Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Преподобнии отцы наши Зосимо и Савватие, молите Бога о нас.
Просвещением Трисолнечнаго Божества, озарившеся, премудрии, светила явистеся осиявающа всюду: тем и нас темностию страстей омраченных, просвещением благодати озарити помолитеся, и душам получити спасения.
Преподобнии отцы наши Зосимо и Савватие, молите Бога о нас.
Светом Божественныя благодати просвещаеми, Зосимо и Савватие преблаженнии, верно светоносную вашу память торжествующих, просветите, и от тьмы греховныя, молитвами своими, преподобнии, избавите.
Слава: Духу Святому храм премудрии бысте, и к Нему все духовное желание обратисте, и сего ради кротких землю наследовасте: душевную нашу страстную бурю преподобнии укротите, да в тишине божественней бывше, песнословим ваша подвиги.
И ныне: Лютыми страстей наветы, обуреваемь есмь, Отроковице, и прилоги греховными погружаемь: к Твоему единому тихому и невлаемому пристанищу любовию прибегаю, Всепетая, ущедрив спаси мя, Приснодево.

Песнь 3

Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.
Преподобнии отцы наши Зосимо и Савватие, молите Бога о нас.
Высотою смирения украшаеми, Зосимо и Савватие преподобнии, и все убо желание ко Владыце своему простросте, яростная же движения на враги вооружисте, со изрядными делы своими, постом и молитвами.
Преподобнии отцы наши Зосимо и Савватие, молите Бога о нас.
Плотей своих востания, крепким пощением преподобнии умертвивше, обителище бысте Владычне: Егоже умолите избавитися скорбей и мучительства страстей, с верою притекающим к вам, преблаженнии.
Слава: Имущи споспешествующу Божественную силу, исцеления безчисленная источают мощи ваша, Зосимо и Савватие преподобнии: отгоняют от человек болезни телесныя, и душевныя страсти врачуют, подвиги вашими всечестнии.
И ныне: Труждает мя буря греховная, и возмущение безместных помышлений: умилосердися, Всенепорочная, и руку ми помощи яко милостива простри, яко да спасся величаю Тя.

Господи, помилуй (трижды).

Седален, глас 4-й

Житейское море воздержанием безбедно преплывше, и ко пристанищу мысленному безстрастия радующеся доидосте, преподобнии отцы Зосимо и Савватие, Богомудрии и преблаженнии: молите Христа Бога, спастися душам нашим.

Песнь 4

Ирмос: Пришел еси от Девы, не ходатай, ни Ангел, но Сам, Господи воплощся, и спасл еси всего мя, человека. Тем зову Ти: слава силе Твоей, Господи.
Преподобнии отцы наши Зосимо и Савватие, молите Бога о нас.
Умом и душею предочистившеся преподобнии, прелесть душепагубную всеконечне от себе отвергше, и чувства своя к немутней тишине управисте, во оток морский премудрии вселистеся, воспевающе: слава силе Твоей Господи.
Преподобнии отцы наши Зосимо и Савватие, молите Бога о нас.
Законы новыми и Ветхим Заветом, разума святых поучающеся, Зосимо и Савватие преподобнии: всякия добродетели образ навыкше, мудрей пчеле подобящеся, и приятелище изрядно Духу Святому премудрии бысте, воспевающе: слава силе Твоей Господи.
Слава: Всяческими, преподобнии, светящеся чудодействы, и Божественною озаряеми благодатию, всем познастеся сокровище исцелений неистощимо, страстей отгоняете омрачение, и вражия низлагаете ополчения, воспевающе: слава силе Твоей Господи.
И ныне: Из утробы Твоея Чистыя Отроковице, возсияв Божественное Солнце, иже сущих во тьме многобожия просвети, и в сени смертней седящих, Владычице, осия, Емуже воспевающе зовем: слава силе Твоей Господи.

Песнь 5

Ирмос: Просвещение во тьме лежащих, спасение отчаянных, Христе Спасе мой, к Тебе утреннюю, Царю мира, просвети мя сиянием Твоим, иного бо разве Тебе Бога не знаю.
Преподобнии отцы наши Зосимо и Савватие, молите Бога о нас.
Тесный предпочетше, пространному пути преподобнии: и радующеся, во отоце морстем всячески утесняеми, претерпесте, божественными поучении души своя очщающе, и доброту Божию неизглаголанную, присно взирающе преблаженнии.
Преподобнии отцы наши Зосимо и Савватие, молите Бога о нас.
Незлобиви и кротцы и милостиви преподобнии бысте: темже благодать и милость от Бога свыше приемше, милостивно нас просвещайте, любовию святую память вашу почитающих.
Слава: Яко великое солнце, величием подвиг ваших возсиясте нам, Зосимо и Савватие преподобнии, земныя осиявающе концы, и вся просвещающе светом богоразумия. Тем молим вы, просветите наш разум, отцы преблаженнии.
И ныне: От множества востающих на ны, в болезни исчезе живот наш, погрязохом в пропасти безчисленных согрешений. Спаси ны, Владычице, и возведи яко милостива, Всенепорочная: Тебе бо имамы едину Предстательницу непобедиму, раби Твои.

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Преподобнии отцы наши Зосимо и Савватие, молите Бога о нас.
Евангельски преподобнии Христа возлюбльше, мира отвратистеся, в непроходимыя же, и в пустыя отоки зашедше, Единому Владыце своему прилепистеся: от Негоже и трудом воздаяние приемше, животу вечному яве причастившеся, за поющия вы молитеся.
Преподобнии отцы наши Зосимо и Савватие, молите Бога о нас.
Богомудрыми помыслы преудобрившеся, преподобнии, и вся яже на земли льстящая, яко уметы вменивше, к нестареющему преставистеся блаженству, с лики во свете Безплотных Сил, о Бозе присно сликовствующе, преблаженнии.
Слава: Странна и преславна, преподобнии, о Бозе содевающе чудеса, всем иже в мори плавающим, и зле страждущим, призываеми, скоро предстаете, от бед избавляюще: и нас бедствующих люте, и напастьми одержимых, милостивно представше спасайте, преблаженнии.
И ныне: Греха тяжкое бремя, еже отяготе на мне, Пречистая, облегчи: Ты бо еси Предстательница грешником преславная, Избавителя и Спаса рождши земным.

Господи, помилуй (трижды). Слава, и ныне:

Кондак, глас 2-й

Христовою любовию уязвившеся, преподобнии, и Того крест на рамо вземше понесли есте, божественне вооружившеся на невидимыя враги, и непрестанныя молитвы яко копие в руках имуще, крепко победили есте бесовская ополчения: благодать Господню приемше целити недуги душ и телес, притекающих к ракам честных мощей ваших, чудес лучи испущаете всюду. Тем зовем вам: радуйтеся, преподобнии отцы Зосимо и Савватие, монахом удобрение.
Икос
Кто доволен изрещи ваших чудодеяний, преподобнии отцы Зосимо и Савватие, мы убо радостию и Божественною любовию почитающе всехвальную и всечестную память вашу, малое сие пение приносим: радуйтеся, исполненнии Христовы красоты, и пресветла от Него и преизобильна восприимшии воздаяния: телесы убо вас морский остров прият, души же самое небо, почести трудов своих, прехвальнии, восприемше от Христа всех Царя и Бога. Тем молим вы, посещайте милостивно, и молите непрестанно о всех нас.

Песнь 7

Ирмос: Образу златому, на поле Деире служиму, трие Твоя отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Преподобнии отцы наши Зосимо и Савватие, молите Бога о нас.
В молитвах бодренное, и в пощениих крепкое, и терпение во искушениих неослабное, ума чистотою, преподобнии, показасте, и земных достойно отступльше, небесное наслаждение обретосте, воспевающе: благословен Бог отец наших.
Преподобнии отцы наши Зосимо и Савватие, молите Бога о нас.
Плод духовный, и жертву непорочную, житие свое, преподобнии, Владыце принесосте, в воздержании бо всяцем пожисте, от Негоже и почести трудом яко подвигоположницы восприемше, действуете преславная чудеса, воспевающе: благословен Бог отец наших.
Слава: Страстьми колеблющихся, и бурею греховною, преподобнии, погружаемых, яко великое к Богу дерзновение имуще, руководствуйте, и всегда, премудрии, сохраняйте, почитающих вас благочестно, яко да воспеваем: благословен Бог отец наших.
И ныне: Избави нас от напастей и скорбей, и печалей различных, и иноплеменных нашествия, и междоусобныя брани, Владычице Всепетая, яко да Тя славим, и Сыну Твоему взываем: благословен Бог отец наших.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.
Преподобнии отцы наши Зосимо и Савватие, молите Бога о нас.
В пребывалища присно живущая вселистеся, преподобнии, нетленных благ наслаждающеся, и Трисолнечныя Светлости исполняющеся, нас, призывающих вы, теплым предстательством вашим, от всех лютых спасайте поющих: благословите, вся дела Господня, Господа.
Преподобнии отцы наши Зосимо и Савватие, молите Бога о нас.
Нам иже любовию почитающим вас, и честное ваше совершающим торжество, Христовы угодницы Зосимо и Савватие, преподобнии отцы, согрешением испросите оставление, и страстей пременение, и Божественнаго света осияние поющим: благословите, вся дела Господня, Господа.
Слава: О Пребезначальное Естество, и Трисоставное Единство, Отче и Сыне и Душе Пресвятый, приими от нас молитвенники Твоя преподобныя угодники, и подаждь прегрешением разрешение, и житию исправление, и злых отчуждение, и сподоби ны в мире воспевати Твою державу: благословите, вся дела Господня, Господа.
И ныне: Яко Едина рождши безсеменным рождеством Христа Бога, Мати Безневестная Чистая, Сего милостива сотвори, Владычице, спасти рабы от насилия и мучительства вражия, вопиющих Христови Сыну Твоему: благословите, вся дела Господня, Господа.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Преподобнии отцы наши Зосимо и Савватие, молите Бога о нас.
Выспрь к Богу имуще мысль, Зосимо и Савватие преподобнии, земная оставльше, небесная восприясте, Богу и Спасу вас вельми прославльшу, трудов ради ваших, и воздержания неослабнаго: сего ради почитаем вас, преблаженнии.
Преподобнии отцы наши Зосимо и Савватие, молите Бога о нас.
Ихже благ, преподобнии, получисте, и небесныя славы, еяже от Бога сподобистеся, и Емуже выну предстоите, молитеся и нам неотлученым быти, молим вы, радостию и Божественною любовию почитающим подвиги ваша всечестнии.
Слава: О Божественная и Богомудрая, и священная двоице, Зосимо и Савватие, мирови миру от Бога низпослатися испросите, церквам соединение и всем скорбящим утешение и спасение, преблаженнии.
И ныне: Пощади мя, Христе Спасе, пощади молитвами рождшия Тя, и всех святых Твоих: егда сядеши судити делом моим, беззакония моя и грехи моя презри, яко един безгрешен.

Кондак 1

Избраннии угодницы Господни и велицыи чудотворцы, светильницы Христовы Церкве пресветлии, облиставшии благочестия светлостьми пустыни Севернаго Помория, и всей стране Российстей сияющии выну чудес множеством, Преподобнии отцы наши Зосимо, Савватие и Германе, яко имущии дерзновение ко Господу, благоприятными своими к Тому мольбами от всяких нас бед и зол сохраняйте, да радующеся зовем вам:

Радуйтеся, Преподобнии отцы наши Зосимо, Савватие и Германе.

Икос 1

Ангели воистину явистеся земнии и человецы небеснии житием вашим, преблаженнии отцы наши Зосимо, Савватие и Германе: во плоти бо, яко безплотнии, ангельское совершисте жительство на земли, вся красоты мира и наслаждения временная яко уметы вменяюще, чистотою же и пощением выну к Богу приближающеся. Емуже ныне достойно со безплотными предстояще, приимите от любве нашея приносимая вам хваления сицевая:

Радуйтеся, Единаго Бога от всея души своея возлюбившии;

Радуйтеся, от юности Тому преподобием и правдою послужившии.

Радуйтеся, возненавидевшии мира сего тленныя красоты;

Радуйтеся, избежавшии мудре житейских соблазнов и суеты.

Радуйтеся, к деланию заповедей Господних всею любовию прилепившиися;

Радуйтеся, мира сего и всякаго пристрастия ко оному удалившися.

Радуйтеся, иноческое житие богоугождения ради себе предизбравшии;

Радуйтеся, тесный и прискорбный путь всею душею возлюбившии.

Радуйтеся, мудрии взыскателие Христа, бисера вожделеннаго и драгаго;

Радуйтеся, люботруднии носителие Христова бремене, легкаго и благаго.

Радуйтеся, ангелом безплотным во плоти бренней подражавшии;

Радуйтеся, на земли жительство небесное нам показавшии.

Радуйтеся, Преподобнии отцы наши Зосимо, Савватие и Германе.

Кондак 2

Видя себе, святе Савватие, ради многих своих добродетельных исправлений, всюду в сопребываниих иноческих почитаема и ублажаема, и бегая суетныя мира сего славы, взыскуя же вечнаго воздаяния на небесех, устремился еси ко отоку Соловецкому, да тамо втайне и никимже видимый поработаеши невидимому и вся видящему Богу. Темже и улучив желаемое, блаженным Германом к сему наставляем, радостно возопил еси Богу: Аллилуиа.

Икос 2

Разум неуклонно вперив от утробы матерни к Богу, и горняя выну мудрствуя и взыскуя, дольних же всецело отвергаяся, богомудре Зосимо, поревновал еси житию Преподобнаго Савватия, и во отоце пусте, идеже сей богогодне соверши подвиги своя, вселился еси, да с ним наследуеши жительство горняго Иерусалима. Темже во обоих восхваляюще пустынножития рачительство, зовем вам:

Радуйтеся, любве ради Христовы, любовь в себе к миру поправшии;

Радуйтеся, всякую греховную сладость века сего презревшии.

Радуйтеся, подобницы Аврааму не точию верою и упованием, но и добровольным от рода своего и дома отеческаго преселением;

Радуйтеся, пустыни всекрасная и благозлачная насаждения.

