См. также ВЕРА
- Молитва ко Господу
- Пред иконой Божией Матери «Умягчение злых сердец»
- Пред иконой Божией Матери «Взыскание погибших»
- Первоверховным Апостолам Петру и Павлу
- Святителю Тихону, патриарху Московскому
- Священномученику Ермогену, патриарху Московскому
- Святителю Спиридону Тримифунтскому
- Святым новомученикам и исповедникам Российским
Молитва ко Господу
Господи, обрати к Тебе сердца врагов наших, если же невозможно ожесточенным обратиться, то положи преграду зла их и защити от них избранных Твоих. Аминь.
«Золотой святыни свет…»: Воспоминания матушки Надежды — последней монахини Марфо-Мариинской Обители Милосердия / Авт.-сост. Неволина Елена Владимировна. — Москва: Сибирская Благозвонница, 2004.
* * *
Молитва пред иконой Божией Матери «Умягчение злых сердец»
О, многострада́льная Ма́ти Бо́жия, Превы́сшая все́х дще́рей земли́, по чистоте́ Свое́й и по мно́жеству страда́ний, Тобо́ю на земли́ перенесе́нных! Приими́ многоболе́зненныя воздыха́ния на́ша и сохрани́ на́с под кро́вом Твоея́ ми́лости. Ино́го бо прибе́жища и те́плаго предста́тельства, ра́зве Тебе́, не ве́мы, но, я́ко дерзнове́ние иму́щи ко И́же из Тебе́ Рожде́нному, помози́ и спаси́ ны́ моли́твами Твои́ми, да непреткнове́нно дости́гнем Ца́рствия Небе́снаго, иде́же со все́ми святы́ми бу́дем воспева́ти в Тро́ице Еди́наго Бо́га всегда, ны́не и при́сно, и во ве́ки веко́в. Ами́нь.
Православный молитвослов с приложением молитв Пресвятой Богородице и святым угодникам Божиим. — М.: Изд-во МП, 2018. — 816 с.
* * *
Молитва пред иконой Божией Матери «Взыскание погибших»
Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший; вонми́ гла́су моле́ния моего́, и вопль мой и стена́ние услы́ши. Я́ко беззако́ния моя́ превзыдо́ша главу́ мою́, и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдная Влады́чице, не пре́зри мене́, отча́яннаго и во гресе́х погиба́ющаго; поми́луй мя, ка́ющагося в злых де́лех мои́х, и обрати́ на путь пра́вый заблу́дшую окая́нную ду́шу мою́. На Тебе́, Влады́чице моя́, Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м, ны́не и при́сно и во ве́ки веко́в. Ами́нь.
Акафист Пресвятой Богородице пред иконой «Взыскание погибших»
* * *
Первоверховным Апостолам Петру и Павлу
О пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите чад ва́ших моли́твы и воздыха́ния, се́рдцем сокруше́нным ны́не приноси́мыя. Се бо беззако́ньми омрачи́хомся и того́ ра́ди беда́ми, я́коже ту́чами, обложи́хомся, еле́я же до́браго жития́ обнища́хом зело́. О си́льнии! Понеси́те не́мощи на́ша, не отлуча́йтеся ду́хом от нас, да не разлучи́мся вконе́ц от любве́ Бо́жия, но кре́пким заступле́нием ва́шим нас защити́те, да поми́лует Госпо́дь всех нас моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же че́сть, и сла́ва, и благодаре́ние, и поклонение во веки веко́в. Ами́нь.
