Текст

[I]. Царство великого государя царя и великого князя Ивана Васильевича, всеа Русии самодержца

В той же главе:

[1]. О опришнине

[2]. О новгородцком пленении, о пролитии крови острия меча во гневе ярости царевы на град святый

[3]. О царице и великой княгине Анастасие Романовне и о чадех

[4]. О царевиче и великом князе Иванне Ивановиче

[5]. О брате царя Ивана Васильевича всеа Русии князе Владимере Ондреевиче Старицком

[II]. Царство благочестивое, иже от поста просиявши, великого государя царя и великого князя Феодора Ивановича всеа Русии

В той же главе:

[1]. О заклании¹ государя царевича и великого князя Димитрия Ивановича в 99-м году, и о приходе крымского под Москву; и Борис Годунов з бояры и воеводы ратию против крымского в обозе стоял; и как крымсково царя Бог победил, и как он, крымской хан, ис-под Москвы побежал; и Борис Федорович Годунов з бояры и с ратными людьми мешкал 3 дни, чтобы царь подале ушол; и спустя 3 дни ходил Борис с Москвы, взяв рать из обозу всю, сказал государю: гонял за царем до Серпухова и побил. Тут же и о занеглинеском пожаре Борисовых зажигальников. Все деялось в одно время, в том же 99-м году, в одних неделях и днях

[2]. О пострижении Борисом царицы Марии, матери царевича Димитрия Ивановича, по смерти его, и с Углеча ссылка ея

[3]. О Богдане Бельском

[4]. О принесении мощей святаго царевича Димитрия Ивановича с Углеча к Москве

[III]. О обирании Бориса Федоровича на царство в Новом Девиче монастыре и о воцарении его; и как ево для в тот монастырь со кресты ходили, а после его Борисовы смерти престали ходить; и о серпуховском его² походе 106-го году, как ходил против царя, и о том, как при царе и великом князе Феодоре Ивановиче и при нем, Борисе, прелестники церкви ставили и образы писали во имя ангела их

В той же главе:

[1]. О крестном целовании царю Борису Федоровичю

[2]. О утвержении имени писмены тогожде

[3]. О Борисе же царе

[IV]. Богопустное на Московское государство Ростригино беззаконное царство

[1]. Притча о цареве сыне римском, иже пострижеся и паки иноческий образ попра, розстригся и женитися восхоте

[V]. Царство царя и великого князя Василия Ивановича Шуйского

[1]. О царе Василие Ивановиче и о таборех

[2]. О князе Михаиле Васильевиче Шуйском Скопине, как в то время был в Нове Городе в Великом, и о его побеге из Нова Города

[3]. О князе Михаиле же Шуйском

[4]. О пещи и о ходех со кресты

[5]. О воровском бежании с Хутыни и о приходе их

[6]. О княжь Михайлове к Москве из Новагорода походе

[7]. О патриархе Ермогене

[8]. Летописец вкратце тех же предипомянутых царств и о Великом Новеграде, иже бысть во дни коегождо царства их

[9]. О крестном целовании королевичю Владиславу

[10]. О вдовстве Московского государства – 2 притчи║12

Самодержавная вправду царствия благочестивых иже царствоваша по благодати новому Израилю³, велицей Росии, при нашем роде, преимея во всех

превысочайшаго во-истинну и преславнейша всех бывших, славиму же от конец небес до конец их, яко толице о нем протекши, до их же места возможна бе по вселенней проходити слуху, зане преобладательне сродных на се имя, яко же Макидон⁵ некогда, вселенней царствуя, свойственейши же рещи о нем, – инорога⁶ бывша во бранех, паче же во благочестних над всеми пресветлыми, государя великого князя Ивана⁷, новому по крещении се бывшу по отцех в Росии с приложеными их царствии ║13 благоданну царю сына, иже всею великою Росиею господьствующа, государя Василия Ивановича⁸ великого князя и царя корень по коленству и муж прародителей своих прозябения готов, помазан к царству на стол его и не проходен до зде лет и конец от рода в род; вечное благородие ему бе отеческое неувядаему послания цвет, яко утренняя от солнца восходит заря. Не бо точию от Рюрика начало имяху о нем, но от самого Августа цесаря⁹ римскаго¹⁰ и обладателя вселенною, влечахуся во своя роды, яко день днесь; паче же ║об. сроднаго естества причтеся по благочестии преже его благоверным бывши; благочестивых благочестивнейши, законно же и святолепно сынови от отец доднесь происхождаху. Таков убо от древле самодержавных мя от род, и даже и Бога в конец не прогневаша, четырьма краевы вселенныя доныне царствия тех водружена непоколебимо утвержахуся. И убо о утвержении сих царствиях речением краткословне сия довлеют. О управлении же того державы благодатноименнаго царя поврещи, его лет юности ║14 и иже к приближению средовечьи старости сокращене реку, ради последующаго о нем без продолжения слова. Время бо лет его всяко бысть; иже бысть во юности же паче премножае во гневе презельныя его подвигшияся на ны пребывшая в нем от грех, иже в нас, без милосердия его ярости, зане к ярости удобь подвижен бе, купно по естеству и за гнев; паче к присноверным, иже в руку его под игом его сущим, во своя ему люди величайшим и малем же, ║об. неже к сопротивным, суров обреташеся и неприступен, ко им же якову быти ему достойно бе, сим не сицев бысть от разжизающагося в нем на люди своя ему пламенна гнева.

От умышления же зельныя ярости на своя рабы подвигся толик, яко возненавиде грады земля своея вся и во гневе своем разделением раздвоения едины люди раздели и яко двоеверны сотвори, овы усвояя, овы же отметашася, яко чюжи отрину, не смеющим отнюдь именем его мнозем градом нарицатися запрещаемом им, и всю землю державы ║15 своея, яко секирою, наполы некако разсече. Сим смяте люди вся, и пред лицем си вместо себе, кроме¹³ сына своея крове, от Измаилт¹⁴ инаго некоего верна царя^15,16 на время поставль, себе же раболепно смири, и малую си часть имения достояния оставль, помале паки все восприят, – тако Божиими людьми играя. Вельможа же царствия своего многи и добромыслимая ему изби, прочих же в чюжеверные земли от себя изгоняя и во онех место от окрестных стран приезжающая к нему возлюби, и большими дарованьми ║об. тех богатя, от них же инех и в тайномыслие си приятова; других художествы врачевные хитрости к нему примильшихся, изветом здравия ему своея мудрости растворение приносяще, о них же истинне рещи, – души его вред, телесное паче нездравие, вкупе же с сим и ненавидение ему на люди его нанесоша. О сем чюдимся много, яко и средоумным се мощи бы разумети, еже не яти веры врагом своим во веки; он же, толикий¹⁷ в мудрости, никим побежден бысть, разве слабостию ║16 своея совести, яко главу ему свою волею во уста аспида¹⁸ влагати; врагом, от стран пришедшим, его же всем противным не возмощи бы ни многими силами проодолети, аще не бы в руки тех сам ся вда. Увы! вся внутренняя его в руку варвар быша, и яже о нем восхоте да сотвориша, лишше не глаголю – сам себе наветник быв. И сим земли всей велик раскол сотвори и усомневатися всем в мыслех своих о бываемом; Бога самого премилостиваго ярость на себе разже, ║об. сим разделением, мню, – нынешнея всея земля розгласие яко прообразуя оттуду до зде: сам тогда на ню руку не благословля наложи, даже оно и доныне неутверженым от грех колеблемо, и несть ю до единаго ныне от человек утвердити могущаго, по Христову гласу¹⁹, яко «всяко царство, раздельшееся на ся, не может стояти», и прочее. Яко волки ото овец, ненавиденых им, отдели любезныя ему, знамения же на усвоеныя воины тмообразны наложи: вся от главы и до ног в черное одеяние облек, сообразны же одеждам их ║17 и коня им своя имети повеле; по всему воя своя вся яко бесоподобны слуги сотвори²⁰. Идеже они на казнь осужены посылаеми суть, – яко нощь темна видением зряхуся и неудержанно быстро ристаху свирепеюще, ови державнаго повеления презирати не смеюще, ови же самохотию от немилосердия работающе, суетне богатящеся, взором бо единем, неже смерти прещением, страшаху люди. Се чтущим ото образа вещи свойство ея знатно есть.

Множае же всея земля, ненавидимых царем всех, яже на люди ║об. моя²² ярость гнева своего некогда излия. Подобою по всему, яко нечестивно того бе на мя нашествия, понеже удобен оболгателем послушник бысть, мнением единем неиспытне водим. Яко от туждих и неверных не бы непщевал бых есм толиких зол пострадати, яко же аз труда от господьствующаго мною, оболгатель нанесением на мя, от руку его приях: упоил бо всю землю мою кровми, различными муками вся люди моя умучая, ║18 нетокмо сушу покры, но и водное естество ими згусти, – Бог един посреде того и онех виновное сведый. Яко всяко место телес наполнися падших ото убивающих рук, до толика бе, яко не мощи пожирати трупия мертвых всея твари животным, яже по земли рищущим, и яже в водах плавающим, и яже по воздуху парящим, яко довленым быти им и чрез потребу, множайшим же плотем не брегомым за страх и согнивающим, гроб им бяше место их. Кто идеже бе свидетелие ║об. сим, со светилы небо и земля вкупе и со иже в ней. Корысти же вся людий моих царь по жребию равно с рабы роздели. Подробну же бывшаго на мя всего царева гнева не бе возможно убозей сей хартийце вместити, ниже кому от земных количество погубления людий исчести, их же число токмо Божия суда день объявит в пришествие Его. Лето же время царска гнева на мя тогда течаше к седьми тысящам 78-е²³, может же о сих исполнити всяко словесы непостижения моего скудость тождество числа самого всего псалма ║19 сила и соседствующаго ему 79-го²⁴ крепость глаголом во исполнение даст.

А яже во мне градограбители и убийца паче, тогда мнимыя си корысти вземшия, в самый царствия град яко главню некую, искр полну, ветром раздомшую, от кровей омрачившеся, с собою внутрь неразсудне внесоша; не убо же сими на продолжена лета обогатишася тогда, ниже в притяжания вся всем избыша и во излишество, но яко саморазжено углие огнено во град к запалению совнесше в неведении, сами яко подгнету сим ║об. царску граду всему сотвориша. И яко на утрия некако, на лето по сих 79-е круга обшествие²⁵, яко корень и главу со утробою, еже гнездо всего царствия²⁶, присное пребывалище водворения самого царска с своесущими в нем благими всеми, Измаиле семя, Агары же порожение²⁷, богопустно от восток нашедше, все огнем запальше, испепелиша. О таковых речеся: «иже кто чюжих, желает, помале восплачет и своих лишаем»; и паки: «еже не своя усвояти, яве зло бывает». Земнородных же число бе тогда погубления в нем ║20 ничим же мнее, иже на земный Сион Титова древле нашествия²⁸; яве греховнаго ради и зде поползения самого всех главы царя, яко же иногда Давид подъя, иже за грехи ему возвещено от Бога, иже избра си от трех едину казнь – поражение смертно²⁹ людий множеству рукою ангела³⁰. И яко же той тогда, казнь избрав, сладце претерпевая, тако и сей печали сея наведение молчанием кротце одолевая, сице о сем Божию на неправедныя суду пришедшу праведну; Всеведцу и Смотрителю Богу скоро отмщение насилующим ║об. сотворшу, – язву мести, неприкладну скорбию и незабытну леты, ниже коею радостию одолену, в царюющаго самого рабоубителя и мирогубителя сердце внутрь углуби и болети неисцелно ему сотвори.

Ныне же не вся по ряду, яже тогда обоюду о мне и самом царствии бывшая изречена, но свидетельне времене потребою, елика ми на память слышанием взыдоша, толика и написашася к прочих зде словес исполнению приведена; пространство же писаньми всех скорбей беды сея днешним краткословием, ║21 не невмещения ради удержав, спокрых, но от многопрехождения лет забвения множеством. Вся бо та, иже тогда прилучшимся и еще и доныне жизнь скончевающим и ум здрав имущим и могущим же изглаголати вся подробну, попустих и оставих в прочее. И нам убо в делных словес путишествие естества немощию утружшимся, и яко в небурне пристанищи мало отдохнутие приимше и в станищи по словесех препочивше предварших вещей, яко залог некий словесем целость отдати ║об. подщимся, в прямный путь устремившеся.

Жизнь же яростиваго царя, глаголют нецыи, преже времени ближнии сего зельства его ради сокращения³¹ угасиша: Борис³², иже последи в Росии царь бысть, сложившийся купно з двема³³ в тайномыслии о убиении его с настоящим того времени царевем приближным возлюблюником неким, глаголемым Богданом Бельским³⁴, Богу смотрительне сему сотворитися бы тем попустившу, прозря исполнити всяко пребудущия. О смерти же государства его окрест вся владычествия, иже земли его конца тех держав прикасающаяся, ║22 не точию врази и близ сущии, но и мнимы ему вдале други, лишением его, яко приобретением неким велиим, зело обрадовашася, понеже, егда он жизньствова, тем во мнозех сопротивен бе отъятием градом их, прибавлением же к своему его царьствию; мечь бо десница его с воздуху долу не туне свожашеся на противныя, ниже престая ощути. И что чюдно еже коварско радование о смерти его странных? Но убо и рабы его, вельможа вся, от зазления его стуживше, сии угашением живота ему оскорбишася тогда ║об. печалию не истинною, но в тайноприкровении лстивне, лютость ярости его памятию в себе обновляющем, содрогахуся, яко не яти себе им веры еже мнети того умерша, ли во сне мечтаемо помышляющем. И едва яко от сна возбнувшемся, в себе им пришедшим, не приснение, но истинну быти разумеша, убо помале многи некия от сигклит³⁵ благородныя в первых, иже мнимыя стопы, седины своя помазавше уханми мира, з гордостию в лепоту ся облекоша и еже младоюнныя, и волю свою творити начаша; обновляху ║23 свою обновлением и пременением временнем, яко орлы, юность, о оставшем же сыне цареве Феодоре³⁶ небрегше, мневше его яко не суща, его же Бог уничижити восхоте; вмале же силентияры³⁷ вси от срабнаго Бориса одолени, погибоша всяко един по единому; и яже по сих – о сем пространнее впреди слово о нем бывшая изъяви.

Оного же Иванна, превеликого царя, разнее же по единому описовати вся живота его царствия дерзающе лета, како то когда царствова во всю жизнь свою, не моея в худости дело дерзости, не бо могу, ниже хощу ║об. за преимущее оного сана величество, изряднее же за благочестие, иже правыя во Христа веры, яко Тройческое поклонение во единстве и единство в Троицы, по отцех даже до смерти пастырски цело ему соблюдшу непоколебимо, ниже позыблемо. И яко чюдно се! Таков бо той бе страшен всем: егда восхотел бы прочих о вере немужество обнажити, яко мати дети страшащи, – могл бы страхом своея власти, поне искушая на час, мало некое от истинны уем, ли прелог сотворив, бежащих нестоятельное обличити; ║24 веде, яко и ото освятованных³⁸ обрелися бы таковии, не у супротив страху его ставшем и нездравое искушение веры возбранити могущим, едва бы могли мали обрестися еже от людий во инех ему первие двоедушие свое явльши. Се глаголю не яко бы церковью царя яко играти показующу, но самоизвольную его о вере твердость известую, паче же нестоящих бежание обнажаю, вере сих слабость. Оно же и совершен страх ему на люди приемшу и то чюдно преложшем своего на слабость естества крепость; и еже сопротивное, ║об. верному же слузе сицевому, царю нашему, за непоколебимое веры столповиднаго его стояния и прочих утвержение венцем приложение, добре бо он грамотечное о истинне по философех научение сведый³⁹, к сим же и внешнее немнение. Сего ради не праведно о царюющем худым многословити, ниже без муки, иже аще что порочно; лепотнее бо есть царьское безообразие жития молчанием покрыти, якоже ризою, иже о Нои, праотцы нашем, от благоискусных детей его срамоте того прикровение бысть⁴⁰; и яко же оному, ║25 упившуся вином, сице и сему, осрамившуся грехом, ему же причастни вси.

О времени же юности его, еже о сопряжении супружества, и от деторождения же преже сих им бывшая, зде в дольнейших словесех приведох, к прочим его делесем не сопримешая; вем бо, яко иже подобаше сказанием сия приложити прежде, но егда что в мысли обрелося, то и вчиних, идеже что обретохом, не предъизбирающе, ниже по чину коемуждо подобных мест. Бывает убо в раздрабление удов главе лежати кроме прочих частей ║об. всего телесе, послежде она, но обоя нога не гнетца, но глава идеже ни суть. Ибо берущии в лесопроходных местех и на полях земноплодное растуще от снедных, такожде не рачит⁴¹ собиратель по ряду в сосуд влагати возрастом их величества и не смешивая большия с среднею и малою; но все тем тщание бысть, еже первие болшую, потом же малую, еже бы спешнее комуждо свой сосуд собираемых наполнити и варити братию свою, в собраниях тех не остая, паче же да ни постигнутися им, не объятем быти нощию и остати вне своего дому, ║26 ниже от дождев окропитися, аще излише избудут; егда же доидут домов своих, розбирают принесшая малая с великими, елико хотят. Сице и о глаголемых зде благоразсудне разсудити не украшающее, но спешащее, а не яко неве́дущу, по ряду чина; по сему образу, яже во инех местех сложений оних сомнитися кто, еже не по ряду или месте своем чему вписатися, ниже по чину, такоже молим не осуждении не разсуждати, но в себе комуждо осуждение убивати страсти, по чину же ряда в мысли слагати си, елико кто ускорит, ли по своему хто чину хощет ║об. изрядне уставити, власть имать от своей воли, о сем не зазрит. И научитися лучшаго не отряцаю, ве́де яко моя недостижне по всему далече книжнаго разуму, неприражения ради, сие все быти уставися; но иже и не сподобитися от неведения, многим терниом забвения от лет прехождений, аще и первобытно вписалося послежде, существа дело неповредно бысть; понеже в нуждах разсеянна ума, яко во угле темне, бысть сотворено, и не бе воля иже по чину изрядне украшением хотящее вся предъизбирати, и добро ║27 разсудливый се разумеет, аще чтущеи тою же немощию обложени, еже и мы. Но увалихом словесы сими о положении начатых словес, в них же истязани быти от неразсудливых чаяхом.

Не безженно бо ни безплодно житие жити: свенечницу же своему царствия высоты не от стран призва, ниже благородием стронну себе потребова, но своея его земли дому изообрел, от синклитска роду избрав дщерь, душевными ║об. добродетельми телеснаго благородия пребольшу же, яко ряснами некако украшену всю, Анастасию, росийска жребия мирови царицу, с нею си царством венчан быв и сопрестольну си во царствии утверди. И паче по еже к родитию ей, она бо, яко маслина доброплодна, ему устрои царским того прижитием пяторице по числу отраслем сия бе родительница, от них же сына три и дщери две⁴³. Сии же о Господе млади почиша, и брат сих Димитрие некако, якоже прилучися, иже все наследницы быти нами чаеми; от них же единому по первем не толико ║28 по плоти, но, яко Анна Самуила⁴⁴ некогда, у Наздавающаго младенцы молитвою испросив по роду, иже и к царствия наследию по отцы и брате, но мало остал бе, о нем же множае предъидый слово скажет.

Вящщий же сего брат благодатным именем от Бога дарован, тепл отцу по всему именем и мудростию купно с храбрости, не умали в добротах ничим же существа. И уже к совершению грядый возраста, третия десятицы лет свене трех число достизая своя ему жизни, троебрачен же быв⁴⁷ ║об. отца волею, и не яко прилучением смерти в мужестве лет частое подружием его изменение бысть, но за гнев еже нань они свекром своим постризаеми суть; ибо при концы отча старости житие скончал бе, по жребии бо не получив земнаго, но на будущее пресельник царствие. Непщую сего быти и к страданию близ, от рукобиения бо отча, глаголют нецыи⁴⁸, живот ему угасе за еже отцеви в земных неподобство некое удержати хотя. Нань же очи всех о державе царствия упованием исчезоша, ║29 обаче же погрешихом, и лишения ради его тогда земля оскорбися вся и в безнадежие отнюдь сведеся, к царству отческу ветхость, братне же недовление помышляюще; стонанием на мнозе слезным источником от сердец всех пресохшем, к самобратному его Феодору, о державе надеждою не внемлющему, на обою ногу храмлюще, неверованием боляху. Претокохся, и аще не бы смертное предварение оному, веде, могл бы толики и таковый к земли своей приближение язык, остроту нахождения их, ║об. юностным си устремлением притупити⁴⁹: от показания его мудрости и мужески крепости се наручно бысть. Явлен по отцы воста младый инорог⁵⁰ на противныя, якоже от востока даже и к западу на нечествующих, иже земли его преседящих, яростным оком на ня взирая, врящею юностию ретяся и, яко некий невседален жребец и неприступен обуздоватися, не повинуя никому же, свободне отекая, пасяше верных толико стадо, люте на оны дыша огнем ярости своея, пламенны искры на тыя, отрыгая, ║30 пущаше; соседствующим варваром земля своея бывшую ми обиду иногда той плотский инорог самошественне вскоре тех, яко овца, поразити хотя, о Бозе уповав. Навладычествуяй и всеми, Иже царем советы Своим судьбам подлагая, под иго Своея вселенныя власти того приведе, предложений его быти не попусти, но, яко уздою некако, пределом смерти сего удержа, лучшее ему предъизбра, к себе бо и позва, в веце оном пред лицем Своим Констянтину цареви⁵¹ своинствовати на невидимыя ║об. и видимыя враги и з сродными близ ему сущими Владимеричи братома двема⁵² и прочими тацеми, в защищении отечества состадуяся, ополчеватися тому повеле; в настоящем Всемогий брату его Феодору пред будущем земное царство на лето устрояя, еже и сотвори по днех.

Брат же сих видоангелен бе, именем же двоематерен⁵³ по толку⁵⁴, еще сый в чреслех родительных. В молебне по завещанию путишествую⁵⁵ издалечие разстояний града царска, царю, отцу детища, водоносилы ко отечеству ║31 воспять с Бела-озера⁵⁶ от лавры святаго отца Кирила⁵⁷ спутешествующу, – о, неизследному Божию совету! случися внезапу отроку от рук доилица на воду ниспасти, сном той погрузившися, и ту ангелы душу младенцом подъемшим. Ужасно во-истину чюдо и слез подобно: не прилучьшим же ся ту неверия близ, яко не у ли ту мнози оберегателе! Сие же таково единство не без Промысла бысть: знаем бо есть Господь, судьбы творя в делех руку Своею и, яко добр Строитель, о тварех Своих промышляя, недоведомое ║об. совета Своего в себе Самом сокры.

Не просто же и оного, благодати тезоименного⁵⁸, иже отче наследствова имя, зачатие же и рождение бысть, якоже писание поведует, яко и сего родителем молитва дарова. По еже бо смерти младенца, брата сих Димитрия, царю самому отцу тех и матери к царствия граду своему им отечества предиреченный путь от лица града Ярославля⁵⁹ скончевающем, водотечный пременив царскою всякою властию к матери градовом по хрепту земному изволи двизатися. И егда града ║32 Переаславля⁶⁰ дошедшу, в лавре преподобнаго чюдотворца Никиты, у целебоноснаго гроба его, вкупосопружное моление прилежно совершив, святому по Бозе чада своего лишение и безгодную всяко неже царску смерть богосмотрительнаго прилучения, з горькими рыданьми своего вопля плачь, яко к живу, возвышенными гласы бедне возвестиша вкупе, и своих им грех безсрамне обличение, и неприкладную таковую печаль по Бозе нам возложиша всю, могущаго печаль их ║об. скоро преложити на радость. И по молитве воставшем и от лавры во святый град⁶¹ пришедшим в дом своего достояния царска, путешествием утружшемся и от плача мало отдохнутием утишившимся, святому у Христа испросившу, скорби их назирательне облегчевающу, ту они обнощевающе почиша, царь позна жену свою, яко Адам Евву. Вне породы некако святому нощеявлением зачатие сына царю благодати тезоименна известившу⁶², та же царствия града самодержцу дошедшу, и помале ║33 законом естества детищ благолепен родися: пот⁶³ печали царюющим, яко губою радости, отер святый. Да ни се праведно бе утаити: во время бо воздоения отроку в болезнь впадшу, святыня многи от всея земля их исцеления ради младенча к молебнопению в совокупление едино снесшимся, яко же писание во святаго житии поведует, прослави Бог посреди собора своего угодника Никиту: освященная в сосуде вода с вериг его, наднесене бывши над ню руке строка, абие кроме вод снесеных всех, чюдеснаго Никиты ║об. вода воскипе. Дивно чюдо! Тогда скроплением купно воды младя исцеле, болезни здравие отдоле, и оттуду до самых жизни его предел святый во всех обстояниох отрока заступаше. И от сея вины обитель святаго самодержавнии, всяцех потреб наполнивше, распространиша, и общежительством и прочими честми зело почтоша, с великими лавры сравниша⁶⁴, не сущи ей тацей первие, и нераздвоено в ню свое шествие на времена с лаврою преподобнаго Сергия⁶⁵ сотворяше. Отрок же молитвами ║34 преподобнаго от лета на лето устрабляшеся, к совершению мужества приближением грядый, яко же о нем выше речено бысть.

И убо от язык приседящая земли нашей безбожная Литва⁶⁶, уве́дев яже о нем стекшуюся в нем врящую юность купно с крепостию мужества, и могущу ему, неудержимаго стремления его смелством зазлив, нанести досаждение всяко, – плотску господу их тогда в них не сущу, от жизни сея смертию соотведену⁶⁷, они лстивне умыслиша, молением испрашает у самого царя нашего, отца его, ║об. да дастся им, земли их, той храбромудрый и пребольший сын его господствовати над ними. И абие Божий суд истинному совету их возбрани, просимаго ими, некончаемый век приложи, не мимотекущаго бо и тленного, не убо угол един тому, но все небесное царствие дарова, яко же пишет: «просите и не приемлете, зане зле просите». Прочии же глаголют⁶⁸, яко о Феодоре, брате сего, тех прошение бысть. В день же преставления пребольшаго брата тварь вся земнородным болезновати Богом повелена бе, иж воздух самого всего солнца заступи мраком, множеству ║35 людцкому срыдая, воду от недр своих, яко слезоточны капля, испущая, зря всего православия царя⁶⁹ зашедша во гроб. Великая бо и пресветлая тогда угасе свеща мирови, благонадежный нам в заступаемых; другий нам толик плотский инорог⁷⁰, по нем не оста, и убо окрест земля их языки о пременении живота ему не мнее, еже о отчи смерти, восплескаша руками, но яко празник им своих ликовати. Нам же токмо второсамобрат его, иже молитвеный рог крепости⁷¹ нам по нем бывый, о нем же ║об. прежде к державе вси надежею о нем отчаваеми, неверием дремлюще, якоже выше рех, зане не бе «брань его к плоти и крови» по Писанию⁷², но молитвою противныя ему одолеваша. И толико ему возмогаше молитвеная сила, яко Божию тому милость на ся от сея привлещи; нечто что и чюднее пристяжа в добродетелех светлости, яко и пророческа дара часть, аще и не зело явленне, но довлении сведят; и яко же в жизни его, не очистив совесть, некогда страшно бо дерзающи и приступающим близ ║36 к тому приступити, по Бозе не обличителен согрешающим; яко не ве́ден бысть убо согрешит кто, аще днесь верою и в молитвах того призовет, и да не обленюся аз, предваряя всех. Во дни бо его миротворительная десница паче человечески надежи самодействене та исправляя и содержа того царствие.

Брат же бе ему двоероден по плоти, ║об. на отечни си достоянии уделне седя, к нему же оклеветаху его рабы его, извет совершенна, яко желати ему, глаголаша, царства братня⁷⁴ великаго жребия. Он же, на сего разжен быв яростию, ят веру клевещущим, утвердив в мысли своей истинно быти се, наученья лукаваго не позна и, яко лев на пути негде срет, порази брата си напоением смертным купно з женою и с сыном⁷⁵: вси принужени быша испити смертные горести чашу от повеления руки его. Он же, сотворив, яко лов некий уловив сладок, ║37 вкупе со убийцы воскликну, гласу на воздух вознесше; рабов же всех дома его, свене клевещущих, различие умучи муками, женску же полу всяко наругаяся срамне, и яко чюже бе благочестивых творити, иже нелеть и глаголати зде неподобное; дерзнути бо не смею нагло глаголанием еже обнажити весь студ венца главы его, но вмале рех в прикровении словес. Яко не токмо еже он самого си брата, но и наследника ему тою же смертию осуди, корень и со отраслью от земля ископа, изверже, ненаследованен того род ║об. остави, их же кровь до века яко Авеля вопиет на Каина⁷⁶; яко же общу с родительма отроку смерть принесе, яве и венцем приятие сим неразделно бе. Часть же достояние их державный к своему великожребию присовокупи и во свое имя усвоив рек. Во обличение же царь своего си брата паче убийства, неже в память рода того, токмо дщерь едину, младенца сущи же⁷⁷, оставль, ненаследованное наследие по них, сию же послежде яве устрои, отца ради, обручену некоему Еллину, сопряже⁷⁸ ║38 за славна краля, лестию притворения яко за господина, истинною же – за нечестива и худа, яко не бы изволил за таковаго вдати своея крове. Он же сию отсюду в своеверных землю завел. И скончавшуся тамо мужу ея, времени зовущу, благочестию рачитель, сын оного же великаго царя, иже по нем царствуяй, со Христом нами Богом избран, Феодор в пресветлыя своея державы дни, по смерти мужа ея, от тамо сущаго нечестия приведе во свет сего благочестия, изыскав ю, во своего паки наследие отечество на первое богоразумие извед, ║об. с прижившею ея тамо дщерью ж. И по воли ея ону во мнишеска облек и в лавре⁷⁹ общей некоей⁸⁰ близ своего обыкшаго царскаго путешествия по своему их достоянию удовлив, посади во ограде словесных овец соводворитися, купно инокинь состадуяся: и ту назираше ю, утешая часте своим святопришествием, удовляя потребами, сродство незабытни храня и отча си недостатки исполняя даже до дне смерти своея. Дщерь же тоя помале пременися на будущее, святым крещением ║39 оглашена по чину родительну.║40

И по первем убо брата два, единоотечни убо, по плоти, материй же обаче, единовременно вкупе отца остаста⁸¹. И вящщий⁸² ею по толку Божия си дара стяжа имя⁸³, по дарованней же благодати паче зело благочестив бе, и елик телесным благородием по отцы, множае душевным предуспевая, первообразное бо соблюд, матерних добродетелей ║об. причастен по всему. В совершене возрасте отца остал бе, уже и супружеству брака еще в жизни отца сочетан⁸⁴, и по отчи смерти всех царств престола родителева наследник бысть. Лет 14 без мала по отцы царь бысть, тихо и безмятежно царствова; во дни бо державы его земля бяше противными не наступаема, но в покои всяцем и изообилии⁸⁵ же и тишине отовсюду, яко же во дни Соломани, мирне и невоеванна пребысть, кроме внутренних мирских соплетений; шлемы всяцех мирожительных «расковаше ратнии на арала своя и меча ║41 на серпы», якоже пишет; молитвами к Богу от противных навет ту всюду невредно царь мой окружая. Бе бо естеством кроток, и мног⁸⁶ в милостех ко всем, и непорочен, обаче во всех путех своих, по Ииву⁸⁷ огребаяся от всякия злыя вещи, паче же всего любя благочестие и благолепие церковное, и по святительних иереох чин мнишеский, даже и до меньших братий Христовых, блажимых Самем Господем во Евангелиих. И просто рещи, – весь возложися Христови, все же житие святаго и преподобнаго своего царствия не кроволюбно, но иночески в посничестве препроводив, в молитвах ║об. и мольбах с коленопреклонении день и нощь, время всея жизни своея в духовных подвизех изнурив. Велик и мног иконопоклонник по прародителех во благочестии явлься, юного Феодосия⁸⁸ царя благочестивому житию подражатель, всем, иже благочестивне царствия управляющим ревнитель бе, яко вторый Иасаф Индейский⁸⁹: ов убо в пустыни, сий же во царствии; он на версе мнишества венец царствия показуя, сий же внутрь себе ураняя иночества дела потаено, диадимою покровены; купно мнишество с царствием соплетено ║42 без раздвоения едино другаго украшаше, судив, яко не мнее другое другаго во грядущем – нераспряжная колесница к небеси восходная. И обоя верным, иже любовию к нему привязанех, единеми точию зримо; вне удобо всеми царь зряшеся, внутрь – уду же от дел иночества мнихожитель познавашеся⁹⁰; венец бо образом, мнишеская произволением, несмесне и неявлене второе; не возможно бо добраго его произволения супружное житие к Богу любве его устудити, ниже самого царствия высота и преизообилие самодержавных доброт. ║об. Многоразньствия и всяческих благ кипящее в земных неприкладство вся совокупив, купно рещи – земное царство и красное мира совершене оплевав, оттрясе по себе, паче всех Бога предпочте, ревностию возревнова по святых, издавна завидящему властолюбцу рабу⁹¹ лесное вся своего владычества остави, его же той много лет в неявленне сердца движении, всем же знаемо, еже то в желательне ожидаше хотении. И елико убо кто тшится на высоту суетныя славы взыти, толико болшии падения подъимет; вси бо к небесней высоте зрети ║43 можем, не достизаем же ю; и солнечну светлость лучь здравыми очесы, елико кто может, приемлем, востещи же к тому и светлости лучь его ятися неудобно; и зрети убо то себе творит не все, но елико тому дает; сице и сия о сем показание убо горцем падение их. Но время сокровенно вся ко свету приводит; о падениих⁹² того последи слово изъявит, их же достойне; о святопомазаннем цари Феодоре нужда зде подобством слова конец отдати.

Начало убо греком первый Костянтин⁹³ во християнех царь, конец же велицей ║об. Росии всей сий Феодор Иванович, вправду благочестивый самодержец, иже рода всего своего житием своим запечатле, яко же пророком всем Иоанн Захариин печать бысть⁹⁴. Аще и дерзостно зде речено бысть и ко оному неприкладно, но убо за благочестие изрядное; аще и любозазорни о сих любопретися начнут, прочее воли их быти не соперно попустим: списателю слово о сих ни едино, нужде не предлежащи убо. И сего святожительнаго в предипреподобии и правде царя, глаголют нецыи⁹⁵, не еще в настоящем у законоположеныя ║44 ему Богом вся жизни его лета к пределу смерти в конец приспеша тогда, егда незлобивей души его от чистаго телеси бе исход, не якоже прилучися, но той же властолюбец злый и желатель его царствию зломудрием своим некако виновну ему смерти сущу бывша⁹⁶, по всему вещем обличающим его, яко же и о уншем брате сего царя⁹⁷ он же явлен убийца бысть. Не человеком единем точию, но и небу и земли та суть ве́дома. Богу смотрительне се попустившу и терпящу предваршему, он явствену брата тогожде, в молчании ║об. нашем попущением ему за страх, царевича Димитрия убийству надеяся, судив в себе, еже и бысть. Ве́де он, ве́де всех немужество, яко не бе тогда и доныне крепкаго во Иизраили⁹⁸ от главы даже и до ног, от величайших даже и до простых, яко и благороднийшии вси тогда онемеша и равно ему попустиша и безгласни бо быша, яко рыбы, по общему словеси: аще кто о первем не возбранен, ко второму без боязни зрит, – еже и сотвори. Величайших убо устраши и бездерзновенно сотвори, младоотечных ║45 же и мельчайших намздив, средних же от сих многи чиновствы недостойне одари, яко же он царствию достоин не бе. Мню же, несть праведно зде молчанию и се предати, яко господоубийцы⁹⁹ сего они вси, иже умолчавшии ему и попустивше и на се, тяжесть мук не мнее понесуть в будущем, – несть бо се забвенно пред Богом, елма и долго зде терпит о нас, – аще сих грехопадением не сравняются исправлением, подобными образы покаяния, елицы в нас еще до днесь жизньствуют, увы! и якоже аз, писавый се. Аще есм от человек всех ║об. якоже от песка всего малостию едино число песочныя дробности, но не могу нигде же, еже неистязан, Божия укрытися ока, от Того бо руки ни жив, ни скончан избежю, и елицы в сих сопричасницы; вся бо тварь объявлена и нага¹⁰⁰ пред Ним, по Писанию: «Создавый око, око не смотряет ли» и прочая; даже и до влас испытует всех прегрешения. А еже колик и каков того умолчание суть¹⁰¹ еже и о равнобратоубийстве и еже о царех, неискуснии во утвержение сии книги да почтут. И паки предиреченным имемся.

Освятованный же царь Феодор, бесчадно и ненаследованно ║46 отеческо по себе царство оставль, безглавно же отнюдь и безсеменно, не да сей убийцы мере жизни его преити самотечне, еже бы поне малу семене его зерну в наследие остави¹⁰² в нас; едино чаду же дщерь во всю свою жизнь токмо прижит, и сию, сущу в пеленах, уневестив Христови, молебницу в вечное царство преди себе послав уготовати ему на небесех жилище. Супруга же его, великаго, по нем умилене, яко твердо заклепанная голубица, горлицы подобяся разлучением подруга, яко душа нужне от телеси ║об. разделшися, плача и рыдания многа, слышания достойно, от царских изшед чертог во общее сопребывание, ангельскаго великаго сподоблься образа¹⁰³. Шесть лет по мужи жестоце житие в посничестве препроводив, достиже, чаемо нами, Богом венчаннаго си подруга и свою благородную и благословеную царска святопрозябения премладейшую отрасль; в недрах Авраамлех¹⁰⁴ ю узреша со иже незлобивыми младенцы, иже за Христа от Ирода избиенными¹⁰⁵, и в независтнем царствии купно веселятся вечно вси. Другий же сего благочестиваго царя Феодора брат, яко зело леторасль, ║47 на второе токмо по отцы от рожения лето жизни тому наступивши, двоематерен сказуем по толку, Селунского мироточца имени наречение стяже¹⁰⁶, по мале сострадалец и свенечник бысть томужде, еще в пеленах от Бога мирови венчеваем царь быти по брате ею, аще и не у нами чювственно царство, но назнаменан бе от Бога царь нам датися. Его же крове ради единоя, мню, от смерти и вся лета ныне росийска земля всяко от бед потрясаема¹⁰⁷, и едина в земли господска кровь многих кровми мщаема бе, попущения ради страсти ║об. в молчании от людей господоубийцу и за стекщияся в нас прочия злобы, вкупе казнимо, от Бога ныне суд¹⁰⁸ приемлет.