Радуйтеся, безмолвия тщаливейшии рачителие;

Радуйтеся, трудных подвигов пустынных искреннии любителие.

Радуйтеся, в дебрех и горах паче, неже в селех мира, изволившии приметатися;

Радуйтеся, в пустынях непроходимых, едини во трудех и соблюдении заповедей Господних возлюбившии подвизатися.

Радуйтеся, яко злато, искусившиися в горниле пустыннаго озлобления;

Радуйтеся, доблественне претерпевшии от бесов же и от людей многая искушения.

Радуйтеся, пророку Божию Илии и крестителю Господню Иоанну нравом пустыннолюбия подражателие;

Радуйтеся, доблем Герману единомысленнии сподвижницы любобезмолвнии купножителие.

Радуйтеся, Преподобнии отцы наши Зосимо, Савватие и Германе.

Кондак 3

Силы небесныя, в служение посылаемыя хотящым наследовати спасение, дивно послужиша вам, о двоице боголюбивая. Егда бо насельницы мирстии, стужающе безмолвию твоему, отче Савватие, жити хотяху во острове близ тебе с женами и чады, ангели грозным прещением и наказанием жены рыбаревы воспятиша сих от начинания богопротивнаго: тебе же, отче Зосимо, во озимении пребывавшему кроме брашна, ангельским служением преподашася потребная ко препитанию. Сего ради Богу, спасающему угодники Своя, поим: Аллилуиа.

Икос 3

Имуще оток морский во обителище себе, никимже населяемый, и в нем пребывающе, аки в раи богозданнем, вне мятежей и волнений житейских, и кроме суетных попечений, благочестно и богоугодно подвизастеся, о богоблаженнии, во дни и нощи поучающеся в законе Господни, и на всякий час умом несмущен­ым и сердцем чистым возносяще усердныя к Богу молитвы и моления. Сего ради радостию вопием вам:

Радуйтеся, в законе Господни непорочно ходити всегда восхотевшии;

Радуйтеся, Господа своего пред очима своима присно имевшии.

Радуйтеся, страхом Господним вся пути своя ограждавшии;

Радуйтеся, в трезвении умнем все житие свое провождавшии.

Радуйтеся, вся помыслы ума в послушание Христово всецело пленившии;

Радуйтеся, чистыя ваша сердца в жилище Святому Духу представившии.

Радуйтеся, не давшии сна очима во всенощных Господеви предстояниих;

Радуйтеся, выну претерпевавшии скорби в поучении смертнем и в сердечных ко Господу воздыханиих.

Радуйтеся, с искреннею любовию подвизавшиися на славословие Божие и псалмопения;

Радуйтеся, сердцем и усты непрестанныя возсылавшии к Богу моления.

Радуйтеся, внутрь сердца своего сокровенное Царствие Божие обретшии;

Радуйтеся, восхождении умными к небесным видением востекшии.

Радуйтеся, Преподобнии отцы наши Зосимо, Савватие и Германе.

Кондак 4

Бурю жития сего многомятежнаго безбедно преминусте, отцы Преподобнии, и свирепыя волны страстей же и искушений, от мира и плоти и от духов злобы воздвизаемыя, не погрузиша и не поколебаша корабля душ ваших, ветрилы молитвы непрестанныя окриляемаго, и нестяжанием облегчаваемаго, благодатию же Божиею управляемаго. Темже и достигосте к безмятежному пристанищу живота вечнаго, вопиюще Богу: Аллилуиа.

Икос 4

Слышаще и ведуще от писаний Божественных, яко вси подвизавшиися во благочестии, распинаху плоть свою со страстьми и похотьми, благочестномудренно, о Преподобнии, сих подвигом последствующе, подвизастеся умертвити уды своя сущия на земли, в пощениих, бдениих и во всяких трудех иноческаго жития мужески претерпевающе скорби. Сего ради, яко доблия подвижники благочестия, венчаем вы хвалении сицевыми:

Радуйтеся, телеса своя труды и болезньми воздержания увядившии;

Радуйтеся, вся плотская мудрования, на дух воюющая, духу покорившии.

Радуйтеся, покаянными слезами пламень страстей угасившии;

Радуйтеся, в пещи воздержания души своя яко злато очистившии.

Радуйтеся, ветхаго человека со страстьми его совлекшиися;

Радуйтеся, одеждею безстрастия и славою нетления достойно облекшиися;

Радуйтеся, возненавидевшии временную греха сладость;

Радуйтеся, наследовавшии на небеси нескончаемую радость.

Радуйтеся, прежде смерти, миру и сластем его плоть свою распеншии;

Радуйтеся, прежде воскресения, славу будущия жизни в себе проявившии.

Радуйтеся, стезею поста к наследию рая, потеряннаго невоздержанием, путь нам указавшии;

Радуйтеся, в телеси мертвеннем и тленнем безсмертие и нетление будущаго века всем предъявившии.

Радуйтеся, Преподобнии отцы наши Зосимо, Савватие и Германе.

Кондак 5

Боготечныя и многосветлыя звезды явилися есте, Преподобнии отцы Зосимо, Савватие и Германе, светозарными исправлении заповедей Господних озаряющии душы и сердца верных, и преплавающым в нощи греховнаго омрачения пучину житейскаго моря указующии благонадежный путь ко блаженному пристанищу Небеснаго Царствия. Темже явившему вы, яко руководители и наставники ко спасению, благодетелю Богу поим: Аллилуиа.

Икос 5

Видевше злокозненнии ненавистницы спасения человеческаго, нечистии дуси тьмы, богоугодное житие ваше, отцы преблаженнии, многообразная воздвигаху на вы искушения и страхования, овогда в мысли и сердце всевающе боязнь и смущение, овогда же преобразующеся; в различная привидения дивиих зверей и гад, с яростию устремляхуся на вы, чающе отвратити от подвига богоугоднаго и изгнати от пребывания пустыннаго: вы же, твердою верою в Бога Промыслителя возмогающе и оружием молитвы и воздержания противу врагов ваших ополчающеся, до конца победисте и низложисте их державу. Сего ради, победительную песнь поюще, взываем к вам:

Радуйтеся, воини духовнии непобедимии;

Радуйтеся, оружницы Христовы добропобеднии.

Радуйтеся, подвижницы, противу козней лукаваго мужески ополчившиися;

Радуйтеся, столпи крепцыи, от нападений вражиих не поколебавшиися.

Радуйтеся, вся стрелы диаволи аки хврастие сокрушившии;

Радуйтеся, вся стужения того и страхования ни во чтоже вменившии.

Радуйтеся, яко во плоти суще, победисте враги безплотныя и невидимыя;

Радуйтеся, яко и во гробех лежаще, низлагаете вражия ополчения.

Радуйтеся, победоносцы славнии, венчаннии от Небеснаго Венцедателя;

Радуйтеся, споборницы доблии ратующым на миродержителя тьмы века сего.

Радуйтеся, яко подвигом вашим ангели удивишася;

Радуйтеся, яко о славе вашей собори верных возвеселишася.

Радуйтеся, Преподобнии отцы наши Зосимо, Савватие и Германе.

Кондак 6

Проповеданное от ангел изволение Божие о населении иночествующими отока Соловецкаго исполнися вами, отцы преблаженнии Зосимо, Савватие и Германе: се бо пустыня неплодная и ненаселенная, поты же и слезами вашими обильно напоенная, показася яко вертоград благоцветущий и рай словесный, идеже лицы иночестии, вами благонаученнии, плоды богоугодныя приносяще, поют ангельскую Богу песнь: Аллилуиа.

Икос 6

Возсиясте, отцы богоноснии, светом благочестия, яко светила богосветлая, светоносными лучами ваших подвигов и добродетелей просвещающии всюду. Отонудуже мы, грешнии и тьмою страстей помраченнии, во свете ваших богоугодных деяний текуще ко дню света и спасения, восхваляем вы, поюще сице:

Радуйтеся, ученицы Христови благопослушнии;

Радуйтеся, Владыки своего раби блазии и вернии.

Радуйтеся, трудолюбнейшии винограда Христова делателие;

Радуйтеся, тщаливейшии заповедей Христовых исполнителие.

Радуйтеся, игу Христова смирения и кротости благопокорне рамо свое подклонившии;

Радуйтеся, во след Христа Господа, учившаго о нищете, усердно в нищете и нестяжании последовавшии.

Радуйтеся, по словеси Господа, прешедшии путь временнаго жития сего, стезями прискорбными и тесными;

Радуйтеся, аки дождем, измывшии душы своя токи слезными.

Радуйтеся, краснейшему душ Жениху красоту девства своего сохранившии;

Радуйтеся, во всякой святыни, всеми добрыми делы Тому благоугодившии.

Радуйтеся, Господа своего прославившии в душах ваших и телесех;

Радуйтеся, от Господа по достоянию прославленнии на земли и на небесех.

Радуйтеся, Преподобнии отцы наши Зосимо, Савватие и Германе.

Кондак 7

Хотяй спасти вами многия, Премилосердый Бог яви вас быти не точию наставники сонма иночествующих, но якоже боговещанныя проповедники, возвестившыя имя Божие в странах Лапландии. Людие бо, во онех местех обитающии, и не ведевшии дотоле Бога, но прилежавшии весьма идолопоклонению и нечестию, во светлости вашего, о Преподобнии, жития, знамений же и чудес, узреша первую зарю спасительнаго боговедения и благочестия, и от вас научишася воспевати истинному Богу: Аллилуиа.

Икос 7

Дивно и преславно совершивше путь своего спасения, чудную же и боголепную основавше обитель во спасение иночествующим, блаженную восприясте живота своего кончину, приснопамятнии отцы наши, Зосимо, Савватие и Германе: обаче, и по смерти вашей, присно живи суще, нас, чад своих, никогдаже оставляете, не духом точию нам присно спребывающе, но и мощи своя цельбоносныя нам предавше, яко сокровище безценное. Сего ради с радостию ублажаем вы, зовуще:

Радуйтеся, добрым подвигом во всем житии своем подвизавшиися;

Радуйтеся, славою и честию от Владыки своего Христа увенчавшиися.

Радуйтеся, яко привременно потрудившеся, в вечный покой внидосте;

Радуйтеся, яко тесным шествовавше путем, к блаженству Царства Небеснаго достигосте.

Радуйтеся, аще и не единокупно, но в равных подвизех подвизавшиися на земли;

Радуйтеся, за равноподвижное житие, радостию и веселием вкупе наслаждающиися на небеси.

Радуйтеся, во отоце пусте, яко град, обитель иноком основавшии;

Радуйтеся, сонмы иноков о Христе Бозе во оней собравшии.

Радуйтеся, стражи стаду своему приснободреннии, и по днех временныя жизни от дел благотворений не почивающии;

Радуйтеся, сынове Царствия, на Небесех живущии и земных не оставляющии.

Радуйтеся, духом вашим горе со ангелы святыми, и долу с нами грешными присно пребывающии;

Радуйтеся, от честных мощей ваших струи милости на всех источающии.

Радуйтеся, Преподобнии отцы наши Зосимо, Савватие и Германе.

Кондак 8

Странную и пречудную, велию же и прекрасную узрев на воздусе явльшуюся церковь, все же место оно, на немже имяше возградитися обитель иноков, видя неизреченным светом осияваемо, ужасом исполнился еси, отче Зосимо, от предивнаго видения. Обаче, Божие во оном откровение поразумев, на созидание обители тебе поощряющее, купно же и грядущую славу места сего прозря, умиленным сердцем и усты воспел еси Богу: Аллилуиа.

Икос 8

Вси правовернии российстии людие, прославляюще ваше святое и равноангельное житие, во всяких нуждах и скорбех притекают к вашей помощи и заступлению, отцы досточуднии: дана бо есть вам от Бога благодать, еже молитися за ны, избавляти же и спасати от всяких бед и зол притекающыя к ракам честных мощей ваших, и на всяком месте призывающыя святое ваше имя. Темже, исповедающе чудная ваша благодеяния, благодарственная восписуем вам, зовуще:

Радуйтеся, источницы Божественных дарований неизчерпаемии;

Радуйтеся, милования и любве к людем сосуди неиждиваемии.

Радуйтеся, яко кадило благовонное, о мире молитвы к Богу возносящии;

Радуйтеся, немолчными вашими ходатайствы всякое благословение от десницы Божия на ны низводящии.

Радуйтеся, сущым в скорбех и нуждах известнии помощницы;

Радуйтеся, во обстояниих и напастех скории пособницы.

Радуйтеся, в недузех целители, и в бури страждущым благонадежнии кормчии и избавители;

Радуйтеся, во всяких бедах и искушениих теплии предстатели и утешители.

Радуйтеся, верным, благочестно чтущим вас, на сопротивныя споборницы;

Радуйтеся, всея земли Российския избраннии молебницы и заступницы.

Радуйтеся, на земли и на мори чудеса преславная содевающии;

Радуйтеся, во вся концы призывающым вы скорую помощь независтно простирающии.

Радуйтеся, Преподобнии отцы наши Зосимо, Савватие и Германе.

Кондак 9

Всеми Богокрасными лепотами добродетелей украсив себе, прехвальне Зосимо, наипаче явился еси краснейший душею же и телом, достойно помазався священства Божественною мастию. Темже, егда во святем храме совершал еси пред престолом Господним первую Божественную службу, видеша вси лице твое, облистанное светом благодати, яко лице ангелово: весь же храм, во известное свидетельство достоинства твоего, исполнися велия благоухания. Сего ради вси, благодаряще Бога о своем пастыре, радостным сердцем взываху: Аллилуиа.

Икос 9

Ветийственными добровещаньми несть возможно по достоянию воспети и прославити многая и неисчетная, велия же и преславная, и всякое разумение земное превосходящая, совершамая вами, отцы Преподобнии, на всякое время чудотворения. Обаче, да не явимся чрез немотствование подобни рабу, сокрывшему сокровище своего Владыки, от уст, аще и не обученных и слова премудрости отнюд не имущих, любовию же точию и благодарением движимых, дерзаем простирати песнь благодарения в память и прославление чудес ваших, зовуще сице:

Радуйтеся, чудотворцы великоименитии и благославнии;

Радуйтеся, душ и телес врачеве немздоприемнии.

