Собор Курских святых

Служба святителю Луке, архиепископу Симферопольскому и Крымскому

Текст службы утвержден
решением Священного Синода
от 5 мая 2015 года (журнал № 28).

Месяца мая в 29-й день

На велицей вечерни

На Господи, воззвах: стихиры на 8, глас 4:

Святи́телю Христо́в Луко́,/ же́ртва Бо́гу свяще́нная,/ испове́дников честно́е украше́ние,/ Це́ркве Правосла́вныя удобре́ние,/ Кры́мския земли́ похвало́,/ врачу́ благи́й и ми́лостивый,/ моли́ от боле́зней и бед изба́витися/ ве́рою и любо́вию творя́щим всечестну́ю па́мять твою́.

Испове́дник свяще́нен/ и архипа́стырь благоприя́тен,/ благоче́стия о́браз/ и исто́чник исцеле́ний,/ святи́телю Луко́, яви́лся еси́,/ ты бо, посреде́ гоне́ний служе́ние Це́ркви и по́двиг врачева́ния не оста́вив,/ до́бре лю́дем послужи́л еси́./ Те́мже, свяще́нное соверша́юще торжество́,/ пе́сньми духо́вными тя ублажа́ем.

Егда́ услы́шал еси́ боже́ственный глас, блаже́нне Луко́,/ тогда́, крест твой взем,/ Христу́ невозвра́тно после́довал еси́/ и, любо́вию к Нему́ распала́емь,/ посреде́ скорбе́й, боле́зней и бед/ испове́дание до́бре сохрани́л еси́./ Те́мже, свяще́нное соверша́юще торжество́,/ пе́сньми духо́вными тя ублажа́ем..

Ины стихиры, глас 8:

Па́мять твою́, святи́телю Луко́,/ с похвала́ми соверша́юще,/ ра́дости духо́вныя исполня́ются ча́да Це́ркве Правосла́вныя/ и прие́млют, я́ко от исто́чника неоску́днаго,/ боле́знем и неду́гом благода́тное исцеле́ние,/ его́же и нам подава́й, врачу́ богоблаже́нне,/ моли́твами твои́ми.

Богому́дре святи́телю,/ я́ко живописа́тель изря́ден и врачева́тель иску́сен,/ апо́столу Луке́ уподо́бился еси́,/ наипа́че же, душе́ю ми́лостивою/ и се́рдцем люботру́дным тому́ после́дуя,/ во мра́це безбо́жия ве́ру непоро́чную утвержда́л еси́./ Сего́ ра́ди мо́лим тя:/ исцели́ и просвети́ ду́ши на́ша моли́твами твои́ми.

Святи́телю Луко́ богоблаже́нне,/ в темни́цах и изгна́ниих/ на всяк день боле́знем и напа́стем приобща́яся,/ страда́ния Христа́ ра́ди возлюби́л еси́/ и, пре́лести зи́му теплото́ю боже́ственныя благода́ти растопи́в,/ ко Христу́, Незаходи́мому Сия́нию,/ со сла́вою всели́лся еси́./ Сего́ ра́ди мо́лим тя:/ исцели́ и просвети́ ду́ши на́ша моли́твами твои́ми.

Сла́ва, глас то́йже:

Святи́телю о́тче Луко́ пречу́дне,/ служи́телю Та́ин Боже́ственных,/ де́лателю виногра́да Христо́ва,/ ве́ры утвержде́ние,/ Це́ркве Правосла́вныя сто́лпе непоколеби́мый,/ исто́чниче исцеле́ний оби́льный,/ Кры́мстей па́стве те́плый предста́телю,/ моли́ся Пресвяте́й Тро́ице/ спасти́ся душа́м на́шим.

И ныне, Богородичен: Царь Небесный:

Вход. Прокимен дне. И чтения святительская.

На литии стихиры, глас 6:

Днесь благода́тию Боже́ственнаго Ду́ха со́брани,/ лик соста́вим и песнь хвале́бную воспои́м,/ па́мять творя́ще святи́теля и испове́дника Луки́/ и, ди́внаго во святы́х Свои́х Бо́га благодаря́ще,/ торжества́ вино́внику моле́бне рцем:/ я́ко имы́й дерзнове́ние у Царя́ Сла́вы,/ врачева́телю прему́дре,/ моли́ вся́ких бед изба́витися/ любо́вию чту́щим тя.

Просвети́вся мно́гими доброде́тельми,/ ве́ры пра́выя свети́льник яви́лся еси́,/ святи́телю преблаже́нне Луко́,/ и, тьму нече́стия разгна́в,/ ве́рным путь спасе́ния уясни́л еси́./ Те́мже и в Черто́г Небе́сный всели́лся еси́,/ иде́же мо́лиши Христа́ Бо́га о душа́х на́ших.

Ины стихиры, глас 1.

Подобен: Небесных чинов:

Святи́телю Луко́, испове́дниче Христо́в,/ ты еси́ земли́ Кры́мстей похвала́/ и гра́ду Симферо́полю в ве́ре утвержде́ние,/ щит и побе́да на сопроти́вныя,/ безме́здный цели́тель стра́ждущих,/ всем нам помо́щник и засту́пник,/ и моли́твенник о душа́х на́ших.

Боже́ственными просвеще́ньми облиста́емь,/ мно́жеством доброде́телей, о́тче Луко́, обогати́лся еси́./ Те́мже богогла́сными словесы́ твои́ми,/ я́ко водо́ю животво́рною Ду́ха,/ напая́еши сердца́ ве́рных, чту́щих тя,/ Бо́жие милосе́рдие сим возвеща́я.

Днесь ра́дуется Не́бо и земля́,/ и Це́рковь Ру́сская торжеству́ет/ в честны́й день прославле́ния/ вели́каго уго́дника Бо́жия, святи́теля Луки́,/ цели́теля прехва́льнаго и врача́ до́браго,/ и моли́твенника те́плаго о душа́х на́ших.

Слава, глас 8:

Святи́телю о́тче Луко́,/ просла́ви тя Госпо́дь жития́ ра́ди многотру́днаго/ да́ром врачева́ния неду́гов,/ сего́ ра́ди пра́зднующих све́тло па́мять твою́/ и любо́вию припа́дающих к тебе́/ соблюди́ от вся́ких боле́зней душе́вных и теле́сных/ и пода́й от Христа́ Бо́га на́шего/ мир и ве́лию ми́лость.