Бе бо синклит некто¹⁰⁹ ближник царев, име сестру, жену бе же бо благаго царя предипомянута Феодора; сего же ближника имяни Писания толку не имать¹¹⁰, яве, яко ни в животных книгах, богоненавистных си дел ради, не вписася от Бога. Злоковарен же бе и прелукав, в милостивне образе дел свою злобу ото всех крыя, злолютством в прикровении злобы своея благороднейших себе во царство превозшед, всех оболстив, еже последи лестию многою ║48 и царствия ему высоты достигнути, иже преди о нем слово скажет. Сей царьскую, Богом дарованную мирови в насладие отрасль сего вданаго ему прародительнаго наследия изгна, яко же огнену искру в пепеле погреб: сего во град некий с рождьшую его оземством немилостивне осуди, и со еже присвоеными ему по матери¹¹¹; не совершено сугубыя стократица поприщ града царска отстоящ к полунощней стране во брег реки Волги, Углечь граду тому имя бе¹¹². Время же своему зломыслию обрет и суща стаинника себе потаена, зело злых злейша, Луппа ║об. некоего¹¹³, брата си свойством и делом, иже толкуется волк, – от дел звание приим; возревнова царствия ради получения завистне Иродотворительною люте яростию¹¹⁴; о младенцы на убивство ему подвигшуся, яко агнец непорочен в жертву Богу принесеся, сугубы возрастам четверица осмодневнаго ради по матери осмолетен ножем послушатели на зло заклан бысть предо очима своя ему матере¹¹⁵. Како тогда тоя утроба не разседеся о бывшем? едино рожшей того о сем болезнь бе тогда сведома. Умысли бо предипомянутый ║49 злый раб, незлобиваго земнаго царства лиший, себе то в сокровене льсти притяжати, еже и сотвори, но Бог за видимаго небеснаго царства не лишим, мняся и от Бога тако же улукавствовати яко же человеки. Но не убо всяко мыслим бе его и от человек утаися, неже от Бога. Убийцы, на се дерзнувшии, от града жителей сами смерти всячески гонзнути не возмогоша, единочастне с неповинным младенцем на едином месте убиени быша мнози¹¹⁶; и грешничю дерзнувших убийцы кров пси полизаша на местех. Он же господскою кровию не удовлеся, ║об. приложи к сей рабскую изливати муками кроволитными: дерзнувших гражан иже на господския убийцы, посланныя им, та все домовное мне погуби, утаився царюющаго нами благочестивне Феодора, овы вне земля всеа оземством в темницах заточив, уморив, овы от них множайших на пути нужно удавити повеле. Сродных же и соплемянных убиеному по матери – сих злейшими муками удручи и на край всея земля такоже оземством различне разсея бедне¹¹⁷; рождьшую жь самую во смирения образ иночества облече, во мнишеско ║50 пребывание, идеже се яко света тамо уединения к рабу сию всели¹¹⁸, всякого утешения место и мало покоя кроме; ю же по времени с рабом ея рострига Гришка¹¹⁹, пришед, оттуду извед, истову си матерь сию нарек к болшей мира прелести, еже и бысть. Послежде попущением Божиим убийчески же не точию род, но и племя все, аще и далечни суть, Борис тогда всех изыскав и именьми вельми обогатив¹²⁰ различне же ему сущу и довольно одарив.

Таковое¹²¹ возмещение егда же о безгодней смерти брата в царския слухи самобратнаго Феодора ║об. еще вниде, тогда царь, во братский на жалость подвиг естеству того понужающу, возстенав от скорби зело и прослези умильныя глаголы, иже тацех сродству достойныя и царским разумом, премудростию украшеныя, испусти, могущая яко человеческия увидети слухи сущих ту всех в неудержим плачь подвигнути, слышащим людем всем господа своего, такову смерть горьку и безгодну приемша, аще не бы ото убийца взора прещения убояшася, от слез удержашася. Абие царь, ║51 от плача престав, скоро им тверду повеле о случшемся взысканию быти. Посылается им един от святоименных отец, Сарский митрополит, с ним же от синглит велможа благороден велми¹²², и яже о них, на место, идеже непорочнаго младенца и святая душа царева от благоуханнаго телеси его нужно разделися, неве́дущая злое и греха не познавшая, и новомученическая неповиння кровь излияся, яко же Авеля другаго и Глеба¹²³, самобратне завистне избиенных, ов убо ради жертвы, ов же царствия дельма, и они убо ║об. от братия, сей же от раба. По взыскании же паки послани повелени к пославшему возвратитися спешне; но убо, паче повеления царска, страха убивству виновнаго посланнии убояшася, повинушася беднии того воли, и елико убийцы¹²⁴ годе тако и возвратившеся цареви, первосвятителю же и всем сказаша, яко же от губителя страхом научени быша. К сему еще лжу ему прелукавне зле на неповиннаго сшити¹²⁵ Бога не убояся, при царе и патриархе, всему сигклиту и мнозе ║52 собрато бывшу, малу лжетворное убийца он утвердити хотя, изнесе повинный пред царем и патриархом с прочими посреде собора таковою вину на самого¹²⁶ младенца возложи: рек, яко самому ему, играя, заклатися¹²⁷. И болезнь ему тяжку прирек: яко же неким, тако и сему, глаголя, страдати: иже иступати умом и телом оцепеневати; той час ему тогда настал бе, глаголаше. К сим же святитель, синклитик, от места убиения пришедше и всепрельстившеся временными, убийца глаголом свидетельне пригласиша, научени бывше: тако быти тогда глаголаше, ║об. уставиша. По сем, времени зовущу, лжу свидетелный синглитик, мню, яко бо попущением той всей Росии царь был¹²⁸.

Таков иже предиреченый убийца он царьствия державы мощен бе, яко Самоцарюющему тогда не восхоте всех в волю вдатися, еже бы поне по смерти убиеннаго младенца мощем тогда оттуду, идеже бе и заклан бысть, внутрь самого царствия града принестися и купно и с того прародители спогребсти; но тамо незлобиваго младя, идеже свою честную ║53 кровь смертно излия, уголубив онамо, перстию посыпати и без славы¹²⁹ земли вдати, ни яко проста людина совершение погребению сподобити, неже бо подобающее царски исполнити. И по животе младенчи всезлый властолюбец на персть враждуя его, – от вещи мыслимое оного убийцы познано бысть. Егда во отечество изо оземства принесется святая с нетленною его плотию рака к положению отец и сродник, бояся и трепеща убивый убиенаго от чюдотворения обличения о гресе своем, яко же Иванна Ирод¹³⁰, да не ║об. яве пред всеми обличится убо, и предумыслимому его еже сложению помысла, к царствию желанию от народа кая возбранения спона препятию хотению его будет, еда людие, зряще вси безгрешную и неповинную кров, умилишеся, его властолюбца злаго возненавидят, и хотимое ему сотворити обличат, и в дело произыти зломыслию его не попустят. Сего ради богоугодие разумети не даде окаянному омраченный ум его, яко Июде, сребролюбием объятому¹³¹. И аще Бог восхоте убо тогда дерзость его ║54 обличити, могл бы и на всяком месте всяко о сем совещеваемое его возразити¹³² не убо дал бы сему и начати убити, но храня убийцы о сем суд в будущем, яко да в день судный пред ангелы¹³³ и вселенною обличив того, вечно умучит¹³⁴. Времени же позвавшу, Василием царем, иже преже сего, единем пришествием во царский того отечества град святому ковчегу сугубо действо содеяся: первое, еже рабскую Борисову обличающе о себе смертноубивствену дерзость и недостойно бывшее Борисово воцарение; второе Гришки Ростриги ║об. во имя святое его имянованием преложение посрами; единопришествине тогда святый дву лжецарей купно заусти¹³⁵. И прочиях же по сих, на се дщащихся, на отечество его, младоточных зело неблагословна корене, ни по избранию людей, но от страдническия четы, безъименных, мельчайших и самозванных, разбойнически наскакати¹³⁶, – таковыя бо, яко дивимаслина к доброй маслине, не по отечеству отнюдь прицепитися не могут, но яко дым по воздуху разшедшеся, без вести быша, – сицевых бо ║55 он даже доныне, не престая, обличает. Чюдотворивое же страстотерпцы и новомученика непричастное тлению в раце тело при гробе отец, яко на свещнице, светит всем, прощает всяк недуг и доныне с верою к нему в чисте совести приходящих несуменьно, и отечества си снабдевает от враг ненаветно, изменших же ему всех обличает своими чюдотвореньми¹³⁷.

Кто убо непщуя толику и такову, яко же сами чтущии весте вси, благочестиву роду и благословену Богом и святыми его, еже во царствиох утвержени многими ║об. леты вкоренену, – и¹³⁸ не пренемогающ до збывших бесплодием леты, ныне без наследия преходен, имеющ конец, – и толице в поднебесней части вселенныя такову убо яко ни Риму другому¹³⁹ царску всему православных жребию ненаследовану в прочее остати? Не оскудевающи бо никогда же и доднесь происхожением лет корениом отчим естественными законы к прозябению отраслей, еже бы не привезстися когда царским стеблеом от чрезл отеческих в наследие толику и такову отечеству, – но влечахуся друзии ║56 по первых, яко всекрасныя леторасли домосадныя и плодоносни, в род от рода не оскудевающе; и не бе никогда до единаго, ни убо, аще не бы от близ сущих злых крестопреступных рабов, царствия ради зависти, искоренен был род тех, Богу за грехи попустившу наша, нам от немужества умолчавшим¹⁴⁰ необличне. Розги бяху рода того от моря и до моря, и яже по сих, – рече пророк¹⁴¹, – ныне же изсхоша вся; «Дах вам, – рече Бог, – царя во гневе Моем и отъях в ярости Моей». Непщую, аще бе под небесем таков другий благочестив по всему и православием¹⁴² сиятелен мир, яко сий, на елику ║об. солнце зрит землю всю и море же¹⁴³.

-----------

От зельнаго бо желания еже о пребывании законных уставы царския высоты памятствова, преумножением скорби и зельством горести тогда той яко упившися, едва душа у державней безгласна и вне себе бывши, яко бездушна зряшеся. И да не убо просто помыслит кто или преложит: такова таце же скорбь, яко же в нас худейших, когда по естеству действовати; обаче тажде неприкладна ║57 бо его не в печалех, ниже в веселиих та мерою, яко же капля дождя к велицей пучине моря; сице между обоих, скорбех же и радостных, преимущих и нижайших преселится¹⁴⁴ различие.

-----------

О царюющих убо нами вправду первосущих царех, – а не иже по них богопустнех на то именех онех¹⁴⁵, – и высоте сана, купно с сими и жительстве неудобно кому человеком отнюдь ниже словесы, неже делы, наручно о них изрицая, писаньми износити неподобная, иже в жизни си аще и безместно что сотвориша ║об. и погрешно; но разве что добротно к сих славе, к чести же и к похвале, се достояше уяшняти, единою сполагати в писаниох будущим ревнителем в память, – о таковых творити тщанно и страхоприступно списателе обыкоша и нас научаша. Недостойное же еже о них с прочими совмещати не¹⁴⁶ неподобно, ниже человеческия силы бысть дело, понеже таковых судити един весть Бог, Иже надо всеми; Той сведый и всех вся, не убо явленая токмо, но и сокровенная тайномыслия открывая, и яже во уме бывшая сложи всяко греха, в день суда обнажит советы сердечныя, ║58 и на среду приходят; может бо Той по когождо делом намздити кого или умучити вечно. А иже от не сущих ниже благословно и чрез подобство наскакающих на царство, сицевых яве от благих по всему отделися суд: необличнаго же умолчания ради, еже о тех нечестиих списателе, мню, с сими равне истяжутся.║59

Во время же некоего времени, иже по седьмой тысещи 99-летное обхождение круга¹⁵¹, внутрь самые благочестивые державы, седмому исполняющеся лету от святопомазания на царствие преблаженнаго Феодора Ивановича, государя всеа Русии, три по числу нам зло попущением Божиим купно тогда ║об. стекошася ко искушению. Первие – иже, яко Иродоубийственною рукою, от раба царска семени незлобиваго отрока неправедное заколение. Второе же зло – внезапное пожжением запаление до иже во испепеление положение большия части всего царствия, пребогатых жителей домы, обремененыя всяко довольне потребами, иже обонпол Неглинны реки бывшее¹⁵². Кто не весть, яко углие в попел претворшееся огня ярости, жилищ всех воздуху развеяти? Умыслительным бысть повелением ║60 тогожде: среди самого полудния той сотворити не от Бога убояся, солнечной теплоте жжещи, неиспущенному яростне пламеню, яко спомогающу свыше¹⁵³, лютость виновнаго¹⁵⁴ запалению показуя. Мнозем¹⁵⁵, глаголют ведцы, тогда от человек разтлевшеся раждающим и со младенцы огня зелостию; во время бо спания полуденнаго внезапно, яко мучительски сотворено таковое, аще бы ни един от них не избысть; в различных местех онем повелителем пущеныя запалители купно везде пламень возжизаху, яко ║об. живущим ту нигде же бе возмощи утещи. Третие же зло – агарянско нахождение самопришествена с восток нечестивна царя¹⁵⁶, даже пред моя забрало внешняя граду приближитися смевшу, яко николиже тако бывающу толико безстудству.

И двем убо злом бытие от властолюбца Бориса, третие же – небеснаго смотрения наведение свыше, но не у без Промысла и обоя. И аще же благочестивне и пресветле тогда державный Феодор нами царствуя, но он убо своими добродетельми един ║61 довляшеся богатея, наше же всех оскудение, еже о добрых неплодство, в нашедших к того избытком не удостоитися; тако же убо и быти может то, яко единаго добродетель не может спокрыти всех человек прегрешение и «никто же красится чюжими делы», рече Писание, но их же суть трудове, тех и дарове; честь и венцы победивших суть, – и многа такова в божественных Писаниях во указание положена. Но убо иже господомладенческое неповинне заколение и всеградное туне огнем потребление и не хотяще убо и подъяхом ║об. вси, яко ничто же знающем, безсловесным молчанием спокрывшеся злохотимому в конец простиратися на прочая сим попустившу, якоже и ныне о наставших онемехом в случшихся¹⁵⁷. И о сих толико.

Безбожнаго же измаильта¹⁵⁸ к царюющему тогда пришествием приближение граду туне бе, нам же по всему безпакостно, явленаго ради заступления Вседержавныя християном на враги Помощницы, внушившу скоро донесением Сыну Тоя мольбу по святых Своего угодника, миропреподобнаго государя нам ║62 Феодора, тезоверна царя. Устрашил бо нечестиваго и со иже с ним, ве́де, нощными знаменьми забрал всех каменноогражденья твердынь градобитных хитростей грома не обыкшая таковыми тех оглашатися слуху, огнепальне многими отрыганий рыканьми громогласнаго ужасно в дыме огня з блистаньми бьением многии словом со основанием колебати землю и потресати небом¹⁵⁹. Сего ради вниде в пришедшаго царя с трепетом вкупе страх, в кости и в душу его, и к бежанию воспять со всеми вои устремися обнощ, гоним во своем ║об. ему ужасе невидимыми поганатыи, яко в бегстве нощи тоя обрестися ему вдале града, глаголемаго Серпухова, обонпол яростнаго устремления быстротечением преславные Оки¹⁶⁰, яко наглое тех нахождение к нам, яко преградою, глубинным присноубыстрением си возбраняет всегда. В снабдение бо от варвар не мало, яко непрелазна стена, премудрено Зиждителем о нас сия положися ввек, многу часть земли нашея от полудне, идеже простерта бе, течаше и, яко поясом¹⁶¹ некако опоясуя, протицает быстрясь, объемше в данную ей меру ║63 земли противным на ны выну всяко возбраняя исход от своего ложа, и не безбедно тем тоя обоюду прехождение бысть, разве иных множеством.

Не едино же тогда пришедших измаильтян нашю пленовати землю огнепальная грома орудия, от царствия устрашением си повелительне отгнаша, но еще к сим единочасне купно и другое тогда чюдо сотворися Богом, яко в той час, в онь же нападе на ня страх, вложи Бог в мысль воину некоему же благочестиву в самом тех пришествии под град яту и держиму ими, ║об. принужен по вспрошением их поведати им. – «Чесо ради, рцы нам, – тому они глаголаша, – таково нами видимо во граде в нощи сей молнеобразное блистание ото оружных сосуд, на ны битва со огнем яростно испущаема? Кая во царствии иже со царем затвореным удобь внезапу пребысть радость, изорцы нам?» – рекоша ему, вскоре к сим и муками испыташа, и не тяжце же. Он же, благоумен сый, яко весть чин православных: благочестия ради не туне в муках и велию претерпети болезнь, ║64 укрепляем о Бозе от добраго приставника ангела своего ему хранителя, елика скорость уму его вопрошаемое объяти, сши словом добромыслено потребну временю грехопростительну лжу, затвореным во граде к свободе приличную, сказа противным, о Христе уповав, аще сим веруют. Яко сего ради, – глагола им, – радость во граде, иже от западных стран, Новоградцкия и Псковския земля¹⁶², предипущенными повеленьми царя, в споможение граду ратей вооруженых многочислие тем днесь купнопришествене ускориша ║об. во град, их же царь нашь и людие града вси чаянием спешне удобь ожидаху. И егда си неверных врази от сказателя услышавше, веру паче о сих многу нощным знамением явленым чювствы емше, купно словом, тоя же нощи, без пождания всяко дня, устремишася в прямное бегство, яко же преди речеся, образом бо, яко многодождевны испадшая ото облак купно воды, и не бывши сих бе пришествие и отшествие. О сем пленный узник, возвратився во своя утечением с пути, вся по тонку царю нашему, ║65 вопрошаем, возвести; к сим же приложи изрещи и о возможных колико видетися и глаголанным елико разуметися ему вещех, бывших времяны теми в сопротивных.

Наше православное тогда стоянием всего ратнаго земля нашея собрания ополчение бе на месте некоем, близ внешних забрал самого великого града, обонпол соименныя ему реки, по простой речи глаголемый – обоз, древним же званием – гуляй¹⁶³. Его же существо зримо, яко град, бяше, подобою древоестествен, тончайшими дцками соделан, щитоподобно име сограждение ║об. градозабралным устроением в защищение верным. Меру же долготы каяждо часть забрал тех имяху трилакотну¹⁶⁴, ли вяшше что мало, широты же в высоту сажень едина; друга друзей соткмени составы тех, яко члены некие животных плотяными жилами, между себе сосвязаеми бываху железных вериг укрепленьми. От места же на места преход его движением пошественым состроен: егда ему поступати, идет и, егда стояти, стоит. Колеснично же его прехождение бысть: внутрь всеа круглости его в колесница многи впряжение мсков, ║66 поступающих тех силою движения на иже место архиначальника воем и строитися ратем повелит двигнути или стати слово; животная в нем вся отнюдь незримы внешних очесы. Обоимательство же таково того величество о себе имать, яко и велию рать всю с потребами всеми, вмещая в себе, ему затворяти, и оружества многи, елико довлети. К сражению же в прямного противления ратных исхождение наших полкодвижных сил свободно бе с коеяждо страны ему, противу бо потребе своя отверзая забрало, егда в меру ║об. сопротивных навет будет; аще ли ни, паки воспять угонзают во свое защищение спешне; или помалу двизатися, ли не зело отступлене от стен творити, хребты своя, яко прилеплены защищение имущи, обаче бо власть имуть ко исхождению и неисхождению, во управляющих воли и егда како наставшее позовеся время в случшихся; отступают же ото ограждения толико, елико когда смотритель всему хотимым время разсмотрения даст. Твердость же телесного того основания толика: ║67 токмо лукопущенех стрел устремление в себе удержати весть, возбраняет суровство тех единех в себе и притупевает удобь, разве прочих и мельчайших огнепалных стреляний, неже тяжчайших многосугубных зельств, иже во огни мнозе и дыма исхождении громоподобне рыкания произносных страшне гласов. Сих к себе яростного приближения летящих невидимо воздухом стенобитвеных железокаменосердец того тончайшая телеса не стерпевают о всем, и множае величайших: оного ║об. состроения тонкости удобне, яко же сткляничное естество, разсыпуют, ли паче рещи, песочное.

Но аще и ко единой вещи и временю сие умодельство¹⁶⁵ потребно бе, но приятно зело бывает в прилучшихся, безбеден бо о тацех сицев щит составися. Разум же¹⁶⁶ глаголют ведцы, первосущия составления его художества в начале бысть, им же таковое хитростное умыслися первие, князя наричют некоего Михаила, порекло Воротынский Ивановичь¹⁶⁷, вправду сигклитик велик при цари, ║68 со властию повелевая сотворити се или оно, паче же о ратнем уряжении вручение печать име о сих себе слово самодержавного; бранному делу по всему сказуют его бывша искусна, иже таковое остенение, православным в сохранение ратем, от стрел вражиих, змиеподобнаго тех уязвение болезни в частости множеств, премудренно составити могий; своего жития бытие имея он составитель при державе предварших царей.

В наставшее же сопротив неверных ополчения первореченное время бяху, собравшеся ║об. во ограде той, всея державы купно благородием великия достойноправителя вся; в них же бе управлением в делных первствуяй зависник он, иже оттогда и прежде на место царствия тщася мыслию в своего ему прикровене явлении хотения образе зрящим, от действ познаваем, не обличаем же. Без него же вси величайша отдревле столпы уряжение некое от велика и до мала сотворити смеша о наставших, – яко празни бяху, обладани прежде властолюбца страхом, вместо действа они токмо имя и место ║69 паче оного имяху, существом же отнюдь ни в чем не действени; окрест всего неусытне вси прилежанием, пчелам подобно, егда о своей им бывает матери; но сий убо по естеству лев, они же крыяхуся страхом. Тако той един онех всех преоблада, и множае простирашеся тогда надо всеми преобладание, честь же и слава, яко и предо очима самого царя вси не страшахуся, ни стыдяху хвалами о нем чрезъестественых словес, яко венчевающе и и помазующе до толика, – вмале не сравнитися ему царю; от сего множае в хотимое надмен быв. ║об. Державнаго око вся сия зряше и слух приемля самосвидетелне, божествен бо образ того по всему не требуя свидетеля, ни обличника; обаче же в коем устроении тогда мыслию о сих царь бываше, по неких, вне ли плоти, ли в телеси, и аще внимаше, или небреже, – простых мере не мощи ясне сего уведети, ли познати глубину сердца царя; недоведомое оста недостижно, точию сведый всяк царя благонравно недвижение к злобе. Егда же приятного Богом известо по иже духом о нас молящихся с сими купно ║70 о царствии во плоти царя нашего, святы ушеса его, не обыкшая приимати всяк слух суетен, огласишася достоверне о богопротивнем цари, отступления его от града и далечнеи вмале неначаемаго всеми всяко бежании, – тогда он санолюбный отвне града с местнаго устроения объятием оного стояния, глаголемаго обоза, вниде не со всеми силами, но токмо со иже именьми великими, ко благочестивному царю нашему во град. Поведаньми великия оны вси сказующе патриарху¹⁶⁸ же и царю, богопобедное воистинну нечестивому отгнание ║об. они на человеческую славу претвориша все; славохваление на языцех имущии могущи истинну на лжу превращати, лжая словеса сшиваху, глаголюще, яко он сице нечестиваго своим промышлением от царствия отогна, сим незлобие царя, несмелость же инех обольстевающе, о прочих же, иже по тех, неберегше всех; словожелателем онем помиловани и намздени, суетными всяко хотяху славопревратницы они быти. И егда угодное свое он послужением ласкателей сотвори, тогда царевых сокровищ вся хранилища ║71 обладатель радостне, яко играя и скача веселием о хвале своей, во изношение отворити повеле и, различных доброт бывшая во обстоянии с ним дарованьми невозбранне венчевая, первее словоласкателя своя удовли, иже помазующих того на лучшая в совершенную желания его высоту, потом ратныя по чином воины обогащая всяко, елико успе сего скорость.

Тридневно он тогда о своем славоутвержении и раздаянии беструдным мздам по отбежании от града нечистых агарян и его во град с места ║об. ополчения пришествия медление во граде сотвори. И егда той извещением крепце уве́де о оном цари, яко невозвратно впредь бегу ятся, еже доспети ему деньми теми своея скорости некий именуем Ливны¹⁶⁹ град, и во царьствии еще ласкающих к своему хотению довольне обрет и мзду от¹⁷⁰ него приимших, – тогда любославия рачитель еще умысли, обаче и сотвори: тщую славу от человек уловив, к перволожней си славе и сию приложи, еже по оном цари вослед гнати ему, яко по ветре, иже обычей ║72 бываше буявым таковая сотворити, его же своим наручным медлением во граде преди себе пусти. И како убо и не предпустил бы? Сопротив его он, лжехрабрый, не возможе во все ополчение не огражден стати! Не восхоте убо тогда гнати по нем с места своего ополчения, глаголема обознаго, во град не входя, дóндеже удоление оного не остояло бе, яве бы тогда гнавшаго о бежавшем храбрость бысть: и виде свое немужество яко сего ради оттуду тогда за онем от близу не погна, яко аще бежащий гнавшаго за плещма своима ощутил бы, ║об. тогда бежимый отвратився¹⁷¹, ве́де, гнавшаго разстерзал бы всяко. О таковых Сам иже всех Господь во Святых Писаниох рече: «блюдитеся от псов», и во другом: «да не вращшеся расторгнут вы». Славоловитель же притворное свое мудрование о сих не отложи, паки ополчися, тридневы во граде препустя, яко скоро охапився и спешне, показуя людем, вослед предипомянутаго изыде до Серпухова глаголема града, едва уже и слышася тогда, за им же гнашеся, где бе. Тако той страхом омрачаше люди; мы же и в сем ║73 повинухомся ему безсловесне, яко и в прочих. Обратив же ся той во царьствие от притворного си погнания, паки хвалением словес осияватися начат, истиннее рещи, омрачатися, сшиваему лестцы, яко в паучинном ткании славолюбия¹⁷² одежду, иже о оном цари победу, лжю, еже того погнанием побиен бе царь от него. Како убо се истое и быти может, его же в погнании ни слыша, неточию виде, разве токмо весть о нем, уверися слухом, еже не возвратно поиде, отнюдуже прииде, неугашен име в себе самовиден ║об. и самослышан страх от града, егда бе при стенах того, а не иже ради по нем ветр гонящаго?

По возвращениих от погнания за варвары иже славу купующаго, ласкавцы ему хвалу к хвале прилогаху, паче се глаголаша, яко он сий сыроядных от царствия отогна, еще же и царя, сошед, преславно победи. Таковым убо образом лжая славы, и хартия многи градом всеа державы с царскими печатленьми разослаша, наполняюще соплетеного своего лжесловесия впущающих слухи, ко едино ║74 подражанию усердно вся люди всячески бедяху, еже, кроме инаго, сего наострителя мыслимое исполнити, яко желатель всем возлюбити и, и узретися ему помазуему немечтанно на всеа престола славе. Вмале не яве откровением, словом сия в писаниях и словесех о нем изрицаху, еже бы всем живущим самохотенно в тонце прикровении о нем разумети; в самом же царствии люди вся словесы на се едино сподвижуще, во очию их добротворения его едины предлагаху, сопротивных ║об. кроме, к согласному всех о нем люблению. Елицех же от воин преже погнания своего, в тридневном во граде предпомянутаго пребывания ему тогда, дарованьми с прочими в скорости намздити рук тех не упразнися, сих по возвращении паче различне обогати, усугубив, извет творя всем ласкания – свое ими побеждение богоборнаго царя. Сего ради им различна мзда: первыя славою санов опоясуеми, втории повелителных чинов вручением, по тех – на власти посажением сповелевати ║75 другим; инии – златницами преизлиха по сих – сребрениц множествы, по них – среброделных и позлащенех сосуд приятием, инех – риз предрагих лепотне, по сих – именми богатно. И всех бывших с ним всяко обдарова, его же таковому наглому удовлению всем приемшим намного удивлятися сотвори. Самим в себе смеющемся, глаголаху, яко не вемы, чесо ради таково многое дарование туне прияхом, иже преже иногда многих ран в послужених, ли за самых глав положение в смертех, и нарочитейшим ║об. в родех, тацех даров приятие не получиша, ниже потом таковая быти могут, – чюдо зримое! Истиною же то разумеяху вси, но в себе сокровено крыюще разумеваемое, яко не за оно тщетное, но сего дельма царевы ризница истощишася: понеже яко преже года куплены рабы ему вси, о хотимем намздени будут. Тако и сотворися: аще и вышеестествено что творимо узрят, о сем вся непрекословно умолкнут еже и бысть, преисполнену ону предваршую неправедне ║76 лихву, яко обличателя приимшим в руку, предо очима имущем; онемеша бо языки их и уста затвориша ото мзды, вся же чювства наша паче страхом ослабеша.

Но¹⁷³ честнолюбивый изветом веры, содеяннаго ради тогда Божия по истинне чюдеси, на месте обознем, идеже бе всего ратнаго собрания православное ополчение, возградил новокаменозданен¹⁷⁴ храм во имя Пресвятые Богородица, порекло Донския¹⁷⁵, и лавру о нем устрои: вещи убо видения благоделно, истиною же – паче своего превосходны тщеславия ║об. имя о победе сим возвышая в роды. Яко же и в прочих о таковых познан бысть, тако и в сих; образ бо своего подобия и имени на стенах вапнотворением, святым состоятельна, летописне вообразил¹⁷⁶. Его же о сем прикровенми¹⁷⁷ лукавству в духовных и святительнии во льсти послужиша на время урочно, якоже последи¹⁷⁸ сокровенная сих от наставших времен обличатся обоих лукавство и лесть. По совершении же¹⁷⁹ и освящении¹⁸⁰ церковном и монастыря состроении, он первосвятителеви законоположи и устави, ║77 в летнем крузе назнаменаный нарек день, в онь же содеяся благопобедное¹⁸¹ ту святопроисхождение, з древесы честными самотрудне шествие творити от наставших и прочая лето подле лета непреложна¹⁸². И во дни убо повелителя живота заповеданое сотворяшеся непременно, а иже по тех, – самогрядущая поведят и возвестят.║об.

По святоубиении же вещати не довляшеся токмо кровию его единого рачитель детоубийца Ирода Борис, но и родительницу неповиннаго закланью отрока мнишеским образом ненавистно облече и в лавру некую от мира сего удаляемых стран ту, кроме воля ея, всели в месте пусте, непроходне же и безводне, отстоимо свене всякого утешения телеснаго¹⁸³, и в скудости телесных ║78 потреб тамо затворити ю повеле, не токмо всех, но и нужных улишив неже по равенству от раб, даже до пища сосуд же и одежд и протчих, их же достоило бе. Но по всему, яко просто супружество подружие, бывшую оному мирообладателю свенешницу таковыми нуждами всячески обложи и яко второе убийство по сыне самого того матери сотвори, яковых нуждь и рабская мельчайшая чета не стерпевают, неже толиких деспод царюющих. И юже сыноубиением оскорбил, ║об. сию к сему и потребами оскудил: сугубу ей в жизни печаль сотворил, сугубейши же тоя и себе он уготовал муку. И аще по сынолишении ея и премнога земного покоя ей сотворил бы, ли и вся благая земнаго царствия плотный враг ея той принесл бы, иже пред малем вся та в самех руцех быша усвоена и не восхитна, – возмогл сравнитися бы царстей погублению души и матери утолил толику о сыне печаль той тленный земный покой? Ея же зде не имать обвеселити никая же радость, неже еще того рожшей сугубое ║79 к скорбем убивческо приложение досадом. В теснотах же толицех она пребы тамо время от нужныя смерти заклания сыновня 99-го по мучителях и кончине до лета 113-го, Розстризина во царство ввлечение; тем бо той оттуду паки во царства град честне изведение, яко от Египта во обетования землю¹⁸⁴, бысть, нарекшуся ему злоковарне в прельщении царства сыном ея. О сем подробну во своем чина известится месте.

-----------

Где суть иже некогда глаголющеи, ║об. яко неповинна суща Бориса закланию царского детища, иже о царствии к сему того зависти? И еще ли от сего не обнажися законопреступнаго его убийства веления, яко и иже во время убиения иже на закалателе гражан многих воздвигших руки не стерпе ярость его, еже бы сих ему пощадити? Овых убо испытне, дерзости таковые ради, различии мук удручи за еже господоубийц, сопротив заклания того, убиша; овых же в западных земля, идеже солнце, седая, ║80 затичет, заточеньми осуди по муках; инех в стропотных путех иже дотуду шествия оков нуждами всяческими умори. И аще сии убийцам не бы сотворили сопротив воли его, то с сими на господоубийц и он равне бы согласовал, и преизлиха всяка власть име сих умучити не токмо, но и соплеменным тех праведно зазлити, аще не бы от него бяше о сем повеление, внегда в сопротивных сему сотворяше таковая. Он же владыкоубийческ род и племя, иже волю ║об. его сотворших, не точию и сих казни предати, ли чим вмале озлобити, но вся изыскав и тех руки исполни мздою, именьми и дарми многими. По всему жаление свое о убийцах мирови истое и не хотя показа, иже самех убийц ради и сим по сродству казни достойнех, – тех обогащенех сотвори. Яко же поистине в сущих державе законныя обычая бяху: благословных вин ради добропобедных роды их, благочестне умерших, к сравному изыскавати дарованию, – сице сему он ║81 сопротивне злотворных племя венчевая, а иже скоромстителем неправде, елики от народа на убийц обретошася, вредности кровомщением не терпящем господска убийца зрети, сих злом си в далечная посуди¹⁸⁵. Оле таковаго ослепша тмою мрака разума, от убийства запятаго, мнящеся ему покровеннаго! Оле и нашего от несогласия немужества и безчеловечества, еже сему о сих попущение, яко и на прочая по сих сими дерза бо сего сотворихом.

Сицево бо бе ║об. самого убийцоповелителя Бориса о убиенем им младенце и по смерти господоненавистное суровство, яко достойне и истову о убистве убиенаго еже бы крепце быти о нем взысканию со истязанием, он же ниже нечестивых деспод о смертех испытанию восхоте тверде сравнити, иже некогда в землю сию от язык при державнем Феодоре в служение ему с восток сыну агарянска царя¹⁸⁶ и потом от западных двема сыновом латынских кралей¹⁸⁷ пришедшим, иже зде нанесеными ║82 от тогожде смертми измершим. О царствии же и всяцем владальстве он таков бе на вся сточныя ему сверстницы завислив, паче же на благороднейших себе, еже ни едину бы кому, кроме его, на та ни делом, ниже словом, ни мыслию о сих смети внимати, сего ради и в началех ему своего обладания и превосхождения величайших испред царя восхищая и в земныя конца развевая.

Едино¹⁹⁰ же от многих, иже в конец лет его им сотворшее зде сокращенем вмале представлю словом. ║об. Некоему званием бывшу по реклу Богдану, от всего царска синклита первоближну и началосоветну при преславнаго царя Ивана очех, елма в державе и величайшая многи благородием бяху, неже той; превозлюблену же ему бывшу царем паче всех по угождению: сердце царя всегда о нем несытне горяше, и очи своя нань присно несовратне издаваше, устрелен срамною стрелою тайныя любве. Современен же сему и Борис той бяше тогда близостию ко царю, но первый втораго много излишествова ║83 во славе, аще и совершенаго имени чиновска предиглагольный еще тогда не у бе венчан славою; другий же, перваго степенем царствия превозщед, послежде и зазлением, яко ногами на главу первому ста, весма и супружным усвоением со племенем бяше ему великий. По пришествии же времен и по самодержавных изменении и пременении в державах владеемых и превращении Борисом первых во царствии, обычаем сему, о нем же начатое слово зде, жизнь продолжися до иже Борис воцарися; в сонме же при велицем Феодоре ║об. с великими благородием сообращаяся купно, и ничим же прочих отщетеваем, во инех же и предерзая, еще же к первей чести Борисом и приложение некое немало имени прият, малом нечим не достигшу ему совершенства чина великих мирския славы. Прежде бо сих многа лета по смерти любящаго и безмерне царя вдале града царска во своих он пределех удаляем бываше от молв мира за наставшую о нем во царствии тогда бывшую крамолу¹⁹¹, преезжая от веси в весь, во обилии тамо и покои мнозе пребываше ║84 вседомно, токмо святонаставшаго царя Феодора очес не виде и близ того вкупочинных си несопричастен присней славе, ниже на всяко время тою же бяше с ними услаждаем честию. В селопребывателных же местех бе снабдеваем Борисом темжде, до иже вся чювствия в земных о обновлениих утишением, яко сном, успоша и яже о нем особне во граде молвящее преста. По смерти бо тогда перваго царя новоукреплением во царствии сын его утвержашеся и о нем сильныя его, иже близу сущая, ║об. обновляхуся, крепяще же первобывшее, ближники царя пременивше вся; много бо розгласия тогда в земли бяше о людех царий ради. Но возвращу паки речь, от идеже недокончана оставих слово.

Тому же во град некия яко под востоки, отнюдуже нам солнце востичет, на обыкшее послужение послану в соименный Борисов град¹⁹² им же, и оттуду оному нанесением лжесловне оклеветаша сего, соткмиша бо и и к пребольшему желанием царства готову бывшу о сем в самоцарюющем мнению нань. Гневу бо в нем ║85 неявлене, яко огню дымоподобне некаку, внутрь невозжене курящуся, к сему оклеветающим веру ят, паче же своемнению попусти: оклеветаемаго первее степени его лиши, от середы синглитства безчестне изрину и, преумноженая же вся стажания его и прочая вся совершене отъя. Премного бо у того бяху драговеществия, зане яковство пребывания его у царех преже бе, – се первее рех; много сугубея бо лета благожизнены жизни при державных славе не вредно пребысть: прибавление ║об. богатству прилагашеся ему день дне, умаления же никогда. Егда же изриновен бысть от славы, наказанья казнь обладатель позорную¹⁹³ ему дав градских закон уставленую, яковою по градом казняху злодея, разбойники и мытаря; и ина безчеснейшая поругания ему и срамоту волею повелевшаго наложиша и в места далная поточен бысть. Сим, ве́де, и инех тоже мыслящих устрашая, еже бо о нем, мняшеся, не удобнех прочая творя, таяжде начинати, о их же превеликий ║86 бояшася.

