыновне есть, еже родитися от Отца, не родити же иного от себе Сына. Свойство Духа Святаго есть, еже исходити от единого Отца²¹. Особо есть отцу не рождение, Сыну же рождение, а Духу Святому исхождение, общее же им Божество и царство²². Единого убо вемы Бога, не рождена Отца, и единого рожденного Господа нашего Иисуса Христа: света от света, Бога истина, от Бога истинна, рождена прежде всех век: от благого бо Отца благ родися Сын. От света же не рождена, свет возсия присносущен, и от истинного живота, животворящий произыде источник, и от самыя Отчия силы Сыновия сила явися, иже есть сияние славы и Слово ипостасно, искони сый у Бога, и Бог сый, безначален же сый и присносущен, Имже вся Быша видимая же и невидимая. И единого вемы Духа Святаго, от Отца исходящего, Бога совершенна, и животворяща, освящающа, тояжде воли суща, всемогуща, соприсносущна, в своем лице пребывающа²³.

3) Един Отец всех нас общий на небеси есть живый и везде сый Бог, и един Архипастырь великий, небеса прошедый Христос, и един всех Утешитель Дух Святый²⁴.

Мы ничтоже ново вводим, егда (кроме Отца) Сына Божия и Святаго Духа исповедуем, та бо нам не от нас самих речена суть, но от Божественных Пророков изобретена. Прежде всех Давид Пророк и Царь, предвозвещая отец ваших (Иудеи) на Спасителя нашего шатание, рече: вскую шаташася язы́цы, и людие поучишася тщетным, на Господа и на Христа Его (Пс.1:2), се убо Господа и Христа Его глаголя, не едино лице вводить, но два. А яко Христос есть Сын Божий, возвещает тойже Пророк, глаголя: Господь рече ко Мне, Сын Мой еси Ты, Аз днесь родих Тя. Ин бо убо есть родивый, ин же рожденный. О Дусе же Святом тойже Давид свидетельствует, глаголя: словом Господним небеса утвердишася, и духом уст его вся сила их (Пс.32:6). Зде убо триех воспоминает, Отца Господа, и Сына. Его же нарицает, Словом, горнего ради и бесстрастного рождения, и Духа Святаго. И на ином месте глаголет: Духа твоего Святаго не отъими от Мене (Ис.8:13). И паки: камо пойду от Духа твоего (Пс.138:7), теми словесы Пророк яве показует, яко есть Дух Святый, и исполняет всяческая. И паки глаголет: послеши духа Твоего, и созиждутся (Пс.103:30): сия вся не от Давида ли суть речена, но и Моисей Боговидец в книзе Бытия Бога вводит глаголюща: сотворим человека по образу нашему и по подобию: с кем убо тогда глаголаше Бог, аще не речем, яко ино лице с Ним бе, не может же рещи никтоже, дабы то глаголал Бог к небесным силам. Та бо самая словеса: по образу нашему, ниже помыслити от том попущают: несть бо тойже образ и подобие Богу и Ангелом, яко ниже естество и сила едина есть, но ино есть естество Божие, ино же Ангельское: подобаше убо иному быти тому, с нимже Бог глагола та словеса, по образу нашему: и таковому быти подобаше, иже бы был единого с глаголющим Богом естества, образа же и подобия и тождества: кто же таков быти можаше, аще не Сын, иже есть единосущен Отцу, единославен, и единосущен Отцу, единославен, и единомощен, образ Отчий неизменный²⁵?

1) Отец, Сын, и Дух, три суть ипостаси, существо же едино: якоже и зримое на небеси солнце, от Бога во образ Святыя Троицы созданное, три бо в нем суть вещи: круг, луча светлая, и теплота, якоже и в Святой Троице, Отец, и Сын и Дух Святый, и есть солнечный круг подобием Бога Отца: якоже бо круг не имать конца, ни начала, сице и Бог есть безначальный и безконечный: и якоже от круга солнечного происходит луча светлая, и теплота солнечная: сице от Бога Отца родится Сын, и происходит Дух Святый. Луча же, от солнца производимая и всю поднебесную просвещающая, есть подобием Бога Сына, от Отца рожденного, и в поднебесный миру явленного. Теплота же солнечная, от тогожде круга вкупе с лучею происходящая, есть подобием Бога Духа Святаго, иже от тогожде Отца купно с Сыном производится предвечне, аще временне посылается на человека и от Сына, якоже на Апостолы в видении огненных языков послан бысть, и якоже солце, треми вещми: кругом, лучею и теплотою, состоящееся, не разделяется на три солнца, аще и каяждо вещь свою особность иметь: ино бо есть круг солнечный, ино луча его, а ино теплота, обаче не три глаголются солнца, но едино солнце: сице и Пресвятая Троица, аще и три имать лица: Отца, и Сына и Святаго Духа, обаче Божеством не разделяется в три Бога, но един есть Бог²⁶.

2) Как человек имеет слово и дыхание, так и Бог Отец всесильный имеет Слово тогоже естества и Всесвятаго Духа своего²⁷.

3) Крест глаголется трисоставный, трелюбезный, треблаженный, триипостасныя Троицы образ: высотою бо знаменует Отца, в вышних живущего, глубиною Сына, сошедшего даже до ада, широтою же купно и долготою знаменует Духа Святаго, везде сущего, и вся исполняющего: того ради и знаменующеся крестным знамением глаголем: во имя Отца, и Сына, и Святаго Духа²⁸.

Тако убо сия веруй, постигнути же образ рождества или исхождения не тщися: нопостежим бо есть, но в правости сердца без всякого испытания приемли, яко Отец и Сын и Св. Дух, по всему едино суть, кроме нерождения, и рождения, и исхождения²⁹. Бог наш есть яко пучина морская, широты и глубины безмерныя: непостижимый бо умом человеческим и неизреченный глаголы человеческими³⁰. Бог есть неизреченный, непостижимый, невидимый и недоведомый³¹. Естества Божия, аще и много потрудишися, постигнути не позможеши: Бог бо есть неизреченный, непостижимый, и помыслы человеческими неиспытанный³².

Мы знаем един истинный нелестный быти к истинному свету путь, веру, глаголю, правую по Отца, и Сына, и Святаго Духа, единого в триех лицех Бога³³.

1) Бог есть Дух безпрлотен³⁴. Глава же Божия, и руце, и нозе не суть вещественны, плотяны, но невещественны, духовны, яже суть всемогущество его Божественное, и власть, и сила, и начало всем, и вседержительство, и вездесущество. Бог весь есть глава, понеже всем управитель, весь око, понеже вся видит, весь ухо, понеже вся слышит, весь рука, понеже вся содержит, весь нога, понеже везде есть, и вся присутствием своим исполняет³⁵.

2) Бог дух есть, а не тело³⁶. Обыкло Священное Писание, и учители Творца часто сотворенным вещам уподобляти, и имена сотворенных вещей Богови приписовати, называющи Его ово огнем, ово солнцем, ово морем, ово златом, и далее: не яко Бог тем подлинно был, но чтобы человек разумный разсмотрением вещей сотворенных, как по степеням ступая, приходил к познанию самого Творца, и чрез многия многих сотворенных вещей совершенства домышлялся, какое есть в Боге Создателе безконечное совершенство. Для чего и Давид глаголет: поучихся во всех делех твоих, в творениих руку твоею поучахся (Пс.142:5). Из творения твоего, глаголет, Боже, научихся знати тебе Бога. Если есть небо прекрасно, и на небе видимое солнце, месяц и звезды, о! как прекраснейший есть той, который прекрасный сии сотворил вещи! Если хороша земля, и на ней веселые проспекты, горы, холмы, леса, дубравы, сады, винограды, нивы, цветы, к томуж дорогие вещи: сребро, злато, камение неоцененное, а притом люди прекрасные, подобные лицами Ангелом: как же есть лучший, дражайший и нужнейший той, который все оное создал своею силою и премудростию! Так чрез подобие творения Творца познвати научаемся³⁷.

Якоже не возможно адаманту, магниту, отъяти силу, влекущую к себе железо: сице не возможно отъяти от всевидящего ока Божия то, еже бы Ему не видети дел человеческих, глаголющу Сираху: очи Господни тьмами светлейшии солнца суть, прозирающии вся пути человеческие, и разсмотряющие в тайных местех: и на земли от конец до конец вселенныя, аще и в глубочайших земных разселинах деемая, толь Ему суть явна, аки на небе пред лицем Его творимая³⁸. Бог испытует сердца и утробы, весть помышления человеческая издалеча, и не соделанное видеть око Его: и никакая же нощь и ни едино сокровенное и темное место укрыти грешника может пред всевидящим оком Его³⁹.

1) Несть грех, побеждающий человеколюбие Божие⁴⁰. Не весть Дух Господень не благодетельствовати, яко сый сокровище благих, не точию достойным, но и недостойным. Солнце свое сияет на благия и злыя, и дождит на праведныя и не неправедныя⁴¹ (Мф.5:45).

2) Бог благ сый и милостив, спасения ради человека на землю сошедый, ни единому же хощет погибнути и вечных благ отпасти, но якоже матерь печется о чаде своем, претерпевая аще что и безчинует, или досаждает ей, естественною к нему побеждаема любовию: ниже гневается на не, аще что-либо неподобно творить: ибо в неведении творит, ничтоже смысля, терпеливне же ожидает его возраста и ума, хотя видети е мужа совершенна и в людех честна и славна: сице и Бог наш, создавый нас, печется о нас, и яко отец нами в неведении соделоваемая злая претерпевает, своим побеждаемый благоутробием, ничтоже более хотя, точию да мы славу Его наследствуем, возрастше в совершенного мужа, в меру возраста духовного⁴².

1) Бог неописанный есть, везде сый, и вся исполняяй⁴³. Всюду есть Христос, яко Бог везде сый, и вся исполняяй. Не вмещают Христа Бога нашего небеса, не объемлет Его поднебесная, вси концы земнии не определяют Его. Везде Христос Бог есть, всемогущею силою своею, на небеси Отцу соцарствуяй, во аде бесы мучай, в поднебесней жизнь человеческую соблюдаяй и строяй. О нем бо живем, и двжемся, и есмы; и во всей вселенней есть содержай всяческая, и всю тварь свою видимую и невидимую управляяй. Аще же и везде есть Христос Бог наш, всемогущею и вся содержащею силою своею, обаче благоволением и благодатию своею не везде обитает, инде есть, а инде не бывал, а инде быв отъиде⁴⁴.

2) Бог Божеством своим пребывает везде, а благодатию наместех избранных, как-то: в храмах Божиих, где пребывают святые мощи, и святые тайны совершаются, а наипаче место, избранное престол Божий на небеси. Хотя Бог везде есть, и вся исполняет, но свет Божества своего изящнее на небесах являет, и имеет престол неосязанный⁴⁵.

Не солгал Бог никому: верен Господь во всех словах своих, и преподобен во всех делех своих, не обманул никого: праведен и преподобен Господь, не обольстит Господь никого: и лесть не обретеся во устех его (Пс.144:13, 17., Ис. 53:9). Что рекл кому словом, то конечно исполнил делом. Обещал Аврааму умножити племя его яко звезды небесные, и яко песок морской, справдил то делом. Обещал усты Пророков своих приити с неба на землю, воплотитися от Пречистыя Девы, и пострадати спасения ради человеческого, справдил то делом. Обещал воскреснути в третий день по вольном страдании и смерти, справдил слово свое делом. Обещал Духа Святаго ниспослати от Отца учеником своим, справдил то делом. Обещал с людьми своими вечно жити, и додерживает слова, глаголя: аз есмь с вами во вся дни до скончании века. Обещал верным рабом своим живот вечный, и чаем Его несумненно: чаю воскресения мертвых, и жизни будущего века⁴⁶.

1) Вся, яже в мире зарятся, суть мимоходящая и скоро погибающая: а яже уготова Бог любящим Его, и работающим Ему, та пребывают во веки, якоже и сам Бог вечен есть⁴⁷.

2) Бог мой есть невидимый, всемогущи же и ничто же есть таково, еже бы не было возможно Богу моему⁴⁸. Бог требует жертвы правды и святыни, яко Бог праведен и свят есть⁴⁹.

3) Всяк человек здравого ума сий имать разумети Бога праведна, непостижима, неописанна, и неисповедима, неизменна же, и Божественными своими свойствы всякия силы превысима⁵⁰. Несть в Нем никоего же недостаточества или несовершенства, но во всем совершен есть⁵¹.

4) Свойств Божиих общих существенных невозможно изчислити. В Символе Афанасия, Патриарха Александрийского, общия свойства показаны сии: несоздан, непостижим, вечен, Вседержитель, Бог Господь, и о таковых же свойствах пространно сказует книга правосл. исповед. в первой части, в ответе на вопрос третийнадесять⁵².

Верую, что един Бог Вседержитель есть Творец всея видимыя и невидимыя твари, Отец и соблюдатель, и что Он небо со всею лепотою и Ангелами, землю с человеки и скоты, и вся прочая во время свое из ничего сотворил всесильным повелением, и хотением, и содержит оныя⁵³.

1) Начало бытия мира Божиим изволением бысть, Словом же Его совершися, и силою Духа Святаго утвердися. Изволивый убо, Отец есть, совершившее же всю тварь Слово, Сын есть: а утвердивый, Дух Святый⁵⁴.

2) Бог есть Творец неба и земли, видимых всех и невидимых⁵⁵. Творец и Сын, Творец и Дух Святый. Обаче не три Творца, но един: понеже един Бог в Троице покланяемый и исповедуемый⁵⁶.

3) Бог безначальный и невидимый, и Его единородный Сын, Господь наш Иисус Христос, и той такожде не создан, на начала, ни конца имый: равно же и Дух Святый, трисоставное Божество, един же Бог, той сотвори небо, и землю, и солнце, и луну, и звезды, такожде и моря, и сушу, и первейшего человека Адама⁵⁷.

1) Боже вышний, Емуже вся небесные силы со страхом предстоят, и вси начала и власти трепещут пред лицем твоим, всяко создание твоею всемощною силою содержится, и изменяется и обновляется! Ты Владыко, призри с высоты небесныя от престола славы Твоея на мя!⁵⁸

2) Мне сан и достоинство, и отечество, и слава, и богатство, Христос есть Сын Божий всегда живый, Его же промышлением вселенная стоит и управляется⁵⁹.

3) Дух Господень есть благодетельствуяй всем, чесо ради и разделяется на седмь дарований в Исаиином пророчестве (Ис.11:2). Изъяснися благодеяние Духа Святаго и в песнех церковных в неделю Пятдесятницы: Дух премудрости, Дух разума: благий, правый, умный: обладаяй, очищаяй прегрешения: Бог и боготворяй, огнь от огня исходяй: глаголяй, деяй, разделяяй дарования⁶⁰.

1) Богу безначальному и безконечному, Царю всех веков, безсмертному, крепкому, премудрому, в Божественной своей силе и Господстве совершенному, ниже коего недостаточества имущему, ни к совершенству своему чесо требующему, но всему в себе довольну, полну, изобилующу, велику, прехвальну и преславну, не надлежаше нужда, ниже кая потреба, еже создати видимый сей мири невидимый, горняя и дольняя, и небесная и земная, Ангелов и человеков, и всякую тварь: но вся та от преизобилующия в Нем благости, и премудрости, и силы создати изволил есть, являя всемонущую свою силу, непостижимую премудрость, и неизчерпаемую благость, сущи преисполнен тоя, аки чаша преизливающаяся, аки река наводненная, бреги своя преходящая, и удолия земли напаяющая: сице Он преблагий Бог от исполнения своего преизобильного на создание излияся, сам же ничимже умалися⁶¹.

2) Созда же та не иныя коея ради вины, токмо да имать кому непрестанно благодетельствовати, уделяя инем добра своего, подая от неистощаемых и неисчерпаемых Божественного благоутробия сокровищ, пребогатая созданию своему дарования. Добро бо не познавается быти добро, аще не будет инем уделяемо: елико же то уделяется инем, толико лучше добро быти познавается, Знаему убо творя Господь некончаемую свою добрость, милость, благостыню, содела разумную тварь, да оней уделяется благодеяний⁶².

3) Создание же Его разумное, Ангельское, глаголю, естество и человеческое, неизреченных того благодеяний выну наслаждающееся, да знает Его Творца и Благодетеля своего, и да любит Его, и славит, и благодарит, и поклоняется ему и верне тому да служит⁶³.

Нецыи мнят, яко со светом и Ангелов созда Бог: но святый Василий Великий, Григорий Богослов, и Амвросий, такожде и святый Иоанн Дамаскин мнят тех в начале прежде всего создания созданным быти: подобаше бо (глаголет Дамаскин) первее умному существу создатися, таже чувственному, и тогда из обоих человеку⁶⁴.

Ангели суть дуси безплотнии, невидимии, безгрешнии, не от себе, но от Божией благодати прежде всея твари созданныи, преходящии от места на место во мгновении ока⁶⁵.

1) Создав я Господь по образу своему (якоже послежде и душу человеческую) и по подобию разумны, самовластны, безсмертны: в начале остави их несовершенных в блаженстве, ни утвержденных в таковой благодати, еже бы им не возмощи согрешати, но даде им некое время, в неже, яко самовластныя, полную волю имущии, можаху у Господа или заслужитися и преуспети получивше совершенную благодать, или прослужитися и пасти в гнев Божий⁶⁶.

2) Разсмотрим невидимое создание, глаголю Ангелов, ихже умное токмо наше зрит око, тех красота неизреченная, звезд, луну, и солнце превосходящая различнообразная: ибо елико есть на небесех чинов Ангельских, кождо якоже местом, сице и красотою друг друга превосходят. Красен есть Ангел, краснейший Архангел, над Архангелов краснейшии высшии чины, над тех Херувимы, над Херувимы краснейшии Серафимы, ихже красоту кий язык земный исповести может. О коль несравненно паче всех чинов Ангельских краснейший Создатель! О красота, неизреченная умом человеческим непостижимая!⁶⁷

Ангелы суть созданы, яко да поют Богу, и тому служат, потом же да служат в мире сем человеком, и да будут хранителие царств, градов, мест, человеков, и все создания⁶⁸.

Ангелы суть безгрешнии, но не чрез себя, но чрез благодать Божию, яко не согласишася с светоносцем воспротивитися Богу, и сего ради тую благодать имеют от Бога, а не от естества своего⁶⁹.

Ангельских чинов девять изочте св. Дионисий Ареопагит, ученик св. Апостола Павла, восхищена бывша до третияго небесе, и тамо различие святых Ангельских чинов видевша, и ему яко ученику своему сказавша. Тии же девять чини разделени суть на три Иерархии, по три чины в себе содержащия, на высшую, среднюю и нижайшую. В первой убо высшей, и Пресвятей Троице ближайшей иерархии, суть Серафимы, Херувимы, Престолы. В средней же иерархии такожде три суть святых Ангелов чины: Господствия, Силы, Власти. Такожде и в нижайшей иерархии три суть чины: Начала, Архангелы, Ангелы⁷⁰.

1) Господствия… учат обладати чувствы, смиряти безчинныя в себе вожделения и страсти, плоть порабощати духу, господствовати над волею, и быть всякого искушения высшим⁷¹.

2) Святые Силы помогают человеком труждающимся и обремененным в ношении возложенного на них ига какого-либо послушания, да сильни будут свое звание исполняти, и немощи немощных носити. Укрепляют же всякого человека в терпении, да не изнемогает в скорбях, но да крепким великодушием и сильным мужеством, вся находящая претерпевает⁷².

3) Власти… имут область на диаволы, еже укрощать бесовскую власть и отражать искушения ими человеком наносимая, не попускать же им, да вредят кого толико, елико бы сами хотели. Утверждают же добрых подвижников в духовных подвизех и трудех, брегуще их, дабы не отщетилися духовного царства. Борющимся же со страстьми и похотьми помогают в день брани их, пособствующе им отгонять злые помыслы, и вражия наветы, и побеждати диавола⁷³.

4) Архангелы… святую веру в людех умножают, просвещающе их ум светом разума святого Евангелия, и открывающе им таинства веры благочестивыя⁷⁴.

Вручено есть Ангелам вселенныя управление, и хранение всех царств и княжеств, земель же и всех народов, племен и языков: коеждо бо царство, и племя, и язык, особного имать себе хранителя и управителя всецелой своей стране, единого Ангела, от небесного чина, глаголемого начала⁷⁵.Того чина служение есть поучати человека, да всякому начальнику, по достоинству степене его, должную воздавать честь. И тии Ангелы на высокия честных санов степени достойных возводят, и наставляют их, да не своего ради приобретения, самопитания, любочестия же и тщетныя славы, на начальство кое восходят, но самыя ради Божия чести, разширения же и умножения Его святыя хвалы и пользы ради ближних⁷⁶.

1) Не видим киждо нас святого Ангела-хранителя своего, веруем же, яко при коемждо нас Ангел-хранитель, от крещения данный, обретается⁷⁷. Ангелы… приставлены суть хранити коегождо нас верных: стоящих убо держат нас, да не падемся, падших же подъемлют, да восстанем, и никогда же оставляют нас, аще и согрешающих всегда бо готови суть помогати нам, аще точию сами восхощем⁷⁸.

2) Елика душе, и елика телу нам нужная, они о тех пекутся и промышляют, в путех наших хранят ны, и во всей жизни нашей блюдут ны, руководствуют, наставляют, управляют, добродетельно и целомудренно в чистоте Христианской жити поучают, силу демонскую от нас отгоняют, умнии наши очи просвещают, и молитвы наши к Богу приносят⁷⁹. Добры суть заступники ходатаи, ихже имате к князем: но не суть таковы, якоже суть Ангели, ходатайствующии о нас к Богу⁸⁰.

3) Наставшу дню кончины, Херувим со множеством Ангел, Божественному отцу (препод. Макарию), представ глагола: востани Господень подражателю, и с нами поиди в вечную жизнь, возведи окрест очи твои, и виждь, елико тебе безплотных, и ликов святых от Вседержителя послано есть, еже к Нему провести тя: виждь Апостолов собор, Пророков сонм, мучеников множество, святителей лик, постников полк, преподобных и праведных совокупление. Предаждь ми убо свою душу, юже от Бога хранити повелено ми бысть в телеси живущую: распряженную же от плотских союзов, яко велие богатство восприиму и честно, и приснопротивныя прошедши силы, Божественному владычнему представлю престолу, веселитися со всеми сущими от века святыми⁸¹. Каково бысть скончание (препод. Симеона), никтоже весть, токмо един Бог и Ангелы Его, тии бо присутствовали обыкоша кончине нищих, от человеков весьма оставленных, якоже присутствоваша на гноищи умирающему Лазарю, в Евангелии помянутому: бысть, рече, умрети нищему, и несену быти Ангелы на лоно Авраамле (Лк. 16:52). Несумненно убо есть, яко тииже святии Ангелы Божии и сему нищу бывшу духом и вещию преподобному Симеону в час блаженныя кончины его предсташа, и кротко праведную душу от чистого тела разрешивше, в небесныя обители во главе радования несоша⁸².

