Празднование:

История

Ико­на Бо­жи­ей Ма­те­ри «Мле­ко­пи­та­тель­ни­ца» яв­ля­ет­ся од­ним из луч­ших об­раз­цов ви­зан­тий­ской шко­лы и име­ет бо­га­тую ис­то­рию, свя­зан­ную с име­нем свя­то­го Сав­вы Освя­щен­но­го, в Лав­ре ко­то­ро­го близ Иеру­са­ли­ма она пер­во­на­чаль­но и на­хо­ди­лась. Свя­той ос­но­ва­тель Лав­ры при кон­чине сво­ей в 532 го­ду пред­ска­зал бра­тии, что Лав­ру по­се­тит со­имен­ный ему цар­ствен­ный па­лом­ник из Сер­бии Сав­ва, и по­ве­лел пе­ре­дать ему в бла­го­сло­ве­ние чу­до­твор­ную ико­ну. Это и про­изо­шло через шесть сто­ле­тий – в ХIII ве­ке. Свя­ти­тель Сав­ва Серб­ский при­вез об­раз Бо­жи­ей Ма­те­ри «Мле­ко­пи­та­тель­ни­ца» в Хи­лен­дар­ский мо­на­стырь на Свя­той Го­ре Афон и по­ста­вил ее в церк­ви при Ка­рей­ской кел­лии по пра­вую сто­ро­ну ико­но­ста­са – это об­сто­я­тель­ство неволь­но об­ра­ща­ет на се­бя вни­ма­ние, т.к. по пра­вую сто­ро­ну от Цар­ских врат обык­но­вен­но по­ме­ща­ет­ся ико­на Свя­той Тро­и­цы или Спа­си­те­ля. Впо­след­ствии цер­ковь бы­ла на­зва­на Ти­пи­кар­ни­цей, так как там хра­нил­ся устав свя­ти­те­ля Сав­вы.

Наи­бо­лее из­вест­ные чу­до­твор­ные спис­ки ико­ны есть так­же в Рос­сии (Москве и Одес­се), Гре­ции и на Свя­той Зем­ле. Ис­то­рия по­яв­ле­ния этих спис­ков в на­шей стране свя­за­на с име­нем пре­по­доб­но­го Гав­ри­и­ла Афон­ско­го.

В глав­ном при­де­ле мос­ков­ско­го Ело­хов­ско­го Бо­го­яв­лен­ско­го со­бо­ра по­ме­ще­на ико­на Бо­жи­ей Ма­те­ри «Мле­ко­пи­та­тель­ни­ца» со сле­ду­ю­щей над­пи­сью: «Сия свя­тая ико­на на­пи­са­на и освя­ще­на на Свя­той Афон­ской Го­ре в ски­ту свя­то­го про­ро­ка Илии и по­сы­ла­ет­ся в дар и бла­го­сло­ве­ние в цар­ству­ю­щий град Моск­ву в храм Бо­го­яв­ле­ния, что на Ело­хо­вом по­ле. В неза­бвен­ную па­мять 2-ме­сяч­но­го пре­бы­ва­ния в оном хра­ме чу­до­твор­но­го об­ра­за Пре­свя­той Бо­го­ро­ди­цы «Мле­ко­пи­та­тель­ни­ца», при­над­ле­жа­щей вы­ше­ска­зан­но­му ски­ту в быт­ность на­сто­я­те­ля ар­хи­манд­ри­та Гав­ри­и­ла. 1894 год».

В Одес­се спи­сок чу­до­твор­ной ико­ны Бо­жи­ей Ма­те­ри «Мле­ко­пи­та­тель­ни­ца», при­ве­зен­ный пре­по­доб­ным Гав­ри­и­лом Афон­ским, на­хо­дит­ся в Свя­то-Успен­ском муж­ском мо­на­сты­ре.

Есть еще од­на ико­на Пре­свя­той Бо­го­ро­ди­цы «Мле­ко­пи­та­тель­ни­ца». Она бы­ла об­ре­те­на в 1650 го­ду на вы­со­ком де­ре­ве в уро­чи­ще Кре­сто­гор­ске, что в два­дца­ти вер­стах от Мин­ска. На ме­сте ее яв­ле­ния был по­стро­ен храм в честь Успе­ния Бо­жи­ей Ма­те­ри. По­ме­ща­ет­ся об­раз над цар­ски­ми вра­та­ми и по­сред­ством осо­бо­го ме­ха­низ­ма спус­ка­ет­ся вниз для то­го, чтобы бо­го­моль­цы мог­ли к нему при­ло­жить­ся. Оста­лось мно­го пре­да­ний о чу­до­твор­ной си­ле этой ико­ны, она по­мо­га­ла при из­бав­ле­нии от раз­лич­ных бед и неду­гов.

Празд­но­ва­ние об­ра­зу Пре­свя­той Бо­го­ро­ди­цы «Мле­ко­пи­та­тель­ни­цы» уста­нов­ле­но в день па­мя­ти свя­ти­те­ля Сав­вы Серб­ско­го, 12 ян­ва­ря.

Молитвы

Тропарь Пресвятой Богородице пред иконой Ея «Млекопитательница», глас 3

Без се́мене от Боже́ственнаго Ду́ха,/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́/ и Младе́нца млеко́м пита́ла еси́,/ те́мже не преста́й моли́ти // изба́витися от бед душа́м на́шим.

Перевод: Без семени от Божественного Духа по воле Отца зачала ты Сына Божия, от Отца без матери прежде начала времен бывшего, нас же ради без отца по плоти родила Ты и как Младенца молоком питала, потому не переставай молить об избавлении от бед душ наших.

Кондак Пресвятой Богородице пред иконой Ея «Млекопитательница», глас 5

Душ на́ших чу́вствия очи́стивше,/ у́зрим на ико́не та́инство пресла́вное,/ Творца́ Вселе́нной и Го́спода вы́шних сил,/ во объя́тиих держи́ма и от сосцу́ Твое́ю я́ко Младе́нца пита́ема,/ и, со стра́хом и ра́достию покланя́ющеся Тебе́/ и ро́ждшемуся от Тебе́ Спа́су на́шему, воззове́м:// ра́дуйся, Влады́чице, жи́зни на́шея Пита́тельнице.

Перевод: Душ наших восприятие очистив, увидим на иконе таинство невероятное, Творца Вселенной и Господа высших сил, в объятиях Ты держишь и от груди Твоей как Младенца питаешь, и со страхом и радостью поклоняясь Тебе и родившемуся от Тебя Спасителю нашему, воззовем: «Радуйся, Владычица, жизни нашей Питательница».

показать все
 
 
 
 

Молитва Пресвятой Богородице пред иконой Ея «Млекопитательница»

Приими́, Госпоже́ Богороди́тельнице, сле́зная моле́ния рабо́в Твои́х, к Тебе́ притека́ющих. Зрим Тя на святе́й ико́не, на рука́х нося́щую и млеко́м пита́ющую Сы́на Твоего́ и Бо́га на́шего, Го́спода Иису́са Христа́. А́ще и безболе́зненно родила́ еси́ Его́, оба́че ма́терния ско́рби ве́си и не́мощи сыно́в и дще́рей челове́ческих зри́ши. Те́мже те́пле припа́дающе к цельбоно́сному о́бразу Твоему́ и умиле́нно сей лобыза́юще, мо́лим Тя, всеми́лостивая Влады́чице: нас, гре́шных, осужде́нных в боле́знех роди́ти и в печа́лех пита́ти ча́да на́ша, ми́лостивно пощади́ и сострада́тельно заступи́, младе́нцы же на́ша, та́кожде и роди́вшия их, от тя́жкаго неду́га и го́рькия ско́рби изба́ви. Да́руй им здра́вие и благомо́щие, да и пита́емии от си́лы в си́лу возраста́ти бу́дут, и пита́ющия их испо́лнятся ра́достию и утеше́нием, я́ко да и ны́не предста́тельством Твои́м из уст младе́нец и ссу́щих Госпо́дь соверши́т хвалу́ Свою́. О Ма́ти Сы́на Бо́жия! Умилосе́рдися на ма́тери сыно́в челове́ческих и на немощны́я лю́ди Твоя́: постига́ющия нас боле́зни ско́ро исцели́, належа́щия на нас ско́рби и печа́ли утоли́, и не пре́зри слез и воздыха́ний рабо́в Твои́х. Услы́ши нас в день ско́рби пред ико́ною Твое́ю припа́дающих, и в день ра́дости и избавле́ния приими́ благода́рная хвале́ния серде́ц на́ших. Вознеси́ мольбы́ на́ша к престо́лу Сы́на Твоего́ и Бо́га на́шего, да ми́лостив бу́дет ко грехо́м и немоще́м на́шим и проба́вит ми́лость Свою́ ве́дущим и́мя Его́, я́ко да и мы, и ча́да на́ша, просла́вим Тя, милосе́рдую Засту́пницу и ве́рную наде́жду ро́да на́шего, во ве́ки веко́в. Ами́нь.

