День памяти

Житие

Развернуть

Богослужения

Развернуть

Молитвы

Молитва первая преподобномученикам Мгарским

Величаем Тя, Великий Господи, всея вселенныя премудрый Промыслителю, яко и в сия последняя времена благоволил еси воздвигнути от земли Полтавския сонм молитвенников изряднейших — преподобных мучеников обители Мгарския!

Славим Тя, вседаровитый Творче, даровавшаго преподобным мучеником мужество и крепость вся козни вражеския препобедити и велиара преобидети! Сотвори, да и мы сподобимся причастники быти сея благодати, еже твердо в вере стояти и на вся враги победители быти!

Хвалим Тя, всехвальный Содетелю, яко соделал еси иноков Мгарских изрядным жилищем Твоим и храмом Твоим освященным. Соделай и нас, молимся, благодатию Твоею храмами Твоими и дух прав обнови в сердцах наших!

Поем Тя, всемилостивый Спасителю, яко даровал еси святым мучеником Твоим велие дерзновение молитися за нас, недостойных! Даждь нам помощь Твою мучеников Твоих молитвами!

Благодарим Тя, Безначальный Отче, яко николиже отреваеши прошения наша, ниже оставляеши нас погибнути со беззаконьми нашими, но всегда милуеши и прощаеши нас, недостойных чад Твоих, молитвами мучеников преподобных!

Славословим Тя, Единородный Сыне, яко освятил еси нас страданьми и Воскресением Твоим, очистил еси банею крещения, и оживотворил причастием Святых и Священнейших Тела и Крови Твоих, и всыновляеши нас Отцу Твоему, и дерзновенны твориши ны, припадающих к мучеником преподобным, дерзновение к Тебе имущих!

Превозносим Тя, Утешительный Душе, яко присно освящаеши нас, просвещаеши и наставляеши, и ко спасению неизреченно путеводствуеши, и благодать Твои верным преизобильно низпосылаеши молитвами святых Твоих.

Ко святым же преподобномучеником во смиренном разуме припадаем и умильно вопием: о, преподобнейшии отцы и мученицы изряднии, услышите нас, сродников ваших, и не оставите нас, но вознесите молитвы к Милостивому Богу, да утвердит веру Православную непоколебиму во отечествии нашем и во всем мире, дарует Церкви благостояние, уврачует же расколы и разделения силою Всесвятаго Духа, да утвердит обитель Мгарскую и иноков ея во всяком доброделании и подвизех духовных усовершенствует, нас же всех покаяния сподобит и дарует, яко да и в земней жизни, и в пакибытии, купно с вами прославим во Святей Троице славимаго Бога, Отца и Сына и Святаго Духа. Аминь.

показать все

Молитва вторая преподобномученикам Мгарским

О, преподобнейшии отцы, новии мученицы обители Мгарския! Предстояще на месте подвигов ваших пред иконою вашею честною, смиренно припадаем к вам и славословим Бога, укрепившаго вас в подвизе, даровавшаго поприще ваше безпорочно преити, веру сохранити и безбожных не убоятися!

Темже к вам, яко изрядным ходатаям нашим прибегаем и тепле молимся, да испросите обители вашей изрядных милостей от Бога, всем же иноком Мгарским спасительных подвигов и добраго дерзновения.

Молите Господа, да укрепит веру православную в земли Полтавстей и всем Отечествии нашем, всех же человеков да просветит светом Своея истины, омраченных грехами к покаянию приведет, заблудивших от пути спасительнаго ко спасению направит, погибельными ересьми ослепленным да дарует умное зрение, расколом увлеченных да привлечет паки к Церкви Святей любовию Своею Божественною.

Предстательством вашим, о всехвальнии мученицы, да сподобимся все мы, добре поживше, в покаянии всецелом и любви совершенней ко Господу и ближнему прейти к небесному Отечеству нашему, идеже с вами сподобимся всегда воспевати всесладостное имя Божие во веки веков. Аминь.

Каноны и Акафисты

Развернуть

Случайный тест