Радуйтеся, очеса слепых благодатию Божиею просвещающии;

Радуйтеся, немотою связанныя уста ко благоглаголанию разрешающии.

Радуйтеся, расслабленных удесы исправляющии неможение;

Радуйтеся, хромым дарующии правохождение.

Радуйтеся, плененных предстательством своим от уз и пленения свобождающии;

Радуйтеся, мертвыя силою Божиею, вашим же умолением воскрешающии.

Радуйтеся, во всяких страстех и недузех совершающии благодатное исцеление.

Радуйтеся, томимым во обстояниих и напастех дарущии мир и духовное просветление;

Радуйтеся, идущим во след Господа путем тесным и прискорбным подающии божественное вспоможение.

Радуйтеся, Преподобнии отцы наши Зосимо, Савватие и Германе.

Кондак 10

Спасения подвиг добре совершив, жития же сего временнаго отрешаяся и отходя к животу вечному и блаженному, Зосимо богоблаженне, утешал еси ученики твоя, глаголя яко, разлучаяся с ними телесне, не отступен будеши от них и обители твоея твоим духом. Отонудуже и самеми делы слово твое исполняяй являешися, не точию невидимо соприсутствуя нам и назирая вся, но и видимо многажды, вкупе со блаженным Савватием, являяся во время благопотребно призывающым вас в помощь и вопиющим Богу: Аллилуиа.

Икос 10

Стена необоримая и покров твердый, спасения забрало и оружие победы быша нам, отцы Преподобнии, теплые ваша к Богу молитвы, в день брани оныя лютыя, егда, по грехом и беззаконием нашым, врази крепцыи и бранноискуснии со огнем и мечем нападоша на ны в достоянии вашем, во еже сокрушити святыни ваша и положити я в разорение и попрание, духовная же чада ваша победити и погубити смертию безгодною; обаче, никоеже зло возмогше сотворити, сами наипаче тии исполнишася студа и безчестия, уповающии же на помощь вашу препоясашася радостию и веселием о своем спасении. Благодаряще убо о сем Бога, исповедуем купно ваше ходатайство и заступление, и вопием вам тепле из глубины души:

Радуйтеся, пастырие добрии, от врагов губительных стадо свое защищающии;

Радуйтеся, яко орли под крилома своима птенцы своя покрывающии.

Радуйтеся, покровом молитв своих в день брани нас осенившии;

Радуйтеся, гнев Божий, праведно на ны движимый, ходатайством своим утолившии.

Радуйтеся, не давшии своего достояния в попрание и расхищение;

Радуйтеся, паче надежды сохранившии е от огненнаго запаления.

Радуйтеся, уповающыя на вы от губительства смертнаго свободившии;

Радуйтеся, от раны и язвы, от уз и пленения дивно тех сохранившии.

Радуйтеся, врагов гордыню и дерзновение обратившии в студ им и безчестие;

Радуйтеся, ны, жительствующия в обители вашей, неискусобранныя и безоружныя, одеявшии в радость и веселие.

Радуйтеся, веры и благочес­ия отеческаго неусыпнии охранители;

Радуйтеся, за Отечество явльшиися и по смерти мужественнии воители.

Радуйтеся, Преподобнии отцы наши Зосимо, Савватие и Германе.

Кондак 11

Песни хвалебныя и моления всеумиленная приносяще, долготу же путную и опасности моря ни во чтоже вменяюще, притекают к цельбоносным мощем вашым царие и князи, святители и вельможи, богатии и убозии, ближнии и дальнии, всяк возраст и пол, и всякое верных совокупление, и яко от неистощимаго источника, по коегождо своей потребе, приемлюще обильная врачевания душевная же и телесная, прославляют и величают Бога, таковую благодать вам даровавшаго, поюще: Аллилуиа.

Икос 11

Светом Божественныя благодати, в недрех земли, в предивных знамениих и чудесех, от первых дней упокоения возблиставшия ваша мощи, достодолжно и праведно лицы иночестии, от многолетнаго покровения изнесше, поставиша со благоговением на свещнице церковнем, во храме, имени вашему созданнем, благочестием великаго и святаго подражателя ваших подвигов, исповедника и мученика, Святителя и первопрестольника Российскаго Филиппа. И мы ныне, благочестно о славе вашей веселящеся, обстояще честныя раки мощей ваших и любезно тыя облобызающе, велегласно зовем вам:

Радуйтеся, светильницы пресветлии, на свещнице церковем преславно поставленнии;

Радуйтеся, кивоти честнии, не камением и златом, но благодати дарованьми украшеннии.

Радуйтеся, яко три звезды, озаряющии тьму полунощную;

Радуйтеся, яко три столпа, в пределех Севернаго Помория утверждающии веру православную.

Радуйтеся, источницы райстии, моря чудес изливающии;

Радуйтеся, бисерие дражайшии, Церковь Христову украшающии.

Радуйтеся, благочестия и добродетели светлейшая зерцала;

Радуйтеся, Церкви и Отечества необоримая забрала.

Радуйтеся, райскаго исполнения крини благовоннейшии;

Радуйтеся, лозы Божественныя розги благоплоднейшия.

Радуйтеся, отцы всеблаженнии, прославляемии горе от Бога и ангел, и долу ублажаемии от человек;

Радуйтеся, яко радость ваша, святая и совершенная, пребывает во век.

Радуйтеся, Преподобнии отцы наши Зосимо, Савватие и Германе.

Кондак 12

Благодать свою Божественную, в телесех ваших обитающую, яви иногда Преблагий Бог благоговейному иноку Иосифу во образе двух столпов огнезрачных, от земли до небес над гробы вашими возносящихся и сияющих светом неизреченным: воистинну бо вы есте, отцы Преподобнии, духовнии светозарнии столпи, светлостию высоких добродетелей и светом богознания, знамений же и чудес, озарившии пресветло духовню тьму в странах полунощных. Сего ради Богу, прославляющему святыя Своя, поим: Аллилуиа.

Икос 12

Поюще в песнех подвиги и труды вашего богоугоднаго жития, преславная же содеяная и содеваемая во всяком роде благотворения и чудотворения восхваляюще и прославляюще, недоумеем, отцы досточуднии, како вас по долгу возименуем: многия бо суть ваша добродетели и дарования, сего ради многая приличествуют вам и именования. Обаче, во многих малыми удовляющеся, сия вам с любовию восписуем:

Радуйтеся, ангели земнии, яко ангельским жительством на земли пожисте;

Радуйтеся, человецы небеснии, яко земнородни суще, возненавидесте земная, небесная же возлюбисте.

Радуйтеся, постницы терпеливейшии, в приснем пощении все житие свое проводившии;

Радуйтеся, пустынницы достохвальнии, в пустынях незаходимых Господеви послужившии.

Радуйтеся, учителие и наставницы, руководящии своими делы на пути спасения;

Радуйтеся, вожди духовнии, многих душы возводящии в небесная селения.

Радуйтеся, мучеником единонравнии, яко мужески бравшиися со страстьми;

Радуйтеся, апостолом подражателие, просветившии тьму неверия боговедения светлостьми.

Радуйтеся, пророком подобницы, тайных и будущих проведением и проречением;

Радуйтеся, всем святым единочестнии, подвигов ради и богоугождения.

Радуйтеся, таинницы благодати и чудес совершителие предивнии;

Радуйтеся, граждане небеснии и друзи Богу и святым Его приснии.

Радуйтеся, Преподобнии отцы наши Зосимо, Савватие и Германе.

Кондак 13

О Преподобнии отцы наши, / Зосимо, Савватие и Германе! / Приимите благоутробно / от нас смиренных и недостойных / сия возносимая вам хваления, / и благоприятными вашими к Богу мольбами / оградите ны от всякия беды и напасти, / от недуга и глада, от огня и меча, / и нашествия иноплеменных. Наипаче же сохраните ны вашим заступлением крепким / от врагов невидимых, / ищущих ны погубити, да избывше их многокозненных сетей, / праведно и богоугодно поживем в нынешнем веце, / и сподобимся в Небеснем Царствии / купно с вами воспевати Христу Богу: // Аллилуиа, аллилуиа, аллилуиа.

Кондак сей глаголи трижды, таже икос 1-й и кондак 1-й

Песнь 1

Ирмос: Поим Господеви, проведшему люди Своя сквозе Чермное море, яко един славно прославися.

Божественною, отче, любовию прилепился еси от юности Христу, плотския страсти увядил еси воздержанием, Зосимо премудре, Богом помогаемь. И ныне нам света мысленнаго исполнитися помолися Господеви, поющим: славно бо прославися.

Претрудил еси тело, пребогате, и страсти плотския, отче, поработил еси, Зосимо, ясно приял еси светлость благодати и, сею просвещься, Божественне взывал еси: Господеви поим, славно бо прославися.

Крепостию Духа возмог, державу низложил еси и силу вражию и, похвалу победную и почести приемь, преподобне, чудесными сиянии просветился еси, Господеви поя: славно бо прославися.

Богородичен: Закон кроме естественных родила еси законодавца Бога, Человека бывша. Того яко Блага моли, Всенепорочная, наша беззакония презрети, вопиющих всегда: Господеви поим, славно бо прославися.

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.

Плоть твою умертвил еси воздержанием, преподобне, душу же Божественными даровании просветил еси.

Все убо желание ко Владыце твоему обратил еси, ярость же на бесы, Богоносе, вооружил еси.

Имея споспешествующую ти Божию силу, премудре, яко чуден, чудеса источаеши и отгониши недуги.

Богородичен: В ложесна Твоя с потщанием, Всенепорочная, вселися Зиждитель на благодеяние верно воспевающим Тя.

Седален, глас 4

Страстное поработил еси плотское мудрование, духу горшее покорив, отче преславне, сокрушил еси выи бесом и постом возсиял еси в мире, яко лучи солнечных сияний, твоя добродетели показуя. Сего ради тя воспеваем.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Премудрости первее ты рачитель явился еси, премудре, житие бо непорочно пожил еси, очищен изрядно душею и мыслию, согласно взывая: слава силе Твоей, Господи.

Очистив ум твой от страстныя молвы, славне, и чувства, мудре, управив, к немутней тишине, отче, устремился еси в морский остров и усердно воспевал еси: слава силе Твоей, Господи.

Земныя печали воздержательно оттряс, Небесныя надежды стяжа Твой угодник, Владыко, преподобный Зосима, со усердием поя: слава силе Твоей, Господи.

Богородичен: Явися в мир от Девы яко Человек, дарова победу преподобным Своим, Крестом бо Его бесы прогнаша, верою зовуще: слава силе Твоей, Господи.

Песнь 5

Ирмос: Утренююще, вопием Ти: Господи, спаси ны, Ты бо еси Бог наш, разве Тебе, иного не вемы.

Умом очищенным, преславне, зриши доброту неизреченную Христа, всяческих Бога нашего.

Умертви наша мудрования, Человеколюбче, плотская, и взыграния Богоприятными преподобнаго Твоего молитвами.

Свыше нас назираеши, преблаженне, и управляеши живот наш, творящих любовию, преподобне, память твою.

Богородичен: Исцели недугующаго ума моего омрачение, врача рождшая, Христа, Всенепорочная Владычице.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Яко сна образ тленный, всего мира славу зря, единаго живаго Бога славы возлюбил еси причастник быти: юже, преподобне, праведно сподобился еси зрети.

Лукавый умертвися змий священными твоими молитвами, Богоблаженне, и того решаются злобы, иже знамение от тебе испросивше, и угодник светел Божий познан был еси верен.

Богомудрым помыслом украсився, яже на земли преобидел еси вся, и Небесное, преблаженне отче, наследие, премудре, разсудил еси, Зосимо, и ныне яве на Небесех живеши, радуяся.

Богородичен: Господь с Тобою, Пречистая, якоже изволил есть и всех нас от области льстиваго ходатайством Твоим избавил есть. Темже Тя ныне по долгу родове родов ублажают.

Кондак, глас 8

Христовою любовию уязвися, преподобне, и Того Крест славный, на рамо взем, понесл еси, божественне вооружився, и непрестанныя молитвы, яко копие в руце, имый, крепко ссекл еси бесовская ополчения. Тем зовем ти: радуйся, преподобне отче Зосимо, монахов удобрение.

Икос

Услышав Христов глас, оставил еси плотская мудрования, богатство же и славу, яко прах, вменив, на страсти, яко безплотен, подвизался еси, и Безплотных ликостоянию уподобился еси, и разума дарование приял еси, еже подаждь в песнех поющим ти сице: радуйся, Зосимо преподобне и Богоносе, Небесный человече и земный Ангеле. Радуйся, яко кроме мира суетнаго пустыню соделав в морском острове, в нем обитель составил еси. Радуйся, яко в ней множество монахов собрася, и от них слышиши сице глаголемое: радуйся, монашествующим спасения ходатай; радуйся, унывающих образ утешения; радуйся, монахом от навет вражиих избавителю; радуйся, скорбей губителю нашего естества, яко отгониши помыслы злобныя; радуйся, скорбящих душею сладкое утешение и радости Божественныя подателю; радуйся, наш предстателю и избавителю; радуйся, преподобне отче Зосимо, монахов удобрение.

Песнь 7

Ирмос: От Иудеи, дошедше, отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Всем желанием прилепился еси, воздержанием твердым твоему Владыце, Того ныне питаешися сиянии, зовый: отец наших Боже, благословен еси.

Просветив твое сердце, священноначальник бысть отча состава, наказуя и уча вся, изводя всяк ум к Божиим волям, поя: отец наших Боже, благословен еси.

Плод Божествен Владыце принесл еси — житие, треблаженне, и жертву приятну и непорочну, зовый: отец наших Боже, благословен еси.

Богородичен: Се Дева Божественное Отроча породи, Егоже ныне Богоноснии отцы познавше Бога и Господа, вопияху: отец наших Боже, благословен еси.

Песнь 8

Ирмос: Богоглаголивии отроцы в пещи, со огнем пламень попирающе, пояху: благословите, дела Господня, Господа.

