Азбука веры » Молитвослов » Тропари, кондаки и величания
Система Orphus

Тропари, кондаки и величания на праздники великих святых

• Цвет фона:


• Шрифт: Book Antiqua Arial Times
• Размер: 14pt 12pt 10pt 8pt
• Выравнивание: по левому краю по ширине
 

По благословению Святейшего Патриарха Московского и всея Руси Алексия II


Оглавление

 



^ Преподобного Сергия, игумена Радонежского, чудотворца
(25 сентября/8 октября и 5/18 июля)

Тропарь, глас 4

     Иже доброде́телей подви́жник, я́ко и́стинный во́ин Христа́ Бо́га, на стра́сти вельми́ подвиза́лся еси́ в жи́зни вре́менней, в пе́ниих, бде́ниих же и поще́ниих о́браз быв твои́м ученико́м; те́мже и всели́ся в тя Пресвяты́й Дух, Его́же де́йствием све́тло укра́шен еси́. Но я́ко име́я дерзнове́ние ко Святе́й Тро́ице, помина́й ста́до, е́же собра́л еси́ му́дре; и не забу́ди, я́коже обеща́лся еси́, посеща́я чад твои́х, Се́ргие Преподо́бне Отче наш.

Кондак, глас 8

     Христо́вою любо́вию уязви́вся, Преподо́бне, и Тому́ невозвра́тным жела́нием после́довав, вся́кое наслажде́ние плотско́е возненави́дел еси́, и я́ко со́лнце, оте́честву твоему́ возсия́л еси́; тем и Христо́с да́ром чуде́с обогати́ тя. Помина́й нас, чту́щих пресве́тлую па́мять твою́, да зове́м ти: ра́дуйся, Се́ргие богому́дре.

 

^ Апостола и евангелиста Иоанна Богослова
(26 сентября/9 октября и 8/21 мая)

Тропарь, глас 2

     Апо́столе, Христу́ Бо́гу возлю́бленне, ускори́ изба́вити лю́ди безотве́тны; прие́млет тя припа́дающа, и́же па́дша на пе́рси прие́мый, Его́же моли́, Богосло́ве, и належа́щую мглу язы́ков разгна́ти, прося́ нам ми́ра и ве́лия ми́лости.

Кондак, глас тойже

     Вели́чия твоя́, де́вственниче, кто пове́сть? То́чиши бо чудеса́, и излива́еши исцеле́ния, и мо́лишися о душа́х на́ших, я́ко Богосло́в и друг Христо́в.

Величание

     Велича́ем тя, апо́столе Христо́в и евангели́сте Иоа́нне Богосло́ве, и чтим боле́зни и труды́ твоя́, и́миже труди́лся еси́ во благове́стии Христо́ве.

 

^ Святителей Московских: Петра, Алексия, Ионы, Филиппа и Ермогена (5/18 октября)

Тропарь, глас 4

     Первопресто́льницы Росси́йстии, и́стиннии храни́телие апо́стольских преда́ний, столпи́ непоколеби́мии, Правосла́вия наста́вницы, Пе́тре, Алекси́е, Ио́но, Фили́ппе и Ермоге́не, Влады́ку всех моли́те, мир вселе́нней дарова́ти и душа́м на́шим ве́лию ми́лость.

Кондак, глас 3

     Во святи́телех благоче́стно пожи́сте, и лю́ди к богоразу́мию наста́висте, и до́бре Бо́гу угоди́сте. Сего́ ра́ди от Него́ нетле́нием и чудесы́ просла́вистеся, я́ко ученицы́ Бо́жия благода́ти.

 

^ Святителя Иоанна Златоустого (13/26 ноября,
а также 27 января/9 февраля и 14/27 сентября)

Тропарь, глас 8

     Уст твои́х, я́коже све́тлость огня́ возсия́вши, благода́ть вселе́нную просвети́; не сребролю́бия ми́рови сокро́вища сниска́, высоту́ нам смиренному́дрия показа́. Но твои́ми словесы́ наказу́я, О́тче Иоа́нне Златоу́сте, моли́ Сло́ва Христа́ Бо́га, спасти́ся душа́м на́шим.