1) Светоносный первый Ангел, иже потом сотворися аггел, донележе бе при Бозе, дотоль его естество бяше светоносно, и нарицашеся люцифер, денница: а яко отпаде от Бога, абие сотворися люцифер, светлость погубивый, томноносный, и от Ангела претворися в беса⁸³.

2) Христос с велиаром и на небеси не пожил, сверже гордого, а на земли пришел бы жити к велиару, сиесть к человеку гордостному, кое согласие смиренному Христови с гордым велиаром?⁸⁴ Светоносец бе благороднейший и первейший Ангел, иже неблагодарен Божию благодеянию к себе, предпочте любовь создания, еже есть себе, возлюбив себе паче Творца, еже есть Бога, и хоте подобен быти Ему, и возгордися, за что со своими единомышленники от небесе до ада низвержен, обнажен природныя красоты, оставльшуся естеству Ангельскому при нем, и от светоносца сотворися бес темный и аггел всякия нечистоты, и беззакония изобретатель, враг Богу и человеком⁸⁵.

3) Было некогда, что и небо походило на пещеру, на вертеп, а на вертеп разбойников, когда в нем затаился было один разбойник лукавый, которого Евангелие зовет человекоубийцею искони, затаился: ибо, рече, в уме своем: на небо взыду, в мыслех то прикровенно, потаенно, с бранию, злодейски и разбойнически, да украдет и убиет, а еще с немалою гвардиею: хобот его отторже третию часть звезд, то есть ангелов⁸⁶ (Апок. 12:4).

4) Отпадшии ангелы в толикое ожесточение вложишася, яко никогдаже возможно им приити в покояние. Нам же отсюду ведати буди, яко от негоже отъемлется грехов ради благодать Божия, той приходит во ожесточение, ниже радит о душе своей⁸⁷. Благодать Божия никогда во век не враждует, аще увидит кающегося: но понеже сия благодать покаяния единому человеку токмо дадеся ради Христа воплотившегося, Ангелу же не дадеся: сего ради, не сущей благодати, каятися не может. Благодать покаяния человеку сего ради дадеся, понеже человек согреши не сам собою, но подущением вражиим: аггел же сам собою согреши, никому его подущающу: да и большие даровании и качества имеяше Ангел паче человека⁸⁸.

1) Супостат рода человеческого диавол, во-первых, крепких, зане руками Божиими созданных, и не к тому удобно приклоненных и работающих греху, прародителей наших, Адама и Еву, победивши в раи, прочих удобнее человек, иных убиваше грехами и беззакониями, иных гоняше и преодолеваше, и иных во плен приводяше. Он подъусти и Каина не убийство праведного Авеля: он и весь мир в нечистоту врину прежде всемирного потопа: он и св. Пророк и Патриархов гоняше и преодолеваше: он и мертвых пленяше, и в темницах затворяше адских: кратко рещи: никто же ему от человек мог сопротивитися, Дóндеже Христос Господь на древе крестнем не распятся, и аки кроткий Давид распятием своим не погуби его. Еще толико ослепи диавол род человеческий, яко не токмо идолам и кумирам во образ человеческий сотворенным кланяхуся: не глаголю ж о сем–честных ли человек, или безчестных и скверных, якоже Венеры и Купидона, но уже и скотским образом, якоже гадов и птиц, и иных безсловесных нечистых животных честь Божию воздаяху: таже и тварь бездушную, солнце, луну, огнь, воду, камения, древеса вместо Бога почитали. Тако ослепляше народ человеческий диавол, и воеже бы слепоту его не познали человецы, и во идолы вселяшеся бес, и льстяше народы ответами своими, и глаголаше к ним на прелесть и пагубу их, и по похотем своим ведяше их⁸⁹.

2) Злобы демони… своим высокоумием на землю от небес низвержени, идеже в смрадней тине пребывающе, языков прельстиша мечтанми, и идолопоклонению научиша: нам же Христианом завидяще свирепеют, и вся злая возмущати не престают, да не на древния их, яже не небесех, престолы взыдем. Различна же их и многочастна злоба есть: нецыи на самый вреждения верх взыдоша, нецыи же мнятся быти легчайшие, вси же по возможности сил своих различные противу всякие добродетели устрояют брани: сего ради многих молитв и воздержания потребно есть, да приимем от Бога дар разсуждения, еже разумети нам различия злобных духов, и ведати коварства и прелести их, и притиву всякой брани да поставляем едину хоругвь, крест Господень⁹⁰.

1) Речет кто: рад бы я и сам добре молитися, но не могу: негли диавол мя покушает, во еже бы разглагольствовати. Не извиняйся человече тем, ты виною еси, не может тебе понудити диавол, аще бы ты не хотел: безсилен уже диавол есть. Прежде пришествия Христова крепок бяше, якоже выше рекохом: ибо никтоже ему могл противитися, занеже не имеяху человецы оружия на диавола: ныне же имамы крест Христов, положи токмо на себе крестное знамение, и абие отбегнет от тебе. Слышим, что и святый Иоанн Богослов глаголет: связан сатана на тысящу лет (Апок.20:2). Чим же связан? аще не крестною силою. Како убо может тебе вредити, аще связан есть, аще же вредить, ты свяжи его, то есть, положи на себе знамение креста Господня, и связан будет. Наносит ли диавол мысли, и помышляешь ли что лукавое умом твоим, положи крестное знамение на уме твоем, и отбегнет от тебе. Понуждает ли тебе семо и овамо очима, положи крестное знамение и отбегнет от очей твоих. Седит ли тебе на языце, или на устнах, чтобы ты разглагольствовал, крестом отжени его. Наносит ли в ушеса твоя разглагольствующих суетная, огради ушеса твоя крестом Христовым⁹¹.

2) Суть от толковников Божественного Писания глаголющие, яко Господь Бог смиряя вознесенную гордыню демонскую, покори того неточию рабом своим, дав им власть наступати на змию и на скорпию, и на всю силу вражию, но и некиим бездушным вещам покори его, якоже покорил его бе и бряцанию гуслей Давидовых, мучиму бо бывшу Царю Саулу от демона, Давид приемши гусли, пояше бряцая, и отступаше демон от Саула (1Цар.16:23)⁹².

3) Имя Христово есть тако сильно, яко идеже то призовется, тако всякое былие и волшебные басни разрушаются, беси трепещут⁹³.

Бог всех веков единым своим словом сотвори небеса, и солнце, и месяц и звезды, свет и тьму, и нарече свет день, а тьму именова нощь, и основа на ничесом же тяготу земную, и водам повеле тещи на службу нашу, и древа различная возрасти, и расположи времена, и лета, и месяцы, и созда звери и скоты на земли, и птицы на воздусе, а в водах рыбы⁹⁴. Услыши, Боже, молитву раба твоего, и моление мое внуши, Господи Саваоф. Ты бо сотворил еси небо и землю и вся чудная под небесем сущая, и Господь еси всех, и несть могущего сопротивитися Тебе, в милости твоей спаси мя, Господи⁹⁵.

1) Бог егда мир в сие раздел украшение, созда его не от подлежащия или преждебывшия таковыя вещи, но все от небытия в бытие приведе⁹⁶.

2) В начале созда Бог небо и землю. Созда же та всесильный Господь от ничегоже, и от небытия приведе в бытие, а от тех потом и прочая создания горняя и дольняя, шестьми деньми делая, произведе. И бяше первая невидимая в бездне тварь, яко семя и начаток имущих произвестися оттуду тварей, якоже бо егда коего садовного древа от семен едино зерно разсуждаем, глаголем в нем быти корению и древу, и ветвиям, и листвиям, и цвету, и плодом, не яко та уже суть, но яко имут оттуду быти, егда то зерно насажденно бывши прозябнет, и возрастет, сице и Богом созданная первая тварь или материя (вещество) бяше начаток прочией твари.

Начиная же, Создатель первую оную тварь невидимую и неукрашенную производити в совершенство и во украшение, в первых повеле из тьмы свету возсияти (2Кор.4). Возсиявшу же свету во тьме бездонной, раздели Бог свет от тьмы, и нарече свет днем, а тьму именова нощию, и бысть то день первый, егоже мы ныне нарицаем неделею (т. е. Воскресеньем), и месяц первый, иже потом наречен бысть Март, и число месяца того первое. По первом дни, во вторый день, егоже мы ныне нарицаем Понедельником, небеса всесильным словом своим от вод бездны произведе, якоже глаголется во псалме: Словом Господним небеса утвердишася, и Духом уст Его вся сила их (Пс.32). В третий, нарицаемый от нас Вторник, собрав воды в совокупление едино, явил есть сушу, и нарече землею, и сотвори ю прозябати семена, и всяку траву, и древеса растити. В четвертый день, егоже мы зовем Среда, сотвори два светила велицыи на небеси: солнце и луну, такожде и звезды. В пятый день, иже от нас Четверток именуется, созда рыбы, и гады водные, и птицы от воды произведе. В шестый, иже у нас есть Пяток, созда звери, скоты и гады земные, по роду их: последи же всех тварей созда Адама и Еву, и введе я в рай пышный. А в седмый день почи Бог от всех дел своих, и наречеся день той Суббота, си есть покой, яко почи в он Создатель, и освятил есть день оный⁹⁷.

1) Вся та небесная и земная нашея ради временныя жизни, да служат нам, созданна и устроенна суть от Бога⁹⁸. Постави Бог Адама над всем дольним созданием своим царя и владыку, и покори ему вся под нозе его, овцы и волы вся, еще же и скоты польския, и птицы небесныя и рыбы морския (Пс.8), а обладает теми⁹⁹.

2) Не токмо в поднебесной, но и на небеси во всех Божиих созданиях ничтоже есть честнее души, ибо тоя ради и небо создано, глаголющу св. Златоусту: человек душею своею всего мира есть дражайший, его бо ради и небо, и земля, и море, и солнце, и звезды создани суть¹⁰⁰.

Почи Бог от дел, еже новая создания более созданных уже тварей не производити, яко не требе бяше множае, но довольно сотворил, и совершися всякая тварь горняя и дольняя. Не почи же, ни почивает, ниже почиет, содержа и управляя всю тварь: чесо ради и Христос Господь во Евангелии рече: Отец мой доселе делает и Аз делаю (Ин.5). Делает Бог, движа небесные течения, и устрояя времен благопотребная пременения, и утверждая землю недвижиму, ни на чем же основану, и производя от нее реки и источники водные сладкие, к напоению всякия живыя твари. Делает Бог о всех, не токомо словесных, но и безсловесных животных, промышляя, храня, питая и умножая. И аще бы отъял Господь Бог от нас и от всея твари своея вседержительную свою руку: абие погибли быхом, и вся бы тварь воничтожилась. Вся же та делает Господь без утруждения своего, якоже некто (Августин) от Богословцов о Нем глаголет: почивая делает, и делая почивает¹⁰¹.

а) Из души и тела, мужа и жену

По устроении и украшении всего зримого горнего и дольнего создания, Бог Троица, Отец, и Сын, и Святый Дух, в Божественном своем совете рече: сотворим человека по образу нашему и по подобию (Быт. 1:26), да обладает рыбами морскими, и птицами небесными, и зверьми, и скоты, и всею землею, и всеми гадами пресмыкающимися по земли: и сотвори Бог человека. Созда же Бог человека, персть взем от земли, и вдуну в лице его дыхание жизни, и бысть человек в душу живу (Быт. 2:7). И созда ему помощницу жену, юже Адам воспрянувши от сна узрев, рече: се кость от костей моих, и плоть от плоти моея (Быт. 2)¹⁰².

б) Создал совершенным и невинным, хотя и знал, что он согрешит

1) Приведе Бог ко Адаму всяк скот, и птицу, и зверя кротка и покоряющаяся: бяше бо еще тогда и волк яко и агнец, и ястреб якоже и кокош нравом, едино другого не вреждаше, и нарече им всем Адам имена тако, якоже коемуждо животному бяше прилично и свойственно, и согласоваше коегождо животна имя с истинным того естеством, и имевшим потом быти нравом. Бе бо Адам зело упремудрен от Бога, Ангельский разум имеяй¹⁰³.

2) Беста Адам и жена его в раи оба нага, и не стыдястася (якоже ныне малыш младенцы не стыдятся), еще бо не ощущаху в себе плотского вожделения, еже стыдя есть начаток, ниже о том что ведяху тогда, и самое их безстрастие и невинность бяше им аки одеяние прекрасно: кая бо одежда можаше им краснейша быти, паче самые чистые девственные непорочные их плоти, райским блаженством удобряемые, райскою пищею питаемые, и благодатию Божиею осеняемые?¹⁰⁴

3) Прежде преступления заповеди Божия человек неповинен, незлобив, безгрешен, в благодати Божией, яко сын в любви и милости отчей сущи, никоеяже име в себе злые воли злаго хотения, ниже знаяше, что есть зло, не желаше какового греха, ниже ведяше, что есть грех. Не бе в нем гордости, ниже требоваше большие паче данные ему от Бога чести, ни славы искаше, ни позавиде Ангельскому естеству честнейшему. Не бе в нем лакомства, не собираше имений, ни злата, ни сребра, ни камений многоценных, ни что-либо от таковых, еже ныне человецы ненасытным желанием собирают. Ярости в нем не бе, ни гневашеся, ни злобствоваше, ни позавиде, праведень сый и свят, плотского сладострастия ни знаяше, ни пожела плоти, чревообъядения ненавычен, ни помысли о зоповеданном плоде, еже бы его хотети ясти: ни преступил бы, когда заповедь Божию сам собою, аще не бы был от врага прельщен¹⁰⁵.

Не прилично бе, да победит преступление Адамле благость Божию, или диаволе лукавство, да ей преодолеет: ниже да воспоследует мнение, яко Бог, устрашився противнаго себе греха Адамля и лукавство диаволя, не сотвори Адами и диавола: сего ради благ будучи Бог и хотя благодетельсвовати, сотвори за благость свою и диавола и человека в добром состоянии, яко не хотяй и ненавидяй беззакония: диавол же и человек сотвори грех своим хотением самовластным¹⁰⁶.

в) Создал по своему образу и подобию, кои различны между собою

1) Образ Божий в человеце изъявляет душа невидимая, разумная, живая, безсмертная, и самовластная, над всею землею начальствующая, и три силы душевные: ум, слово и дух. Якоже души невидимая сила, и невидимое существо, и природа, тако и Бог невидимый. И якоже душа разумная, тако и Бог разумов Господь (Рим.11:34). И кто разуме ум Господень? или, кто советник Ему бысть? О, глубина богатства и премудрости и разума Божия! И якоже душа живая и безсмертная, тако и Бог прежде век и во веки живый и вся оживляяй: и якоже Бог хотением самовластен, и всеми тварми обладаяй, тако и человека сотвори самовластна, и да обладает рыбами морскими и птицами небесными, и всею землею: и якоже Бог триех лицах, тако и душа человеческая в триех силах – ума, слова, и духа: и якоже слово от ума, и яко дух от ума, тако Сын и Дух Святый от Отца: яко ум без слова и духа быти не может, тако Отец без Сына и Духа Святого не был никогдаже, и быти не может: и якоже ум, слово, и дух, три силы душевнии разнии, а едина душа, не три души: тако Отец, Сын, и Св. Дух, три лица Божия, а не три Бога, но един Бог: и якоже душа во всем теле вмещается, и ни един уд тела без души, тако и Бог небо и землю и весь мир Божеством своим исполняет, и ни едино место без Бога быти и систоятися не может: Бог не как душа в теле, но во всем мире вместитися не может, и аще бы тысяща тысящей миров создал, то бы в них не вмещался¹⁰⁷.

2) Есть душа образ Божий, понеже имать тройственную силу, а едино естество. Силы же души человеческие сие суть: память, разум, воля, памятию подобится Богу Отцу, разумом Богу Сыну, волею Богу Духу Святому. А якоже в Святей Троице аще и три суть лица, обаче не три Бози, но един Бог: сице и в души человеческой, аще и три суть (якоже речеся) душевные силы, обаче не три души, но едина душа. Между образом и подобием Божиим в человеческой души разность полагают святии Отцы: Василий Великий в Шестодневнике своем, в беседе 10, Златоуст на Бытия в беседе 9, Иероним в толковании на Иезекиилева пророчества главу 28, разность же сицевую: образ Божий приемлет душа во время своего от Бога создания, подобие же Божие в ней совершается в крещении, образ в разуме, подобие в произволении, образ в самовластии, подобие в добродетелех, яко и Христос в Евангелии глаголет: будите подобни Отцу вашему, иже есть на небесех: подобни же кротостию, благостию, незлобием, и проч. Сице Василий Великий умствует: сотворим человека (глаголет Бог) по образу нашему и по подобию: ово убо зданием Божиим имамы, ово же от нашего произволения исправляем.

В первом устроении есть нам по образу быти Божию, от произволения же нами исправляется, еже по подобию быти Божию. И паки: мне оставил есть (Бог) еже по подобию Божию быти, по образу убо имам, еже словесен быти, по подобию же, еже Христианин быти. Будите (рече Христос) совершенни, якоже Отец ваш небесный совершен есть. Видиши ли, где дает нам Господь еже по подобию? Тамо, идеже подобимся тому, иже солнце свое возсиявает на злыя и благия, и дождит на праведныя и на неправедныя (Мф.5:45). Аще ненавидиши лукавства, не памятозлобив же еси, ни поминаяй вчерашния вражды, аще братолюбив еси, и сострадателен, уподобился еси Богу, аще оставиши врагу от сердца, уподобился еси Богу, аще каков есть на тя грешника Бог, таков и ты еси на согрешившего к тебе брата, благоутробием уподобился еси Богу, томже еже по образу (Божию) имаши, от еже словесен быти: по подобию же бываеши, от еже благостыню деяти. До зде святый Василий Великий. Да вемы убо, яко образ Божий есть и в неверного человека души, подобие же токмо в Христианине добродетельном, и егда согрешает смертне Христианин, тогда подобия токмо лишается Божия, а не образа: и аще и в муку вечную осудится, образ Божий тойже в нем во веки, подобие же уже быти не может¹⁰⁸.

г) Для особенной цели

1) Благоволим паче отъити от тела, и внити к Богу (2Кор.5:8), к Богу на небеси живущему: на то бо и создани есмы, да преходим от земли на небо, и наполняем та праздная места, отнюдуже испадоша злии ангели: на то и небо отверзается, да воходим в не¹⁰⁹. Многое сотвори Бог Адаму благодеяние, создав того по образу и по подобию своему, и в раи сладости жити дав тому, и вся под нозе покорив ему, еще же и большее хотел ему сотворити благодеяние, еже из рая преселити того в небо без всякого неудобства. Но понеже Адам неблагодарен явися Божиих первых благодеяний: убо пресече ему благодеяние сове, и от рая отсече его, и в землю возвратитися повеле, и пусть к небеси ему о коль неудобный дал есть!¹¹⁰

2) Еже сотвори Бог небо и землю, не Себе ради сотвори, да в них обитает и почивает, по нас ради, да будет от нас хвалим и почитаем¹¹¹. Естество убо бренное человеческое, емуже потом множае, неже Ангелом излияся благость Создателева воплощением Слова, да весть своего Создателя, и верует в Него, и прилепится к Нему всею любовию, и благодарно сущи толикия его неизреченныя милости, да благоугождает Ему во вся дни жизни сея, надежду имея получити от благости Его блаженство вечное, и общение того Божественныя славы во царствии Его со Ангелы святыми¹¹².

3) О возлюбленне! отец твой, родивый тя по плоти, несть истинный отец: понеже тленную токмо роди плоть, скоро умирающую. Всесильный же Бог Отец твой истинен есть: понеже безсмертную твою создав душу, влия в плоть твою, его же повелением зачатую: иный убо есть отец твой видимый, иный же невидимый. Видимый отец есть смертен, временен, бедам и страданиям подлежащ, и ничтоже могущ: невидимый же отец есть безсмертен, вечен, никиим же страданиям подлежащ, всемогущ и вся держащ: той рече, и создался еси во утробе матерней: той повеле, и изшел еси из чрева матере твоея: и аще плотского родителя чада почитати должни, кольми паче того, иже созда нас по образу и по подобию своему, и даде нам смысл и разум, и постави нас господствовати над делы руку Его, и рабов нас Его сущих, приобщи себе в сыны и в братию и други благодатию своею. Того убо истинного нашего Отца, толикая нам благая давшего, должни есмы знати, любити, почитати и всегда тому покланятися¹¹³.

а) Начал промышлять с самого сотворения его

α) Давши ему все райския блага и заповедь

1) Поят Господь Бог человека, егоже созда, и введе его в рай прекрасный, неизреченных благ и сладостей исполненный, четырмя реками вод чистейших напаяемый, в немже посреде бяше древо жизни, от негоже вкушаяй плода, никогда же умрет: таможде бяше и иное древо, глаголемое разум, или ведение добра и зла. Бяше же то древо, древо смерти: повелевая бо Адаму Бог от всякого древа плоды ясти, заповеда не вкусити от древа, еже разумети доброе и лукавое: в оньже день аще снеси (рече), смертию умреши (Быт.2)¹¹⁴.

2) Человека положи Бог в раи, дав ему заповедь учащую послушанию, да насыщается всех благ в раи сущих, единого токмо да не коснется древа, сицевый ему положив подвиг: да аще наветом не ктому Ангела, но диавола вся противу ему кознствующаго, не преступит заповеди Божии, и посрамит врага завидящаго ему великия ради его чести, безсмертен будет пребываяй в нетлении: аще же ни, то не попустится ему более в раи жити, но изгнан будет вон, и живши умрет¹¹⁵.