С похвалами бывает, Богоносе, память твоя: правды бо явился еси показатель, мужества, и мудрости, и целомудрия, отче преподобне Зосимо, Содетелю и Избавителю взывая: благословите, вся дела Господня, Господа.

Невозвратно шествовал еси ведущими к Небеси Божественными стезями, отче преподобне Зосимо досточудне, от злых, ведущих до конца, укрепился еси, поя: благословите, вся дела Господня, Господа.

Богоноснаго вси хвалами почтим, яко исполнена яве благодати и Божественными сияньми просвещена, изрядне Содетелю и Избавителю вопияше: благословите, вся дела Господня, Господа.

Богородичен: Вода еси неисчерпаемая, Дево, от неяже вси, пиюще, благодати исполняемся и, душею и телом освящаеми, поем: благословите, вся дела Господня, Господа.

Песнь 9

Ирмос: Устрашися всяк слух неизреченна Божия снизхождения, яко Вышний волею сниде даже и до плоти, от Девическаго чрева быв Человек. Темже Пречистую Богородицу, вернии, величаем.

Струями твоих слез очищся, ныне Света наслаждаешися, отче преподобне, трисияннаго. Тому предстоя яве, светозарными просвещаемь лучами, свыше назираеши нас, твою память творящих, всеблаженне.

Яко великое солнце, нам величием подвиг твоих осиял еси, Богомудре, вся земныя концы, к Свету, от Света возсиявшему, умер, прешел еси. Тем вопием ти: просвети наша помышления, отче преподобне.

Процвел еси в постнических подвизех, прехвальне отче наш, яко шипок благоуханен и, яко кедр, облагоухал еси совести верных сердца добродетельми и чудесы; тем отжени страсти смердящия, преподобне.

Богородичен: Просвети, Пречистая Дево, сетующее сердце мое присно преступлении и житейскими многими молвами и не остави мя врагом быти в радость, яко да славлю Тя и яко да Тя любовию пою, Препетая.

Светилен

Насаждену ти в дому Божии, воистину, яко финикс, псаломски процветает твоя обитель, умножая тебе чада, иже твою, отче Зосимо, память празднуют светло.

Песнь 1

Ирмос: Яко по суху, пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Пребожественный Свете трисолнечне, страстей темностию омрачена всего мя, просветив, очисти молитвами Твоего раба, Человеколюбче, и сего чтущу слово ми вдохни.

Поющу светоносную память твою свет ми низпосли, яко Богоначальному Свету предстоя, преподобне Зосимо, страстей моих тьму молитвами твоими отгоняя.

Кроток, и милостив, и чист быв, кротких землю достигл еси, отче, укроти настоящую бурю сердца моего, да, в тишине Божественней быв, песнословлю твоя подвиги.

Богородичен: Твоего приимши Содетеля, яко Сам восхоте, из безсеменна чрева Твоего паче ума воплощенна, Чистая, тварей воистину явилася еси Владычица.

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Целомудрие, отче, притяжав, имже на Божественную любовь возшел еси, приемь дары исцеляти недуги душ и телес наших.

Ум твой Небесныя доброты созерцати, от земных отлучив, прилежати наказал еси, Зосимо, идеже ныне водворяешися.

Образ быв твоим учеником к добродетели, отче, ихже возводя к высоте Божественнаго рачения, добродетели прилежати наказуя.

Богородичен: Божественнаго рождества Твоего, Чистая, всякаго естества чин преходит чудо: Бога бо Присносущна приимши во чреве, и, рождши, пребываеши присно Дева.

Седален, глас 4

Страстное поработил еси плотское мудрование, духу горшее покорив, отче преславне, сокрушил еси выи бесом и постом возсиял еси в мире, яко лучи солнечных сияний, твоя добродетели показуя. Сего ради тя воспеваем.

Песнь 4

Ирмос: Христос моя сила, Бог и Господь, Честная Церковь боголепно поет взывающи, от смысла чиста о Господе празднующи.

Кротостию, отче, наветы нося, терпя же и от твоих, на тя востающих, отеческим нравом последуя, тех житие в себе имел еси.

Терпение и безгневие имея, отходиши, из киновии гоним, возвращаяся же, призываемь, смирялся еси, яко отроча, по Христову словеси.

Укорение и досады приемля, подобился еси молчанию Иисуса, моего Бога, младенец беззлобием Царство наследуя, уязвляя же гордящася врага.

Богородичен: Яко воистину неизреченна и непостижима Твоего, Богородице, Боголепнаго суть рождества, сущим на земли и Небесным, Приснодево, таинства.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Носиши со онаго полу моря чудеснаго Савватия мощи и твоея обители сие царственное сокровище снискал еси, егоже добродетели в себе нося, Зосимо преподобне.

Ненаселеная населяется, отче, тобою, яко бо заря просияша твоя добродетели; еюже осиявшеся, в пустыню, якоже и во град, монашеское множество стичется.

Обещанное древле, при Савватии чуднем, ныне тобою исполнися, отче: постник бо множество к тебе пришедше, и добродетелем прилежат, тобою просвещаеми, Зосимо.

Богородичен: Богородицу Тя от души, Владычице мира Благая, исповедающия спасай, Тебе бо заступление непобедимо имамы, истинную Богородительницу.

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Слезами твоими, отче, потопил еси умныя египтяны, имиже очистився, Чистому приближился еси и благодать привлече исцеления, благоутробне. Бедствующии ны зле, требующия твоея помощи, спаси.

Сланое, отче, неверия море истекающими от тебе силами и знаменьми возмущается, и злочестие благочестием лопи изменяется, и тьма неведения Богоразумием просвещается, Зосимо.

Предстательствовати страждущим благодать, отче, имея, никакоже медли, но предвари и руку помощи подаждь нам, зле страстьми одержимым: вси бо, призывающии тя верно, от бед спасаются.

Богородичен: Пречистая Владычице, рождшая земным Окормителя и Господа, страстей моих непостоянное и лютое разжени смущение и тишину подаждь сердцу моему.

Кондак, глас 8

Христовою любовию уязвися, преподобне, и Того Крест славный, на рамо взем, понесл еси, божественне вооружився, и непрестанныя молитвы, яко копие в руце, имый, крепко ссекл еси бесовская ополчения. Тем зовем ти: радуйся, преподобне отче Зосимо, монахов удобрение.

Икос

Услышав Христов глас, оставил еси плотская мудрования, богатство же и славу, яко прах, вменив, на страсти, яко безплотен, подвизался еси, и Безплотных ликостоянию уподобился еси, и разума дарование приял еси, еже подаждь в песнех поющим ти сице: радуйся, Зосимо преподобне и Богоносе, Небесный человече и земный Ангеле. Радуйся, яко кроме мира суетнаго пустыню соделав в морском острове, в нем обитель составил еси. Радуйся, яко в ней множество монахов собрася, и от них слышиши сице глаголемое: радуйся, монашествующим спасения ходатай; радуйся, унывающих образ утешения; радуйся, монахом от навет вражиих избавителю; радуйся, скорбей губителю нашего естества, яко отгониши помыслы злобныя; радуйся, скорбящих душею сладкое утешение и радости Божественныя подателю; радуйся, наш предстателю и избавителю; радуйся, преподобне отче Зосимо, монахов удобрение.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

В мори являяся, от бед спасаеши, Зосимо преподобне, призывающе бо тя на помощь, и тепла помощника всем ведяще бывающа, и быстра заступника стяжавше, зовут: благословен Бог отец наших.

Яже от лютаго беса насилуемая жена праведне тобою запрещается, безумне Избавителя не призвавшая и тя, к Нему молитвенника, Зосимо. Тая исцеление от напасти получи, поющи: благословен Бог отец наших.

Иже злыми присно обуреваемии и страстьми содержимии, к тебе прибегаем, Богови молитвенника тя предлагающе, Зосимо преподобне. Темже милостивно посещай нас, отче, да, тобою спасени, поем: благословен Бог отец наших.

Богородичен: Очистилище естеству Ты еси, едина Богоблаженная, на рамех бо Херувимских седящаго Бога дланьма носила еси, вопиющи: благословен Бог отец наших.

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

Лоза плодовита, отче, душа твоя бысть, вино умиления искапающи нам, страсти очищающее и души божественне веселящее, от малодушия возставляющее. Темже и, благодушны бывше, усердно поем: благословите, вся дела Господня, Господа.

Подобонравное добродетелей, отче Зосимо, отцу Савватию и равноподвижное исправление совокупи тя в премирных ему. Отонудуже, являющеся вкупе, спасаете поющия: благословите, вся дела Господня, Господа.

Двоице Богоугодная, равночестнии отцы, едино достояние вечныя славы стяжавше, от лютых нас изымати не престайте, вопиющих, яко равномощно дерзновение имуще ко всех Владыце: пойте, благословите, вся дела Господня, Господа.

Богородичен: Златозарный Тя, Дево, свещник предвообрази, прияла бо еси несказанно Свет Неприступный и сиянием Твоим озаряеши концы. Темже Тя поем, Чистая, и превозносим во веки.

Песнь 9

Ирмос: Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.

Представил еси себе жертву чисту Богу, преподобне отче, все желание добродетельми возложив, имиже сияя, просвещаеши приближающихся к прославляющему тя по успении Господеви, предстателя показавшему сущим в нуждах.

Высотою делания к Небеси взятся, отче вселюбезне, ко оному блаженству преложился еси, Егоже в житии болезненне не престал еси, взыскуя, и, трудами покой обрет, тамо певцы твоя ходатайством твоим возведи.

Приими с любовию ти песнь приносимую, преподобне отче, и подаждь оставление прегрешений и страстей пременение, и Божественнаго света осияния сподоби, тамо управляя, идеже ты во светлых селех троичныя зари, Зосимо, пребываеши.

Богородичен: Мертвым воскресение ныне даровася Твоим несказанным и неизреченным рождеством, Богородице Всечистая: Жизнь бо от Тебе, плотию обложшися, всем возсия и смертное смешение яве разруши.

Светилен

Насаждену ти в дому Божии, воистину, яко финикс, псаломски процветает твоя обитель, умножая тебе чада, иже твою, отче Зосимо, память празднуют светло.

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Просвещением Трисолнечнаго Божества озарившеся, премудрии, светильницы явистеся, просвещающе верных, страстей темностию омраченнаго мя обновите молитвами вашими, святии, к Человеколюбцу, светоносную вашу память чтуща.

Совесть имеюще к Богу неоскудно и око сердечное взирающе к Богоначальному Свету, в молитвах предстояще, Зосимо преподобне и Савватие пребогате, страстей наших тьму молитвами вашими отгоните.

Храм бысте Святому Духу и Тому душевное возложисте желание, преподобнии отцы, сего ради кротких землю наследовасте. Укротите настоящую бурю сердец наших, да, в тишине Божественней бывше, песнословим ваша подвиги и жизнь некончаемую.

Богородичен: Плотию рождши Безплотнаго, Богородице Пречистая, страсти лютыя ума моего утоли, Дево, и исправи мя, заблуждшаго, Мати Божия, яко да славлю Тя.

Песнь 3

Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.

Исполнивше сердца своя слезными потоки, преподобне Савватие и Зосимо Богомудре, и плоти своя умертвивше постом и воздержанием, святии, души же Божественными даровании просветивше, плодоносну износите раку чудес ваших явлении, преблаженнии.

Высотою смирения украшаеми, преподобнии, все убо желание ко Владыце своему простросте, ярость же на бесы, Богоноснии, показасте изрядными делы своими, постом и молитвами.

Образ бысте своим учеником, к добродетелем и к высоте их возводяще Божественнаго желания, и исцеления источают безчисленная гроби ваши, преподобнии отцы, и отгоняют от человек болезни телесныя и душевныя, страсти врачуют подвиги вашими, всечестнии.

Богородичен: Из ложесн Твоих возсия преславно Великое Солнце, Христос Бог, Богородице Дево, и, вся земныя концы просветив, преподобных лики честно венчал есть.

Седален, глас 4

Житейское море воздержанием безбедно преплысте и ко пристанищу мысленному безстрастия, радующеся, доидосте, преподобнии отцы Зосимо и Савватие, Богомудрии и преблаженнии; молите Христа Бога спастися душам нашим.

Песнь 4

Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

Землю дольную преминувше, Небесную стяжасте жизнь и со Безплотными лики смесистеся, преподобнии, премудрости рачителие явистеся пребогатии, житие бо непорочно поживше, храми Святому Духу бысте, очищени душею и телом, и землю кротких наследовасте, согласно взывающе: слава силе Твоей, Господи.

Очистивше ум свой от страстныя молвы, славнии, и Христову смирению подражавше, преподобне Савватие и Зосимо чудне, безстрастие стяжавше, и гордыню бесовскую до конца низложивше и на землю повергше, к небурному пристанищу устремистеся, в морский остров, согласно воспевающе: слава силе Твоей, Господи.

Возсиявше, яко солнце от востока, чудес лучами и ангельскому житию поревновавше, преподобнии, непрестанными молитвами, земныя печали отложивше, Небесныя надежды стяжати сподобистеся, усердно поюще: слава силе Твоей, Господи.

Богородичен: Блажит Тя, Пречистая Богородице, всяк возраст и всяка душа верных, Божие бо Слово паче ума и слова родила еси, Препетая.

Песнь 5

Ирмос: Света Подателю и веков Творче, Господи, во свете Твоих повелений настави нас, разве бо Тебе, иного бога не знаем.

Возсия в вас Господь, Егоже от души возжелели есте видети, преподобне Савватие и Зосимо прехвальне, внутреннима очима зрите доброту неизреченную Христа Бога нашего, любве ради Его в морский остров вселистеся и Того славы наслаждаетеся непрестанно и пищи неизреченныя.

Единой Христове любви присвоистеся, преподобнии, и всею душею потщастеся умертвити плотская взыграния богоприятными вашими молитвами, и исполнителие заповедем Божиим бысте, и многих чудес обретосте благодать.

Беззлобив и кроток бысть, Зосимо, вся злобы и стрелы вражия погубль, милостив же до конца явися, Савватие, милость душевную стяжав от Единаго Бога. Благодать и милость приемше, свыше нас посещайте, преблаженнии.