Не един же к нему в таковых иже той первонарочитый облыгуем бе, но и ины с ним¹⁹⁴ в тождевство единомыслие ему приплетоша, и сих такожде по муках, всих обнажив житейских, гневом на мя о первем яросне объят бысть, тех по странах развея. И тамо, в темницах затворени, много пребыша время, от них же нецыи в таковых нужах онамо си ко нежитию прияша; прочим же и первоименному от них оттуду вспять паки возвращению вина повелителю смерть разрешению бысть и низложителя ║об. сего, еже Ростригиным во царство пришествием. И егда той оного, яко козел ногама, збод и с престола долу сверг, – о сем инде вяще сказася, – они же иже безчестие понесшая и раны прияша, с первострадальным во своя паки пришедши, лутшу первыя в земных жизнь Ростригою улучиша: впервоглагольний во страдальных совершенно исполнением¹⁹⁵ тогда синклитско сий прия имя¹⁹⁶, сострадальнии же ему кождо своего возраста в честех обретоша меру. Никая же бо бе нужда с протчих зде словес сказаньми сия писуема быти, но ради Борисовех ║87 многих обнажения злоб. «Возсияет бо нам, яко звезда же ото Иякова и востанет человек ото Израиля, иже упасет яко новые люди сего Израиля и сокрушит начатки моавля»¹⁹⁷; и аще и о Самом Христе речена пророчествия сия, истинною же сбышася вся и неприкладна суть ныне же о¹⁹⁸ Воплощагося и рабе, цари нам ради днещних завистей наших, – яко второе, та прилично суть не существом, но подобными образы. И да никто же о неприкладнем прикладстве от чтущих мыслию содрогнетца, презмерия ║об. ради, по схожении бо Того смотрения много прикладства егда быша к рабом зане плоти ради приступен бывает всем, тако нам Писание сказаша¹⁹⁹ и многа к сим зде же иже в мале ответное, не ради иже добре се разсудити могущих, ненавидящих дельма и мятушихся мысльми списася. А еже о дерзости ми начнет хто, аз паче тех соестественных истязания боюся иже ми душу Вложившаго, могущаго с тою и тела погубити в геене, аще и воображая сия рука верна и ниже без страха²⁰⁰ сеи словеса начертая, но глас во мне не веществен.║88

Василий же, иже бе в нас по прочих царь, иногда в державу ему не свою о святаго младенца смерти убийцы на страх лжесвидетельствова, он же потом во время своего ему царствия бе и мощем отроку взысканью вина, еже ото оземства извнутрь земного спуда в царский град, того истовое отечество, пренесе – и не тако, якоже того страдания и погребения при мучители неславно бысть, но святолепно зело и с честию многою, яко же подобаше святым. Первосвятительный ║об. Ермоген²⁰¹, всеа Росия великий патриарх, всесоборне иконам воследуя во сретении новомученика, таже во славе своей царь и по нем того синклита чин, потом несочтенное всенародное множество, старца и юноша вкупе обоего полу, мужи и жены со младенцы си сретением страстотерпца и новомученика младенца почтоша. Царя царь с рабы сретая, убиенному царствия ради зависти, яко новому Глебу Владимиричю²⁰² – оба²⁰³ бо в различии лет за едину вещь, еже царствия ║89 ради зависти, горку смерть подъяша, он от брата, сей же от раба, – в сретение сугубыя различны испущаху гласы, взывающе: яко погребению твоему сподобитися первее аще и в тайноболении сердцы снедаеми есмы тогда, но ради убийцы не бехом достойни неволею, ныне же свободне всяко сретаем тя волею; и аще по смерти твоего мучителя, Богу тако благоволящу, не не сподобил же еси нас своего к нам в принесении пришествия, о тебе в самом сретении достохвальное погребение ║об. исполнити добре, новострадальне младомучениче, к нам пришел еси, сотворив дивно дивство во дни наша; гряди убо, незлобиве, чисте, принесшаяся жертва Богови, не у греха познавый; вниди во своя, и своя с любовию приимут тя; се убо ныне от желания любезне стретаем тя, радующеся за се, яко не остави нас сиры, плачюще же о бывшем, яко не бехом достойни видения вовремя твоего страдальческого погребения страхом твоего губителя; якоже адскими тогда есьмы узами содержими, ныне же паки иже в стретении, ║90 лицы ко граду²⁰⁴ обратившеся, воследуем мощем твоим; сие вмени вместо оного, иже на твоем погребении наше несподобление по нужди от страха, днесь исполни наша недостатки.

Он же непаметозлобне, якоже бе младенцем общь незлобия нрав, манием яко преклонся неослушно скоро к молению раб своих, дошед общаго, гробоприятелнаго яко влагалища, места всеродительнаго ему сположения, храма пречюднаго в чюдесех Архистратига²⁰⁵ Михаила²⁰⁶, идеже в неразстоятельне совокуплении разности всех купно сродных ему з господская ║об. телеса вмещаема, ста на богоуготованнем ему месте, яко на восток утреняя звезда, с победы венчан, от запада пришед. И сположися выспрь персти земной, обагрен своею ему честною и добропобедною кровию, на суд готов тою враги своя обличая: самого убийца первее, потом иже святое его и неприкладное имя на ся возлагающих и царствия его с прочими вся разорших. Три бо пяторица летнаго продолжения, от живота ему пременения до возвращения ║91 во отечество, в земном онамо по страдании своем быв чреве, тлению в толико лета ниже святомладенческим его ризам прикоснутися смевшу, неже того освятованней плоти, разве заемны части общаго долга, убо тля сего, яко же иногда тричисленных устыдеся пещный пламень²⁰⁷. Что убо достовернейшии сего к сужению правость убиенаго и зависть убившаго, к сим кипящая оного чюдеса?

И се не мало на убийцу во указание: не в погребалных убо, яко же по закону, ║об. в белых ризах ныне страдалец в раце зрим, но во иже прилучшихся на нем во святострадании, еговою обагренех тогда кровию, во их же и в земли довольна лета сотворь; но ниже в пренесении первосвятителеви²⁰⁸ и царю вложи святый в мысль ко еже бы пременитися тем, спешит бо прочее пред лице вселенней Судящаго во обличение своего си убийца и в тех предстати тшится на суд. Чеснейши бо суть всяко царския самоя порфиры они, добропобедною обагрены кровию; не чюжа ║92 бо тому порфира она, но яко Иосиф некогда совлечется тоя и поверг сию, яко любострастней иегиптяныни²⁰⁹, сему властолюбцу. Число же в раце риз его сице бе: едина иже по первей на срачицу в животе его обычай полагатися, опоясуема; таже две единого существа, беловиднаго ткания, иже к телеси приближни суть, срачица и гащи, иже долнейшая объемля части тела до плесну; по сих препоясания; елика к сим же сандалейца со обувными платы, багряновиден тех зрак бе; ║об. митра же честные его главы моему недостойну забвися виду, суть ли ту с прочими, или ни убо. Чюдно же и се, яко что бе и дело его в час заклания его! Яко не о царствии тогда и прежде бысть упражнение его, – его же бояся Борис, да некогда он то себе восхитит, предварив, – но младенческо по всему бе устроение его: обретоша бо ся в раце, внутрь суть, святыми его недры держимы, орехи ║93 тогда бывшая обагрившаяся во страдании честною кровию его во свидетельство, самораслена бо и обычна, дивия же обаче; и младенческая таковая пища ниже естеством она зломыслия образ бе²¹⁰. От показаных бо вещей, яже о нем, указася всем яве, яко в радости святых сия царска семене святая стебль и незлобия отрасль ныне ликует с точными ему незлобием, со иже в Вифлиоме ║об. иноизбиенными Иродом: вяшшее си в день Божия суда чает ожидая оправдание. Мы же к первым словесем начатое навершити нудимся от идеже стахом.║94

И по тех предитекущих времен в сего внутрь миротворений общия жизни к седьмой тысящи грядущаго лета 106-го²¹⁴, по успении самодержавнаго вправду ║об. государя царя и великого князя Феодора Ивановича всеа Русии, скончавшаго Давыдски свой кродце живот в деянии его благих дел, иже от рабских рук нуждно и прежде времени почившаго, – яко мноземи непщеватися о нем, еже прежде времене ему положенех Богом предел крестопреступный в клятве раб сему уготова вечным сном почити, возложи бо на того царску главу свою рабосквернавую убивства руку, принесе господску животу смертен яд и уби и некровопролитне аще, убивательне же обаче²¹⁵, якоже отрочате брату сего ║95 прежде той же, – о самого же смерти царя восплеска си тайно руками, зря всех несмельством умолкших о нем людей, и немилостию от своея совести жгом, отбеже извнутрь самого царствия в пострижение сестры своея²¹⁶ лавру, бывшей прежде супрузе оного предипомянута царя. Триех бо ради вин непщуемо бысть бегство его, коварством некако мышлено: первее, страх о сем име в сердцы си, да увесть истее, аще ли отнюдь не быти внезапну востанию нань людий, огорчившемся по зельнем плачи вкусом о смерти, царя, и ускорят вослед его на убивство ║об. мщеньем; второе, аще же таковый в людех распаления пламень не возжется вскоре, он благонадежне безстуден будет; третии же, разсмотрит свое хотимое, колицем усердием народ весь в державу себе его взыщет и еликою теплотою вослед его по нем тещи имут, и кий коего о его взыскании предваряти начнет или небрежти, в прочее простирая, роздвоять во царствии, овых за страсть любити и намздевати, овых ненавидети и томленьми мучити, – вся сия лукавне о всех уве́дети хотя, да последи, великая ║96 получив, тщащихся о нем возлюбит, нерадящих²¹⁷ же умучит гневом. Во граде же оставшу на се с великими своя ему от рода избранныя и многими с ними по нем спомогатели, яко везде быти в людех того всех слух и око.

По отхождении же его иже лестию в лавру от града, на утрие, токмо еще начинающу дневи, солнцу же своя простирати луча на вселенную, собрашася необленно вкупе сильнословесныя рачителя его вся и, молебну человеку угодия хартию писаньми тщанно соплетше, временю прилучну в донесение ко оному, губительну же ║об. по всему суетием желателных душам в будущем, ускориша они самого архиерея²¹⁸ во двор и подъяша и с крестопокланяемою всею честию кафолическия церкве, и с прочими всего яда²¹⁹ во святомолебне устроении и исхождении и чине же купно святительне и священными в белоодежне оболчении. Сподвигоша же с нима и люди вся от старец до юношей от града изытием со святоношении во обители место, идеже превосходный славою, яко в берлозе дивия некако, лестне крыяся, в нехотения образе самохотящ ║97 нам поставитися и быти деспод, еже и сотворися, умолим вмале: идеже богатово хотение, ту удобно бывает прошение. День же того прошения тогда в сырней седмицы вторник бе²²⁰.

И якоже придоша вси со святоношеньми в лавру, изыде виновный сопротив во святосретении, с ту сущими священных же и простых, во сретение всеградней святыни. И вшедшим во церковь, молебноя обычие сотворшим, и по совершении начаша со архиереом святоименнии и мирстии столпи велицыи, и по них вси чинове царскаго велми всего устроения, ║об. и умноженая зело чадь малая с великими умильне с плачем молящим и бедящим же всяко и понуждающим на долзе много²²¹, да преклонится к молению и не оставит сиры, яко да будет росийску всему жребию царь. О сем кождо своя к той пристойная оного хотению принося увещания глаголы²²², могущая молимаго повинути о просимом, глаголющим же себе к нему сими примилити словесы, о сем друг друзе словохотне рвением ретящимся. Средним же и до мала всем нелепо с воплем многим кричати не в чин, яко до иже ║98 разседатися от вопля того утроба их, и лица рдетися ото рденья и ушеса своя от шума того слышащих затыкати, – такова²²³ человеком угодия лесть бяше в них! Прикровеному хотением ко всем купно отвещавающим, еже никако ему на таковое дерзнух, сице глаголаше. Не буди то! – рече, с клятвами се утвержая слово к ним. Просимыя же наипаче к нему словесы належаху, к мольбе паче многосугубу мольбу прилогающе, и вяшщий вопль простроша в людех, молимаго хотение спокрывающе купно вси. Он же и еще ║об. не повинувся к тем, яко да не вмале хотя умолим быти, и скорым их от крове умягчением уяснится его хотения дело и вси словом отщутят лесть его; откровением бо малем обличается обнаженне и сердечное сокровение, всяко умудрение вещи. Он же, зря всех таковое о себе прошения прилежание, еще спокрывся нехотением и выспрь, яко орел, превзятся мерою паче и прелукавне явлеными показаньми обольстеваше люди. Иже в руках держа пота своего утирания ткания плат; сего плата, ║99 в приложение своим он клятвам, предстоящим вдале народу, иже не слышащим от прочих вопля словес его, ставше ему в крылу церковнем, прямо входу западных врат, на месте высоце, еже мощи видену ему быти всеми, – оного плата окрест шия своея облагаше: ближним, им же мощи глас словес человеческих слышети, сим глаголаше, дальним же прилагателне о себе показуя разумевати, яко бы удавитися понуждаемаго ради хотяше, аще не престанут молящеи. Таково последнее тогда своего нехотения притворение людскому множеству ║об. показа, и плошайших убо сим в веру многу улови, прочих же никакоже, яко и сего его льстиваго ловления сетей разуменьми ся вышшим быти. Но что успе разумение? Аще и уразумеша, но хотящее богопопущенне быти, превратити не возмогоша, Богу в прочее то смотрительне на се к збытию попустившу. О хотящих деятися по сих и паки предиреченных имемся о предиглаголаннем.

Он же, по прилагании еже платом си удавления, убеже от церкве в темножительныя храмы мнихоцарицы, сущи сестре ║100 ему, и яко зельне свое нехотение показуя, известо же видением и крепце уверився, яко не имут молящая из лавры изыти, молимое прошение не получив от него. Видяху же молящая молимаго к молению яко непреклонна вправду, движутся вослед бежащаго, и внити спрошение в храмы пред лице госпожи, яко да тамо многу к ней мольбу прострут и яко да поне сия преклонится к мольбам и вдаст повелительне брата молящих прошению, паче же оного желания хотению. К сим же отрок некий наущен, не ве́де кими, ║об. хотимем ли самем коварне некако, или блазнительми его: яко проповедника изветом пред лицем мнихопребывателных затворов²²⁴ царицы посадиша и на забралех, поставленех в защищение града храмом, оноя мнишицы смирения ради; и выспрь сего на та вознесше, при самых оконцах державныя, изветом народа яко во уши той младый вопити повелен. Просимых же молению согласен отрока вопль бысть, вся народныя их гласы превосходя: к затворшейся иже в темных храмех ║101 волею единогласно вопия, да дастся ею поставитися царски брат ея во главу всем людем; им паки то же непременне крича и не престая. И елико сей вопияше, сим паче хотимаго обличаше, яко уже студ бе мнозем и слышати таковаго нелепаго и бесчисленаго вопля. И аще не бы любезен был и кроме воли желателя таков близ непреступных храмов бесчинен и мног вопль уноша, то не бы к месту тому и приступити смел, ниже бы зрящая стерпели тому на мнозе, яко и в средних таковым бывати не стерпевают, ни попущают же, обаче ║об. ни его, еда творимо что свене своего повеления узрит. Се к прочим множае бысть хотимому обличение.

Абие же вся молящая от храмов сестры виновнаго со многим изыдоша веселием, яко одарени, получивше ото обою обещно просимое, сестры и брата обаче, яко руками радостию восплескавше, во вся церковныя камбаны ударити повелеша, возвышающе выспрь своя гласы на многоополчении прошения; и о приложения лет живота новохотящем поставитися царии паки молебная ║102 певше довольне, и всем людем такоже обещавшемся²²⁵ новогосподе молити повсюде запоручиша и во всем царьствии спешне то же и с приложеньми творити повелеша. И по сем обещавыйся, много не отлагая, от лавры паки вниде во град. Елицы же к преимущему ласканий своя кождо прелестныя словеса в лавре молением изрицаху, не единаго ради сих множества²²⁶ изрещи не возможно, но и за студ, – усладил бо ся, блажим хвалами, лжами, и утвержатися обыче яко на ветрех, – о таковых бо Сама Истина рече: «горе егда ║об. возглаголют о вас человецы добре», и блажащеи вас лстят вы и прочая.

Он же презре словес силу, глаголемых Богом, ли не разуме, отнюдь, бо бе сим не искусен сы, от рожения бо до конца буквеных стезь ученьми не стрывая. И чюдо, яко первый таков царь не книгочий нам бысть²²⁷. В прочих же, разве сих, худого преизлиха в мори обладаемых коварствах паче о простертей вещи познаетца, о ней же слово: како, всех обольстив, на верх всея земныя чести превзниде, подобне, яко на небо от земля, единоступлением на престол ║103 царствия воступи, благороднийших себе в рабы себе покори, первее средороден и средочинен. И аще убо дерзостию и прегрешно зело наскочение на превысокая сотвори, срабным бе, но ни враг его кто наречет сего, яко безумна: скудоумным бо тацем образом, яко же он, на таковая превосходити и обоимати недостижно, аще кто ин таков обрящется в людех. Таков бо той бысть рабоцарь, яко и прочая величайшая и прегордыя по вселенней цари, иже нечестивых держав обладателя, ║об. рабородства того не отвращахуся, ни гнушахуся, державнаго ради соименства²²⁸; и благоразумия его о земных слышаще, справаго братства и друголюбства не отметахуся, якоже и благороднех, прежде его бывших, ли и вящше. И что дивно: аще быша по сем нам инии цари разуму, но к сего стень суть онех разумы, якоже познано есть во всех: киждо бо, яко ограду некако прелез, свой путь погибели обрет²²⁹. И да никто же мя о сих словесы уловит иже о любославнем разделением: ║104 во овых того есмь уничижая, в прочих же яко похваляя, в ких явится местех; по неких ни убо, но зде того при онех разума единаго праведне представляю, якоже и в прочих, не разликуя; во инех же, яко и в сих, оглаголанием не терплю сего господских глав убийственное ниизложение и на сих престолы наступления; разве же сего в делных прочая того благая и злая, бывшая на лицы и нами изрещи возможная, не утаишася, но не вся, разве что сокровеных.

Нрав же бо ему сопротивне ратующих ║об. ходити: егда не исхождаху они на брань, тогда он устремляшеся на ня, егда же волцы овец не врежаху, он сих на ся звизданьми токмо, яко храбор являяся, призывая; егда же суровии смиреным безстудне наветовати начнут, он пребывает от каменотвердынь неисходен, якоже преди слово покажет и мимошедшая изъявит. По избрании же великаго и своем ему к нам хотении на превысокая не скоро тогда, но разсмотрено и еще седает, яко лето цело препустив, дождав предпосланного ║105 блаженным Феодором, самодержавным царем, на восток ко агарянску царю²³⁰ ходившаго. Известив ему той, в послании пришед, небытие царево на Русь, тогда новоизбранный наш хотяй быти царь, уверився тверде о неисхождении сопротивнем царя, собрав многи вои, преславно творит исхождение свое. Ополчився ратью противу токмо имени царя, не наветующаго нам бранью тогда, дошед града Серпухова, царь наш ста при брезе Оки и двомесечно медление творит тамо ║об. на едином месте со всеми силами преди, не поступая. Обаче и посланныя от царя, не ве́дущи его исхождения и стояния ту, приидоша обыкшим обычаем по первых, якоже иногда бываше между господств посланным с посланными вкупе ли особь приходити сопротив творимо. Он же свое устремление притворное в царских светлостех многолюднаго собрания предо онеми показуя изветом своея храбрости, яко готов бе, глаголаше, тех сопротивитися царю, и все уряжение воинско ║106 и огнепальная премнога громостреляния, иже посланием огаряном пришедшим во устрашение та представляя, сими сих и в прочая ужасая. Им же тогда и путишественый свой прехитрый белосущаго лняноткания снеговиден град, долготою и широтою много обоямо простерт, того им во удивление показа, его же составное умудрение видением подобоградно все, многи врата и башты по стенах имея; величество же объятия того четверостенна круглость; отдалече бо зрим, сущу быти²³¹ ему, ║об. яко каменюзданну граду, и внезапно ставшу некако на месте праздне, о нем глаголати неким, могущь же некогда и устрашити кого мимоходящих путем от нечаяния скорым возрением нань и последи удивити. Внутрь же себе имея, красуяся, вмещена самого царя, водворяющася с чинми всеми, и вся телесныя того потребы в себе объемля и о них служимыя²³². Рать же всю, окрест вне стоиму округ же его, украшаху цветущия злаконосне крины, зеленеюще и цветущеся различне. Со оного же места ║107 обладатель наш чюжеверныя воспять отпусти, и яко пришед вся во своя, видимая ими своему они царствии возвестят. И ту двомесечное он исполнив время, со тщетныя победы к царствию во многосиятелней возвратися славе, фараонитцки, множество колесниц и конник, сим исхождением ко еже возлюбити его всех паче утверди иже не разумеющих²³³ козненаго.

И еще, пришед, о своем совершении премедли два обращения луне до начала новаго круга, индиктиону тогда начинающу седмому, себтябрия 3-х каланд²³⁴, совершене²³⁵ ║об. помазася елеом от рога, в сущих на земли превосходною²³⁶ венчася славою, оттуду господско притежа си совершене имя, – царя же и князя вкупе наречение прия, якоже обычай бываше сущим помазоватися царем в преимущих чине преславнаго возвышения; зде желаемому си неявлену хотению збытием конец приим, яко всех царей честь, собрав, единому имяни своему возложи. Толикие бо гордости вознесеся о царствии, еже вмале не сравнися з Богом послежде; но получение таковыя ║108 славы от своего ему яве желания по всему яко нож наострен сам принесе своему сердцу, им же себе збод и, низпад, сокрушися, якоже и во других о сем пространнее речеся местех.

Лаврскаго же ради иже прошения сотворенаго получения в безмерная уставиша церковнии святонастольницы, великому угождающе, оному же сим приповелевающу, от матере церквам²³⁷ и царствия всего святоисхождения сотворяти неизменно на лета в сырныя седьмицы третий день: празднование изветом яко Божии Матери имени возложиша, вещью же царюющаго угождению ║об. сокровне, яко да той день не остает неисходен в домех и нигде же ни един от велика до мала, мужеска пола и женска, онем воследуя. И таково уставление во указания день исполняше, не преступи до иже бе живот в первоповелевающим и се хотящем. В твари же, по строю тогда от небес, – аще слани, аще дождевы, аще бури, и нестерпимыя ветры, и прочая, еже никако мощи издомовне изникнути, – обаче повелеваемое за страх и помущения ради облак отложити не смеюще, но яко со тщанием творяху в страсе. ║109 И чюдо, яко во она происхождения сам, о нем же празноваху, исхождение собою сотворяя купно с народы! Сам себе празнуя по образу, иже кто на кий день каковыя Богом беды избавится, тогда празднует Богови: незабвено будет в помилованем дело Его, – и к сему того должная есть, – он же радостне празднуя, на кий день временную си славу получи.

О, омрачения! о, многаго славоослепления! Или еще от сих вин сего злоба, еже царей умершвение и царствия желания, не обличися, ни обнажися? Что таковаго явления явленнейши, иже господа ║об. убийца сокровеных в нем таин внутрених обнажение от сего познася? Всего паче Бог на суде открыет всяко и обнажит! И аще кто сопротивне за оного речет, яко не себе ради сотворяше исхождение, но рождшия ради Господа²³⁸,– к нему же и мы: и аще се тако уставляете, почто прежде своего он избрания той день в седмицы просте минуя и не празднуем оставляше? Но сопротивляяйся о сих руку си на устех положит, паче же сицевых Самая Истина заустит.

Но дóндеже оного бе живот, до толико таковая и происхождения ║110 бываху: яве яко не Бога ради; не престало бы всяко в век, оно же смерть пресечи. Не токмо же егда по смерти оного, воздуху смущаему, собори и людие не удобни бываху к неисхождению, дождев ради и ветров и прочих, но егда и странно время бяше, иже чистота воздуха и яснины многи, светлость дня, солнечных луч сияние излишно, – единако тогда презрено бываше повеление и в конец отложено, не действено же, и яко непотребно отринуша, и всячески неприятно судиша то. И яко же тогда в неудобная времена со святынями ║об. не соисходити за страх не смеша, сице множае по оного смерти и возможения дни исходити не восхотеша, яко и о первых, таце действо не благоволиша; и елика оному в животе его от того законех слава бе, толико же и паче по смерти отвращение и ненависть. Сице и о другом предипомянутем сотвориша, иже на место обознага стояния тогожде указанием исхождений купно о всех творимых страх умершвен к недействию, яже прежде во страсе творяху, не отлагая; человеческим бо законом преграда смерть законоположителя бысть.║111

Не убо ли от сих и первосвятителя²³⁹ с прочими обнажися лесное послужение в животе ему? Яко же и инии в жизни тогожде, лжеугодием работающе ему²⁴⁰, во имя бо купно державных ангелов храмы здаху мнози з довольствы, яко вечны, и иконы писующе украшаху и прочая чести тем сотворяюще; славимыя же несытне о сих услажахуся честию, опасно сами сия о себе ве́дущи и зрящи. И по исходе славолюбных отсюду, храмы они опустеваеми и небрегоми, иконы же презираеми, яко поругани и насмеховаеми ║об. умалением веры, ими же прежде почитаеми, сими и оставляеми. И яко и Бог оставит оставляющих, и не человеки бо они обезславиша, но человек ради Божия угодники, им же волею обещашася честь творити во всем животе си и обещанное не соблюдоша; лучше есть не обещатися, неже обещав солгати и не сохранити. Како от сего не научся предипомянутый он, иже не сыт бе в земных славою: в жизнь бо самую иже во блаженных Феодора тацы же бяху временопрелестницы воздвижение храмом и воображения икон державных ║112 ради имен утворяху многи; не иже ли при животе тех токмо та быша, по смерти же ни? Но избранный Богом тщетносуетных славами не услажашася, яко же он, истинныя бо славы от единого же Бога ожидая, желаше, зван бо от Бога, а не от человек, по Павлу святому. Той же, иже о нем слово зде, не внят си во ум тогда о преставших возвышати иконами имя по смерти Феодора, – не имут ли по сих и о нем сотворитися, еже и бысть, – но тогда ему свое любославие одоле, и до иже тому живот, дотуду и слава льстящих бе.║об.

Не восхотех же и се не помянуто оставити: ангела бо имя воцареному бе един празднуемых перво от двою июля в 24²⁴¹, в онь же творится пресветлая добропобедных на память новоявленосвятых мучеников всеросийских князей самобратных по плоти Бориса и Глеба, во святом крещении Роман и Давид, иже самоизволне презреша земное царство и во исповедании крови своя излияша усердно за Христа, той бо не разлучи их в животе на земли, ниже по смерти на небеси. Тех святую ║113 двоицу, не разлучимую Богом, человекоугодницы иконописаньми на дцках разлучаху единаго от другаго; вящщаго описующе, яко почитаема мняху, паче же сим раздражаема на ня, юннаго же с сродным не совокупляюще, яко презираема от сплотнаго спребывания воображением²⁴² отторгаху. И что тяжко бе: на дцках вапы обою брату воображати, святороженнаго супруга не разпрязая, ве́де, яко не шаровнаго бо другому не доста утворения, но иконостежателей²⁴³ веры умаление²⁴⁴. По притчи земных указаний: два друга кто обрет, брата си, ║об. ближники царя, и за вкупную искрь себе любовь сообращающемся им друголюбием выну, по случаю же зван будет инем третьим на брак един от двою, не разлучающихся никогда нигде же, – не имат ли незванный от звавшаго своего презрения вменити в бесчестие и о звавшем враждовати гневом? в прочее тому не хощет нарицатися друг, но сопротивне, и время обрет, цареви нань о своем уничижении в молитвах изъявит; негодует же всяко на звавшаго и званный брата ради, к брату бывшее оскорбление ║114 вменяет свое бесчестие; и яко не убо дружбы дело се, но разделения и самохотныя вражды, и не точию бо братия имут во отмщение ревность сию, но и несроднии друзи же; предиреченному же не трапезнаго предложения недовление другаго к любви удержание, но оскудение усердия к дружбе.

И что рещи о повелеваемых иконописателем, в них же суть ови разумиви, но неразсудливи и невнимательны о добре и зле наглости ради, ови же средоумни, другия же нимало, но на первыя взирающе ║об. подобы, прочая же поучающих не внемлюще преслушливи и презориви всяко? Но множае горе преобладающему, иже превзятся на всех разумы, опасно бо ему сия ве́дящу и зрящу: единого лице годе ему бысть на иконах. Сопричастен же ко греху о глаголемых иже духовная кормила объемый: слыша бо таковая, ве́де и зря, но умолчевая, а не поучевая, ни обличая. И о сих судити весть правды Око, Иже вся зрит, егда приидет день Своего пришествия. Паки же ║115 возьмем²⁴⁵ слово, от идеже стахом и начатое положихом, паки же бывшая по ряду да напишем²⁴⁶.

Не зжали бо си, ни помысли, ради получения славолюбия соутробныя ему сестры, всеа же Росия госпожи²⁴⁷, сицевою како зелною скорбию ту оскорбити, еже по такове мужи не прилучшеюся смертию разлучити и зрети ю ему присно от толикия славы в черная оболчену²⁴⁸, ея же ради некогда сочетания за еже ко царю он си всю честь получи, якоже подражатель бе; господския иже первых по цари болярския многи ║об. дщери девы²⁴⁹, своя же госпожа, нуждею от зависти постризати, яко несозрелыя класы срезовати, им же не бе всяко воля. Тем родителем их колику скорбь и болезнь вечну творяше, не брегомы толико, яко кроткия агницы остризаеми; не явлеся о сем извет творя, яве же вещь указа: яко да не понудится некими царь прияти едину от них второбрачием²⁵⁰ в жену, неплодства ради сестры его²⁵¹; он же тогда уже будет яко ничто, – мняше се серце его, собирая беззаконие ему. Но еже ║116 чюжим чадом содея, се и о сестре сотвори он же; како же не к сродным той человеколюбив явился бы? По прехождению же времен и дщери²⁵² его не от коего тожде бысть невольное пременение риз, но и со студом всяко; аще и не он, но мы узреша то. О жене же и сыне²⁵³ его что рещи? нужно бо удавиша и неначаемии враги, о сих слово пространнее преди положися по своему чину.

И яже злоба о Борисе извещана бе, должно есть и благодеяний его²⁵⁴ к мирови не утаити и в среду глаголемых совнести, аще та и притворна ║об. им к людем бяху по всему. Елика убо злотворная его подробну написати подщахомся, сице и добротворивая о нем исповедати не обленимся, дóндеже от прехода летняго продолжения не спокрышася забвением. Елика ми на память взыдоша, толико напишу их, да не и наше списание еже нань злобное возмнится по неких враждуемо; егда злотворная единако изречена бы, добрая же от инех сказуема, нами же умолкнута, – яве неправдование обнажилося бы списателево; ║117 а иже обоя вправду известуема без прилога, всяка уста заградятся.

В начале убо жития си он всяко добровиновен бе; первое его – и добро творив и начальнейшее к Богу, неже к людем, се еже о благочестии всяцем ревнитель усерден по древних о церквах с чинми тоя бысть попеченьми прилежен; требующим даватель неоскуден, к мирови в мольбах о всяцей вещи преклонитель кротостен, во ответех всем сладок, на обидящих молящимся беспомощным и вдовицам отмститель скор; о земли правлениох прилежанием ║об. премног, правосудства любление име безмездно, неправде всяцей изиматель нелестен; о зданиох градостроителных вещей яже к царствия наполнянию тому прилучныя красоты уряжением излишен; доможительное всем во дни его пребывание в тихости не обидно, даже и до начатия еже по нем самобезначальства в земли; насилующим маломощных возбранение з гнева прещением уемно, разве обид ких слух его не прият; обидимым от рук силных изиматель крепок; ║118 купно о всея земли утвержение попечением показуяся преизлиха, дóндеже не превзят любовластием; в безмерие богомерскому винопитию продаяние отнюдное искоренение с наказанием; зелных мздоприимству всему в конец умерщвение не пощаденно бяше: мерско бо ему за нрав; на всяко зло сопротивное добру искоренитель неумолим со властию, яко же инем воздоброе мздовоздатель нелестен; но не всем убо, во всех же Росию всю олукавствова, преже бо уклонения его ко злейшим, иже на господско подражания убивство ║об. по первосамодержцех благочестию последуя, во инех и вящше. Но вем вещи силу сказати, откуду се ему доброе прибысть: от естества ли, ли от произволения, ли за славу мирскую; яве, яко в прикровеней лсти, за еже на самую высоту от много лет разжения его, тайно лежиме во глубине серца его. Мню бо, не мал прилог и от самодержавного вправду Феодора многу благу ему навыкнути, от младых бо ногот придержася пят его часто. Яве, яко узде его Богом попущене бывши, возбранению ни от кого же ему не сущу, отъигра бо ся, ║119 яко жребец от стада, самовластием от Бога и царя. В часе же смерти его никто же весть, что возодоле²⁵⁵ и кая страна мерила претягну дел его: благая, ли злая; яко «может Бог и в день смерти воздати человеком противу пути его», якоже пишет. Но что, аще похощет кто дивитися еже сего к земли о добром тщанию? И не чюдо: что бо от всех сущих сравнитися может главе царстей? Аще бы он и себе всего самого за оного живот некако излиял, ничто же суть достойно, ни мир весь, власу единому царских ║об. глав, якоже видим ныне вси, аще не тако суть.

Добротворения же он своего ради еже к земли мнимаго им прилежания его, превознесеся гордостию серце ему, яко же некогда Новходоносору царю о Вавилоне²⁵⁶ дел ради здания. К сим еще прилагает два некая делеса, яже с прочими зде его добрыми в ряду не вписашеся, иже он нача, гордостию разстворив, здати, Бог же, совет его предварив, не даде ему совершити, разсыпа бо и, прегордое его предзря.

Первое убо и верховнейшее ║120 дело его: основание во уме своем положи и промчеся всюду, еже о здании святая святых храма сего весь подвиг бе; яко же во Иерусалиме, во царствии си хотяше устроити, подражая мняся по всему Соломону самому, яве, яко уничижив²⁵⁷ толик древняго здания святителя Петра храм Успения Божия Матере²⁵⁸. И яже к созданию на сограждение стенам потребная готовляхуся им вся. Второпервое – превелие и то дело его, – аще и восхоте убо, не возмог же се: источник самого присносущаго живота ║об. нашего, Тройческаго состава Единаго видимаго возраста Христа Бога Гроб, божественыя Его плоти вместилище, с сущаго от их во Иерусалиме мерою и подобием, златослиянен весь вообразити подщася, каменобисеро- и златовязно устроити. И якоже у близ совершения той быв во утворении, топази оны и бисеры многоценными, яко лящею, весь посыпан, ухищреньми умудрен прехитре зело, яко не токмо невежде подобным мне таковое дивство бысть, но и благородных ║121 первых, неже по сих, иже в царских домех при всеа красоты славе воспитанех, драгости и умоделне хитрости дивяся; уму же и даже от предел своих уступати, зраку же очес от каменоблистаний, светлостей различья сияний луч едва в местех им своих устояти. Многоценства же о нем объятися численыя истовыя меры положения не бе, превзыде бо числа всяко.

Сие же зде не вещи дивство естества, но превзятие Борисово описую, сугубство гордости, высокоумие бо вере его одоле, множае камень честных з бисерми и существа самого ║об. злата превозношение взыде. Внят Божие ухо воз ношение сердца его, зане частыми смотреньми вещи сея превзимаяся, предварших его всеросийских деспот всех уничижая сим, яко упремудрився, иже, глаголашеся, и не бе в них толико разума о сем домыслитися. Сим всечастно надымаяся, таже и от ласкатель ему своих бояр поджизаем хвалою лстивою, яко подгнетою некако, словесы многосугубны потаки ему приглашающих и паче сих и, яко хврастие подо огнь, хвалу серцу его подлагаху, образующе ║122 своими словесы, яко и онамо в будущем подгнета ему будут они таковым ласканием. Они и к царствия желанию сего подвигоша, связахуся с хотением его, якоже два ужа некая, вкупе: сего хотение и онех ласкание – грехоплетенная верига. Како убо той помысли толика велия дела наздавати, еже воздвижение толико святыни храма и о вотелесении Господни, кроме Божия хотения и воли, не ведый, яко и богоотец древле пророк святый царь Давид, иже по сердцу Господню бывый, таковое ║об. здание рачаше и не получи, но ему же повелеша, иже от чресл его изшедый нача таковое и совершит? Добре иже о себе начинающих таковая рекошася, яко «помыслиша советы, их же не возмогоша составити». Гробозданное же златое умоделство все красотою его многою нелепотне Ростригою лжецарем на доможителныя потребы безообразни сокрушени разсыпашеся, неже хитротворение, красоты жалость от разбиения удержа. Обоих си деле Бог имени Своему совершенех им быти не благоволи, ║123 показуя всем, яко в них же з гордостию вера того слияна бе; нечто си примесися вкупе, мню, и от неправды собраное, еже от слез и кровей, от Создавшаго око и Насадившаго ухо и Научающаго языки мня утаити, но не возможе. От неправды Бог угождаем не обыче бывати, яко же овча порочно, слепо же и хромо²⁵⁹ приносимо древле Богу на жертву: «принеси, рече, таковое князю вашему, еда приимет». В них же он угождати Тому надеяся, в тех прогневая Того паче. Тако же и о тяжкослиянных ║об. и многошумных звуком камбанех бысть и злое соделанех. Приготовленая же орудия на вся яже сограждение великия церкви Богом не у на то прияты, яко непотребны вменишася Шуйским Василием царем, на ина здания, даже на простыя храмы вся распродашася. Яко добродетели убо по естеству вся благи суть, различне же от Бога судятся произволением творящих я – сице и о сих²⁶⁰.║124

Во время же своего воцарения ему умысли себе и семени своему по нем вся иже страхом приведшая; о себе, о рабе, упова нечто таково, еже твердее же и преждебывших его царей крестную ему в людех утвердити клятву во утвержении царства. Сотвори невозбранною своея власти волею некое законопреступно, чрез первых царей положеныя ими уставы, яже прежде в доможительных храминах, не яко же он в Божиях ║об. храмех с проклятием клятву сотвори; бывый со угожающими бо воли его, таковым прикровено словом в мысли своей сложился едва вмале не з богоотступлением вся привести ему во имя свое и в род от рода под клятву люди²⁶¹. Бе же се и не всем болезнено, токмо разумевающим. И еже бо до сего свою ему с ласкатели излияти злобу, яко аще, по клятве в малех неких писанех, погрешившем кому что от воли его сим в клятвописании, под крест подложив Христов, глаголати вчини, не радя толиких человеческих ║125 душ, еже обнажитися всем надежи на Бога повеле. И даже до сего богоотступно слово приведе, яко не быти на нас всех Сотворшаго ны милости и святых Его; конец же – не разсмотрено и анафеме²⁶² всех подложи, свое привременное царство, мнимое утвержение паче Божия заповеди почет, не ведый, яко единой души словесней мир весь не достоин бе. Но им же мняшеся во царство си утвердити, сим паче свое укрепление разори: Божию ярость на ся в конец разже, не малу бо о погибели всех душ, клятвенаго ради греха ║об. порадоватися врагу дьяволу сотвори. Слепый вож толико стаду быв: грамотичнаго учения не сведый же до мала от юности, яко ни простым буквам навычен бе²⁶³. И чюдо! первый бо той в Росии деспод безкнижен бысть, в миролюбных же двизаемых вещех многосугуб коварств паче тацех многокнижных.