 
 
 
 

Молитва вторая Пресвятой Богородице пред иконой Ея «Млекопитательница»

О, Пресвята́я Госпоже́ Влады́чице на́ша Богоро́дице, Небе́сная на́ша Цари́це, млеко́м Христа́ Бо́га на́шего пита́вшая, и нас недосто́йных и многогре́шных Твое́ю бога́тою ми́лостию пита́еши. Спаси́ и изба́ви нас гре́шных рабо́в Твои́х от напра́сныя клеветы́, от вся́кия беды́ и напа́сти и внеза́пныя сме́рти. Поми́луй нас в дневны́х часе́х, во у́тренних и вече́рних и во вся́кое вре́мя сохрани́ нас: стоя́щих, сидя́щих соблюди́ и на вся́ких путе́х ходя́щих и в ночны́х часе́х спя́щих покры́й и заступи́. Защити́ нас, Влады́чице Богоро́дице, от всех на́ших враг ви́димых и неви́димых и от вся́каго зла́го обстоя́ния. На вся́ком ме́сте и на вся́кое вре́мя бу́ди нам, Ма́ти Преблага́я, необори́мая стена́ и кре́пкое заступле́ние, всегда́, ны́не и при́сно, и во ве́ки веко́в. Ами́нь.

Каноны и Акафисты

Акафист Пресвятой Богородице пред иконой «Млекопитательница»

Икона Богородицы «Млекопитательница»

Текст акафиста утвержден решением
Священного Синода от 26 декабря 2019 года (журнал № 163).

Кондак 1

Взбра́нной Воево́де, Влады́чице на́шей Богоро́дице, похва́льная пе́ния прино́сим Ти раби́ Твои́ о явле́нии чудотво́рныя ико́ны Твоея́. Ты же, я́ко иму́щая милосе́рдие неизрече́нное, соблюди́ и спаси́ от вся́ких бед рабы́ Твоя́, с ве́рою и любо́вию вопию́щия Ти: Ра́дуйся, Богоро́дице Де́во, ми́лостию Твое́ю при́сно нас пита́ющая.

Икос 1

Арха́нгел Гаврии́л с небесе́ прии́де к Тебе́, Богоро́дице, благовести́ти непостижи́мое рожде́ние от Тебе́ Бо́га Сло́ва, и рече́: ра́дуйся, Благода́тная, Госпо́дь с Тобо́ю. Те́мже и мы, смире́ннии, дерза́ем вопи́ти к Тебе́ си́це:

Ра́дуйся, А́нгелов ра́досте;

ра́дуйся, челове́ков спасе́ние.

Ра́дуйся, па́дшаго ми́ра обновле́ние;

ра́дуйся, средосте́ния вражды́ разруше́ние.

Ра́дуйся, проро́ческих глаго́л исполне́ние;

ра́дуйся, зако́на дре́вняго премене́ние.

Ра́дуйся, А́гнца и Па́стыря во чре́ве Твое́м упа́сшая;

ра́дуйся, Творца́ небесе́ и земли́ пло́тию ро́ждшая.

Ра́дуйся, Пита́теля вселе́нныя млекопита́вшая;

ра́дуйся, млеко́м богопозна́ния ве́рных Пита́тельнице.

Ра́дуйся, пови́вшая Повива́ющаго не́бо о́блаки;

ра́дуйся, дла́ньма нося́щая на Херуви́мех Носи́маго.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 2

Ви́дя Ио́сиф целому́дренный Чи́стую Де́ву непра́здну су́щу, восхоте́ тай пусти́ти Ю́: уве́дев же во чре́ве иму́щу от Ду́ха Свя́та, удиви́ся непостижи́мей та́йне воплоще́ния, и до конца́ ве́рен храни́тель чистоты́ Ея́ пребы́сть; мы же, гре́шнии, сла́вяще е́же о нас Госпо́дне смотре́ние, во умиле́нии серде́ц на́ших благогове́йно покланя́емся Ти, Де́во Чи́стая, вопию́ще Ро́ждшемуся от Тебе́ Бо́гу: Аллилу́иа.

Икос 2

Ра́зум челове́ческий недоразумева́ет пости́гнути ве́лие та́инство воплоще́ния от Тебе́, Пречи́стая, Христа́ Бо́га на́шего, и А́нгели небе́снии недоуме́нно дивя́тся, ка́ко нас ра́ди, челове́к, Влады́ки Христа́ с небесе́ на зе́млю низхожде́ние и от Де́вы воплоще́ние бысть, мы же, земноро́днии, Тебе́ благодаре́ние принося́ще, ра́достно глаго́лем:

Ра́дуйся, пра́ведных Иоаки́ма и А́нны свято́е прозябе́ние;

ра́дуйся, непло́дныя утро́бы плод благослове́нный.

Ра́дуйся, в зача́тии Твое́м чуде́снем просла́вленная;

ра́дуйся, в рожде́нии Твое́м благода́тию Бо́жиею осене́нная.

Ра́дуйся, благове́щение Арха́нгелово во смире́нии ра́достно прие́мшая;

ра́дуйся, де́вство и деторожде́ние пречу́дно в Себе́ сочета́вшая.

Ра́дуйся, Спаси́теля ми́ра нетле́нно ро́ждшая;

ра́дуйся, Де́во Пренепоро́чная и Богоро́дице Пречи́стая.

Ра́дуйся, Бо́га я́ко Отроча́ мла́до па́стырем яви́вшая;

ра́дуйся, Влады́ку, я́ко Пе́рвенца, пра́ведному Симео́ну прине́сшая.

Ра́дуйся, Киво́те Божества́ освяще́нный;

ра́дуйся, Вмести́лище Боже́ственных открове́ний.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 3

Си́ла Вы́шняго осени́ Тя, Мари́е Богоневе́стная, и Дух Святы́й на́йде на Тя по благове́стию Арха́нгелову. Те́мже благода́тию Свята́го Ду́ха осеня́ема, зачала́ еси́ во утро́бе Твое́й и явила́ся еси́ одушевле́нный Киво́т Сло́ва воплоще́ннаго, Ему́же прера́достно вопие́м: Аллилу́иа.

Икос 3

Иму́щи любо́вь к челове́ком, искупле́нным Кро́вию Сы́на Твоего́, Преблага́я Влады́чице, прия́ла еси́ от Бо́га благода́ть покрыва́ти род христиа́нский, ему́же в утеше́ние ико́ну Твою́ сию́ святу́ю, чуде́с благода́тию просла́вленную, ми́лостивно дарова́ла еси́. Те́мже благода́рственно вопие́м Ти:

Ра́дуйся, пресве́тлая звездо́, явля́ющая ми́рови Со́лнце пра́вды;

ра́дуйся, пресла́вная пала́то, в ню́же всели́ся Христо́с.

Ра́дуйся, от всех родо́в ублажа́емая;

ра́дуйся, ве́лие дерзнове́ние к Сы́ну Твоему́ и Бо́гу стяжа́вшая.

Ра́дуйся, вы́ну хода́тайствующая пред Ним за род христиа́нский;

ра́дуйся, при́сно умоля́ющая Его́ за лю́ди согреши́вшия.

Ра́дуйся, ско́рая на́ша Помо́щнице;

ра́дуйся, ми́лостивая на́ша Засту́пнице.

Ра́дуйся, гре́шников ка́ющихся Спору́чнице;

ра́дуйся, су́щих в ско́рбех и напа́стех Изба́вительнице.

Ра́дуйся, тве́рдое на́ше огражде́ние от находя́щих на ны озлобле́ний;

ра́дуйся, непосты́дная на́ша наде́ждо.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 4

Бу́рное мо́ре преплы́в, Са́вва святы́й, Се́рбския Це́ркве первосвяти́тель, за́поведь испо́лнь вели́каго Са́ввы Освяще́ннаго, прия́ благогове́йно чудотво́рную ико́ну Твою́, Млекопита́тельнице, от рук преподо́бных оте́ц Ла́вры его́ и ра́достно возопи́ к носи́мому на рука́х Твои́х Сы́ну Бо́жию: Аллилу́иа.