Кондак, глас 6

     От Небе́с прия́л еси́ Боже́ственную благода́ть и твои́ми устна́ми вся учи́ши покланя́тися в Тро́ице Еди́ному Бо́гу, Иоа́нне Златоу́сте, всеблаже́нне преподо́бне, досто́йно хва́лим тя: еси́ бо наста́вник, я́ко Боже́ственная явля́я.

 

^ Святителя Николая, архиепископа Мир Ликийских, чудотворца (6/19 декабря и 9/22 мая)

Тропарь, глас 4

     Пра́вило ве́ры и о́браз кро́тости, воздержа́ния учи́теля яви́ тя ста́ду твоему́, я́же веще́й и́стина; сего́ ра́ди стяжа́л еси́ смире́нием высо́кая, нището́ю бога́тая, О́тче священнонача́льниче Нико́лае, моли́ Христа́ Бо́га, спасти́ся душа́м на́шим.

Кондак, глас 3

     В Ми́рех, свя́те, священноде́йствитель показа́лся еси́: Христо́во бо, преподо́бне, Ева́нгелие испо́лнив, положи́л еси́ ду́шу твою́ о лю́дех твои́х, и спасл еси́ непови́нныя от сме́рти; сего́ ра́ди освяти́лся еси́, я́ко вели́кий таи́нник Бо́жия благода́ти.

Величание

     Велича́ем тя, Святи́телю О́тче Нико́лае, и чтим святу́ю па́мять твою́, ты бо мо́лиши за нас Христа́ Бо́га на́шего.

 

^ Святителя Василия Великого (1/14 января)

Тропарь святителю, глас 1

     Во всю зе́млю изы́де веща́ние твое́, я́ко прие́мшую сло́во твое́, и́мже боголе́пно научи́л еси́, естество́ су́щих уясни́л еси́, челове́ческия обы́чаи украси́л еси́, ца́рское свяще́ние, О́тче преподо́бне, моли́ Христа́ Бо́га, спасти́ся душа́м на́шим.

 

Кондак святителю, глас 4

     Яви́лся еси́ основа́ние непоколеби́мое Це́ркве, подая́ всем некра́домое госпо́дство челове́ком, запечатле́я твои́ми веле́ньми, небоявле́нне Васи́лие преподо́бне.

 

^ Преподобного Серафима, Саровского чудотворца
(2/15 января и 19 июля/1 августа)

Тропарь, глас 4

     От ю́ности Христа́ возлюби́л еси́, блаже́нне, и Тому́ еди́ному рабо́тати пла́менне вожделе́в, непреста́нною моли́твою и трудо́м в пусты́ни подвиза́лся еси́, умиле́нным же се́рдцем любо́вь Христо́ву стяжа́в, избра́нник возлю́блен Бо́жия Ма́тере яви́лся еси́. Сего́ ра́ди вопие́м ти: спаса́й нас моли́твами твои́ми, Серафи́ме, преподо́бне Отче наш.

Кондак, глас 2

     Ми́ра красоту́ и я́же в нем тле́нная оста́вив, преподо́бне, в Саро́вскую оби́тель всели́лся еси́, и та́мо а́нгельски пожи́в, мно́гим путь был еси́ ко спасе́нию. Сего́ ра́ди и Христо́с тебе́, О́тче Серафи́ме, просла́ви, и да́ром исцеле́ний и чуде́с обогати́. Те́мже вопие́м ти: ра́дуйся, Серафи́ме, преподо́бне Отче наш.

 

^ Собор святителей Василия Великого, Григория Богослова и Иоанна Златоустого (30 января/12 февраля)

Тропарь, глас 4

     Яко апо́столов единонра́внии и вселе́нныя учи́телие, Влады́ку всех моли́те, мир вселе́нней дарова́ти и душа́м на́шим ве́лию ми́лость.