К прочим же другое таково богопротивно веление попущенем ему самовластием содея непрекословно, самозаконное беззаконии, архиерею отцу с прочими верховными богоненависную ║126 во имя его к людем клятву умолчавшиим страсне наемника образом вси, неже пастырски: во дворех живаго Бога сотворити ему ту повелевшу, забыв древнее онамо во святилище гордостию покажение Озиино^264,265. Зде же, в самой матере церквам, идеже безкровная Христова жертва приносима о мире всего мира²⁶⁶, ту же чюдодействуемая преосвященных телеса слежаху, – в ней написанем страхом привед всех с принуждением х клятве, дом Божий сотворь место клятве, разрушившее ║об. древнюю нашу клятву²⁶⁷. Яко же иногда нечестивым многоживотное безсловесных стад ревяху, бесом провожаема в жертву, сице словесных народов соймы, в церкви снемшися вкупе, кричаху клятву, гласа многа на высоту пущаху²⁶⁸, яко прочим ушеса своя от безчиннаго вопля затыкати, непщующе нам, якоже благодати от святилища изшедшии беззаконий ради по иже во Цариграде бывшему образу²⁶⁹ иже от благодати отступлений, яко, мневше, от зелнаго кричания церковному разсестися верху. Но Озии²⁷⁰ убо на челе ради ║127 дерзнутия покажения прокажение, – сей же, мню, в души прия. И толико содержим нечювствием, яко не в самый год Божия тайнотворимыя страшныя службы от таковаго бесчиния повелевая престати, ниже во время часа их Благовестиом прочитания премолкнути; но и евангельская святовозглашения неблагословный вопль одолеваше превосхожением шума, ниже самого Богоцаря, животу Подателя, преношения ради Даров Его усрамившеся, еже бы гортанем заградитися и з говением ║об. устыдетися, поне час мал, Его же и херувими в молчании мнозе крылы закрывающе своя лица, ни о изрядне Богоматере Песни²⁷¹ приставницы о премолчании радяху, но краткословне рещи: ни чтущих, ни поющих не бе слышати, тогда по всему дом Божий дом купли сотворшу, благочиния бесчинию победившу. Первосвятителю ту на своем ему месте предстоящу²⁷², яко безгласну пред нелетним, славнаго одоле страхом, Богу убо стояше образом, человеку же угоженьми, яко мнети кому – не петей литоргии бывши в той день в матере церквам шума ║128 ради. И се по многи дни творяшеся, дóндеже все безсчислие людское клятве подложиша, день дне, в жатвеныя до девятаго часа²⁷³ и вящше неисходно молву в церкви продолжающе, святительному ни храма заключати повелевати смеющу, – толико глагол царев превозмогоша и: аще и до вечерния жертвы²⁷⁴ были и паче, приставником из храма не исходити. Аще ту и не сущу самому царю телом, ниже образу его, никакоже повеленое презрети смели бы; мы же и воистинну Сущаго, яко не суща помышляюще, не трепещем, ║об. ни боимся же, Ему же говейне и Вышшая херувим Мати Его Сама раболепно с чином подобным, яко Сыну и Богу, предстоит купно во мнозе страсе, неже бесплотных ликове и святыя. Довольне бо есть во указание нашего невнятия се обличение, яко, во время святых собрани, не терпеливи в молитвах обретаемся, еже не прежде отпущения мал отлученый час на пение во церкви неисходно пребыти, но страх Божий презревше и заповеди Его, входим бо и исходим, яко скоти безсловесни, безвременно и без страха влачимся, яко же кто восхоте, ║129 самовластию надеющеся, от Него же и осудимся убо; не толико бы осудихомся, аще не бы волею всех Бог спасения нашего искал. Нам же не у сопротив воли своея ставшем сотворша, не боящеся и Самосущаго во церкви на престоле седяща образа Владычня, и не точию образа, но и Самого Пресущаго: идеже бо церкви или икона Христова, ту и Самого Бога пришествия. Мы же небесный страх ниже земному сравнихом, но срабнаго паче Самого Владыки почтохом; сего ради конечно все зло на ся привлекохом, от него же даже и доселе ║об. не исцелехом за прегрешения коегождо младоспреходящих.

Ко онем же и третие тогожде миролюбца неподобство воспомянути, еже по местах яко о добре в послушество клятве пресядящим, идеже людския душепагубныя рети клятва бе: иже в первых первый сам святейший верх, таже четвероуголнии росийстии столпи, святонастольницы митропольския²⁷⁵, и по них от синглит благородием великия, разделшися обоего чину, повелениом мирообладателя повинушася, человекоугодне со страстию летающе перед лицем ║130 самого Бога и одушевлена киота Матере Слову и при ковчезех освятованных телес, дерзнуша сицеви пастырие присидением, яко к жертве, к клятве земнородныя во очию свою провожаху.

Не токмо в самом царствии, но и по градом такоже сия клятва во святилищах бысть. Удобее бо церковью от клятвы разрешитися людем, неже в той клятвеною вязатися узою²⁷⁶. Аще и не ту кляли быхом ся, не ту же ли клятву быша ему исполнили²⁷⁷? А иже оною от самого безумия связахомся, чим возможщи имамы от тацех ║об. уз разрешитися по реченному же: «и кленется церковью, кленется и Живущим в ней» и прочая? Безсловеснии пифицы²⁷⁸ соплетохомся неразумием! Таково бо дерзнутие повелеваемым и попущаемыми ему на се сотворися, яко место описуем есть Бог по них. Се от вещи показаша людем, яко во церкви Бога токмо пребывающе мнеша, а не на всяком месте. А иже в полате таковая клятва сотворити бы, ли инде, он не восхоте убо, паче же ласкатели его, на се угажающии ему, понудиша, крепце тамо быти клятве уставиша, – и по них, яко ║131 не на всяком месте Бог и не всюде зрит, ниже везде сый, ниже вся объемлет, како же и горстию всю содержит тварь, но местом описуема и сотвориша, иже церковию единою Тому объиматися. Аже вся тварь Сего вместити не может, неже объяти²⁷⁹, Бог бо Сам Себе предел и место, – богословцы изрекоша тако. Но, Господи Всяведче! остави нам безумия глаголы, яко Отец чадом, немования смеющим о Твоем пресуществии о неизреченнести²⁸⁰; неведение бо злее согрешения, рекоша мудрии; Ты бо верным всем неведением бываеши ║об. ведом, зане безмерие еже о Тебе разум. И множае о сем во обличение слабости рещи, но не потреба и за тесноту довольно бо и се рачителным. Богатыя в разуме и добре от Божественных Писания паче сами сведят и си нам просветят²⁸¹. Но о сотворшихся клятвах во святилищах нами о сих не унывати, но покаяния искати от Положшаго различныя образы покаянию и Ожидающу, силен бо от сих разрешить²⁸² ны, бесовская умышления, прехитри коварствы, Иже словом единем связавый сатану; аще с прилежным ║132 прошением²⁸³ тепле Всесилнаго умолим, достойныя плоды покаяния сотворше, и к тому вся могий противному о нас не радоватися сотворить.

Предваршия же сущия наша цари, еже бы во церквах клятвам при сих²⁸⁴ державах бывати, сего законопреступления свободни, ниже причастни отнюдь; но в жителных храминах таковое о своем утвержении сотворяти повелеваху и бес прилога всякого, иже губительно человеческим душам, еже предипомянутый Борис умыслил, си мня во утвержение, Бог же преврати мнимое его твердое ║об. на бывшее людем о нем развращение; вскоре бо сконча живот его, якоже пишет: «егда глаголете мир и утвержение, тогда найдет на вы всегубительство».

И первым же оного дерзостем и се бестудие его не мало и приражение²⁸⁶ церкви бысть, ей же обычно бе по отпустех в концых коегождо пения всяка дни царюющих токмо единех имена и с пастырем православию всему ║133 песнь многолетнаго утвержения во церквах ликове на клиросех по странах возглашати. Он же в той, чрез уставныя во церквах обычая, своечинье приложи: з женою ему купно и с чады повсюду певатися сотвори, сим непщуя много к жизни своей прилог сотворити, обаче же и улиши убо. Такожде и в земностроении писмянных делес восприят лукавне в мысли, дмением своея гордости восхоте²⁸⁷ сотвори чрез первыя самодержавных уставы в писмянех всяцех свое утвердити имя: полным имянованием ║об. в коейждо строце описоватися повеле, егда имя его аще и вмале где наменено будет²⁸⁸; не погрешати полнаго именования отнюдь, аще и учащено будет в них; елицы же погрешиша, тии муку прияша. Умысли бо он тоя полности частостию имя свое вкоренити и памятну быти в роды, не внят о сем ушесы гласа пророческа, яко «в род един потребится имя его», еже и бысть.

И еще не довляшеся о нем и еже о имени полноты писмяны частость, но и главе самой церковнаго верха, иже бе выспрь всех во граде²⁸⁹, гордостне ║134 сему сравняяся, ему же в начале своего царствия к первозданней высоте много прибавление сотвори и верх позлати, иже блещашеся, всеми доныне видим есть, приснует, всех святилищ высотою превосходя, – на нем в позлащеных дцках златописмяными словесы имя свое пригвоздив, яко дивство некое на свешнице положи: мощи отдоле к высоте зрящим прочитати словес дебелость, яко в руце имуще близ, неведый речения пророческа о таковых: «аще вознесешися, глаголет, яко и орел и сотвориши си гнездо посреде ║об. звезд, и оттуду свергу тя²⁹⁰, глаголет Господь», еже помале и сотвори. Льже – и самоцарь темныя своея власти, рострига богопустный на ны Гришка, порекло Отрепьев, пришед, среди царствия срамне того и всеродно низложи, яко дивий козел овна рогами збод, с самого престола стремглав на землю сверг и не чювствене аще, ругателне же обаче, яко на главе того, свержением посмиявся, нагами ста; пространнее же о сем преди слово изъявит.

Самоутвержение же оному, им же во царствии всяко утвержашеся ║135 сам, не успе никое же, ниже предипомянутое здание высокостолпное, златословесие самое, яко на аере пригвожденое, неже на скоротленных хартиях словесы учащение имени; но, яко поучинно ткание, недействене все удобь расторжеся, телу сущу ниизложену, и слава погибе вся, о нем же зде слово бе. Сице Бог гордым, уповающим на ся, противляется и мыслено сих сламляет роги.║об.

Ов убо куртес²⁹¹ и доместик²⁹², притворением творяся кроток, неже естеством, обольсти в правлении изветом правосудства люди, от плашайщих ту, идеже бе, и повсюду чад, от нижших бо степеней мнозех на превысокая льстивне превозшед вышши и благороднейши себе; потом же, егда желания своего край получи, мирови надежею солган бысть. В начало о сих некоего своему злу ║136 злокознена всячески наставника и учителя си име²⁹³ – како преходну быти ему от нижайших на высокая и от малых на великая и от меньших на большая и одолевати благородная, – древня мужа, иже в царских ступающих тайнах премудрых царей наших предварших приближена бывша, и многолетна, глубочайшими сединами цветущи²⁹⁴ и состаревшися, без него же никая же державных тайна и о землеправлениох законоуставленая положения не совершашеся, понеже в дельных зело злохитр ║об. бе от соименных ему. И в преимущих чином всего синклита ин сицев до дне смерти его и по нем доныне не обреташася, – такова убо се той желатель царствию учитиля тезозлобна по нраву стяжа! Бе же сему мний соутробный на се с ним оному споборник²⁹⁵. Они же своему чину первоначальницы суть в самописщих²⁹⁶, и вправду сия же самобратная двоица и супруга честная перваго чина по цари достойна, разума вкупе с чином и взора ради земнаго любомудрия, паче инех наказаний ║137 мнозех. Не мала же посреде их обоюду со онем и клятва бысть крестоклятвена еже к царствию трема утвержению. К сим же и еще о себе преобладаемый он и инех мнозех рачитель, на сея же о нем дщащихся, име, но не якоже сии. Время же довольно препустив, егда он высоту си получив, клятву же преступив двобратном и, кроме убивства, зло сотворити возможе, яко и прочим: обоих, якоже зверь некий обратився навспять, зубы своими угрызну, многолетно бесчестным и влачащимся ║об. житием, живот их продолжив, изнури и отъятием именьи лишив²⁹⁷. Тако и до гроба жизнь их проводи, ни во что же им вменив толика их к себе ослужения, яко еже и на царьствие посадитися ему ими, подобою, яко на небо ими возведен бысть; сам себе крестопреступен душеубийца бе; яко же они ему несвойственое дароваше, в сицем и он сим не исправляше. Кацем же послужением ин и то возмогл бы оному угодити? аще и главу бы свою зань положил бы, не бы что успел; что во царствах дражае ║138 и высочайшии бе, – и се ему по получении ни во что вмени! Сия же два, о них предь глаголашеся, з главами и душа своя зань положиша и чрез естество, но ничто же получиша, паче себе вредиша и от Бога отщетишася, вкупе же и человек. От сего оного обладателя нрав чтущим познается, елицы сего в жизни зрети и о нем слышати не получиша.

-----------

Егда²⁹⁸ восходя он на верх царския всеа высоты, к прочим еще о себе утвержением и сие приложити ║об. умысли: ко еже избрания его укреплению скрижаль велию на хартии с печатленьми вси людие о нем, иже от первосвятитель и синглит весь, даже бо и до нарочитых, да напишут с подписаньми своих им десниц²⁹⁹. К сему же аще не устрашися дерзнуть, иже заклепанный оттвердити гроб и вложити ту во златый ковчег ко освятованным мощем рускаго первосвятителя, во святых дивнаго чюдотворца Петра раку, юже благочестивии самодержцы первии, паче же Бог от здания ея затвердиша крепце, еже ║139 проидоша лета мнози, яко и самим настольнийшим обоим, святителем же и царем никогда же ту отверзати, якоже прочих, сме́ша. Сея той многолетнаго златоспания твердая дерзостне отвори, внутрь тоя миролюбовную си хартию, своего лукавства мнимое утвержение, безстудне, яко к мертву и просту телеси, яко нечестивне вержением вметнул, святителей на се принудил, ласкательми же наумняем, и по растлении отгвождением киота сего паки о ней того затвори. Мняше си сея вложением с тоя утвержении царствованию си благостоятелну ║об. и вечну пребыти, солга же ся всяко о своем уповании. Но простите ми, чтущии! Яко паче аще смел был, да не второе растлится гроб еже дозрети сего достойно бы. Не буди то! Но³⁰⁰ яко же на собрании вселенстем четвертаго святаго иже в Халкидоне Собора³⁰¹ некогда во извещение инославнии гнилое свое списание сположиша во гроб святыя Еуфимьи, и обретеся отвержено при ногах ея, сице и тому святым святителем Петром отметнуту быти верою, понеже богопротивно умышлено бысть, ║140 а не якоже благословное, иже отцы святыми иногда сположеное, приято же от святыя любезне и держимо, ве́де богоугодно, при персех в преподобней оноя десницы, на нем же к сему по³⁰² смерти своей супруг свят отец свидетелне к согласию богоносных подписаша.

-----------

Продерзанию³⁰³ же дверь таковым на таковая неблагословне издавна отверзеся, яко от еже самых начал по прекращении самодержавцех, иже предипомянутый Борис ║об. превосходныя ради славы си начат с прочим прилежания своего мнящемся ему земностроением его, еже о царствии обновлении пременением, им же начаша изменения чином от первых до в последних тогда в бываемых вещми сицевыми во всех случитися, еже худородныя на благородных возводя он степени кроме меры и времене, тайнословия ради тех ко оному, якоже и преди речеся о сих пространнее. Сими той на ся в сердца величайших о еже на высокая меньших вчинених велеразсужену ║141 и неугасну стрелу гнева к ненависти вонзил, еже и сотворися по днех со стекшимся от него им в прочих купно по временах досадах. По сих такожде он, и паче сего тацы же, яже по нем, и второсначалных первым чины, в них же суть быша они, иже вдановластием по избранию благоволения почтеная, самописщая сущая, не сущими свене мзды сих превращением изменяху туне. В места же тех – на мздах поставляемых вменяху на лета многа, иже по существу не навыкшая, ниже постигшая в чем отнюдь обученех ║об самоискусне известо меры долготою времен изрядных в державах лет в сообращених делных движений, онем же едва токмо вмале, ниже свершене, умети к своего им комуждо имени начертанию по хартиях тростию косно, яко не свою, трясущася, провлачати руку, и ино ничто. На прочая же, иже подобие к того чинове свойства явишася, недовлени никакоже, разве на злотворения точию яве и отай, иже сопротивная добрым, на сия тщаливе удобни, на иже студная ║142 всяко неисчетне деяния быша они зело искусни. Божий и царский купно весь от себе отринуша страх, в бестрашие же самовластне оболкшеся, готово имуще в себе вскоренено от чресл родителных на злое едино хотение умение, во еже господская им вседобротная изнуряти бес поболения, язычески, не зря воспять, своя же несытая влагалища безсрамне, паче рещи бестрашне, всячески наполняти.

Достойне паче прочих рещися сему, о иже зде в нас днесь в таковых деемо: яково что писаньми послушныя ║об. тех уготовает им потребно, или ни, – единаче от них всяко всегда неразсудне, любезно же и непрекословне, яко добра, вся приемлют, не разумеюще к потребам излишних словес и недостаточных. Не точию еже быти в них по случаю самосоставному словес украшению лепотне, иже времяны зовомых, но по образу нрава быша неразумных свиней обычей: егда кормящая и брашна на ядь представляют им добротворна, ли плашайша, не убо сопротив отрекут, еда слано что ║143 или бритко есть, и аще что и смертно растворено же и спокрыто принесут им, они же не ощутят; сице и о предиглаголаных разумей. Пред послушными же они безгласны бывают приятия ради безмерны мзды, несытством утробы обладаемы, связаным сущи устом их; подобне, яко от трапез богатых падающих³⁰⁴ малых крупиц, подручных и тех лишающе, яко вельбуды и комары, малая с великими сами купно обоя пожирающе, не процежая. И не вем, ких ради вин еже к ним послушныя ║об. о таковых обретошася непрекословни! От нихже и ими и вся моим соборне всем людем наведошася зла от изнурения, по прочих неисчетнех напастех, даже и до самых в нуждах смертех скончания, их же по числу бед и прилучшимся ту позаратаем самем не возмощи слышателем и чтущим сия представити словом, иже не самого когождо обглядавшу оку. И да не долго творю слово, но якоже пишет: несть праведно вожду слепу церковная вручати, и монастырь растакателем вверяти, ║144 кормчию же неискусну карабль управляти, – сице губително по всему градостроение о людех невеждам попускати, мшелособирателем и мытоимцем, на сия им токмо едины времяны сими поставльшимся, на добрая же ни, яко «древо зло плод добр не творит», и прочая. Горе же пастве, о ней же пастырю дремлющу, и монастырю, неснабдители истощеваему, и кораблю, ненаучеными окормляему, граду же, мытоимцы злотворне строиму! И первый бысть растакатель стаду, последний же явлься ║об. предатель граду, и уже паственая зверьми пожреся, монастыря же до толика опустеша, яко и основания их развлекоша, карабль низверг погрузися, но не уже и потопися, еже есть церкви Христова, град же самый весь ниизложительми в конец разорися до иже яко не бысть. Сице же, яко преди речеся, на власти и повсюду мнози прочии по прочих и по хужших худейшая преспеваху, на злая день дне друг по друзе злорвением изменяхуся, до иже бы ни едину аще и хужщу во всех оного им не свойствена чина ║145 не непричастну остати³⁰⁵. Таковыми же творимая студодеяния попущаема быша молчанием без возбранена владущих страха или еже от безсилия немощи, за иже еще о сих не у наставшему протекшу лету; непщеваху бо си, яко и времена настоящая воли их служаху, яве, от попущения. К сим же си и господство безглавное со времяны прижиша³⁰⁶, но убо до дне десподска востания, по притчи, егда дому владыко, пришед, восхощет испытне стязатися с рабы о словеси приставления домовна³⁰⁷.║об.

Колеблет же смущеньми самомнимых ум и о пременении в России мест иже степеньми первых престол святительных, еже от нижайших на высочайшая имен возвождением пришествие³⁰⁸. Благочестиваго Феодора, тогожде Бориса правление бысть, якоже митропольски на патриаршески преименовася, архиерейские же на митропольски преложися, епискупски на архиерейскии пременися. О сих святостных си вышениох не смею к прочим гордостным дел Борисовех словесы преложити, да не прогневаю Бога, зане ║146 во дни доброчестиваго царя сия содеяшася. Ныне, не престая, о сем блазнит мя, яко тогожде гордолюбца и при оного державе пестунство действова, понеже устроение се бысть начала гордыни его, и настольнейшим се не неугодно иже сими красящимся. О сем достоит истовым утвердитися и колеблемое мысли уставити, аще таковое от Бога есть и неиспытно к тому пребудет³⁰⁹.║об.

Плачь³¹⁰ из среды сердца глубок и рыдание горко от лица града святаго великаго к могущему спасти мя Богу на иже мучительски мною владущаго, неже благодержавно; именем убо глаголют мя – нова, вещию же древним спребытна: сицев образ имяни моего исперва богоумышлен бысть³¹¹

Тит, древле за превозшедшая жидом грехи Иерусалим разби, – и не чюдо: царь убо сы. Мене же новый подобосенахиримль³¹² ║147 и прочих по них на востоце разорших земный Сион дьявол, неже тех слуга, рачитель злу, всех злых бывших и будущих превозшед злобою, Мартиниянин ересию³¹³, бездушен же, обаче озоба мя всего лукавне, яко вепрь, тайно нощию от луга пришед, и якоже инок дивий, пояде, ныне же и кости ми оглада. Не о Бозе, но льстивне стену прелез, вшед в мя, запаленьми множайшую часть града испепели, – разорити мя тому конечне Бог мой попусти, – солгав убо не человеком, но Богу клятвокрестопреступне, ║об. вся корысти моя обидя и поплени, и в запустение всяко вся моя и обитель моих потреби, и основания их раскопа, злом целя зло, древнею злобою зле по отцы си ревнуя. Владыце моему тако умноженья ради же злоб тех моих тому яже о мне послабившу, омочи убо в мене вселукавый, яко в елей, ногу свою многолетно, некако яко гагрена жир обрет, уты, утолсте и разшире, унае бо сущи неисходно в берлозе, огнем на мя ярости несытне дыша; оставшая ║148 люди моя вся, священныя же, и иноки, и бельца, сребро ненасыщанне погубляя в конец, голени их сокрушая, уже от сухих костей, подобно псу, тех ссет мозги убо; пес, идеже кость суху обрет, гложет ю, – премудр некто таково рече. Тако и се, якоже ад, никогда же не речеся, яко досыти и еже довольно ми есть, но и земля всея своея обременену пазуху всяцех доброт корыстей моих наполни; к сим же и десницу свою и подручных си многою несытне исполни мздою и прочее еще искоренит. И доднесь ║об. всеяделных си зубов мене в конец поядая, брашну моему во устех его сущу по вся дни присно; доселе от главы и до ноги злолютне мя, яко змий, держася, обвив хоботом своим. Но и лаврския вся мнихожителя моя неимущая изыскав всюду обоего полу, мужеска же и женска, иже чюждь во-истинну хлеб ядущих непретерпимому игу с могущими иногда, ныне же со изнурившемися, единако и тех с сими тому же ярму под дань³¹⁴ подложи; яве, недугом сребролюбия ║149 несыства самех нищих убожае явлься по всему, умилене голени тех палицами сребрениц ради без милосердия столцая. Но еще ни сими довляшеся конечно, злобне самому Богу приразився, нищепитателя в мире скитающихся, иже един сух ков и туждь хлеба точию имущих, вся от надра моего изгнаньми осуди и самих тех рубищ грабленьми вне града моего бедне лишив, Бога не убоявся, всех обнажи. Злолютне тмою своего нечестия омрачився, на християны шатаяся, не ведый ║об. окаянный, яко есть тем же и нам заступник Бог, могий и ныне, якоже древле в пустыни, Своя манною препитати люди³¹⁵, ризу же и вся к тех потребе довольне подати.

Кто убо, рцы ми, не посмеется повсюду окрест земля их во странах того безумию? Убогих моих недостатки, еже слезных крупиц собраньми, мняся обогатети, его же вся моих богатств различия безчислие удовлети не возможе! Слезами ли нищих бездонную свою утробу, иже самого ада несытнее, насытити тщася? Оле неисцельному его ║150 погибельному ослеплению, Июдино подражая сребролюбия несытство! Да негли умилосердится Господь, умолен быв о мне ходатайством моея и вседержавныя Заступницы с лики святых! Стужив си людий моих, стонание и воздыхания плачь еда донесет Та³¹⁶ к Сыну си Царица всех ходатайствене и исторгнет мя от поглощения гортани зубов оного аспида³¹⁷ судьбами си, ими же сам Бог мой весть, и измет всяко, яко же во Египте и Израиля вопль Сам услыша и мышцею высокою, яко на крылу орлю взем, ли на ветрех, преславно и безбедно люди Своя ║об. насилия всяко измет фараоня³¹⁸. Конец же злым о мне яже по сих василиска³¹⁹ онаго до днесь не сведом верными, разве глаголаннаго уготование сердца его внят ухо Его, доньдеже Той разорит вся умышления его, яко «помыслиша советы, их же не возмогоша составити»; и инде «Аз, рече, преже Аз»; и по сих: «убию и жити сотворю, поражу и паки исцелю». Аще «не в конец удержит на ны во гневе Своем щедроты Своя», по речению Давыдову: «рех, ныне начах: сии измена десница Вышняго», – и еже бо обеща, силен есть и сотворити, ║151 Той бо и ныне чюдодействуя, и есть с нами Бог, иже древле от работы фараоня всего избавлей Израиля, аще внидет вопль мой в слуха Господня. И о сих до зде. Прочее же начало злобное оного и среду до збывшихся подробну преди слово скажет.

-----------

Сице и Борис, егда в равночестных честен бе и по цари вся добре управляя люди, тогда по всему благ являяся, во ответех убо обреташеся сладок, кроток, тих, податлив же, ║об. и любим бываше всем за обиды и неправды всякия от земля изятельство, яко едину ему такову по цари праведну тогда мняху вси во всецарствии обрестися. Сего, таковаго правосудства ради, и к церковию помазанию³²⁰ вси людие земля о нем усладившеся предкнушася: в получении жь толика преестествена высотою сана и несвойствена ему такова по всему чина, егда паче естества си совершено одеся преславнаго царствия превсесветлаго благолепия порфирою, тогда мирови о мнящихся ими благих солган бысть надеждею, еже о нем ║152 чаянием упования лучшаго к нему купно и душевне верою. По получении же того величеством абия претворся и нестерпим всяко, всем жесток и тяжек обрется; о людех варив благотворениом малем и прельсти державу свою. Много бо и велие, вылгав, приобрет си царствие, но не вечно; абие сугубу же тем и себе язву сотвори, телу бо и души своей; многою бо он в жизни си от всех человек тогда насладися³²¹ честию. В ня же лета и преже царствования ему в правлении его яко та же вся купно собрася честь, тогда с покоем он, яко на Авраамли ║об. лони, во благих почиваше, неже по приятии царствия: в том бо никое благо прибысть ему, разве трепет и боязнь от всех во удех его, безмерия ради со именем сана, еще же к сему неисцелна болезнь и скорбь недуга телесна, и ненависть его, и неверие на люди. Не разсуди бо в себе, получения прежде, на неприкладнаго величества чина своего бестудства дерзнутие, «красяше же и раки праведных» книгочески и фарисейски³²², якоже пишет; мнит же ся, – яко о гордости, понеже явлен о них показася конец. ║153 Яко повелитель слиянию их, сам на ся евангельский глас изнесе; пришедшеи бо в землю нашу язы́цы³²³ она вся разбиша, прочии же и в надробно истниша, многая в сребреницы претворше, прочая же на своих потреб различия: яве, яко не о Бозе, но тщеславне бяху соделана, сего ради и не прията суть Богом, ниже святыми его, и не утвердися дело оно пребытно в век, по главизне апостольстей³²⁴: «когождо бо³²⁵ дело явлено будет, день бо явит, зане огнем открывается; и кого же дело, яко бо есть, огнь искусит, – и его же дело пребудет, его же назда, мзду приимет; а его же ║об. дело згорит³²⁶ – отщетится». И аще се и последняго дня о искушении человеческих деяний речена быша апостолом, но убо и нашествие язык на землю сию от Господа же бысть на ны наведение их, и прежде бо последняго дня оного делу еще зде сотворися раздробление, подобне, якоже и в последний день быти о сих огнем искушению. И аще угодно бы и приятно Богови дело того, – и в век пребытно было бы, и еже что он от гордости здаше, сия Бог разоряя. Душеславен бо всяк ║154 глаголется любяй явления, и яже убо показательне бываемая не к веку будущему плод простирает, но в человеческой похвале разсыпуются. По Писанью, се едино без гордости Богом приемлется, в сокровене кто сострояе благо, что о сем яве и Христос во Евангелиох³²⁷ показа: «да не увесть шуйца, что сотворит десница», – таковым тайнотворениом нас еже в добрых научи.

-----------

С ляховными же наше тогда о мирном постановении³²⁸ не бы в среду сположся еще к совету слово, занеже тем нам ║об. зол паче прочих язык бысть сотворение, но нача бо ся никое согласие к совещанию яти, каков будет о сих сположенью образ, начаток и конец совершен с ними. Аще бо и многолетно множицею ратоваху, наступаху, не престая, землю нашу язы́цы мнози, но никогда толико, якоже днесь, премогоша, ниже таковы отвсюду пакости ей сотворити успеша, якоже ныне³²⁹. Тогда бо они без наших с ними на ны сложенья копия своя они сломиша, сражающеся, и щиты сотроша, сопротивство свое, мнимое одоление ║155 велми осрамиша, егда не бяше в преложении способства изменьших нам к ним споможеньем. Аще не бы ныне изшедшая от нас самоизвольно богоотступницы и благочестию предателя, скорыя християнопревратницы и пребогатае новые отпадницы нашия веры, отторгшаяся самохотне тела церкве Христовы соединений! Своим они со языки смешением вкупнаго на ны с ними свещания ко онех смесному сподобию паки оружия их обновлением своих прилог наостриша и меча она своя обоюдны ║об. остротою соделаша, вся же и наша на ны своим преити о всем возможны устроиша природы изменьшими; одолеваемы³³⁰ сих ради от туждих, по всему победихомся ими. И се убо яве: егда не сопримесишася наша на ны, они едины таковых нам своих побеждений³³¹ содеяти не возмогоша никогда же, аще и многи прежде сих в нас с ними сражения быша.║156

По сем воста от ложа своего скимен лют, враг же обаче, а не человек бывая словеснаго существа, оболкся в плоть антихрист³³²; и яко темен облак возвлекся от несветимыя тмы, нечаянно, внезапу токмо, и наиде на ны, его же страха слухом Борис, прегордый пред малем и царствуяй нами, ужаснувся того стремления, с высоты престола царствия низзвержеся; прикладне, яко комар лва ║157 не дошед порази, якоже пишет. Не той бо, но совесть ему своя сего низложи, ведый вся, яже о себе некогда. И сей бо худороден сы и зело плашайша племене пород ему бе, – Галич³³³ бо град того изблева, – Улияна по всему законопреступнаго³³⁴ исчадие и нечестивое порождение Гришка, порекло Отрепьев³³⁵. Не толико сей на ны, елико оного властолюбца поразити страхом пущен бысть, суду на неправеднаго пришедшу праведну дати: до сего праведней ярости дерзости Борисове стерпети. Преславным именем ║об. во образе царска сына вменився, Дмитрия Ивановича всеа Русии, предипомянутаго великаго победителя во царех всынотворився ему, чюжа ему бывша по всему, разве рабства число в прочих срабных ему песочнаго умножения бе он. Яко же море не познавает в пределех своих малех держащихся в нем животных до единого, сице сего царюющему не бе знан ни род сего, ниже имя его, – он же дерзну сицевому усынотворитися, якоже к Богу приближением приразився! Богу свое терпение и попущение показующу³³⁶, ║158 привлечеся от Севера³³⁷ в самую матере градовом град Москву в совокуплении многих сил безбожныя Литвы с приразившимися к нему и меньшими³³⁸ всеми вои росийска господства благородными началы воем бранных сил³³⁹, иже росийску жребию сущим, скифетродержателем тогда Борисом в защищение против оного на краях всего севера поставльшимся. Приложшеся убо им от десна на шуе клятва крестопреступне ко лжеименного воли: овы убо того лукавое льщение ║об. познавше, овы же и ино мневше – по правде некако возсияти ему от изо оземства царю, идеже бе оземствован сущий царевичь Димитрий Ивановичь Борисом, прельстившеся много и козньствы его. Еще ему вне сущу предел руския земля, самохотне повинушася вси, идолу сущу, яко царю, поклонишася: страх смерти чаяния по вострии меча его одоле. К сим же всем купно и Борисово тожде насилное во льсти кроволюбное царство стужи, не от ига еже бы им даней подложения, но неповинных ║159 мнозех пролития кровей, оболгания мневшеся при оном отдохнутием поне мал получити покой. Но надежею вместо уповаемых вси солгани быша; горее нечестивых, иже православными прежде не именовавшихся никогда же, конечное зло хотящеся от него на вся нанести и паче всякого зла злейши: по смерти его от тайных его уведено бысть, яко Христову веру, православием вечно цветущую, в конец хотя окаянный от памяти испроврещи зломыслием врага, аще не бы Господь ║об. прекратил дни жизни его.

По начинанию бо и конец его, понеже таков бе напрасен и нагл, вкупе же и дерз, яко Июда, иже на Тайней вечери дерзну³⁴⁰. Тако сей предприятием убо своим злым, преже бе прияти ему царство, во мнишеское облещися дерзну, и не довляшеся сим преокаянный, но и еще к сему преложи, яко во огнь вскочити не устыдеся, еже и священнодьяконство ему на ся у великаго³⁴¹, противнаго умыслом, изолгати, ведый в себе, яко от предложения своего ║160 хотя священство и мнишество отвержением си обезчестити, по мале богопустну времени о сем приспевшу, еже и бысть. Вкупе обоего чина самоизволне совлечеся, священства, глаголю, и мнишества, с сими же убо и обещания святого крещения отвержеся преокаянный, достоверными, паче же от дел его познано бысть. Весь сатана и антихрист во плоти явлься, себе самого бесом жертву принес! Еще же ему и в латынех, – яве, яко Богом изгнан от наследия верных, – тамо к сквернобрачия совокуплению за дщерь ║об. у некоего инославна духоборныя ереси³⁴² призятьствовася обещанием, у могущаго всю злобу умышления его исполнити, ельма достигнет своего упования совершеное желание некасаемым коснутися, еже получения царьствия приятия, еже и бысть. Обличати хотящих овы яве, овы отай убиваше, иных же во оземство зачатая, прочих тех, яже онем на такавая дерзати, устрашая; многи бо име у себе ласкатели, угожающая други, и другим дщанно ретящихся.║161

Оста же по смерти Бориса царя супруга его³⁴³, яко горлица вдовствующи, две си точию отрасли имущи: сына убо, дара Божия имянуема³⁴⁴, могуща державе скифетраправления, и произбранну уже на царство крестоклятвено же, и люди вся отча державы вверившу си утвержене к служению, едино тогда точию недостаему, еже не помазану сущу, – на мало сему отложену бывшу ради супротивия ратных к бранем строений; дщерь же³⁴⁵ деву имущи чертожницу, совершене уже приспевши к браку, ║об. странна имянем по толку, ей же и обручник волею отчею приведен бысть отвне земля, сын некоего краля³⁴⁶, любезне ему, – еще живу сущу отцу ея, – браку же не збывшуся, Богу несоблаговолившу плотских совету. По малу же предвари приближением ко граду предипомянутый нововосхититель царствия. Матерь же ону, уже безмужну и сих обоих прежде рождьшую, с сыном ея одолетель прежде своего входа во град, от ближник своих преде себе послав, в дому перваго достояния и безсловесне некако и нуждно обоих ║162 убиством осуди, увы, загнетением смерти преда. Мню, сего отрока телом чиста представша Христови, яко родительных грех непричастну. Твердозаклепанную же юницу, по еже во град своем входе, умилене нужею от царска чертога извед раболепно, свене всяко чина царска, в некоем угождаемаго ему и приближна нововельможи дому без тоя воля, яко несозрела класа, пожат, – во мнишеская облек. И чюдо, аще не бе ото отступника той тайноругательно что³⁴⁷!

Юже прежде в твердынях высоты ║об. царствия, при рожших ю храмине сущей, едва солнце³⁴⁸ скважнею виде ю когда, яко «слава тщери царевы внутрь», по Писанию, – тогда же сию не брегому и мельчайшии чади многи обгляда око. И оттуда на лета к болшему безчестию продолжися живот ея даже и до четвертаго по отцы царюющаго, часте в державах пременяющихся; и от места на место и от лавры в лавру она превождение подъя. И до толика безславия жизнь ея протяжеся, яко и до еже, – егда всему царску ║163 граду объяту от противных и во облежании бывшу, в нем той с прочими затворене, – всякого безчестия скудость и нужду претерпети, даже и до сего, яко и иноплеменных язык, самых врагов отца ея, ту уничижене руки осязаша. Прочее же помолчю: елико в царствиях превзятыя высоты достиже, множае в нижайщих бесчестия всякаго! Яве, яко за грехи родивших ю и сродных всех едина та за всех всяко безчестие подъя. И да никто же иже от зде глагол сопротивно некое ║об. тоя чистоте вознепщует, еже бы по изволению ея. Не буди то, – разве насилия многа от попущения, предисогрешшим ея родителем, той и неповинне сущи. Не знааше бо, ниже сведуще преже, что есть плоти грех, в преимущих бо, неже в плежущих, от еже родися и воздоися и воспитася, идеже всяко ни слово гнило не происходит никогда же, разве вся изрядная и честнейшая в делех и словесех преиметельства. Откуду же и мощи сопротивному той навыкнути не токмо же, но и тоя служительницам сущим в чинох ║164 и до последних навыкшим лучшему, неже дщери царя ? Се вси сведят. Юже вечно сподоби, Господи, сих бесчестием будущую честь купити, им же образом вечный живот купуют праведнии! И паки прежереченных имемся.

Подобна же себе богоотступный и фатриарха^349,350 несвящена, Игната имянем, изообрет, на преосвященем велицем престоле сего постави вместо сущаго; патриарха Иова, православнаго и в Росии перваго, измен, оземством во град некий осуди³⁵¹. Вскоре обещанная оного сквернителя сквернавица³⁵² и за грехи ║об. наша обладателя пославшимся по ню в царский град приводится некоим от синклит стаинником его Власовым Офонасом³⁵³, всяко человекоугодне ему от сердца и душа послужившу чести ради гнилыя. Богопротивно, обаче всеукрашене бо та в царских лепотах, яко царица, колеснично фараоницки³⁵⁴ с отцем си в царский град приведеся, огнеподобно же ереси яростию, не яко царица, но человекообразная аспида, на християнство грядущи, дыша, подобне, якоже иже о женах во Откровении Богослова³⁵⁵ лежит: едина ║165 едину, нечестива благочестиву хотя потопити изо уст водою. Но убо ехидна сия аще и не водою, яко же та, но Росия вся, мир наш кровию от нея потоплен бысть, кто не весть? Приведый же сию тайноглагольник его Афонас от пославшаго его сан некий паче достояния своего и имени сугубыя чести преложение не в лепоту прият: всех сокровищных царских доброт властохранителя надо всеми того постави, вся царская ему вручи хранилища; ему же, зряще нецыи же и то, – еще и предходатая его ║об. сотвори себе напоследок, иже втораго чина болярска ступающа с прочими пред лицом лжецаря, – преизящества достойнии тайно враждебне взавидеша чрезмерие того, присно убо дающемся.