β) попустивши его падение

1) Позавидев таковому их блаженному в раи пребыванию, диавол прельсти я во образе змия, да вкусят плода от заповеданного древа: и первее Ева вкуси, таже и Адам, и согрешиста оба тажце, заповедь Божию преступивше, и абие обнажистася благодати Божия, прогневавше Бога Создателя своего, и познаста наготу свою, и прелесть вражию уразуместа, яко рекий к ним: будете яко бози (Быт. 3), солга, сый отец лжи: не точию бо не получиста Божества, но и еже имеяста, погубиста, низреченных бо дарований Божиих лишистаса¹¹⁶. Что как диаволу, так и человеку согрешити попусти Бог и не возбрани: то сделалося потому, яко на самовластие Бог не наводит насилия. Обаче, да не согрешит, предостереже, самовластие же преподав Господь Бог, не наводит насилия по правосудию, о немже псаломник засвидетельствовал: праведен еси Господи, и прави суды твои (Пс.118:137)¹¹⁷.

2) Мнози многия и различные предлагают Адамлю падению вины: едины безверие, друзии преслушание, третии же гордыню и слволюбие, инии же ины различные вины. Мы же ни едину от сих первейшую быти мним, точию безумие и всех вещей неразсмотрение. Первейшая Адаму в раи бысть заповедь, еже делати и хранити, сиречь делати разумом, еже разумети добре, и хранити заповедание, еже не преступати: но понеже не делаше разумом, сего ради не сохрани заповедания. От неделания бо умного первее возрасте в Адаме неверие, во еже не веровати Богу, иже рече и заповеда. По сем от неверия преслушаение и преступление, от преступления же отпадение Господни благодати, и Божественныя Его любве отчуждение. Аще бы разумел Адам благодателя, и предразсудил себе заповедание, не бы не неверовал заповеданию. Аще бы веровал, не бы преслушал, не бы вкушал запрещенного древа, не бы изгнан был из рая, не бы подпал смерти и тлению, не бы Бог толико о нас чудодействовал дотоле, донеле приведе нас во древний разум, и всех вещей познание¹¹⁸.

γ) И подвергши его заслуженному наказанию

1) Бог гласом своим воззвал я, и лицу своему представив, и в гресе испытав, издаде на ня праведный свой суд: еже из рая изнанным им быти, и от труда рук своих и пота лица своего питатися, Еве в болезни чада родити, Адаму землю, терние и волчец родящую возделовати: обема же по долгом жизни сея злостадании умрети, и в землю обратитися телом, душею же во адовы отъити узилища. И изгна Бог Адама с Евою из рая, и всели его прямо рая делати землю, от неяже взят бысть, и пристави Херувима с пламенным оружием хранити рая, да не ктому человек, или кий зверь, или диавол в он внидет¹¹⁹.

2) В то время познаста прародители нашы, яко добра вещь рай, и еже в нем пребывание, егда того недостойны сотвористася, и оттуду изгнастася. Воистину добро не толь познавается быти добро, егда имать е у себе человек, яко в то время, егда погубит е: познаста и злое, егоже прежде не знаяста. Познаста бо наготу, глад, зиму, труд, болезнь, страсти, немощь, смерть, и ад: все то познаста, егда запведь Божию преступиста¹²⁰.

б) Продолжает промышлять и во все последующее время

α) сохраняя бытие наше

1) Бог содержит живот всякого человека, верного и неверного, праведного и грешного: вси бо о Нем (якоже глаголет Апостол) живем, и движемся, и есмы (Деян.17)¹²¹. Что же принесем, что воздадим, или кое благодарение возслем Создателю нашему Господу Иисусу Христу, яко благих не требующих наших, но от своего единого благоутробия не токмо мир сей видимый нас ради созда, но и в нем обогащает и сохраняет ны, дает нам житие и жилищ и питает ны?¹²² Да не глаголеши убо: сирота есмь, Бога бои маши храняща тя, и пекущася о тебе: Он тебе отец и матерь, учитель и наставник, покровитель и руководяй ко спасению¹²³.

2) Аще Бог и о невозлагающихся, ни уповающих нань промышляет, изливая на всех благодать свою, якоже солнце лучи своя, сияя на благия и злыя, кольми паче промыслит о уповающих нань, и возложивших себе Ему всецело. Помыслим, како бяше промысл Божий о людех Израильских в пустыне, о тех, иже бязу благодеяний Его неблагодарный, много неверие свое к Нему (аще и чудеса того зряху велия) являющих, ко идолопоклонению удобопреклонящихся: обаче и таковых не оствляше Бог, но весь промысл Его о них бяше: не имать ли убо Господь промышляти о работающих Ему усердно, с верою же и любовию, всю надежду свою и упование нань возлагающих?¹²⁴

β) Попуская распространение первородного греха

1) Начать Ева, мати всех живущих, в болезни родити чада, к смерти паче, неже к животу: прежде рождения бо умертви я, наведши грехом своим всему человеческому роду смерть сугубу, душевную и телесную. И не первее начинаху родящиися жити, неже умирати душею бо абие мертвы бываху, телом же к смерти течаху, происходяще от утробы матерни в жизнь сию купно с мертвым тлением¹²⁵. Егда Адам бысть прельщен, и прогнева Создателя преступление заповеди Его, и лишися преждния благодати того: тогда познав зло, сотворися к нему зело удобен. И вниде в естество человеческое всякое греховное желание: гордость, лакомство, ярость, гнев, зависть, плотская вожделения¹²⁶.

2) Естеству человеческому, грехом прародительным растленному и добра первого лишившемуся, и в зло поползшемуся, природнейше есть злое: ибо в том человек зачинается и родится: в беззакониих (рече) зачат есмь, и во гресех роди мя мати моя (Пс.8). А в чесом родится, того от детства и желает, о том и помышляет, якоже и Писание извествует глаголя: прилежит помышление человеку на злая от юности его (Быт.2). Того ради неудобны есмы к добродетелем, ниже послушливы есмы добрым увещаниям, на злое же дело зело есмы скоры¹²⁷. Обаче разумная тварь человек, по образу Божию созданный, в произволении спасения своего, якоже прежде бе самовластен, сице и ныне есть самовластен, и впредь будет самовластен¹²⁸.

γ) Содействуя нам в деятельности

Содержащи нас создавый ны Вседержитель содействует естеству нашему во всех деяниях, аще в добрых, аще в злых, в добрых пособствуя, в злых же не отъемля от нас жития, дыхания и движения нашего, держимого рукою Его, и хранимого милосердием того: и несть в жизни нашей деяния коего, еже бы совершилося без Божия ны содержания, и без содействования нашему естеству. Без Него бо ниже единою дохнути, ни единым перстом двигнути можем. И аще бы Бог человеческого жития и движения не содержал и поне на едину черту времене, на едино мгновение ока от него содержание свое отнял: абие человек мертв бы был: егда человек грех каковый деет, содействует естеству его содержай того Бог, не отъемля от него своея вседержительныя силы, держащия живот и движение грешниково, ни попуская ему в самом том греховном деле внезапу умрети, и от врага невидимого похищенну, и во ад низведену быти. Содействует же тако грешнику и не хатящи, якоже бо смерти грешному не хощет, сице не хощет отъяти вольную волю и власть человеку, юже даде ему по образу своему. Обаче сам несть общник греха грешнича, ниже повинен есть злому делу его: не бо в злом изволении греховном содействует или помоществует грешнику Бог, но токмо в животных естественных того силах, о нем, Бозе Вседержителе нашем, движимых. И якоже хромцу ходящу и храмлющу, душа его с ним не храмлет, аще он и не бездушен храмлет: сице грешнику грешащу Бог, содержай живот его и содействуяй естественному того движению, несть греху оного причастен, ни повинен, но самовластная воля человеческая от Бога ему неотъемлемо данная, та противу воле Господни грех деет. Богу на то не соизволяющу, хранящу же живот грешничь, аще и мерзостен есть ему Владыце грех грешащего. И дивное есть воистину Божие долготерпение, како человека грешаща терпит, ни погубляет его со беззаконии того в самый час деемого скверного греха его! Слава толь долготерпеливому милосердию Его!¹²⁹

δ) И направляя все к нашему благу

Поистине о всех рабех своих, царствия Божия ищущих, о спасении пекущихся, усердно же и верно ему – Господеви своему служащих, и на того промысл возлагающихся, Он печется, промышляет, житие их полезно устрояет, и к житию потребная подает неоскудно. И аще каковыя беды и напасти рабом его случаются, Он в тех не оставляет их, но от бед изымает, и напасти в добрый конец им производит, якоже произведе Иосифу прекрасному от братии возненавидену, в ров ввержену, в работу проданну, в чужую землю завезенну, от жены напаствованну, в темницу заключенну: по сих всех что? – сотвори того царя и владыку во Египте славна¹³⁰.

Бог вся в бытие приведый, егда созда человека, и виде его преклонившася ко всякому злу, не презре дела рук своих, погибающего: но благоизволи, да Сын Его, пребывая с Ним нераздельно (есть бо всюду Бог), до наших снидет предел¹³¹. Пришед убо Сын Божий прия плоть от Пресвятыя и Пречистыя Девы Марии, образом быв яко человек, крест волею претерпе, да грех Адамова преслушания древом креста исправит, и осужденному человеку отпущение дарует, сам за ны воздавши долг вольным своим страданием: ибо на кресте пригвожден быв, рукописание еже на ны разтерза, грех разреши, и своею смертию попра смерть, и ад плени, и всю диаволю власть и силу посрами, и номощну сотвори. Егда же все полчище бесовское прогна, и врата медная сокруши, и вереи железныя сотре: воста от мертвых в третий день, и дарова человеческому роду то, еже воскреснути всем, и жити во вся будущия безконечныя веки¹³².

1) Есть грех толикое зло, як человек сам собою, без содействующаго Божия милосердия, никогдаже может совершенно зань довлетворити, аще бы и тысячу лет жил, в покаянии же, трудах, постах, в молитвах и слезах вся лета оная проводил. Един грех Адамов, в раи содеянный, толикия бяше тяжести, яко всех святых праотцев премногия слезы, святых Пророк излиянныя крови не возмогоша зань возмерити: но требе бяше, да сам Сын Божий, с небеси сошед, воплотится и постраждет, и своею кровию за грех человеческий воздаст долг Божию правосудию¹³³. Простил Бог Адаму и Еве грех его, елико той грех бяше лица их, а не елико всего рода человеческого. Изведе от вины греховныя, а не от казни: ибо казнящая справедливость Божия требоваше довлетворения от виноватого. А понеже Адам и Ева не можаста сами собою довлетворити Богови за грех наведенный на весь род человеческий, того ради в рай не введостася, даже приидет Избавитель рода человеческого Сын Божий, и довлетворить Богу Отцу своим вольным за всемирный грех страданием, и крестом отверзет рай¹³⁴.

2) Кая бе нужда Богу родитися в плоти человечестей? Еда ли не можаше инако спасти род человеческий? Ничтоже есть невозможно у Бога, подобаше же диаволу побеждену быти от того, иже от него побежден бысть. Человек от него побежден бысть, человек же не по обычаю естества рожденный, не от смешения, глаголю, мужеска, но от земли созданный, от земли же таковыя, яже бе аки дева чиста и нарастленна: еще бо не бе тогда проклята от Бога: сицеваго и сице рожденного человека егда победи все злобный диавол, подобаше убо, да и сам от такового человека победится: таков же есть Господь наш Иисус Христос, не по обычаю и закону естества рожденный, но якоже Адам от земли нетленныя, тако Он от утробы чистыя девическия и святыя¹³⁵. Праведно убо судил равен с нами подвиг прияти Господь наш Бог Слово, и явити нам победу на сопротивнаго, сотворився нам подобен во всем кроме греха, смири себе, зрак раба приим, родися от Девы, непременен Божеством, и бысть яко овча, да упразднит волка. Аще бо бы горнею своею силою Божественною поразил сопротивнаго (можаше бо то сотворити, яко всесилен), дал бы ему благословную вину ко ответу сицевому, яко человека победих, от Бога же побежден есмь, и тако удобь возмогл бы за себе вещати: возможна суть вся Богу. Сего ради Господь наш Спас всех, егда раби Его в брани с диаволом падоша побеждени и сотрени, сам неизреченным советом себе истощи, сошед в Пречистую и Пренепорочную Деву, и приим рабий образ, и вся тела нашего немощи, кроме греха: и на позорище жития сего изшед, вольным и премудрым смирением утаися всезлобнаго диавола, и победи того находяща яко на простого человека, и всю вражию силу сокруши спасительною страстию, яже на кресте, уча нас смотрящих на Его подвиг, таковым же образом с диаволом братися, и того низлагати силу¹³⁶.

3) Таковому честнейшему созданию, роду, глаголю, человеческому, во истление греховное и смертельное падшему, от кого бы имело податися врачевство и обновление, аще не от самого Творца? Не Давид ли предрече: посла Слово свое и исцели я? (Пс.6:20). Ибо Слово Отчее Сын пришед и исцели естество человеческое. Како же то Слово Отчее имеяше исцелити человека, аще не бы яки пластырь приложился к человеку рез соединение ему вочеловечением? Еда ли который врач, хотя язвенного человека уврачевати, пластырь к древу, или к камню, а не к болящему человеку прилагает? Убо и Бог Слово единородное, не к древу, аще и между древесы купины неопалимыя бе виден, ни к камени, аще и на каменных горах – Синаи и Хориве Моисеем и Илиею бе зримо: но к человеку болезнию греховною объятому смертно, яко целебный пластырь приложи, и присоедини крепко, благоволивши тому вселитися действием Духа своего Святаго, в чистой девической, а не просто женской утробе, и воплотитися и родитися от нея¹³⁷. Никтоже можаще нас исцелити от язвы и избавити от смерти первее не отъемши вреда. Не бе сице совершенного врача, Дóндеже сам Он превышний седяй на Херувимех, душам и телом совершенный врач и Творец, уста своя, сиесть Сына своего (якоже бо Дух Святый в Писании нарицается Отеческим перстом: о перст, рече, Божии изгою бесы (Лк.11:20): сице Бог Сын именуется Отчиими устнами, по писанному: Духом уст Его вся сила их) (Пс.32:6) тая, глаголю, уста своя Господь Бог – Сына своего возлюбленного от любви к роду человеческому приложил к язве естества нашего: тако возлюби Бог мир, яко и Сына своего единородного дал есть. (Ин.3:16). Которая уста, глаголю, Бог Сын, соединившийся со уязвленным естеством нашим, извлече на ся яд той греховный? Вземляй грехи мира, той грехи наша понесе, и исцели ны, свое за нас положши здравие. Сице нас лобзанием своим, сиесть воплощением отроди на живот благодати¹³⁸.

1) Уязвляет ны Бог Отец стрелою любве своея Божественныя: тако бо возлюби Бог мир, яко и Сына своего единородного дал есть. Кто обрящется в поднебесной таков, иже бы дал за кого сына своего единородного на смерть? Никтоже: а Бог Отец Сына своего вдаде на смерть за ны. Не дивно, яко Авраам не пощаде сына своего, вознес того на жертву: сотвори бо то Бога ради: то дивно, яко ради нас Бог не пощаде своего Сына. Кто же мы есмы? брение и гнойи червь. Пощаде Бог Исаака, удержав руку Авраамову, да не заколет его: своего же Сына не пощаде, не удержа рук убийственных распинающих Того: но попусти Ему заклану быти за ны. О любве Божественыя! веждь, мире наблагодарный, како тя Бог возлюби, тако возлюби Бог мир, тако возлюби! уязвляет ны Бог Сын стрелою любве своея Божественныя, возлюбивши нас крайнею любовию своею, якоже во Евангелии пишется: возлюбль своя сущия в мире, до конца возлюби я. (Ин.13:1). До конца: аки бы кто пия про здравие коего любезного друга чашу, испил ю до конца, до последней капли: сице нас Сын Божий возлюби до конца, и пия за ны страданий своих чашу, истощил ю до основания, до конца: не оста бо в Нем кая любовь, еяже бы нам не явил: не оста бо в нем кая крове капля, еяже бы за ны не излиял. Толь нас возлюбил, яко всего себе нам истощил: возлюби бо нас не точию паче всего создания видимого и невидимого, паче Ангел, паче Архангел, паче Херувимов, паче Серафимов, и паче всех Сил небесных, и всего небесного царствия: но и паче души своея пресвятыя возлюби нас, душу бо свою за ны на кресте положил есть. Пишется же, яко болши сея любве никтоже имать: аще кто положит душу свою за други своя (Ин.15:13). И не толь бы дивно было, аще бы Сын Божий положил душу свою за други своя, глаголю, за праведныя, за святыя, к нимже глаголет: вы друзи мои есте, не ктому глаголю вы рабы, но друзи (ст. 14–15); то дивно, яко не за други, но за враги своя, глаголю, за ны грешныя положил есть свою душу: то крайняя Его любовь к нам недостойным, якоже глаголет Апостол: составляет в нас свою любовь Бог, яко грешником нам сущим, за ны Христос умре (Рим.5:8)¹³⁹.

2) Столь душе весу, сколько и крови Сына Божия, глаголет бо Апостол: не тленным сребром и златом искупистеся, но честною кровию Агнца непорочна и пречиста Христа (1Петр.1:18–19). Свесь кровь Сына Божия, – свесишь честность душевную, оцени воплощение Сына Божия, оцени пречистое пречистых девических Матери Божия персий млеко, имже питала Божественного Младенца, оцени премногая чудеса Его, силою Божественною творимая, оцени вся страдания Его, оцени всю Его излиянную за душевное наше спасение кровь, оцени крест и смерть Его. Возможеши ли то оценити? Тогда возможеши и души оценити драгость. Разсуди всяк, в коль велию цену сам Сын Божий душу человеческую поставил, выше всех небес, вышше всех Ангел, вышше престола своего Божественного и всего небесного царства: ея бо ради вся та оставль, на землю сниде, себе ея ради не пощаде, душу свою за ню на кресте положи. Ищи ж тут цену душе человеческой¹⁴⁰.

1) Слово Божие, от Бога Отца прежде век рождшееся, неоцененное сокровище сердца Отча, егоже из чрева прежде денницы роди Отец, тое Слово Божие, превозлюбленный Сын Бога Отца соизволи благоволением Отца, и содействием Пресвятого Духа, спасение ради нашего, восприяти человеческое естество, и в нем устроити спасение наше¹⁴¹.

2) Воплощение Бога Слова бысть благоволением Бога Отца, осенением и действием Духа Святаго, и самого Слова соизволением. Воскресение Христово от мертвых, тогоже Бога Отца купно с Духом Святым благоволение и действом, и самого Христа соизволением бысть¹⁴².

Яко да сохранить свойство ипостаси своея, яко быти тому на небеси Сыну и на земли Сыну¹⁴³.

1) Како женское чрево вмести страшное Божества величество? Сице, якоже обитель Авраамова вмести Бога под дубом Мамврийским, егда сниде с ним ясти. Како убо огнь Божества не пожже женского тела? Якоже не пожже огнь купины в Синаи, тако и девическия Божество не вреди утробы, Дева роди, и Девою пребысть. Неразумнии убо суть тии, иже глаголют невозможной быти вещи, дабы во утробе естества человеческа вместился Бог, егоже в купине Моисеевой вмещшася ведят: еда ли купина, тварь сущи бездушна и нечувственна, честнейша есть паче чувственныя и разумныя твари, душею Богоподобною почтенныя? В бурю, во облак, в дым и во огнь вмещашеся Бог, егда являшеся Иову, Моисею и Илии: и что дивно, яко в честнейшую одушевленную тварь вместися, хотя явитися на земли, и с человеки пожити и исцелити их от язвы смертныя, Адамовым грехом человеческому роду нанесенныя?¹⁴⁴

2) Сие же неиспытно приемли, никакоже образа ведети вопрошай: како себе истощи Сын Божий и человек бысть от девичеких кровей, без семени же и без тли, или коим образом двух естеств во едином составе бысть соединение. Верою бо сия научихомся содержати, яже нам от Божественных Писаний предашася: образа же разумети и глаголати не можем¹⁴⁵.

Удивлятися кто может, яко по преступлении Адамовом не скоро прииде Слово Божие на землю воплотитися, и спасти подший род человеческий, даже до полушестыя тысящи лет. Ни едина на земли обрется таковая дева, яже бы была чиста не точию телом, но и духом. Та едина обретеся первая и последняя таковая, яже сугубыя ради чистоты своея – телесныя, глаголю, и душевныя, сотворися достойна быти церковию, и храмом Духа Святаго¹⁴⁶.

1) Едину ипостась исповедую Бога Слова, якой той един Сын Божий и Сын Девы, а человеческой ипостаси Христос не имеет, понеже не два Сына и не два Христа: но един Христос Сын Божий и Сын Девы¹⁴⁷.

2) Существо Божие с существом человеческим во утробе Девыя во едино лице Христово соединися, и от самыя тоя черты времене, в нюже воплотися Христос, Бог совершенный совершен бысть и человек, и совершенный человек, совершен бысть и Бог, в сугубых существах естеств раздельных, в едином же лице нераздельном¹⁴⁸. Не так бывает Бог человеком, чтобы престал быти Богом, ни человек так бывает Богом, чтобы престал быти человеком, но обое то так с собою соединяются, как в оном таинстве, о котором Апостол: будета оба в плоть едину (Еф.5:31), а тут в лице едино, яко красне глаголет Дамаскин: не во двою лицу разделяем, но во двою естеству несмесно познаваем¹⁴⁹.

3) Христа от Сына Божия не разделяем, ни посаждаем Его на особном престоле близ Святыя Троицы, и не делаем из Троицы четверицу, но единого и тогожде быти Сына Божия и Христа веруем и исповедуем, иже глаголется Сын Божий и Сын человеч. Сын Божий по естеству Божества, Сын человеч по естеству человечества, обаче не два Сына, но един Сын, якоже и Церковь по Октоихе, в гласе 6 на вечерни, догматически воспевает, глаголя: не во двою лицу разделяемый, но во двою естеству неслитно познаваемый. То наша вера не новая, но старая: тоя святыя веры неприменно держимся, никакияже новости и ереси приемлюще. Тую исповедуем, тую облобызаем и тою спастися чаем несумненно при благодати и помощи Божией¹⁵⁰.