Богородичен: Воспойте Господеви, вся земля, и пойте вси Явльшемуся из чрева Девы, неизреченно и боголепно из Неискусобрачныя, и Сию верным Показавшу тверду надежду и похвалу.

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Силою Христовою укрепляеми, преподобнии Савватие и Зосимо, вся коварства лукаваго низвергли есте на землю священными молитвами, Богоблаженнии, и ныне безстрастия умом очищенным предстоите Богу Вседержителю, от Негоже знамения и чудеса испросивше, угодницы Христови, пресветли явистеся.

Богомудренными помыслы украсившеся, и яже на земли преобидесте тленная, и Небесное богатство восприясте, блаженнии супрузи Христови, Савватие премудре и Зосимо преподобне, и ныне на Небесех, радующеся, живете. Иже с верою к раке мощей ваших притекающим подавайте исцеления неоскудно, полки прогоняюще бесовския.

Божественных повелений, отцы святии, нравы стяжасте, смирение и любовь, кротость же и незлобие. И сего ради, лукаваго змия умертвивше священными вашими молитвами, Богоблаженнии, от Христа Бога дарование богатно прияли есте, исцелений же дары требующим подаваете.

Богородичен: Душевныя моя страсти, Пречистая, исцели, Яже безстрастия бывши источник, Мати Божия, и просвети мя Рождеством Своим, преподобных молитвы приемлющи.

Кондак, глас 2

Христовою любовию уязвившеся, преподобнии, и Того крест, на рамо вземше, понесли есте, божественне вооружившеся на невидимыя враги и непрестанныя молитвы, яко копие в руках, имуще, крепко победили есте бесовская ополчения; благодать Господню приемше целити недуги душ и телес притекающих к ракам честных мощей ваших, чудес лучи испущаете всюду. Тем зовем вам: радуйтеся, преподобнии отцы Зосимо и Савватие, монахов удобрение.

Стихира, глас 6

Преподобнии отцы, слух свой смиренно Евангелию Христову приклонивше, призывание от Вышняго во обители Небесныя приясте и, Тому верно последующе, мира красная во уметы вменивше, единыя доброты вожделесте Христа; Емуже прилежно молитеся низпослати мирови мир и Церквам единомыслие, стране нашей на враги одоление и душам нашим велию милость.

Песнь 7

Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.

Всех текущих и временных страстей свободися, преподобне Савватие, всю бо надежду стяжав к Богу. Ты же, блаженне Зосимо, всем желанием прилепися воздержанием твердым своему Владыце. Сего ради действуете преславная чудеса поющим: отец наших Боже, благословен еси.

Просветивше своя сердца оружием молитв ваших, начальницы бысте морскаго острова обители, учаще и наказующе дети своя и вся возводяще к Свету Богоразумия, с Небес приемше благодать недуги целити, и прокаженныя очищати, и бесы изгоняти, и от морских бед избавляти взывающих верно: благословен Бог отец наших.

Плод духовный и жертву непорочную, преблаженне Зосимо, житие свое Владыце принесл еси. Ты же, Савватие Богомудре, плоть свою духови повинув, в воздержании всяком пожил еси, в трудех и во бдениих, прехвальне, имея совесть чисту и житие непорочно, воспевая: благословен Бог отец наших.

Богородичен: Оружие, Чистая, хранящее прежде врата Едемская, плещи, Девице, всем дает, низложившим врага - губителя постническими борении и всегда взывающим верно: благословен, Пречистая, Плод чрева Твоего.

Песнь 8

Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.

Мыслию очищенною, премудре Савватие, к Богу приближашеся и всем всяк бысть, да Христа приобрящеши. Ты же, преподобне Зосимо, праведен явися, и нищим питатель, и убогим заступник, мужества, и мудрости, и целомудрия рачитель. Сего ради с похвалами бывает память ваша, Содетелю и Избавителю взывающии: благословите, вся дела Господня, Господа, пойте и превозносите Его во вся веки.

Слез твоих капли погасиша огнь греховный, преподобне Савватие, реку же чудес твоих показал еси всем зрящим, всякия страсти потопляющу притекающих к тебе, прехвальне. Невозвратно же шествовал еси путь ведущими стезями к Небеси, Зосимо досточудне, от злых и плотских до конца удалился еси, поя: благословите, вся дела Господня, Господа, пойте и превозносите Его во вся веки.

Богоноснаго Зосиму похвалами вси почтим, яко благодати Божественныя исполнена и сиянии духовными просвещена изрядно; Савватия же, яко веру, и надежду, и любовь стяжавша неразориму и яко пресветлу звезду, сияющу в духовных добродетелех изрядно, Содетелю и Избавителю вопиюща: дети, благословите, священницы, пойте и превозносите Его во вся веки.

Богородичен: Спаси мя, Маги Божия, спасению начало мирови явльшися, избавляющи мя молвы нечистых страстей и всякия противныя скорби, да славлю Тя, Богородице.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная, тем Всепетую Богородицу величаем.

Процвел еси в подвизех постнических, прехвальне Савватие, яко шипок благовонен, и, яко кедр благоуханен, верных сердца облагоухал еси. Струями же слез твоих, преподобне Зосимо, очищся, ныне Света Трисолнечнаго наслаждаешися, отче Богомудре, Троичному предстоя Престолу, светозарными зарями просвещен.

Яко велие солнце, провозсия нам величием подвиг страданий твоих, преподобне Зосимо, вся концы просвещая светом Богоразумия, темже, и умер, яко жив являешися. Савватие премудре, отверзеся тебе Царствие Небесное, скончавшу ти доброе течение, видеша же Ангели подвиги трудов твоих и удивишася, темже и Христос тебе воздаяние почести, яко угоднику Своему, дарует. Сего ради вас, преподобнии, ублажаем.

Слез твоих тучами греховный огнь погасил еси и своему Владыце Христу угодил еси, преподобне Савватие, крепко сокрушил еси бесовския полки. В постнических же подвизех и трудех процвел еси, блаженне Зосимо, яко шипок благоуханен, и, яко кедр в Ливане, умножил еси чада твоя добродетельми и чудесы. Темже покланяемся раце мощей ваших и верно ублажаем вас, отцы досточуднии.

Богородичен: Пощади мя, Господи, пощади, егда хощеши судити, и не осуди мене во огнь, ни яростию Твоею обличи мене. Молит Тя Дева, чисто рождшая Тя, Христе, и ангельстии собори, и преподобных ликове.

Молитва

О преподобнии и Богоноснии отцы наши Зосимо и Савватие, земнии ангели и Небеснии человецы, ближнии друзи Христови и угодницы Божии, обители вашея славо и украшение, всея же северныя страны, паче и всего Православнаго отечества нашего, необоримая стено и великое заступление! Се мы, недостойнии и многогрешнии, с благоговейною любовию к ракам честных мощей ваших припадающе, духом сокрушенным и смиренным прилежно вас молим: молите непрестанно Благосердаго Владыку и Господа нашего Иисуса Христа, яко дерзновение велие к Тому имущии, да не отступит от нас Его вседействующая благодать, покров же и заступление Пресвятыя Владычицы нашея Богородицы на месте сем да пребудет, и да не оскудеют никогдаже истиннии ревнители ангельскаго жития во святей обители сей, идеже вы, Богоноснии отцы и начальницы, безмерными труды и пощении, токи же слезными и всенощными бдении, непрестанными молитвами и молении начало иноческому житию положисте. Ей, угодницы святии, молитвенницы к Богу благоприятнейшии, теплыми вашими к Нему мольбами оградите и сохраните ны и святое селение сие ваше от труса, потопа, огня и меча, нашествия иноплеменных и смертоносныя язвы, от вражды и всяких нестроений, от всякия беды и скорби и от всякаго зла, да непрестанно на месте сем в мире и безмолвии благочестно славится пресвятое Имя Господа и Бога, и обретают вечное спасение ищущии Его. О преблаженнии отцы наши Зосимо и Савватие! Услышите ны, грешныя, во святей обители вашей и под кровом вашего защищения недостойно жительствующия, и благомощными вашими к Богу ходатайствы испросите душам нашим грехов оставление, жития исправление и вечных благ восприятие в Небеснем Царствии; всем же верующим, иже на всяком месте и во всякой нужде призывают вас в помощь и заступление и иже с благоговейною любовию во обитель вашу притекают, не престаните изливати всякую благодать и милость, сохраняюще их от всякия сопротивныя силы, от всякия напасти и от всякаго злаго обстояния и подающе им вся потребная к душевней и телесней пользе. Наипаче же молите Премилосердаго Бога, да утвердит и укрепит Церковь Свою святую и все наше Православное отечество в мире и тишине, в любви и единомыслии, в правоверии и благочестии да сохранит и соблюдет во веки веков. Аминь.

Ина молитва

О преподобнии отцы, велицыи заступницы в скорби и услышателие молитв, угодницы Божии и чудотворцы Зосимо и Савватие! Не забудите, якоже обещастеся, посещати чада ваша. Аще бо и отыдосте от нас телом, но духом присно с нами пребываете. Молим убо вы, о преподобнии: избавите ны от огня и меча, от нашествия иноплеменников и междоусобныя брани, от тлетворных ветров, и от напрасныя смерти, и от всех прилогов бесовских, находящих на ны. Услышите нас, грешных, и приимите молитву сию и моление наше, яко кадило благовонное, яко жертву благоугодну, и души наша, злыми делы и советы и помыслы умерщвленныя, оживите, и, якоже умершую отроковицу востависте, якоже неисцельныя раны многих исцелисте, от духов нечистых зле мучимых избависте, тако и нас, содержимых в узах вражиих, измите, и от сетей диавола избавите, из глубины прегрешений изведите, и милостивым вашим посещением и ходатайством от врагов видимых и невидимых оградите ны благодатию и силою Всесвятыя Троицы, всегда, ныне, и присно, и во веки веков. Аминь.

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Просвещением Трисолнечнаго Божества озарився, преподобне, светильник сияя явился еси, просвещая верно светоносную твою память чтущия.

Совесть имел еси благу и око сердечное взирающее к Богу, темже и Христос внят молитве твоей, мудре, и с преподобными сочта тя.

Весь Троицы был еси жилище и тамо душевное возложил еси желание, преподобне, сего ради вечную память восприял еси и жизнь некончаемую.

Богородичен: Плотню рождши Безплотнаго, Богородице Чистая, страсти лютыя утоли ума моего, Дево, и исправи мя, Мати Божия, заблуждшаго, яко да славлю Тя.

Песнь 3

Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.

Наполнив сердце твое слезными потоки, преподобне Савватие, плоды всяких добродетелей износящее, чудес показанием, преблаженне.

Высотою смирения украшаемый, преподобне, низвергл еси на землю велехвальнаго, Савватие, отче преблаженне, изрядными делы твоими, постом и молитвами.

Исцеления безчисленная источает гроб твой, преблаженне отче, и отгонит болезни человеческия, и душевныя врачует страсти похваляющих труды твоя, всечестне.

Богородичен: Из ложесн Твоих возсия преславно Великое Солнце, Христос Бог, Богородице Дево, вся земныя концы просветив, и преподобных лик честно прият.

Седален, глас 4

Житейское море воздержанием без труда преплыв, ко пристанищу тихому безстрастия, радуяся, пристал еси, преподобне отче наш Савватие, богомудре и преблаженне.

Песнь 4

Ирмос: Пришел еси от Девы не ходатай, ни Ангел, но Сам, Господи, воплощься, и спасл еси всего мя, человека. Тем зову Ти: слава силе Твоей, Господи.

Землю дольнюю преминув, Небесную стяжал еси жизнь, и со безплотными лики смесился еси, преподобне Савватие, соделав душу твою храм Духа Святаго, и кротких землю наследовал еси.

Яко Христово, смирение возлюбив, преподобне Савватие, стяжал еси безстрастие, смирив же всю демонскую гордыню, блаженне, низложив, низвергл еси.

Возсияв, яко солнце от востока, чудес лучами и ангельскому житию поревновав, непрестанными молитвами, преподобне, просветил еси всю подсолнечную.

Богородичен: Блажит Тя, Пресвятая Богородице, всяк возраст и всяка душа верных, Божие бо Слово паче ума и слова родила еси, Препетая.

Песнь 5

Ирмос: Света Подателю и веков Творче, Господи, во свете Твоих повелений настави нас, разве бо Тебе иного бога не знаем.

Возсия тебе Господь от Девы, Егоже возжелел еси, преподобне Савватие, жилище имеющу в морстем острове любве ради Его, и ныне Того славы наслаждаешися непрестанно.

Единой Христове любви, преподобне Савватие, приложився и всею душею потщався исполнитель Божиих заповедей быти, и многих чудес, преподобне, приял еси благодать.

Незлобив и кроток быв, вся злобы вражия погубил еси, и, милостив до конца явлься, милость душевную стяжал еси от Единаго Бога, и благодать и милость приял еси истинную.

Богородичен: Воспойте Господеви, вся земля, пойте вси явившемуся из чрева Девы неизреченно и Сию верным показавшему твердую надежду и похвалу.

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Силою Христовою укрепляемь, преподобне Савватие, вся коварства лукаваго низвергл еси и ныне безстрастия умом очищенным предстоиши Богу Вседержителю, на Негоже все желание возложил еси.

Твоя, всеблаженне Савватие, преподобныя мощи, во гробе лежаще, недуги врачуют, демонския же полки отгоняют всегда от души приходящих с верою.

Божественных повелений, отче, нравы стяжав, кротость, и безмолвие, и смирение, сего ради от Благодетеля Бога богатно дарование приял еси, исцеления дар требующим даруеши.

Богородичен: Душевныя моя страсти, Пречистая, исцели, Яже Безстрастия бывши источник, просветившая преподобных лики Рождеством Твоим.

Кондак, глас 2

Житейския молвы отбег, вселился еси в морский остров, мудре, и, крест твой взем, Христу последовал еси, в молитвах, и во бдениих, и в пощениих, злостраданьми плоть твою изнуряя: тем был еси преподобных удобрение. Сего ради любовию память твою празднуем, преподобне Савватие, моли Христа Бога непрестанно о всех нас.