И ныне, Богородичен: Безневе́стная Де́во:

На стиховне стихиры, глас 2.

Подобен: Егда от Древа:

Егда́ беззако́ннии лю́дие,/ зло́бою неве́рия ослепле́ннии,/ гоне́ния лю́тая на Це́рковь Ру́сскую воздвиго́ша/ и мно́гия па́стыри в темни́цы всади́ша,/ тогда́, свя́те Луко́ пресла́вне,/ любо́вию ко Христу́ распала́емь,/ во земли́ Самарка́ндстей небоя́зненно святи́тельства сан прия́л еси́/ и, па́ству ти от Бо́га вруче́нную,/ до́бре упа́сл еси́.

Стих: Свяще́нницы Твои́ облеку́тся в пра́вду/ и преподо́бнии Твои́ возра́дуются.

Егда́ безбо́жнии мучи́телие,/ беззако́нное веле́ние исполня́юще,/ ру́ки своя́ на тя возложи́ша/ и, я́ко злоде́я, изгна́нию преда́ша,/ тогда́, свя́те испове́дниче Христо́в,/ ве́рою в Сы́на Бо́жия укрепля́емь,/ гра́ды и ве́си земли́ Сиби́рския обходи́л еси́/ и лю́ди ея́, апо́стольскими труды́ просвеща́я,/ от неду́гов душе́вных и теле́сных врачева́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Егда́ нечести́вии уби́йцы,/ лю́тою зло́бою ды́шуще,/ непра́ведно тя оболга́ша/ и темни́чному заключе́нию преда́ша,/ тогда́, священноиспове́дниче Луко́ пресла́вне,/ страда́ния тя́жкая претерпева́я,/ мучи́телей безбо́жных не убоя́лся еси́/ и, все упова́ние на Бо́га возлага́я,/ о́браз му́жества ве́рным лю́дем яви́л еси́.

Слава, глас 6:

Прииди́те, вси лю́дие,/ просла́вим ди́внаго святи́теля,/ в боже́ственней сла́ве пребыва́юща/ и моли́твами свои́ми ми́лость нам низпосыла́юща,/ на земли́ же мощьми́ свои́ми исцеле́ния ще́дро источа́юща;/ и велегла́сно Го́спода Бо́га на́шего возблагодари́м,/ я́ко дарова́ нам благода́тнаго врачева́теля/ и священноиспове́дника достохва́льнаго.

И ныне, Богородичен: Богоро́дице, Ты еси́ лоза́ и́стинная:

Тропарь, глас 1:

Возвести́телю пути́ спаси́тельнаго,/ испове́дниче непоколеби́мый,/ и́стинный храни́телю оте́ческих преда́ний,/ Правосла́вия наста́вниче,/ Кры́мския земли́ архипа́стырю,/ врачу́ богому́дрый, святи́телю Луко́,/ Христа́ Спа́са непреста́нно моли́,/ дарова́ти душа́м на́шим ве́лию ми́лость.

На утрени

На Бог Господь: тропарь святителя дважды. Слава, и ныне, Богородичен, глас 1: Гаврии́лу веща́вшу Тебе́, Де́во:

По 1-м стихословии седален, глас 3:

Но́вый свети́льник Це́ркве Ру́сския/ и моли́твенник те́плый за мир яви́лся еси́, святи́телю Луко́./ Те́мже и мы, припа́дающе к тебе́, взыва́ем:/ изба́ви нас от вся́кия беды́ и напа́сти/ и ко спасе́нию наста́ви моли́твами твои́ми.

Слава, и ныне, Богородичен:

Богора́дованная Влады́чице,/ святи́телем похвало́, пра́ведным утвержде́ние и всем ве́рным утеше́ние!/ Спаси́ ны от наси́льства диа́воля и лю́тых прегреше́ний/ предста́тельством и моли́твами Твои́ми.

По 2-м стихословии седален, глас 6:

Я́ко ма́слина плодови́та и лампа́да, еле́я благово́ннаго испо́лнена,/ пред Бо́гом яви́лся еси́, святи́телю о́тче Луко́./ Сего́ ра́ди мо́лим тя:/ благоуха́нием святы́ни твоея́ отжени́ от нас смрад грехо́вный/ и еле́ем моли́тв твои́х исцели́ стру́пы душ и теле́с на́ших.

Слава, и ныне, Богородичен, глас тойже:

Не пре́зри моле́ния Твои́х рабо́в, мо́лимся, Влады́чице Всепе́тая,/ я́ко да изба́вимся вся́каго обстоя́ния.

Псалом избранный: Услы́шите сия́, вси язы́цы:

По полиелеи седален, глас 4:

Всечестна́я и светоно́сная па́мять твоя́, святи́телю Луко́,/ испо́лни всех ра́дости и весе́лия духо́внаго./ Те́мже и мы, восхваля́юще во святи́тельстве труды́ твоя́/ и терпе́ние в испове́дничестве,/ сла́вим просла́вльшаго тя Го́спода./ Его́же моли́ спасти́ся нам, любо́вию тя почита́ющим.

Слава, и ныне, Богородичен:

Спаси́ всех, к Тебе́ притека́ющих,/ моли́твами Твои́ми, Де́во Богоро́дице,/ и изба́ви вся́кия ну́жды и ско́рби.

Степенна, 1 антифон 4-го гласа. Прокимен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси живу́щии по вселе́нней. Евангелие от Иоанна, зачало 35, от полу.

По 50-м псалме стихира, глас 6:

Па́стыря до́бра,/ испове́дника тве́рда,/ служи́теля Та́ин Христо́вых ве́рна/ и цели́теля неду́гов безме́здна/ ве́мы тя, святи́телю Луко́./ Сего́ ра́ди мо́лим тя:/ изба́ви ны от наве́тов вра́жиих,/ боле́зней душе́вных/ и неду́гов теле́сных.

Канон Пресвятей Богородице со ирмосом на 6 и святителю на 8. Глас 8.

Песнь 1

Ирмос: Ди́вному Бо́гу вели́чия принесе́м/ и великоле́пно с на́ми,/ да воспое́т земля́ и не́бо/ я́сно сла́ву Его́.