Икос 4

Слы́шавше и́ноцы Святы́я Горы́ Афо́нския, я́ко честна́я ико́на Твоя́, Богоро́дице, от Иерусали́ма к ним гряде́т, с ра́достию изыдо́ша в сре́тение ея, и узре́вше ю́, рука́ма святи́теля Са́ввы носи́мую, благогове́йно поклони́шася и с весе́лием си́це Тебе́ вопия́ху:

Ра́дуйся, явля́ющая нам ди́вное заступле́ние;

ра́дуйся, сладча́йшее душ на́ших утеше́ние.

Ра́дуйся, Го́ру Афо́нскую благода́тным покро́вом осени́вшая;

ра́дуйся, ико́ны Твоя́ чудотво́рныя в ней умно́жившая.

Ра́дуйся, от Иерусали́ма прише́ствием Твои́м но́вое зна́мение ми́лости Твоея́ нам яви́вшая;

ра́дуйся, ико́ною Твое́ю насе́льников Святы́я Горы́ благода́тно озари́вшая.

Ра́дуйся, стра́нствия на́шего ти́хое прибе́жище;

ра́дуйся, спасе́ния на́шего немо́лчная Хода́таице.

Ра́дуйся, и́ноков прему́драя Учи́тельнице;

ра́дуйся, Свята́го Афо́на Богодарова́нная Влады́чице.

Ра́дуйся, затво́рников сла́дкая Собесе́днице;

ра́дуйся, отше́льников наде́жная Покрови́тельнице.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 5

Боготе́чною звездо́ю води́мии волсви́ достиго́ша хра́мины, в не́йже узре́ша Отроча́ с Мари́ею, Ма́терию Его́, и па́дше поклони́шася Ему́. Сего́ ра́ди и мы, гре́шнии, предстоя́ще честне́й ико́не Твое́й, Богома́ти, я́ко Само́й Ти су́щей с нами и держа́щей на объя́тиих Твои́х Богомладе́нца, со умиле́нием поклоня́емся Ему́, непреста́нно вопию́ще: Аллилу́иа.

Икос 5

Ви́дяще, Влады́чице, святу́ю ико́ну Твою́ с Богомладе́нцем Иису́сом, Его́же, я́ко блаже́нная Ма́ти, от сосцу́ Твое́ю пита́еши, велича́ем ди́вное смотре́ние Его́ о нас, гре́шных, и умиле́нно вопие́м Ти такова́я:

Ра́дуйся, Пода́тельнице духо́вныя ра́дости;

ра́дуйся, А́гнице, ро́ждшая А́гнца Бо́жия, взе́млющаго грехи́ ми́ра.

Ра́дуйся, ле́ствице Иа́ковля, земна́я с небе́сными соедини́вшая;

ра́дуйся, в след Тебе́ де́вы Царю́ приводя́щая.

Ра́дуйся, ско́рбных ма́терей утеше́ние;

ра́дуйся, чад их благода́тное охране́ние.

Ра́дуйся, вдов непреме́нная Засту́пнице;

ра́дуйся, си́рых ско́рая Уте́шительнице.

Ра́дуйся, а́лчущих ще́драя Пита́тельнице;

ра́дуйся, боля́щих неча́емая Цели́тельнице.

Ра́дуйся, заблу́ждших Путеводи́тельнице;

ра́дуйся, ю́ных целому́дрию Наста́внице.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 6

Пропове́дуем ми́лости, явле́нныя Тобо́ю Святе́й Горе́ Афо́нстей, Богома́ти, и о Покро́ве Твое́м всечестне́м при́сно ра́дуемся, ви́дим бо, я́ко и ны́не от ико́ны Твоея́ исцеле́ний мно́жество быва́ет всем ве́рою прося́щим и умиле́нно вопию́щим Бо́гу: Аллилу́иа.

Икос 6

Возсия́ла еси́ луча́ми преди́вных чуде́с Твои́х, Богоро́дице Де́во, от ико́ны Твоея́ святы́я, на не́йже де́вственную ле́поту Твою́ созерца́юще, и рука́ма Твои́ма держи́маго кра́снейшаго па́че сыно́в челове́ческих Богомладе́нца ви́дяще, к славосло́вию Твоему́ подвиза́емся и та́ко глаго́лем:

Ра́дуйся, цве́те де́вства неувяда́емый;

ра́дуйся, ма́терей сла́во и похвало́.

Ра́дуйся, Мирополо́жнице благоуха́ния Христо́ва;

ра́дуйся, алава́стре, на всяк неду́г врачева́ния подаю́щий.

Ра́дуйся, Предста́тельнице у Престо́ла Пресвяты́я и Единосу́щныя Тро́ицы;

ра́дуйся, ста́мно злата́я святы́х святе́йшаго Сло́ва.

Ра́дуйся, преукраше́нный черто́г Царя́ ца́рствующих;

ра́дуйся, Горо́ Свята́я, низхожде́нием Бо́жиим просла́вленная.

Ра́дуйся, Це́ркве Христо́вы сия́ющая ле́пота;

ра́дуйся, всего́ ми́ра удобре́ние.

Ра́дуйся, Небе́сная Цари́це, па́че со́лнца светле́йшая;

ра́дуйся, Влады́чице, от всех чино́в А́нгельских покланя́емая.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 7

Хотя́щим нам, Богороди́тельнице, благогове́йно лобыза́ти чудотво́рный Твой о́браз, не возбрани́, Всеблага́я, грехо́в ра́ди на́ших, но, а́ще и недосто́йных, с любо́вию приими́ и вся проше́ния блага́я на́ша испо́лни; ве́мы бо, Цари́це, я́ко милосе́рдие Твое́ неисче́тно. Сего́ ра́ди с упова́нием неотсту́пным к Тебе́ прибега́ем и, сла́вяще чудеса́ Твоя́, пое́м Бо́гу: Аллилу́иа.

Икос 7

Но́вую ми́лость яви́ла еси́, Богоро́дице, егда́ неисчерпа́емый исто́чник исцеле́ний и благода́тную по́мощь всем с ве́рою притека́ющим ко святе́й ико́не Твое́й дарова́ла еси́. Сего́ ра́ди, благодаря́ще Тя и пречу́дному о́бразу Твоему́ со умиле́нием припа́дающе, хвале́бно зове́м Ти:

Ра́дуйся, от го́рних высо́т всех нас Ма́тернею любо́вию Твое́ю назира́ющая;

ра́дуйся, юдо́ль земну́ю многоско́рбную милосе́рдием Твои́м посеща́ющая.

Ра́дуйся, усе́рдная спасе́ния на́шего Споспе́шнице;

ра́дуйся, ди́вный сосу́д благода́тнаго врачева́ния.

Ра́дуйся, прославля́ющих Тя прославля́ющая;

ра́дуйся, и непочита́ющих ико́ны Твоея́ на покая́ние призыва́ющая.

Ра́дуйся, во дни бра́ни правосла́вным во́ином кре́пость подаю́щая;

ра́дуйся, во дни ми́ра сердца́ ве́рных веселя́щая.

Ра́дуйся, наги́х и безкро́вных при́сно покрыва́ющая;

ра́дуйся, сиро́т и вдови́ц никогда́же оставля́ющая.

Ра́дуйся, хожде́ние хромы́м подаю́щая;

ра́дуйся, о́чи слепы́м отверза́ющая.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 8

Стра́нствие на́ше земно́е многоско́рбное и многомяте́жное услажда́еши, Влады́чице, ико́ною Твое́ю свято́ю, к не́йже притека́юще с ве́рою и любо́вию, упова́ем, я́ко и́мамы Тя на небеси́ Ма́терь и Покрови́тельницу Всеблагу́ю, при́сно споспе́шествующую нам в жи́зни сей и по сме́рти нас не оставля́ющую. О сем ра́дующеся и из глубины́ се́рдца благодаря́ще Тя, вопие́м Бо́гу: Аллилу́иа.

Икос 8

Вси ро́ди христиа́нстии при́сно блажа́т Тя, Богоро́дицу су́щую, и на лик Твой Пречи́стый благогове́йно взира́юще, с ве́рою покланя́ются Тебе́, я́ко Честне́йшей Херуви́м и Сла́внейшей без сравне́ния Серафи́м. Те́мже и мы, гре́шнии, с любо́вию вопие́м Ти:

Ра́дуйся, Цари́це, я́ко пресла́вная глаго́лашася о Тебе́;

ра́дуйся, Влады́чице, я́ко небе́сная и земна́я пе́ти Тебе́ не умолка́ют.

Ра́дуйся, свеще́ неугаси́мая, весь мир сия́нием Твои́м озаря́ющая;

ра́дуйся, благоуха́нный кри́не де́вства и чистоты́.

Ра́дуйся, любве́ и ми́лости исто́чниче живоно́сный;

ра́дуйся, моли́твеннице благоприя́тная за ны гре́шныя ко Христу́ Бо́гу.