Повнегда же нечестивней оного супрузе царскаго града дощедши, вскоре скверносверстник тоя презлый, православных собор призвав, льстивне прельщает их, извет творя яко праваго совета, соопрошается неправе с ними своея подруги о крещении: аще достоит ей, рече, второе креститися? Вменяет ║166 ей преокаянный латынское богопротивное крещение во истинное святое християнское купелное порождение изветом сим: что ей, глаголя, второе креститися? яве есть, яко не хотя ко истинному просвещению тоя привести. Та же соборным же правилом, взысканий ради о сих, на среду священносудящих, и лжецаря пред лице все в храмины крова его совнесшимся, и овы убо ото отец немноги же по истине не просвещене во церковь совнити ей с ним не соблаговолиша; прочии же страстне человекоугодия слабостию за славу ║об. мирскую подавишася, на обою ногу болением храмлюще, прельстишася купно же не пастырски, но наемнически, и ужаснушася, воли его быти повинувшеся попустиша. Зряще³⁵⁶ то, и первии умолкоша, яко словеса беззаконник премогоша, и вси даша ему плещи; несвященный его фатриарх егов весь готов бысть, яко и прочим о нем соблазнившимся. Видя же сей волкохищный³⁵⁷ обще всех бегство и разума нестоятелное, – даша ему свою волю улучити, на царствие наступление, тако и в церковь ему внития с прочими ║167 нечестивыми не возбранят, еже и бысть, – приемлет сложение помысла своего исполнити вскоре, не токмо бо человеческий срам презре, но и Божия страха преокаянный не ужасеся, ниже во уме того приемляше, мняше Бога яко не суща: «рече бо безумен в сердцы своем: несть Бога». Яко в просту храмину вседержавныя нашия общехристиянския Надежи и Заступницы всемирныя пес со всесквернавою сукою и латын и еретик со множествы вскочи и на версе царска престола дерзостно председ! Видимо весь храм ║об. наполнися тогда еретик, яко волков, невидимо же мрачен облак тмы исполнися бесов, радующемся, объемлющим их, Божия благодати, мню, отступльши, яко да исполнится реченное: «узрите мерзость запустения, стоящу на месте святе»; чтый да разумеет. И ничим же тогда мнее самого антихриста его зрящим, недостойна на престоле суща, неже царя! Дню же праздника бывшу великаго архиерея во святых, иже Мирликийских Николы честных мощей принесения³⁵⁸, егда же та скверна дерзости законопреступления, – и не празнованого его! ║168 Паче Иродова³⁵⁹ празника сотворяшеся сугубо тогда беззакония, осквернив святая богоборне, еретическими наступив ногами, царьствопомазание и женитву, невидимо мажущим и венчающим его к своей воле бесом, благодати не сущи. О, долготерпения твоего, Владыко! Како не разверзе земля уст своих, якоже о Дафане и Авироне древле³⁶⁰? где тогда уступило Твое многотерпеливое, кое водворение безгневия Его безчислие, Его же Тя вся тварь бывшая Тобою вместити не может? ║об. Вправду предел и место Себе Сам еси, по богословцех, Пресвятый Господи! Ве́де, яко долготерпение Твое усмотри дати ему всю злобу хотения его исполнити, яко да тем он лютейшу себе муку устроит.

Он же, растлитый, несвершеный урок жития своего и прекрашеный грехолюбно поживе, всеблудно же, и беззаконно по всему, и рабско, и скотолепно всяко; яко веж бе, тако бе, во плоти бо, яко в гробищи, пребывая, питаяся отнюдь, иже вправду прежде царствующих его ни стени жительства царствия их ║169 показавшу. Свое существо делы си обнажи сточными советники себе во нравех; и младоумными делы, неже леты, нецыи обновляюще о нем любовременною славою в преизлишных богатствах и в чрезъестественых чинов свою многолетную старость в скаредах всяцех и в мусикейских гласех. С присными си, причастными всех дел его, поживе мертвою жизнию, по богатаго притчи, на всяк день веселяшеся красно, непщуя живот си продолжитися. Царски чины ради студных дел недостойный недостойным недостойне ║об. раздая чрез естество и возраст, паче отечества же и благих вин послужения, срамных же вельма; подобие, егда по случаю некако пес восхитит негде не по естеству, но снедь царску, бежит в место тайно тоя снести; прочии же пси, таковое узревше восхищеное, у единого отъемлют и наслажаются вси купно чрезъестественаго, несвойственого, пожирают же растерзательно и небрежно, обаче и растрашают много, прерывающе: у другаго ов отъем, ов много и ин же мало, яко ве́дяще бяше не свое всем; бывает бо им за се, им же от прочих в тех обиденым, ║170 изгрызатися. Сицев разум и о глаголемых такоже, по премудром³⁶¹: «якоже многоценныя усерязи у свиний в ноздрех», тако в недостойнех чины; яков дающий, тацы же и приемлющии: ни даяй весть, что дает, ни приемляй знаем, и аще бы виновное ве́дели обои, не бы несвойственое усвояли. И Борис сего в сих немнозем отличен бе; но паки о первем скончаем слово. Сокровичная же хранилища прежде всех бывших царских доброт, даже и до златиц и сребрениц самех, увы, вся истощи без чина и разсмотрения ║об. не в лепоту разсточительне, яко скудель мня все, неже сребро, и дражайшая раздаяя: яве бе, о них же не трудися; их же многих тем не возможно числом объяти, – мню, яко и песочное множество сих мере превзыти. И богопротивных землю вкуполатынную Литву сими обогати, мал сих останок в тайнохранилницах оставль, и сему точию смерти его удержавшу.

Но убо Царствуяй всеми не попусти ему благочестивых престола лето цело оскверневати, величество Божия ярости и прежде вечнаго суда ║171 множества нечестия ему не стерпе; аще и отшед тогда в царьская, всяко гнева не убежа от неумытнаго суда Христова, внезапно вмале сотрен бысть с возлюбльщимися с ним, не со всеми же. Богодвижно народу всему, яко огнь возгореся во Иякове³⁶², и бури зело сильне нань подвигшися, взятся от жизни нежизненый живот его и «память его с шумом погибе», по реченному, и со иже с ним. И чюдо! Богу крепце ниже произносно совет во мнозех еже поучение о смерти его удержавшу, не возможе той ║об. преокаянный мыслимоя о себе в согласующих³⁶³ уведети; и аще бы поне мало некоего о сем часть не утаилася слова, велие бы было повреждение делу и сотворилася вспона; но Божию совету человек возбранити не может, никто бо может умудрити, егда реченное хощет исполнитися. От него и от любитель его таковый совет сокровен бысть, ему же и хранители его ратоборцы, учиненыя им, близ ложница его поставльшияся в блежчащихся бранных оружиях, живот ║172 его облюдовати, еже помощи ему, християном не сооделеша; и мнози от них оружия своя праздна при ногах православных повергоша, Божия гнева пролитие нань уразумеша. Над сими же в царский наш град и совшедшая с ним рать и на превысокий престол посадившая его богоборная Литва купно погибоша, в них же множество избранных благородных бе; яко олово в воде зелне посреде царствия вси погрязоша, и не избысть от них ни един; яко же древле о фараоне бысть, сице и в нас днесь тожде Бог ║об. чюдодействова. Таков убо бывает конец востающих неправедно на православных землю, яко же пророк рече: «помыслиша советы, их же не возмогоша составити», и прочее. Сице и днесь тайноумышления некая на ны языческая, егда Сведый время восхощет не укоснит раздрати совет их: может бо, аще утолит на ны ярость гнева Своего. Таже прежереченная накончаем.

Мы же тогда тем злочестивым мня свою погибель отмстити, но Богу за грехи наша гнева Своего лютейша сих на ны сохраньшу, прегрешное ║173 наше очищая, увы, множайши тем земли рустей вред сотворихом: всю землю их сами на ся сим восколебахом³⁶⁴. И по мал час тогда онех падением порадавахомся, много же оттуду и доныне неутешно плачем: яростный огнь возжгохом даже и до сего сих подвигохом³⁶⁵, еже по мале пришедшим убо в силах тяжцех им и предняя наша грады стершим и дошедшим самыя матере градовом, вся тоя входы же и исходы, облежением обседше, затвориша и на много оставиша, никому же сопротив могущи стремление их ║об. возбранити, и жилища си близ забрал града на лета утвердиша. Самого же царя, иже внове пред малем самохотно восхищением наскочивше безстудне от болярска чина на царство, – мню, яве, яко без Божия Промысла, его же и конец небесный суд всем дел его показа, безчестно бо и малолетно пребысть, – сего, яко в худе клетце, со всеми вои его неисходна во граде затвориша, князя Василия Шуйского³⁶⁶. Всеа же Росия грады и веси по нем, яко зверие растекошася, не точию пусты под мечь подложиша, но в различья смертей до основания ║174 низложив, всеродно испровергоша; купно рещи, не бе места, идеже правоверных кровми горы и холми не полияшася, и удолия, и дебри вся наполнишася, и водам естество, ими очервив, згустися, и зверя селныя и парящая плотми верных удовлишася, и множество им преизбысть; оставльшая же вся со землею смесившеся истлеша даже до общаго всех воскресения. Но и еще мечь гнева всего доныне³⁶⁷ на места прескача, останцы земныя, идеже бе что, изыскуя, поядает ║об. не престая. Со злочестивыми вкупно сложившимся, верных часть всем зло сим быша злосоветник с наскочившим без смотрения разбойнически на царство, якоже преди слово скажет³⁶⁸. «Поставиша си князя, Мене не вопросиша, – рече Бог – согрешил еси, умолкни».║175

-----------

Взыщем в себе и подщимся усердно вси от всех изложити³⁶⁹ первее, от ких разлияся грех земля наша, не безсловеснаго ли ради молчания, ея же славе пред преславнии мнози враждебне взавидеша, яве, кипящи в нас многими времяны всяко благ; согрешиша бо от главы и до ноги, от величайших и до малых, сиречь, от святитель и царя, инок же и святых. И аще и восхощет кто злобная оноя вся по ряду, и си яже возмогоша непреложное Божия совета на ню разжещи, – но не доволен ║об. явися, к сим кое коего зазления Судиину ярость гнева распалити предварив. От некаего греха злолютнаго, якоже змия многоглавна, пущаго всех злоб наполнити место, ли от всех купно зол, в место сошедшихся, все наше разлияние бысть; и аще и начнет кто сих имяны числити и прочитати, и в прочее, силою изнемог, повержет писательную трость, множества зол всех по ряду не исчет. Обыкоша себе подобныя многи по себе раждати; велико бе сии, но токмо нуждных вмале зде помяну, ║176 иже ми на память в наставшем взыдоша.

Крестопреступления беспоученную дерзость в клятвах первее предреку, о ней же глаголет пророк: «велия огнена серпа казнь», сказа, предзря, «наклепася³⁷⁰ во лжу»; таже богомерскую и преокоянную гордость безумную, юже древле Богом возненавиденную, иже рожденно³⁷¹ ту, низпад, свержен денница быв; по сих истоваго суровства отложением уклонение и в того место лицемерна введение и сего кривость премногую, срастворену мздою; еще же любовнаго ║об. обще между себя соуза лишение; к сим же винопития безмернаго с чревобесием, от них же раждаемо блуда невоздержание тлетворное и сих жало – содомское гнусодейство³⁷², его же срам есть глаголати и писати и слышати; обаче же злопомнение ко искреним. К прочим же приложу сребролюбие несытне, и лихв ненаполняемыя прибытки, и мзды незатворяемыя влагалища, числа не имущия, и братоненавидение самолюбное, и чюжаго имения восхищением любление, и ризное чрез меру ни в лепоту красование, и вседомовных ║177 вещей разньствия паче потреб множества, по премудроедином словеси, яко всякая гордость умножается преизообилных вещей, яко купно всех к сим притяжение дщанно бе, еже средних к первых безмерно же желание, последних же к средним рачение несытно, и прочая вся, – чтый, да разумеет. И конечно еще оста нестерпимо зло, иже к ближняго лицы в досадах кождого самохотное укорение, еже матерню имени мотыльна со усты языка сквернословное изношение; не укореному бо сим досаждаху, ║об. но рождьшую скверняху своими нечистоты. Зла земля не терпящи стонет о сем; заступающая о нас в бедах крепкая Помощница, бедне гневаяся, негодует и отвращает лице Свое: егда что в молитвах воззовем, неуслышани и пусти Тоя отходим, от таковых бо двери милости Своея затворяет, ниже ходатайствует о сих к Рождьшемуся от Нея; сицеву тяжесть сий грех имать. И аще иже не вси, ниже равне с начальницы истоначальнии сия вся страсти содеяша, но суд по различию ║178 приимут от сих, овыя попослушныя не наказующе, овы же началных учениом не внемлюще, яко бо случающим о добрых мздовоздаяния не обещевающе, о сопротивных же муками не претяще. Но всех зловерных язык исполнихом дел их меру и вящше; единем точию лучши сих явихомся, еже ко иконам покланяемую в себе имяхом почесть и еже не соизволяем с ними преданыя нам посты разорити, но не у и мы сия вси совершене, яко же подобаше.

Вся, мню, быша предиреченныя ║об. страсти в нас от безстрашия Божия, чювствия не приемши грехом своим ради окаменения сердечнаго и суда нечаяние мое; сего ради на нас, познавших волю Его и не творяющих ю, прежде всех язык Божий изыде ответ во гневе, и к себе наказаньми нас, яко кормилом, обращая от заблужения пути Его. Но что, аще не быхом Борису первее умолчали благородныя по царех сущия столпи великия, ими же земля наша вся утвержашеся, всяко сия погубляти и вся вмале по ряду различне ему ║179 превозможными образы обладати, но яко же Евреи фараону в Египте попустиша убивати младенца и при Христе таковыя же в Вифлиоме Ироду, – то не бы предиреченный на фторое дерзнул убийство, еже новомученика святого царевича Димитрия, и вящшую часть всего царствия, во время то запалительми пожещи: елма вси пожжении забудут в своих им плачех оного ради смерти востати нань, – тако мняшеся он. Елма и Ирод во Иерусалиме некогда вся владущая земли погуби³⁷³, своея ему смерти ║об. сих не радоватися сотвори, сице и той, сего ревнуя злу, такожде. И аще оному оно не попустихом бы предиреченных, не бы вооружился третие, иже прекратити от жизни живот самого незлобиваго царя Феодора, и аще се устремление его нами возбранилося бы, не бы безбоязнено и кроме страха желание свое простер и безсрамно приступил к царству. И о древних о младенцах дерзость сего безстудству не сравнаема бе, ниже оного к тем; онех бо незлобных смерть по сих к смотрению ║180 величия Божиих дел убийцам попущаема бысть, ныне же о нами глаголемых не к чюдесем таковым; она бо вся уже совершишася, зде же к смотрительну суду обоих, дерзающаго и попускающих ему. От сего яве ныне едва познаваемся, но не вси, яко сего ради, ве́де, от Бога днешними язвами наказуемся, по премудрому словеси: «прещение, рече, сокрушает сердце мудраго, безумен же и биен, не чюет ран»; сице о нашем нечювствии разумети нам самем лепо есть.

И аще не бы исперва ║об. нашим молчанием предипомянутому на сия послаблялося, не убо таковый искоренил от земля благородныя вся и благословныя без остатка семяна малыя с великими, даже от главы до ноги, то не бы скимен злый иже священно- и мнихоругатель Гришка Розстрига по оном, зря нашея слабости страшивство всех, на самый Богом помазаных верх безстудне, такожде яко той первее, наскочил, ниже бы тацем смельством кто прежде сего предсел. Первый бо восхищения его указанием ║181 второму учитель бысть, и вторый третьему, и вси, яже по сих безъименнии скоти неже цари; каяждо бо злоба мати есть второй, указание бо второму первый о благих и злых. И аще не бы Рострига насквернил святая, то не бы первых дерзость прочии ощутиша и мнози безсловесне, иже скотом подобнии, подражателе на се быша; и аще не бы предипомянути вси царския степени недостойне з безстудством наступати дерзали, и ниже прочим на се путь показали бы, то не бы по градом и местах господьская имяна навежды многия на ся такожде налагати ║об. смели, и яко вместо чисты и зрелы пшеницы посреде земля сеа хотяху ненасеянное терние возрастати, они и празным сим и хульным угобзением дщахуся богословная семяна подавити. И аще не быша сии, то не бы приражалися к сим сослужебныя им стаинники и от нарочитых, скверных ради прибытков, вкупе с ними землю опустевати и саны различныя от них получати временно.

И аще не бы се, то не тако бы страннии купно вси срадовались в себе нашея земля раздвоения злоденьствию; и аще не бы се, то не быхом ║182 прежде сих призвали Еллины, иже своя наветныя древния враги злобы, руския земля от тацех же³⁷⁴ противных обраняти, от якоже и они. Кто бо таков безумен, якоже мы? От века несть слышано, – волком волков ото овец отгоняти; тацем же сущем им естеством, ве́де, яко не овца щадяще в землю нашу нас обраняти от прочих, но яко да сами более сих насытятся овец, еже и бысть. И аще не бы се, то не бы враждебнии земля сеа наступили, яко и прежде при самодержавных вправду; и аще ║об. не бы се, то не у бы земля вся росийска инославными в конец пленением потреблена; и аще не бы се, не убо бы преже сих вкупослатынныя Литва главу и серце всего царствия, град Москву, яко гнездо орле, рукама, пришед, объемше и долгим обстоянием умучиша. И аще не бы се, не быша они злодейнии, вся клятвою обольстивше, внутрь превеликаго вселилися града того и пообладаша нами на время много, доньдеже по сих останки малыми людий, от своих нам стран собранными, их же всюду прежде волки распудиша, ║183 сих Бог преславно послежде, яко кропива, воедино собрав, охрабрив и на оны воздвиг³⁷⁵, иже гнездящихся змиев отвнутрь града сими ужасив и исползати без вести сотвори; тогда свобожший град наследоваша и достойне, аще и празден, прияша.

И аще не первая быша вся, не у бы еще отценачалник³⁷⁶ всех во изгнаниих нужно почил, его же естество не стерпе величества бед, его же не возбранях оставших бе храбрость, о нем же уяснением малем словес вдале выше в первых речеся, ему же ║об. похвала не от человек, но от Бога. И аще не оно бы, то не бы все царствие запалителя повеленьми огнь полизал бы; и аще не бы се, самодержавных сокровичная хранилища обременены, иже от родов в роды наполняема, царских не быша доброт купно всех истощени и в насилующих землю превезени; и аще не бы се, то и не и еще бы искали от стран помощи о смирении. И аще они днесь и мирницы³⁷⁷ о нас являются людем, радуют же ся, ве́де, с насильными купно о погибели нашей; смиряют же враждующих не туне ║184 с нами, но мзду си хотяху не малу от нас за се прияти. С пленшими нашу землю сии суть всяко равни, ничем же меньши во злобах онех: яко же они разорением, тако сии мирницы за мир мздоприятием, – единаче бо сию кождо их на части развлекоша. Но то дивно о туждих, яко и вкуповерныя нам, мира же ненавидящая, срадуются купно с сим злом нашим и от согласия мира сих отвлачаху, ради кипящаго в них днешняго доброденствия скорошествие, увершеся, яко ║об. вборзе житию своему от блага на зло пременения чающе, мнящеися им расколом мира лстящую их жизнь си продолжити. На предиреченное же возвратим речь³⁷⁸.

Не мирствовати бо глаголемии миротворцы со враждующими нас они дозде приидоша, но прикровением мира тайно о нас советовати на зло, мира извет, яко дым на воздух расходящеся, словеса своя о нас во страны пущаху; но не сице си истина, мы бо надеждею о них солгани быхом. О них же чающе мы некую в налагаемых тяготах ║185 получити отраду и от нечаяния возникше, едва разсмотрив о сих, возбнухом позде, некогда сих лесть от дел их познахом. Больше зло сих сюде пришествием от насилующих нам сотворяшеся, яко до сих не бысть прежде. И церковныя бо трубы, от них же происхождаху святозвучныя гласы, созывающая на пение православных народы и возвещающая во церквах глаголы Божия людем, яко со оного полу Иердана³⁷⁹, глаголемаго реки Волхова, от святилищ всех по ряду со устроенных им мест та низсвесиша вся к тому, ║об. якоже безгласны трубы, отнюдь не дающи глас. Не сущим им зде, пред малем же и стенобитныя хитрости меднослиянная телеса, неодержимыя тяготы, с прочими тех приличествы, предипомянутыя вдале первее, си обоя орудия церковныя со градовными во свою их отслатися ими землю. Увы! плачь! Овых водоносил подъяша тягость, овы же возилы зимы путем гладости, никому же бранящу о сем им. Оставшую же во мне чадь, подъяремныя люди вся, нестерпимым утягчением в конец погрузиша ║186 игом, до сего тем нанесоша зло, яко паличием голени сих сокрушиша. Равно же с сими и священнопастыря честныя, чредоначальники мнихом великих лавр, иже по архиереи первыя, сребрениц ради безчестне ударением болезнене пребиша, неже сих послушных, не могущем яко на долзе и к обычней воздвигнутися им молитве; их же слыша беду, инех же зря, самый пречестный верх отчею о чадех разгарашеся болезнию, снедашася нестерпимо, во очию своя чада присно зряше, тако от волков и псов немилостивне ║об. биением влачимы. Мнози же в сих муках и живота гонзнуша иноки и бельца, злых не претерпеша мук. Ими же поядающии кормяхуся, сих и пожираху, яко ото овец кротких млеко ссавше, волною же согревающемся, но ни сего ради тех щадяху. На се самозваным новобогоотступником неким от правоверия, – звание си и нрав естества брехающих и угрызающих человеки стяжа, имянование от дел в лепоту приим, не разликуя от проимяния делы, – вкупе он словесныя пожирающим моя овца яростне нападая ║187 согласием, злоревнителя злу паче инех других себе единого такова показуя всем; но они убо угрызают тайно, сей же яве и безумне, – малым нечим им обоим во злых недостаточествовати самех злобою бесов³⁸⁰.

Мнози же и се глаголют в нас, якоже слышится днесь о бывших уже и бывающих нами гресех, яко Божий суд о всем повинен творят, а не свою смотря от гресех слабость, глаголюще, яко аще не Божие повеление о всех нам приключшихся было бы, то како возмощи бы нам сотворити се или оно, забывше реченное ║об они, яко Бог убо может вся, хощет же нами деятися доброму и благому, и «несть Он искуситель злым, не искушает бо Той никого же». Аще бы всяко законопреступление, по них, Божиим хотением, то не бы Бог закон полагал о добрых и предел о злых, не бы о Иваннове убийстве Ирод осужен, но и о еже не добре клятся обличен бысть; Самого Положителя закону разорителя сему наричют Тогожде безумне. И аще о сих мы сами себе сотворихом неповинни, то почто лет толико до днесь мечь ярости Господня ║188 снедает ны, не почивая? Лучши есть престати от таковых на Бога хулных глагол забывшем себе, кто и каковы есмы повинни пред Богом, но многими слезами просити прощения, да не ради нашего нечювствия о гресех одождил еще к сим камения и на ны, якоже на Содома с прочими о нем грады.

В Римстем граде бяше у царя сын и в болезнь впад, абие же, болезни того на много время продолжившися, и все тело его отерпе, ║об. токмо язык покаяния ради оставлен бысть ему; и прииде ему желание же облещися во иноческий образ, еже и бысть. И потом паки первую крепость тела³⁸³ своего приемлет, бысть здрав, якоже бе и первее, и хотя сожительствовати в некотором от монастырей в том же Римстем граде близ отца своего. Сему же не терпяще скорбных еже со иноки пребывания, но памятствуя и желая первыя своея славы доброты, еже в царьских домех всегдашнее пребывание и веселие и вся ║189 по ряду, еже царскому величеству достойная. О иноческих же небрег, но приходя часто к цареви, отцу своему, невозбранно ради сродственнаго соуза зрети красоты привременныя славы; мнози же от ближних царевых зазираху ему, яко не достойно таковая творящу во мнишестве сущу тому вмениша. Он же прельстися, не терпя обличения, но мнишеская одеяния с себе вся сверже, паки в мирская облечеся, в первое достоинство остряся и паки приходя ко отцу ║об. своему царю насыщатися благих; синклит же и вся люди наипаче³⁸⁴ поношаста ему, еже не сохранившу обещания, яко преступнику вере и ругателю ангельскаго образа. Он же, срама исполнен быв, не возможе на долзе времяни обличаем под смехом быти, ото отечества си отбегает, и пребеже во ину страну к некоему велможи, и благородие свое и обещание, еже во ангелском образе пребывание, сокрывает, в рабий бо образ преложся, яко един от сирот, в работу предается. Предиреченный же ║190 вельможа, зря его в доброте суща, за красоту лица и ради величества тела вся ему дома своего вручает, яко верну хранителю, и надо всем имением своим, над рабы поставляет его строительствовати. Не по мнозе же времени господину его умершу, жена господина того за сего отрока браком сочетавается, еже и бысть. Но обычай бяше новобрачным ради измовения тела в баня входити, и по совокуплении того с своею купно з госпожею и женою вниде той предиреченный отрок в теплицу. Но зде страх, зде трепет! Дивно чюдо содеяся тогда, внегда отрок вниде в баню: ║об. напрасно возопи нелепым гласом, силе Божии язык его движущу, сам неволею своя содеяная, род и отечество поведает, и обещания своего несохранение³⁸⁵ и преступление заповеди, и попрание святаго ангельского образа, и отвержение иночества – все подробну обличает, аще Благоутробный в покаяние вменит ему се. И многу народу на чюдо то стекшимся, яко видетися всем и страхом объятым быти; место же то народу неприступно бяше, но возбраняемо некоею силою. По мале же отрок, от безчиннаго ║191 вопля пременися, нача гласом крепости своея исходить; людем же отверстыма очима издалеча зрящим, видяху того отрока без главы седяща, токмо труп един бездушен зряху, и не по мнозе все тело его предо всех очима невидимо, яко от огня воск, без вести бысть, прообразуя онамо безконечную муку. И глас всем слышеся: сей мирское имя покры чернечеством, а чернечество женитьбою.

Се бо нам всем образ бысть: воспрянем убо мы, иже в нечаянии лежащии, не сохраньшии своего обещания, да не когда³⁸⁶ постигнет и нас прежде будущаго ║об. суда зде смерть люта и лютый ответ, неже тамо. Но, о Владыко всяческих, и долготерпя, не пролей на нас, согрешших Ти, праведнаго Своего прещения вскоре, но, презря наша вся согрешения, дай время исправлению ими же Сам веси Своими судьбами! Ве́мы бо, во-истинну ве́мы, яко можеши вся спасти, аще хощеши, ибо согрешихом, но от Тебе не отступихом, тварь бо есмя, и веруем в Тя, могущаго ны спасти. Аминь.║192

Во время же последнее днешних времен Шуйского, порекла Василия, самоизбранна глаголема всеа Русии царя, на первых предержавных и преобладательнейших престолех без Божия, мню, Его избрания же и благоволения седша, ниже по общаго всеа Русии градов людцкаго совета себе составльша, но самоизволне и единем некоим присоединившимся ему сложением в мысль, напраснем в делех и словесех волкохищнем лжесиленьтияром, ║об. иже от перваго рабоименнаго в Росии царя Бориса, богопротивное ему некае тайнослужения угождение, не свойственне, ниже достойне, в синглитства чин нововводнаго, худородна же по всему Михалка Татищева³⁸⁸, – прежде бо некогда оному первоглаголанному Василию, о нем же зде слово, даже и до рукобиения всеродно той досаждая, миролюбообладателю первоцарю своему Борису чести ради сана получения си тому угождая, оного же Василья всеродна бесчестя: сея он предваршия ради своея вины ему лстивне ║193 гонзнути хотя и обаче не получи. Оному препомянутому Василию на великую Росию всю без воля всеа земля люди по случаю некоему, спешне, елико возможе того скорость, от ту сущих токмо, иже в царствии³⁸⁹ и граде людий без прекословия всякого от него нарещися первее во своем ему дворе, потом же и поставитися царю; ниже первопрестольнейшему³⁹⁰ наречений его возвести, да не противословие кое в людех будет, но яко просталюдина тогда святителя вмени: токмо последи ему о нем изъви. Колико можаше той безстудством ║об. сия тому сотворити, никому же ему смеющу возбранити, ли прекословити в такове превелии делеси! Спешнейши же и бесчестнейши и сугубее того от высоты престола ниизвержения сего самовенечника бысть, – послежде о нем же паки с прочими пространнее инде слово скажет, – иже ум имущим рыдание о сем, неже смех, от безумных же и от врагов несмиряемых земли рустей бысть насмеяние велико.

Прочее не глаголю, яко беззаконно, но яко нечестив всяко и скотолепен, царствова во блуде и пиянствах ║194 и кровопролитиих неповинных кровей, к сим же и во вражбах богомерских, ими же мняся во царствии утвердити; сего ради паче царство его малолетно пребысть. Аще и перводержавнейшим сроден бе, но нечто же успе тому тех сродство ко еще царствию утвержению, не благочестивне живущу, оставя Бога, к бесом прибегая, но и жилища сим собою в царских кровех в присное пребывание тайно устрои ради непрестаемаго с ними нощию и днии обаяний, чародеяний творения, яже ║об. чюже таковая християном, неже царю. Яко же и преже сего, егда он в синглитстве быв, – изряден в прочих сверстницех, сточных ему, первосоветник и предуказатель в соборе всего сиглита о земных вещех управляемых всех; егда же страстем плотским безумно приплетеся, тогда и умом срастлися. Кто не посмеется того безумию последнему: внегда бо всеа Росия земля восколебася нань ненавистию, за еже без воля всех градов воцарился бе, к настольнейшему же и преболшему царскому граду противных пред малем приближения ║195 их, иже обстоянием во облежание сих чающе, он тогда свое безвременное дело еже бы брачнаго ему совокупления сопряжение супружество сотворити, еже и содеяся. Неже бы достояше паче тогда земля вся прежде от волнения уставити и себе на высоте толице возшедша утвердити непоколебима, и град толик, всего царствия корень и главу всем, и себе самого со всеми в нем во обстояние врагом не вдати, и ото обдержащих в чаемых бе того свободити – потом бы о женитвеных тщатися ему исполнити ║об. лепо, в тишине пребывая и в покое мнозе почивая, никому же претящу, неже во страсе убо: страх и бысть послежде. А иже росийских всех деспод достойнех прежде по истинне бывших царствия, удивлению всея славы их предивных царских преизрядных и предрагих вещей, от мног лет собранных, – сих всех доброт он расточитель и искоренитель бе со ими же ся возлюби. Сего ради не мощи его нарещи по истинне царя, зане мучительски правяща власть, неже царски. Суди ему, Боже, по делом его! ║196 И язы́цы бо безумию его посмеяшеся и насмиваются, но в последний день, мню, пред языки всеми Бог паче всех посмеется ему; «ссечет бо выя грешником не чювствием меча, но усечением мук», по Писанию. До сего убо он, растлитый умом мнимый царь по себе, предварших царей исполненыя до верха царския сокровищныя хранилища истощи, яко уже ему сими его скотскому житию не довлетися; но, яко нечестив, и освященным сосудом в соборех и по святым лаврьским местом всех градов ║об. своего владычества, иже преже бывших царей с роды вданныя по душах их в вечную память, сия он к потребе своего студожительства в сребреницах разлияти не устыдеся, извет творящу, яко бутто воином раздаяния летняго их урока ради, истовый их весь урок, на то отлученый предваршими царьми, вся сребреницы преже блуднически изжившу. Ниизвержение же бесчестное сего венечника подробну сповесться в прочее.

Предипомянутаго же Михалка, иже царския чести сего Василия сподобльшаго, по своем ему воцарении он в мое нядро ║197 истинною сего во оземство осуди, лестне же второе воеводства чин ему зде о мне управляти вручи, тому не хотящу. Ничто же бо сему возводителю ради помазанаго воцарения чаемое ему благо успе от иже на неначаемое царство возведенаго, ниже пользова: преодоле бо иже и на высоту престола посажения первое его тому досажения зельство, якоже в растроениях неких премогают горчина сладости, лютости – времени зовущу – умножением. Но той убо паки изо оземствия зело тщашеся царствующаго града по образу ║об. первому к царю приближения своими злокозньствы некими доити, и первыя чести или и совершенейши тоя, еже бы и с первыми по цари в синглитех сравнения достигнути; от самого зде движения его в долных познан бе. Мню, паче и самого своего си царя, его же посади, коварствы некими дщася, дошед, ниизложити, мня по оному, яко возможе того на престоле посадити, мощен мнящеся того и низвергнути, клюкам своим надеяся, образ своего си тайноумысла, якоже кончины Ростригины, помышляя, и о сем тождество своим первосоветием другое ║198 свое содеяти сточное тайнодействие. Не получи же обаче, но усрами бо ся превознесеная гордыня, яко попущением Божиим и первую честь недостойне прият, не ради благословных вин, но сопротивных от попущения. Никто же бо у самодержавных истинейших и природных царей наших прежде, доньдеже не сущии царие нами не обладаша, таковую честь когда худородства получи; паче бо бе естества и первая ему вдана почесть; благороднии же, аще и видяще чрез достояние что, но цареве воли ни словом противитися ║об. не восхотеша, крепчайшим в них не обретшимся ни единому. Но паче си бяху не боязнивы и страшивы, истиннии же убо наши царие прежде сих ве́дяху, коему роду кую и какову честь и чесо ради даровати, худородным же ни. Коего же он ныне надеяся доити, не получи обаче, а его же не начаяся, се сего постиже: всего бо иже во мне народа руками многих кровоубийствено от неначаемаго тем некоего куртеса повелением, – братанича царева³⁹¹, и пред малем³⁹² от державнаго тогда в надра моя пустися, – внезапу нужно ║199 зле горделивую свою душу он изверже, вся уды его и со одеждами на части оружми здробившем. Сам великий вину его всем вслух объяви³⁹³ людем, народ всеми воскликнувшу гласы: да возьмется таковый от земля и несть ему, глаголаша, части и жребия в достоянии с нами! В речную быстрину воднаго естества немилостивно того в растерзание водоживотным безсловесно вметнуша, ниже погребалных тогда сподоблен бе; аще вмале некако пред сим что отцеви духовне от содеянных ему скорости ради ║об. исповедати от Преимущаго бе послаблено, негли убо некако аще и святыни прия, – о сих добре ведомо свене нас прилучшимися ту сущими, аще тако истино есть. Яко рабу³⁹⁴ обаче, незапно же и без замедления тому кончина, якоже Ростриге, содеяся за преестествено некое его зло и богопротивно виновное злолютство злобы его, паче всех повелителю о нем единому сведущу, зане и Бог сему на нем зде мерско содеяти попусти. Имения³⁹⁵ вся рукохищнаго его собрания суетнаго обогащения ║200 в надре моем, яко прах по воздуху, разсеяся не точию же, но иже и в различиях местех негде сокровено бе, да яко и в царствующем в самом граде в тайноместех положенья от державнаго не утаися отсюдными о сих возвещеньми. Такова бо высокоумных и самомудрых гордоустцов кончина: яве, уповающим на ся, неже на Бога, праведному суду не попустившу мнимомуся чесому им творити, неусыпному оку Сего мыслимое предварившу, по Писанию, «уготование сердца его вняти ухо Божие», нрава прегордое, еже мышляше ║об. в себе богопротивно некое, яко и прежде, но Бог величанию рог сламляя и запиная всяко самопремудрым в коварстве их.

Самописчий же некто³⁹⁶, действом тому вселукавому лукавый некогда в делных всяко собеседен бе и сосходен при всем, на того к преимущему в прикровении льсти своея искренно и дщанно пожела, не мал советник и совещатель на убивство его бысть. От самого повелителя убийству прегордаго по возвращении великаго с народы от крове вборзе тогожде часа уве́дено бысть, пред послухи ║201 мноземи в притворе церковне негде, иже дому своего ему пребывания; тайное ядя его, яве в лицо ему той при всех, егда ся преимеяй сотворив, отсюду к державному скорописаньми смерть убиенаго борзо всадником на езделех возвещая. Еще же сего свидетельства и доныне не вси почиша, елма же не вкупе бяху месты. Аще же и не руками тому он убийца бе, но убо оклеветаньми к великому и подвижением языком тайно со усты; злонраводействен бо той и злопомнив ║об. прелукавен же и самолюбец; не мноземи же он и ко оного убийству ведом бе.

-----------

По разсужении же места, иже объемлющаго всю общепротивных рать, идеже близ царска града облежанием сих станы быша вси, не вем силу вещи сказати, како оттуду языческо в самыи матере свене труда вхожение бысть, его же и они первие многими труды ухищрения долзе преяти не возмогоша, како же ли онамо бывших внутрь тезоверных нам с'ынославными онеми посполитое о всех, иже ║202 к содержанию земли, утвержение бысть. Крестопреступнех бо всяко кая ина клятва кроме сего в клятвеных утвердити весть? не может бо. К сим же паки и еже о главе всего царствия, самом цари, с высоты престола в худость того ниизведение, и умиленое супружнаго жития его скорое в бесчестии всяко распряжение, горлиц подобное, яко смертию раздвоеное, и от вольнаго царствия невольное того мнишество, и внезапное всеа купно верховныя чести лишение, и до иже в самый плен ║об. отведения и конечнаго ему тамо безчестия наругание и срамоты, увы, еже царску венцу всего срама налагание подъятия, – о всех сих быхом зде от плена яко во мраце внутрь стен неведени затворени, разве что кроме истины же вмале прияхом не согласное от слуха, но яко по аеру чрез забрала, и та в слухи наша едва кое нуждею прелетит слово, заклепы тверде затворением сущеми, иже всяко не бе воля в нас. О сих прочих словес сочетанию непогрешнаго по единому когождо сказания ║203 не изстязаннем нам быти чтущим се молимся; и о прочих, идеже ко исполненом вещей и исправленном словесы изъявлению не доволни явихомся, тоже разрешение прощения просим, обще по естеству недостижения немощию обложенем. И аще подробну збывшихся словом в писании представити есмо и недовлени на се, но, не оплакав различне сих, не могу минути, единако бо от славы в бесчестие изменение сих, аще и неуяшнено в слозе, смирено же по всему.

Но что обрыдаю первее: самого ли царя, ли царствия его? ║об. Нужда бо и обоих, о царюющем и месте его, в среду привести плачь, но ни единому же без другаго, яко ни души мощно бе без тела в видимем содержатися, ниже телу кроме душа в составлении двизатися. Увыи, царю венченосче росийскаго всего боголюбезнаго жребия по благочестии, одушевленый по всему образу Божию властию и страхом, богопоставленый нам во всей жизни во утвержение и управление обще наше, и рог всеа крепости нашея, и жезл пастырства, и опирание совершенаго о всех заступления! ║204 Аще о нем иже бесчестне некое в сложении сем рекохом негде, от дел его творимо им что безместно, но тамо вправду неподобное того единого извещано, зде же в ресноту подобно жалостное словесы и положити о том же. Но аще он повинен коим в сложении гресех, престол же места о всех непорочен сы, чисто бо от грех достояние бе; единому же горе соблажняющемуся, иже на престоле святости не в лепоту седящему. И не ради того единаго наставшаго к почести слово зде вмещаемо, но ради ║об. предварших его вправду царей, исправляющих престол иже тем же местом достойне, отъемшихся, – первее зде сречено бысть, – и самого общаго престола, яко одушевлена, честь изъявляя; едино бо всем и прежде бывших его царей тожде³⁹⁷ пречестное первоседалище бысть. И о сем толика; прочее же во умилении глаголы скончаем слово яко в лице ту сущу посрамляемому. Како не усхоша господопредательныя руки, коснувшиися неразсудно высоте твоей смелством безсловесныя дерзости, ниже устыдешася вежди дерзаго освятованныя ║205 чести славы твоея? Тебе бо, яко Бога вся купно тварь, по Бозе стыдящеся, почитает страхом и молчанием, подобне Тому повинуяся служи, Зижителя не смея преслушати повеления; иже Богом дарованныя ради чести венца ти патриарси и вси святительныя верси говейне и со страхом приступают, сами суще непреступни всяко. Но что? И соименни ти и от восток христоподобною честью, яко волсвми, посылаеми ими дары ти приношаху, от конец небес до конец их вси позываеми отвсюду согласную по Бозе честь ║об. вам сотворяху на лета, в вашу державу приходяще не самодвижни, но посылаеми Богом; превзыде бо честь их всех на земли славою. Аще и человек царь бе по естеству, властию достоинства привлечен есть Богу, иже надо всеми, не имать бо на земли высочайши себе.