Икос

Како возмогу твоя премногая чудеса, отче, изрещи или труды твоя и злострадания, имиже потрудился еси, преподобне Савватие, аще не ты, святе, подаси ми слово, недостойному рабу твоему? Ты бо еси монахов похвала и утверждение, с нимиже Христа Бога моли непрестанно о всех нас.

Песнь 7

Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.

Всех текущих, привременных страстей, преподобне Савватие, сподобился еси убежати, всю надежду стяжав к Богу, Егоже ради действуеши, блаженне, преславная чудеса, поя: отцев наших Боже, благословен еси.

Оружием молитв твоих лукавыя победив полки, с Небесе благодать приял еси целити недуги и прогоняти демоны от взывающих верою: благословен Бог отцев наших.

Плоть твою повинув духу, отче преподобне Савватие, в воздержании всяцем пожил еси, в трудех и бдениих, прехвальне, имея чисту совесть, житие Небесное, воспевая: благословен Бог отцев наших.

Богородичен: Оружие, Чистая Дево, хранящее прежде врата Едемская, плещи всем дает, низложившим постнически борителя врага и присно взывающим: отцев наших Боже, благословен еси.

Песнь 8

Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа, и превозносите во вся веки.

Мыслию очищенною, преподобне Савватие, к Богу приближаяся и всем всяк быв, да Христа приобрящеши, моли спасти вся поющия тя, преподобне отче.

Слез твоих капли погасиша огнь греховный, реку же чудес показал еси всем нам, всякия страсти потопляющу притекающих к тебе, отче прехвальне.

Веру и надежду неразориму и любовь истинную имел еси, отче, и божественное прирадение, терпение благо и поучение духовных словес, смиренномудрие и совершенное беззлобие.

Богородичен: Спаси мя, Мати Божия, начало спасения мира явльшися, избавляющи мя молвы, и нечистых страстей, и всякия противныя скорби, да Тя славлю во вся веки.

Песнь 9

Ирмос: Безначальна Родителя Сын, Бог и Господь, воплощься от Девы, нам явися омраченная просветити, собрати расточенная. Тем Всепетую Богородицу величаем.

Процвел еси в подвизех постнических, прехвальне отче наш Савватие, яко шипок благовонен, и, якоже крин, объюхал* еси совести верных добродетельми и чудесы. Темже, преподобне, отжени от нас страсти смердящия.

Отверзеся тебе, отче, Небесное Царствие, скончавшему доброе течение, и видиши, яже Ангели видят, и трудов воздаяние тебе подает почести Христос, чествуя тя, Своего угодника. Темже тя, преподобне, ублажаем.

Слез твоих пролитием огнь греховный погасил еси, Богу угодив, Савватие преподобне, сокрушил еси демонов козни. Темже, предстояще раце мощей твоих, верно ублажаем тя, досточудне.

Богородичен: Пощади мя, Господи, пощади, егда хощеши ми судити, и не осуди мене во огнь, ниже яростию Твоею обличи мене: молит Тя, Христе, рождшая Тя Дева, и ангельстии чини, и преподобных собори.

Светилен

Святыни храм был еси, блаженне, по божественному причастию, райский гражданин, в немже напитаваешися невозбранно древа разумнаго и нетленныя славы, память творя, Савватие, отче богомудре, верно хвалящих тя.

____________________

*Объюхал - облагоухал

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Препетая Соестественная Троице, Преблагий Боже, Иже паче ума дары рабом Своим дая, и моему мрачному уму светлую посли благодать, всех страстей очищающую, песнь ныне начинающу ми.

Твоя похвалы начати хотящу ми, Савватие, молитвами твоими посли благодать, страсти души и телесе очищающу ми и ум просвещающу, да воспою твоя подвиги, преподобне.

Желание божественно в сердцы прием, усердно мирскаго многоволненнаго смущения отбег, к тихому пристанищу безмолвия прииде. Темже и Христос изволение твое прият, отче.

Богородичен: Без семене Отчею волею от Божественнаго Духа Божия зачала еси Сына и плотию родила еси, Пречистая, Иже из Отца без матере и нас ради из Тебе без отца.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Возвеселил еси, отче, над всеми Сущаго Бога терпением своим, темже тя достойно прослави.

Показа тя Христос, Савватие, звезду пресветлу, крыющася, яко во облаце, в пустыни, чудесы озаряюща нас.

Добродетелей труды и поты, Савватие, покой со всеми святыми приял еси, ихже и возвеселил еси своим житием.

Богородичен: Ты едина сущим на земли иже паче естества благих Ходатаица, Мати Божия, явися, темже Ти, радуйся, вопием.

Седален, глас 8

Постничеством вооружився, блаженне, страсти победив и плоть покорив духови, бесовом прогонитель показася, и недуги целя. Темже, любовию память твоего успения почитающе, просим восприяти исправление житию и миру умирение, вопиюще ти: преподобне Савватие, отче наш, моли Христа Бога грехов оставление подати чтущим любовию святую память твою.

Песнь 4

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.

В место от места преходя, бегая славы человеческия, Небесныя славы рачитель был еси, отче преподобне.

Терпеливно труд проходил еси в киновии, томя плоть и порабощая разумне, добрыми утверждаяся.

Болезнь болезньми отражати разсудив, волею в работу вдаваяся Христа ради, страстей работы избежал еси.

Богородичен: Неискусобрачно родила еси, о Дево, и по Рождестве паки явилася еси девствующи, темже немолчными гласы, еже радуйся, Тебе, Владычице, верою несумненною вопием.

Песнь 5

Ирмос: Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.

Разгнав страстей мрак, отче, к свету добродетелей дошед и светел быв, мрачныя духи лукавствия отгоняеши от человек, Савватие.

Тьму бесов потребляя, Савватие, чистыми ти молитвами, тьму грехов моих потреби, отче, чистоту добродетелей наставляя мя творити.

Страстьми очернена мя, отче, прилоги чуждаго всего бывша, предстатель теплый буди ми, всякаго зла избавляя и исцеляя струпы язв моих.

Богородичен: Тя оружие непобедимое на враги предлагаем, Тя утверждение и надежду нашему спасению, Богоневесто, имамы.

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

Прешед море, в пустем отоце вселяешися, страстей море изсушая и то немокренно проходя, крестовидным пощением разделяя, в твердости добродетелей вселяяся, отче, бесов крепость разрушил еси.

Во успении твоем, отче, бури велии бывшей, Иоаннови стремление уставляет и твоему погребению служит, Феодор же от истопления в мори предстательством твоим преславно спасается, Господу тя прославляющу.

Вси иже в мори обуреваемии к твоему предстательству прибегают, и, тя призывающе, бедующии спасаются, и нас, бедствующих люте и напастьми одержимых, милостивно, отче, представ, спаси.

Богородичен: О, чудо, еже всех чудес новейшее! Яко Дева во утробе Иже всяческая Содержащаго словом, неискусомужно приемши, нетесно вмести.

Кондак, глас 3

Яко звезда всесветлая, добродетельми сияющи, чудес лучи испущающи, обоюду богатя приходящих, души исцеляеши и телеса, благодать имея, Савватие, прославляет бо Своя Си Великий Дародатель.

Икос

Простри ми руку Твою, благодать подающу, Блаже, Едине Господи Боже, да восхвалю Твоего раба, яко, мира вся презрев, усердно Тебе последова, Твоему неизреченному, еже в наше спасение, странствию, Владыко: странен бывая, служа паче, а не слугуемь, обходя же и ратуя врага, егоже и низложи, сам себе оземствуя во отоце моря, желая прилепитися Богу. Темже, и умер, яко жив, близ всем бедующим обретается, бесы отгоняя, цельбы точа, прославляет бо Своя Си Великий Дародатель.

Песнь 7

Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.

Прославити восхотев Владыка и явити тя, таящася Своего раба, гроб твой знаменьми и силами обогати и в мори бедующих и тя призывающих спасает, вопиющих: благословен еси в храме славы Твоея, Господи.

Священный Зосима священныя твоя мощи, отче, нетленны обрет во гробе, усердно подъемлет, яко многоценное богатство нося, неистощимо сокровище своей киновии сокрыв, вопияше: благословен еси в храме славы Твоея, Господи.

Ни гроб, ходатай забвения, возможе твоя добродетели, отче, утаити: трубы бо яснейше знаменьми проповеда твоя болезни постническия, имиже Богови приближился еси, иже зря, чудный Зосима со ученики вопияше: благословен еси в храме славы Твоея, Господи.

Богородичен: Вышняго освященное Божественное Селение, радуйся, Тебе бо ради дается радость, Богородице, вопиющим Ти: благословенна Ты в женах, Всенепорочная Владычице.

Песнь 8

Ирмос: Руце распростер, Даниил львов зияния в рове затче; огненную же силу утасиша, добродетелию препоясавшеся, благочестия рачители, отроцы, взывающе: благословите, вся дела Господня, Господа.

Прилепися любовию ти, отче Савватие, блаженый Зосима, бдения присно нощию в гробнице ти творя, твою помощь на враги приемля и чадом своим заступника тя имея, с нимиже пояше: благословите, вся дела Господня, Господа.

Наследник отока, наследник и добродетелем ти, отче, блаженный Зосима снаследник и вечнаго ти блаженства бысть, отнюдуже и бедующим купно предстаете, темже спасаеми вопиют: благословите, вся дела Господня, Господа.

Двоице присноблаженная, яко едино блаженство имущая от Бога, версто предобрая, Савватие и Зосимо, нас, призывающих вы, теплым предстательством вашим от всех лютых спасайте, поющих: благословите, вся дела Господня, Господа.

Богородичен: Ты, едина во всех родех, Дево Пречистая, Мати явилася еси Богу, Ты Божеству бысть пребывание, Всенепорочная, не опалившися огнем Неприступнаго Света. Темже вси Тя благословим, Марие Богоневестная.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.

Восприем яко ныне трудов своих и потов, преподобне, честь и славу неистленну от Христа Бога, свыше нас назирай, твоя подвиги почитающих, богатныя ти дары богатно нам источая.

Ныне на Небесех праведным свеселяся, Савватие, с нимиже Христови предстоя, моли мир мирови подати, и Церквам единство, стране нашей победная, и всем скорбящим предстательство и спасение, отче.

Приими песнь твоего раба, отче, богатными благодатьми воздаждь грехов оставление, жития исправление, и лютых избавление, на Суде милость, и Небеснаго Царствия наследие, идеже ты пребываеши, отче.

Троичен: Едино убо Божественное Существо, но Составми Троицу, вси вернии, восхвалим, в неслиянных Составех Отца Пребезначальна, Сына и Духа Всесвятаго.

Светилен

Светильника, свыше просвещаемаго, озаренне детельми приемлюща, ныне памятию своею души наша освещающаго, достодолжно почтим.

Молитва

О преподобне отче, угодниче Христов Савватие, всею душею Господа возлюбивый, и удаливыйся в пустыню сию, и течение подвига спасительнаго совершивый! О верный рабе Царя Небеснаго, учителю добродетелей, образе смирения, гражданине пустынный, Ангелом собеседниче, Херувиме земный, человече Небесный! О свете немрачный отока Соловецкаго, паче же велие светило всея Церкве правоверных! Молюся ти, пречестне, аз, многогрешный (имя рек): услыши убогое мое моление, вонми глаголом нечистых устен моих, твоея ныне помощи требующаго. Се бо враг прелукавый на всяко время тщится мя погубити, иский горько поглотити душу мою, и несть мне спасения, идеже помощь прияти, зане немощию плоти моея обложен есмь и страстьми весь долу приклонихся, не имам к Богу дерзновения. Ныне же точию к твоему повергаю себе заступлению: помилуй мя, омраченнаго всеми злыми делы, воздежи о мне всечестнеи твои руце ко Господу, о молитвенниче теплый, Савватие преподобне, да за благоутробие щедрот Своих подаст ми грехов оставление, и в День Судный избавит мя вечнаго мучения, и Царствия Своего сподобит благодатию Своею, Емуже буди всегда слава, честь и поклонение во веки. Аминь.

Песнь 1

Ирмос: Поим Богу, от горькия работы фараоновы избавльшему Израиля и огненным столпом и светлым облаком наставльшему, яко прославися.

Слово ми подаждь, Слове Божий, во отверзение уст моих на похвалу угодника Твоего, преподобнаго Германа, пустыннаго жителя и монахов наставника и обители Соловецкия утверждения.

От юности безмолвное житие возлюбив, пустыннаго пребывания взыскатель был еси, преподобне, темже, улучив желаемое со блаженным Савватием, равноангельное жительство показал еси.

Богоизбраннаго во иноческое селение пустыннаго места острова Соловецкаго первый насельник явился еси, блаженне Германе, и купножитель и сподвижник преподобному Зосиме, с нимже обитель зде возградил еси.

Богородичен: Егоже родила еси во спасение всем верным, Пречистая Дево, моли прилежно, яко Зиждителя всех и Бога, помиловатися нам, рабом Твоим, Богородицу воистину Тя исповедающим.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.

Кто изречет подвиги и труды твоя, отче Германе? Ты бо, в дебри пустынныя вшед, день и нощь труждался еси, постом и бдением тело свое удручая.

Злостраданием и молитвою страсти душевныя от корене исторгл еси, воздержанием же и злых удалением вся плотская вожделения потребил еси, блаженне.

Бесов борения не возмогоша одолети тя в добрем произволении, но благою надеждею и крепким терпением вся козни их ничтожны сотворил еси.

Богородичен: Владычице мира, Благая Помощнице, Твоим всесильным предстательством сокруши вся востающия на ны силы вражия и вознеси рог людий Твоих.

Седален, глас 8

Возшед на высоту добродетелей, образ был еси учеником твоим, воздержанию и кротости, смирению же и послушанию тех наставляя, и, яко пастырь, стаду своему предходя, добре шествовати путем жестоким пустыннаго жития научил еси. Темже ублажаем твое успение, Германе преподобне, моли Христа Бога согрешений оставление даровати чтущим любовию святую память твою.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Напоив душу твою слезными потоки, соделал еси ю плодоносну и добродетели всякия износящу, темже путеводитель ко спасению многим был еси.