Ра́дуйся, гре́шных ко Творцу́ приводя́щая;

ра́дуйся, пра́ведный гнев Его́ на ми́лость прелага́ющая.

Ра́дуйся, Ни́во неора́нная, Клас спаси́тельный ми́ру израсти́вшая;

ра́дуйся, Трапе́зо пресвята́я, живоно́сный Хлеб нам дарова́вшая.

Ра́дуйся, ле́ствице, от тьмы грехо́вныя ко спасе́нию возводя́щая;

ра́дуйся, звездо́ пресве́тлая, путь к небесе́м показу́ющая.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 9

Вся́кая похвала́ не довле́ет сла́ве Твое́й, Богоро́дице Де́во: Ты бо Сы́на от Ду́ха Свята́го зачала́ еси́ и невмести́маго Бо́га во чре́ве вмести́ла еси́; Тобо́ю спасе́ние ми́ра возвеща́ется, па́дший же род челове́чь Пречестны́м Рождество́м Твои́м от ве́чныя сме́рти свобожда́ется. Сего́ ра́ди из глубины́ души́ возсыла́ем Ти благода́рственная хвале́ния и, я́ко изба́вленнии от злых, пое́м Бо́гу: Аллилу́иа.

Икос 9

Вети́и многовеща́нныя не мо́гут пости́гнути ве́лию та́йну Твоего́ присноде́вства, Богоро́дице, ка́ко в рождестве́ и по рождестве́ Де́ва пребыла́ еси́. Мы же, ве́рою правосла́вно велича́юще Тя я́ко Присноде́ву и Ма́терь Предве́чнаго Живота́, прино́сим Ти из глубины́ серде́ц испове́дание на́ше и любо́вию вопие́м Ти:

Ра́дуйся, и́ноков и и́нокинь правосла́вных благо́е наставле́ние;

ра́дуйся, ревну́ющих о чистоте́ и целому́дрии тве́рдое огражде́ние.

Ра́дуйся, де́вственных чино́в свята́я Предводи́тельнице;

ра́дуйся, и бра́ка честна́го защи́то и покро́ве.

Ра́дуйся, в ложесна́х Твои́х Бо́га нете́сно вмести́вшая;

ра́дуйся, Еди́на непоро́чная в жена́х.

Ра́дуйся, нетле́нная и неискусобра́чная А́гнца и Па́стыря Ма́ти;

ра́дуйся, Ма́терним Твои́м к Нему́ дерзнове́нием спасе́ние ми́ру устроя́ющая.

Ра́дуйся, я́ко о Тебе́ ра́дуется а́нгельский собо́р;

ра́дуйся, я́ко о Тебе́ торжеству́ет челове́ческий род.

Ра́дуйся, все́ми доброде́тельми преукраше́нная;

ра́дуйся, от всех христиа́нских родо́в почита́емая и ублажа́емая.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 10

Спасти́ хотя́ мир, Предве́чное Сло́во избра́ Тя, Пречи́стая, и из честны́х крове́й Твои́х истка́ Себе́ плоть, яви́ся на земли́ и спасе́ние ми́ру соде́ла. Те́мже песносло́вим Тя я́ко Всепе́тую Ма́терь Изба́вителя, благода́рственно вопию́ще Ему́: Аллилу́иа.

Икос 10

Сте́ну необори́му и покро́в неруши́м име́ют Тя, Богоро́дице Де́во, во оби́телех и́ноческих подвиза́ющиися и Помо́щницу Держа́вну вси, на Тя по Бо́зе все упова́ние свое́ возлага́ющии, Тебе́ бо даде́ся от Го́спода благода́ть моли́твеннаго заступле́ния, и Ты еси́ ве́рных в де́встве и чистоте́ утвержде́ние. Те́мже и мы, гре́шнии, благооти́шие душе́вное в Тебе́ обрета́юще, усе́рдно взыва́ем:

Ра́дуйся, до́бре подвиза́ющимся Хода́таице блаже́ннаго упокое́ния;

радуйся, и́ноком, на плоть во́инствующим, Пода́тельнице ве́чнаго ра́дования.

Ра́дуйся, безмо́лвствующих благода́тное осене́ние;

ра́дуйся, ста́рцев благогове́йных отра́до и утеше́ние.

Ра́дуйся, ста́риц боголюби́вых кре́посте и утвержде́ние;

ра́дуйся, ю́ношей и дев в де́вственном житии́ заступле́ние.

Радуйся, ма́терей ражда́ющих и млеко́м пита́ющих от бед огражда́ющая;

ра́дуйся, всяк во́зраст ве́рных Ма́терняго благопопече́ния Твоего́ сподобля́ющая.

Ра́дуйся, благочести́вых домо́в покро́ве и благослове́ние;

ра́дуйся, оби́димых и гони́мых гото́вое заступле́ние.

Ра́дуйся, оби́дящих гро́зное обличе́ние;

ра́дуйся, вражду́ющих любвеоби́льное примире́ние.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 11

Пе́ние хвале́бное прино́сим Ти, Христе́ Царю́, в верте́пе ро́ждшемуся и во я́слех возле́гшему спасе́ния на́шего ра́ди. Те́мже в пе́снех велича́ем и Пречи́стую Ма́терь Твою́, Присноде́ву Мари́ю, пред честно́ю ико́ною Ея́ возвеща́юще ми́лости и чудеса́, и́миже обогати́ся вся вселе́нная. Ты же, Всеблага́я, Сама́ научи́ нас вы́ну взыва́ти Бо́гу: Аллилу́иа.

Икос 11

Све́тлыми луча́ми чуде́с Твои́х, Богоро́дице Де́во, мрак грехо́вный отгоня́еши, всех нас на стезю́ спасе́ния наставля́ющи. Те́мже мо́лим Тя, Всеблага́я, приведи́ нас к ти́хому приста́нищу Твоему́, да со умиле́нием прино́сим Ти хвале́бная пе́ния сицева́я:

Ра́дуйся, Пренепоро́чная Влады́чице, Со́лнце Пра́вды ве́рным возсия́вшая;

ра́дуйся, пла́чущим и скорбя́щим небе́сное утеше́ние низпосыла́ющая.

Ра́дуйся, ни́щих и убо́гих бога́тство неоскудева́емое;

ра́дуйся, подви́жников благоче́стия во бра́ни духо́вней укрепле́ние тве́рдое.

Ра́дуйся, предста́тельство к Бо́гу на́ше кре́пкое;

ра́дуйся, в час кончи́ны огражде́ние на́ше необори́мое.

Ра́дуйся, в ра́йских селе́ниих хода́тайством Твои́м нас водворя́ющая;

ра́дуйся, благоче́стно живу́щим Ма́тернее милосе́рдие явля́ющая.

Ра́дуйся, от восто́ка до за́пада непреста́нно сла́вимая;

ра́дуйся, от А́нгел и челове́к в пе́снех ра́достно превозноси́мая.

Ра́дуйся, рук на́ших дела́ исправля́ющая;

ра́дуйся, ско́рби лю́тыя в ра́дость претворя́ющая.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 12

Благода́ть и ми́лость испроси́, Преблагослове́нная Ма́ти, от Сы́на Твоего́, Христа́ Бо́га на́шего, и, воздева́ющи к Нему́ Богоприе́мнеи ру́це Твои́, умоли́ Его́ вся ны спасти́ и изба́вити от ги́бели ве́чныя: мно́го бо мо́жет моли́тва Твоя́ Ма́терняя ко благосе́рдию Влады́ки; те́мже ра́дующеся, пое́м Ро́ждшемуся из Тебе́: Аллилу́иа.

Икос 12

Пою́ще пресла́вная чудеса́ Твоя́, Богоро́дице Де́во, от ико́ны Твоея́ святы́я при́сно явля́емая, велича́ем Тя, возвели́чившую род наш. Ты же, Всеблага́я, освяти́ и спаси́ вопию́щия Ти сицева́я:

Ра́дуйся, Ма́ти, безму́жно Предве́чнаго Сы́на ро́ждшая пло́тию;

ра́дуйся, я́ко Тобо́ю печа́ли на́ша утоля́ются.

Ра́дуйся, живоно́сный ми́лостей исто́чник всем к Тебе́ прибега́ющим;

ра́дуйся, лучеза́рный свети́льниче омраче́нных душ на́ших.

Ра́дуйся, проро́ческая све́тлая похвало́;

ра́дуйся, апо́стольская нетле́нная сла́во.

Ра́дуйся, му́чеников утеше́ние;

ра́дуйся, святи́телей укрепле́ние.