И о дерзнувших убо рабех, иже коснушася некасаемых, суди в день суда им! Которого же от Бога паче велицыи вси мнимии ся столпи, тогда ту прилучшися, получат ответа в будущем, иже досаду сию на богопочтенный ║206 венец и место сотворити дерзым невеждам попустившеи и зрящая вся на сих чады? Аще и отнюдь сами они совлекшим того низу непричастни, ниже соизволяющем господьским низлагатаем, но обаче видцы и позаратаи быша вси бесчесному оного ниизведению, да не реку – ниизвержению, – могущим дерзнутых о таковых начинаниих возбранити, и не возразиша, но паче и соблаговолиша им, непщующе вину его о гресех. Но аще есть он некогда и погрешительну жизнь убо царствуя проходил, венцу⁴⁰⁰ же честному что есть с ним? ║об. Еже и о святителех всяко порок некий множицею приемлется, не убо и церкви сим бывает сповинна, яко же и они: та бо от человеческих страстей не потемневает, но пребывает присно в своя ей светлости чистоте и юнеется; сице и о свенечнем и престоле царстем всем знается о сем слово едино. Чесо ради со онем и непорочное обругаша и с повинным неповинное сочеташа безсчестне? Лепо бе и недостойное достойнаго дельма снабдети, якоже негде в прилучшихся плоть ради душа мудрии пощадевают, ║207 и ина такова, неже и достойное ради недостойнаго всеа вкупе совлекоша чести. Егда бо той нам поставляшеся царь, не несведый сего и яже о нем прежде движения его всего смотрения око убо и Предведый вся о всех: лепо бы о всем Оного суду попустити, неже себе самем отмщати; аще и попустися, но токмо убо нам укоризну сию мощен, от человек во странах языческих протекшую тамо в ня от восток даже до запад, в конец погасити всю. Ве́де, яко возжеся неугасно онамо та, ║об. пламеню велику подобию, в роды многи о дерзнутом ко уничижению нашему и срамоте; Един же ю, аще восхощет, всяко погасити весть повелеваяй ангелом, иже манием всей твари воздвизая и утишая к потребе ветры и разводяй по воздуху облаки, преславно же погашая неугасимыя пламы вавилонския пещи, аще что и чюднее; благоприменителен бо иже обезславльшееся может на первую паки приложити славу и вящше, обновлей образ Адамль⁴⁰¹.║1

-----------

Иже рукою⁴⁰² Божиею древле праотцы наши сотворени быша, супруг первый Адам со Еввою⁴⁰³, – ов от земли, ова же от того ребра, тем же сей надо всеми бывшими яко царь самовластен поставися твари всей, ему же птицы, зверие же и гади вси страхом повиновахуся в покорение, якоже своему Сотворителю, Владыце всех и Господу. И донелиже первозданный не запятся всех врагом губителем к первой заповеди преступлению, тогда безсловесная вся, иже по сих ныне и страшащая ны, созданнаго оного трепетаху повеления. Егда же змия Евзе прелесть во уши пошепта, она же научением ║об. тоя и мужа си сопрельсти, – абие оттуду сам новозданный всего царь мира животных онех ужесатися начат, и от прослушания падению по них быхом оттуду вси причастни доныне. И якоже Адамови прежде преступления ему дивии вси быша самопокорни о всем, сице, сему подобне, во временах последних и наша самодержавнии во своих державах обладаху нами всеми, от века рабы своими, дóндеже они сами держахуся повелений, даных Богом, егда к Нему не у еще вконец согрешиша. К ним же быхом от всех мног век доселе непрекословни, ║2 елико по Писанию быти достоит ко своим владыком рабом повиннем, во всех служебне; не уже до крове токмо, но и до самоя смерти быхом им самопослушни, яко же скот водящему и даже до заколения сопротивитися не сове́сть; тако безоответни быша к ним, яко рыбы безгласни, всяко со тщанием кротце рабское иго ношахом, повинующеся им во страсе подобне, честь страха ради творяще вмале яко не равну з Богом; аще Того тако боимся, ни убо унее бо, аще се было тако бы.

Егда же к концу лета грядяху⁴⁰⁴, ║об. предержателе наша поскольку начаша древняя благоуставления законная и отцы преданая превращати и добрая обычая на новосопротивная изменяти, потолику и в повинующихся рабех естественный страх к покорению владык оскудеваше изчезая, яко же и земля к первому угобзению семян ныне по премногу своим несравняема плодоносием. От дел бо яве познаваемо бе всяко излишество и тшета благих же и злых неже от недр темных, яко и в прочих. Восхотеша бо обдержителе ушеса своя сладце ║3 преклоняти к ложным шепотных глаголом, – яко же в Ветсем прабаба всех Евва змию прелестнику подаде любезне своя слуха, сим вмале и огорчися: абие подъяше бо обще малжена бесчестное ис породы изгнание, – лжевный же недуг и горький плевел терния, посреди всего царствия израстая, умножашеся и истинствующия пшеницы класы являя превосходя. Языки бо своими убиваху люди яко мечи с люблением тех послушателей, возношаху бо ся зело над правдою в неявственных своих похвалах; державнии же и никакоже тех отщутиша, дóндеже плод горести ║об. тоя пожаша и в снопы связаша, якоже и в хранилища им своя сих положити; тогда сих вкусу добре уразумеша. Послежде то бо в прочих о наставшем и мати всему злу бысть.

Рабопослушныя же мнози от сего быша самослабостни и страшиви естества обычаи, и на кождой час изменуеми, и словопревратни удобь, и всяко неутвержени ни в чем, в делех же и словесех нестоятельни, по всему вертяхуся, яко коло, и друг другом защищающеся в находящих.

Приходящии же в державу наших господ от стран иноземныя многи ║4 посолницы и купцы, ползское естества нашего пременение иже от древния крепости в худость сошедшее, прилежно разсмотряюще и страшивство наше предипомянутыя слабости паче писаных им в послании, о них же прихождаху, вещей извета, наше немужество все всяко во царствии бываемое узревше приложением к своей им непременней и доныне твердости и к потребе временю, – крепце проразумеша о нас довольне, яко несть отнюдь мужества никоего в нас до единого, зане от грех готову в себе пристяжахом слабость во всяку прелесть, еже ║об. и бысть последи сотвореное им нам о лжецарех погибелное предкновение совершенаго падения; ту же слабость о нас и во всей земли нашей судив сположиша они.

Все убо первые крепости оскудехом вконец: старии в нас быша младоумнии, вместо разума токмо седину едину имуще и брадную власом долгость, юже являху людем и красахуся тою, яко мудрии; средолетнии же бяху миролюбни и славолюбни, якоже и предиреченнии, и ко властем обои о неправдах самоподвижением утреневаху присно, у них же «во своя им ║5 дни лукавствий ли своему животу искуповаху время», якоже пишет, и обаче елико искупят, толико и поживут убо; юнии же у превозрастных тем же и доныне учатся злобам. Яко речется, иже «несть пророка, ни вожда», и не бе к тому в житии обрестися исправляяй пути своя человекоподобне по заповеди, яко достоит, вси бо согрешиша от младенец до старец, ибо за грехов презмерия древняя в нас крепость от всех отъяся. Сего ради и язы́цы, на ны нашедше, всю землю нашу растлиша, яко и паче елико хотеша. Се же все бысть державных малем ║об. поползновением, якоже Адамлим ко греху умяхчением, рабским же нашим многим прегрешением, единаче же обоих к Богу о добродетелех неисправлением.

-----------

Сопротивна бо древних царей уставным законом начаша вся во всех бывати: малая великих одолевати, юнныя же старых и бесчестныя честных, рабы своих им владык; и купно всяко вся честная на бесчестная прелагаема, бесчестное же сему сопротивне, в честное, яко в ризу несвойствене и чрез естество облечеся нелепотне. ║6 Яко же у свиньи в ноздрех усерязь драгая видима, сице у недостойных в руку начальствия власть зрима, и им же повелеваяй и прежде, тем ныне сопротив повелевая бываше, и господин рабови предстоя; по всему подобне, яко нога венчеваема, глава же смиряема, и дольняя убо яко на престоле выспрь, горняя же долу бысть, и первыя убо быша посаждаеми богоданными цари, днешнии же богомерскими враги. Разумеет же ся ум имущим, яко бывает сребро, при ногах валяемо, всяко неприменно скверны, и злато, ║об. погребаемо в кале, существа своего в тимении не погубляет свойства; порх лица же не смеет многоценен нарещися бисер, аще и честь вмало неблагословно приятно.

-----------

Иже в безгодия время своему владыце раби дому его досадивше и зело мнози, по днех же той, от бед отраду приим, абие лютою смертию умучаются, первая тех досаждения воспомянув, егда никоего же от внешних враг на ся нашествием бояся навета, ли слово с ними некое крепце о мире ║7 положит. Аще ли ни, то предбывшую рабов досаду, от горести утеснен и тернием одолен, отлагает невольне на время довольно, да не убо варвари того окресныя, ощутивше оного умаление людий паче перваго, пришедше, всю его вконец попленят землю и господина самого восхитят вседомно, и запленят, и соотведут во своя всеродно.

-----------

Вся же всяко бывают во время подобно: время бо одолевати и время одолеваему быти. Не мало бо бысть вина к запустению ║об. нашея земля и козмик мнозех наших, иже именьми многими обремененных в куплях: своих бо ради собраний они и приложений прибытков со обладающими нас чюжеверными, и со иже на власти от них посаждаемыми, и со лжевоины языковредными⁴⁰⁵ же много сложение творяху вкупе вси о истощении и православных земли, яве и множае отай сошедшеся, сприседяще онем и советующе, кои же бы кими когда прибытки на кийждо день и час обогатитися им. Бога и царя отнюдь в прочее наши вси не боящеся и человек ║8 не срамляющеся, враждебных руки своими всяко советы наполняюще доброхотне и своя нядра такожде обогащающе стяжанием господским; они еже к тем своим приближением своеродную же и купноверных им землю опустевающе без остатка вконец и на всяко зло к злым прилагающе всеизменно совет всяцем земноизнурением злотворным, яко да торжники со лжеименными воины во злобе сих от зловерных своя стяжанья цела снабдят, злоначальнии же ║об. в начальствах паче да утвердятся крепце тем же приложением ко онем совета на зло, да от нечестивых они вкупе вси с своими сохранятся невредни богатствы, еже и бысть; корысть бо свою паче веры почтоша. Но зде слово вмале сих, инде же многократно потонку речеся о них.║208

В лета убо, по иже пресечеся с роды смертию предел живота царьствующаго нами Бориса и повнегда поражен бысть во царствии нам же от гнева ярости Господня мироубийственою рукою богопустный⁴⁰⁷ на ны Рострига, за еже не добре толико и таково наследова купно со имянем место, – по сих абие такожде взавидеся о царьствии Василию цареви и, яко стрелою первых любовластием абие устрелен быв, токмо же дерзое обою сотвори, но неразсмотрено зело и спешне ║об. председ, неискусен сый таковым; не на камени бо храмину си назда, ниже в земли углуби ю, но по всему на песце основа, якоже о нем конец его показа, по гласу Самыя Истинны⁴⁰⁸: «припадоша убо реки и возвеяша ветри, храмина поколебася всебедне и житель ея падеся». Внезапно и самодвижно воздвигся кроме воли всеа земля и сам царь поставися, его же скоропомазанием вси людие о нем предкнушася, и сего ради всескипетра градов воздвижь на ся ненависть; оттуду бо по первых в Руси все зло начало прият и нача много в земли ║209 ражатися зло, еже по всей нашей земли непослушное самовластие рабов⁴⁰⁹ з затворением градов, яко самой царствия главе, еже матере градом, своевернии раби, ратию пришедше, злонаветне презирашеся своим приближением к града стенам; от них же новоцарюющему во граде, яко пернатей в клетце, объяту сущу и затворене всеродно. Ту же и мне⁴¹⁰, мухоподобному, во тмах человеческого умножения соображающуся в соименных чине, заповеданиеми царских тогда велений етера хранящу, – егда же стужающих на град вмале уляже ║об. брань, тогда самохотне о мне изволися цареви, и паче сего Богови своими тварми чюдне промысл творяшу всяко ко оному и прочим: кроме воля моея взыскания послати мя умилися в трикратное титло царевы место, еже царских в писании о имени возвышений чтомых, – первоименным, иже мене предварившем, сначальствовати мним купно в градцких движениих повелевая он.

И сим тако в тогда наставших бываемом, время же непреложного человеки совета Божия о нас пришествием неведоме приближающемся, Господьска ║210 гнева исполнь, и суд Его на ны в прочее преди готовляшеся, – начинаше бо оттогда болшее безместие в нашей израстати земли, – приидоша нечаянно от своея земля под матере градом Москву людие богопротивнии, латыня вся, и объяша со царем жителей всех сущих во граде, яко потопная внезапу некогда при Нои древле нашествие облия вода⁴¹¹. По градом же всем злоначальства в них и самовластие умножахуся, колебанием о цари людие распыхахуся неуставне и воспеняя море житейское неукротимо; ║об. лют бо тогда в живущих от ярости гнева пламень распалашеся возжизаем; он же, вправду яко огнь, леты многими обтек, испепели убо, яко же во всесложении многословие о сем речено бысть. Мое же отсюду к преславному граду вспять возвращение, отнюду же преж ми семо исхождение бысть, медлением зде на долзе закосне скудостию ми возможных к подъятию действ⁴¹², дожда бо и до иже великому граду порабощением в плен приятися еллины. К ним же убо нашего обшерабства работством тамо, яко ║211 в сети, увязе ми нога и вне града изъютрьуду преди с прочими гонзнути не свободися предиписаныя ради вины; о всех бо купно преграда днесь, яко о выи верига некая железна, облажися нашего несвобождения, по реченному: «сеть препяша ногам моим и при стези соблазны положиша ми». Но паки предиреченных имемся.

И егда уже в земли по малу нача прекращатися зло и о велицем граде лжебожнии вся злая уже содеяша: церкви святыя раскопаша, и великообительная с малыми места ║об. вся иноких развлекоша со основаньми, доброты же их, иже вся имяше град, зле расхитиша и градожителей имении, и изнуривше муками, погубиша, голени же их паче паличным биением сребрениц ради столкоша, градохранителная же, иже во время брани обраняющая град, и сопротивная творящих стенобитств рыкающих сосуд тяжестных великая премногая телеса и со иже о них потребами во своя им соотслаша и с собою отвезоша, – и убо купно по всего града опровержении аз огорчихся, ║212 зря и еже слыша некая местное таковое и неприкладное запустение, зжалихся, пребывая в себе, помышляя: како, яко в час всему разоршуся, бывшую пред малем неисповедимую толико града и яже о нем красоту, иже нами мняшеся она пребывати в век, яко до иже стихия растаются, ныне же ю вмале яко не бывшу зрим, ниже бывающу? И во уме си мыслию слагах всегда по многи дни, не отлагая и в себе бывая, ходя бо, яко изступив умом, изгубление таковое граду присно мысля. А иже о самой главе ║об. царствия и всея земли что рещи? Нахожаше бо ми часто и восхищением обуревая мысль облакоподобная по всему и скоролетящая высокопарне, яко по воздуху птица, позыбанием же потресая нестоятельное ми ума, и ниже в час даваше ему от стужения препочити, собираему в естества его клетце, но яко перстом тыкаше в моя ребра, понужая же недостойного мя и не на удобная поущая, ко еже прилежати ми, поне мало что отчасти написати богонаказания днешняя, иже ║213 в нашей земли бывшая, – на сия присно подвизая мя⁴¹³ и памятию обновляя и не отступая, ея же от стужения безстудия безсилием ми отринути не могох. Многащи бо, яко спираяся к ней, невежество все ненаучения моего пред лицем ея предлагах, к сему же и инославных насилие еже всем плененым от затвора иже во граде неотреченных нуждь. Еще же и единоверных зазирания и воздержная их смехотворная прекословия многая той воспоминах, ве́де бо обыкших, яко естеством, от невоздержания другови поношающих, ║об. яве, яко от своего им презорства хотети о чюжих гресех непщевати⁴¹⁴ вины, нежели им о своих недовольствох внимати, самем же яко бесплотнем и непорочнем мнетися по всему. И яко да не положу, глаголах к ней, претыкания брату в соблазн, ниже буду вина поползения его; но и ныне пред всеми ума моего мелину представляю, да не будет и о мне реченое: «се человек нача здати и не возможе совершити». Та же отрецанию моему не внимаша, но елико аз сию отревах, елико она безстудствуя ми належа. Аз же к неудобству свое ║214 уединение представих, глаголах ей всяко, яко словесы убо зболезнующая ми о написании обрет, в рукодействие же тайномыслимаго начертания, во еже омокается трость же и трудолюбне по хартии к провлачению, – в сие спомогающаго ми ни единаго, но якоже пишет: «жатва наста многа, делателе же мало»; и молихся Господину жатве, яко да изведет делателя на жатву, но не убо услышан бых; таковых бо общением в дело се Зижитель мой и Положитель слову показати не восхоте, и воспомянух рекшее, еже «просите и не приемлете, ║об. зане зле просите». Но и еще ми она ими же родительных деяний простых притчю к сим судив сположи, глаголя: егда кто потребу какову имать, хотя доити во град некий, ли от себя на ину страну, – спутники себе взыскует, еще же и путь показующих ему требует, аще не добре знает и да не разстерзан будет, по нему грядый, разбойники ли зверьми, ниже, совратився, правую стезю погубит; и егда таковыя обрящет, с ними путь гонит; аще ли ни, то прилучшихся⁴¹⁵ жителей при оном пути или сретающих испрошает, ко еже бы здраво ║215 и несовратно по малу уреченного доити ему места, и един по испрашании нудится сокрывати путь, не отлагая, да не изгубит своего орудия в пождании времени, ниже дождем и сланам и прочему в пути нестроению внимает, но вся небрежет, едино токмо еще ино мало утешение в мысли приемлет: еда на пути, ли от стран, з десна ли с шуя готовы споследователя си обрящет он, ли сошедшея его; аще неслучением и таковых обрести улишится, путем уединен, прочее поприще до⁴¹⁶ наречения места, не отлагая, да трет нога его, ║об. ничто же сомняся, о Бозе уповав, показующу ему путь и безбедно добре направляющу невещественному тае́но егову руководителю и хранителю святому ангелу. Сице прикладно сему и наше судится пути уединение еже к словесем составлению, иже о спутнице неполучение.

И яко же по естеству бываше во обычаех прочих комуждо свой нрав поползением вдавати во умяхчение греху, сего ради и аз зазор весь хотящих молвити о мне оставих яко за плещма, от неудержания попустих самовластия ║216 моего изволение многопытному ми помыслу, в покорение вдахся ему от смысла слабости, в порабощение рабски привождением притчи. И яко по воде плавая, чюжими хотя быти держим руками, да не еже бы, яко бурею, погрузитися множества глубиною писаний, краток в таковых имущими смысл, и якоже в чюж корабль сед, мног путь мня преехав, вборзе на друзем обрестися брезе, не сведый на ся внезапнаго путем воздвижения бури, среди же пучины убояхся и, непщуя ║об. о всадивших мя в онь извержену быти и потоплену, но, презрев свою худую меру, вергохся само собою кроме корабля в непроходимую быстрину таковы глубинныя широты. И не токмо же о велицем граде сем, но и о матере градом и всеа земля, главоболие ея дошедшее зде в слухи наша, мало что отчасти с прочими словесы воспомянути мысль спонужая мя, да не проходом лет мнозех забвится еже о сих память, их же еда вмале и жизнь померкнет. Аще и труд мног⁴¹⁷, прибыток же мал, ║217 но не изволих быти, якоже чтется, своему Владыце раб, ниже в чину наемника, иже ов за страх, ов же мзды ради своя полагает труды; но совершена восхотех от любве отча устроения сыновня, воспоминая Писания, якоже и уведевый себе никогда же наруган во иже выше себе начнет, и помышляя глаголавшаго во пророце, – «яко в реце проидут ногами». Саможивотное же во плоти Слово рече: «маловере, почто ся усомне?». Но глагол аще и к верховному во апостолех бе, но обаче ко изнемогающему маловерием⁴¹⁸. Тогожде и во ║об. другом: «аще не сомнитися, не токмо смоковничное сотворите, но и горе оной речете: двигнися и верзися в море, и бывает, иже кто аще речет», и ина такова. И аще бо и ко апостолом сия речена суть и вправду, но паки Учитель к ним: «а еже вам глаголю, всем глаголю». Сице провеща Обращаяй море в сушу, Нань же и уповах, отложих бо еже к Нему в сих весь о дерзости страх, к человеком же срам, доньдеже донесу обогащеным в разуме сия добре исправити. А идеже сложение ино сего предваряему обрящется добрейши и совершенейши, наше тому ║218 да отступит кротце и место подаст. Прочее же помолчим, но и десницу ему дадим: побеждает бо ся в ресноту присно хужшее лучшим, и меньшее большему дает место, нощь же уступает пришествием дня, и луна при солнцы свивает свой свет. Сицев разум и в писуемых судится; но не у верую быти сему возможну, иже плоть носяй⁴¹⁹, кто аще иже от начал самех наченшихся по тонку до единоя черты полность всю, якоже луна совершается, исполняема во округлости ея, разве кто обожен.║об.

Моего же скудоумнаго сего составления писательство совокуплением не купно бе, но друг друзе разстоящеся по всему, яко плотовидна не составне вкупе многоразная удеса хартейных членов, или яко новоскроена некая риза, купно же не сошвена, ли разпадшася от ветхости, иже за страх тогда не сподобишася исправлению и в сличное сочетание по чину совокупления пленожительнаго ради во граде обдержания, иже несвободне нашего во страсе пребывания, и хартейныя от изнурения в затворе скудости, неже ║219 телесных потреб. Но яко же в бесловесных вол затворен и утаився всех, от затвора исшед, пажить малу обрет, во гладе срывает, не избирая, траву, токмо еже бы ему утробу наполнити, обзираяся обоямо всюде во ужасе, да не узрится, ниже увесто будет стяжавшим и – тако ми и о тайнописании, в туждих сущу, невольное разумей: зело бо в скровне хранения уединении⁴²⁰ частаго от места в место преношения противных страхом в смерти чаяния то сокрывах и самех темномест безгласнех, иже та в себе ║об. таящих, яко чювствена от них провещания бояхся, да не проглаголют ли, мнях си, ниже кому поведят о сих иже на мя. И не точию тех иже град враждебно, яко змиеве, своими зубы держащих, но сих множество и своеверных, враждующих ми, стращахся, иже приседят о нас тайно в ловителех ко еллином: ловят бо и убивают, яко лев во ограде, сице они во дни и в нощи християном душа с телесы неповинныя.

Ныне же, егда оттуду свободи ны Господь Бог и Царь наш, Его же от века раби ║220 вси есмо убо Божиею благодатию в прочее, аще живи будем и обрящемся возможни, начнем о исправлении предварших своих писаний скрывати стезя премудрых и ударяти во двери могущих, по премудрому словеси. Повнегда и о сих збытие узрим пророческа словесе, яко «неси мене затворил в руках вражиях и поставил еси на⁴²¹ пространне нозе мои», и паки совершене станет нога плененых на своей правоте свободнаго жития нашего первыя широты, тогда з Давидом реку: «сеть сокрушися и мы избавлени быхом, ║об. помощь наша во имя Господне, сотворшаго небо и землю», якоже случай даст и кроме будем коего новопрепятия, аще не запнутся в ких стопы наша.

-----------

Яко убо иногда Моисеом от Египта древнии и со Иисусом на землю обитования, такоже ныне от нас боговоцаренем оттуду изяхомся и во своя изведени быхом и, якоже в день Христова самого воскресения, свободихомся ото ада. И аще убо речет кто, еже на своеверне месте земля толико мучения пребыхом время, – к ним же отвещаем и мы: ║221 но работа чюжаго; пребывающим⁴²² бо во свете во тме сущих не разумеют, ни видят же.

-----------

Не бяху же во всех равнии вси иже в плену объятыя: овы убо алчют ниществующе, овы же в богатствах упиваются излишествующе; и бысть сим таковый плен лучши свободнаго всяко жития, ибо в жизнь богаторадостну им се бываше, прочим же скорбь на скорбь протяжением дней в потребах скудости. Несогласно же бяше житие обоих и много имут между себе разстояние ║об. разньства убо: продолжение сего времене первым бяше прибавление богатству, другим же приложение печалем. И обогатевшеи за ради своего благоденства не радуются о мире земля нашея мира, но о вражде; аще и вся лета тако зле нам долго переходны бы, не убо они о том поскорбели бы. Всяко в добрых расколы творяху: яве, прелестницы свой живот судив вмениша паче всего мира, верою своего си они обоюдумнящагося ими яко слугования к своеверным же и неверным лестию лукавствоваша, ║222 на обою ногу храмлюще, пременяя, душами же возжени и сердцы горяху приложением ко еллином: паче своея веры и господ сущих нам от века почтоша и; мнетися, яко отступив в тайне со онеми, яко жидовствующе за скорое суетия обогащение и своея чести от них. Но богатых благоденства румянство и обнищавших злоденства дряхлость и плоти от сухости бледость обоих лиц зрящихся очеса разсудят и непритворная риз худость, неже смущаемая словеса, иже о сих, колеблют слухи слышащих.║об.

Егда поражен бысть внезапу гнева ярости Господня мироубийственных рук и растлеся телесное смертью внутрь самих царских чертог и вне сих на среди же царствия самого стогны извержен бысть, разражен яко от грома, пад скимен, аспида же, обаче и яйцо василисково, Гришка Рострига, порекло Отрепьев, – бе той яко сын обещанием злобы его Жигимонту, литовску кралю⁴²⁴, к хотению его не сущи ему по обетству, но о нас советом на зло, и яко скорпииным надмен ядом, пущен на ны ║223 от пазуху его, – иже узре бо той краль время поносно себе, еже всеа руския земля колебанием мятущеся неуставне о цари люди, и растоящася несогласне между себе самовластием наша грады вся, и возникоша на свободных и соплеменных свою главу, слагающемся со языки и особ кождо различне: идеже враждующе туне сами на ся от грех, кипящих в них, в совершение здешней мсти, паче же на пребольший град, главу всего царствия, и на прочая ратоборством грады разбойнически находяху. Тогда Жигимонт краль, ║об. дерзостне яряся о добрых на ны спеющи Богом в нас умножением всяцех вещей, – первое о благочестивей по истинне первосиятельней и пресветлей вере, потом о умножении растворения земных всяко благ, – яко же фараон иногда на возлюбленнаго Израиля, сице и сей древним земля своея зломыслием на землю нашу, соединив свое злоумие о нас с несвященным и лжепапою, оскверняющим Рим⁴²⁵, по согласию безверныя веры их своея, аще и не самодвижен ополчением прихождению на ны, но люди в силах тяжцех пусти своя вся к самой ║224 главе всего царствия нашего граду с приказаньми прелести, еже облещи паки второе, яко в ризу, некое во имя не свойственно и прочая, елика обоих учитель сих враг научи. И яже прилучшаяся им наша грады разорением они сотроша вся и всяко положиша пусты и, к матере градом пришедше, за мало поприщь, во облежание близ внешних забрал града своего оплот сотворше, могуще всю объятием тех окружающе рать, самодержавнаго нашего срамодейственаго Василия всеродно с сущими яже о нем во граде, ║об. яко в клетце парящую, ужасив, затвориша и неисходна о всех ту пребывати сотвориша. Пришедшии же с прочими Ростригино, по убиении его достовернем, оживотворившем имя, и начаша коварнем умыслом, инаго второругателя⁴²⁶ сущему имени изветом истоваго государя царевича Димитрия сказующе, нас прельщая, яко той есть вами царствуя, и лжу сшивающе, глаголаша яко сохраншуся ему негде и бежанием гонзнувшу смерти, сим изветом несмысленыя к своей им воли уловляя. И по всей земли от них желчь горести ║225 лжи сея на слабейших излияся. Что же неразумия сего, иже веру емших сим, скотолепнаго! не скота ли всякаго несмысленейши? Мнози бо от сих самого Ростригу чювствеными своими очима, а не привидением, ни от слуха, мнозех и руки во время убиения его, снасмесившеся, оного Богом ненавистнаго злосмрадныя плоти коснушася, якоже выше рех, – они же, претворшеся, последоваше врагом, зловерным языком и с ними сложившимся, аще и верни быхом яко и мы, тех словесем паче очес своих ║об. и осязания нелестнаго веру яти повинушася самовольне от слабости без страха! Мню, не быти тем словеснаго естества, но несмысленнейши безсловеснаго. Аще кия обрящутся в таковых, глаголя, яко неведением се все творяху, – но ради получения вскорости некоего к славе сана и получения скоропребытнаго и безтруднаго богатства гибнущаго, им же удобь благими делы по истинне сих доити во вся дни своя возможно не бе: ве́де, сия мнози в скорости неправдою получают⁴²⁷ саны купно души погублением, ║226 душевнаго вреда о сих не помышляющим.

Се бо зло в нас и доныне всеми зримо деется, иже славы и богатства желают вскоре, без разсмотрения обогащаются неправдами. Аще что и от крове и от слез, к сим не раскаются, ни разсмотряют; точию на едино Божия бо взирает, еже бы им своя желаемое получити; сих ве́дуще грешно, о сих отнюдь страха не во ужасе приемлюще, ниже кому своих седин множае стыдетися, ко единому дщащимся, еже бы своя им влагалища вся лихвами изообильне исполнити.║об.

Не вси бо своего дания и достизают: прежде бывших их лучших всяко паче по всему еже собранная тех камо дешася? Не яко ли дым на воздух разыдеся? Паче же от сего навыкнути: яко многа в руку свою чюжая от восхищения имуще, могут та паки от них отъятися и инем вдатися, яже бо имяху собранная, вся к ним приити, тако же и отъити. О сих они Богом реченная словеса лжу по себе непшующе, еже «собираяй не весть, кому собирает»; и прочия о сих таковым Писание многи укоризны имать. О недошедших ║227 же и еще старости, в таковых же пребывающе прелести, что и глаголати убо? Ума не наказана никто же может исцелити, паче же безообразием в старости; «горко бо есть возрастом старетися, а умом младенствовати», рече богословию тезоизменный⁴²⁸. Не о единех бо онех временных славолюбцех, иже тамо бывших, сия речена быша, но⁴²⁹ иже по градом во своя времена кождых, и лишеных разума и не произволяющих доброе, речение толика. Время же от положения в начале слова начатое исполнити.

Восташа бо наша сами на ся ║об. и разделишася в разделения зла, приразишася ко иноплеменных сонмом, и совокупишася со языки, и навыкоша дела их и, инде речеся, изыдоша от нас, но не быша; лица бо своя во иноплеменных концех бранью на своеверныя обратиша, и не своя полки, но сопротивных собою наполняюще рать, крепость мышца своея всю купно здревле ратующими нас издаша с ними на ны; вкупе же, ве́де, и душа своя погубиша: со ими же ся зде умрети возлюбиша, с теми и в будущем изволиша часть прияти, по рекшему: «иже ║228 отвержется Мене пред человеки» и яже по сих. Снемшим же ся от нас отступным с туждими⁴³⁰ силами, обаче и вкупе пришедшим, – нашея земля мнозем воином, «малыя с великими», якоже рече Писание, ревнующе и соизволяюще о нас противных мудрованию, злому совету и делу их сложившуся неразделно, како бы им купно православных землю прелестию омрачившемся самем им многою; не токмо же едини мельчайшии бывшая наша воины бяху в них, но и от синглитска суще чина не мало, и прочии ис пред лица царя ║об. мнози сановницы⁴³¹. К сим же и отвнутрь двора его по чином кождо вне града, еже к противным в станы прельстившеся неуставною прелестию и прочая соблажняюще, преезжаху, всем образ слабости своея и немужества показующе, негли мощно бо вся люди во свою им погибель сопривести. И сим тако бывающим, и ото окрестных градов множества крестною плотному врагу душа своя клятвою, неже уста, на лжи печатлеюще, овы нелюблением царя во граде, овы ради телесных потреб скудости, ║229 гладу внутрь града тогда стужившу многу. Кратце рещи, не толико бе люди со царем остало во граде, елико лжецарю приложиша еже беганием прелагатаи.

Аще и ве́дуще его прибегшеи тамо ложна царя, яко кумиру, покланяхуся, плотским образом обложену, сице сущему царю, иже во граде, досаждающе и на всяко время граду, яко чюжду, с противными и кроме всяку творяху пакость, по пророку: «весь день ополчаху брани». Едино же тех тщание бе, еже прияти град и в нем царя и сущая ту с ним ниизложити; ║об. друг друзе ретяхуся мыслию, делесы, тезоверныя и сродныя си убиваху за се едино точию, еже бы им раскопати град, врагу разжизающу, яко железо х калению, и ожесточевающу сердца их. Паче зловерных роженный рожшаго, и сопротивне воспять, неже самобратная, и далечне, и чюжднии по роду никакоже себе пощадевающе, но яко иноверни убивахуся без милосердия от крайняя лютости, ниже веру, ниже сродство си во ум приемлющим, и яко самим противным, иже на се пришедшим, ║230 зелость, онех к сродным их⁴³² зряще, дивитися. Воставшим на веру им свою и естество, о благочестии жалостию не внемлюще, еже таковое превелие и многосиятельное в преимущих всех доброт, Богом украшеное царствие, яко солнце под солнцем: мнящееся по них, разоритися ими, – се помышляюще, не ужесахуся; но содрогнуша таковый златозданный ковчег дому Божия Матере и Самого в нем Бога жити изволивша с рабы, достойными милости Его: но яко скуделя, сих разбити помышляющи богоборнии, ниже к тройскому ║об. владычеству⁴³³ сего сравниша. То бо аще и во тме прелести бе и еллинских житель наполняемо, но за бесгодное того разбиение и доселе чтуще и оплакуют падений ради толиких тем; моего же, яко солнца пресветлаго всеми и паче всех, аще бы мирозданная длань, иже содержащая свет, противным нань что к роскопанию и вмале попустила бы, – сего не яко тройскаго господствия, но и всея вселенныя царствия срыдать о сих скончания век не престатели бы. От сего знано есть, яко и днесь ║231 окрестная величества сего опустеваема и не в конец падша слышати не терпят и колеблющая того ветры, иже ненавидящая по всему мира, мирне укротевают, друголюбное показующе, на ся тожде⁴³⁴ чающе наитие по временах, – аще не лестне будут мирствуют, ни радующеся злом нашим, Бог весть. А иже что попущением Божия смотрения в самом царствии⁴³⁵, в сей земли всей содеяся к наказанию нашему от противных, но не в конец, и еще мощен бо Попустивый вся паки ║об. исполнити удобь: врази бо достояние наше не наследоваша себе, – велие убо се есть нам благо от Бога! Един аз, глаголавый се, обладан еллины и не могу сих из себе истребити, дóндеже Введый иже в мя благоволих о мне, тех вне изрынет. И паки возвратим речь, идеже от начатых препочихом.

Противныи же яже от верных, якови тепли и усердни о вере быша, сицы, скоро сплетшеся, ту враждебне ратоваша, яко ото ангел бесове некогда, произволением отторгшеся Божия ║232 славы, отпадоша от света во тьму, тьмам они не сущи по естеству. Плотоядных зверей иновернии лютейши сих вменяху, обаче же сопостатнии многих от них, отцеубителя и братогубителя когождо сопротивне, немилостивне такожде погубляху; кровь родительну незакоснено убивающим чюждии отмщеваху, и неотложно к будущему побивателей отсылающе; жестоты сих и суровства к родителем их страннии зрети не терпяху. И по всеа земли сеа ║об. место же своя своим творяху тожде, повсюду равно враг един плевел злобы во вся сердца верных разсея за оскудение иже в нас добродетелей. По вышеписаному же образу варвары своим им продолжением стояния всечастне многу гражаном сотворяху пакость, и протяжением облежания их времене градожителем тесноту всячески ухищряше, и на всяк день исходящих на брань, яко класове злаконосна поля, серпом смертным пожинаху, онех же сопротив едва часть некая. ║233 И таково коснение на месте варвари сотвориша, яко и жилища си многа по образу иже во граде пребывания, яко вечна, устроиша, доньдеже дивный стратиг, ускорив, от нядра моего пришед с наятыми еллины, остроту тех всю, яко юнец рогами своима, сломи и на землю пасти ту сотвори и от стада Божия отгна, о нем же пространнее инде слово сказа.

Они же пред сим за мало от утверженаго ими к стоянию под градом места и в конца всеа земля нашего царствия, в прочая вся грады, яко прузи, ║об. различно полкодвижными нахождении расходящеся небоязнено, якоже во своея им земля отечестве сопротивльшихся⁴³⁶ им нигде же, еще и способствующих им удобнее обретающим единомысленныя на зло, вся же грады⁴³⁷ и веси со окрестными тамо месты, даже и до предел самого обоуду моря на десно и на шуе, ниизложив, поплениша, житейския и верныя различными по муках скончевающе смерти, имения же восхищающе. И не бе возможно кому многочислия бед росийска жребия, иже от враг подъяша, словесы сказати ║234 и исчести, ли изъяснити писаньми, ельма чье и око само со убивающими везде походило бы, неже слух; но о в тамо бывших бедах приключшихся, иже подробну хотящих вся вписатися, книга особь кождому месту может быти. Во едино же совокупление купно всемирных бывших им и бывающих напастей, по местах по единому кое же собрав, вкупе рещи всем необъятно, аще иже витейством краткословне кто довлен о сих обрящется по риторех. Корысти же всяческих потреб вся отвсюду, яко во всеприятелище, противнии, ║об. отнюду же предипочитаемаго ими всесмрадное лицо, во ограду его сношаху; и аще вяще что, инуде, яко рыбы нечто от вещных по пучине морстей, яже по широте мира во вся земныя конца разнесоша, необъятнем вся единем местом, ниже числом постижна, ве́мы, яко паче египетцких⁴³⁸ сокровищ быша, – толикия долготы и широты всюде земля снесеным быти воедино. Людие же мнози от земля всеа ко лжецарю стекахуся онамо, множае самовольнеи, неже по нужде «яко ведо́ми ведяхуся», ли на жертву х клятве по Писанию.║235

Егда же начат от Бога строительне исполнятися о нас смотрение, грады вся державы росийска скифетра от матере градовом отметание творити много, и отрицатися отступлением всеродно, и затворятися неповинутием царю особь кождо град, идеже бе, – не благ совет о всем умысливше, преумноженая чадь, сущая в них, извет ношаше всюду сей, яко да Шуйской Василей князь не у бы убо царь им был. И ни едино точию, но паче ║об. не восхотевшем им учиненым во градех от Бога царей сущим властем повиноватися и покаряти, но безначално желающим и без строения самовласно, разбойнически во всем жительствующе, двизатися по своему хотению, безумием, якоже овцы безсловесныя, не имуще пастырь в страх поставлена им жезла, но сами⁴⁴⁰ собою водитися умыслиша. Скотолепно зело суетен совет безглавная чадь в мыслех своих утвердиша, обаче на се уклонишася, яко да начальныя изгубить и избранныя лучшая мужа и нарочитейшая себе по муках ║236 всех смерти предадят, именья же их они наследят, еже и бысть, но не вечне пребысть; обаче инии с сим вкупе уже погибоша; восхотеша бо желанию, яко в пустыни нецыи древле: еще брашну сущу во устех их, но и кости их тамо падоша; сице сих даже доныне не ста нога их на правоте, якоже бе.