Во дни гоне́ний тя́жких на Це́рковь Ру́сскую/ свяще́нный сан во гра́де Ташке́нте небоя́зненно прия́л еси́, блаже́нне Луко́,/ и отсту́пники, нововведе́ния льсти́вая вводя́щия, му́жественне облича́л еси́,/ принося́ вели́чие Бо́гу и воспева́я сла́ву Его́.

Яви́лся еси́ па́стве твое́й, испове́дниче Христо́в,/ столп непоколеби́мый и защи́тник кре́пкий,/ боля́щим исцеле́ние, скорбя́щим утеше́ние,/ Бо́га велича́я и воспева́я сла́ву Его́.

Вседержи́теля и Го́спода о нас моли́, святи́телю Луко́,/ дарова́ти нам оставле́ние прегреше́ний,/ да с тобо́ю ди́внаго Бо́га возвели́чим и воспое́м сла́ву Его́.

Богородичен: Тя призыва́ющим, Богороди́тельнице Пречи́стая,/ яви́лася еси́ спаси́тельное приста́нище и покро́в./ Те́мже любо́вию зове́м Ти:/ Влады́чице, спаси́ ны/ и научи́ ди́вному Бо́гу вели́чия приноси́ти и воспева́ти сла́ву Его́.

Песнь 3

Ирмос: Уподо́би мя, Христе́, у́мно горе́ Сио́нстей,/ возвы́сивый и утверди́вый в наде́жди о Тебе́/ и иска́павый ро́су благода́ти,/ Человеколю́бче.

Егда́ в Сиби́рскую зе́млю изгна́н был еси́, святи́телю,/ тогда́ мно́гия гра́ды ея́ апо́стольскими труды́ просвети́л еси́/ и, теле́сныя неду́ги врачу́я,/ о лю́дех Бо́гу моли́лся еси́,/ да источи́т на них ро́су благода́ти Своея́, я́ко Человеколю́бец.

Руко́ю твое́ю святи́тельскою о́чи слепы́м исцели́л еси́, врачу́ преди́вный,/ та́же и ду́ши их Све́том Христо́вым просвети́л еси́, моля́ся,/ да источи́т на них Госпо́дь ро́су благода́ти Своея́, я́ко Человеколю́бец.

Твои́ми поуче́нии, святи́телю Луко́,/ я́ко до́брый па́стырь, указа́л еси́ лю́дем путь в Ца́рство Небе́сное./ Сего́ ра́ди сла́вою от Бо́га увенча́лся еси́,/ Его́же моли́, да низпо́слет и нам ро́су благода́ти Своея́, я́ко Человеколю́бец.

Богородичен: Люби́ти у́бо Тя, Пречи́стая Богома́ти, и пе́сньми прославля́ти/ науча́ет нас вели́кий Арха́нгел,/ сего́ ра́ди вопие́м Ти, Богоневе́сто:/ ра́дуйся, Благода́тная, Госпо́дь с Тобо́ю;/ ра́дуйся, Ра́досте А́нгелов и всех челове́ков.

Седален, глас 8:

О́чи серде́чнеи ко Го́споду вы́ну име́я,/ испове́дник дерзнове́нный ве́ры Христо́вы яви́лся еси́, о́тче Луко́,/ и, си́лою слове́с боже́ственных полки́ безбо́жных отгоня́я,/ Кры́мскую па́ству му́дре упа́сл еси́./ Те́мже по кончи́не в Небе́сныя оби́тели со сла́вою водвори́лся еси́, святи́телю блаже́нне./ Моли́ Христа́ Бо́га грехо́в оставле́ние дарова́ти/ чту́щим всечестну́ю па́мять твою́.

Слава, и ныне, Богородичен:

Тя Приста́нище и Сте́ну,/ Прибе́жище и Наде́жду,/ Покро́в и Заступле́ние те́плое и́мамы,/ к Тебе́ притека́ем и вопие́м приле́жно:/ спаси́, Богоро́дице, упова́ющия на Тя/ и от прегреше́ний изба́ви.

Песнь 4

Ирмос: Всел еси́ на ко́ни, апо́столи Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́/ ве́рно пою́щим:/ сла́ва си́ле Твое́й, Го́споди.

Ю́же стяжа́л еси́ честно́ю Твое́ю Кро́вию,/ Це́рковь Твою́, Христе́, утверди́ и напра́ви на путь ми́ра,/ та́ко воздыха́л еси́, святи́телю о́тче Луко́,/ преподо́бнеи твои́ ру́це горе́ воздева́я.

Любо́вь Христо́ву в денноно́щных труде́х твои́х яви́л еси́, святи́телю:/ неду́жных безме́здно врачу́я,/ вдов и си́рых ми́лостивно пита́я,/ согреша́ющих кро́тко вразумля́я,/ уныва́ющих и отчаява́емых оте́чески утеша́я,/ о ни́хже и Же́ртву безкро́вную благогове́йно Бо́гу принося́.

Ни глад, ни мраз, ни темни́чная заключе́ния,/ ни безче́стия, ни му́ки, ни са́мая смерть/ возмого́ша разлучи́ти тя, святи́телю, от любве́ Христо́вы,/ ты бо, во изгна́нии сый и преде́лы земли́ Ру́сския обходя́,/ лю́дем ея́ о́браз па́стыря до́браго яви́л еси́/ и, я́ко столп непоколеби́мый пребыва́я,/ испове́дник ве́рен наре́клся еси́.

Богородичен: Кре́пость на́ша Ты еси́, Пречи́стая Богома́ти,/ Твои́ми бо мольба́ми изба́вихомся вси от страсте́й и бед,/ обстоя́ний и неду́гов многообра́зных, Спа́су Христу́ зову́ще:/ сла́ва си́ле Твое́й, Го́споди.

Песнь 5

Ирмос: Повеле́ния Твоя́ просвеще́нием, Христе́ Бо́же,/ я́ко Благ, показа́л еси́,/ зане́, Светода́вче,/ от но́щи у́тренююще, сла́ву возсыла́ем.