Ра́дуйся, неотсту́пная Храни́тельнице и́ноческих оби́телей;

ра́дуйся, пра́ведных непреста́нное ра́дование.

Ра́дуйся, ми́ра Влады́чице;

ра́дуйся, я́ко Тобо́ю спасе́ние содева́ется.

Ра́дуйся, Богоро́дице Де́во, ми́лостию Твое́ю при́сно нас пита́ющая.

Кондак 13

О, Всепе́тая Ма́ти, Млекопита́тельнице Спа́са на́шего! Услы́ши серде́чная воздыха́ния на́ша, бу́ди те́плая Засту́пница и Моли́твенница за нас пред Сы́ном Твои́м и Бо́гом, о е́же изба́витися нам от грех на́ших, да не пребу́дем вне черто́га Его́, но сподо́бимся со все́ми святы́ми пе́ти Ему́: Аллилу́иа.

Этот кондак читается трижды, затем икос 1-й и кондак 1-й.

Молитва

О, Пресвята́я Влады́чице Богоро́дице, Пречи́стая и Ми́лостивая Млекопита́тельнице! С любо́вию и благогове́нием припа́дающе ко свято́му и чудотво́рному о́бразу Твоему́, на не́мже ви́дяще всех Творца́ и Го́спода, я́ко Младе́нца, пречи́стым млеко́м Твои́м пита́ема, благохвале́ния и поклоне́ние прино́сим Ти гре́шнии и недосто́йнии раби́ Твои́ и сле́зно мо́лим Тя: не оста́ви нас без Твоея́ по́мощи и заступле́ния! Се бо грехми́ и страстьми́ разсла́бленни есмы́ и гла́дом духо́вным погиба́юще, а́лчем и жа́ждем пи́щи небе́сныя. Оскуде́ бо в нас ве́ра, упова́ние благо́е, любо́вь и благоче́стие. Несмы́сленни и младоу́мни есмы́, зане́ при́сно умо́м и дея́нми младе́нствуем, и во́ли Бо́жией не твори́м, ниже́ разуме́ем, что есть благо́е или́ зло́е. Ты же, о Цари́це Небе́сная, Пита́тельница жи́зни на́шея, покро́вом ми́лости Твоея́ покрыва́ющая все́ленную всю, напита́й нас от исто́чника бла́гости Твоея́ млеко́м богопозна́ния, да возраста́ем в стра́се Бо́жии и смиренному́дрии. Ты еси́ ми́ро, излия́нное лю́бящим Тя рабо́м Твои́м, росо́ю моли́тв Твои́х Богома́терних ороси́ нас, да принесе́м Бо́гу плоды́ покая́ния и житие́ нескве́рное. Укрепи́ нас малоду́шных, омраче́нных грехми́ просвети́, воста́ние страсте́й на́ших утоли́, ко спасе́нию ве́чному окорми́, не́мощи естества́ на́шего исцели́ и не оста́ви до конца́ поги́бнути рабы́ Твоя́, Ты бо еси́ еди́на Засту́пница на́ша и Упова́ние, и вси наде́ющиися на Тя не постыдя́тся, я́ко да Твои́ми те́плыми моли́твами в день Стра́шнаго Суда́ Христо́ва изба́вимся бу́дущаго осужде́ния и несконча́емыя му́ки, сподо́бимся же избра́нных ра́дости и весе́лия ве́чнаго, во е́же со все́ми святы́ми воспева́ти Сы́на Твоего́, Христа́ Бо́га на́шего, Ему́же подоба́ет вся́кая сла́ва и благодаре́ние, честь и поклоне́ние со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Канон Пресвятой Богородице пред иконой «Млекопитательница»

Икона Богородицы «Млекопитательница»

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Водою молитв Твоих, Дево, ороси нас к плодоносию духовному и воспламени хладное наше сердце Божественною любовию, да Тебе, Млекопитательнице Питателя нашего, пение хвалебное воспоим достойно, Чистая.

Воды страстных помышлений обуревают нас, Госпоже Всеблагая, но инаго пристанища ко спасению не имамы, токмо Тебе, Всенепорочная, млекопитавшая Спаса душ наших и от иконы Твоея святыя всем дарующая утешение.

Воду непостоянную житейских треволнений прейти безбедно помози нам, Чистая, и от лютых недугов исцеление нам подаждь, Млекопитательнице Святая, и покажи причастники нас быти наследия Небеснаго, Богоневестная.

Воды целебныя источает нам икона Твоя всечестная, Богородице Дево, и страсти многоразличныя исцеляет, и помощь в бедах верным от Тебе подает, да славим чудеса Твоя и поем Тя, благих виновную, воплотившую и доившую Богомладенца Иисуса.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Небесных радование и земных упование еси, Богородице Дево, светлая палато Царя царей, млекопитавшая Его от сосцу Твоею. Того убо моли прилежно с великим Предтечею Иоанном и чудотворцем Николаем спасти и просветити души наша, Едина Всеблагословенная.

Небес превышшая, и землю рождеством Твоим освятившая, и млекопитавшая Зиждителя Твоего, Богоневесто Марие, иконою сладкаго подобия Твоего нас утешаеши и недужным исцеление подаеши, Едина Пречистая.

Небесная Царице, Всемилостивая Владычице, нетленно родившая и доившая святых Святейшее Слово, кую достойную похвалу принесем Ти, недостойнии, аще не Сама Ты научиши нас неосужденно славити Тя и пети Твоя чудеса, Едина Всеблаженная.

Небесное ангельское славословие слышиши, Госпоже, в Сионе Горнем, отонудуже нас, дольних, матерним Твоим оком назираеши и выну молиши за нас Сына Твоего и Бога, да вечнаго избегнем осуждения, Едина Пренепорочная.

Седален, глас 8

Величия Твоя кто исповесть, Богородице? прославлением бо чудотворныя иконы Твоея Млекопитательницы возвеселила еси души православных, многия недуги тою врачующи и от всяких бед избавляющи, иже по Бозе упование на Тя возлагающих, о Владычице Всемилостивая, и нас Твоего заступления не лиши, обитель же нашу от всякаго зла сохрани, да, Тобою хвалящеся, не постыдимся во веки.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Услыши гласы наша хвалебныя, Богородице Преблагая, и наше поклонение приими, пред святою иконою Твоею днесь приносимое: видим бо Тя на иконе, Спаса Христа млекопитающую, и радуемся, грешнии, рождшагося от Тебе Бога славяще.

Услышала еси, Пречистая Владычице, благовещение Архангелово: радуйся, Благодатная, Господь с Тобою, и зачала еси во утробе Твоей предвечнаго Бога, Егоже нетленно рождши, млеком Твоим яко Младенца питала еси во спасение наше.

Услыша первосвятитель Сербский Савва завет великаго во отцех Саввы Освященнаго о святей иконе Твоей Млекопитательнице, Богородице Дево, и прият ю со благоговением, яко залог Твоего благоволения, Преблагая.

Услышаши иноцы Святыя Горы Афонския, яко святая икона Твоя Млекопитательница от Иерусалима к ним приносится, о Мати Слова и Дево, и, радостию славяще и поюще многопетое Твое имя, потекоша во сретение ея.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Просвети нас, грехами потемненных, Владычице, сиянием Божией благодати и сподоби чисто зрети святую Твою икону и на ней чудо чудес благоговейно созерцати, сие есть Творца вселенныя яко Младенца, от сосцу Твоею питаемаго.

Просвещение и спасение на Тя надеющихся, Богородице Дево, облагодати наш помысл достойно славити Тя и пети Твоя чудеса, яже от иконы Твоея, Млекопитательница именуемыя, явила еси и присно являеши во утешение и спасение наше.

Просветивый небо солнцем и земли основание утвердивый Словом Своим, Зиждитель всяческих во утробе Твоей, Пречистая, не тесновместися и от сосцу Твоею яко Младенец питашеся, нам же святую икону Твою источник чудес дарова, Преблагая.

Просветися Божественною благодатию обитель великаго пророка и Боговидца Илии, икону Твою, Богомати Владычице, в наследие себе приемши, сию убо и мы достодолжным поклонением почитаем и Тя, Предстательницу нашу, в песнех немолчно ублажаем.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Молитвы множайшия здесь, пред иконою Владычицы, возносятся, егда сия в православную Россию от Святыя Горы иноками обители Ильинския принесеся, верным во утешение и в радость нескончаемую.

Молитву всяк приносяй Тебе с верою и любовию пред пречистым образом Твоим, Богородице Преблагая, не неуслышан от Тебе отыдет, всем бо вся благая даруеши, яко Бога и Питательнице Питателя вселенныя.