1) Верую, что истинный Сын Божий единосущен и равночестен Отцу, да спасет род человечь, падением Адамлим во ад осужденный во область сатаны, с небесе сниде, и прият плоть человеческую во утробе Девы Марии от кровей ея девических Духом Святым соделанную, словесную и одушевленную, а не без души, или мечтательную, но совершенный Бог и совершенный человек, – от души словесныя и человеческия плоти состояй, един Сын Божий, Господь Иисус Христос, а не два Сына: едина Сыновня Божия ипостась во двою естеству пребывающая: по Божеству от Бога Отца прежде всех век, по человечеству же от Девы Богородицы во свое время родившийся¹⁵¹. Во Христе Сыне Божии вочеловечшемся нас ради два естества исповедую, едино Божества и едино человечества: Божественное естество самое Божество: а человеческое естество тело и душа. Два существа исповедую: едино единосущно Отцу по Божеству, и второе единосущно Матери по человечеству. Две воли исповедую Божества и человечества. Два действа исповедую Божественное и человеческое¹⁵².

2) От всего Святого Писания Ветхого и Нового Завета, и от святых Учителей и Соборов поучаемся ведати, яко имать силу хотети и делати Божеством же и человечеством воплощенный Христос Иисус Господь и Бог наш, ничтоже бо не достает Ему от тех, имиже яко Бог, или от тех, имиже яко человек познавается, кроме греха. Аще же совершен есть по обою, и ничесогоже лишается, то воистину все о Нем таинсво той прелюбодейственно творит, иже не исповедует Его быти самое существо со приличествующими Ему свойтвы по обою естеству¹⁵³.

3) Сын Божий ради спасения рода человеческого погибшего грехом, с небес сошел на землю не применением места и не разлучением от Отца, но с Ним был на престоле и во чреве Мариине тойже Бог, – и зачался нашествием Святаго Духа, и принял истинное, а не привиденное человечество, и не с небесе оное снес, но от крове Пречистыя Девы исткал. Был человек совершен со всеми его частьми и с душею словесною, и соединился с Божеством, и во едином лице был Бог истинный и человек истинный. Ниже Божество пременилось в человечество, ниже было вместо души, ниже человечество в Божество, но обоя естества пребыли совершены в одном лице со всеми свойствы, кроме греха. Присем к ведению потребно, что Божество, по восприятии человечества, никогда не разлучалось от него, ни во время страсти или смерти на кресте, ни по смерти: хотя душа и разлучилась от тела, однако Божество ни от плоти, ни от души никогда не разлучалось. Чего ради и во время смерти ипостась Христова была едина и таяж¹⁵⁴. Следовательно

1) Пречистую Деву истинную исповедуем быти Богородицу, а не Христородицу токмо, но, по существу, рождшую воплощшагося в ней Бога Слова, во двух существах и естествах, в Божием и человеческом, несмесных, в лице же одином Христовом нераздельном¹⁵⁵. Мы веруем и исповедуем, яко Пречистая Дева есть истинная Богородица, истинного Бога Слова рождшая, якоже веровати нас научиша святи Отцы, на третием Вселенском Соборе, в Ефесе на злочестивого Нестория собравшиися. И святый Иоанн Дамаскин в книзе 4 о вере, в главе 15, пишет: господственно и истинно Богородица есть, и именуется. И паки: родися из Нея Сын Божий воплощен, не богоносный человек, но Бог воплощен. Истинный Сын Божий Божественным своим существом воплотися во утробе Пресвятыя Богородицы, а не иного коего от себе Христа посла воплотитися: и истинная есть Богородица, Пречистая Дева Мария, воплотившая и родившая неизреченно истинного Бога¹⁵⁶.

2) Иже не исповедует Госпожу нашу всепетую, святейшую и пренепорочную, и всех умных естеств честнейшую, воистину и естественную быти Матерь Бога, создавшего небо и землю, море и вся, яже в них, буди анафема от Отца и Сына и Святаго Духа соестественныя и преестественныя Троицы и от всех сил небесных, и от лика святых Апостолов и Пророков и бесконечного множества мучеников и от всякого духа праведного в Вере скончавшегося, ныне и всегда и во веки веков!¹⁵⁷

1) Не видехом, ниже постигаем умом нашим воплощения и рождества Христова, како во утробе Девической Бог Слово плоть бысть, и како родился нетленно, сохранив пречистую Свою Матерь перед рождеством Деву, в рождестве Деву и по рождестве Деву, веруем же тако несумненно быти¹⁵⁸. Новизна то, что Дева внебрачная рождает, и по рождестве паки Дева. Новизна то на свете первая и последняя, таковая Девица, которая Мати Богу, и Дева рождающи и действующи паки¹⁵⁹.

2) На иконе Богородичной три звезды пишутся: на челе и на обоих раменах, для того, что Богородица пред рождеством (Христовым), в рождестве и в рождестве Дева¹⁶⁰.

1) Кто по Христе на небесех больший? Богородица. Чесо ради Богородица превыше всех Святых и Ангелов? Яко есть Мати Спасителя миру¹⁶¹. Егда Архангел Гавриил благовестил ей зачатие Сына Божия, отвеща с смирением: се раба Господня: буди мне по глаголу твоему. А коликия благодати Божия исполнено бяше! Кто изрящи может: более она имеяше в себе благодати неже вси Пророки, вси Апостолы, вси святители, неже вси мученики, неже вси святии, не токмо же вси святии, но более, неже и вси Англии и Архангели, Херувими и Серафими. Чесо ради и морем благодатей нарицает ю Герман святый, Патриарх Цареградский: якоже бо океана моря глубину кто измерит? Сице благодатей Божиих в пречистой Богоматери кто изрещи может? Добре к ней вещает и Церковь: радуйся глубино неудобозримая и Ангельским очима!¹⁶²

2) Высока Матерь Божия заслуг умножением: ибо теми всю тварь духовную и плоскую тако привзыде, якоже ни Ангелом, ни Властем, ни Силам, ни Господствам, ни Престолам, ни Херувимом и Серафимом ниже Пророком, ни Апостолом, ни Мучеником, ниже всей твари прочей мощно есть своими с нею равнятися заслугами и добродетельми, едина бо она вся превзыде по оному приточника изречению: многи дщери стяжаша богатство, мнози сотвориша сильная: ты же преспеющи превознеслася еси над всеми (гл. 31:30). Превознесеся Преблагословенная Дева над вся святыя и над вся силы небесныя. Она бо на небеси Царица, на земли Владычица, небесных сил Госпожа, дев похвала, мучеников венец, учительница Апостолов. Она зерцало исповедников, проречение Пророков, ожидание Патриархов, она всех добродетелей сокровище. Ибо чесого та лишитися может, яже всяких благ Виновника есть Мати?¹⁶³

1) Дева Мария есть истинная Богородица, и прежде рождества, в рождестве, и по рождестве, пребыла и есть пречистая нетленная Дева, которую всяк, яко удостоившуюся послужить толикому таинству, должен славить. Почему и Церковь похвалу ей сложила от слов Архангела Гавриила и святыя Елисаветы, и надобно думать, и утверждать, что оная похвала есть от самого Бога¹⁶⁴.

2) Пречистую Богоматерь аще кто не чтит и не исповедует, и не покланяется ей, той проклят в нынешний век и в будущий да будет!¹⁶⁵

О преизобильной любви к нам Господь Бог (ежели осмелюсь сказать) якобы себе забывает. Ибо себе истощивши, и якобы себе оставивши, весь ум свой, весь разум свой, имже и веки сотвори, всю свою премудрость внедрил в нас, в спасение наше. Положил еси к нам твердую любовь твою, Господи. Твердая то любовь, для которой Сын Божий, преклонивши небо, снизшел на землю, из Бога есть человек, из богатого нищим, из господина слугою: не приидох, глаголет, да послужат ми, но да послужу им (Мф.20:8); тако возлюби Бог мир! Твердая то любовь, для которой Бог наш, творец наш не стыдится нас братиею нарицати: вы друзи мои есте (Ин.15:14), глаголет. Твердая то любовь, для которой безсмертный пришел умрети: крепка яко смерть любы, твердая то любовь, для которой пришел положити за нас душу свою. Больши сея любви никто же имать, да егда кто положит душу свою за други своя: когда же бы за други своя, и не дивно бы: а то не за други, а за недруги, за главных своих неприятелей, как глаголет Апостол: составляет свою любовь в нас Бог, яко грешником нам сущим Христос за ны умре (Рим.5:8). Да знаем же, что полюбил нас твердо: тако возлюби Бог мир!¹⁶⁶

1) Описуя Апостол Христово от Девы рождество, глаголет: равен Богу себе умали (Фил.11:6–7). Иеронимов перевод читает: себе истощи. Обнищал, расточил, так нас возлюбил Бог, что обнищал, расточа нам все имение пренебесного богатства своего, и, якобы уже не имеющь больше, что дати, дал нам на остаток себе самого: себе истощи. А истощил так: будучи свет неприступный, темностью облекся. Слово Отчее предвечное сущи, Пророками глаголавшее, сделался безгласным. Крепкий и сильный будучи, маломоществовати изволил в младенческом теле. Источник жизни, сам жаждет. Хлеб Ангельский, будучи, алчет. Везде сый и вся исполняяй, не имать где главы подклонити¹⁶⁷. Покланяюся твоему тайному снисхождению, и действом Святого Духа в утробе девической воплощению, рождеству и во яслех скотских положению, ради спасения нашего, человеколюбче Господи!¹⁶⁸

2) Большее явил Владыка наш смирение во обрезании, неже в рождестве своем. В рождестве бо прия на себе образ человека точию, глаголющу Апостолу: в подобии человечестем быв, и образом обретеся якоже человек (Фл.11:7), в обрезании же прия на ся образ грешника, яко грешник претерпевая язву, за грех уставленную. И чесому не бе повинен, за то яко повинный страждаше, аки бы с Давидом глаголющи: яже не восхищах, тогда воздаях (68:5). Коего греха несмь причастен, за той подъемлю обрезания болезнь. Изволи же прияти обрезание, предначиная страдати за нас, и вкушая тую чашу, юже имать до конца испита, глаголя на кресте: совершишася. Изливает капли крове от крайния плоти, Дóндеже от всего телесе та потоками тещи будет. В младенстве терпети начинает и страданию обучается, да егда будет совершен возрастом муж, удобь претерпит лютейшия страсти, от юности бо мужественным подвигом навыкати подобает. Житие человеческое, трудов исполненное, есть аки день, имый свое утро – рождение, кончину же – вечер. Из утра убо, от пелен, человек обоженный Христос исходит на дело свое, на труды, в трудах от юности, и на делание свое до вечера онаго, когда солнце померкнет, и тьма будет по всей земли до часа девятого¹⁶⁹.

3) Покланяюся и славлю плотское твое обрезание, смиренное от раба крещение … Вся труды твоя на земли нас ради подъятые, в них же был еси от юности, постяся и подвизаяся, ходя и труждаяся, уча и проповедуя, исцеляя и воскрешая. Покланяюсь тайной твоей вечери, Сыне Божий, на ней же самого себе дал еси во снедь верным, да тела и крове твоея причащающися имам тя живота вечного. Величаю же и смирение твое глубокое, во умовении ног учеником явленное¹⁷⁰.

1) Покланяюся коленопоклонению твоему в вертограде, идеже моляся, пот кровный излиял еси, да мимо идет от тебе чаша страстей¹⁷¹. Две страсти во Христе Спасителе сражаяся, кровавый пот из Него выжали: боязнь и любовь. Боязнь пронзает сердце тревогами, тенснотами и принуждает Его просить у Отца о отдалении чаши, которую Ему явившийся Ангел показует: Отче, да мимо идет чаша сия от Мене (Мф.26:39). Любовь в сердце производит желание, велит руку немедленно простерть к чаше, волю отеческую исполнить. Аще же воля твоя, да пию. Так в Нем воюя две сии страсти, облили Его кровию, и Он потел кровию (Мф.26:42). Вторый это Адам, в поте лица своего яст хлеб. Быша слезы моя мне хлеб день и нощь (Быт. 3:19, Псал. 41:4)¹⁷².

2) Покланяюся тебе, Господи Боже мой, воспоминая вольная твоя страдания, лестное от Иуды лобзание, неповинное от беззаконных ятие, связание и безчисленныя поругания, ударения, оплевания, заушения, досады, биения, терзания, уничижения, и вся твоя, мене ради окаянного и неблагодарного, претерпенная мучения, и нещадная крове излияния¹⁷³. Но не так тая рана и заушение оскорбляет Владыку, как Петрово слово: не знаю человека (Мф.26:72). Петре святый! Как ты забыл своего благодетеля, на которого пристально смотря утешался, которого лице на Фаворе яснейшее солнца видел? Как сказуешь: не знаю человека, которого не давно пред тем и Бога быти исповедал? (Мф.16:16)¹⁷⁴.

3) Обезчещенного, осмеянного, оплеванного, умученного, едва живого Господа нашего, как скоро день настал, с великою народа молвою проводят, волочат от двора до двора, из улицы в улицу, чрез рынки, чрез гостиницы, на большое позорище, посмеяние и на ругание, не помня увещания Сирахова: не ругайся человеку в горести души его. Ибо око, ругающееся отцу да исторгнут е вранове и зверие, и да снедят е птенцы орли (Сир.7:11, Прит. 30:17). Потом, умученного по повелению Пилатову и прошению Жидов в претор выпроваживаю, где бы над Ним мучительския свои оказать свирепости. Обнажают тело того, который одевает небо облаки. Так обнаженного к столпу привязуют, который в столпе облачном к людем глаголал, стоит у столпа, столпом огненным и облачным наставляющий Израиля. – Течет кровь ручьями из источника жизни, отпадает тело кусками от святых Его костей, летят по всему претору брызги святыя Его крови, падает на землю под столпом, не могши от ран стояти, Апостоли оставили, Ангели отступили, Бог Отец на смерть выдал. – Не удовольствовались безчеловечные сим Его крови пролитием, не удовольствовались тяжкими Его сими муками: далее простирают свою злобу, жесточайшее мучительство над Ним оказуют, ибо по лютом оном биении, другое вымышляют мучение. Острый терновый венец на главу вбивают. Сплетение венец от торния возложиша Ему на главу¹⁷⁵.

4) Осужденного, на смерть определенного, придавивши крестом, за град выводят. Изыде нося крест свой (Ин.19:17). Под крестом падает на дороге, крепкий во бранех, сотворивый державу мышцею своею. – Распяша Его (Лк. 24:20). Нагий вступает на крест, как нас естество нагих в мир производит: сказует с Иовом: наг изыдох из чрева метере моея, наг и отхожду (Иов. 1:21). В той кровавой работе измучившися, Христос Господь сказует: жажду! (Ин.19:28). И желчи вкушаешь, сладость церковная! Чтоб мы поток сладости пили в царствии небесном. Тем горьким напитком переподчивается с прелюбезнейшею своею Материю, стоящею под крестом, когда чашею горькою страстей своих горести ту наполняет. И преклонь главу, предаде дух (Ин.19:30). Дал Бог Отец все в руце Сыну, теперь Сын дух свой Отцу предает в руки. А с Ним и небо замыкает свои светлые очи: солнце во тьму преложися, луна в кровь (Деян.2:20) претворися. Когда Солнце правды заходит, день совсем померкает. Мир весь хотел разрушиться, видя неправду, учиненную Создателю своему. Весь мир сетует, когда Владыка всего мира умирает. Плачет невеста Христова – Церковь. Одежды на раздравши: завеса церковная раздрася на двое¹⁷⁶.

Приемши на ся Господь наш естество человеческое, и хотя плотию доити славы своея, юже име у Отца прежде мир не бысть (Ин.17:5), пройде чины всех святых, и нигде же восприял славу ону, токмо в мученическом чину, в оньже яко входити начат, абие возва, глаголя: нань прославися Сын человеческий (Ин.13:31). Совершив на кресте страдание, рече, по воскресении явившися Луце и Клеопе: не сия ли подобаше пострадати Христу и нити в славу свою? (Лк. 24:26). Христос, копием на кресте прободенный, мученичеством своим аки копием досяже высокия своея первобытныя у Отца своего славы¹⁷⁷.

1) Христос сходил во ад, разрешити область сатаны и избавити души плененныя Адама и прочих, явити Божества своего силу.

2) Се православныя святыя старыя веры о Христовом во ад сошествии исповедание, яко Христос Господь наш плотию лежаше во гробе, а душею своею пресвятою, с силою Божества своего, во ад сниде, еже возвести оттуду святых праотец души. И святый Иоанн Дамаскин о том глаголет сице: нисходит во ад душа (Христова) обоженная, да якоже сущим на земли правды возсия солнце: тако и под землею во тьме и сени седящим присияет свет¹⁷⁸.

3) По преступлении Адамовом затворен бе роду человеческому рай, и никто же можаше даже до пяти тысящей и более пяти сот отверзти его. Вси аще и святии угодники Божии, по скончании сея временныя жизни идяху не в рай, но во ад. Кто же потом отверзе райскую дверь? Христос, новый Адам. Коим ключем? Крестом: той бо есть ключ замка райского, глагодющу Златоусту святому: крест ключ есть рая, крест Христов отверзе рай¹⁷⁹.

Верую, что Спаситель наш Господь Иисус Христос с тоюж плотию, юже прият во утробе Девы Богоматери, и ею же страдал и умирал, от всемогущия силы Божественныя, воскресе в третий день, яко же пророчества предсазоваху¹⁸⁰. Во время вольного страдания Господня видехом Христа Спасителя безславна, безчестна, и глаголаше о нем Исаия: видехом его, и не имяше видения, ни доброты, но видение его безчетно, умалено паче сынов человеческих (Ис.53:2). По воскресении же Его, видим со святым Иоанном Богословом славу Его, славу яко единородного от Отца, исполнь благодати и истины (Ин.1:14). В то время венчан бысть Господь наш Иисус Христос на поругание тернием, а теперь на славу приемлет на пречистую свою главу цветы, рожы неувядаемые хвалы. В то время с беззаконными вменися, а ныне Бог посреде людей своих, честною Его кровию искупленных, и от ада свобожденных, Господь в сонме святых своих явися, глаголя: Аз есмь с вами. В то время мнози мимоходящии ругахуся Ему, а ныне о имени Его пресвятом кланяется всякое колено небесных, и земных, и преисподних. В то время биен бысть по плещема, по ланитома, и убиен бысть на смерть: повесивше на древе, убиша. А ныне Он убил смерть и диавола: где ти, смерте ныне жало? Где ти, аде победа? В то время Животодавец наш бяше мертв, а ныне жив Господь, и благословен Бог. В то время в полудне на несеси солнце померче, а ныне из гроба красное правды нам возсия Солнце, и видим со Апостолом Иисуса, за приятие смерти, славою и честию венчанна¹⁸¹.

1) Верую, что Спаситель наш Господь Иисус Христос силою Божества своего, по четыредесятодневном со ученики своими пребытии, вознесеся на небо с плотию своею¹⁸², вознесеся не Божеством, а человечеством, понеже оно по воскресении бысть обоженное, прославленное и светловидное, Богоподбым светом сияющее¹⁸³. Вижу Господа моего светла, радостна, в веселии ко Отцу грядуща, и вся горния Силы ликующия неизреченно, еще же и Церковь слышу всех земных населенников к веселию возбуждающую и глаголющую: вси язы́цы восплещише руками, яко взыде Христос, идеже бе первее¹⁸⁴.

2) Дóндеже мысленное Солнце наше – Христос аки в западе на земли в неявлении себе человеком пребываше, и самостраданием вольным потемняшеся, дотоле бысть по всей земли тьма незнания Бога, а яко от запада гробного возсиявший на небо взыде, абие осветиша молния Его вселенную, абие от восток солнца до запад славно сотворися имя Его, абие познанием Бога вселенная просветися¹⁸⁵.

1) Чесо ради седе одесную Отца? Яко за самопроизвольное смирение, за страдание и смерть не токмо сидение одесную Отца прият, но и Судия есть живым и мертвым¹⁸⁶.

2) Не видим Спасителя нашего, на небеси прославленною протию, на престоле Божественном в неприступной славе седяще, Отцу же своему и Святому Духу сцарствующа, а веруем несумненно тако быти¹⁸⁷. Речением Бога Отца к Сыну: седи одесную мене, изъявляет Псаломник равночестна и единосущна Сына по Божеству Отцу и Святому Духу, символ же исповедует по человечеству получивша большую у Бога честь паче всякого создания¹⁸⁸.

Хотя Бог, яко всеведущий, и знал, что Адам согрешит, однако для того сотворил его, что не хотел, дабы грех человеческий победил Его благость и человеколюбие и было б препятствие его воли. А к томуж прежде, нежели быти солнцу, определил Бог Отец Сына своего послать в мир, чтоб кровию своею тот грех очистил и его примирил к себе¹⁸⁹. Имя спасительное – Иисус, прежде всех век, в троическом совете, бе предуготовано, написано и даже доселе (до воплощения Бога Слова) хранимо на наше избавление, ныне же аки безценный бисер во искупление рода человеческого от сокровищ пренебесных принесено, и Иосифом во откровение всем подано, безвестная же и тайная премудрости Божия в имени том явлена¹⁹⁰.

Иисус значит Спаса, а Христос – Помазанника. Ибо в Ветхом Завете Иереи, Цари и Пророцы помазывались на иерейство, царство и пророчество, и того ради назывались христами. Христос по воплощении на себе имел три должности: ибо был он Иерей, Царь, Пророк. Почему в Священном Писании Ему приличествует иное яко Иерею, иное яко Царю, иное ж яко и Пророку¹⁹¹.

Господь Бог наш от начала мира сеял слово свое в сердцах человеческих: А) первее праотцами и Пророками, иже слово Божие проповедаху; Б) таже сам собою воплотившися от пречистыя Девы Марии, и на земли явившися, и с человеки поживши, прохождаше во грады и веси, уча и благовествуя царствие Божие, таже посла Апостолы своя во вселенную сеяти семена Божия слова; В) по Апостолах учители церковные на то учинил, и дойде даже доныне та должность до архиереове и иереов, еже та духовная семена, Божие слово сеяти в сердцах наших…; Г) долготерпеливый Господь оставляет та (плевелы) расти до жатвы, во время же жатвы повелит жателем, глаголя: соберите первее плевелы и свяжите их в снопы, яко сожещи я: и тако плевелы сожжет огнем неугасающим¹⁹².