* * *
Святителю Тихону, патриарху Московскому
О, па́стырю наш до́брый, святы́й вели́кий Патриа́рше Ти́хоне! я́ко град го́рний ты яви́лся еси́, до́брая дела́ твоя́ и доны́не све́тятся пред челове́ки. Ве́мы, я́ко ты, предстоя́ Престо́лу Пресвяты́я Тро́ицы, ве́лие и́маши дерзнове́ние в моли́твах пред Го́сподем. Воззри́ и ны́не на нас гре́шных и недосто́йных чад твои́х, к тебе́ бо я́ко иму́щему ве́лие дерзнове́ние пред Творце́м вся́ческих, ны́не припа́даем и усе́рдно мо́лимся: умоли́ Го́спода, да пода́ст нам реши́мость стяжа́ти благоче́стие отце́в на́ших, его́же ты стяжа́л еси́ от ю́ности твоея́. Ты в житии́ свое́м ре́вностный защи́титель и храни́тель и́стинныя ве́ры был еси́, помози́ и нам незы́блему соблюсти́ ве́ру правосла́вную. Ти́хая бо душа́ твоя́ зело́ преуспе́ла в Боже́ственном смиренному́дрии: научи́ и нас ра́зум наш пита́ти не многомяте́жною му́дростию челове́ческою, но смире́нным позна́нием во́ли Бо́жией. Ты пред лице́м лю́тых враго́в Христо́вых и́стиннаго Бо́га дерзнове́нно испове́дал еси́: моли́твою свое́ю укрепи́ нас, малоду́шных, да и мы всегда́ и всю́ду противоста́нем ду́ху безбо́жия и льсти. Ей, уго́дниче Бо́жий, не пре́зри нас, моля́щихся тебе́ (имена), и́бо не то́кмо от бед и скорбе́й избавле́ние про́сим, но си́лы и тве́рдости, великоду́шия и любве́ про́сим, да́бы претерпева́ти о́ныя напа́сти, возстаю́щия на ны. Испроси́ нам неосла́бное терпе́ние да́же до конца́ жития́ на́шего, мир с Го́сподом и грехо́в отпуще́ние. О́тче святы́й! Укроти́ в стране́ на́шей ве́тры неве́рия и сму́ты, да водвори́т Госпо́дь на земли́ Росси́йстей тишину́ и благоче́стие и любо́вь нелицеме́рную: моли́твами твои́ми да сохрани́т ю́ от междоусо́бныя бра́ни, да укрепи́т святу́ю Це́рковь на́шу Правосла́вную: да не оскуде́ет она́ и́стинными па́стырьми, до́брыми де́лательми, пра́во пра́вящими сло́во ева́нгельской и́стины; упаси́ и заблу́ждшия о́вцы ста́да Христо́ва. Наипа́че же моли́ Го́спода сил, да возроди́тся Ру́сская земля́ святы́м покая́нием и еди́ным се́рдцем и еди́ными усты́ просла́вит ди́внаго во святы́х Свои́х Бо́га в Тро́ице сла́вимаго Отца́, и Сы́на, и Свята́го Ду́ха, во ве́ки веко́в. Ами́нь.
Минея дополнительная. 26.09 Святи́теля Ти́хона, Патриа́рха Моско́вскаго и всея́ Руси́
* * *
Священномученику Ермогену, патриарху Московскому
О, вели́кий уго́дниче Христо́в, святи́телю о́тче наш Ермоге́не! К тебе́, моли́твеннику те́плому и предста́телю пред Бо́гом непосты́дному, усе́рдно притека́ем, в ну́ждах и ско́рбех на́ших утеше́ния и по́мощи прося́ще. В дре́внюю годи́ну искуше́ний, внегда́ обыше́дше обыдо́ша страну́ на́шу нечести́вии врази́. Госпо́дь яви́ тя Це́ркви Свое́й столпа́ непоколеби́ма и лю́дем росси́йским па́стыря до́бра, ду́шу свою́ за о́вцы положи́вша и лю́тыя во́лки дале́че отгна́вша. Ны́не у́бо при́зри и на ны, недосто́йная ча́да твоя́ (имена), умиле́нною душе́ю и сокруше́нным се́рдцем тебе́ призыва́ющая. Кре́пость бо на́ша в нас оскуде́, и вра́жия ловле́ния и се́ти обыдо́ша нас. Помози́ нам, засту́пниче наш! Утверди́ нас в ве́ре святе́й: научи́ нас всегда́ твори́ти за́поведи Бо́жия и вся преда́ния церко́вная, от отец нам запове́данная. Па́стырем на́шим бу́ди архипа́стырь, во́ином вождь духо́вный, боля́щим врач, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и за вся те́плый моли́твенник; я́ко да моли́твами твои́ми огражда́еми, непреста́нно воспое́м и просла́вим всесвято́е и́мя Живонача́льныя Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.