Молитвенно Тя славим, Пречистая Млекопитательнице, и, с любовию припадающе к многоцелебному Твоему образу, сердцем и усты сей целуем, видяще в нем залог благодатный Твоего к нам матерняго благоволения.

Молитися всегда усердно желание подаждь нам, Преблагая Владычице, вся бо можеши яко Мати и Млекопитательница воплотившагося Бога, Егоже милостива нам сотвори всесильным предстательством Твоим и не попусти до конца погибнути рабом Твоим.

Кондак, глас 5

Душ наших чувствия очистивше, узрим на иконе таинство преславное, Творца Вселенныя и Господа вышних сил, во объятиих держима и от сосцу Твоею яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.

Икос

Архангельское целование услышала еси, Приснодево, и в чистоте девственней Бога зачала и Христа безболезненно родила еси, Егоже яко Младенца от сосцу Твоею млеком питала еси, Ангелы и человеки величием Твоих добродетелей удивила еси. Темже ублажаем Тя, истинную Богородицу, возвеличившую наше естество и милосердием неизреченным на род христианский призирающую. Темже умиленно зовем Ти: радуйся, Владычице, Питательнице жизни нашея.

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

От святаго чудотворнаго образа Твоего, Богородице Дево, Млекопитательнице Спаса нашего, струи исцелений истекают и воня животная благоухает, еюже мертвость греховная душ наших потребляется и плодоносие духовное подается зовущим: отцев Боже, благословен еси.

От Иерусалима на Святую Гору Афонскую икона Твоя благодатная, именуемая Млекопитательница, Богомати Владычице, принесеся во изъявление благоволения Твоего к избранному Тобою жребию на земли, егоже насельницы гласы немолчными воспевают Сыну Твоему: отцев Боже, благословен еси.

От глубины зол многих к Тебе припадаем, о Мати, Млекопитательнице Слова и Дево, и молимся прилежно, Твою благодатную помощь нам подаждь и не попусти погибнути нам до конца, но спаси нас десницею Твоею и воздвигни пети всех Творцу: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Царя Небесе и земли воплотила еси, Богородице, от девственных кровей Твоих багряницу плоти Ему исткавши и яко Младенца от сосцу Твоею Того млекопитавши, истиннаго Бога и Человека, хвалимаго и превозносимаго во вся веки.

Царице наша Преблагая и Заступнице, Пресвятая Мати Господа Вышних сил, с ними моли Его прилежно мир мирови даровати, плодоносие земли и всем нам здравие и спасение, да хвалим и превозносим Его во вся веки.

Царство и Господство дарова Тебе, Богородице Марие, Сын Твой и Бог, царствуеши бо с Ним вечно и покрываеши люди, честною Его кровию искупленныя, иже славят многопетое имя Твое и с верою поклоняются чудотворному Твоему образу, Млекопитательнице, хваляще и превозносяще прославльшаго Тя Господа во веки.

Царя Небеснаго безплотныя слуги ужасает, Богородице, тайны Твоея глубина, бесы же смущает Твоя икона, именуемая Млекопитательница, ейже мы кланяемся, чтуще Тя, Божию Матерь.

Песнь 9

Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.

Воистину никтоже, притекаяй к Тебе молитвенно, тощ от Тебе исходит, Пречистая Богородице Дево, всех бо Ты милуеши и ущедряеши, яко любоблагоутробная Мати, Млекопитательнице Спаса нашего, темже, вси роди земнии, благодарно Тя величаем.

Воистину залог благодатный явися святая Твоя и чудотворная икона, Богородице, Млекопитательнице Преблагая, на нюже взирающе, сияние Божиея благодати в души наша невидимо приемлем и по долгу песньми хвалебными Тя величаем.

Воистину щит и покров обители нашей святая икона Твоя дадеся, Преблагая Дево, Млекопитательнице, сию убо с любовию объемлюще, сердцем и усты целуем и Тя, Благодетельницу нашу, непрестанно величаем.

Воистину всех святых вышше еси, Богородице Дево, рождшая Святейшее Слово и млекопитавшая яко Младенца воплощеннаго Бога, нас ради Человека бывша, да избавит падший род человеческий от погибели вечныя. Темже Тя, яко Виновницу спасения нашего, немолчно величаем.

Светилен

Пречистаго образа Твоего явление, Мати Божия, празднуем светло, ибо в нем познаваем знамение Твоего к нам благоволения, Преблагая, покрываеши и спасаеши на Тя уповающия, Богородице Всепетая и Неискусобрачная.

Акафист Пресвятой Богородице пред иконой «Млекопитательница» (2-й)

Икона Богородицы «Млекопитательница»

Кондак 1

Возбрaнной Воеводе Владычице нaшей Богородице, Млекопитaтельнице Спаса нaшего, похвaльное пение приносим мы, недостойнии, о явлeнии чудотворныя иконы Твоея, Всеблагaя; Ты же, яко имyщая милосeрдие неисчeтное, соблюди и спаси от всяких бед рабы Твоя, с верою и любовию вопиющия Ти:

Рaдуйся, Благодатная Богородице Дево, Млекопитaтельнице Спаса дyш нaших.

Икос 1

Архaнгел Гавриил послан бысть к Тебе, Богородице, благовестити нетленное рождение от Тебе Бога Слова, иже и рече Тебе со стрaхом и любовию: «Рaдуйся, Благодатная, Господь с Тобою!», емyже подражaюще и мы, смирeннии, дерзaем вопити к Тебе таковaя:

Рaдуйся, человеков спасeние.

Рaдуйся, пророческих глагол исполнeние.

Рaдуйся, средостение вражды дрeвния разрушившая.

Рaдуйся, вочеловечению единаго от Троицы непорочно послужившая.

Рaдуйся, Творца небесе и земли воплотившая.

Рaдуйся, Питaтеля вселeнныя млекопитaвшая.

Рaдуйся, чудесы божеcтвенными просиявшая.

Радуйся, знамения силою Сына Твоего сотворшая.

Рaдуйся, мира горняго утешeние.

Рaдуйся, мира дольнаго заступлeние.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 2

Видяще Тя на иконе Твоeй святей, Богомати Владычице, Богомладенца Христа на рукaх Твоих держaщую и от сосцу Твоею Его млекопитaющую, умиляемся душaми нaшими и, благоговейно покланяющеся Тебе и рождшемуся от Тебе Господу, рaбски Ему вопиeм: Аллилуиа.

Икос 2

Рaзум человеческий превосходит вeлие тaинство воплощeния от Тебе, Богородице, Единаго от Троицы, Христа Жизнодaвца, Егоже ни Ангели небеcнии постигнути могут; мы же, земнии и пeрстнии, Непостижимому дивящеся и крaйнее снисхождeние Владычне прославляюще, Тебе, Служительнице тaинства и Млекопитaтельнице Жизни нaшея, благоумилeнно глаголем:

Рaдуйся, Иоакима и Анны прозябeние святое.

Рaдуйся, неплодныя утробы плод богодаровaнный.

Рaдуйся, в зачaтии Твоeм чудесы прославлeнная.

Рaдуйся, в рождeнии Твоeм благодатию Божиею осенeнная.

Рaдуйся, в благовещении Твоeм смирeние святое показaвшая.

Рaдуйся, девство и мaтерство пречyдно в Себе сочетaвшая.

Рaдуйся, Спасителя миру нетленно рождшая.

Рaдуйся, яко младенца Его млекопитaвшая.

Рaдуйся, вeлие вселeнныя чyдо.

Рaдуйся, непостижимая разумению тaйно.

Рaдуйся, Божеcтва кивоте освящeнный.

Рaдуйся, Святaя Святых большая.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 3

Сила Вышняго осени Тя, Марие Богоневестная, и Дух Святый нaйде на Тя с благовещением архaнгеловым, емyже смиренномyдренно внeмлющи, зачала еси во утробе Твоeй Предвечнаго Бога и явилася еси палaта преукрашeнная воплотившагося Слова, Емyже, яко Творцу и Создaтелю нaшему, брeнными усты вопиeм: Аллилуиа.

Икос 3

Имyщи любовь вeлию к людем, искуплeнным чеcтною Кровию Сына Твоего и Бога, Владычице Преблагaя, прияла еси от Него влaсть строити и покрывaти род христиaнский, емyже во утешeние и цельбу икону Твою святyю милостиво даровaла еси, чудeс благодатию прослaвленную во вселeнней. О сeм убо благодаряще Тя, яко Благодетельницу нaшу, сице Тебе зовeм:

Рaдуйся, Звездо пресветлая, являющая нaм Солнце прaвды.

Рaдуйся, одеянная в боголепную ризу милоcердия и щедрот.