Еди́ницу в Тро́ице, Триипоста́сное Божество́,/ богосло́вил еси́, Луко́ блаже́нне,/ и триеди́ный соста́в челове́ческаго естества́/ писа́нии твои́ми изъясни́л еси́.

Егда́ испыта́ние ра́тное прии́де на зе́млю на́шу,/ тогда́ ты, святи́телю, во враче́бнице гра́да Красноя́рска, враче́бное иску́сство прилага́я,/ мно́гия во́ины от неисце́льных ран исцели́л еси́ и к жи́зни возврати́л еси́.

Словеса́ похва́льная приими́ ны́не от нас, недосто́йных чад твои́х, святи́телю Луко́,/ и моли́ Христа́ Бо́га,/ да изба́вит нас шу́ияго стоя́ния/ и сподо́бит Небе́снаго Ца́рствия Своего́.

Богородичен: Еди́на Чи́стая, Богороди́тельнице,/ не пре́зри моле́ний раб Твои́х,/ но уго́дника Твоего́ ра́ди/ принеси́ сия́ ко престо́лу Сы́на Твоего́,/ да спасе́т ду́ши на́ша.

Песнь 6

Ирмос: Отве́ргл мя еси́/ во глубины́ се́рдца морска́го,/ и ви́дех чудеса́ Твоя́, Го́споди.

Раздава́я после́дняя твоя́ и попече́ние о неиму́щих име́я,/ сироты́ и вдо́выя с любо́вию пита́л еси́,/ Ми́лостивому Спа́су подража́я.

Ду́хом ве́ры пламене́я,/ и́стинное благоче́стие ве́рным явля́л еси́, святи́телю Луко́,/ и, иере́и до́бре назира́я,/ к де́ланию па́стырскому тех наставля́л еси́.

Не отре́клся еси́ креста́ Госпо́дня/ во многотру́днем житии́ твое́м, архиере́ю Бо́жий,/ и ны́не архипа́стырем на́шим моли́твами твои́ми помози́,/ да пра́во пра́вят сло́во Боже́ственныя И́стины.

Богородичен: Отрокови́це Богоизбра́нная, Де́во Мари́е,/ восхваля́ем Тя вси и ве́рно взыва́ем:/ моле́ние на́ше приими́ и проше́ния ско́ро испо́лни.

Кондак, глас 1:

Я́ко звезда́ всесве́тлая,/ в нощи́ безбо́жия доброде́тельми просия́л еси́/ и, от гони́телей мно́го пострада́в,/ непоколеби́м ве́рою пребы́л еси́,/ враче́бною же му́дростию укра́шен,/ мно́гия лю́ди исцели́л еси́./ Сего́ ра́ди с любо́вию вопие́м ти:/ ра́дуйся, добропобе́дный испове́дниче,/ ра́дуйся, о́тче святи́телю Луко́,/ ра́дуйся, земли́ Ру́сския похвало́ и утвержде́ние.

Икос:

Испове́данием тве́рдым Бо́га просла́вив,/ се́ятель духо́вных доброде́телей яви́лся еси́, Луко́ прехва́льне,/ и, я́ко архипа́стырь и учи́тель благоче́стия,/ нече́стия ре́вностный искорени́тель показа́лся еси́,/ жи́знь же в по́двизех и труде́х мно́гих соверши́в,/ вене́ц неувяда́емый от Го́спода прия́л еси́./ Сего́ ра́ди с любо́вию вопие́м ти:/ ра́дуйся, добропобе́дный испове́дниче,/ ра́дуйся, о́тче святи́телю Луко́,/ ра́дуйся, земли́ Ру́сския похвало́ и утвержде́ние.

Песнь 7

Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Ева́нгельски Христу́ после́довав, о́тче Луко́,/ еле́ем любве́ врачева́л еси́ лю́ди стра́ждущия и боля́щия/ и, сло́во Бо́жие возвеща́я, святи́тельски потруди́лся еси́,/ да прославля́ют ве́рная ча́да Сотво́ршаго вся Го́спода, воспева́юще:/ благослове́н еси́ во ве́ки, Бо́же оте́ц на́ших.

Па́стырь до́брый слове́сному ста́ду твоему́ был еси́, святи́телю Луко́,/ ду́шу твою́ за него́ при́сно положи́ти гото́вый./ Те́мже яви́лся еси́ оби́димым засту́пник непреобори́мый,/ пра́вды Бо́жия ревни́тель неустраши́мый,/ си́льных ми́ра сего́ кро́ткий обличи́тель, Го́споду воспева́я:/ благослове́н еси́ во ве́ки, Бо́же оте́ц на́ших.

Ра́довахуся лю́дие гра́да Симферо́поля,/ зря́ще тя, о́тче Луко́, све́тлостию са́на святи́тельскаго облече́на/ и престо́лу благода́ти Бо́жия в моли́тве предстоя́ща./ Ты же, по апо́столу, вся всем быв,/ мно́гия ко Христу́ приве́л еси́,/ и́же ны́не Го́спода прославля́ют:/ благослове́н еси́ во ве́ки, Бо́же оте́ц на́ших.

Богородичен: Ра́дости Пода́тельнице, Богороди́тельнице Пречи́стая,/ ве́рою сла́вящия и от души́ пою́щия Тя ра́дости неизрече́нныя испо́лни/ и Све́та Невече́рняго сподо́би, Де́во Богоблагода́тная.

Песнь 8

Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

И́мя твое́, святи́телю Луко́,/ я́коже благоуха́ние рая́ Бо́жия по всей земли́ прославля́ется,/ услажда́я сердца́ ве́рующих/ и призыва́я благода́рне воспева́ти Соде́теля всех во ве́ки.

Ны́не Престо́лу Бо́жию предстоя́,/ мо́лишися о лю́дех, тя призыва́ющих,/ на моли́тву же твою́ с ве́рою упова́ющих/ и благодаря́щих Соде́теля всех во ве́ки.

О, иера́рше богому́дре,/ ты, тече́ние жи́зни до́бре соверши́в,/ ве́ру Христо́ву в гоне́ниих и страда́ниих до́бре сохрани́л еси́,/ сего́ ра́ди ны́не вене́ц небе́сный от Пода́теля жи́зни обре́л еси́,/ ра́дуяся и воспева́я освяща́ющаго Соде́теля всех во ве́ки.