Акафист священномученику Ермогену, патриарху Московскому и всея России, чудотворцу
* * *
Святителю Спиридону Тримифунтскому
О, всеблаже́нне святи́телю Спиридо́не, вели́кий уго́дниче Христо́в и пресла́вный чудотво́рче! Предстоя́й на Небеси́ Престо́лу Бо́жию с ли́ки А́нгел, при́зри ми́лостивым о́ком на предстоя́щия зде лю́ди (имена) и прося́щия си́льныя твоея́ по́мощи. Умоли́ благоутро́бие Человеколю́бца Бо́га, да не осу́дит нас по беззако́ниим на́шим, но да сотвори́т с на́ми по ми́лости Свое́й! Испроси́ нам у Христа́ и Бо́га на́шего ми́рное и безмяте́жное житие́, здра́вие душе́вное и теле́сное, земли́ благопло́дие и во всем вся́кое изоби́лие и благоде́нствие, и да не во зло обрати́м блага́я, да́руемая нам от ще́драго Бо́га, но во сла́ву Его́ и в прославле́ние твоего́ заступле́ния! Изба́ви всех ве́рою несумне́нною к Бо́гу приходя́щих от вся́ких бед душе́вных и теле́сных, от всех томле́ний и диа́вольских наве́тов! Бу́ди печа́льным уте́шитель, неду́гующим врач, в напа́стех помо́щник, наги́м покрови́тель, вдови́цам засту́пник, си́рым защи́тник, младе́нцем пита́тель, ста́рым укрепи́тель, стра́нствующим путево́ждь, пла́вающим ко́рмчий и исхода́тайствуй всем кре́пкия по́мощи твоея́ тре́бующим вся, я́же ко спасе́нию, поле́зная! Я́ко да твои́ми моли́твами наставля́еми и соблюда́еми, дости́гнем в ве́чный поко́й и ку́пно с тобо́ю просла́вим Бо́га, в Тро́ице Святе́й сла́вимаго, Отца́ и Сы́на и Свята́го Ду́ха, ны́не, и при́сно и во ве́ки веко́в. Ами́нь.
Канонник. Канон святителю Спиридону, чудотворцу, епископу Тримифунтскому
* * *
Святым новомученикам и исповедникам Российским
О святи́и новому́ченицы и испове́дницы Росси́йстии: / святи́телие и па́стырие Це́ркве Христо́вы, / ца́рственнии страстоте́рпцы, / благове́рнии кня́зие и княги́ни, / до́блии во́ини, мона́си и мирсти́и, / благочести́вии му́жие и жены́, / во вся́цем во́зрасте и сосло́вии за Христа́ пострада́вшии, / ве́рность Ему́ да́же до сме́рти свиде́тельствовавшии / и вене́ц жи́зни от Него́ прия́вшии! / Вы во дни гоне́ния лю́таго, / зе́млю на́шу от безбо́жных пости́гшаго, / на суди́щах, в заточе́ниих и про́пастех земны́х, / в го́рьких рабо́тах и вся́ких ско́рбных обстоя́ниих / о́браз терпе́ния и непосты́днаго упова́ния му́жественне яви́ли есте́. / Ны́не же, в раи́ сла́дости наслажда́ющеся, / пред Престо́лом Бо́жиим во сла́ве предстои́те / и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите. / Сего́ ра́ди мы, недосто́йнии, / мо́лим вас, святи́и сро́дницы на́ши: / не забу́дите земна́го оте́чества ва́шего, / грехо́м Ка́инова братоуби́йства, / поруга́нием святы́нь, безбо́жием и на́шими беззако́нии отягче́ннаго. / Умоли́те Го́спода Сил, / да утверди́т Це́рковь Свою́ непоколеби́му в ми́ре сем многомяте́жнем и лука́вом; / да возроди́т в земли́ на́шей дух ра́зума и благоче́стия, дух свя́тости и стра́ха Бо́жия, дух братолю́бия и ми́ра; / да па́ки бу́дем мы ца́рское свяще́ние, / род Бо́жий, избра́нный и святы́й, / при́сно с ва́ми сла́вящий Отца́ и Сы́на и Свята́го Ду́ха во ве́ки веко́в. Ами́нь.
Минея дополнительная. Собо́р Новому́чеников и испове́дников Росси́йских
Комментировать