Аще и купно со блаженным Савватием в безмолвие пустынное вселился еси, обаче яко един Единому Богу молитвою непрестанною тамо беседовал еси, преподобне.

Ум просветлен жития чистотою имый, мысленныя прилоги лукавых демонов удобно низлагал еси, вся тех ухищрения и коварства обличая.

Богородичен: Блажит Тя, Пречистая, преподобных лик и всякое верных совокупление, Божие бо Слово паче ума и слова родила еси.

Песнь 5

Ирмос: Утренюет дух мой к Тебе, Боже, от Отца рожденному неизреченно и воздвигнувшему рог спасения нам.

Во плоти сый, безплотных жительству поревновал еси, блаженне Германе, темже победу на враги безплотныя приял еси от Бога и венец славы.

Вольную нищету возлюбив, в нестяжании безпечальное житие препроводил еси, сокровище некрадомое скрывая себе на Небеси, по словеси евангельскому.

Очистив себе от всякия скверны плотския и душевныя, приятелище Духу Пресвятому был еси, преподобне, от Негоже дарованиии духовными обогатился еси.

Богородичен: Тя надежду нашему спасению стяжахом, Богомати, и оружие непобедимое на враги видимыя же и невидимыя.

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.

Плакал и сетовал еси о разлучении с сожителем твоим, блаженным отцем Савватием, не обрет того в живых, егда возвратился еси во остров от путешествия твоего.

Радости и веселия исполнился еси, егда по разлучении Савватиеве обрел еси Зосиму преподобнаго, с нимже паки во остров вшел еси, Божиим смотрением направляемь.

Ангельския глаголы, к жене рыбареве бывшия, яко недостоит женам селитися во острове сем, возвестил еси Зосиме, церковь чудну на воздусе узревшему.

Богородичен: Бога, Егоже родила еси плотию, моли, Пречистая, яко Человеколюбца, ущедрити люди согрешшия.

Кондак, глас 4

Вышних желая, вся долу влекущая возненавидел еси и, отечество свое оставль, в поморие пустынное отшел еси, таже в морский остров удалився, в нем многа лета Господеви поработал еси. Темже, память твою празднующе, любовию вопием ти: радуйся, Германе Богомудре, отче наш.

Икос

Духу Святому в жилище себе уготовав, от Него всеми Божественными добротами украшен был еси и наставник монахом явился еси, отче, делы благими поучая чада твоя. Темже, память твою празднующе, взываем тебе таковая: радуйся, богоизбраннаго места острова Соловецкаго небесное насаждение; радуйся, селений иноческих Божественное удобрение; радуйся, пустыннаго жития любителю; радуйся, безмолвия добрый рачителю; радуйся, преподобнаго Савватия во остров Соловецкий приведый и сожитель ему бывый; радуйся, преподобному Зосиме в создании обители иноческия послуживый; радуйся, от нас купно с сими преподобными отцы ублажаемый; радуйся, на Небесех со всеми святыми от Христа Бога прославляемый; радуйся, Германе Богомудре, отче наш.

Песнь 7

Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.

Ничтоже земное предпочел еси паче Небесных и, яко злато в горниле, искусился еси, в послушаниих иноческих труждаяся и присно взывая: благословен еси, Боже отец наших.

Молитвою непрестанною Господеви прилепляяся, Тому Единому послужил еси и кончиною блаженною от земных удолий к Небесным обителем прешел еси, радостно поя: благословен еси, Боже отец наших.

Гроб твой, преподобне, благодатию Христовою цельбоподателен является, к немуже с верою притекающе и исцеления приемлюще, вопием Прославляющему угодники Своя: благословен еси, Боже отец наших.

Богородичен: Благословен Плод благословеннаго чрева Твоего, Егоже благословят Небесныя силы и преподобных собори, нас избавльшаго клятвы древния, Благословенная.

Песнь 8

Ирмос: Ангели и небеса, на Престоле Славы седящаго и яко Бога непрестанно славимаго, благословите, пойте и превозносите Его во веки.

Подвизався добре на земли и победив вся вражия действа, венчался еси славою на Небеси и лику преподобных сочетался еси.

Нетление мощей твоих являет, преподобне, яко обрел еси благодать у Бога и имаши наследие со святыми и со Ангелы ликостояние.

Яко обогатившуся всеми добродетельми в житии, благодать чудес даровася тебе по смерти, и точиши исцеления верно тя блажащим.

Богородичен: Спаси мя, Мати Божия, спасению начало мирови явльшая, избавляющи мя треволнения страстей и всякия скорби, да Тя славлю во веки.

Песнь 9

Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира.

Иерею благоговейну во отечествии твоем явлься, повелел еси списати образ твой и песнь тебе сложити, той же со тщанием сие сотвори, в похвалу твою и во славу Христа Бога, прославляющаго угодники Своя.

Икона твоя, на нейже вкупе со преподобными отцы Зосимою и Савватием изображен был еси, чудотворна явися, еже бысть во изъявление святыни твоея, яко да память твоя со святыми почитается.

Аще и не на месте подвигов твоих преставился еси, отче преподобне, обаче честныя мощи твоя пренесены быша во обитель твою, идеже во храме, имени твоему созданнем, святолепно почивают.

Богородичен: О, чудесе, всех чудес превышшаго! Яко Дева, во чреве всяческая Содержащаго словом неискусомужно приимши, без истления родила еси.

Светилен

Яко воистину звезда путеводная явился еси, Германе преподобне, блаженным отцем нашим Зосиме и Савватию и с ними множеству монахов, приведшая их в немятежное пристанище Соловецкаго острова и светлостию жития твоего озаряющая стези пустыннаго жительства нам, почитающим святую память твою.

Кондак 1

Избранный чудотворче и изрядный угодниче Христов, отче наш Германе преблаженне, пустыннаго жития на острове Соловецстем первоначальниче, восхваляем тя любовию; ты же, яко имея дерзновение ко Господу, от всяких нас бед и скорбей свобождай, да зовем ти:

Радуйся, отче наш Германе, преподобных Зосимы и Савватия сподвижниче.

Икос 1

Ангельски пожив, яко ангел безплотен на земли явился еси, преподобне отче наш Германе; ты бо евангельскаго гласа послушав, от юности иго Христово на рамо свое взем, в пустыню потекл еси, и, упование все на Бога возложив, Тому ревностно служити возжелал еси. Сего ради восхваляем тя сице:

Радуйся, родителей твоих плоде благословенный; радуйся, Господа твоего благий рабе и верный.

Радуйся, яко Христа единаго возлюбил еси; радуйся, яко многая лета на острове пустыннем Богу служил еси.

Радуйся, иго Христово на себе вземый; радуйся, от Подвигоположника Христа дар исцелений приемый.

Радуйся, яко красная мира сего нивочтоже вменил еси; радуйся, в бреннем телеси, яко безплотен, пожил еси.

Радуйся, в страсе Божии издетска воспитанный; радуйся, на подвиги иночества от Господа призванный.

Радуйся, места рождения твоего града Тотьмы похвало и утверждение; радуйся, обители Соловецкия славо и ограждение.

Радуйся, отче наш Германе, преподобных Зосимы и Савватия сподвижниче.

Кондак 2

Видя, яко надлежит человеку прилежно злая от юности его терпети, усердно потщался еси совлещися ветхаго человека, тлеющаго в похотех его, и облещися в новаго, по Богу созданнаго в преподобии и правде; темже слезами покаяния день и нощь душевную ниву твою орошал еси, терния грехов и страстей искореняя, Христу же поя: Аллилуиа.

Икос 2

Разум просвещен свыше имея, провидел еси, отче Германе, будущая яко настоящая, и егда преподобный Зосима узре свет, осиявый место, на немже живяше, и церковь велию на воздусе, на востоце явльшуюся, тогда пророчески рекл еси ему, глаголя: «Не ужасайся и внимай себе, яко Господь чрез тя монахов множество соберет зде». Мы же, проречения твоего исполнение видяще и сему дивящеся, тако глаголем ти:

Радуйся, душетленных сластей мира сего не познавый; радуйся, премудрости небесныя взыскавый.

Радуйся, яко добре на земли подвизался еси; радуйся, яко козней демонских не убоялся еси.

Радуйся, некнижным путь верный к небесем показавый; радуйся, в молитве и трудех непрестанно пребывавый.

Радуйся, яко нерадивых молитвою твоею к покаянию воздвизаеши; радуйся, яко изнемогающих и унывающих силою благодати укрепляеши.

Радуйся, вольную Христа ради нищету возлюбивый; радуйся, в нестяжании безпечальное житие проводивый.

Радуйся, яко лучами добродетелей твоих иноков просвещаеши; радуйся, яко от всякия напасти их ограждаеши.

Радуйся, отче наш Германе, преподобных Зосимы и Савватия сподвижниче.

Кондак 3

Сила Вышняго укрепи тя, егда, приступая работати Господеви, по слову Писания, душу твою во искушение уготовал еси, постом, бдением и многими лишении в пустыни тело твое изнуряя, душу же молитвою непрестанною питая, во псалмех и пениих и песнех духовных воспевая сердцем и усты Богу: Аллилуиа.

Икос 3

Имея ревность о спасении души своея, дом отчий и вся красная мира сего оставил еси, угодниче Христов, и мужественно в пустыню вселился еси, сподвижник и сотаинник преподобным Савватию и Зосиме был еси; темже и на небеси купно с ними мзду трудов своих обрел еси, идеже слышиши от нас похвалы сия:

Радуйся, преподобных Савватия и Зосимы сожителю; радуйся, преподобных совершеннаго безмолвия любителю.

Радуйся, яко тесный путь паче широкаго избрал еси; радуйся, яко непрестанною молитвою дары духовныя стяжал еси.

Радуйся, святым древним отцем ревновавый; радуйся, всего себе на служение Богу предавый.

Радуйся, яко демонския полки всеконечно погубил еси; радуйся, яко ангельския лики возвеселил еси.

Радуйся, плоти угодия никогдаже творивый; радуйся, притекающим к тебе отец чадолюбивый.

Радуйся, яко во плоти сый риз греховных до конца совлеклся еси; радуйся, яко образ Божий в себе благодатию Христовою возставил еси.

Радуйся, отче наш Германе, преподобных Зосимы и Савватия сподвижниче.

Кондак 4

Бурю уныния и напастей, от врага спасения подвижником благочестия наводимую, молитвою отгоняя и в непрестанных трудех пребывая, помощию Божиею достигл еси тихаго пристанища, покоя душевнаго, благодарне Благодетелю Богу взывая: Аллилуиа.

Икос 4

Слышавше ревнителие равноангельнаго жития, яко на острове Соловецстем преподобнии oтцы Зосима и Герман обитель боголепнаго Спасова Преображения устрояют и ищущих спасения братолюбно приемлют, Божиим Духом движимии притекаху к има, просяще наставления и руководительства. Мы же, суетою омраченнии, тебе, яко общаго наставника, отче наш Германе, прославляем звании сими:

Радуйся, плоть твою духови покоривый; радуйся, трудом, бдением и постом ю изнуривый.

Радуйся, яко слез твоих струями ниву душевную напоил еси; радуйся, яко вся помыслы душепагубныя от себе удалил еси.

Радуйся, стрелою любве Божественныя сердце твое уязвивый; радуйся, немощи немощных, яко сильный, на себе носивый.

Радуйся, яко причастник всем боящимся Бога был еси; радуйся, яко до зела себе смирил еси.

Радуйся, очи наша верою просвещаяй; радуйся, сердца наша надеждою спасения озаряяй.

Радуйся, яко преподобному Зосиме в созидании обители послужил еси; радуйся, яко подвиги твоими братию всю удивил еси.

Радуйся, отче наш Германе, преподобных Зосимы и Савватия сподвижниче.

Кондак 5

Боготечная звезда явился еси, богоблаженне отче наш, преподобным Савватию и Зосиме, егда восхвалял еси пустынность острова Соловецкаго и провождал еси их, по морю плывя, на место святое сие, идеже в безмолвии труды ко трудом прилагая, плоды духовныя собирал еси, Богу же сердцем чистым взывал еси: Аллилуиа.

Икос 5

Видя враг рода человеча, яко необитаемая доселе пустыня процветает, яко крин, и яко в ней имя Господне от пустынножителей прославляется, восхоте погубити святое дело Божие; напусти бо человека некоего с женою его и чады преселитися на остров. Ангели же Господни, биения давше жене, повелеша оставити остров, да будет сей в жилище токмо иноков. Сего ради, прославляюще Господа, тако благоизволившаго, глаголем ти:

Радуйся, измлада иноческое житие избравый; радуйся, пустыннаго и безмолвнаго пребывания взыскавый.

Радуйся, яко непрестанно себе внимал еси; радуйся, яко равноангельное жительство показал еси.

Радуйся, в терпении мнозе потрудивыйся; радуйся, молитв забралом присно ограждавыйся.

Радуйся, яко преподобным Зосиме и Савватию сподвижник и сотаинник был еси; радуйся, яко с ними в пристанище безстрастия достигл еси.

Радуйся, яко злато в горниле искушенный; радуйся, светом Трисиянным озаренный.

Радуйся, яко с небесе на вся ны милостивно призираеши; радуйся, яко вся прошения наша во благо исполняеши.

Радуйся, отче наш Германе, преподобных Зосимы и Савватия сподвижниче.

Кондак 6

Проповедник всем глагол ангельских был еси, преблаженне отче, егда, по совершении с преподобным Савватием воскреснаго нощнаго молитвословия изшед из храмины, внезапу услышал еси глас жены плачущия и, узрев ю, вопросил еси о причине плача. Она же рече: «Два юноши светли жестоко биша мя и рекоша ми: бежите отсюду, ибо не для вас место сие, яко зде иноков множество прославит Господа». Ты же, слышав сие, умиленне Богу возгласил еси: Аллилуиа.

Икос 6

Возсия свет велий от обители Соловецстей, осияваяй всю страну нашу, ибо лучами добродетелей твоих просвещаеши не токмо притекающих к цельбоносным мощем твоим, но и издалече верою призывающих тя. Озари убо светом Евангелия омраченная грехом сердца наша и укрепи нас во благочестии, да вси радостно взываем ти:

Радуйся, пустыни красное прозябение; радуйся, постников предивное украшение.