Богородичен: Шед путе́м за́поведей Сы́на Твоего́, Богома́ти,/ весь род челове́ческий Твои́м Рождество́м от пра́отеческаго паде́ния воста́/ и кля́твы прама́терния изба́вися,/ воспева́я Соде́теля всех во ве́ки.

Песнь 9

Ирмос: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Ева́нгелие Христо́во пропове́дав, богому́дре святи́телю,/ служе́ние Бо́жие на земли́ страда́льчески соверши́л еси́/ и, прия́тия Святы́х Та́ин Христо́вых сподо́блься,/ о Бо́зе ми́рно почи́л еси́.

Ны́не с Вы́шними во́инствы моли́, уго́дниче Христо́в, Человеколю́бца Бо́га,/ дарова́ти притека́ющим к тебе́/ оставле́ние грехо́в и жития́ исправле́ние.

И по сме́рти, я́ко жив сый,/ благода́тию Бо́жиею с на́ми пребыва́еши, святи́телю Луко́, испове́дниче до́брый,/ укрепля́я нас тве́рдо стоя́ти в Правосла́вней ве́ре/ и в доброде́тельней жи́зни наставля́я.

Богородичен: Еже ра́дуйся, со арха́нгелом зове́м Ти, Чи́стая,/ я́ко Царя́ Небе́снаго родила́ еси́, Де́во Богоро́дице, и мо́лим Тя:/ изба́ви ны, рабы́ Твоя́, от ве́чныя сме́рти.

Светилен:

Свети́льник ве́ры и испове́дник тве́рдый яви́лся еси́, Луко́ пресла́вне./ Пло́тию, а́ще и почи́л еси́,/ но ду́хом в Ца́рствии невече́рнем со Христо́м пребыва́еши/ и при́сно мо́лишися Ему́ о всех,/ ве́рою и любо́вию тя почита́ющих.

Слава, и ныне, Богородичен:

Вы́шних чинонача́лий Превы́шшая су́щи,/ нас, ни́жних, не оста́ви, Пречи́стая Влады́чице,/ но при́сно с на́ми бу́ди/ и от вся́ких наве́тов вра́жиих свободи́.

На хвалитех стихиры, глас 4:

Красу́йся и лику́й, гра́де Симферо́полю,/ торжеству́йте, вси правосла́внии,/ зря́ще честны́я мо́щи врачева́теля безме́зднаго,/ источа́ющия исцеле́ния чу́дная/ всем, притека́ющим к ним с ве́рою/ и воспева́ющим Христа́ Жизнода́вца,/ подаю́щаго нам мир и ве́лию ми́лость.

Во хра́ме Святы́я Тро́ицы,/ иде́же лежа́т ны́не мо́щи твоя́,/ преблаже́нне Луко́ святи́телю,/ исцеле́ния подаю́тся всем челове́ком,/ ве́рою притека́ющим к ра́це твое́й./ Те́мже и мы усе́рдно мо́лим тя:/ моли́ Триипоста́снаго Бо́га/ дарова́ти нам мир и ве́лию ми́лость.

Весели́ся и торжеству́й земле́ Ру́сская,/ иму́щи пред Бо́гом моли́твенника те́пла,/ и́же, я́ко и́стинный па́стырь Христо́в,/ по́двиг страда́ния и испове́дничества в преде́лех твои́х соверши́./ Ны́не же в Небе́сней сла́ве Христу́ предстои́т/ и, взира́я на неизрече́нную Его́ добро́ту,/ прося́щим подае́т теле́сное здра́вие/ и мо́лит дарова́ти душа́м на́шим/ мир и ве́лию ми́лость.

Слава, глас 8:

Святи́телю о́тче Луко́,/ ты, ева́нгельски Христа́ возлюби́в,/ Его́ Боже́ственное и́го и крест испове́дничества на ра́мена подъя́л еси́/ и, я́ко ле́гкое бре́мя, поне́сл еси́,/ архипа́стырский же по́двиг до́бре соверши́в,/ Ца́рствия Небе́снаго дости́гл еси́./ Те́мже Го́спода сла́вы моли́,/ дарова́ти нам мир и ве́лию ми́лость.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славословие великое. И отпуст.

На Литургии

Блаженны от канона, песни 3-я и 6-я. Прокимен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те вси, живу́щии по вселе́нней. Апостол ко Евреем, зачало 318. Евангелие от Матфея, зачало 11. Причастен: В па́мять ве́чную бу́дет пра́ведник, от слу́ха зла не убои́тся.

Молитва

О, святи́телю Луко́, испове́дниче и уго́дниче Христо́в! Услы́ши нас, гре́шных, со умиле́нием припа́дающих к ра́це честны́х и многоцеле́бных моще́й твои́х, и принеси́ моли́тву на́шу к Ми́лостивому Человеколю́бцу Бо́гу, Ему́же ты ны́не со все́ми святы́ми предстои́ши. Испроси́ у Христа́ Бо́га на́шего, коему́ждо дар благопотре́бен и вся, я́же ко спасе́нию поле́зная, да утверди́т ны в ве́ре Правосла́вней и благоче́стии, я́ко изба́вльшеся от ко́зней лука́ваго, избе́гнем вся́кия вражды́, нестрое́ний, ересе́й и раско́лов.

О, цели́телю преди́вный и врачу́ безме́здный! Уврачу́й благода́тию, да́нною тебе́ от Бо́га, я́звы душ и теле́с на́ших, да не неисцеле́ни оты́дем из сея́ жи́зни вре́менныя, но да чи́сти и непоро́чни предста́нем Престо́лу Бо́жию, прославля́юще Отца́, и Сы́на, и Свята́го Ду́ха, во ве́ки веко́в. Ами́нь.

Служба преподобному Исаакию Оптинскому

Текст утвержден Священным Синодом
Русской Православной Церкви
17 июля 2020 года (журнал № 34)

Ме́сяца а́вгуста в 22-й день

Преподо́бнаго Исаа́кия О́птинскаго

На вече́рни

На Го́споди, воззвáх: стихи́ры пра́здника. И преподо́бнаго стихи́ры, глaс 8:

Прииди́те, вси ве́рнии,/ дре́внюю добро́ту мона́шества у́зрим,/ ю́же пропису́ет па́мять богоно́снаго отца́ на́шего Исаа́кия,/ той бо, при исто́чнице уче́ния ста́рческаго насажде́н быв,/ в пусты́нных удо́лиих я́ко фи́никс процвете́/ и, возрасти́в сла́дкия плоды́ воздержа́ния,/ благоуха́нный арома́т доброде́тели источи́./ Ны́не же, ра́йския добро́ты наслажда́яся,/ мо́лит Христа́ Бо́га// поми́ловатися душа́м на́шим.