Рaдуйся, приeмшая влaсть превыше всякия влaсти.

Рaдуйся, получившая вeлие дерзновeние к Сыну Твоему и Богу.

Рaдуйся, выну ходaтайствующая пред Ним за род христиaнский.

Рaдуйся, присно умоляющая Его за людская согрешения.

Рaдуйся, скорая нaша Помощнице.

Рaдуйся, милоcтивая нaша Застyпнице.

Рaдуйся, грешных Спорyчнице.

Рaдуйся, бедствующих Избaвительнице.

Рaдуйся, Отрaдо нaша пресвятaя.

Рaдуйся, Надeждо нaша всеблагaя.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 4

Бyрею недоумения и рaдости одержим, первосвятитель сeрбский Сaвва благоговейно прият чудотворную икону Твою «Млекопитaтельницу», Богородице Дево, от рyк преподобных отцев Великия Лaвры великаго во отцех Сaввы Освящeннаго, по егоже завету икона сия от них ныне ему даровaся, и благодaрно слaвляше сей многопетое имя Твое, зовя рождшемуся от Тебе Христу Богу: Аллилуиа.

Икос 4

Слышавше иноцы Святыя Горы Афонския, яко чудотворная икона Твоя «Млекопитaтельница», Богородице Владычице, от Иерусалима к ним грядeт, с рaдостию и благоговением текоша в сретение ея и, узревше ю, рукaма святителя Сaввы носимую, усeрдно ей покланяхуся и с весeлием духовным сице Тебе вопияху:

Рaдуйся, Рaдосте нaша святaя.

Рaдуйся, Утешительнице нaша благaя.

Рaдуйся, Гору Афонскую в жрeбий Себе избрaвшая.

Рaдуйся, иконы Твоя чудотворныя в нeй умножившая.

Рaдуйся, от Иерусалима утешeние нaм в иконе Твоeй ниспослaвшая.

Рaдуйся, оною обитель Хилендaрскую облагодетельствовавшая.

Рaдуйся, стрaнствия нaшего тихое прибежище.

Рaдуйся, спасeния нaшего небyрное пристaнище.

Рaдуйся, иноков Покровительнице.

Рaдуйся, пустынножителей Посетительнице.

Рaдуйся, отшeльников Собеседнице.

Рaдуйся, затворников Укрепительнице.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 5

Боготeчная звезда икона Твоя святaя, Богомaти Пречиcтая, от Иерусалима на Афон пренесeнная святителем Сaввою, в типикaрнице пустынней от него постaвлена бысть, в нeйже и доныне пребывaет, и исцеления недужным источaет, подвизaющи верных слaвити Тя и пети прослaвльшему Тя Богу: Аллилуиа.

Икос 5

Видяще, Владычице, зде на земли святyю икону Твою, исцелeний струи точaщую, познaем величие и всемогyщество Твое на небеси и к славословию милоcтей и чудeс Твоих возбуждaемся, моляще усeрдно, да, якоже ныне Тя зрим на иконе, тaко да узрим Тя по смeрти в Сионе горнем, мaтерски на нaс взирaющу и милости Твоея не лишaющу, и тaко Тебе да поeм:

Рaдуйся, Сиона горняго первейшее украшeние.

Рaдуйся, живyщих долу благонадeжное заступлeние.

Рaдуйся, дев непорочных присное величaние.

Рaдуйся, матрей детородящих нетрyдное разрешeние.

Рaдуйся, вдов Попечительнице.

Рaдуйся, сирот Окормительнице.

Рaдуйся, нищих призрение.

Рaдуйся, болящих исцелeние.

Рaдуйся, заблyждших Путеводительнице.

Рaдуйся, юных к целомyдрию Настaвнице.

Рaдуйся, немyдрых Вразумительнице.

Рaдуйся, даров благодатных независтная Подaтельнице.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 6

Проповедует милости и чудеса Твоя Свято-Афонская обитель святaго пророка Илии, стяжaвши икону Твою чудотворную, «Млекопитaтельница» именyемую, Богородице Всеблагaя, от неяже исцелeний множество излияся и помощь Твоя благодатная подаeтся всем трeбующим, верно вопиющим Сыну Твоему Христу Богу: Аллилуиа.

Икос 6

Возсияла еси лучaми предивных чудeс, Богородице Дево, от иконы Твоея святыя не токмо в обители Свято-Ильинстей на Афоне, но и на Руси, в нюже пренесeся сия от благоговейнаго инока Игнaтия на благyю потрeбу обители его святыя и множество исцелeний источи недужным, о нихже благодаряще Тя, Целительницу Благyю, хвалeбно Тебе зовeм:

Рaдуйся, от горних высот всех нaс мaтернею любовию Твоeю назирaющая.

Рaдуйся, юдоль земнyю многоскорбную благодеянии Твоими посещaющая.

Рaдуйся, стaрца смирeннаго и безкнижнаго к прославлeнию иконы Твоея святыя избрaвшая.

Рaдуйся, чрез него многия милоcти Твоя людем проявившая.

Рaдуйся, не токмо на Афоне, но и в Руси чудесы икону Твою прослaвльшая.

Рaдуйся, немaло врeмя тaмо иконе Твоeй пребыти благоволившая.

Рaдуйся, в сиротстве от нея обитель Твою не остaвльшая.

Рaдуйся, икону Твою в ню милостивно возвратившая.

Рaдуйся, лицезрением чудотворнаго образа Твоего доныне нaс утешaющая.

Рaдуйся, его святым осенeнием от всяких бед нaс спасaющая.

Рaдуйся, Церкви Христовы сияющая лепото.

Рaдуйся, христиaн правослaвных крепкое уповaние.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 7

Хотящим нaм, Владычице, благоговейно лобызaти чудотворный образ Твой, не возбрани нaм сие грехов рaди нaших, Всеблагaя, но сице и недостойных с любовию приими, и благослови, и вся прошения наша во благо исполни; вемы бо, Царице, милоcердие Твое неисчeтное, и сего рaди со уповaнием благим к Тебе припaдаем и, слaвяще чудеса Твоя, поeм Богу: Аллилуиа.

Икос 7

Дивно прослaвила еси чудесы икону Твою, «Млекопитaтельница» именyемую, Богородице Дево, на нeйже доброту Твою девственную созерцaюще и рукaма Твоима держимаго, краснейшаго пaче сынов человеческих, Богомладенца Иисуса видяще, на славословие Твое подвизаемся и сице Тебе зовeм:

Рaдуйся, девства Цвете Неувядaемый.

Рaдуйся, мaтерей похвало и слaво.

Рaдуйся, мироположнице благоухaния Христова.

Рaдуйся, алавaстре врачевaния, на всяк недyг врачевство содержaй.

Рaдуйся, светоносная палaто святейшаго Слова.

Рaдуйся, преукрашeнная ложнице Царя царeй.

Рaдуйся, горо святaя, снитием Божиим прослaвленная.

Рaдуйся, всезлатaя стaмно мaнны божественныя.

Рaдуйся, клеще тaинственная.

Рaдуйся, купино неопалимая.

Рaдуйся, глубино неудобозримая.

Рaдуйся, Невесто Неневестная.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 8

Стрaнствие нaше земное, многоскорбное и многомятeжное, услаждaеши нaм, Владычице, иконою Твоeю святою, на нюже взирaюще с верою и любовию, уверяемся, яко имамы Тя на небеси Матерь и Покровительницу Всеблагyю, присно готовую помогaти нaм в жизни, в смeрти и по смeрти; о сeм убо рaдующеся и благодаряще Тя из глубины души, вопиeм Создaтелю нaшему: Аллилуиа.

Икос 8

Вeсь мир христиaнский слaвит Преблагоcловeнное имя Твое, Марие Богородице, и всякому верному слaдостно и утешительно есть взирaти на пречиcтую Твою икону, от неяже обыкла еси являти многия милоcти и чудеса бедствующим и болящим человеком. Сего рaди и мы, смирeннии, чудотворному образу Твоему благоговейно покланяемся, Владычице Всеблагaя, и с любовию сице Тебе зовeм:

Рaдуйся, святостию Херувимы превыщaющая.

Радуйся, чистотою Серафимы превосходящая.

Радуйся, яко горняя и дольняя поют рождеству Твоему немолчныя хвалы.

Рaдуйся, яко небо и зeмлю воедино совокyпила еси.

Рaдуйся, кaющихся грешников с Богом примирeние.

Рaдуйся, рaйских двeрей отверзeние.

Рaдуйся, Хлеба, сшeдшаго с небeс, Трапeзо Пресвятaя.

Рaдуйся, ниво неорaнная, Клaс спасительный миру израстившая.