Радуйся, яко в бодреннем трезвении пребывал еси; радуйся, яко мзду трудов твоих на небеси восприял еси.

Радуйся, ангелов собеседниче; радуйся, Царствия Христова наследниче.

Радуйся, яко благодать от Бога обрел еси; радуйся, яко иерею благоговейному образ твой во сне списати повелел еси.

Радуйся, безмездный недугов целителю; радуйся, благодатный бесов прогонителю.

Радуйся, яко с преподобными Зосимою и Савватием ревностно трудился еси; радуйся, яко с ними наставник добр монахом явился еси.

Радуйся, отче наш Германе, преподобных Зосимы и Савватия сподвижниче.

Кондак 7

Хотя всем человеком спастися и в разум истины приити, Человеколюбец Господь указа ти место удобно спасения, идеже ты многими поты и скорбьми, злострадании и лишении неленостне Богу работал еси, выну вопия Ему: Аллилуиа.

Икос 7

Новаго Моисеа, древнему подобна, видим тя, богоизбранне отче наш, ибо в пустыни земнаго странствия нашего всех, к помощи твоей прибегающих, к Иерусалиму горнему наставляеши, фараона мысленнаго потопляя и всех молением твоим ограждая, вопиющих ти таковая:

Радуйся, молитвенниче наш неусыпный; радуйся, предстателю о нас непостыдный.

Радуйся, яко скорби пустыннаго жития доблественне претерпел еси; радуйся, яко постом и молитвою, аки крилами, на высоту добродетелей возшел еси.

Радуйся, чистотою душевною и телесною Бога прославивый; радуйся, нравы твоими вся ны наставивый.

Радуйся, яко в небесных чертозех вселился еси; радуйся, яко оных обителей и нам пред Богом ходатай явился еси.

Радуйся, бед и напастей нас свобождаяй; радуйся, всем благая от Спаса Христа подаваяй.

Радуйся, яко непрестанно духом горел еси; радуйся, яко со всеми человецы мир имел еси.

Радуйся, отче наш Германе, преподобных Зосимы и Савватия сподвижниче.

Кондак 8

Странно убо видети, како ты, богоблаженне отче, старостию притружденный, за послушание настоятелю и братии по морю многажды плавал еси, о нуждах новосозидаемыя обители и об утешении братии попечение имея, отнюд покоя себе не дая и среди опасностей потопления живот твой Богови вверяя и сердцем взывая Ему: Аллилуиа.

Икос 8

Весь ум твой в небесная вперив, горняя мудрствовал еси, а не земная, преподобне отче наш, вышних ища, идеже есть Христос одесную Бога седя, идеже празднующих глас непрестанный, идеже радость праведных несказанная. Тамо убо со всеми святыми водворяяся, слышиши от нас ублажения сии:

Радуйся, очесы веры на Христа присно взиравый; радуйся, в злостраданиих николиже роптавый.

Радуйся, яко на ладии многажды по морю плыл еси; радуйся, яко сие за послушание настоятелю и братии творил еси.

Радуйся, морских волнений и напастей не страшивыйся; радуйся, благому Промыслу Божию всецело покоривыйся.

Радуйся, яко смирением и послушанием Богу угодил еси; радуйся, яко козни вражия до конца сокрушил еси.

Радуйся, в бурю пловцем подаваяй спасение; радуйся, дивное им в бедах поможение.

Радуйся, яко душу твою по братии полагал еси; радуйся, яко имя Господне непрестанно призывал еси.

Радуйся, отче наш Германе, преподобных Зосимы и Савватия сподвижниче.

Кондак 9

Всякое плотское мудрование мужественне отринув, вдал еси себе в совершенное послушание настоятелю и братии, памятуя слово наставления святоотеческаго, яко послушание паче поста и молитвы есть, и тако достигл еси в мужа совершенна, в меру возраста Христова, Богу поя: Аллилуиа.

Икос 9

Витии премудрии не возмогут достойно восхвалити труды и подвиги твоя, ибо всего себе от юности в жертву Господеви возложив, даже до старости многолетныя распинал еси плоть со страстьми и похотьми, да очистиши сердце твое и да будеши храм Животворящаго Духа Святаго. Сподоби и нас, святче Божий, тебе усердно подражати и сице тебе возглашати:

Радуйся, в пустынных дебрех и горах привитавый; радуйся, постом и молитвою в напастех себе ограждавый.

Радуйся, яко чести и славы мирския избегал еси; радуйся, яко во смирение аки в порфиру Царствия Небеснаго облеклся еси.

Радуйся, благодати сосуде избранный; радуйся, любве, соуза совершенства, кладенец преизливанный.

Радуйся, яко игу Христову выю твою подклонил еси; радуйся, яко по трудех дневных нощи в молитве проводил еси.

Радуйся, вся обеты иноческия свято соблюдавый; радуйся, прельщениям лукаваго никакоже внимавый.

Радуйся, яко от всякаго зла себе хранил еси; радуйся, яко полчища бесов посрамил еси.

Радуйся, отче наш Германе, преподобных Зосимы и Савватия сподвижниче.

Кондак 10

Спасти хотя душу твою, нозе твои на камени веры поставил еси и, светильник слова Божия вжег, в законе Господни ходил еси, помышляя, яко странник и пришлец еси на земли, и яко жительство Твое на небеси есть. Сего ради ко всем заповедем Господним направлялся еси, всяк путь неправды возненавидев, во еже непрестанно воспевати Христу Богу ангельскую песнь: Аллилуиа.

Икос 10

Стена еси и крепкое заступление обители твоея и всем верно молящимся тебе, ибо небесе и земли Творец, видя богоугодное житие твое, облагодати тя, да будеши печальным утешение, скорбящим радование, недугующим врач и целитель, кающимся надежда прощения и всем во всяких нуждах помощник, да вси ублажают тя сице:

Радуйся, образе кротости и смирения; радуйся, теплый ходатаю нам спасения.

Радуйся, яко ревнующих о спасении под кровом своим соблюдаеши; радуйся, яко трудников и богомольцев обители твоея с небеси благословляеши.

Радуйся, обидимых благонадежное и скорое защищение; радуйся, в скорбех и печалех нам всем утешение.

Радуйся, яко всем, притекающим к тебе, в нуждах помогаеши; радуйся, яко за вся православныя христианы молитвы Богу возсылаеши.

Радуйся, на свещнице Христовой поставленный; радуйся, на земли дивно от Бога прославленный.

Радуйся, яко гнев Божий от нас грешных отвращаеши; радуйся, яко любовию чтущих святую память твою благодатно посещаеши.

Радуйся, отче наш Германе, преподобных Зосимы и Савватия сподвижниче.

Кондак 11

Пение надгробное со слезами смешанное принесл еси, всеблаженне отче, егда, возвратився в обитель, уведел еси о преставлении сподвижника твоего преподобнаго Савватия, егоже зело, яко брата, любил еси. Егда же Господь посла тебе новаго сподвижника твоего, преподобнаго Зосиму, тогда радости исполнився, благодарно Богу возгласил еси: Аллилуиа.

Икос 11

Светозарное светило показался еси, отче наш, Германе, в нощи греховней блуждающим, души наша светом богопознания просвещая и по пути заповедей Христовых ходити наставляя. Сего ради к тебе усердно притекаем и тако тя восхваляем:

Радуйся, целомудрия изрядный ревнителю; радуйся, чистоты усердный блюстителю.

Радуйся, яко надежду небеснаго наследия в себе имел еси; радуйся, яко жития преподобных Зосимы и Савватия списати повелел еси.

Радуйся, вся заветы преподобнаго Зосимы свято хранивый; радуйся, ни един же от них преступивый.

Радуйся, яко о смертнем часе непрестанно помышлял еси; радуйся, яко ко исходу от жития сего себе присно уготовлял еси.

Радуйся, по Бозе упование твое на Матерь Божию возлагавый; радуйся, Богородицу яко Матерь Света выну в песнех величавый.

Радуйся, яко преподобнаго Зосиму ко гробу проводил еси; радуйся, яко тело его многотрудное слезами теплыми оросил еси.

Радуйся, отче наш Германе, преподобных Зосимы и Савватия сподвижниче.

Кондак 12

Благодать, свыше ти дарованную, подаждь нам, досточудне отче наш, яко да и мы, подражающе вере и благочестию твоему, принесем Спасителю нашему дары духовныя: покаяние теплое, молитвы усердныя, братолюбие нелицемерное со всеми добродетельми и сподобимся купно с тобою взывати Богу: Аллилуиа.

Икос 12

Поюще твоя чудеса, богоносне отче наш, восхваляем подвиги твоя, ублажаем и кончину твою, ибо, на смертнем одре возлежа и исход свой провидя, возжелал еси исповедатися и Святых Христовых Таин причаститися. Сподоби убо и нас христианския кончины живота нашего и добраго ответа на Страшнем судищи Христове, да зовем ти:

Радуйся, в монастыри преподобнаго Антония Римлянина богоугодное житие твое скончавый; радуйся, в Новограде на послушании умиленный дух твой Богу предавый.

Радуйся, яко и по смерти чудесы твоими сияеши; радуйся, яко духи нечистыя от человек прогоняеши.

Радуйся, от обители земныя во обители небесныя преселивыйся; радуйся, тамо со всеми святыми в вечней славе водворивыйся.

Радуйся, яко мощи твоя на месте трудов твоих почивают; радуйся, яко тыя мощи исцеления верующим источают.

Радуйся, духом воскресый прежде общаго воскресения; радуйся, и нашим душам указуяй путь обновления.

Радуйся, яко монахов множество наставника тя почитают; радуйся, яко православных собор присно тя ублажает.

Радуйся, отче наш Германе, преподобных Зосимы и Савватия сподвижниче.

Кондак 13

О преподобне и преблаженне отче наш Германе, приими ныне малое сие моление наше, от души в похвалу тебе приносимое, и твоим многомощным предстательством умоли Господа нашего Иисуса Христа, да пробавит милость Свою нам грешным и подаст нам во временнем житии нашем вся благая и потребная яже к животу и благочестию, да и мы с тобою и всеми святыми выну Ему вопием: Аллилуиа.

Этот кондак читается трижды, затем 1-й икос: «Ангельски пожив …» и 1-й кондак: «Избранный чудотворче…».

Молитва первая

О великий угодниче Христов, земный ангеле и небесный человече, преблаженне отче наш Германе, преподобных Зосимы и Савватия сподвижниче, Соловецкий чудотворче и пустынножителю, обстояще честную раку цельбоносных мощей твоих, мысленными очесы зрим тя с нами суща и мольбам нашим внемлюща. Сего ради, с верою и любовию припадающе к тебе, молим тя: призри с небесе святаго на нас грешных, слабых духом и немощных телом и умилосердися, помози нам твоим многомощным ходатайством ко Творцу и Спасителю нашему. Ты веси, яко, подобно реце многоводней, разливаются по земли нашей безбожие, неверие, зловерие, ереси, расколы, распри, раздоры, разделения, и увы нам. Среди именующихся именем Христовым хулится имя Божие, раздирается Церковь - Тело Христово, попираются Евангелие и закон Христов. Ты зриши оскудение велие любве многих и умножение беззаконий, ихже ради грядет гнев Божий на нас грешных. К кому прибегнем, отче наш? К кому возопиим? Кто предстанет и защитит нас? На тя упование наше возлагаем, предивный угодниче Христов. Испроси нам у Господа грехов наших прощение и отврати от нас весь гнев Его, праведно движимый на ны. Утверди веру правую в сердцах наших, защити Церковь святую, духом грядущаго в мир противника Христова обуреваемую. Даруй нам любовь к Богу и друг ко другу, мир и единомыслие, утоли вся раздоры и нестроения наша, да не до конца погибнем. Буди стена крепка и заступление обители твоей, в еяже созидании много потрудился еси. Буди отец и наставник и покровитель иноком, ихже с преподобными Зосимою и Савватием мудре собрал еси на месте трудов ваших. Помози им подвигом добрым подвизатися, веру нераздельну соблюсти, главы невидимых змиев сокрушити, победителем греха явитися и житием своим прославити превелие имя Святыя Троицы. Не забуди и нас, любовию чтущих святую память твою и к тебе, яко отцу чадолюбивому, притекающих. Помогай и нам, отче наш милостивый, в душевных и телесных нуждах наших, подавай нам вся благая и потребная в жизни временней, да ревностно поработаем Господу Богу прочее время живота нашего, и понесем на себе иго Его благое и легкое Его бремя, и, тако достигше благодатию Христовою Небеснаго Царствия, сподобимся с тобою и со всеми святыми славити и воспевати пречестное и великолепое имя Отца и Сына и Святаго Духа ныне и присно, и во веки веков. Аминь.

Молитва вторая

О преподобне и Богоносне отче наш Германе, безмолвнаго иноческаго жития во острове Соловецстем первоначальниче! Молим тя мы, недостойнии, прибегающе к молитвам твоим, имиже купно с молением преподобных отец наших Зосимы и Савватия освящается и прославляется богоизбранное место сие. Буди, с сими угодники Божиими и прочими Соловецкими чудотворцы и всея Российския земли Небесными предстатели, молитвенник и ходатай о нас, грешных, пред Престолом Вседержителя Бога, Емуже в дерзновении предстоиши со Ангелы и всеми святыми, да дарует нам, яко Благий и Человеколюбивый, вся потребная к животу и благочестию, душам и телесем нашим здравие, во всех благих преспеяние и Свою всесильную помощь во всяких искушениих, бедах же и напастех, воздвизаемых на ны от враг спасения нашего; обители твоей моли избавится от всякаго злаго обстояния и приходящим в ню ближним и дальним получити вся просимая ко душевней и телесней пользе. Наипаче же испроси, угодниче Христов, всем нам грехов отпущение, христианскую кончину жития и наследие Царства Небеснаго у Христа Бога нашего, Емуже честь и слава, со Отцем и Святым Духом, ныне, и присно, и во веки веков. Аминь.