Но яже ими тамо творимая законопреступления подробну кто испишет? Нам малейшая от слуха точию ве́дома. От терния проникша смрадным скверны помазан, – Плескова глаголю и прочих, яже о нем⁴⁴¹ – во имя незнана, ниже нарочита ║об. ложна царя⁴⁴²: написоватися ему им и крестоклятвено обещавшемся, яко сущу, а не яко не сущу; еже по мале и сотвориша убо, они же собою злобе образ показаша, многи бо грады взустиша и даже погубиша; и не доселе могут⁴⁴³ стати, ацы быша, на оно, мню, самовластне взирающе, иже по державных смерти во царьстем граде и в прочих пред сим от мельчайших первое таковое зло действовати начася.

Мною же преобладающу и о мне промышляющу и власти правящу – пред малем, егда сих градов отложение бе, пустися от места, ║237 от царска града, идеже бе всея высоты престол, самодержавным тогда стебль по роду царска, вправду истовый воевода князь Михайло Васильевичь Шуйской, Богом обраняти мя повелену ему от сопостатных и в промыслительных всех от сердца прележати. Он же, яко верный раб талант умножив, повинуся воли господа своего, повеленое усугубив, многа бо той наказания от царя не требуя, сам себе благих дел образ быв, державное от Бога кормило в руку имея и правдою обоямо тя обращая, аможе хощещи, елико мога; не ║об. яко мздолюбныи прочии по нем его сначатницы, аще они тогожде синглитства суть, но преизящен рачитель к мирови в заступаемых, ему же быхом должни всяко вси яко рабы достойни вменитися послужением за изрядное его о нас в храбрости ото врагов обранение, якоже о того⁴⁴⁴ борениох преди слово изъявит.

Егда же от Плескова с прочими, яже о нем, возжеся огнь прелести самовластия и доиде до зде в слухи иже сего великаго, – не вем, како словес прелестию восхити сего, яко волк агнца незлобива, ║238 и отнес на раме в дебрь третий отзде сначалник⁴⁴⁵, иже по нем, ему же и соименен бе кроме княжества, но зело прелукав и злохитр, худорожден пред сим; обаче повинуся убо великий совету злоумнаго: пошепта, якоже древле змия Евзе, во уши, бегством сего изводит из града. Соизволяет же и способствует того совету и от втораго чина самописчий некто⁴⁴⁶, иже сосходен злохитрому оному во злобных нравех и собеседлив, паче же по лукавству свойствен; бяху бо тогда у царя ему светли дни живота его, тайнаго ради послужения ║об. законопреступнаго и еже за сродных времене приближения, честию малем не точен злохитрому за тайное ко царю языковредие. Сим обоим сложившимся, на лестная своя словеса, яко на крыла, подъемше, из града царьскую ону стебль, отрока изнесоша. Премудр некто негде рече, яко «незлобив веру емлет всякому словеси». Они же два своему им страху и боязни, яже от дел, оного с собою туне сотвориша причастна и бесчестие последнее же на лице великаго сим нанесением, яко проказу некую рукама, наложиша. Не толик малеим худород всяко ║239 от дел студ, елик велицем и благороднем от словес срам. Они бо за злоумное совета своего народа множеством людий еже убити, ли связанем в Плесков им к наставшему тогда мучителю лжецарю⁴⁴⁷ отвестися, – сего бояхуся, не оного они честное снабдевающе, но себе всяко соблюдающе. Еже бысть тогда к бегству стремление, яве о них познано бысть, зане от совести своея потыкаеми, егда от бегства вспять в моя недра сим возвразщимся, злоумие свое от них единому некако о сем словом, яко паучинным тканием прикровено, дружине своей сказавшу.

Егда же ║об. они в бегство купно устремишася, дневи знамениту тогда Пречистыя Божия Матере Рожества Ея честнаго бывшу⁴⁴⁸, с воины всеми, иже с ними сущими, не треною стезею, якоже татем, прелезшем не о Бозе, но инуде стену, чрез оплот мелющия хитрости бежащим и с собою талантов многих сребреники влагалища моего вземше, внезапу вне града во своем обретошася страшивстве вдале триех поприщ моего града. Никим же гонимы, точию от своея совести потыкаеми, забыша страшливии в бежании страсе Божия Слова в премудрости совершити молебная и у архиерея ║240 моего⁴⁴⁹ не восхотеша благословения, но удалишася от него, ниже нарочитым града обвестиша, якоже обычай бе яве храбрым действовати; сии же и во дне ходяще, яко в нощи, предкнушася, вину яждения своего таемне от всех сокрыша. Во граде токмо два, вторый по нем синклитик и другий с ним, точию осташася, славы же оних непричастни и от человек уничижени; владычествова же и царюя тогда во граде всеми само живое Слово Божие Премудрости, соблюдая и промышляя и содержая град. Они же на место оно, иже вне града бе, ║об. по сначальствующих и нарочитых града прислаша и вину бегства своего льстивне сокрывают ложными словесы, правым яждением прикрывше: сказаху изветом – быть то тщание их еже скорости ради. Грядут в крайней сея земли град, – человеческа имени наречения, еже благодати имя бе⁴⁵⁰, – еллин, глаголаху, наяти к помощи на врагов, иже росийску землю разоряющих, и епистолию от преже о сих в той град посланнаго у себе сказуют, вся ложная словеса прелагающе и лжу ко лжи сшивающе: аще токмо они во он сий град ║241 скоро ратных наяти сами днесь не идут, и от еллинска языка дозде не имут приити помощницы. Тако они глаголаху, сим изветом душа своя, вкупе же и телеса убиша, гордостию омрачивыися; сия же и первосвятителеви и граду всему, возвратившися воспять во град, возвестити повелеша.

Они же в путь свой устремишася, бежаху, идеже сами не ведяху; но убо путь той зело стропотен им и о всем не полезен бе, «пути в нем града обительна, по пророку, не обретоша»; от них же сами некотории, вспять возвратившеся, сказаша. Они же вси града, ║об. о нем же извет предложише в него спешитися тем наятия ради ратных, внитие в онь⁴⁵¹ погрешиша всяко, понеже, уведев их бежащих к себе, яко же и Плесков, вселюдно с ту сущими в нем совершене затворися, ко еже отнюдь владущему тогда в Русии ни в чем же им повиноватися восхотевшим, но зело бо град той ста ему в противление. А о их же простирается слово, – и паче ложное совета их в конец обнажися, мнозем поприщем града того разстояньем не дошедше, с праваго им пути на страну савратившимся, ║242 идеже не бе воля их, по непроходным стремнинам и пропастем бырающе днем и нощью влачащимся. Мнози от них, видяще суеумие их, воспять во град мой с пути возвратишася и со яже беша с ними моя сребреницы; не токмо же моя сущая воспитованныя воины, но и от раб мнози первоимянного, возвращше, во мне сущим о мнящихся самоумных поведаху яже прилучьшаяся онем на пути. Смеху с поношеньми и срама последнего бе исполнена! И едва от студа в противных землю не угонзнуша; некоему им малу препятью припадшу, обратившеся, во град на моея же ║об. краях земля, порекло Орех⁴⁵² имя тому, прибегше, о них же начальствуемому того града наручно от писаний моего нядра от оставших во мне промышляемых о тех бежании уве́дено бысть. Они же не мало от того града владаталя⁴⁵³ бесчестие прияше, содеянное их поношая, к державному хотя, веригами обложив, тех предпослати, насмеховаяся, аще не бы он соименый первому, иже всему сраму виновный⁴⁵⁴, оного града владателя за соплемянное увеща.

Оставшии же во граде начальницы, от них вспять во град возвратившеся, святителю и граду ║243 всему повеленная о неминовне совершене смельстве вся сказаша; народ же от сего слуха неуставным шатанием восколебася. Овым бегством онех мятущимся: чесо ради, глаголаху, град моими⁴⁵⁵ презрен бысть и празден им оставиша? Овым яже в Плескове близ деемое глаголаху, но овы сице, овы же инако. Прочии же⁴⁵⁶ глаголаху мольбу послати вослед бежащих ко еже возвратитися⁴⁵⁷ их бедити; друзии сопротивное сим хощаху, с нелепыми кричаньми в безначальство вооружахуся, еже гнати по них вопияху; инии же иная ║об. с воплем изношаху гласы. Избраннии же, иже и богатая влагалища имущая, не мнози с тихостию и по малу кродчайшия произношаху к народу и мирная словеса слуха ради, лицемерствующе обоюду, да не от сонма людий растерзани будут за неугодное мирови от них словес изречение, еда что ими не угодно сонму внушится, еже бы со обою страну сохранитися им. Глаголющим же и молчащим, зане бояхуся паче всех к мирови своего им разгласия, ни вещати дерзаху, ни молчати смеяху; трепет бо их отвсюду объят, в них же и доныне той же страх малодушья, ║244 иже к преимущим всяко лицемерствуя, действует, храмлюще в прикровене льсти, ниже от владущих быти им возненавиденем, – сего ради сопряташа в мире тогда словеса своя, яко на суде, паче же удержеваше их богатств и ненасытное множества любление, да не врагом понеже в наследие корысти их останут. Не согласно же бяху тогда народное гласование к совещания единству, яко и первосвятителю соборне и з градоначалники не бе сила толика народа от вопля уставити глас без Оного повеления, Иже времены ║об. обладающаго, зане человекоугодием купно все, дремлюще, храмляху. По сих, Богу благоволящу, едва житейское яко море велие воспеняемо, укротев, в тишину преложися; от Иже чювственому морю и ветром манием повелевающаго⁴⁵⁸ укротевати единоглагольно быти уставися еже молитву с писаньми от архиерея и началных града всего вослед никем гонимых, но от ветра и своея совести бежащих, с нарочитыми града пустити, еже и бысть. Согласно же бе и онех, молимех нами, иже к возвращению хотящих, изволение нашему хотению, Богу соединившу ║245 обоих совещаемое: стрем к нам своего посла послаша о своем их воспять в мою пазуху возвращении, познавше во всем свое неможение, в себе пришедше.

Что бы бе, егда оны в бегстве глумившеся бродяху, скитающеся, яко изверги, по дебрем, сий град мой великий, аще бы враждотворцы воставшии и наветоваша нам от Плескова, ли з другии страны пришедше, приятием мене наследовали быша, ратных чина во граде к заступлению ни мало, ниже сребреником к градцким потребам даже до пенязя оставившим? И аще бы бежащии, ║об. к моего стенам града кроме звания пришедше, в мое недро не быша были прияты, прелукавое их дерзодейство моя населницы обличением быша им отразили? По сих что? Где бе им ко вмещению место, еже своя им, сюду и сюду преезжающим, главы подклонити разве срам, державному тогда еще сущу во своем устроении и могуща виновным, мню, нанести всяко муку за преимуща от зломысленых терпению, паче же оного к самопрестольному изменное их прослужение, еже такова и толика града всего архиереом ║246 и с людми предательне оставление, яко наручно о нем предательство того сотвориша, противным без страха повергоша и яко праздна, им же не имущим над собою Господа, ниже истязани быти от владущаго о сем чаеми? Дивство есть! Чюже бо дело се рабскаго устроения иже страшащих, и законы царских обычаев устав кроме таковое дерзнутие, паче же страшливех младенец нрав бысть по всему, им же прочее не достоит в правление таковая превелие господьствие стран вверяти по предварших деспод наших законоположению. ║об. Они бо иже сотворшая за то сие достойни горцей смерти суть; но мню, онех злобе одоле к великому великаго по сродству имя, правости его и вкупость нераздвоенаго бегства их: без рассужения вся купно в мою на зло пряты быша. Како еже от народ безмолвно им во ограду мою паки внитие бысть, – и от царюющаго самого тем непотязаемо безбедство бе.

От народа от поколебания убийства боящися, ве́дящи свое ко злу виновное, помышляюще, чим поне малу бы срама си угонзнути⁴⁵⁹, умыслиша же писаньми в мой град ║247 к первым и к нарочитым тщатися; соплетаху же лукования в писаниях не мала, се и се, чающу на ся всенароднаго собрания за оное свое дерзости неподобное. Но ве́дуще моих гражан с начальными безпрекословное, яко к рабом, з гордостию восписуют, своего исправления труд паче, неже бегство, утвержают, сим люди омрачают⁴⁶⁰. Мои же началнии и града вси, аще и ве́дуще от вещи вся подробну тех ложная ими бывшая словеси прикровения о содеяных, но ови за страх, ови же за лицемерство писаниом тех, яко истине, ║об. повинушася. Правда же бе во льсти крыема, зане моя жителя семя исчадия бяху вси, и не бе крепкаго во Израили⁴⁶¹, еже бы поне писаньми обличити тех неподобное; но овчате кротчайши быша и самех рыб безгласнее ко отвещанию, яко безсловесни в лице стати: восписуют молебне им еже в мене возвратитися, и велию почесть им приобещаша, якоже благопотребно нечто тем сотворшим, и в сретение лиц их со многопищными потребами от всего града с нарочитыми предпослаша. Они же по мале та, яко залог, вземше, смелость с боязнию ║248 смесивше, – но первое второму одоле, – другим путем в мой кров водопутными носилы приидоша. И в Слова Божия Премудрости храм вшедше⁴⁶², верховнейшем и с начальными ту сущими и вселюдцкому собранию обще всем непревратно, ниже покаянно нимало в чем, но⁴⁶³ от перваго извета си славлюще, лжу ко лжи сшивающе⁴⁶⁴, первыми своими изветы слабейших великим жерлом прежереченный гордоустец⁴⁶⁵, видя мою чадь слабых сущих и страшивех, кричаньми своими увеща. Разумеша тех ложное, но мою чадь несмельство ║об тех ради и страшивство объят, и быша како воспитало начне страхом и онемеша⁴⁶⁶ паче же неразумием своего несогласнаго безчеловечества. Виновнии же злу, о них же зде слово, преобрадовашася, ве́де сердцы⁴⁶⁷ своими в неявленне образе, яко толик много народ и освященнаго самого, неже нарочитых, своими лживыми словесы превратиша, зиянием горла он си един, яко аспида, устраши; сокровено же кождо в себе токмо истиное све́де, но страх в народе прежде одоле. Просто рещи, яве бывшую измену ║249 свою в людцком сонме, словесы покрыв, украсиша, по Писанию, яко словеса украшают дела; деянми же истыми вещь от словес своих паче обнажиша и на свет пред народы изнесоша, аще они умолкоша и отъидоша в домы своя самооправдани, мняхуся ничему познатися в людцком множестве от прикровения словес от словес их лжетворному. И начаша обще творити о граде промышление со угождением людем, яко же обыкоша по согрешениох новоповиннии о всем з боязнию творити донележе в первые устребятся; ║об. в промышляемых тем тщание бе, вельми же не совершено смельство и немнозе всему злу виновны. Михалко же^468,469 в сети своея ему злобы, еже преди уготова си и соплет неким лщением, себе же уловль, якоже речеся: «в сети своей увязи грешник», – убьен бысть, якоже преди речеся. А иже вправду от дел звание приемый, вданный ми ся от Бога ратоборец на плотныя враги моя, хотящих разорити мой град, боголичный толку князь Михайло Васильевичь свободився оного многоплетенных сетей, – не нареку оного ║250 Михаила: василиска же обаче во змиях, неже Михаила. Аще же и соименен⁴⁷⁰ бе первому лучшему оному, но той всяко от сего разньствова якоже свет от нощи, сице сей оному не сходен бе по всему, ниже во нравех сроден, якоже впреди слово скажет.

Стратигу плотску внутрь мене храбру сущу, богоданну обретщуся еже о мне в заступаема, «Божие лицо» по толку глаголемо имя его, к сему же и княжеродия получения преславна ║об. корене отрасль, яко юнец младорог по всему, врящею своея совозрастаемыя в нем и цветущия юности крепостию сопротивных роги яко гнилые лозья⁴⁷¹. Аще и юн сы телом, но многолетну стяжа ума крепость и не убо точию се велие, но и все росийское господство, самую всех градов матере, – от рук воздвигшихся на ню язык ко еже уже той па́стися близ, обстоянием объяте ими, яко удавою некако удавити ю пришедшем, – он стремлением си ускори и собою заступив, той избаву дав ║251 и па́стися не попусти; зверообразно на объемших ю вся волки тыя напад, грозне разпудив и от стада Божия отгнах, без вести сотвори, явлься яко непобедим, враги одолев. Вышняго Промысл в нем своя судьбы действова к того славе⁴⁷². Вмале же от сродных си, о добрых взавиден быв, смертным уязвен ядом; угашению жизни его, сказуют нецыи, носяй венец стрый его виновен бе⁴⁷³. Ничто же бо во время зависти, егда она, царствава, сродство обоих пользова; дерзаго же паче на суде, осудив, посрамит, зане убиеный ║об. убившему искрено послужи, он же ему се ненависть преложи, якоже Саул иногда Давидови, о похвалах устрелен завистию, яко елень в ребра, сего ради и сотрясен бысть поражением от духа нечиста. Но кто от земных мощен бе подвиг дельма доброхвальнаго главу венчати, разве не Иже ли крепость тому подавый? Его же в самом царствия недре земнороднии со младенцы вси при гробе его небоязнено перводесподским почтоша плачем, не внемлюще отнюдь владущаго страху, но яко свободителя своего оплакоша, ║252 надгробное ему рыдание жалостне со умилными воспеша гласы, исходную с провожденми песнь и честь по всему, яко долг некак, отдаша за безгодное время смерти паче. И яко же Израилича Иосифа египтяне некогда⁴⁷⁴, ради препитания от глада, умертие многими поплакаша деньми и Моисея: самого послежде весь Израиль есть⁴⁷⁵, сице и сего новый Израиль наш за освобождение его, яко к сим сего народи вси желательне сравниша. И аще выше что подобы чтущим се возмнится ║об. в похваляемых, святым десным бо от сего никое умнение бысть, и кто весть, аще сей не сопричастен сый же от зависти умершим Авелю и прочим?

Таков бо народу всему любезен бе, яко во время обстояния граду, в нуждах их в продолжении, того прихода к ним всех очесем исчезати чаянием его, прелагающем прелыгатаем приход его день дне, но обыкоша убо человецы вси тогда воспоминати спасающаго, егда от бед великих их избавит. И что дивно: их же царь избавити ║253 не возможе, он же се ими и царя самого, яко ис клетцы парящую, изят. И аще сего наветницы не быша ускорили у всех украсти жизнь его, ве́де от слуха, готови независтне бяху о нем в тайнодвижении сердец по числу всех родов родове ко еже поставитися святопомазания рогу на главе его диадимою венчаваему и вручении державна скипетра, негли яко же возлюбленаго Богом Давида внезапу древле кротости ради Самуил повелен облияти воскипевшим ║об. от рога маслом к совершению царьства⁴⁷⁶. И не чюдо! Яко же пророче тогда о взыскании отрока, тако и ныне людий всех подвигшаяся о нем сердца к согласному хотению о нем всех в руце Божии бяху. В местех пишет неких, яко от враг свидетельство вся верно; о сем бо, о нем же зде похвала вписася, и богоборнии латынови, от их же он уст нас исхити и своего рама пращею разгна, – нам тезовернии сказаша, ото онех се слово приемше, иже с ними в содружестве на ны ║254 бывшеи, – яко противнии некогда негде глаголаше им: аще возможно бы, яко да им всеми таковый юноша кральствует достоин, реша, их же от дел познася, самим им зрителем в наставших бывшем сего победному одолению юношескаго на сих наскакания строением ратей. Но саможелатели царствия, иже сего злосроднии сродницы, сами отломишася естественыя маслины, желаннаго ни онем даша, ниже нам того завистне оставиша. Увы! вмале и сами, по Писанию, ║об. «ниизложени быша со престолы» и во власяных худерубищах чюжеверных страну всеродно наследоваша, за далняя пленени, и яко под землю, оплакани прежде будущаго суда, тамо заидоша, зависти своея с прочими зол жатвы рукояти прияша.

Великотаинственая же вся святодействия кафолическия церкве ║255 изрядныя красоты, иже искони по апостолех святых седмостолпными соборы⁴⁷⁷ к Божией славе церкви преданая, бывающая святители всеми непревратно доднесь, во уставная чюдес времена обновляемы, обыкоша преходными бывати леты, – от нечестивых днесь вся упразднишася в нас и не действени всяко быша и престаша, стезя бо их непотлачны. Первое доселе благолепно бысть и велико, страшно же и грозно образование, яко начертанием Божья воплощения ║об. человеческа ради спасения, иже ангелово⁴⁷⁸ от небес ужасное схождение в пещь, им же тричислеными бысть много уготованнаго мучителем пламене во опаление разжения на росопреложение⁴⁷⁹.

Потом – два освященья водам, о них же пребольше иже генваревы луны, в неже свыше нам Тройческое все открыся таинство, иже Самому Богу плотию освятившу водам составы, о Нем же в служении трепеташа Крестителева рука; по сем же августа 1-го тожде действием⁴⁸⁰.

По сих – во святый град на спасеную Христа ║256 Бога страсть яждением вход Его и еже на Тайней Его вечери четвертка странное учеником послужение – от пречистых рук умывание всекрасных ног, благовествующих мир⁴⁸¹; та же всего о нас совершения тайны же и Бога плотию за ны вся ко кресту пригвождение в пяточнем дни седмыя седмицы поста, в онь же святых бываше мощей обмовение⁴⁸². Не яко прежде свободно бе тех преношение от храма в храм чрез стогну града, но сокровене и тайнокрыемо внутри близ сущих празех храмов и немнозем ║об. ступлением между церковных дверей утеснене служимыя сообращахуся в песнех без возношения гласов, о всех бывающу затворену входу.

Сицевым образом источника нашему воскресению, еже живоноснаго Христова Гроба, постановения на уготованнем ему месте и окрест храма обношение тогожде в заутра благословеныя суботы, такожде утаився доньдеже чюжеверным, якоже иногда стражем при Господне страсти, спящим⁴⁸³.

По прочих же – летопровожение и наставшему кругу обновление и потом будущаго ║257 суда назнаменаньми воображение; к сим же округ града во освящение святителево соборне крестоисходное икон обношение, еще же и всегодищно бываемая в неделях посполитое града священноодежных сонмов⁴⁸⁴ соборная совокупления с святоношеньми в матере церквам и отценачалнику вкупное тех к молбам снитие.

Таже и во святыя обители, лавры же и места честная и иже соборных храмов в празницех молебных нареченых дней исхождение, и паче инех нужднее се по древних иже яко на ново богопребывалище и ║об. церкве место святое, идеже самоизволное вселение животворивыя иконы Божия Матере с воплошщимся в ню Божиим Словом чюднаго знамения, иже водружен бе ту от некогда на веки всеградно людий многою и тепле тогда верою, за еже древле от противных нашествия весь град мой преславно тоя образом належащих навет невредно избавися⁴⁸⁵.

Сицевыми же по первых, иже нами глаголаных, и ко еже всего града храмом дней праздничных прилученьми, коегождо святаго имене ║258 дом его, на место, идеже бе, всеградное тогда благословне стечение техжде с народы множествы, иже творимо от древних почести ради празднуемым святым; прикладно звездам бываше сотворяемое зримо в земных служением словесныя твари дароприношение, свещ блистанием во дне просвещаем воздух. непщевах бо, яко и Богу сия в нас бывающая тогда любезне назирающу с высоты; яко же Ноевы с прочими⁴⁸⁶ древле угодне обоневающу Ему жертвы, сице и о нас смиреных милостивно, смотряя ║об. овчеподобное наше вследование усердно в кротости и простоте, не егда согрешихом.

И яко оттуду дозде⁴⁸⁷ предиреченныя вся не отлагаема таковая обыкшая взаконения, но тщанна⁴⁸⁸ творима бываху, ныне же вся в нас умолкоша и не действуемы отнюдь зряху: ово ради инославных мерзости и нечестия, купно же и поврежения ради святынь наруганьми и насмеянья с помизанми, бесчестия же и в конец разорения и в положение опустенья и крайняго оскудения и отнюднаго всех лишения, к сим же и за страх; овы же в нуждных ║259 и святонастольнаго с прочими нерадения и разленения своей слабости, немужества же и бесчеловечества. И в наводимых нетерпеливства извет о всем полагающем варварско насилие нужд, – и вправду, – а о возможных что имуть рещи?

Но по всему яко во озлоблении времене явихомся есмо неудобни к ношению, пророческо от Бога не помышляющем речение, еже «не стерпехом совета Его», еже совеща о нас очищением и в законе Его не изволихом ходити и «забыхом Бога, спасающаго ны»; к тому же и апостолово не помышляющем рекшее: «кто ны разлучит от Божия любви, ║об. скорбь ли, или теснота, гонение, ли раны», и прочая тамо бо речена, но ни мечь, ни самая смерть, ниже живот и во другом: «еда неправеден Бог наносяй гнев?». Но яко гневавшемся нам на Создателя своего, забывшем всех благодеяниих Его и чюдес Его, их же яви нам и претерпе о нас леты многими, богопочтеннаго сыновства делы отвергохомся, любодеищное паче изволихом; аще и словесни сущи, но бессловесных и нечювственых зданий⁴⁸⁹ хужши явихомся. Скот бо не прекословит водящему, ниже вяжущему, яко и до самого заколения сопротивитися не сове́сть; млатобияния же всяка вещь, аще ║260 и тмами зиждай ю во огнь искушения вмещет, обаче зодчаго воли повинуется непрекословне, – обоя же бо к нашему наказанию бываема, мы же о гресех ни мало очищения благодарне приемлем, но сопротивне извет сотворяем се или оно; обыкохом бо в жизни всей не возстязаеми бывати ни от Бога, ниже от человек, но никогда себе творим о своих беззакониих повиннех. Ни ли леть Богу во Своих сотворити? Ве́де, яко сотвореное Сотворшим умучится.║об.

Внезапное же иже стужающих ми належанием их бежание, да не реку отступление, от града сице преславно и чюдно бысть. В 11 день генваревы луны в преподобии дву памятных, Феодосия началника общежительным, и Михаила саллоса⁴⁹¹, иже на Клопске, сугубаго сих празднества, с места, рекомаго Футыня, от иже на кождо день они прихождаху ратью досаждати моему градовному, тогда наставшая ║261 нощ тмы делателей и змиев, ту гнездящихся, яко буря некая, силно ветрена, воздвигшися на ня, от места святаго изрину, и всячески и вскоре быша оттуду разсеяни; тма времене плотную тму отогна. Обстоимыя же, – возвестися им некими оттуду пришедшими, – пребываху замкмени обыкшаго ради тех страха, чающем наутрее тех, яко и прежде, на ся ко граду прихождения, святым тогда на ня ко изриновению их купно молитвами к Богу сподвигшимся невидимым сподвижением, их же «брань не бе к плоти и крови», по апостолу; ║об. Варламу же⁴⁹², в преподобии премногому, яко в сих старейшинствующу⁴⁹³ о изгнании, не терпящу ему во обители его мерзостнаго тех пребывания на долзе, сего должае: сотвориша бо ту студодейнии от прихождения своего до изгнания их множае и двоелуннаго изменения время. Посту бо Христова Рожества начинающу⁴⁹⁴, на место то приход их бе. Яко многомутныя нечистоты воды от скверных мест, на мя собранием истекоша, удобно си таково к присному исхождению избраша место, еже вседневно стужати насилием граду близости ║262 ради умыслиша, правоверных от града восхищающе, яко керасты, и в разселины земные отвлачаху. С ними же быша лжехристияне и отметницы, точию едино кротких имя имуще, сразорители и нечестивым споборницы мнозии нарочитии имены; еще же и два куртеса чином бяху в них⁴⁹⁵, делы же оба – яко с василиском аспида. Вверенная же от царя градоначальства им воинска повергоша, грады своего вручения со изообильствы всеми небрегомы за свою плещу оставиша и яко готовы отверсты разорителем в разхищение повергоша, еже и сотворися: ов ║об. Орешек град, ов же з градом землю Корельскую, ин Ладогу с пределы их⁴⁹⁶; сами же приложишася к сонму царевых враг, многи бо вослед себе и воины соотвлекоша к ним.

Егда же они вси отсюду бегством отторгошася, Божиим гонимы страхом, первое их отзде устремление бе, яко Содомску морю мертву⁴⁹⁷ нечистая⁴⁹⁸ сопримесися вода, еже пребыша они в темномрачное ополчение богоборных латын, иже тогда собравшихся обстоянием же у главы всего царствия, и окружиша объятием, яко велий змий хоботом.

Они же своея прелести покосно время обретше, ║263 внутрь града вшедше, самой матере градом всеродно остригоша главу, в конец до всех изнурив и всяческих доброт обнажив, оставшая же⁴⁹⁹ з домы огню подложиша. Начальный же бе тогда промыслитель затвореным во граде иже по святопервом первый Михаил, яко победе князь; он убо нам тогда Богом поставися страж, яко же ангел Его языку жидовску⁵⁰⁰; о нем же наше и тогда спасение бысть. Вожди же и наставницы быша толику злу предипомянутыя гады два, василиск и аспида⁵⁰¹; еще же сказуют и превзошед сих некий и явися злобою козмик некто ║об. от мельчайших⁵⁰², своеименен, зельством яко и яйцо василисково; с ними же и ины нецыи таемницы, их же всех последний день объявит. По всему бо бяше таково предание их: яко же некогда тройское царствие прелагатае два некая опровергоша⁵⁰³, сице и наше преславное.

Егда же юнорогому Михаилу княжати во обстоянии затвора градовна належащих нужд безстудства стужающих с нами всеми, яко уз неких, ему ║264 свобожьшуся, тогда ко главе градом всего царствия быстрее отсюду он свое шествие протязая, – елики от сущих зде пятичастных пяторец⁵⁰⁴ успеша во время оно собратися воя в скорости слова, – спешне на обстоятеля, иже тамо нападши, дошед, хотя от бед изяти матере град, иже хохлы имущими на главах тогда бяше той обстоим; на тыя же им наятыя еллины сводящи, мня, инем путем отсюду преди себе пустив, в споможение царю на сопротивныя нам тамо быти их увещав, во еже им купно с ним сошедшемся от предипомянутых стужения ║об. свободити град. И егда ему с сими о сем слово утвержшу и варяти им себе повелевшу, абие он от мене исходит с силами всеми, по себе добре управив о граде, владущая в нем оставль. Бе же отсюду исход его 117-го круга лету к седьми тысящам во время весны⁵⁰⁵, маия каланд двадесят пятых, сугубо же бе празднество прилучением: по животворных⁵⁰⁶ Страстех, погребении же и Воскресении самый шастаго четвертка день спасенаго Вознесения⁵⁰⁷, настоящего же по числу дня Предтеча обретение третие главе его⁵⁰⁸. И о нем же бе слово зде, вся во мне чадь тогда ║265 живущая, яко и жены со отроки, во исхождении до вне града и вдале с хлебопровожденьми почтоша и победное тому налагаху имя, яко свободителя его себе от враг нашедших наричюще; первое егова лишения ради отсюднаго удаления, второе же не мала людем всем тогда належаше печаль, и моляху Бога о сем – даровати ему еже царствию в помощь безбеден путь гонити ускорением, яко да ему не пропнут своея сети противни ощутивши отсюду исход его, еже и бысть вмале от попущения⁵⁰⁹ Божия. Многа же и бедна ║об. быша сему с теми по градом сражения, одолеваше бо и одолеваем бываше; о них же, иже тамо бывших, мы зде затворении ясне подробну к сказанию не довлени, потонку же вся сведят с ним же бывшая в прилучшихся⁵¹⁰, нам же и нуждная вписавшем, елика вмале от слуха приемшим. Бываху же ему, иже о нем сказуют, и удержания от супостатных не мала на местех, насилием и коварне всяко забраняюще путь ему, не дающем к преславну месту приближением ему приступити избавы ради, но всячески ему отвсюду вся прележащая ║266 стезя пресецаху. Он же, время обрет, протяжения тех сети вся преторже, свыше приим помощ, устремився, достиг самый град царствия, затворену ту цареви самому с народы от насильных дав свободу. О сих явлене в прочих скажется местех.║об.

Егда убо всем одержателная градом, идеже венченоснии мои присно водворяхуся, конечне тех обезглави за безмерие безгрешное от главы царя и до ногу по вселенней, в того ото обстояний всяцех теснот вкупоименныя латыном и сосожительныя им Литвы страхом смерти и нуждами, яко удавою некоею, вся люди удавиша в ней, по сих обстоянием вся тамо держимыя и самого верха освященнаго ║267 всему росийску жребию Ермогена, глаголю, верховнаго в преподобии главу всесветлую, патриарха православного, мужа апостолаобразного, надо всеми честь крайняя, по Павлу же, носило херувимское плотное и уста, иже добре огненосного ревнителя, – ревностию за Христову веру противлением любви он паче огня разжизаяся, – многовременно не послабляя, противу латыне добльствовавшаго, онем же яко же антихристовех способников, иже от християн в тожде с'ынославными противление претворшемся, – он на сих ║об. крепце храбрствова, языком единем токмо со усты, яко мечем, противныя немилостивне посекая и падати тех без ответы пред ногама си сотворяя; богоотступных же, яко идолов бездушных, возгнушався отвращаяся, не повинувшихся того поучению и наказанию многому, ниже восхотевших благословением, но самоизвольне того удальшемся.

С сим же и первие с первейшим, и синглит весь, иже по чином несчисляемое число различия вся разньствия порога царска, величествия его достойная ║268 и довленая, и числом необъятое люди множество – латыни и соприобщающися им, паче же на всю злолютную злобу тех направляющему по имяном ересиархов Михалка Салтыкова и Федку Андронова⁵¹² и прочая по имяном сих соглаголники и совещатели злу всему, их же имена от дел в своих хартиях беси вписаша, – яве бе по всему яко свету тма сопротивна, сице благочестию нечестие, – новоблагоотступницы преже ласканьми, потом же прещеньми к воли своей неволею привлекоша, во еже к тех повинутию на иже ║об. росийския вся скипетры изветом Жигимонта латыном краля сыну его Владиславу⁵¹³ вдатися. Сие же крестоклятвено обоямо мнети утвердиша и никому же зла безчисленому стаду Христову сотворити обещашеся, последнее злолютство в своем крестопреступлении льсти крыюще, иже по клятве нам всем и везде всяко зло сотвориша.║269

║270 Яко же сущии поселяня, ко оружию ратным мыслию невнятни о положении тех когождо пособства мест, егда воини к брани тыя на себе налагают, токмо на препоясание едино просте взирают, умом же твердо ко оружению не внемлют, како и где на оружеконцех каяждо утварь полагаема бе, непщующе си, якоже прилучися, убо положению тех всяко спроста бывати, а не иже по разуму; но солгашеся несмыслени; не весть бо се тако, но всяко что любо от вещей кождо свою подобу имать, где чему потреба полагатися бе; егда же невеждам самем будет негде прулучения ║об. время в таковыя же им некако облежчися броня, шлем убо на колену налогают, щит же на бедру повешают с прочими орудии нелепотне, понеже не свойствено им сицево дело бе. Сице и самоученое кое же действо всяко, такожде яко же иже писательства слову добре не обученых о положении писаний к начинанию вещи, подобне, увы, и яко же мною творимо днесь последняго неразумия знамения и детем игралище, всячески же купно поношения достойно. Но скудства ради сущих и времене належащих людем нужд от инославных затвора градовна ║271 аще довленых на се по премногу и не удостоися, но веде, яко по нужди вчинися сие.

-----------

Иже земношествий на сусе и по водах паче тщимыя⁵¹⁴ различие мнози многажды в сложении своего им непщеванием смысла, егда от мест жителных в далняя доити спешне нудятся ради ких ими созидания вещей излишества, не коснят на⁵¹⁵ долзе в прочее, ниже о пошествии препускают туне благодати время, но сице и хотят, не возмогают же, с скоростию слова вземшеся, внезапно преплути многу ║об. и неудобьпроходну широты пучину нетребныя ими стези великого моря на иже приемшееся ими в мысли пришествия место. Всегда о таковых, якоже слышим, не напрасным же они устремлением быстрящеся и кроме еже о пути испрашания в водоносила входят, да не скоростию наченше которую от желаемых си погубят доброту; обаче испытне от бывающих известуеми всяко, аще и кормчия на се искусни имут, толик сведущих пути о пристанищах и брегох, устранения ради внезапства бури; ║272 гладости же пути и стропотства иже в водах сокровеных волнами кораблю претыканиих потонку испытуют яже о них, да не от ведения, водам вдавшеся, вельми яко во что, на крилу многих вод носими, в противствох некако постражут зло, аще и не вся по ряду возмогут минути, но да поне от великих сохранени будут; бывает же от прилучшихся тем сретениих всяческих неудобств⁵¹⁶ и на едином за бурнаго пристанища месте много коснети время, ожидающу плавателю⁵¹⁷ к своему от затишия исходу небурношествие ║об. и покосен час. А иже инако и спешне, борзяся без разума, вещь сицеву начинающеи всяко беды подъемлют, корабль убо сокрушают, и вместящая в нем соборне потопляется ими, и едва по редку⁵¹⁸ от всеизгубления спасаются; о недоброначатии же много творят свое раскаяние и окаяннех себе наричют.

Колика же паче сих должно наченшу вещь преити удобь без прилог словес море? Не иже ли убегнути произволения вторых, предъизбирати же и ревновати первых безбедному шествию, ║273 еже по испрашании к пути коробля приличная; сострояти, ветрила убо подобная простирати и гребла со орудии прочими такожде, и егда по чину вся устроятся, тогда благочинно плавание начинати? И якоже корабль по водах пред главою вдается пути, сим и виновное слова свое начало прия, якоже се.

-----------

Егда убо глава венчается, всем удом телесным слава и радость о ней бывает, есть же сему подобие в неких и матерь о чадех веселящуся; смиряет же ся всяко от прегрешений славное, якоже Христова уста в Павле⁵¹⁹ глаголаша: «еда стражет ║об. един уд, сострадуют с ним вси уди»; а иже главнаго начальства чювство кое болезнует, яве прочая части тела причастием по всему готовы суть тому в сострадание.

Се и зде наченшей вине образ, иже великия всеа Росия преславное во благих царствие всех земель его з грады иже приседанием соседством злобожнии язы́цы древлим господ их нань зломыслием ныне все разорително то опровергоша, со обоюдных пришедше стран, иже от северных в Росии градов⁵²⁰, и иже от запада, и от инудь ин. С ними же совокуплено твердою всего студа ║274 любовию сияшася Росийския всеа державы домородныя злотворцы, рабы своих им различных господ; быша они самостечни на зло и всю купно православных землю, усты меча и разновидными муками умучивше, погубиша и лестию всячески ю сокрушиша и всеродно на части развлекоша. Но зде ныне о сем толика; к сему о сем всяка вещь даст время и место кождо в прочее, поскольку о себе во ответ слово, о оном и яже по нем.