1) В том токмо (Бог) утеши я (наших праотцев) попремногу, яко откры им тогда имевшее на кончине века быти искупление человеческого их рода воплощением Христовым. Глаголя бо Господь о жене к змию, яко семя ея сотреть главу его, провозвести Адаму и Еве, яко от семени их имать родитися Пречистая Дева, клятвы их потребительница, а от Девы родится Христос, иже своею кровию искупить я, и весь род человеческий от работы вражия и от адовых уз изведет, паки рая и небесных селений сподобить, диавольскую же попереть и сотреть главу в конец¹⁹³. По исполнении шести сот от создания мира лет, егда праотец Адам острейшим покаянием благоугодил Богови, бысть ему (по свидетельству Георгия Кедрина) Божиим изволением, от Архангела Уриила, иже есть Князь и хранитель человеков кающихся, и ходатай о них к Богу, откровение известнейшее о воплощении Божии от Пречистыя, безмужныя, приснодевствующия Девицы. Аще же о воплощении, убо и о прочих спасения нашего таинствах открыся ему, сиесть, о вольном страдании и смерти Христовой, о сошествии во ад и свобождении от ада праведных, и о тридневном Его от гроба возстании, и о инех Божиих тайнах, и о мнозех имевших потом быти вещех, яко о развращении сынов Божиих Сифова племени, и о потопе, и о будущем суде, и о общем всех воскресении. И наполнися Адам великого пророческого дара, и прорицаше будущая, грешников к покаянию возставляя, праведных же надеждою спасения обвеселяя¹⁹⁴.

2) Яко от Девы (Сын Божий) родитися име, прорече Божественный Пророк Исаия, глаголя: се Дева во чреве зачнет и родит сына, наречеши имя ему Еммануил: имя же то знаменует Божие к человеком пришествие, и в Еллинском переводе Еммануил сказуется: с нами Бог, Бога убо имевша от Девы родитися той Пророк прежде многого времени предвозвести… А яко с человеки Бог име пожити, слыши о том Варуха пророчествующа: сей Бог наш, не вменися ин к нему. Изобрете всяк путь хитрости, и даде ю Иакову отроку своему, и Израилю возлюбленному от него: посем же на земли явися и с человеки поживе. И яко от диавола име искушаемый быти, пророче Захария: и показа ми Господь Иисуса Иерея великого, стояща пред лицем Ангела Господня, и диавол стояше одесную Его, еже противитися Ему: и рече Господь к диаволу: да запретит Господь тебе, диаволе! (Зах.3:1–2). О ятии же Его проречено бе в книзе Соломоновой: рекоша в себе промышляющии неправо: уловим же (лестию) праведнаго, яко непотребен нам есть и противится делом нашим (Прем.2:1,12). А яко име продан быти от своего ученика, провозвести Псамломник: ядый хлебы моя, возвеличи на мя запинание (Пс.40:10). И о свидетелях неправедных преднаписа: восташа на Мя свидетелей неправеднии (Пс.26:12). О распятии же Его рече: ископаша руце Мои, и нозе Мои: исчетоша вся кости Моя (Пс.21:17–19). Той же Пророк и о разделении Христовых риз предглагола: разделиша ризы Моя себе, и о одежи Моей меташа жребий (Пс.68:22). Той же и о напоении оцтом с желчию прорече: даша в снедь Мою желчь, и в жажду мою напоиша Мя оцта (Пс.87:7). И паки о погребении Его провозвести: положиша Мя в рове преисподнем. И Иаков праотец, тожде провидя духом, рече: возлег уснул еси яко лев, и яко лев, и яко скимен¹⁹⁵.

1) Авель неповинне по зависти от брата убиенный прообразованием бяше страдания Христа Господа нашего, имевша от Иудей неповинне убиенна быти по зависти их. Свидетельствуется же от святых Отцев и сие, яко святый Авель прежде познания супружества умре в девстве непорочном. И глаголет Августин о нем сице: первый по преступлении Адамовом Спасителя нашего носил есть образ Авель, иже девственник и священник и мученик бысть. Девственник: понеже прежде супружества умре, священник, яко приношаше Богови благоугодныя жертвы, мученик же, яко истинного ради Богопочитания убиен бысть¹⁹⁶.

2) Исаак блаженный носяй дрова раменьми своими, и на жертву возносимый, бяше прообразованием Христа Спасителя нашего, имевшего понести крест свой, на немже хотяше жертвою Богу Отцу о гресех всего мира быти. И сие то есть, еже Господь по Евангелии ко Иудеем рече: Авраам отец ваш рад бы был, дабы видел день Мой, и виде, и возрадовася (Ин.8), – виде день страдания Христова в той час, в оньже овча вместо Исаака заклана в жертву¹⁹⁷.

3) Сынов Израильских, Моисеом из Египта изведенных изшествием прознаменовашеся имевшее не скоро быти наше изшествие от работы прародительного греха, еже Христом Господем нашим содеяся. Морем Чермным прообразовашеся святое крещение. Манна образ бе тела Христова в евхаристии святой. Водою же, от камене изведенною, прознаменовашеся кровь Христова, а камень бе образованием самого Христа, якоже глаголет Апостол: пияжу бо от духовнаго последующаго камене, камень же бе Христос (1Кор. 10:4).

1) Не отчаявающе милости Божия прапродители наши Адам и Ева, но уповающе на человеколюбное того благоутробие, начаста в покаянии своем изобретати виды служения Богу, еже кланятися к востоку, идеже насажден бысть рай, и молитися Создателю своему, и приносити Богови, ово от стад своих: се же смотрение Божиих, в прообразование Сына Божия, имевшего закланна быти аки агнца, за избавление человеческого рода: ово же от жит сельных, в предзнаменование сего в новой благодати таинства, яко Сын Божий под видом хлеба имеяше приноситися в благоприятную Богу Отцу своему жертву, за оставление грехов человеческих. То творяще, участа и чада своя Богопочитанию, и жертв приношению, имже и о райских благих плачуще сказоваста и возбудаста их к желанию обещанного от Бога им спасения, и на Богоугодное житие наставляста¹⁹⁸.

2) Жертва Авраамова (из овна, юницы, козы, горлицы и голубя) толкованием духовным образоваше самого Христа Господа нашего, иже име быти о гресех всего мира Богу Отцу жертва и примирение. Овен образова агнче незлобие во Христе, коза образованием бе плоти Христовы, крешником подобныя, якоже глаголет Апостол: Бог Сына своего посла в подобии плоти греха. Юница бе образованием страдания Христова, горлица-чистоты, голубь же – кротости Христовы образы Быша¹⁹⁹.

3) Дивная то церемония (принесение юницы на жертву за грехи людские), но понеже вся ветхозаветная бяху сению и прообразованием новоблагодатных, ищу убо, что прознаменоваше юнец оный, и кедр, и вода, и пепел? Святый Апостол Павел сказует то быти прознаменование самого Христа, Спасителя нашего, иже бысть жертва Богу и Отцу о очищении грехов всего мира, заклан быв, и излияв за ны кровь и воду. Сице Апостол глаголет: аще кровь козлия и тельчая, и пепел юнчий оскверненныя освящает к плотстей чистоте: кольми паче кровь Христова очистит совесть нашу от мертвых дел (Евр.9:13–14). Се убо ясное толкование само показуется: юнец – Христос, дрова кедровы – крест, вне полчища телец сожигашеся – вне Иерусалима Христос пострада, глаголющу Апостолу: темже Иисус, да освятить люди своею кровию, вне врат пострадати изволи. Заклан, быв гвоздми и копием, источи от пречистых своих ребр кровь и воду: тою кровию и водою очищаются и освящаются людие. Что же пепел преобразова? Смерть и воскресение Христово и наше. Положен был Христос во гроб, яко мертв, в персть земную вменен: но Он, аки феникс птица от пепла, ожив воскресе от гроба. Сице и мы, в персть земную обращающиися, по смерти паки от персти тоя отживем и востанем.

1) Яже подобаху ветхозаконным в храме свидения обрядам и церемониям, и яже подобаху управлениям плотяным, та хранити не токмо несмы одолжены, но и весьма от них свобождены. Вся бо, яже бяху ветхозаконных плотских оправлений, сиест, обрадов, церемоний, та бязу прообразования и сени Христова плотского пришествия и священства Его, и жертвы, и сущих ныне в новой благодати церковных таинств. Пришедшу же Христу, и вся прообразованная и сеновная совершившу самым дело, упразднишася прообразования и сени: прорастающу бо плоду, отпадает цвет, и возсиявшу солнцу, померцают звезды, и благодати новой наставшей, преста законная. Аще бо и ныне бы темже ветхозаконным обрядам и церемониям быти, убо лживи бы были, яже о Христе прообразования и сени, ибо и еще прознаменовали бы имущего приити во плоти Христа, иже убо прииде, того ради оная весьма от нас отсекошася, и мы от тех свободни сотворени есьмы²⁰⁰.

2) Аще в ветхозаконных церквах живяше Бог благодатию своею, в нихже токмо семени и образования и прописания новоблагодатных бяху: кольми паче живет в самых новоблагодатных, в нихже тело и кровь Христова священнодействуется, вся таинства Христианская совершаются, Дух Святый на совершаемые тайны сходит²⁰¹.

3)Первому в Ветхом Завете Архиерею Аарону Господь Бог веля устроити святительскую ризу, повеле на омете ризном быти звонцам златым, да, егда служить, слышится глас его, входящу тому в священие пред Господем, и исходящу, да не умреть… Вемы, яко ветхозаконная бяху прообразованием новоблагодатных, и священство оное нашего священства образ бяше: звонцы же звонящии, по сказанию святого Григория Двоеслова, знаменоваху глас учения святительского, яко подобает Архиерею (такоже и иерею) не нему быти, и уже не звонцы, но усты и языком гласовати, учаще и вразумляюще люди Божия²⁰².

1) В Ветхом Завете виноградом нарицашеся народ Израильский, из Египта изведенный, о немже Псаломник глаголет: виноград из Египта пренесл еси (Пс.79:9), и Исаия глаголет: виноград Господа Саваофа дом Израилев есть (Ис.5:7). Того винограда оплот –закон от Бога Моисеови на Синаи данный, точило – алтарь жертв ветхозаконных, кровь животных точащий, столп – церковь Соломонова, делатели – законоучители, книжницы и князи, архисинагогисты, рабы избиении – Пророцы, наследник, вон изведенный и убиенный, Мессия Христос²⁰³.

2) Сан архиерейский в Божественном Писании уподоблен есть небесным светилам, глаголющу Сираху о ветхозаконном Архиереи Симоне: яко звезда утренняя посреде облака, аки луна полна во дни своя, и яко солнце сияя на церковь… (Сир.8:6–7). Светила горняя суть аки очи небу, на всех призирающия, на благия и злыя равне сияющия: и Архиереи суть яко очеса церковная, бодренно и неусыпно на вверенное им смотрящия стадо, и всех нужду и немощи зрящия, и о всех спасении пекущияся равно, якоже о благих, сице и о злых²⁰⁴.

В Писании Пророческом, в немже сказуется: устнам иереовым хранити разум, и закону Божию взыскиватися от уст его (Мал.2:7), абие пишется сие: яко Ангел Господа Вседержителя есть: да текут, рече, учений реки от уст иереовых, яко той Ангел есть Божий²⁰⁵.

1) Бе (Господь наш Иисус Христос) Пророк, предсказуя будущая о разорении Иерусалима, о дни страшного суда. Бе Апостол, от Бога бо Отца послан бывши, хождаше проповедуя всюду. Бе Учитель, и вси во сладость его послушаху²⁰⁶.

2) Христос Спаситель наш, егда беседоваше к людем книжным, ко учителем жидовским мудрым, простираше к ним словеса Божественныя премудрости исполненная, приводя свидетельства от книг Пророческих. Егда же ко простому народу простираше слово, простыми притчами изъясняше им свою о небесном царствии проповедь, сказуя: яко подобно есть царство небесное человеку домовиту, и человеку, сеявшему доброе семя на селе своем, и человеку купцу, и зерну горушичну и квасу, егоже взеши жена сокры в мучных сатех трех, Дóндеже вскисоша вся²⁰⁷ (Мф.13).

3) Глаголы изъявляют вся словеса проповеди и учений Христовых, яже Он пречистыми своими усты к возследствующим Ему и послушающим того изрече, и яже ныне Евангельским чтением нам проповедуются в душевную нашу пользу… Глаголы (сии) и словеса Христова, от Божественныя Его премудрости в поучение к народу и учеником Его изреченная, не вся всем уразумительна суть, понеже различный разум имею: ова суть ясная, ова прикровенная, ова притчи и уподобления, ова заповеди, ова советы, ова обетования и утешения, ова обличения и прещения, ова пророчества, и другая многая о различных вещех словеса Его пресвятая²⁰⁸.

1) Слышу некиих глаголющих: Христос Господь некнижных Апостолов собра, простых, неученых, не от книг призва их к себе, но от рыбарския сети, а весь мир теми просветил и научил. На то ответствую сице: некнижных собра, но книжных посла, простых и невежев к себе призва, но умудренных Богословцев в концы земныя разосла, отверзсши им ум разумети писания, (Лк.24:45), собра якоже учитель учеников, и вящше триех лет водил их с собою, уча и вразумляя, и не отпустил их от себе на проповедь дотоль, донележе добре вразумил я, и Писание знати даде им, егда же просвети их ум к разумению Писания, и Духа Святаго наполнил их, и странными языки глаголати научил: тогда посла я во вселенную проповедати Божие слово²⁰⁹.

2) По Господнем вознесении Апостоли святии, возвратившеся от горы Елеонския во Иерусалим, взыдоша на горницу, и бязу терпяще единодушно в молитве и молении, с женами, и Мариею, Материю Иисусовою, и с братиею Его (Деян.1:13–14), в коей горнице и Дух Святый на святые Апостолы во огненных языцех сниде (Деян.2), – и единою проповедию святого Апостола Петра, три тысящи душ во Христа вероваша и крестишася, и бяху терпяще во учении Апостол, и во общении проломлении хлеба (тело Христово разумей) и в молитвах… (Деян.11:41–42). Посем разшедшеся святии Апостолы по вселенней всюду, идеже кий град и страну верою святою просветиша, Божия устрояху храмы, и епископов поставляху, верным же на молитву в Божия храмы собратися веляху²¹⁰.

1) Авраам два сына име: единого от рабы, а другого от свободной (Гал.4:22), то убо по письменному сказанию самым бе делом: аллегорически же, еже есть иносказательно, знаменует Бога, имущего два сына, сиесть, два народа, и два завета от Него данные: Иудейский, от рода Авраамля, и Христианский, от языков, Иудейский бе в работе закона Моисеова, Христианский есть в свободе благодати Христовы. Иудейский закон бе плотян, Христианский – духовен²¹¹.

2) А яже Христос Господь рече словеса: не приидох разорити закона, но исполнити, то толкуются сице: исполнил Христос закон обрядов ветхозканных: обрезася, в церковь Господню по закону принесеся, пасху законную яде, и прочие обряды Еврейские совершив отстави я, яко сень бывшую тех, яже имеяху быти в новой благодати, оставив же ветхозаконная, уставил новоблагодатная: и тако прейде сень законная, благодати пришедшей²¹².

3) Иаковле, в борьбе со Ангелом от пресечения жилы, хромание знамением бяше пресечения ветхого закона: наставшей бо новой благодати, аще и соблюдается закон, Моисеови от Бога на Синаи данный, его же и Христос хранити повеле, к юноши некоему глаголя: аще хощеши внити в живот, соблюди заповеди (Мф.19), обаче прочия вся ветхозаконныя уставы, церемонии, действа, обычаи отсечены суть от новыя благодати, и сотворися ветхий закон яко храмлющь²¹³.

1) Верую, что Спаситель наш Господь Иисус Христос самопроизвольную страсть, мучение и распятие, от неизглаголанной любви к созданию своему – человеку, истинно претерпел, а не мечтательно, ниже Божеством, но токмо человечеством распялся и погребеся²¹⁴.

2) Христос Сын Божий за наше беззаконие, коим мы огорчили и обезчестили безконечного и крайне благого Бога, по воле своей на кресте пострадал истинно, не Божеством, но плотию, и как умер, так и кровь свою излил за всех истинно ж, без всякого греха… Смерть Христова была отлична пред другими ради тяжести наших грехов, и ради совершения на кресте, яко на жертвеннике, священства, чрез приношение себе самого Богу Отцу за род наш в жертву, и ради исполнения ходатайства и примирения между Богом и человеком²¹⁵.

3) Наших зол ложе возложило Его на болезненное ложе крестное. Мы то все ложе Его обратили в болезнь Его, мы то зачали болезнь, рождая беззаконие. Наши смердящие греховные раны болезненные Христу Спасителю нашему соделали раны. Сказует св. Амвросий: страждешь, Господи, и мучишься не твоими, но моими ранами, болезнуешь не твоею смертию, но моею немощию. В лице каждого грешника жаловался Давид: болезни адовы обыдоша мя, предвариша мя сети смертныя (Пс.14:3). Изъятой адовой болезни и сетей смертных избавляя нас Христос Спаситель, сам впал в болезни и сети²¹⁶. Сказал Иов: видех орющих злобоюЮ сеющии же я, печалию пожнут (Иов.4:8). Как же Ты, Господи, пожинаешь печали, когда не орал злобою? Кроток, незлобив!.. И почему истинно есть сие слово, что ин есть сеяй, а ин жняй? (Ин.4:37). Мы насеяли грех, а ты жнешь болезни²¹⁷. Раб ведый волю господина своего, и не сотворивый ю, биен будет много, не ведый же и сотворивый ран достойная, биен будет мало (Лк.12:47–48), Ты, Христе Спасителю, сказал. Творил Ты волю Его во всем, был Ему во всем послушен: смирил себе, послушлив быв даже до смерти (Филип.3:8). Не сотворил ран достойная: однако терпишь несносныя и неисчетныя раны. Что сие такое? Терпишь Ты раны, чтоб наши греховныя исцелели раны, чтоб наши греховныя исцелели раны, все сие сносишь за грехи наша, язвен еси за грехи наша. Мы то, Христе, тех безчисленных ран есмы достойны, которыя ты терпеливо теперь сносишь! Мы грешили, а Ты за грехи несешь наказание! О любве твоея, человеколюбче!²¹⁸

4) Христос Спаситель на кресте горькую чашу, оцет с желчию, и самую испил смерть. За чие здравие? За здравие врагов своих, глаголю, грешников: грешником нам сущим, Христос за ны умре (Рим.5:8). А како испил? Терпеливо, извествующу Петру святому: укаряемый, противу не укаряше, стражда, не прещаше: и не токмо противу не укаряше, но и моляшеся о убивающих Его: Отче, отпусти им (1Пет.2:23). О незлобие незловиваго Агнца Божия!²¹⁹

Болезновал некогда сердцем Создатель, смотря на злости человеческия: видев же Бог, яко умножишася злобы человеков на земли, и всяк помышляст в сердце своем прилежно на злая во вся дни, и размысли Бог, яко сотвори человек на земли (Быт.6:5–6). Стеснился Бог болезнию сердечною внутрь. Ежели только смотря на злости наши, стеснился болезнию сердечною: какую же теперь болезнь в себе ощущает, когда не смотрит только на злости, но и взял их на себя, – все грехи, все беззакония, все злости целого света восприял на себя, вземляй грехи мира (Ин.1:29)²²⁰. Несет престол свой Архиерей, чтоб с него руками простертыми благословить все части света. Выходит, Исав на поле, взявши лук и стрелы, чтоб уловить лов Отцу своему (Быт. 49:3). Выходит Христос Спаситель, взявши крест, яко лук, чтоб уловить лов, чтоб всех нас привлещи к себе. Егда вознесен буду, вся привлеку к себе (Ин.12:32)²²¹.

Жалуется Он у Псаломника: изчезе в болезни живот мой (Пс.30, 11). Всеми уды болезнует: главою для того, что беззакония наша превзыдоша главу нашу, болезнует очами для того, что очи наши возложихом уклонити на землю, болезнует устнами и языком для того, что уста наша умножиша злобу, и язык наш сплетает льщения, болезнует руками для того, что руки наши осмелились сорвать заповеданное яблоко, болезнует сердцем для того, что от сердца нашего исходят помышления злая, болезнует утробою для того, что клятва вниде, яко вода, во утробу нашу, болезнует ногами для того, что ноги наши от пути правого заблудили, весь болезнует для того, что всяк из нас безчисленными содержится страстями и на ложе зол низлежит²²².

1) Сотворил есть Царь небесный людем своим град великий по вселенней, Святую, Соборную и Апостольскую Церковь, да вси от проклятого демона наветуемии в той град прибегают, и от его мучительства свобождаются… Утвердивый Господь вселенную, яже не подвижится, утвердил есть в ней и град Церкви, ему же и врата адова, еже есть вся сила демонская, и воинство его, погане и еретицы одолети не могут. Ибо премудрейший небесных кругов Архитектон основа ю не на песце слабом, его же и водное течение размывати может, и буря ветреняя здания на нем пставляемыя разорити сильна есть, но на твердом камени, на истинном оном исповедании Петром: ты еси Христос, Сын Бога живаго (Мф.16, 16), еже исповедание сам Христос Господь камень нарицает, глаголя: ты сеи Петр, и на сем камени созижду церковь мою, и врата адова не одолеют ей (ст. 18). Камень есть то исповедание, яко о камни твердом изречеся о самом Христе Господе, иже есть камень, по свидетельству святого Апостола Павла глаголюща: камень же бе Христос (1Кор.10:4), твердо убо основание града Церкве²²³

2) Кто назда церковь и утверди, и на ком утверди? Христос на себе самом утвердил Церковь, и наздал, и стяжал кровию своею²²⁴.

1) Прободенна живоносная ребра тому, иже от ребра созда помощницу протцу нашему Адаму, зиждет той ныне себе от ребра своего Жених небесный возлюбленную Невесту, нам же любезную Матерь – Церковь свою святую, кровию Его искупленную, да породить многая чада водою и духом²²⁵.

2) Церковь, яко сень свидения: в ту бо притекаяй крещением святым, покаянием истинным и прочими тайнами Божественными, спасение получает от вины греха, и от долга вечныя смерти по всяцем преступлении²²⁶.

1) Аще отъятся благодать Божия от Церкве святыя, то, где неложная словеса Христа Бога нашего, пречистыми усты Его реченная: аз есмь с вами во вся дни до скончания века?.. Ложна ли словеса Христова, или ни? Воистину неложная. Верен Господь во всех словесах своих (Пс.54:13). Небо и земля преидут, а словеса Господня не мимо идут (Мф.26:35), не солгутся. Убо не отъятся благодать Господня от Церкве, ей же Христос присутствует до скончания века: идеже бо Христос, тамо и благодать Его²²⁷.