Кондак, глас 2

     Свяще́нныя и боговеща́нныя пропове́дники, верх учи́телей, Го́споди, прия́л еси́ в наслажде́ние благи́х Твои́х и упокое́ние: труды́ бо о́нех и смерть прия́л еси́ па́че вся́каго всепло́дия, Еди́не прославля́яй святы́я Твоя́.

Величание

     Велича́ем вас, святи́телие Васи́лие, Григо́рие и Иоа́нне, и чтим святу́ю па́мять ва́шу, вы бо мо́лите за нас Христа́ Бо́га на́шего.

 

^ Собор новомучеников и исповедников Российских

Тропарь, глас 4

     Днесь ра́достно лику́ет Це́рковь Ру́сская, я́ко ма́ти ча́да, прославля́ющи новому́ченики и испове́дники своя́: святи́тели и иере́и, ца́рственныя страстоте́рпцы, благове́рныя кня́зи и княги́ни, преподо́бныя му́жи и жены́ и вся правосла́вныя христиа́ны, во дни гоне́ния безбо́жнаго жизнь свою́ за ве́ру во Христа́ положи́вшия и кровьми́ и́стину соблю́дшия. Тех предста́тельством, долготерпели́ве Го́споди, страну́ на́шу в Правосла́вии сохрани́ до сконча́ния ве́ка.

Кондак, глас 3

     Днесь новому́ченицы Росси́йстии в ри́зах бе́лых предстоя́т А́гнцу Бо́жию и со Ангелы песнь побе́дную воспева́ют Бо́гу: благослове́ние, и сла́ва, и прему́дрость, и хвала́, и честь, и си́ла, и кре́пость на́шему Бо́гу во ве́ки веко́в. Ами́нь.

 

^ Святителя Алексия, митрополита Московского
(12/25 февраля, а также 20 мая/2 июня и 5/18 октября)

Тропарь, глас 8

     Яко апо́столом сопресто́льна, и врача́ предо́бра, и служи́теля благоприя́тна, к ра́це твое́й честне́й притека́юще, святи́телю Алекси́е, богому́дре чудотво́рче, соше́дшеся, любо́вию в па́мять твою́ све́тло пра́зднуем, в пе́снех и пе́ниих ра́дующеся и Христа́ сла́вяще, такову́ю благода́ть тебе́ дарова́вшаго исцеле́ний и гра́ду твоему́ вели́кое утвержде́ние.

Кондак, глас тойже

     Боже́ственнаго и пречестна́го святи́теля Христо́ва, но́ваго чудотво́рца Алекси́я, ве́рно вси пою́ще, лю́дие, любо́вию да ублажи́м, я́ко па́стыря вели́каго, служи́теля же и учи́теля прему́дра земли́ Росси́йстей. Днесь в па́мять его́ прите́кше, ра́достно возопие́м песнь богоно́сному: я́ко име́я дерзнове́ние к Бо́гу, многообра́зных нас изба́ви обстоя́ний, да зове́м ти: ра́дуйся, утвержде́ние гра́ду на́шему.

 

^ Великомученика Георгия Победоносца (23 апреля/6 мая)

Тропарь, глас 4

     Яко пле́нных свободи́тель и ни́щих защи́титель, немощству́ющих врач, правосла́вных побо́рниче, Победоно́сче великому́чениче Гео́ргие, моли́ Христа́ Бо́га, спасти́ся душа́м на́шим.

Кондак, глас тойже

     Возде́лан от Бо́га показа́лся еси́ благоче́стия де́латель честне́йший, доброде́телей рукоя́ти собра́в себе́; се́яв бо в слеза́х, весе́лием жне́ши, страда́льчествовав же кро́вию, Христа́ прия́л еси́, и моли́твами, свя́те, твои́ми всем подае́ши прегреше́ний проще́ние.