Преподо́бне о́тче Исаа́кие,/ ум горе́ вознося́,/ на земли́ послуша́нию до́бре прилежа́л еси́,/ хле́бы же иску́сно свои́ма рука́ма испека́я,/ богодухнове́нными глаго́лы, я́ко хле́бом духо́вным,/ ча́да твоя́ оби́льно напита́л еси́/ и, сладкогла́сно в хра́ме слу́жбу Бо́жию со тща́нием соверша́я,/ на высоту́ созерца́ния возше́л еси́./ Ны́не же, со А́нгельскими чи́ны ликовству́я,/ моли́ Христа́ Бо́га,// дарова́ти душа́м на́шим ве́лию ми́лость.

Преподо́бне о́тче Исаа́кие,/ ве́рный учениче́ Христо́в,/ иску́сный устрои́телю вертогра́да О́птинскаго,/ до́брый де́лателю любому́дрия мона́шескаго,/ ча́да Бо́жия святооте́ческими уче́нии напита́вый,/ ны́не не преста́й моли́тися Го́сподеви/ дарова́ти душа́м на́шим умиле́ние// и оби́тели твое́й благоустрое́ние.

Сла́ва, глaс 1:

Небе́сным чино́м подража́я,/ с ли́ки преподо́бных сочета́лся еси́, о́тче Исаа́кие,/ у́мную моли́тву в се́рдце утверди́в,/ о́браз ученико́м твои́м был еси́,/ простото́ю и смиренному́дрием настоя́тельство украси́в,/ му́дре бра́тию в Ца́рствие Бо́жие упра́вил еси́./ Те́мже любо́вию чту́щим святу́ю па́мять твою́,/ испроси́ у Христа́ Бо́га/ оби́тели О́птинстей Небе́сный покро́в и заступле́ние// и душа́м на́шим ве́лию ми́лость.

И ны́не, пра́здника, глас то́йже: Подоба́ше самови́дцем:

Вход. Проки́мен дне. И чте́ния преподо́бническая 3:

На лити́и стихи́ра хра́ма.

Сла́ва, преподо́бнаго, глас 5:

Воспо́йте, лю́дие, воспо́йте,/ Исаа́кия ста́рца на́шего,/ днесь бо пресве́тлую ду́шу свою́/ в пречи́стеи ру́це Бо́га предае́т,/ Его́же мо́лит непреста́нно// дарова́ти оби́тели мир и ве́лию ми́лость.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Сладкогла́сно слу́жбу Бо́жию соверша́я/ и в молча́нии моли́тве непреста́нней поуча́яся,/ дом Ду́ха Свята́го себе́ соде́лал еси́,/ преподо́бне о́тче Исаа́кие,// моли́твенниче о душа́х на́ших.

Стих: Честна́ пред Го́сподем// смерть преподо́бных Его́.

Нача́ло и́ноческому исправле́нию/ во благообра́зии вне́шнем полага́я,/ де́ланию вну́треннему бра́тию науча́л еси́,/ преподо́бне о́тче Исаа́кие,// да не яви́мся мона́си то́кмо одея́нием.

Стих: Что возда́м Го́сподеви о всех,// я́же воздаде́ ми?

Простото́ю и му́дростию/ от Бо́га укра́шен быв,/ умо́м Того́ лицезре́л еси́,/ Исаа́кие, ста́рче преди́вный,// преподо́бных отце́в сожи́телю.

Сла́ва, глас 4:

Я́ко дре́вний патриа́рх,/ от ю́ности пра́ведное житие́ проводя́,/ бога́тство духо́вное стяжа́л еси́/ и, я́ко до́брый па́стырь,/ на па́жити святооте́честей/ о́вцы твоя́ воспита́л еси́,/ от кла́дязя воды́ живы́я тех напая́я/ и мы́сленныя во́лки жезло́м моли́твенным отгоня́я,/ те́мже вси зове́м:/ о́тче наш Исаа́кие,// сохрани́ и ны́не ста́до твое́ невреди́мо.

И ны́не, пра́здника.

Тропа́рь, глас 1:

По́стническими укра́шен добро́тами,/ ко́рмчий изря́ден мона́шествующим был еси́,/ чистото́ю и простото́ю Ду́ха благода́ть стяжа́в,/ О́птинскаго ста́рчества яви́лся еси́ украше́ние./ Сего́ ра́ди зове́м тебе́, Исаа́кие:/ сла́ва просвети́вшему тя Христу́,/ сла́ва укре́пльшему тя,// сла́ва подаю́щему тобо́ю нам исцеле́ния.

На у́трени

По 1-м стихосло́вии седа́лен, глас 1:

По́стническому ли́ку сочета́вся, преподо́бне Исаа́кие, о земны́х и тле́нных наслажде́ниих небре́гл еси́, труды́ же воздержа́ния и сле́зы покая́ния Христу́ принесы́й, врага́ ро́да челове́ческаго посрами́л еси́. Те́мже па́мять твою́ све́тло пра́зднующих от вся́ких бед сохрани́ моли́твами твои́ми.

Сла́ва, и ны́не, пра́здника.

По 2-м стихосло́вии седа́лен, глас 1:

От собла́знов жите́йских, и́ноков смуща́ющих, и страсте́й треволне́ния изба́ви ста́до твое́, Исаа́кие богому́дре, путе́м бо те́сным в ра́йскую широту́ дости́гл еси́ и отту́ду подае́ши по́мощь тя почита́ющим.

Сла́ва, и ны́не, пра́здника.