2) Не видим телесне Христа Господа, верою же несумненно зрим Его всюду, и на небеси седяща Отцу, и на земли в Церкви своей святей обитающа, по Давиду: Господь в Церкви святей своей (Пс.10:10), и посреде всех своих верных рабов жительствующа: Бог посреде людей своих, и комуждо особь присутствующа: предзрех, рече, Господа предо мною выну, яко одесную мене есть (Пс.15:8)²²⁸.

3) Господь в Церкве святей своей, в Церкве святей, Апостольской, правоверной, от конец до конец вселенныя сущей, аще же и озлобляемой и утесняемой, терзаемой, обаче не преодолеваемой, еяже и адовы врата не одолеют, – в ней есть Господь, и удаляющимся от нея несть спасения²²⁹.

1) Постави некогда Бог Херувима близ рая с пламенным оружием хранити путь древа жизни. Раем нарицается и Церковь матерь наша: читаем бо в книзе Бытия: яко насади Бог рай на востоце (Быт.1:8). Тако и Церковь святая истинная есть восточная, юже хранить Дух Святый тако, якоже глаголет Псаломник: не воздремлет, ниже уснет храняй Израиля (Пс.120:4).

2) От Него суть все даря, сияющии в Церкви, или во Пророцех, или во Апотолех, или в мученицех, или в инех киих – либо удех обретаемии. Он есть Дух премудрости в Соломоне, Дух ведения в Веселеиле, Дух совета в Моисеи и в судиях седмидесятих, Дух крепости во Иисусе Навине, в Гедеоне и Сампсоне, Дух благочестия в Товии, Дух разума в Данииле, Дух страха Божия в праведном и Богобоязливом Симеоне: всяко от Него вси дары благодати происходят. Чесо рад Дух благий, Дух правый, Дух, владычествующий именуем есть… От сошествия Святаго Духа Церковь святая, матерь наша, процвете яко древо в различная листвия, сиречь, в различные лики праведных, ово в девственники, ово во учители, в мученики, исповедники, в преподобныя и в пустынники, о чесом давно Осия пророчествовал: процветут яко цвет, и прострет корение свое яко дубрава, и будет яко маслина плодовита (Ос.5:6–7)²³⁰.

1) В новой благодати виноград есть Церковь Христова, из Израиля в языки пренесенная: оплотом есть тойже закон Божий, то число – слово Божие, столп – вера твердая, делатели – пастыри, архиереи, иереи, рабы – послушание носящие, овцы словесные, люди благочестивые, наследник и глава Церкви – Христос²³¹.

2) Родися Христос, и бысть за ны Богу Отцу жертва, пострадав на кресте и сотворися Начальник, и Вождь, и Глава Церкви своей святей, юже искупил есть честною своею кровию, и уставил есть жертву безкровную, под видом хлеба – пречистое свое тело, под видом вина – пречистую кровь свою, повелев священно действием то совершати, рек: сие творите в мое воспоминание (1Кор.2:24), и Быша по Нем вожди Церкви святей – Апостоли святии, по Апостолех учители, святители, священницы едини по друзех, и до нас дойде тойже святительского и священнического чина жребий, и по нас до скончании века будет²³².

Соборная Православная Апостольская Церковь (не о стенах и зданиях глаголю, но о множестве правоверных) не токмо в Российском государстве, но и в странах Греческих, и Аравитских, и Сирских, и Египетских, и в Сербских, и в Болгарских, и в Далматии, и в Молдавии, и просто рещи – по вселенней… (сия) Соборная Православная Апостольская Церковь с своими пастырьми и учительми не сокровенно содержится, не под спудом светит, но яве яко на свещнице всей вселенней сияет²³³.

1) Якоже между пшеницею, донележе та на ниве есть не пожата, невозможно не обретатися между ею плевелам: обаче пшеница пшеницею пребывает, ниже оставляема есть от господина своего ради немногих между ею обретшихся плевел, но ждется для жатвы, тогда господин повелит жателем собрати пшеницу в житницу свою, плевелы же воврещи во огнь. Подобне и в святей Церкви, донележе та, аки пшеница на ниве, во удоле семь плачевном пребывает, невозможно между добрыми не обрестися злым. Обаче тех ради не оставляет Христос Господь Церкве своея, и даже до кончины века не оставит, якоже обещал есть, глаголя: аз есмь с вами во вся дни до скончания века (Мф.28:20)²³⁴.

2) Церковь святая есть яко нива пшеницу растящая, посреде же пшеницы и плевелы имущая, обаче обоя имать до жатвы. В Церкви святой, глаголю, суть добрии и злии, суть праведнии и грешнии, суть овцы и козлища: Церковь же яко мати, не токмо добрыя своя чада, но и худыя питает и согревает, добрыя любя, а недобрыя терпя и по них милосердствуя²³⁵.

1) Едина: потому что един Бог, едина вера, едино крещение, едины тайны и заповеди, и едино учение Христово Евангельское и Апостольское.

2) Святая: потому что верует во Святаго святых, и святых святейшия имеет тайны, преданныя от Христа Бога, и кроме Церкви святыни негде взять.

3) Соборная: потому что собрана от всея вселенныя народов, а не от единого народа, как прежде была от жидовского.

4) Апостольская: потому, яко от святых Апостол преданная, и власть Апостольскую, сиречь священство, имущая²³⁶.

1) Аще Церковь ересей ныне исполнена, то, где словеса Христова к святому Петру, Христа Сына Бога живаго быти исповедавшему, реченная: на сем камени созижду церковь мою, и врати адова не одолеют ей? (Мф.16:18)²³⁷… Церковь аки камень высок, посреде моря стояй, и от волн морских выну во дни и в нощи биемый, не повреждается: хульники же, аки волны о камень разбивающиися, без вести бывают: та прославится, а тии постыдятся, та воцарится с главою своею – Христом, а тии с предводителем своим диаволом в бездну геенскую вринутся, та во веки востожествует на небеси, а тии во веки восплачутся и возрыдают в подземных адских заклепах²³⁸.

2) Ковчег Ноев в духовное нам обучение привести можем, аллегорически (иносказательне) того распологающе. Ное образ есть Христа, ковчег образ Церкве Христовы, потоп гонение на Церковь. Не погрузи потоп Ноева ковчега, ни гонение преможет Христову Церковь: врата адова не одолеют ей. В кавчезе чада Ноева купно и безсловесная животная бяху, в Церкве Христовой добрыи Христиане и злыи, праведнии, глаголю, и грешныи купно обретаются. И якоже в корабле Ноевом человеов ради и безсловесная животная от потопа спасени соблюдашася, сице в Церкве святой праведных ради и грешныи соблюдаемы и спасаемы бывают Божиим милосердием. Враны суть еретики, от корабля церковного излетающии, удаляющиися и невозвращающиися, голубица же образ есть Духа Святаго, сучец масличен во устех – благодать и милосердие Господне, конец потопа – последний века сего день²³⁹.

1) Учение не ложное есть то, еже происходит от уст учителя неложного, но истинного. Учитель же неложный есть той, иже не сам собою восхищает на ся сан учительский, но от Церкви Божия благодатию Духа Святаго поставляемый, и на проповедь посылаемый бывает, якоже во дни Апостольския учители посылаемы от Церкве бываху Духом Святым, еже видети есть от Деяний Апостольских, от главы 13… По святых Апостолах, учительское место приемлют архиереи, и иереи и прочии, елицы суть освященного церковного чина. Приемлют же по изволению Духа Святаго, понеже приемлют по правильному избранию и освящению. Таковии учители суть истиннии, неложнии, и таковых учителей учение есть истинное, неложное, яко от Духа Святаго глаголемое²⁴⁰.

2) Христова уста Павлова уста, Павлова уста Златоустого уста, Златоустого же уста и других с ним отец суть поистине уста Христова. Может ли в таковых честных и святых устах какова обрестися ложь?²⁴¹

1) Устне Иереове сохраняют разум и закона взыщу от уст его (Мал.2:7). Аки некое пребогатое сокровище в устах пастыревых должно быть хранимо учительского разума и смысла дарование, да будет премудр ко учению, к наставлению, ко увещанию, ко обличению непокоривых, якоже и Апостол о епископе, еже и о всяком иереи разумети есть, глаголет: да силен будет и утешати во здравом учении, и противляющияся обличати (Тит.1:9), не имый же Духа премудрости и смысла, не сокровиществуяй во устах своих разума нестьдостоин пастырского сана. Сице глаголет Бог во Осиином пророчестве: ты умение отвергл еси, отвергу и аз тебе, еже не жречествовати мне (Ос.4:6). Не хощу, рече, имети тебе в чину священства, понеже не взыскал еси разума, премудрости, учения. Подобне и в Златоустого на послания Павлова беседах пишется: не ведый Писания, и со еретики не могий ратоватися далече будет епископского сана, недостоин быти в чину священных служителей Божиих и попечителей о душах человеческих, недостоин сана пастырского, иже неискусен в Божественном Писании, отвергаяй умение²⁴².

2) Учение неложное есть то, еже происходит от уст учителей искусных в Божественном Писании, и благоразумия учительского исполненных, ведущих Писание Святаго силу, и толковати е право могущих. Подобает бо учителю не токмо быти освященну, от Церкви Духом Святым во учительских сан поставлену, но и премудру, доволен разум имущу, по словеси самого Бога в пророчестве, глаголющего: устне иереове сохраняете разум, и закона взыщу от уст его (Мал.2:7)… Неученому бо простолюдину не токмо иныя о догматех веры право учити невозможно, но ниже самому правым путем шествовати удобно на свой безкнижный простоумный уповающему разум, истинных же учителей презирающему. Оттуду и ереси возрастоша, и раздоры, и расколы, яко невежи дерзнуша о вере испытовати и учити… Лучше ли научить неученый и самозванный учитель, неже ученый, и не сам собою учитель нарекшийся, но от благодати Духа Святаго поставленный?²⁴³

Он (Дух Святый) есть изобретатель Священного Ветхого и Нового Писания, и во святых отцах на Вселенских Соборах действовал²⁴⁴.

1) Научитеся от святого Апостола Павла, в послании к Евреем, в главе 2, в стихе 1, глаголющего сице: есть вера уповаемых извещение, вещей обличение невидимых, которая Апостольская словеса святый Иоанн Дамаскин читает сице: есть вера надеемых ипостась (состав), вещей обличение невидимых. А Златоуст святый глаголет сице: вера убо есть взор безвестных, в тоежде видимым приводит извещение невидимая… Вера есть то, чесого очи твои плотские не видят, ни руце твои осязают, сердце же твое, ум твой несумненно в себе утверждает, яко тако есть, а не инако: то вера²⁴⁵.

2) Познавается Бог верою по Апостолу: верою разумеваем совершитися веком глаголом Божиим: на что пишучи Златоуст святый глаголет: веры дело есть познание. Вера, глаголет, составляет познание Бога, что того всемогущею силою и веки составилися… Истинный способ вера, ибо без веры не можно угодити Богу и спастися. Иже иметь веру и крестится, спасен будет. Верою человек оправдывается (Иак.2:24)²⁴⁶.

3) Мы, внутрь Церкве сущии, Таинства Духом Святым навершаемая содержащии, тела и крове Христовы причащающиися, Церкве святыя яко члены тела, главою – Христом оживляемого, придержащиися, уповаем несумненно имети веру святую, оправдающую ны и спасающую. Несть веры в тех, иже не веруют во Христа Бога, каковы суть Турки, Татаре, Жидове и идолопоклонники, и каковы суть еретики, неправыи Христиане, именем токмо Христовым нарицающиися, самого же Христа чуждающиися, чуждаяйся бо Церкве Христовы, чуждается Христа²⁴⁷. Мати наша Церковь святая восточная православная питает нас сосцами своими – благочестивыми законами и уставами от древних отец приятыми, мы же, оставивше сосца матере нашея, породившия ны водою и духом, ищем сосец Египетских, иноземческих, еретических, православию противных, от тех в сладость питатися навыкаем: манну оставлше, Египетское помышляем брашно, сладость святого воздержания презревше, к свиным рожцам уклоняемся. О стыда велика! дети постыждают мужей, младенцы – старцов²⁴⁸. (Но) всяк противляяйся святей Церкви, Христу противится, гоняй Христову Церковь, Христа гони, хуляй православныя догматы веры и предания церковная, Христа хулит и есть Антихрист уподобительне²⁴⁹.

4) Старая вера Церкви содержится во двою: 1) в догматах православных, святыми Апостолы и Вселенскими Соборами утвежденных, и 2) в преданиях церковных древних, яже святии Апостоли, и святии древнии отцы, предаша содержати верующим православно²⁵⁰.

5) Мы православнии, благодатию Христа Бога нашего наставляеми, вемы, что есть вера, и не новую, но старую благочестивую содержим веру, юже Христос Господь святы Учеником и Апостолом предаде, юже святии Апостоли по веленней проповедаша, еяже велицыи учители церковнии учиша, юже Соборы Вселенскии утвердиша, юже Владимир святы от Грек в Россию принесе, в нейже велицыи светильницы церковнии, и светила миру, святии Российстии отцы и чудотворцы просияша²⁵¹

Вемы от святого Апостола Павла, по чесому в человеце познавается вера? Посему: аще яже верует сердцем, та и усты исповедует: сердцем веруется в правду (глаголет Апостол), усты же исповедуется во спасение (Рим.10:10), а идеже устного исповедания веры несть, тамо и в сердце не быти вере познавается. Вы же (св. отец говорит к раскольникам) не слышите ли в нас исповедания православныя веры? Еда ли глухи есте, еже не слышати вам в нас по всех градех и весех, по всех святых церквах исповедуемую и прославляемую благочестно Святую Троицу – Отца, и Сына, и Святаго Духа, единого Бога?²⁵²

1) Вем, яко от нас кождо речер: знаю Христа Господа моего, и верую в Него. Аз же дерзновенно реку, яко не вси знаем Того, аще и вси веруем в Него: верою знаем, но не любовию, верою же и беси знают Его, по Апостольскому речению: и беси веруют, и трепещут: а понеже любве к Нему не имут, убо суть беси, ниже могут Того знати истинно, чужды суть любве Его. Той истинно знает Пастыря своего – Христа, иже поистине Его любит, емуже любовь Божественная усладися в сердцы, егоже все желание и попечение не о ином чесом есть, токмо да имать в себе любимого Господа своего²⁵³.

2) Любовь воистину правильный есть способ (познания Бога): любы николиже отпадает, глаголет Апостол. Вера знает Бога, что есть на небе Бог, и вся земля Им наполнена: везде сый и вся исполняяй. Так и бесы веруют, знают над собою Бога, казнящего их вечно казнию. А любовь не только знает Бога, что есть Бог, но и то добре знает, яков есть Бог²⁵⁴.

α) Общее понятие о Таинствах

1) Таинств, на спасение наше устроенных, седмь: крещение, миропомазание, евхаристия, священство, покаяние, брак, маслосвятие. Оныя тайны устроены или установлены от Христа Господа излиянием Его предражашия крове.

2) Тайна есть служение, еже под видом некиим зримым приносит в душу верную благодать Божию незримую. Христос установи тайны: 1) да будет знамение истинных сынов Божиих, сиречь, Церкве православныя; 2) да будет знамение неблазненное веры нашея в Бога; 3) во врачество спасения нашего.

3) Надобно во всякой тайне три вещи приличныя: 1) чтобы был законный, сиречь, правильно рукоположенный служитель тайны; 2) вещь или материя, каждой тайне приличная; 3) образ или форма, имиже действуется тайна всякая и совершается, сиречь, призывание Святаго Духа, и вид словес, имиже иерей совершает тайну силою Святаго Духа, с мыслию изреченною, еже освятити тайну²⁵⁵.

β) О крещении

1) Крещение есть омытие греха первородного, а в возрастных и произвольного. Материя сея тайны – вода чистая, простая и ничем непритворная. Форма – словеса сия: крещается раб Божий, или раба Божия во имя Отца, аминь, и Сына, аминь, и Святаго Духа, аминь, аминь же восприемник глаголет. Требе хранити в тайне сей, да будет восприемник веры православныя Кафолическия, такоже и священник. Тайна сия повторятися никакоже может: понеже сей характер на душе незагладимый бывает.

2) В крещении получаем очищение прародительского преступления, и отпущение прочих грехов, до крещения сделанных: по крещении бо человек бывает сын Божий и наследник благодати.

γ) О Миропомазании

1) Миропомазание есть тайная изливаемой благодати Духа Святаго на новокрещенного. Материя тайны сея–миро от Архиерея православного освященное. Форма – словеса сия: печать дара Духа Святаго, аминь. Требе хранити в сей тайне, дабы миро не было повреждено в своем благоухании, которого мира не может прост священник освятити, кроме Архиерея: должен же всяк священник имети.

2) Каковую благодать Божию получаем? Печатствуемся дарами Духа Святаго, воеже бы нам твердым и постоянными быти в вере, и во всех Христианских добродетелех. Вторицею сия тайна дается токмо Царем, да оступлшим от православныя веры в веру некрещенную.

δ) О святейшей евхаристии

1) Евхаристия есть тайна тела и крове Господа нашего Иисуса Христа. Материя тайны сея хлеб пшеничный, квасный, и вино естественное виноградное, простое, а не притворное. Форма – словеса к Богу Отцу реченная: И сотвори убо хлеб сей четное тело Христа твоего, а еже в чаши, честную кровь Христа твоего. И тогда существо хлеба и вина претворяется в существо тела и крови Христа Бога нашего, действием Святаго Духа и молитвою иерейскою.

2) Требе хранити в сей тайне три вещи: 1) да будет священник правильно посвященный; 2) да будет жертвенник, сиречь, престол от Архиереа освященный, или антиминс; 3) да имать священник всю несумненную веру, что существо хлеба и вина претворяется в существо тела и крове Господа нашего Иисуса Христа действуем Св. Духа.

3) Какое действо в нас хлеба в тело Христово пресуществленнаго, и вина в кровь Христову пресуществленнаго? Соединяемся с Богом яко огнь с железом, и единотелесны и единокровны Христу делаемся, по глаголу Христову евангельскому: ядый мою плоть, и пияй мою кровь, во мне пребывает и аз в нем (Ин.6:56), и по Апостолу: вы есте тело Христово и уди от части (1Кор.12:27)

4) Совершаемая священнодействием Божественная жертва несть убиение, и сама смарть безсмертнаго Христа Бога нашего, на небеси прославленною плотию со Отцем царствующего во веки, но воспоминание прежде бывшего убиения и смерти Его. И егда жрется на дискосе часть, от просфоры во образ тела Христова изъятая, агнцем нарицаемая, жрется в воспоминание самого Агнца Божия – Христа, на кресте за ны пожерта бывша. И егда закалается копием на дискосе часть, глаголемая агнцем, закалается в воспоминание самого Агнца Божия – Христа, на кресте за ны копием в ребра прободенна бывша²⁵⁶.

5) Пречистыя и животворящия тайны Христовы, яже суть тело Христово под видом хлеба, напоенного видом вина, еже есть кровь Христова, хранимыи во весь год больных ради, да будут в достодолжной Божественной чести вышше всея святыни соблюдаеми, яко самый истинный Христос, рожденный от пречистыя Девы, пострадавый за ны, и воскресый и на небеса возшедый… Входяй во алтарь иерей да покланяется святым Христовым тайнам на престоле сущим поклонением великим до земли, яко самому истинному Богу: такожде и всяк от входящих во алтарь, то да творит²⁵⁷.

ε) О священстве

1) Священство есть тайна, в нейже чрез рукоположение святительское дается власть от Бога священнику священно-служение совершати и действовати тайнами, установленными в Церкви Божией. Материя тайны сея – человек правильно производяйся во священника. Форма – рукоположение архиерейское и молитва от архиерея глаголемая: Божественная благодать, и проч.

2) Чем разнствует епископ от священника? Епископ сам тайны совершает, и иным преподает власть сия тайны строити, а простой священник, сиесть, иерей, токмо сам их по данной власти архиерейской действует, а иным их не дает действовати, да також мира святити и антиминса священник не может, токмо Архиерей.

ζ) О покаянии

1) Покаяние есть тайна, чрез которую нам дается отпущение грехов, соделанных по святом крещении, чрез разрешение архиерейское и иерейское. Материя тайны сея – грехи словом, делом, мыслию сотворенные, паче же человек кающийся грехов своих, после крещения соделанных, Форма – разрешение от священника в тех словах: Господь наш Иисус Христос благодатию и щедротами своего человеколюбия и проч.

2) Силу имеет сия тайна прощения грехов от Христа Спасителя нашего. Тайна сия совершается молитвою прощательною священническою.

η) О Браке

1) Брак есть тайна нелицемерного согласия мужа и жены, и сохранение веры и любве супружеской. Материя тайны сея – лице мужеска и женска пола, желающих непринужденно законно сочетатися, и извещающих сие пред священником. Форма – молитвы священническия.

2) Какова благодать Божия преподается в сей тайне? Честное рождение детей, аще же любовь к жене не бывает препятствием к любви Божией.

θ) О елеосвящении

1) Елеосвящение есть тайна, в нейже чрез помазание елеем освященным и чрез молитву священническую благодать Всесвятаго Духа дается больному, и исцеление от болезни и оставление грехов. Материя тайны сея – елей на то освященный, чистый, без всякого примеса. Форма – молитва сия: Отче святый, врачу душ и тела, и проч.

2) Какова благодать Божия чрез сию тайну преподается? Забвенных грехов отпущение и исполнение неисполненного удовлетворения, за болезнию, от исповедавшихся, и исцеление, или облегчение телесныя болезни.

α) Как собственное

1) Христос о нас ныне на небесех молится ли? Христос Господь по Божеству не молится, но яко избавитель наш по человечеству моляшеся ко Отцу своему на земли, а наипаче на кресте, и услышан бе, ныне же на небесех в действо услышанныя молитвы на земли, и плоть пострадавшую и вознесшуюся, и в безкровной жертве приносимую всегдашнего ходатая к Богу Отцу представляет²⁵⁸.

2) Вознесеся Господь наш от нас на небо, да ходатайствует о нас к Богу Отцу. Сице глаголет Богослов: аще кто согрешит, ходатая имамы к Богу Отцу Иисуса Христа праведника, и той чищение есть о гресех наших (1Ин.2:1). И Апостол святый Павел к Евреем: не в рукотворенная святая вниде Христос, но в самое небо, ныне да явится лицу Божию о нас (Евр.9:24), и к Римляном: Христос Иисус умерый, паче же и воскресый, иже есть одесную Бога, иже и ходатайствует о нас (Рим.8:34). Не убоимся, грешнии людие, не отчаяваемся спасения, а будем благонадежны, доброго Заступника к Богу Отцу имамы – Христа Спасителя нашего, иже и ходатайствует о нас, показуя Ему своя язвы за на подъятыя, токмо не поленимся и мы при Нем теплыя наши ко Отцу возсылати молитвы, да ходатайствует Христос Господь Богу Отцу, показуя Ему язвы своя, и теми яко устнами молитвенными умилостивляя Его²⁵⁹.