 

^ Равноапостольных Мефодия и Кирилла, учителей Словенских (11/24 мая)

Тропарь, глас 4

     Яко апо́столом единонра́внии и слове́нских стран учи́телие, Кири́лле и Мефо́дие богому́дрии, Влады́ку всех моли́те, вся язы́ки слове́нския утверди́ти в Правосла́вии и единомы́слии, умири́ти мир и спасти́ ду́ши на́ша.

Кондак, глас 3

     Свяще́нную дво́ицу просвети́телей на́ших почти́м, Боже́ственных писа́ний преложе́нием исто́чник богопозна́ния нам источи́вших, из него́же да́же до днесь неоску́дно почерпа́юще, ублажа́ем вас, Кири́лле и Мефо́дие, Престо́лу Вы́шняго предстоя́щих и те́пле моля́щихся о душа́х на́ших.

Величание

     Велича́ем вас, святи́и равноапо́стольнии Мефо́дие и Кири́лле, вся слове́нския страны́ уче́ньми свои́ми просвети́вшия и ко Христу́ приве́дшия.

 

^ Рождество Пророка, Предтечи и Крестителя Господня Иоанна
(24 июня/7 июля)

Тропарь, глас 4

     Проро́че и Предте́че прише́ствия Христо́ва, досто́йно восхвали́ти тя недоуме́ем мы, любо́вию чту́щии тя: непло́дство бо ро́ждшия и О́тчее безгла́сие разреши́ся сла́вным и честны́м твои́м рождество́м, и воплоще́ние Сы́на Бо́жия ми́рови пропове́дуется.

Кондак, глас 3

     Пре́жде непло́ды днесь Христо́ва Предте́чу ражда́ет, и той есть исполне́ние вся́каго проро́чества: Его́же бо проро́цы пропове́даша, на Сего́ во Иорда́не ру́ку положи́в, яви́ся Бо́жия Сло́ва проро́к, пропове́дник, вку́пе и Предте́ча.

Величание

     Велича́ем тя, Предте́че Спа́сов Иоа́нне, и чтим е́же от непло́дове пресла́вное рождество́ твое́.

 

^ Славных и всехвальных первоверховных апостолов Петра и Павла (29 июня/12 июля)

Тропарь, глас 4

     Апо́столов первопресто́льницы и вселе́нныя учи́телие, Влады́ку всех моли́те мир вселе́нней дарова́ти и душа́м на́шим ве́лию ми́лость.

Кондак, глас 2

     Тве́рдыя и боговеща́нныя пропове́датели, верх апо́столов Твои́х, Го́споди, прия́л еси́ в наслажде́ние благи́х Твои́х и поко́й; боле́зни бо о́нех и смерть прия́л еси́ па́че вся́каго всепло́дия, Еди́не све́дый серде́чная.

Величание

     Велича́ем вас, апо́столи Христо́вы Пе́тре и Па́вле, весь мир уче́ньми свои́ми просвети́вшия и вся концы́ ко Христу́ приве́дшия.

 

^ Равноапостольной великой княгини Российской Ольги
(11/24 июля)

Тропарь, глас 1

     Крила́ми богоразу́мия впери́вши твой ум, возлете́ла еси́ превы́ше ви́димыя тва́ри, взыска́вши Бо́га и Творца́ вся́ческих, и Того́ обре́тши, пакирожде́ние креще́нием прия́ла еси́; дре́ва живо́тнаго наслажда́ющися, нетле́нна во ве́ки пребыва́еши, О́льго присносла́вная.

Кондак, глас 4

     Воспое́м днесь Благоде́теля всех Бо́га, просла́вльшаго в Росси́и О́льгу богому́друю, да моли́твами ея́ пода́ст душа́м на́шим грехо́в оставле́ние.

Величание

     Велича́ем тя, свята́я благове́рная княги́не Росси́йская О́льго, и чтим святу́ю па́мять твою́, ты бо мо́лиши о нас Христа́, Бо́га на́шего.