По полиеле́и седа́лен, глас 8:

Стра́сти плотски́я мече́м воздержа́ния посе́кл еси́ и смире́нными коленопреклоне́ньми главу́ зми́еву сокруши́л еси́, преподо́бне о́тче Исаа́кие. Сего́ ра́ди со дерзнове́нием вопие́м ти: моли́ Христа́ Бо́га просвеще́ния нам дости́гнути, любо́вию чту́щим святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Нра́вом ти́хий,/ кро́ткий и смире́нный се́рдцем,/ преподо́бне о́тче Исаа́кие,/ ты, от Го́спода дар сове́та и прему́дрости восприи́м,/ до́бре и́ноком оби́тели Пречи́стыя Богоро́дицы послужи́л еси́,/ днесь же, Тоя́ Успе́нию пра́зднуему,/ блаже́нный поко́й души́ твоея́ обре́л еси́// и успе́ние со святы́ми.

Кано́н преподо́бнаго, его́же краегране́сие: Песнохва́лится про́сто Исаа́кия красота́. Глас 8.

Песнь 1

Ирмо́с: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Пе́сненный вене́ц тебе́ тщу́ся соплести́, усе́рдствуй же, о́тче, моли́твою твое́ю и пода́ждь благоле́пно воспе́ти твоея́ простоты́ вели́кую красоту́.

Ева́нгельским нра́вом изде́тска обогати́вся, от суеты́ мирски́я уклони́лся еси́ и, я́ко му́дрый купе́ц, пучи́ну премину́в собла́знов, в приста́нищи и́ночестем до́брый би́сер обре́л еси́.

Смиренному́дрием украси́в главу́ твою́ и послуша́нием прилежа́в вели́ким ста́рцем, духо́вному худо́жеству научи́лся еси́, те́мже и мно́гим лю́дем до́брый наста́вник яви́лся еси́.

Богоро́дичен: Но́сиши на рука́х Твои́х, Де́во Всепе́тая, Христа́, Со́лнце Пра́вды, И́же зе́млю просвети́ богозна́ния луча́ми и к Све́ту Невече́рнему наста́ви нас.

Песнь 3

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.

О́тче преподо́бне, ста́рчества О́птинскаго досто́йный прее́мниче! Ты, во главу́ оби́тели поста́влен быв и игу́менский крест, я́ко корми́ло духо́вное, восприи́м, мно́гия и́ноки в Ца́рствие Христо́во му́дро упра́вил еси́.

Христа́ изде́тска возлюби́в, ве́ру апо́стольскую и любо́вь оте́ческую стяжа́в, а́нгельски на земли́ пожи́л еси́, свя́те Исаа́кие, ны́не же с ли́ки преподо́бных Бо́га прославля́еши.

Ве́рен быв заве́том ста́рцев О́птинских и оби́тель твою́ благоче́стием украси́в, ду́ши, вве́ренныя тебе́, Исаа́кие преподо́бне, испове́данием по́мыслов и слеза́ми покая́ния очища́ти науча́л еси́.

Богоро́дичен: Ада́мова ме́ртвость Тобо́ю оживотвори́ся, Богоневе́стная, зачала́ бо еси́ без се́мене Христа́, всех Воскресе́ние, те́мже истле́вшии во гробе́х улуча́ют безсме́ртия наде́жду Твои́ми, Де́во, моли́твами.

Конда́к и и́кос пра́здника.

Седа́лен, глас 8:

Я́ко житие́ твое́ све́тло бысть, преподо́бне, поще́ния ра́ди, та́ко яви́ся пресве́тло и успе́ние твое́, Христа́ бо просла́вил еси́ я́ве де́лы твои́ми, сия́я мно́гая ле́та му́дростию ста́рческою, о́вцы же Христо́вы во благоче́стии упа́сл еси́, мы́сленныя та́ти дале́че прогна́в, богому́дре. Те́мже моли́ся Христу́, преподо́бне Исаа́кие, грехо́в оставле́ние дарова́ти чту́щим любо́вию па́мять твою́.

Сла́ва, и ны́не, пра́здника.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Любо́вию безмо́лвия взыску́я и послуша́нию прилежа́, Исаа́кие богоблаже́нне, я́ко ве́рный учени́к Христо́в, в себе́ запечатле́л еси́ нрав ева́нгельский, те́мже и наста́вник яви́лся еси́ прему́дрый.

Истонча́я ве́лиим посто́м плоть твою́, стра́сти душетле́нныя усмири́л еси́ и ду́шу твою́ слеза́ми покая́ния омы́л еси́. Моли́ о нас, преподо́бне, да скве́рны грехо́вныя очи́стимся.

Терпе́нием вооружи́вся, богому́дре, воздержа́нием стре́лы вра́жия отрази́л еси́ и, моли́твою ум окрыли́в, ловле́ния вра́жия избе́гл еси́. Помози́ и нам, преподо́бне, се́тей лука́ваго избе́гнути.

Богоро́дичен: Сотвори́ Тебе́, Де́во, вели́чие Си́льный и свя́то и́мя Его́, И́же в ложесна́ Твоя́ вшед, Плотоно́сец на земли́ яви́ся и ми́ра Засту́пницу Тя показа́.

Песнь 5

Ирмо́с: От но́щи неве́дения/ по душелови́тельному пути́ при́сно блудя́щаго,/ Све́том ра́зума Твоего́, Го́споди, преднаставля́я мя,// на стезю́ за́поведей Твои́х напра́ви.

Я́ко све́тлая свеща́, преподо́бне Исаа́кие, от любве́ ста́рцев О́птинских возже́глся еси́ и све́том богоразу́мия ду́ши приходя́щих к тебе́ просвети́л еси́.

Простото́ю нра́ва и чи́стым се́рдцем украси́вся, житие́м добронра́вным просия́л еси́, блаже́нне, и мно́гия лю́ди ко Христу́ приве́л еси́. Научи́ и нас путе́м за́поведей Госпо́дних пра́во ходи́ти.

Ре́вность по благоче́стии име́я и игу́менскою вла́стию облече́н, любому́дрие мона́шеское с прилежа́нием насажда́л еси́, о́тче, и кро́ткими обличе́ньми и́ноки вразумля́л еси́.

Богоро́дичен: От Твои́х ложе́сн, Де́во Пречи́стая, Богоро́дице, Со́лнце Пра́вды возсия́, и нощь лука́вых страсте́й отбеже́, у́тро же благоче́стия просия́.