β) Так и своея Пречистыя Матери, Ангелов и всех святых своих

1) Имеем ли, кроме Христа, других ходатаев? Ходатаев таких, якоже Христос, и столько о нас ходатайствовавших не имеем, якоже Христа, но ко умилостивлению прогневанного о гресех наших Бога по Христе и ко Христу изрядных имеем ходатаев – Матерь Божию и всех святых²⁶⁰. Не видим плотскими нашими очами Пресвятыя Владычицы нешей Богородицы, на небеси Сыну своему и Богу сцарствующия, и о нас грешных рабех своих ходатайствующия, веруем же, яко сцарствует Христу, и о нас ходатайствует: то вера. Не видим святых угодников Божиих, горе в торжествующей Церкви престолу Божию предстоящих, и о нас к Богу молящихся, веруем же, яко предстоят и молятся: то вера²⁶¹.

2) Твердейшая нам стена есть Преблагословенная Царица небесе и земли, яко не земного, но небесного Царя, е единощи, но выну о нас умоляет, и ходатайством си пресильным казнь на милость прелагает, и вместо смерти живот дарствует… Покрывает ны она крылома милости своея от казни Божия, якоже кокош птенцы своя от пазноктей орлих. Сокрывает от лютого прещения Господня, якоже мати чадо свое под ризу от некоего страха. Покрывает от праведного суда Божия и от мести омофором заступления си²⁶². Уподобляет же Дух Святый Пречистую Деву столпу Давидову, ибо та, сущи дщи Давидова, посредствует яко шия между главою и телом, между Христом, главою Церкви, и между верными, иже суть телом Церкве Его, превосходящи Церковь, яко воистину вышше всех сущая, Христа же досяжущи яко плоть Ему давшая. Еще же и того ради уподоби ю Дух Святый столпу, или хранилищу оружейному, да покажет ю быти возбранную воеводу, всеми оружии вооруженную: се же на наше от врагов защищение… Вся же оружия сильных изъявляют то, яко вся тыя благодати Божия и силы, яже имут вси святии, имиже нам помоществуют Пророцы, елико Апостолы, елико иерархи, елико мученики, елико преподобныи и праведный, и прочии вси святии, елико имут: вся та имать едина Пресвятая Дева, и едина она толико помоществовати нам может, елико вси святии: и того ради о ней глаголется, яко имать вся оружия сильных²⁶³.

3) Аще весте ю (Матерь Божию) быти Иаковлею лествицею, вежд те убо и сие, яко того ради Ангели не имут покоя, восходяще и нисходяще, яко пресвятая Богородица велит им, да восходяще приносят к Богу человеческия молитвы, и всякия их нужды, скорби и печали, нисходяще же да приносят от Бога человеком Божию милость, помощь и дарования, се же лествицею, сиесть Богородицею, сродное о нас промышление имущею. Таяжде лествица, кроме Ангельских вой, еще изводит и полки святых о горняго восшествия к дольному нисхождению, к человеческому Христианскому роду, в помощь воюющей на земли Церкви. Изводит полки святых: ибо Церковь, воюющая вопиет о том к ней словесы Дамаскиновыми: «молящи приими лики Архангел же множество вышних воинств зиждителя моего, Апостол же и Пророк соборы и мученики, и преподобныи и священномученики, и молитву сотвори чистая за нас к Богу»²⁶⁴.

1) Якоже телу живость есть душа, сице души живот есть благодать Божия, и якоже тело, отшедшей от него душе, бывает мертво, сице душа, отъемшейся от нея благодати Божией чрез грех, бывает мертва²⁶⁵. Без Его же (Духа Святаго) Божественного наставления дух наш человеческий не весть путем ходити правым, и в землю нас вводити праву, есть бо дух человеческий суетен, непостоянен, заблудлив и немощен, и многажды не вемы, коего дух есмы… Сицевыя же и тем подобныя имеюще пакости в пути нашем, от лукавого демона многащи, под видом благости, прельщающего ны злыми, к тому и сами немощны суще, всячески имамы требование: да Дух Он благий наставит нас, и пособствует нам, по реченному Апостолом: Дух способствует нам в немощех наших²⁶⁶. Благодать бо Духа Святаго есть нам яко огнь светяй, и яко облак прохлаждаяй. Он своею благодатию, предваряющею на путь благ, наводит, спутшествующею вождествует, последствущею доводит, даром терпения вводит, и совершенною благодатию введенныя венчает. Никто же убо входит в землю ону праву, кроме помощи вождества Духа Пресвятаго: ибо якоже на мори корабль, аще и вся имеет нужная ко плаванию готова, единого же токмо вета благопотребного лишается, не может благополучно морския преплавати пучины: тако нам, чрез море мира сего к вечности пловущим, благопотребен есть ветр Духа Пресвятаго, без негоже всякое наше тщание, готовление есть суетно и бездельно²⁶⁷.

2) Он же (Дух Святый), помощник наш милосердный, различными способствует образы. Во-первых, пособствует в немощи нашей, внегда творит, еже всякия скорби душевныя и телесныя от Божия руки приимати нам благодарно, и о тех хвалити Бога нашего. Паки пособствует нам, отгоняя от разума невежество, и научая, что творити достоит, и чесого бегати подоает. Ктому волю нашу укрепляет, во еже любити благая, постоянная и вечная, пренебрегати же тленная, настоящая, яже чувства точию принуждают и прельщают, а души никогда же услаждением довольне не насыщают. Еще пособство деет памяти, да содержим ею вся благотворения Божия со благодарением, да помним заповеди Его, еже не преступати, грехи же наша, еже о них сокрушатися сердцы. Да не забываем праведного и грозного суда Божия, праведником возмездие благое творяща, лукавым же казнь достойную наносяща. Напоследок подает руку помощи духови нашему противу похотем плотским, дает крепость к начинанию дел Божественных, и утверждение деет в нас, да пребудем в службе Божией, в ревности и благодати. Пособствует же нам Дух Святый во всяком состоянии сущим, аще в благодати, аще во гресех пребывающим. В благодати сущим, да не постраждем падения от нея: от греха новоисходящим дает утверждение, да не отпадемся, и ведет от силы в силу добродетелей, Дóндеже узрети Бога богов в Сионе. Во гресех пребывающим пособие дает к возстанию, и еже бы от них исхититися, да не погибнем, по глаголу оному Псалмопевца: аще не Господь помогл бы, вмале вселилася бы во ад душа моя (Пс.93:17)²⁶⁸.

3) В чесом убо состоится спасение наше? В сердце и в Бозе. В сердце произволяющим, начинающем, к Богу обращающемся, в Бозе же помоществующем, содействующем, и в конец добрый производящем… Не место бо святить и спасатет человека, но благодать Божия, содействующая произволению человеческому, и произволение человеческо, содействующе Благодати Божией²⁶⁹.

4) Да со страхом приемлем наипаче дары духовныя: понеже тыя скоро отъемлются. Дары бо Божия суть яко роса утренняя, настанет ли зной полуденный, изсхнет роса. Возможет ли в человеце зной греховный, отъимутся от него Божия духовныя дарования²⁷⁰. Безчестить и гневит грешник Бога Духа Святаго, отгоняя Его от себе скверными делы, не может бо тамо Дух Святый жити, идеже грех скверный совершается. Златоуст святый уподобляет Святаго Духа пчеле, яже в чистых и благовонных пчельниках вселятися любит, от злосмрадных же мест отлетает²⁷¹.

α) С молитвою

1) Ты, Господи, даждь ми помощь, без твоей бо всесильной помощи и благодати никакоже могу злых моих дел и греховного обычая остатися, и ни единого же блага дела творити, без тебе бо не могу творити ничесоже. Имею волю каятися, аще ми ты, Боже, поможеши, можеши мя очистити. Господи помози ми, и спасуся. Верую, Господи, твоему благоутробию, помози моему неверию, верую, яко близ еси всем призывающим Тя во истине²⁷².

2) Кождо желаяй омофором заступления Матере Божия покровен быти, да бежит тощне под кров крилу ея, се бо якоже кокош покрывает крилы си яица своя, да изведет из них птенцы себе, распростирает и она крыле благоутробия си над нами, да зверство наше претворит в человечество, и в чада Богу и себе отродит ны, да тако наследницы будем Божии во царствии Его, снаследницы же Христовы²⁷³.

3) Святый Архистратиже Михаиле, и со всем Ангельским собором! Осени над главою нашею в день брани нашея видимыя и невидимыя, покрый нас кровом крилу твоею, и отжени от нас всякого врага и супостата²⁷⁴.

4) О Святии мученицы, горе посреди девяти ликов Ангельских ликовствующии! Нас доле бедствующих не забудите, славнии небеснии граждане нас замных пришельцов, аки во изгнании в жизни сей сущих, милостивно помяните, с высоты возлюбленного селения Господня милосердно на ны призрите, и веждьте наше к вам усердие, услышите наша к вам мольбы, приклонитеся к нашему смиренному молению, и посетите ны, и исцелите болезни наша, уврачуйте недуги душевныя и телесныя, утешайте скорбящия, помозите страждущим, избавите от бед своя молебники, и молите о нас Бога, в Троице единаго, Отца, и Сына, и Святаго Духа²⁷⁵.

β) Воздавая притом подобающее честование Св. Кресту, Св. Евангелию Спаса нашего, и свящ. изображением как Господа, так и всех святых Его

1) Почитаем и честный крест Господень, или паче рещи, подобие онаго креста, на немже Христос был распят. Оный бо самый крест, на немже Христос распят бысть, не обретается, раздроблен и разнесен от верных на благословение и исцеление по вселенней. Ныне же того креста подобие токмо делается или пишется, обаче мы почитаем яко самый истый крест, но не боготворим того, ниже бо самый оный Христов крест Бог бысть, но древо и казнь злодеев… Почитаем крест не ради креста, но ради самого на кресте распятого Христа, и полагаем надежду спасения нашего не в вещественном кресте, но в распятом на кресте Христе… Кланяемся образу креста не веществующе, сиесть, не вещество почитающе, но образ креста, яко символ Христова распятия²⁷⁶.

2) От начала веры в России прияхом предание церковное, еже почитати книгу Евангелия святого, износимую на утреннях воскресных, по прочтении Евангелия воскресного, из алтаря к народу, да покланяются и лобызают е людие… Кланяющеся мы святому Евангелию, не веществу кланяемся, не доскам окладным сребром или златом, не хартиям, не чернилу, но слову Божию, в Евангелии написанному²⁷⁷.

3) Почитаем мы иконы святыя, лобызаем, покланяемся им, но не боготворим, не сказуем, яко икона есть Бог, но изображение подобия Христова, или Богородица, или коего святого, Яснее же со святым Иоанном Дамаскиным речем, яко икона есть поветь о Христе Господе и о святых Его, живописным художеством сказуемая, якоже и словописным повествуемая… Егда убо кланяемся иконе святей, кланяемся не доске, ни вапам, ни переводам, ни ветхости, ни новости, понеже не вещества во иконе ищем, ни вещество во иконе почитаем, но на святыню взираем, святыню почитаем, и изображению начертанного покланяемся. Кое наше поклонение, по святого Василия Великого извествованию, восходит на первообразное, на того, иже на небесех есть²⁷⁸. Церкви святой врата адова не одолеют. Церковь есть столп и утверждение истины, с которою мы – чада ея со всеми отцами святыми, светилами Вселенскими, Василием Великим, Григорием Богословом, Иоанном Златоустым, Афанасием и Кириллом и прочими безчисленными, со всем собором святым Вселенским на иконоборцев собравшимся, вси единогласно глаголем, и кровию нашею готовы подписатися, «Пречистому твоему образу покланяемся, благий». Вас же мерзких еретиков, гноеименитых Копронимчиков, с темже собором святым седьмым Вселенским проклинаем: «Анафема, анафема, анафема!»²⁷⁹

γ) А также святым останкам и мощам угодников Божиих

1) Подобает почитати мощи святых, понеже сам Бог в чести та имать, Ангелами своими охраняя я, и благодатию своею осиявая, и целебную силу тем подавая… Подобает почитати мощи святых, яко честных другов Божиих, о них же Давид к Богу вещает: мне же зело честни Быша друзи твои, Боже! (Пс.138:17).

2) Подобает почитати мощи святых, к ихже душам на местех светлых упокоеваемым, и Богу предстоящим, молимся, да молятся о нас ко Владыце, и веруем, яко молятся, и за то само от нас должни почитаемы быти, яко молятся о нас… Подобает почитати мощи святых, понеже души их святыя знают и видят творимую мощам их честным от нас почесть, и за то ходатайствуют о нас ко Христу Владыце нашему²⁸⁰.

1) Вознесеся Господь наш от нас на небо, да с высоты на вы призирает, яко отец на чада, яко пастырь на овцы, яко орел на птенцы, яко воевода на вои своя, и всякого да видит, и коегождо нужду и требование да разсматривает, и комуждо да подаст помощь. Якоже бо некий Царь, собрав многая воя своя на рать, и хотя вся своя полки видети, восходит на высокое место, – на гору, или на кое здание, и с высоты смотрит, и устроявает я, и аще видит одолевающия, радуется о них, аще же зрит одолеваемыя, скорую им помощь посылает. Сице Господь наш, Царь царем, собирает ратующую на земли Церковь, в ней же елико чинов, толико полков, взыде на горняя, да с высоты смотрит на подвиг коегождо. Добре убо подвизающимся да соплетает венцы, изнемогающим же да прострет руку помощи скорыя, и падшия да возставит, и сильнейшия да сотворит я на супостаты, а гонящим ны препятие да сотворит²⁸¹.

2) От него (Св. Духа) правима и наставляема бывает Церковь не точию на ответование во Апостолех, и мученицех, по оному Господню обещанию: егда же приведут вы на соборища, и власти и владычества, не пецытеся, како или что отвещаете, или что речете: Святый о Дух научит вы в той час, яже подобает рещи (Лк.12:11), но и на всякое дело благо, по словеси сему неложному: Утешитель же Дух Святый, егоже послет Отец во имя мое, той вы научит всему. Того бо ради посылается, да наставит нас на путь вечности, научить нас оправданием своим, и введет ны в первое достояние²⁸².

1) Господь наш Иисус Христос, донележе видимо на земле с человеки пребываше, доколь Сам Он един нарицашеся Пастырь овцам, глаголя: аз есмь пастырь добрый. А яко дело пастырства совершив, восхоте отъити ко Отцу своему, оставил есть по себе наследники пастырства, – святыя своя Апостолы, и иже по тех Архиереи, да пасут стадо Его, к комуждо от них тоже глаголя, еже и к святому Петру рече: паси овцы моя. Всяк убо Архиерей есть пастырь Хритову стаду, пастырь же сущи должен быти добрый, да в нем, яко в образе Христовом, исполняются та словеса Христова: аз есть пастырь добрый²⁸³. В нынешнее убо настоящее время благодатию Христовою суть начальники и вожди, ну путь спасения наставляющии, Архиереи и иереи, и прочии духовного чина лица²⁸⁴.

2) К новоблагодатным Архиереом сам Господь в Евангелии глаголет: вы есте свет миру, (якоже небесная светила мир озаряющая) тако да просветится свет ваш пред человеки (Мф.5:14–15). Небом есть Христова на земли Церковь, якоже бо на небеси живет Бог Ангелами окружаемый, сице не земли в Церкви своей живет, и славится между человеки, глаголющу Давиду: Господь в церкви святый своей, Бог посреде людей своих (Пс.10:3), хваление Его в церкви преподобных (Пс.149:1), и якоже небо украшается и сияет своими светилами, сице и Церковь своими светилами, – своими пастырьми и учительми, от нихже овыи суть яко звезды, инныи яко луна, а иныи яко солнце, кождо по чину чести и звания, и по мере своего в добродетельном жити и в духовной мудрости совершенства. Светила небесная, на высоте безмерной Божиим устроением поставленная, далече от земли отстоят, и Архиереи в церковном небе, не низкое содержать место, но превысочайшее, суще образ Сына Божия, и разнствуют премного от подначальных своих властию и святынею. Иже бо суть под Архиерейским правлением, овцы суть, а Архиерей – пастырь, тыи чада, а он – отец, тыи ученики, а он учитель, тыи человецы, а он Ангел чистым и святым житием²⁸⁵.

1) Овцы мои гласа моего слушают, и по мне грядут. То овца Христова, иже слушает Христа, – Пастыря своего, и возследствует Ему: не слушаяй же Того, ни возследствует Ему: не слушаяй же Того, ни возследствуяй Ему, како может овцею Его нарицатися и быти?... Пастырь наш добрый – Христос Господь призывает нас, глаголя: грядите по мне, сиесть путем заповедей моих ходите, да внидете в царствие небесное: мы же киим путем и ками шествуем, поразсмотрим кождо свою совесть… Иже убо суть истинный Того овцы, тех никтоже восхищает от руки Его, сиесть, никаяже прелесть греховная может отторгнути от благодати Его: якоже не отторже Иосифа прекрасного Египетская блудница, нии праведнаго Лота развратиша Содомския соблазны, ни целомудренную Сусанну преклониша к Богопрогневанию два беззаконныи судии Израильстии²⁸⁶.

2) О окаянныии времена наши, или паче рещи – окаянныи нравы наши! О коль далече отстоим от овец Христовых, от овец тех, иже прежде нас Быша, ихже Всероссийскии пастыри – Петр, Алексий и Иона пасяху! И уже они, смотряна нас, едва познавают нас Христианами быти, разве токмо имя Христианское на нас видят. И что виновно такового нашего развращения? Виновно то, яко не слушаем пастырского гласа, не внимаем поучениям душеполезным, Бога не слушаем, сказующаго нам рабы своими, и святыми книгами, якоже пишется: Господь повесть в книгах людем. Неслушание гласа пастырского, сиесть словеси Божия, есть всему злу виновно²⁸⁷.

3) Не довлеет человеку ко спасению едино еже веровати во Христа Бога, и беси веруют, якоже глаголет святый Апостол Иаков, и трепещут (Иак.2:19), обаче беси суть. Кая пользы Христианину токмо еже веровати во Христа, а дел Христианских не имети? Кая польза токмо молитися Христу, а заповеди Его преступати? Кое есть благо, еже кланятися Христу Богу, а опечаляти Его беззаконными делы, якоже и тии, иже во время вольного страдания Его, прегибающе колена, покланяхуся Ему, и вземше трость по главе Того бияху? Кланяешися, человече, Христу, и биеши Христа, озлобляя и муча ближнего твоего, насилуя его и грабя, и отъемля неправедно, молишися Христу, а в лице Ему плюеши, сквернословие испуская от уст твоих, укоряя же и осуждая ближнего твоего, веруеши во Христа, а отметаешися Того богопротивными делы твоими²⁸⁸.

4) Дела добрая, Богоугодная, вемы написанная в Божественном Писании: ово в заповедех Божиих, ово в советех Евангельских и Апостольских, ово в книгах учительских и постнических, и иматы безчисленныя образы Богоугождения в житиях святых, ихже по силе нашей подражати должны есмы, и в живых добродетельных мужех та видети можем²⁸⁹. Дела добрая, плода спасения не приносящая, бывают та, яже делаются или не от самыя любве к Богу, но от самолюбия, или яже вне православныя кофолическия Церкви делаются²⁹⁰.

Основание и глава сему верных Божиих собранию (Церкви) есть сам Христос, и всяк православный, яко истинный сын, должен святей Церкви во всем повиноваться, и исполнять ея заповеди, коих есть девять²⁹¹.

1) Молится Богу сокрушенно в воскресные и праздничные дни, и слушать церковнаго пения.

2) Посты, також среды и пятки хранить. Пост заповедь есть самого Бога: сице бо пишется в пророчестве святого Иоиля Пророка, в главе 2: и ныне, глаголет Господь Бог ваш: обратитеся ко Мне всем сердцем вашим, со алчбою в пост, плаче и рыдании… Сам Христос Спаситель постился 40 дней и 40 нощей, нам оставляя образ, да поледуем стопам Его (2Пет.2:21), и по силе нашей да храним пост во святую четыредесятницу… Постишася и святии Апостоли, якоже о том в Деяниях, в зачале 31 пишется: служащим им Господеви и постящимся, рече Дух Святый: отделите ми Варнаву и Савла на дело, на неже призвах их, тогда постившеся и помолившеся возможиша руки своя на ня, и послаша их… Убо должен есть всяк верный Христианин хранити пост святый, якоже Божия заповеди и церковная предания повелевают²⁹².

3) Священников, а паче духовных отцов почитать.

4) Исповедываться четырежды в каждый год, и приобщаться святыя Евхаристии, а работных хотя единожды.

5) Книг еретических не читать, и учения их не слушать необученным во Святом Писании.

6) Молится о властех, о душах умерших, и об обращении еретиков… Грешный человек из ада свободиться до суда может не собою, но милостынями, из праведного имения издерживаемыми и молитвами, а паче безкровною Жертвою²⁹³. О упокоении душ блаженно памяти преставльшихся рабов Божиих молитвы наша, совершая, имамы надежду несумненну, яко принесенная за души их жертва, излиянная кровь и вода от ребр Христовых, во святом потиру совершаемая, окропляет и очищает души их, о них же приносится, и о них же извивается. И аще кровь и вода Христова, единою древле на кресте излиянная, всего мира грехи омыла есть: ныне таяжде, а не иная, не имать ли наши грехи очистити? Аще тогда кровь Христова многия безчисленныя души искупила есть от работы вражия: ныне таяжде, а не иная, не имать ли оных поминаемых душ искупити? Аще тогда страдание Христово толь многия оправда: тожде ныне Христово страдание, Божественныя жертвы совершением воспоминаемое, не имать ли я, нами поминаемыя, оправдати? Веруем несумненно силе крове Христовы с водою от ребр Его истекшей, яко очищает, искупует и оправдает рабов своих, им же во царствии небеснем, и в Церкви святой на земли, в людех благочестивых вечная память буди²⁹⁴.

7) Хранит и те посты и молитвы, кои ради некоторых нужд уставляются от Архиерея.

8) Не брать церковного имения мирским насильно, а духовным промышлять о украшении и о всех потребностях.