Великодержавныи же, яже искони быша своеземная ║об. и особь владычества и самогосподствия, – в них же суть иже и не бывшая верою от двора сего пресильныя агарянска царствия, и за лета многа владыки и самодержавными⁵²¹ нашими беша обладани⁵²², купно же оттогда совокупишася с нами под единовластноправление скипетродержавства благочестия тогожде, токмо они дотуду веры ради и многоземства долготы земля иже и разширением мест бяху от преславнаго царствия нашего отстоимы, абие по Бозе нашими предержатели вся жилища тех измаильтов⁵²³, от нечестия пременьшеся, благочестия же верою яко нов сад Богови насаждени ║275 быша, – и убо от тех обладаемых град к потребе нам⁵²⁴ глаголати нужда от мног о единем, иже иногда и нас предваряя в вере, иже бе существом яко Рим⁵²⁵ другий превеликий и старобытный паче положенаго ему имене богонареченный Новград, иже не человеческа, ниже вещию коею, но от Бога наречения си прият имя, его же от здания под солнцем честно во устах имяху вси концы земныя, на его же от века землю отынудь варварска не сме наступити нога, самодержавных возбраняеми страхом. Увы! Днесь теми, яко в вечно наследие, лжеусвоением ║об. объят быв с пределы всеми, яже о нем, шестолетно же бысть без мала одержим всяко погано туждих руками, яве ими приснодневно попираем и пожираем бываше, се по предивышеписанному образу, аки уд некий своему телеси, сострадуя во всем всего царствия главе, еже преславному во всех градови Москве, яже та многими, ве́де, образы подъя от латын неисповедное зло. Онамо же и зде зловерныя изобретше си предводителе, богоотступники православныя веры, во свое им хотение, могущая всю волю онех исполнити, они бо тем на всяко зло указующе путь⁵²⁶.║276

Чювством же оны предипомянутыя великия оба грады с пределы всеми, яже ми, друг друга между себе бывших им от противных самовкусных ими язв приятием болезни бяху несведни; аще и зело быша злослышны, но кождо тех зельств горесть особь терпением неизвещанно внутрь себе ощущаху. По слову же сих не бе кто исчести за множество и существа злости чювством сказати потонку; но елико возможе мой пустый ум и медленоглагольный язык со усты изрещи, – разве стень тех, неже самыя беды споведати, – уму же ║об. и языку всих спослужи, купно коснодвижная мною трость, в насобных всяко стесняему и от градцкого затвора паче прочих ми бываемых нужд; не чювствена бо образа отвещанием, яко чювством некако, начало вообразися в словесех дольних иже по сих.

-----------

Егда великий восхощет от послушных си заповедания некая кому о больших деяниих положити, не отлагая, обаче же не обрет в прилучшемся месте удобь достойных на та, абие и недостойным вручает таковая, елико по нужди, аще не отложити изволит свое ║277 совещание в мысли, понеже, улишився сущих, и в хужщих довлится всяко, аще не стяжит лучших за настоящее обдержание о всех скудости время, – яко же ныне, еже нами рещися хотяше, иже в предипомянутого града недре иже святонастольнаго ко⁵²⁷ отцем начальника великаго и ту сущим пастыря общаго, его же в соименных бе снеговиден верх, в сточных же тех онамо первствуя он в четырех един, его же зде к нам слово бысть. Внегда убо х концу грядяше время лет, иже от нечестивых нам на долзе ║об. во множестве бед ими деемая вражда⁵²⁸, и аще ожидахом градови сему всичаемыя свободы, еже благочестиваго царя нашего, от бед наших истоваго изятеля и свободителя нам от горкия работы яко фараонитски, боголичнаго царя Михаила⁵²⁹, посланными его на месте некоем совещанием с нечистыми о соглашении мирне⁵³⁰ тогда во един от дни ото освятованного во святилище самоя Божия Премудрости Слова⁵³¹, в час богоспасеныя о мире возношения жертвы, святительнаго Исидора⁵³² слово, яко от Божиих уст, изыде ми ║278 того повеление; его же от места бе, яко изо облака, глас, им же призван и близ к нему приступити повелен есм. Изрече бо ми, преклонся уединене и малогласне, святодейственною си десницею осенив мя крестообразно, и ко еже писаньми начати принуди иже богонаказательных в рустей земли вещей, о нас сотворшихся пред времяны сими, поне малу часть некую от них споведати, елика имут писателеви взыти на память, яже видена и яже слышана быша зде, аще и не зело совершене, за иже бывшем нам всем многодневно купно пленоградным ║об. затвором объятем всяко в нуждах, множае убо за страх, особне же ми от всех за моего недовольство смысла. Он же о сих на мнозе моего отрицания глаголом быти не попусти, аще и ненаучение мое о сих лицу его предлагах, но рече ми: да не убо в продолжении лет глубина нераденья таковая помрачит и от небрежения забвится потреба сицева дела. Прочих же паче тщати ми ся повеле о преславновелицем Новеграде сем, иже понесшем в себе многолетно от еллин нестерпимых язв различья болезней, ║279 от дней последних царей, ли вмале яже пред сими. Аз же преслушания бояхся, повинухся великаго словеси, коснухся обаче поне начатку делу, не убо своей немощи и безсилию притворно надеяся. И о сем кто похвалится, не буди то, но елико Параклит настави, отверзая им уста немых и языки младенцем творяя сыны, и о сих моляся, яко да достовернии, идеже аще явльшеся обрящутся, яко в нас да исправят иже сия.

В последняя убо мира сего мимошедших времен лета, яже по древних ║об. грядущаго века к седми тысящам⁵³³ осмаго⁵³⁴, быша Велеросийска всего скифетра и патриархия самодержавнии и земнообладатели царствующеи на мя, их же зде вмале и имена скажются яве, от них же не о мнозех днесь ради вещи начало вписася краткословне, им же еще самовидцы раби суть в жизни доныне, елико что могут памятствовати о них, якоже се.

-----------

По первых убо господьствова в Русии Божиими новаго Израиля⁵³⁵ людьми иже благочестию твердый рачитель изящен ║280 Иван Всегрозный⁵³⁶, сын великаго князя Василия⁵³⁷, иже временное царствие в конец жизни си един по едином, вторый по первом, иночеством измениша обои. Благодати же соименный во дни своя велицей Росии всей первый царь бысть; от времене приятия пресильных агарянских царств мног по отцы отвсюдный вторособратель всеа руския земля, державных самодержавнее, крепок во бранех и мудроумен зело о всех, во всем роде своем изряден быв премудростию, и в силах могутства яко необорим, к варваром в спротивствах земных непреклонен бывая, и в неправдах ║об. их мститель неумолим, его же имя и страх со славою обоюду в слухи всех язык возгреме даже до восток и запад. Потресением же меча его и прещением нашествия окрестныя его вси ужасаеми бываху врази, Александрови бо, иже Македоном и вселенней царю, той причаствуя в лучших. глаголаху же нецыи, яко прежде времени той, яростнаго ради зельства, от своих раб подъя угашение своея жизни, яко же и чадом его по нем они сотвориша тожде. Смерти же его во странах языческих, яко о празднице светле, много сотворися⁵³⁸ радость, и весело восплескаша ║281 руками; успением бо его наветницы странстии в чаянии брани зело почиша, не туне бо мечь своея десница в гнева ярости своея выспрь на ня возводя, ниже с воздуха тщетно сводя.

И по нем сын его, благожизненый Феодор Ивановичь⁵³⁹, государь всеа Росия, отечества си престол святолепне наследова, истинолюбно бо и достойно царствова незлобием, в кротости Давидове, некроволюбно по всему своя пасяще люди, всю же свою препровожая жизнь к Богу в постех и молитвах выну, день и нощь неусыпне, велик предстатель о мире ║об. и святоцарь бывая. О церковнем же вселепотнем благочинии и украшении священных име желание присно и попечение несытно, мнихолюбец и нищелюбец, многоподатлив зело, и воздержник в подвизе явлен от извну кипящих в нем люблением дел иночества, свыше же багряницы светлостию прикровен, его же дому изволению жития супружество не возбрани, ниже самого царствия высота; неправды бо всякия изимая и огребаяся, по Иову⁵⁴⁰, ниже усты даде безумие Богу, богомолитвена си языка мерскими словесы ║282 во всей жизни своей не оскверни никакоже, но весь всем благочестием купно объят быв и всецел, мнети, Богови предста, яко един от всех первообразное соблюд, и в своея всеа державы дни достояние отечества ненаветно от враг молитвами снабде, свене меча. Не токмо же той людьми, но и над страсми царствова; мню, не убо кто согрешит, аще и в молитвах того призовет.

Своих же вечноотечьных царств, еще в животе сы, весь о людех правления жезл, начало власти Борисови⁵⁴¹ попусти, его же по мале он и престол вселукавне⁵⁴² восхити; в наследие же ║об. благочестивый сей Феодор царь благородныя си отрасли по себе мирови не остави, но все благочестия семя внутрь себе согнете, умертвив, Богови тако и о нас прозревшу в прочее, запечатле бо в конец рода своего существа богоугодныя своея державы благим царствием. Увы, и толик по отцы, яко свеща всемирная нам возженая, ли звезда пресветлая оставшая, в борзости от сего жития угасена богопустно несеньми вражиих прилог ветры, бывшая от благодати светле в роды его царствию вечно возженая! ║283 Тезоименен бо бе он богозрителю Иеремиови⁵⁴³ по имени, иже освященном преже пелен во чреве, произвед во дни своя от царских си чресл дщерь едину, жизнию же непребытну⁵⁴⁴; но обаче и о сея рождении тогда в людех премнога сотворися радость, и яко в наследие место сию вменя любве ради отча, за иже рабския к нему приязни.

Соиме же и самобратнаго си, единоотечна по плоти, двоематерня же по имени и естеству⁵⁴⁵; но злый раб, иже от врага властолюбием⁵⁴⁶ устрелен быв⁵⁴⁷, возрастом устрабити отроку не даде и яко летарасли прозябшей от корения⁵⁴⁸ ║об. благоплодна на высоту тому взыти не попусти иродуубийствено, яко несозрел толик господеск клас, серпом смерти среза⁵⁴⁹; сим убийца издалеча своему хотению предуготовляя путь.

Увы, яко сих двобратных кончиною прерван купно род, по смерти росийских деспод весь благородия корень! По сих же от синглитских чинов срабне на царствия верх возводити начаша, но различне, – ов сице, ов же инако, в них же первый Борис и потом Рострига⁵⁵⁰ и иже по сих, их же бе дерзость по всему безстудна и воцарение⁵⁵¹ странно⁵⁵²; сих ради и земля, не стерпеваема, селико лет ║284 даже доселе о цари смущаема, колебашеся неуставно, о них же подробну на се довлеными в подобных местех скажется ясно, не иже нами.

По сих же некий, иже землею всею не утверженый царь⁵⁵³, росийския мняшеся яко содержа скифетры, не самогосподствено же, обаче и не яко иже его предваршая, обладаем бо бываше, а не обладая за грехи мира, понеже без воли всеа земля не со мноземи, но гордоустым единем неким⁵⁵⁴, могущим же обаче, на се наострен и в скорости без замедления и кроме разсмотренья ║об. спешне на превосходная председ, иже вмале предбывшими его наскакателех не теми же образы малех к себе примилив. Сего ради и возненавиден бысть от людий, им же вся не восхоте земля надолзе царствуема и обладаема быти, но яростною бранью воздвижеся нань, ратью пришедше под самый церствия град, в нем же всеродно своим обстоянием они того затвориша и отъемше и, яко пернатую в клетце. И по всей земли яко огнь ненависти скоро возжеся о нем, и грады многи егова крестопреступна повеления ║285 и отписашася имени и повеления, и начаша по местах многи, яко елико град, студныя и лжеименные возницати цари от мельчайших и безъименных людий, паче же от последних страдническия четы, градцкою в безумие шуме бяху поставляеми чадию земли всей, и законным досаждающе царем; сими всеа земли и развращаху люди, взирающе на иже пред ними бывшая наскакателе.║об.

Сицево в преятие мое самое, спленши мя еллины х крестоклятвеному их утвержению единем неким самописчием извергом же пред малем борзоприятельством трости руки его в хартиях начертаниом вписася, ему же о сих в мале и внезапне часе святительным и синглитиком первым вручение действа припаде повеление, по ему же еллином списанию клятися крепце к моим, согласящимся прежде. Нецы же о сем тождедейственицы, иже властолюбца два⁵⁵⁶, их же имя не от дел жития их познашася, враг моих скории слагатаи и стаинники, взавидевше ║286 начертание то, и, стрывша, отринуша в конец и без вести сотвориша, яко не бывша; истниша е, разсмотревше в нем, яко не бе им во всех таковое написание к полезному при клятве их, но сопротивно все воли их, единем точию нам токмо в належащих нуждах потребно бысть. Они же по своему о мне злоумию то первое самохотне на ино претворше и свое ново другое вместа сего составиша во угождение по всему варваром. И кацем они вещем неискусни суть, сим сия два мои превратницы быша наставницы ║об. и учители и вожди ко всем необыкшим вещем; в них приязнь нелестну своего варваром слугования и теплоту всего злосердия к ним и з душами своими издавшем всю, своего приобретения дельма множае, их же ради и доныне, утвержени без измения и всяко непременяеми, со враги моими купно во всех мною згосподствуют, паче рещи корчемствуют, не возбраняеми; ничим же мнее онем сповелевают, равне во всем и свободне такожде по всему, яко же мои обладатели, во всех, во их же ║287 хотят, никим возбраняеми, на свое им угождение, яко же на некий превелий залог к противным надеявшеся.

Таковое же в самый пленения моего час написание в хартиях вписася к инославных о нас клятвам неким, ему же имя благодати, самописеньми же по чину послужением руки его от беловиднаго и преосвещенна верха и первым по нем на се повелен, его же врази за неугодное им писательство се возненавидевше, за своя плеща завергше, забвением помрачиша е; вместо же сего приразившаяся ║об. шептанием тайнотворца два и аще ко еллином моя глаголю изменшая на первосоставльшаго и сия завистне сподвигшеся. Писательное его, ельма и благословно бе, своим они превращением пременьше, угодное же сотворше по онех хотению все свое угождение ради многих от сих себе тленных благ получения.

Сие же писание за любление х клятве не сбысться⁵⁵⁷ по них, но превратницы мои предателе и скории чюжим примеритилие, оно претворше, к воли их ино другое составиша по себе.║288

До избрания же новоцарения Богом воздвиженнаго в наследие царска от рода в роды государя царя и великого князя Михаила Федоровича всеа Русии и до возвращения от Литвы паки на Русь такожь Богом даннаго онаго управителя, благаго его государева по плоти отца, великого государя святейшего патриарха Филарета Никитича Московского и всеа Русии⁵⁵⁸, тогда бяше такова земля наша по притчама двема, яко вдове нецей, иже по муже остаеме уподобляема⁵⁵⁹ и своеземными ║об. рабы разорительно обладаема и разтакаема и яко по жребиом разделяема, тем бо от Бога смотрительно наказуема, еже и бысть. О ней же подобне и притча сия предложися зде, и другая по той, вправду же обои.

Егда вдова некая уединена, без чад отъинудь, по мужи остает, аще и преславна супружества бывше подруга, егда и мужа имущи человека царя власти всяко и силы же, но безглавен по нем свой имущи дом, и к разорению удобен бе, преисполнен же бысть видимых благ всячески, токмо единаго господина ║289 дому не бяше, а всему бывшу: идеже бо владыце дому не сущу – яко тело недвижимо кроме душа, «аще и многи уды, по Писанию, имать», но «мертво есть без духа». Не име же о себе предиглаголанная она благи помощники, ниже заступителе на обиду ей деющих, прежде бо всех всюду обладаема бяше и разоряема домовозрастными служебне мужеви ея злорабы, якоже суть обыкоша нравы их досаждати своим господем при животе и по смерти паче, егда они госпожу оставшу мужа сира узрят, видят же ю безплодну и безсродну и беспромыслену всяко, не имущу ║об. отвсюду в супружестве рода и соплеменства, презрене же други и соседы и знаемыми; и ниже рабов верных имяше та на послужение си, и сего ради бывшея друзи мужеви ея являются к ней скории добру забытницы. Тогда вся супрузи рабов чина им своего рабского устроения претворяются скоро на непослушныя обычая и законы и своеволное слугование: легающе преже времене рано и заутра воставающе позде, и спят довольно и паче иже до дне озарения; первое начинают к ней в повелеваемых от нея им делех и словесех ║290 едва и косно послушни бывати, таже во всем прекословии; исходящая со властию от госпожа их к ним словеса отвращаемы ими и презираемы⁵⁶⁰, заповеданая же им творити вся недействена оставляющи ея повеления: общерабския же сообращения вся в срабных им во одеждах и в снедных пременяема. И сопротив к госпожи многа сугубая непослушне отвещания бываху им неистовы⁵⁶¹, и во очию ея нелепыя они своя глаголы, яко камение, метают пред лице тоя; уязвляют же сердце ея рабская их со языки уста невежествием многословия ║об. и вменяются той от них яко стрелы пущаемы от лука. О имениях же своих владык и пред лицем госпожа бывают неверии, нерадиви же и небрежливи; стяжаниям их всем своих господ растакатели зли, крадуще и усвояюще и своя руки господскими добротами всяко наполняющеся, и объядающеся и упивающе присно, и пиршества многоззывна возлежащих иродорачительне вседневно сотворяюще радостотворно господску смерть и всеа земля разорение яко празник си светел вменяху. Еще же ║291 и ризами красяхуся, не у еще всемирну плачю днем уставления отшедшим, во всех же несвойственейших им потребах изообилующе; о вданней им и уреченней в повседневную потребу пищи и о отлученней одежди ропотницы являются неблагодарни, вданная им вся охуждаху; в срабных си с равноточными им крамоляхуся, сущая же под ними рукобиением даже до крове ураняху и инако друг друга сокрушаху; дом же своево си владыки от нестроения не огражен и врата дому ║об. день и нощь не затворены имяху, присную пролазу волком и прочим зверем внутрь им творяху.

Своим же они о безгосподстве всегдашнем веселием вяшщую болезнь госпожи день дне различне з досадами приношаху, купно они, рабы, своя своего им общерабского свобождения четыредесятаго дне прихождением распущения си ожидаху; еще же и ины они злотворные же рабы, подобны себе, отвне двора владыческа, странны и госпожею незнаемы некия, в дом ея с собою тех, в пиршества своего им веселия, сопривождаху ║292 купносрастощевати владычняя имения к болшому своея им госпожа безмужному досаждению.

Едино же тоя к тем многотерпеливое безооружне обранение, еже к Богу молитв коленопреклонения з главоударении в частых воздыханиих, Богоматерию о ней теплыя оноя в горести приносим⁵⁶² слезы, прежде же помолив скоропослушную в бедах християном Помошницу мольбами в ходатайство к Нему подвизающи, явеобещную вдовам ото обидящих Заступницу, до Иже егда устрояй ║об. Свое достояние возставит подобно царьствия могущаго добре всю землю управити главу в людех; ускоряет бо милостивно Иже везде сый преклоняти богопослушная своя ушеса к Матере Своея молитвеным Ея о мире словесем, не терпит же болезнию от бед к Нему вопиющих, ниже надолзе прошения Его без болезни. И аще овдовевшая имела бы не точию воздоеное, ельма и младя роженое, ли поне во утробе ей остало бы зачатое, и егда же то усыреное времены своими произшед от чрева, иже мужеск пол, аще бы тогда чаянием о нем ║293 возраста его мати его благопожданне бы того ожидала надеянием: егда устрабится в державе владычески, тогда того поносившей еговым возрастом вся бывшая забвилися⁵⁶³ быша печали; аще ли ни, то уже от сицева их первоглагольнаго корене дозде прозябение бысть и прочее к тому преста.

Но обаче всего Строитель мира Промыслом Своего смотреливна суда не закоснит на мнозе неустроением тацем, еже выше речеся, колебатися о главе толику яко всемирну дому, бывшу премногу всеми; но⁵⁶⁴ воздвиг несведоме, ║об. яко от сокровищ неких, и произвед, якова восхоте, по иже от небытия обыче вся приводити в бытие Своим всесилным Словом, воставив отъинюдь инаго инако, ими же Он судбами весть. Аще и не самый естеством благословна кореня плод, но соплеменным вмале причастием к сущему царску плоду некако прозяб от лозы, яко лист масличен истову винограду усвоением приближен, по друзей крови, паче же благоволением избрания, яко же Исаак обещанием, он довлен в наследие державных, тожде помазан быв ║294 и укреплься тверде, готов бяше по прочих земли устроених виновным обиде мщати: первее злотворным рабом, иже разоршим, неже снабдевшим господоотечества дом, таже на еговая нашедшим врагом. У Владычествующаго всеми испросив с помощию время, купно бо предиреченным сложившемся нань о зле обоим он бо, яко владыка своя изыскати грядый работныя ему вся, нечаянием о нем дремлющих обрет, господска в конец отчаявшемся пришествия, по гласу рекшаго, от них же он всяко расточения ║об. домовна истязательне изыщет и злых зле погубить⁵⁶⁵ может. Иже вместо радостных, о их же они господовосхитителных ими вещех богатя́щеся, пирующе, веселяхуся забытне, по богатаго притчи⁵⁶⁶, и различными саны препоясаны несвойственне, – тогда тех, сего чиновства лишив и санов обнажив, якоже и не имущаго одеяния брачна, иже: по возлежении царь, повелев, от чертога изринет и вечен тем вдаст плачь⁵⁶⁷ и прочая, якоже тогда и самим глаголати к себе, рекущим сице: яко во сне убо доселе питахомся, отныне же истинною мучитися начахом⁵⁶⁸, якоже пишет, иже: «червь их не уснет и огнь⁵⁶⁹ их не угаснет»; псаломник же, о таковых словеса ║295 своя утвержая, сугубит, яко не быти им⁵⁷⁰.

И яко же зде о овдовевшей госпожи вписашася с рабы и прочими вышереченная яко притчею словеса, – не сице ли, по образу овдовевшия, и нашея земля сиротство бе? К ней же не таково ли рабское непослушание з досаженьми о всем и их же со языки о тоя разорении вкупное сложение к запустению, еже убо во очию всех нас и сотворися, и бысть, и еще доднесь бывает, якоже бо огнь еще не купно всюду погасе, но инамо убо угасая, инде же разгараяся воспалаем? И вещественный невещественным ║об. удобь погашает, аще тажде роса днесь и сего погасит пламене, иже от небес древле в пещь халдейску сошедшея⁵⁷¹; но сию росу в таково погашение обыкоша от свыше сводити долу наша многопролитныя воды, врящая из глубины сердец исходных очесы, иже течением быстрящася по ланитома и растворени достойна поста в частых молитвах с теплыми воздыханьми; сия, ве́де, Владыку всех умолити могут иже о сих толик угасити пламень.

И дом аще коего сильножителя, елик ║296 убо не без приклада, довлится плачем единех уставных дней о нем, егда без чад и всекоренно лишаем бывая от жития отшедша своего господа, но обаче и по нем приятелем и другом его, или рабом истинным прилогается другими дни много и незабытен к плачю плачь его ради, паче же егда видят того ризы зримы лежаща оставшая, или ино что, помышляющем в себе оного предбывшее от много лет благое жительство, како во очию их то стяжавый, толико время преходя, добре жизньствова. И потом зрится ими же вдовство ║об. того супружныя безглавное, плачевное же и беспомощное, и облачение в ризы черныя ей же, презрение о всем мужедружнее, безгосподство рабское, истощение сокровищ, добротное стяжаниом развлечение от нестроения и запустения домовнаго и достоянием его, к госпожи непослушание з досажденьми рабское, их же сложение со враги его совещанием на зло о нем, домочадным обида от всех последняя, и всем о всех житие неутешное бысть, иже нерадение рабов отнюдь всяко беспоболенное даже и до небрежения ║297 о вере, и в конец земленое разорением запустение, и прочая вся.

Кольми же паче оного дому приемлется, ли изрещи словом возможет кто о самодержавных державе всей, иже Велеросийскаго царствия, объемшаго в себе благочестие все, его же о благостоянии слава протече во вся конца всемирныя? Несть же часть вселенныя, еже и о безславии его бывшее не уведеся, иже Богом попущением не долзе сотвориша ему врази его многообразно и нестерпимо зло не прикладнаго огорчения пред времяны ║об. сими. И его же бо дому радость сугуба бысть, того и печаль и премнога; и колико нами сокрушение его зрится, толико о нем болезньми серце наше язвится. Сего ради в начале дом плача к царствию самого указанию зде о нем с сущими сположися, не оплачет бо ся, ниже обрыдает и многими леты таковое.

И яко же нерадением драхму царску⁵⁷², даную в наследие мирови, некогда погубихом, за нея же земля смущаема и до ныне трясашеся неуставно, понеже яко второе оскуде князь от Июды⁵⁷³; ║298 но по днех вместо оноя ину новоподобну тоя обретохом, боголичного, глаголю, Михаила, воздвижена Богом по благонравнем царе Феодоре, «зван бо не от человек, ни человеки», по Павлу⁵⁷⁴. Зане и мы прижихом вторую двоицу тако же благородных, сим подобнех, яко же Феодору с сыном древле получиша греки⁵⁷⁵, сице таковы и мы другия, и должни быхом, по притчи, созывати к веселию своя соседы и другиня⁵⁷⁶ с ними о новыя обретении драгмы, о них же мы вси добре паки первое своего жития ныне по малу утвержение начинати приемлем.║об.

Давшаго же ся от Бога нашему царствию во главу людем произведшая его во свет сей родителие сего мира еще путь живота си проходят малжена во образе мнишескаго устроения особ и различне кождо⁵⁷⁷: он в земли чюждых, правды ради стесняем, страдателно леты многими в нуждах с прочими подвижется о всем мире нашем, ова⁵⁷⁸ же во царствии яко второспрестольствует своему ея сынови, о всех купно сповелевая с ним. Вина же заведению отзде тамо оного сицева бысть: егда пред сими ║299 временно пообладани быхом есмо латыны, он в первосвятительне чине всемирно по нужди умолен быв соборне же, прежде произбрания на царство сыновня, сподвигнутися ему с прочими, доити в смежноземных нам латын землю, инославных же верою, ради оттуду испрошания сына господа их нам всем в десподство же⁵⁷⁹. Совет о сем с нами они многими клятвами утвердиша прежде ко еже тому ими датися нам на то некоснено; они же о сем вселукавне обещание свое превратиша, клятвы же си отвергошася, просимаго нами от них дати не восхотеша; просителех же з запленеными во своих удержаша, ║об. с пленники тамо бедно созатвориша и в нуждах, им же воспять к нам оттуду возвратитися⁵⁸⁰ всяко не бе воля. Рождьшая рожшемуся от нею и доныне спреобладает ему от воцарения его; аще и странно бысть образом, но зане яко мати бо.

-----------

Мужественныя же крепости не бе в нас отдавна, яко ни о коем бо смеяхом тайномыслии когда иже многолюднаго бы собрания лик составити к возбранению на неугодно некая Богови и человеком, иже что нововводна и чрез законы бываемо обладателех наших повеления, еже неподобная начинания ║300 их нам мощи возразити бы; сонмоначальником хотящаго составитися на все вселюдскаго собора о сих на ся се непщующем, извну сонма неких чаянием боящихся, да не како совет их ко владущим внезапно удобь прелагатаи⁵⁸¹ в клеветах своих явне изнесут, понеже в велице сонме людий о таемых вещей совета по страсти некако неудержанно бывает слабых и произносно всяко, яко на аер, на страну слово и к державным паче; много же мнози и отвне то ощущают всяко, даже и до сего стаят, яко же и на то снемшемуся всему ║об. разстлитися собору клеветивых претворным языковредием⁵⁸².

Таковое бо за страх невозможное совокупление в нас новообладателе наша, верныя же и нечестивыя, ясно издавна узреша ко еже их пользе и к хотимому удобь веществиесоставлению, яко убо кому ни начала когда о таковых начинаниих нам сположити смети, аще и в мале дружине, неже во мнозе сущеи: яко малое убо совокупление невозможно к спротивству на возбранение, многочисленое же людособрание зело неудержанно к совету. Сице малех советом ║301 суперное не возбранится, во мнозех же, аще и крыемо, не утаится, еже и при нас бываше некогда во временах прешедших в среде самого царствия вселукавнаго обладанья Борисова и Розстригина, и по сих вселением во царство насилования главохохленых, и во стране земля Новоградския от немотующих фриг таковожде.

Толик в нас от слабости страхования несогласного нашего разгласия и небратолюбнаго разстояния вогнездился недуг: яко же град от града отстоим, или места некая многими между себе поприщи разни, тако и мы ║об. друг друзе любовным союзом растояхомся, к себе кождо нас хрепты обращахомся, овии к востоку зрят, овии же к западу. Но сия наша разность многу на ны врагом нашим подаде крепость. Идеже бо присно неразстоятелно единомыслием совокупление, ту неразсторжено бывает тех собрание; таковое бо и нечестивых пределы утвержает крепце, еже и бысть в них доныне, яко же и мы бывающе прежде, дóндеже нас греховная слабость не соодоле. И аще близ любовию братски, елико по Писанию быти достоит, не совокупимся, ║302 врази наши в прочее наветовати нам и одолевати нас не престанут убо; и овцы, при ограде собираеми купно, пожирающими и зверьми растакаеми неудобь, егда во своем снятии неразлучно усердием будут сострадуеми тепле. И аще братско совокупление не богоугодно бы, ниже человекопотребно по всему было бы, то не бы Давид возопил: «что добро и что красно, но еже жити братии вкупе»⁵⁸³; подобне же и апостол: «аще возможно, рече, со всеми мир имейте»⁵⁸⁴; той же паки: «время нам, глаголет, уже от сна востати»; Богослов же⁵⁸⁵ паче всего ║об. любовь утвержает в нас; в них же и первый сим подобне: «довлеет нам, глаголаше, мимошедшее время волю язычну творити»⁵⁸⁶, и ина, якоже благословцы сказаша. Не убо вси язы́цы не искрь себе к себе сами вражду имут бранию, но ко внешним; ниже завидят и ревнуют во своей кривости не сущей си вере, но согласного их своего разноверья; но о прочих землях крамолятся потребах, елико о еже в нас видят, и вси всяко купную зависть на ны подвижют; яко же волцы гладнии, агнцы зряще, алчют, сице они разорити желают в нас ║303 землю нашу и попрати истинную и непорочную веру Христову и нас пожрети. Оно же предиреченное наше разньствие на вкупное сложение нам во всем мире нашем на противные и доныне⁵⁸⁷ добросоставления тверда не имать, понеже неблагословных есмо одолени страхом, в велицех вещех и до малех деяниом сопротивных, а не благим к ним же храбрени словом стати можем, неже делом. Которое же таковое ино к противным и ратующих нас на возбранение довлеет⁵⁸⁸, аще не вкупно наше тезоверных соединение на ны ║об. и единомудреное и всеродное совокупление, яко и прежде? Аще ли они в прочее, не уже к тому живем, но о всекупно погибели земных пред Богом в будущем безответни⁵⁸⁹ обрящемся ответницы; не чюждии земли нашей разоритили, но мы есмы сами той потребители.

-----------

Дозде убо о московстем господствии, яже на нем бывших зол, нашего слышания, иже в плену затвореных, бяше слово, понеже в Новеграде Велицем в тожде междоусобие земное всеградно еллини запленени ║304 быхом⁵⁹⁰, со убегшими же оттуду во иже всего царствия в матере градов угонзнути не возмогохом, Богу хотимое нами не соблаговолящу, потом же, мало препуская время, в протчих градех пребывание⁵⁹¹ наше на уреченных службах царским по Бозе повелениом бысть⁵⁹², – и идеже елико слышахом, толико и писмены вместивше издахом.

О протчих же, яже содеяшася о царствии, иже нань нашедших многообразно богопусных ран, египетцких казней подобою, Иерусалима самого, ║об. иже быша при Тите⁵⁹³, якоже по прочих и о нас сотворися послежде презелно зло, егда росийска владычества корень поколеньства царей прервася и скифетр царствия древняго благородия преторжеся, угашением благия жизни приснопамятнаго и святым сопричаснаго великого государя царя и великого князя Феодора Ивановича всеа Русии богоугодная держава его прекратися, к Царствующему всеми позван⁵⁹⁴ бе и в небеснем со святыми содворятися чертозе Той тому быть благоизволи, – от дел его сице ║305 быти непщевахом, – рода бо своего земное царствие оставль безчадно, святою си смертью запечатле, яко же благодати Предтеча Иоанн всем пророком печать бысть; и содержавны его супруги свенечныя во мнишестве шестолетне воздержателное по всему жития исправление, горлицы чистотою подобное, скорое на небеса к свенечному ея возведение, вкупное тамошняго пребывания вечнаго веселия⁵⁹⁵, и како иже по блаженнем государе царе Феодоре Ивановиче всеа Русии кийждо царь ║об. в мире сим жизнь свою управляше добре или сопротивне, – но ныне, иныя преминув, первое по единому кто подробну рек бы?

Како Василию⁵⁹⁶ цареви на престол царствия возведение, и колеблемое его царевание, и со престола безчестное сведение во иночестем невольне облечении, и в латыниных землю заведение, идеже бе того и скончание, и сожительницы его зде плачевное пребывание надолзе⁵⁹⁷; таже по временах во лжеименнаго образе, иже несвойствено имене царска, приседящей⁵⁹⁸ к нам соседством ║306 Литвы к царствию подшествие⁵⁹⁹, их же бяше отвне града внутрьюду того вселением пребывание много, и тяжественое всеми во царствии обладание главы и до ног, и порабощение наше от главохохленые и слатынныя Литвы; поборательство же во обдержании по благочестии и в доброй ревности благую дерзость и подвизание до смерти второсвятейшего по первем патриарха Ермогена Московского и всеа Русии, еже наскакание его словеси и храбрость на латын, купно же с ними и на богоотступники и богоборцы, ║об. разорителе руския, слагатае и единомысленники с латынники на всяко зло, – кто испишет, их же ради той вскоре хотя от Бога венчан быть, исповедничю тем мзду получая?

Потом же⁶⁰⁰ како, внезапную и неизреченную милость Божию получивше, работы онех избавльшеся малеми останцы людий^601,602, оболкшихся вооружением в тристатную крепость древняго ратоборства, иже о фараоне⁶⁰³, и яко змиев, гнездящихся и сипящих на ны гневом, отвнутрьюду царствия ║307 Божие мановение чрез надежду внезапу всекоренно изрину, человеколюбно же и заступительно паче же, яко от мертвых второе паки оживотворив, сооживлятися повеле и благостройно заповеда в первую лепоту и красоту облещися, яко в ризу, предуготовляя слузе Своему достояние, великому государю царю и великому князю Михаилу Феодоровичю всеа Русии, Давидов глагол во псалме исполняя, идеже речеся: «вознесох избранного от людий Моих»; и яко же Адаму прежде егова сотворенья вся, яже под небесем, ║об. предустрои, сице и нашему владыце и благодателю Михаилу цареви Велеросийское царствие, предварив, вседержавну вручи; такожде и рождьших и, иже предъизбранную православия и благородия двоицу, великих государей, отца, глаголю, и матере, сущих ему по естеству, хотяй купно устроити Бог присного пребывания во своем достоянии неразлучны от сына, воздвиже благочестию любителя и красоту церковную, трисвятейшаго Филарета Никитича, патриарха Московского и всеа великия Росия, по смотрению Божию избраннаго ║308 на святительный превысокий престол⁶⁰⁴ росийску жребию всему в вящее утвержение людем и справу земную; боговосхитно, яко на облаце Владычице, с рабы вмале пренесену бывшу ему во своя от запленения латын, и устрои того Бог сыновии своему сопрестольна: скифетр царствия подтвержает, сирых и беспомощных избавляют бед, отечески сынови о мире собеседуя, и купно соуказуя, и соблаговоляя, и на лучшая соусердствуя, и наставляя, и сподвизая; подвизания же его и страдьбы и многую ║об. ревность, якоже Ильину⁶⁰⁵ о Бозе, в теснотах лютыя скорби, яже посреде латын бывшая, яко между волков, в земли не своей, не убоявся туждих страха и прещения смертна, со мноземи ими един он безооружна, словесы токмо, боряся и препирая благочестия истинною богоборных лжю и соперная их словеса посрамляя, – прочая же его неисписаныя подвиги, яже онамо христоподобно подъя, по числу кто исповесть? Сих ради нетленну си ону мзду на небеси предуготова!

Ему же прежде подвигшуся многолюдно, ║309 умолену сущу землею, с ним же и от чиновств, шедшу тамо по кралевску со своими ему в клятвах обещанию льстивну сопривести с собою к нам оттуду, испросив, сына кралева господствавати нами, – они же убо, преступив клятву, солгаша, испрошателех же всех со святейшим пленообразно во своей земли, различие по градом разведше, осмь лет удержаша всяко в нуждах. Своя же они противницы советы, их же помыслиша, составити не возмогоша, смотрения бо Око быти тому возбрани, ║об. таковы советы разсыпа и в дело нечистиво произыти не попусти; но помазанному на престол, его же избра, боголичному Михаилу цареви такову державу проуготова, о нем же преди пространнее рехом; сим же образом и отца его, государя нашего, первосвятителя великого в патриарсех Филарета Никитича Московского и всеа великия Росия, паствити люди своя воздвиже. Матере же сий царь в велице лавре сущу зде мнихожительну име⁶⁰⁶, о иноких и мирских испрашательницу о всех велику о молимых ║310 к сынови благополучну, ему же и святителеви в богоугодных о мире согласуя; и яко же они, государи, трие во своих неразличны державах, сице и в милостех к рабом единонравне.

Между же первобывшими такожде сотворшееся, яко и прочая вся, иже кралевска сына з главохохлеными множествы второе наступление на землю нашу⁶⁰⁷, наглость их со устремлением к царствию, и приражение к градовным стенам⁶⁰⁸ к приятию их, и паки Божие невидимое нам пособие, видимое же побеждение на ня, и обидимым заступление ║об. и помощь, сопротивным же от царствия отражения и отриновение, и невольное тех невозвратное с срамом от града отступление, и коим образом обоюдных ратей в кроволитиих от браней престатью конец, и посолных о мире утвержение с писаньми на лета⁶⁰⁹, – та вся, яже о царствии быша, иже по градом всей неисчетне чади различны разорения и муки, тогда идеже прилучшися ведцы⁶¹⁰ по местах, самовидны же и слышателе и иже к написанию довлени, подробну да испишут, понеже наши ужи кратки суть глубочайших разумений ║311 к сложению не досяжут, и не вем бывших: кое что было⁶¹¹ коего попреди, ли послежде; и поносно бо есть писателю, не ясно ве́дуще, сущая вещи описывать, извет полагая постиженьми, и бывшая деяньми неиспытне воображати, предняя последи писати, последняя же напреди, ниже подробну.

Сего ради таковая многая и великая, ниже удобь постижная, могущим оставихом навершити, яко да нашея грубости и невежествих недостатки, молюся, своим они кождо изообильством ║об. разума исправят и удобрят испытно и непогрешно, нас же неведения ради бывших, срама, купно же и страха царска, пременят. Мы бо, по притчи, иже⁶¹² во Евангелии⁶¹³ лежимей, в винограде Господа своего не точию от перваго часа подвигшихся и похваляемых чести не сподобихомся, но и умедливших иже от единаго десятаго часа делавших человеколюбнаго дара Владычня улишихомся, деланию время состаревшеся и средовечие недеянне препустихом, егда деланию бяше время, а не отложенью, ни празности, неже ║312 старости; и по друзей притчи в данных сребром прикупа Владыце не сотворихом, благи надежды отпадохом и мзду погубихом⁶¹⁴. И аще речет кто, яко Господеск рабом вписася равен дар обоим, но понеже премилостивое Свое простирая, яко и недостойныя к Себе привлечет, не уже к трудолюбных чести ленивым сравнение мздою сочетанно, но опоздевших всяко явитца замедление укорно.

От Бога же исцеление удобно, к Нему же и возбнути достойно, яко да буди всем получити благодать Его и человеколюбие в бесконечныя веки. Аминь.