Рaдуйся, лозо благоcловeнная, Грозд святый плодопринeсшая.

Рaдуйся, чaше драгaя, в нeйже нaс рaди уготовася Плоть и Кровь Христова.

Рaдуйся, источниче божеcтвенный, воду жизни нaм источивый.

Радуйся, облаче легкий, имже к нам Сын Божий прииде.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 9

Всяку похвалу превосходит слaва Твоя, Преблагоcловeнная и Препрослaвленная Мaти Господа нaшего, недоумеют и умове безплотнии пети Тя по достоянию, пaче же нaм, земным и перстным, сие неудобно есть; но, любовию Твоeю побеждaеми, дерзaем приносити Тебе смирeнное пение хвалы и благодарения за премногую милоcть Твою к роду человеческому, егоже возлюбила еси и емyже благотворити не престаeши, Всеблагaя, и сим подвизaеши нaс благодaрно пети Богу: Аллилуиа.

Икос 9

Витии суемyдрии человечестии не могут постигнути вeлию тaйну Твоего приснодевства, Богородице: кaко в рождеcтве и по рождеcтве Дева пребыла еси; утаи бо сие Господь от премудрых мира и верою откры смиренным, трепeщущим словeс Его, от нихже правослaвно и несумненно Приснодева быти проповедуешися. Приими убо о сeм и нaше исповедание вседушeвное, о Мати и Дево, и укрепи нaс последовати Тебе непорочным житиeм и сердeчною чиcтотою, да возможем неосуждeнно пети Тебе:

Рaдуйся, святых обителей покрове и снабдение.

Рaдуйся, иноков и инокинь благое вразумлeние.

Рaдуйся, ревнyющим о целомyдрии и чистоте присная Покровительнице.

Рaдуйся, девственных полков святaя Предводительнице.

Рaдуйся, Едина непорочная и добрая в женaх.

Рaдуйся, нетленная и неискусобрaчная Агнца и Пaстыря Мати.

Рaдуйся, о Тебе бо рaдуется Ангельский собор.

Рaдуйся, о Тебе бо торжествyет человеческий род.

Рaдуйся, в ложеснaх Твоих Бога нетесно вместившая.

Рaдуйся, Сего яко младенца млекопитaвшая.

Рaдуйся, обителе прекрaсная Духа Святaго.

Рaдуйся, таиннице Пресвятыя и Единосyщныя Троицы.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 10

Спасительное прибежище в скорбех и бедaх являешися христоименитым людем, Богородице Дево, и иконою Твоeю святою утешeние и помощь нaм подаeши яко Мaти Всеблагaго Бога. Темже поeм чудеса Твоя и слaвим неисчeтную милость Твою к христиaнскому роду, зовyще о Тебе благих Подaтелю Господу: Аллилуиа.

Икос 10

Стена еси девам, Богородице Дево, и иноческим соборам, Тобою хвaлящимся и на Тя по Бозе все уповaние спасeния возлагaющим, икону же Твою святyю благоговейно чествyющим, Тебе бо даровaся от Господа благодать всемирнаго заступлeния и верных в девстве и чистоте утверждeния. Темже иноческаго жития рачителие под мaтерний Твой покров от бyри страстeй прибегaют и благоотишие душeвное обретaют, верно к Тебе взывaюще:

Рaдуйся, преподобных трудов Ходaтаице блажeннаго упокоeния.

Рaдуйся, иноком благоподвизaющимся Подaтельнице вечнаго рaдования.

Рaдуйся, в тaйне Богу работающих тaйное награждeние.

Рaдуйся, юношей и дев к святому девственному житию приведeние.

Рaдуйся, неверных в веру чудесы Твоими обращaющая.

Радуйся, верных благодатными дары ущедряющая.

Рaдуйся, всяк возраст матерняго благопопечeния Твоего сподобляющая.

Радуйся, коемуждо по его потребе вся благоподавающая.

Рaдуйся, благочестивых домов и семeйств благоcловeние.

Рaдуйся, враждyющих любвеoбильное примирeние.

Рaдуйся, обидимых и гонимых присно готовое заступлeние.

Рaдуйся, обидящих всегрозное обличeние.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 11

Пение хвалeбное приносим Ти, Всепетая Владычице, о явлeнии чудотворныя Твоея иконы и светло прaзднуем прaздник Твой всечеcтный, возвещaюще милоcти Твоя и чудеса, имиже обогатися вся вселeнная. Ты же, Всеблагaя, Сама научи нaс благоприятно слaвити Тя, да не явимся пред Тобою безответны и изженeмся от пречистаго лица Твоего яко недостойнии, но да прослaвим Тя с достойными, зовyще Богу: Аллилуиа.

Икос 11

Светлыми лучaми чудeс Твоих, Богородице Владычице, благодатно озаряеши мрaк греховный, нaс обдержaщий, и на стезю спасeния приводиши блуждaющих в дeбрех страстeй. Молим убо Тя, Всеблагaя: приведи нaс к тихому пристaнищу благочестиваго и богоугоднаго жития, да в мире глубоце принесeм Ти песни таковыя:

Рaдуйся, величием чудeс Твоих превосходящая рaзум человеческий.

Рaдуйся, сиянием слaвы Твоея удивляющая умы Ангельския.

Рaдуйся, низлагaющая бесов и всю их тeмную силу.

Рaдуйся, подвижников благочeстия укрепляющая в брaни духовней со враги невидимыми.

Рaдуйся, в чaс кончины помогaющая любовь и веру к Тебе имyщим.

Рaдуйся, на мытарствах воздyшных заступaющая Тя слaвящих.

Рaдуйся, Судии Прaведнаго известное умолeние.

Рaдуйся, стяжaвшая к Нему матернее дерзновeние.

Рaдуйся, при Кресте Сына Твоего всех нaс усыновившая.

Рaдуйся, благочeстно верующим в Него Мaти по благодати явльшаяся.

Рaдуйся, от востока и до зaпада непрестaнно слaвимая.

Рaдуйся, от Ангел и человек превозносимая.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 12

Благодать и милоcть испроси нaм, Всеблагоcловeнная Владычице, у Сына Твоего Христа Бога и, простeрши к Нему богоприемныя рyце Твои, умоли Его вся ны спасти и избaвити от погибели вечныя: много бо может молитва Твоя матерняя ко благосeрдию Владыки и ничтоже невозможно всесильному пред Ним ходaтайству Твоему, о нeмже рaдующеся, поeм Триединому Богу: Аллилуиа.

Икос 12

Поюще преславная чудеса Твоя, Богородице Дево, от иконы Твоея святыя явленная и присно являемая, хвaлим, слaвим и величaем Тя, возвеличившую род нaш непорочною Твою чистотою. Ты же, Всеблагaя, освяти и спаси слaвящия Тя и сподоби нaс причaстники быти слaвы небeсныя, да рaдостно Тебе взывaем:

Рaдуйся, голубице кроткая и незлобивая.

Рaдуйся, Мати чадолюбивая.

Рaдуйся, Агнице, Агнца Божия во чрeве Твоeм упaсшая.

Рaдуйся, от сосцу Твоею Его млекопитaвшая.

Рaдуйся, пророческая светлая похвало.

Рaдуйся, апостольская нетленная слaво.

Рaдуйся, мучеников укреплeние.

Рaдуйся, святителей утешeние.

Рaдуйся, преподобных пречеcтный венче.

Рaдуйся, праведных непрестающее удивлeние.

Рaдуйся, всех святых присное рaдование.

Рaдуйся, христиaн непостыдное прибежище.

Рaдуйся, Благодатная Богородице Дево, Млекопитaтельнице Спаса дyш нaших.

Кондак 13

О Всепетая Мaти и Млекопитaтельнице Святых Святейшаго Слова! Нынешнее нaше приeмши хвалeбное пение, пред святою Твоeю иконою днeсь приносимое, от всякия свободи мyки всех верно Тя слaвящих и вопиющих Сыну Твоему, Христу Богу: Аллилуиа.

(Этот кондак читается трижды, затем икос 1 и кондак 1)

Молитва

Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе, на руках носящую и млеком питающую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему и умиленно сей лобызающе, молим Тя, Всемилостивая Владычице: нас, грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их от тяжкаго недуга и горькия скорби избави. Даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою. О Мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли, и не презри слез и воздыханий рабов Твоих. Услыши нас в день скорби пред иконою Твоею припадающих, и в день радости и избавления приими благодарная хваления сердец наших. Вознеси мольбы наша к престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша прославим Тя, милосердую Заступницу и верную Надежду рода нашего, во веки веков. Аминь.

Случайный тест