9) Браков в посты не венчать, и не возбраненныя игрища Христианам не ходить.

1) Смерть есть разлучение души от тела, разрешение естественного тех союза: стихий, имиже человеческое естество состоится, разрушение, органов человеческих недействие, чувств нечувствие, жития престатие, разрешение человеческого сочинения. Человек бо от души и тела сочинен есть, умершу же тому, несть уже человек: аще и тело зримое предлежит, аще и душа пребывает безсмертна, но понеже суть от себе раздельны, убо ни душа есть человек, но токмо душа, ни тело есть человек, но труп. И того ради естество живущих боится смерти, понеже смерть отъемлет бытие того, еже не быти тому, чим бе.

2) Нрав свойствен смерти есть – неизвестно к человеку проходити, аще и всем та сама известна есть. Что бо в жизни нашей известнее есть, паче смерти? Понеже (по Апостольскому словеси) лежит человеком единою умрети. И что неизвестнее паче прихода, или часа смертного, якоже сам Господь во Евангелии глаголет: не весте дне и часа, в оньже Сын человеческий (животом и смертию обладяй, пояти душу) приидет… Известна есть смерть, понеже правосудием Божиим за грех прародительный та, яко казнь всему человеческому наведеся роду: неизвестен же час смерти, понеже времени жизни человеческия Бог определения не положи яве, но в недоведомых судьбах своих то сокры. Вемы, яко умрем, не вемы же, когда умрем, днесь ли утро, рано ли или позде, в день ли или в нощи.

3) Действа же смерти суть сия: отъемлет человеку вся, яже имать человек в мире сем: богатство, честь, славу, красоту, наслаждение всяких благ. Егда бо умирает человек, не оставит ли вся? Ниже снидет с ним слава его. Разлучает друг от друга, – родителей от чад, господина от рабов, и всякое люблени человеческо, и всяку надежду временных пресецает и погубляет. Отверзает дверь вечности человеку и начинает ю, как-либо та будет, аще добрая, аще злая²⁹⁵.

1) Нам православным Христианом довлеет комуждо на всяк день и на всяку нощь чаяти неизвестного часа кончины жизни своея, и ко исходу быти готову, то нам страшный суд комуждо свой, прежде общего всем суда страшного²⁹⁶. Суд есть двоякий: особенный и общи. Особенный суд всяк человек умирая имеет, ибо тогда увидит все дела свои²⁹⁷.

2) Мы чаем по вся дни и нощи и на всяк час пришествия к нам Господня, но еще не того страшного пришествия, имже приидет судити живых и мертвых и воздати комуждо по делом его, еще не того на всяк час чаем времени, в неже (по словеси Петра Апостола) небеса с шумом мимо идут, стихии же сожигаемы разгорятся, земля же и яже на ней дела сгорят (2Пет. 3:10), но чаем кождо своего смертного часа, в оньже суд Божий приидет пояти душу от тела, в кий час комуждо свое особое бывает о содеянных истязание, того часа на всяк час ожидаем, якоже сам Господь, оберегая нас, в Евангелии учить: будите готови, яко в оньже час не мните, Сын человеческий приидет (Лк.12:40)²⁹⁸. Егда приидет страшный час разлучения души моея от тела: тогда, Искупителю мой, приими ю в руце твои, и сохрани от всех бедствий ненаветну, и да не узрит душа моя мрачного взора лукавых демонов, но да спасена прейдет вся мытарства. О Спасителю наш! Сего надеемся верно получити от твоего человеколюбия и милосердия²⁹⁹.

1) Прежде дне судного несть совершенного мздовоздаяния совершенному человеку, сиречь с душею и с телом, яко ниже мучение во аде осужденным, но мздовоздаяние частное. По дни же судном будет совершенное мздовоздаяние по телу и по душе³⁰⁰.

2) Души же праведных находятся на небе, а грешных в геенне, – и как праведные награждение, так и грешные мучение совершенно по делам своим не приняли, но приимут, совокупясь с телом по суде³⁰¹.

3) Убо есть мучение частное? Есть. Кое? Отчаяние, чувствование прогневанного Бога, вечных благ лишение, места темная и ужасная, видение всегдашнее диавола и с ним сожитие, и от него души мучение, огнь неугасаемый, червь совести неумирающий (А). Бога на небеси души святых видят ли? Выну видят лице Отца небесного, и о зрении того веселятся. В том ли состоит их блаженство и мздовоздаяние? В том, как Псаломник свидетельствует: насыщуся, внегда явитися славе твоей³⁰².

1) В пост Апостола Филиппа (рассказывает о самом себе св. Димитрий), во одну ночь окончав письмом страдания святого мученика Ореста, которого память ноября 10 числа почитается, за честь или меньше до заутрени лег отдохнуть не раздеваяся, и в сонном видении узрел святого мученик Ореста, лицем веселым ко мне вещающаго сими словами: я больше претерпел за Христа мук, нежели ты написал. Сие рек, откры мне перси своя, и показа в левом боку великую рану, сквозь во внутренность проходящую, сказав: сие мне железом прожжено, потом открыв: правую руку… и проч. А что сие видение я, недостойный и грешный, истинно видел, и точно так видел, как написал, а не иначе, сие под клятвою моею священноиноческою исповедую: ибо как тогда, так и теперь помню³⁰³.

2) Отверзи немедля гроб наш, (сказал св. Гамалиил, явившись во сне пресвитеру Лукиану), идеже в небрежении лежат мощи наши (св. первомученика Стефана, Никодима, Гамалиила и Авия), ово дождем мочими, ово же неверных человек ногами попираеми: и не толико о мне пекуся, елико о тех, иже суть лежащии со мною святии, великия чести достоянии. Отверзи оныя, да отверзет Бог двери милосердия своего миру, многими бедами объяту³⁰⁴.

1) О времени суда, когда он будет, неизвестно никому, точию приметы к тому сии суть: 1) проповедуется Евангелие во всех языцех; 2) будут великия рати, смерти, глады, знамения на небеси³⁰⁵.

2) Святый Апостол Павел к Солунаном пиша, глаголет: да никто же вас прельстит ни по единому же образу: яко аще не приидет отступление прежде, и открыется человек беззакония, сын погибели, противник и превозносяйся паче всякого глаголемого Бога, или чтилища, якоже ему сести в Церкви Божией аки богу, показующу себе, яко бог есть (2Сол.2:3–4). О котором человеце сия глаголет Апостол святый, извествует неложный свидетель, толковник Павловых посланий, святый Иоанн Златоуст, глаголя: о антихристе зде беседует и велия открывает тайны. Что есть отступление? Того самого антихриста нарицает отступление, яко многих имущего погубити и оставити тако, яко соблазнити аще мощно и избранныя (Мф.24:24), и человека греха нарицает и, безчисленная бо соделает злая и приуготовит иных, да делают лютая, сына же погибели глаголет и, зане и той погибнет. Кто же есть сей? Убо ли сатана? Никакоже, но человек некий, всякое его приемляй действо. До зде Златоуст, толковник Павлов. Також и Ефрем святый в слове о антихристе глаголет: не сам родися сатана, но в образе его приидет прескверный яко тать³⁰⁶. Святой Ипполит о делах антихристовых сказует, яко имать творити дела дивная: попущением бо Божиим, пособием же демонов, имать деяти чудеса великая на прельщение человеков, яже чудеса будут не истинная, но мечтательная, прииденная³⁰⁷. Вся Церковь страждаше гонение в начале своем во Апостольские дни и по тех даже до Константинова просвещения, лет яко триста, по всей вселенней тогда Церковь Христова бе гонима, утесняема, озлобляема и премногими мученическими кровьми обагряема, на Востоце и Западе, на Севере и Юге. Таково же гонение паки вся Церковь имать страдати и на окончании мира, во антихристовы дни, по всех бо концех земных от антихристовых поклонников истиннии Христиане гоними будут и убиваеми, и храмы Божии опустошаемы³⁰⁸.

1) Верую, что Спаситель наш есть Судия крайний живых и мертвых, праведных и грешных, и тоюж плотию, юже прият от Девы Богородицы, и пострадал, и погребеся, и вознесеся, имать приити на землю со всеми Ангелы, со славою многою. воздати комуждо по делом его, егоже Царствию, которое праведницы в мздовоздаяние приимут, не будет конца³⁰⁹.

2) Первее прииде, яко агнец кроток и незлобив: второе приидет, яко лев грозен и мстителен. Первое прииде взяти грехи всего мира, и прощение всем даровати: второе приидет судити грехи всего мира, и воздати комуждо по делом. Первее прииде спасаяй грешныя: второе приидет судяй и погубляяй грешныя. Первее прииде не нечаянно, но исполняющимся пророчествам, и днем рождения от Пречистыя Девы, прииде же тихо, без шума и молвы, якоже глаголет премудрость: молчанию содержащу всех, и нощь своего течения полпути имеяше, всемогущее слово твое, Господи, исходящи от небеси, от престол Царских прииде (Прем.18:14). Второе приидет (Господь) нечаянно, с шумом страшным, земле колеблющейся, горам трясущимся, мертвым от гробов восстающим, всякому человеческих рук делу сгарающу, морям волнующимся необычно, небесам изменяющимся, звездам спадающим, всем стихиям смущающимся. В первом Того пришествии очеса человеческая видеша Его младенца повита, в яслех лежаща, на руках матерних носима, сосцами питаема: во втором же Его пришествии узрим Того уже не младенца, но мужа, на престоле с славою многою седяща, на беззаконныя прогневанна, небом и землею трясуща, всю вселенную в конец разоряюща³¹⁰.

1) Небо с прекрасными светилами своими стоит до времени, будет тое время, когда звезды спадут, яко лист с древа, и небо в свиток совьется³¹¹.

2) Страшна и люта бе казнь потопная, но страшнейша и лютейша имать быти казнь огненная. Вода потопная землю токмо покры, а огонь не токмо землю, и вся яже на ней дела, но и небеса сожжет, якоже святый Апостол Петр извествует, глаголя: небеса жегома разорятся и стихия опаляема растаются (2Пет. 3). В то время кий страх и трепет грешником будет, егда грядущу страшному Судии, огнь пред ним предъидет, река же огненная и ужасная пред судище Его начнет влещи всех!³¹²

1) Во второе свое на землю пришествие Христу Богу нашему славно приити имущему, во-первых, услышится предъидущим Ему глас трубы Архангельския, по вселенней гласящия, всех на суд призывающия, и мертвых от гробов возставляющия: вострубит бо, и мертвии востанут нетлении (1Кор.15:52). Зде, во-первых, страх велий будет грешным, егда глас трубный повели коейждо душе в свое внити тело, – в тело, еже в прах и в перст бе обращенно, и весьма уничтожено, а тогда, повелением Божиим, паки в свой первобытный состав приидет, своя члены возьмет. Якоже бо семя, в землю посеянное, аще и истлевает, обаче в свое ему время прозябает, и возращает первее траву, таже клас, и плод приносит, по словеси Господню: аще зерно пшенично падши на землю не умрет, то едино пребывает, аще же умрет, мног плод сотворит (Ин.12:24), сице и тело человеческое умершее, и истлевшее, и в прах бывшее, единым часом от гласа трубы приимет силу ращения своего, и в первобытие свое приидет, и душею своею оживотворится³¹³.

2) Верую, что тоюж плотию, юже прияхом, и создани есмы от Бога, и в мире жихом, на глас Сына Божия в последнее время вси воскреснем, и приимем по делом наю – или жизнь вечную, или мучение вечное³¹⁴.

3) В последний день, егда Архангельския трубы глас всех от века мертвых от сна смертного возбудить, тогда праведных телеса, оживше, изыдут в воскресение живота, грешных же телеса изыдут в воскресение суда, праведных телеса просветятся яко солнце в царствии небесном, телеса же грешных очернятся яко угль черн, и сажа, и смола, и Ефиоп адский³¹⁵.

1) Второе пришествие Господне обычно страшным судом есть нарицаемо, и в правду, ибо имут н нем судитися живые и мертвые. Страшен суд, ибо устрашит всякое создание, горнее и дольнее, невидимое и видимое. Страшен будет горним, ибо силы небесныя подвигнутся. Страшен дольним, ибо земля от основания восколеблется. Страшен Ангелом, ибо вопиет святый Апостол Павел: мы хощем и Ангелом судити (1Кор.6:3). Страшен святым и праведным, ибо тогда и праведник едва спасется, а наипаче страшен будет грешным: нечестивый же и грешный где явится? (1Пт.4:18)³¹⁶.

2) Воставшу грешнику от гроба, абие обличатся вся грехи его, и яве пред всею вселенною покажутся вся та дела его скаредная, яже он в тайне, в сокровенном месте, во тьме нощной, никомуже ведущу соделал есть. Сице бо к согрешившему в тайне прелюбодеянием Двиду глагола Бог: ты сотворил еси втайне: и аз сотворю глагол сей пред всем Израилем, и пред солнцем сим (2Цар.12:12)³¹⁷.

3) От лица (Христова) гневного, страшного что чаем услышати мы грешнии, не ино что, токмо страшнейший паче всех громов и молний глас оный жестокий: отъидите от Мене проклятии во огнь вечный, уготованный диаволу и ангелом его (Мф.25:41). О коль той глас устрашит вся грешныя! Коль вострепещут вси неправедницы, беззаконницы, прелюбодеи, любодеи, татие, разбойницы, хищницы, грабители, мучители и прочии гневающии ныне Бога! Поистинне вожденлели бы горами и камением сотренны быти, неже таковый яростный глас Божий услышати. По сих всех приступят, и похитят грешников немилостивии руце темнообразных бесов, ихже самое видение страшнейше быти сказуют паче всякия муки. Приступят, и повлекут в адскую бездну, в огнь вечный, и в тартар, и в червь неусыпающий вечныя и безкоечныя муки, ихже страха кий язык изрещи, или кий ум постигнути может?³¹⁸

1) Пошлет их (грешников Господь) по ад во веки мучитися, и тамо будет им за разное согрешение разное и мучение. Будут тамо терпети и огнь неугасающий, ибо рекл Христос Спаситель наш: огнь их не угаснет (Мк.9:44). В сем огни будут горети человецы нечестивии, блудники, и прелюбодеи, и гневливии, того ради, яко они, ов от похоти, ов от гнева распалялися. Будет жа тамо и зима лютая, и от тоя студенности не терпя грешнии, скрежетати зубы своими будут. О сем рек Христос Спаситель наш: тамо будет плачь и скрежет зубом (Лк.13:28). Сию зиму лютую будут терпеть человецы тии, которые немилостивы суть до убогих, и не приемлют в домы своя странных, и лежащих без покрова во гноищи, и терпящих снег и мраз лютый, таковии и сами будут товарищество имети со диаволом и аггелы его, ибо к таковым речет Христос Бог наш: идите от Мене проклятии во огнь вечный, уготованный диаволу и аггелам его (Мф.25:41). Сие товарищество со диаволом будут имети и людие горделивии, которые ныне презирают убогих, гнушаются ими, и минуют их своими очесы. Будет же тамо непрестанное и червей сомление, которые тамо непрестанно будут терзати и ясти человек грешных, и никогда они умрети не имут, ибо речено есть: червь их не умрет (Мф.9:44). Сии черви тех будут человек ясти и терзати, которые зде лихоиманием у кого что отъимают. Будет же тамо еще и смрад нестерпимый от огня серчатого, ибо написано есть: огнь и жупел, и дух бурен – часть чаши их (Пс.10:6). Сей смрад будут терпети таковии человецы, которые наблюают себе в сладость всякия благовонныя мастичные духи, и зельным прилежанием снискивают всякие благоуханныя зелия. Будет же тамо и тоска велия, такова лютая, яко аще бы возможно было умрети, то во сладость бы ея со тщанием ради были восприяти, но никогдаже умрут. Ибо писано есть: взыщут человецы смерти, и не обрящут ея: и возжделеют умрети и бежит от них смерть (Апок.9:2). Еще же тамо будет и тьма кромешняя, ибо писано есть: связавше ему руце и нозе, вверзите его во тьму кромешнюю (Мф.22:13), и в той тьме вверженныя будут сидети во веки, и не будут видети лица Божия никогда. Сию ж тьму восприимут таковии, которые не допускают убогих лица своего видети. Будет же тамо и глад, ибо рек сам Христос: горе вам насыщеннии нань, яко взалчете (Лк.6:25), той глад будут терпети людие сии, которые в веце семь не питают бедныя и убогия. Еще же тамо будет и жажда велия, ибо сам же Христос рек: яко вы возжаждете. Таковую жажду будут терпети таковии, которые зде жаждущих не напояют странных и убожайших³¹⁹.

2) Аще и зде казнь огненная, егда кий человек на сожжение осужден бывает, страшна есть, то несравненно страшнейша та казнь, яже будет в геенне огненной. Иже бо тамо огнь силу онгя здешняго, нами употребляемого, превосходит потолику, яко быти сему огню, аки на иконной дске писанну противу огня онаго. Здешняго огня не боятся беси (якоже писанного на дске мы не боимся), онаго же геенского трепещут: сей бо токмо телесное вещество сожигает, а оный и безплотного духа жжет и мучит. Сей огнь, недостающу подлагаемому ему веществу, угасает, а оный никогдаже угаснет, по свидетельству неложных уст самого Господа нашего, во святом Евангелии глаголющаго: добрейте ти есть внити в хивот хрому или бедну, неже обе руце имущу ввержену быти во огнь неугасающий, идеже червь их не умирает, и огнь не угасает (Мф.18, Мк. 9). Здешний огнь горя светит, онаго же огня пламы токмо жгут горяще, не просвящают же тьмы кромешныя… Здешний огнь временно мучит, объемши бо вверженного в он человека, абие того уморяет, и в пепел единым часом сожигает. Оный же геенский огнь жжет, но не уморяет, вверженный бо в он не умрут, жегоми и мучими во веки. А аще един час жегому кому быти есть мука велика и нестерпима, помыслим убо коль велико мучение будет жегомым и несогараемым в безконечные веки! Но оле нам грешникам! Яко нимало хощем памятствовати о ждущих нас муках, ни боимся тех, но паче день от дня и час от часа во множайшие грехи впадающе, большия геенския пламы себе возжигаем, и огнь ко огню прилагаем, и еже уготовано бесом мучение, то мы на ся обращаем. Огнь бо той геенский не человеком уготован от Бога, но демоном, якоже праведный Судия во Евангелии глаголет: идите от Мене проклятии во огнь вечный, уготованный диаволу и аггелам его (Мф.25)³²⁰.

1) Честь та, еюже Бог другов своих на небеси почтит и прославит, не прейдет в безконечные веки. Понеже и Бог, хотяй почтити и прославити, есть вечен, и имущии от Него почтитися и прославитися, будут безсмертны, и слава небесная безконечна. Тую вечную другов Божиих честь кий язык исповести, или кий человеческий ум постигнути может? Святый Апостол Павел восхищен, быв тамо, и неизреченныя глаголы слышав, рече: не лет есть человеку глаголати (2Кор.12), почто? Понеже ум человеческий не может объяти, аще бы и сказал Апостол та, яже виде и слыша, разве кто образом земных может отчасти постигнути небесныя, помыслив сице, несть на земли большия части, паче чести царския, убо на небеси, комуждо рубу и угоднику Господню, яко другу Божию, дастся честь царская, самому Богу глаголющу: наследуйте уготованное вам царство (Мф.25). Дастся престол царский, якоже обеща Царь небесный, рекий: побеждающему дам сести со мною на престоле моем (Апок.3). Дастся и венец царский, по словеси Апостольскому: отложимися венец правды, егоже воздаст ми Господь в день он, не токмо же мне, но и всем возлюбившим явление его. И всяк друг Божий прославится яко Царь во царствии небесном, и что сего честнее – угодником Божиим? Добре глаголется: Богу работати – есть царствовати³²¹. Аще зде утешают вы каменныя красные домы, кольми паче имать утешити вас красота горних оных домов, идеже трапезы златом чистым блещащыяся, идеже чертоги от каменей честных создани, маргаритами украшени, славою сияют, идеже вертограды присноцветущии неувядаемыми цветы, идеже поля злачнии сладкими потоками кипящии, идеже всегда благорастворенный воздух, жизненные ветры благовонием неизреченным чувства облагоухающии, идеже день немерцающий и свет незаходимый и некончаемое радование, и несть тамо воздыхания, ни плача, ни скорби, ниже каковыя–либо не красоты и видению мерзостныя скверны, ниже уханию коего зловония, ни страшного коего печального и плаченого и страшного гласа, но вся красная зрятся, вся ароматная ухаются, вся веселая слышатся. Тамо поют непрестанно Ангельстии и Архангельстии лицы, согласно безсмертного Царя славящии³²². В коем человеке праведничество и благочестие, в том и чаяние утехи Израилевы, яже есть будущая жизнь святых в насыщении лицезрения Божия, вся бо утех, все веселие и радость будет новому Израилю, Церкви, глаголю, торжествующей на небеси, в том самом, яко откровенно лицем к лицу зрети будут Бога³²³.

2) Господь от нас на небо вознесеся, да уготовает комуждо на небеси место, людям Бога любящим место меж Серафимами, Богомудрым меж Херувимами, Богоносным меж Богоносными Престолами, господам добрым меж Господствиями, воином добрым и храбрым, за отечествие подвизающимся, меж Силами, властем разным меж Властями, всяким начальникам управляющим чиноначальство свое по Бозе, тем место между Началами, а иже в бедах и напастех сущих другов своих и нищих утешают, пособствуют им, тем место во Архангелы, Ангельски на земли во плоти живущим, место на небеси со Ангелы, а нам грешным, Господи, где уготовал еси место? Будет ли на небеси хотя малое местечко?³²⁴

3) Благодарю тебе, Господа моего, благодателя прещедрого, яко малого ради некоего благоугождения, жизнь вечную, царство небесное дати ми обещал еси, сам сотворивый, сам создавый мя и вся ко благоугождению давый, жизнь вечную туне даруеши, не на времы некое мало, не на времы некое кратко, не на сто лет, или на тысящу, или тысящи тысящей, но во веки вечные, конца неимущие. Слава неисповедимому Твоему милосердию, Господи! Слава пречудному устроению Твоему, Пресвятый Царю! Слава неизреченней и непостижимей твоей благостыни и премудрости, человеколюбче Господи! Яко тебе подобает всякая слава честь и держава, со Отцем, и с Пресвятым, Благим и Животворящим Твоим Духом, ныне и присно, и во веки веков, аминь³²⁵.