 

^ Равноапостольного великого князя Владимира (15/28 июля)

Тропарь, глас 4

     Уподо́бился еси́ купцу́, и́щущему до́браго би́сера, славнодержа́вный Влади́мире, на высоте́ стола́ седя́ ма́тере градо́в, богоспаса́емаго Ки́ева; испыту́я же и посыла́я к Ца́рскому гра́ду уве́дети правосла́вную ве́ру, обре́л еси́ безце́нный би́сер, Христа́, избра́вшаго тя, я́ко втора́го Па́вла, и оттря́сшаго слепоту́ во святе́й купе́ли душе́вную вку́пе и теле́сную. Те́мже пра́зднуем твое́ успе́ние, лю́дие твои́ су́ще: моли́ спасти́ся держа́вы твоея́ Росси́йския нача́льником и мно́жеству владо́мых.

Кондак, глас 8

     Подо́бствовав вели́кому апо́столу Па́влу, в седи́нах, всесла́вне Влади́мире, вся, я́ко младе́нческая мудрова́ния, я́же о и́долех тща́ния оста́вль, я́ко муж соверше́нный, украси́лся еси́ Боже́ственнаго Креще́ния багряни́цею; и ны́не Спа́су Христу́ в весе́лии предстоя́, моли́ спасти́ся держа́вы Росси́йския нача́льником и мно́жеству владо́мых.

Величание

     Велича́ем тя, святы́й равноапо́стольный кня́же Влади́мире, и чтим святу́ю па́мять твою́, и́долы попра́вшаго и всю Росси́йскую зе́млю святы́м креще́нием просвети́вшаго.

 

^ Пророка Илии (20 июля/2 августа)

Тропарь, глас 4

     Во пло́ти Ангел, проро́ков основа́ние, вторы́й предте́ча прише́ствия Христо́ва, Илиа́ сла́вный, свы́ше посла́вый Елиссе́еви благода́ть неду́ги отгоня́ти и прокаже́нныя очища́ти, те́мже и почита́ющим его́ то́чит исцеле́ния.

Кондак, глас 2

     Проро́че и прови́дче вели́ких дел Бо́га на́шего, Илие́ великоимени́те, веща́нием твои́м уста́вивый водото́чныя о́блаки, моли́ о нас Еди́наго Человеколю́бца.

Величание

     Велича́ем тя, святы́й проро́че Бо́жий Илие́, и почита́ем е́же на колесни́це о́гненней пресла́вное восхожде́ние твое́.

 

^ Великомученика и целителя Пантелеимона
(27 июля/9 августа)

Тропарь, глас 3

     Страстоте́рпче святы́й и целе́бниче Пантелеи́моне, моли́ Ми́лостиваго Бо́га, да прегреше́ний оставле́ние пода́ст душа́м на́шим.

Кондак, глас 5

     Подража́тель сый Ми́лостиваго, и исцеле́ний благода́ть от Него́ прие́м, страстоте́рпче и му́чениче Христа́ Бо́га, моли́твами твои́ми душе́вныя на́ша неду́ги исцели́, отгоня́ при́сно борца́ собла́зны от вопию́щих ве́рно: спаси́ ны, Го́споди.

 

^ Усекновение главы Пророка, Предтечи и Крестителя Господня Иоанна (29 августа/11 сентября)

Тропарь, глас 2

     Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́л бо ся еси́ вои́стину и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго грех ми́ра и подаю́щаго нам ве́лию ми́лость.

Кондак, глас 5

     Предте́чево сла́вное усекнове́ние смотре́ние бысть не́кое Боже́ственное, да и су́щим во а́де Спа́сово пропове́сть прише́ствие. Да рыда́ет у́бо Ироди́а, беззако́нное уби́йство испроси́вши: не зако́н бо Бо́жий, ни живы́й век возлюби́, но притво́рный, привре́менный.

Величание

     Велича́ем тя, Крести́телю Спа́сов Иоа́нне, и почита́ем вси честны́я твоея́ главы́ усекнове́ние.


 
Как помочь