Песнь 6

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Свы́ше власть прии́м вяза́ти и реши́ти, о́тче Исаа́кие, соу́зом любве́ бра́тство твое́ связа́л еси́ и, к лу́чшему простира́яся соверше́нству, моли́тву те́плую ко Го́споду возноси́л еси́.

Твоя́ простота́, о́тче Исаа́кие, обличи́ хитреце́в неве́жество, чистота́ же души́ привлече́ А́нгел мно́жество, ум бо Христо́в стяжа́л еси́, мирско́е худо́жество я́ко сор вменя́я.

Оби́тели Ша́мординския благопопечи́тель изря́ден и О́птинскаго ста́рца Амвро́сия сотаи́нник богому́дрый быв, моли́твенник усе́рдный о па́стве твое́й яви́лся еси́, Исаа́кие.

Богоро́дичен: Испо́лнен храм Твой, Богоро́дице, песнопе́ний духо́вных, я́ко ны́не па́мять преподо́бнаго приспе́, и́же мощьми́ зде упоко́ися и ду́хом неотсту́пно пребыва́ет. Те́мже ра́дуйся, зове́м Ти, Де́во Чи́стая, преподо́бных похвало́.

Конда́к, глас 3:

А́нгельскому чи́ну подража́я,/ плоть твою́ ду́хови покори́л еси́,/ смире́нным же се́рдцем любо́вь Христо́ву стяжа́в,/ изря́дный наста́вник па́стве твое́й яви́лся еси́,/ Исаа́кие о́тче богому́дре,/ Христа́ Бо́га моли́/ благоче́стие Оте́честву на́шему дарова́ти// и спасе́ние душа́м на́шим.

И́кос:

Све́тлых по́двигов твои́х заря́ осиява́ет ны́не храм сей, богому́дре Исаа́кие, я́ко мощьми́ честны́ми зде почи́л еси́, благоче́стия о́браз нам показу́я, и, я́ко неугаси́мую лампа́ду, вжегл еси́ моли́тву твою́ непреста́нную, оте́ческою любо́вию вся ча́да твоя́ согрева́я. Те́мже ко предста́тельству твоему́ притека́ющим утвержде́ние во благоче́стии испроси́ и спасе́ние душа́м на́шим.

Песнь 7

Ирмо́с: От Иуде́и доше́дше, о́троцы,/ в Вавило́не иногда́,/ ве́рою Тро́ическою пла́мень пе́щный попра́ша пою́ще:// отце́в Боже, благослове́н еси́.

Све́тел по́мысл име́я и разсуди́телен, богому́дро па́ству твою́ упа́сл еси́, Исаа́кие о́тче наш, и от кла́дязя живо́творных оте́ческих писа́ний о́вцы твоя́ напоя́л еси́.

А́ще и мно́гими почестьми́ окруже́н и са́ном игу́менским укра́шен был еси́, о́тче Исаа́кие, оба́че, тяготу́ и́ноческаго жития́ люботру́дно подъе́м, о́браз смире́ния и братолю́бия и́ноком показа́л еси́.

А́нгельски на земли́ пожи́в, лице́ Христо́во лице́м твои́м зре́ти сподо́бился еси́, блаже́нне, и, ли́ку преподо́бных сочета́вся, вку́пе с ни́ми прославля́еши Триипоста́сное Божество́.

Богоро́дичен: Ко Твое́й непобеди́мей по́мощи прибега́ем, Богоро́дице, изба́ви оби́тель Твою́ от ересе́й и нестрое́ний, да благоче́стно сла́вится в ней Пречестно́е и́мя Бо́га отце́в на́ших.

Песнь 8

Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во/ и огнь в ро́су претво́ршее/ и превозноси́те всем жизнь подава́ющаго// Ду́ха Всесвята́го во ве́ки.

Исцеле́ния ны́не источа́ет свяще́нная ра́ка моще́й твои́х, о́тче Исаа́кие, и притека́ющии к ней с ве́рою здра́вие улуча́ют душа́м и телесе́м си́лою на тебе́ почи́вшаго Ду́ха Всесвята́го.

Я́ко домоправи́тель иску́сен, подо́бник Моисе́евых дел яви́лся еси́, преподо́бне, ста́рчества О́птинскаго утверди́телю и в нощи́ безпу́тия блужда́ющим ве́рный указа́телю.

Кро́тостию украси́вся, богоблаже́нне Исаа́кие, бра́тию оте́чески возлюби́л еси́ и, изря́дное показа́в милосе́рдие, мно́гое утеше́ние скорбя́щим пода́л еси́.

Богоро́дичен: Ра́дуйся, све́тлая Сло́ва пала́то, ра́дуйся, ча́ше Животворя́щия воды́, по вся дни напая́ющая ве́рных, ра́дуйся, Богома́ти, Предста́тельнице пою́щих Тя.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,// со безпло́тными ли́ки Тя велича́юще.

А́нгельскими чи́нми ны́не окруже́н, в го́рняя взя́лся еси́ с преподо́бными ста́рцы О́птинскими, о́тче Исаа́кие, я́ко ми́ра красоту́ презре́л еси́ и по́двиги по́стническими украси́лся еси́.

Светоза́рен яви́ся днесь день преставле́ния твоего́, о́тче досточу́дне, во́ньже подае́ши изря́дную по́мощь и предста́тельствуеши пред Бо́гом о ве́рою и любо́вию чту́щих тя.

О́птинскаго вертогра́да дре́во многопло́дное яви́лся еси́, о́тче, те́мже и ны́не, духо́вными плоды́ ве́рных насыща́я, исцеле́ния оби́льная источа́еши с те́плою моли́твою притека́ющим к ра́це моще́й твои́х.

Тро́ичен: Тро́ицы изря́днии уго́дницы яви́шася преподо́бнии ста́рцы О́птинстии, Отца́ бо вои́стину почто́ша, Сы́ну изря́дно порабо́таша и Ду́ха Свята́го стяжа́ша, я́ко сосу́ди богоприя́тнии.

Богоро́дичен: А́нгелов Творе́ц, Сын и Бог Твой, лю́ди спасе́, во гресе́х зле погиба́ющих, те́мже Тя, Де́во Чистая, с безпло́тными ли́ки велича́ем.

Свети́лен:

Я́ко со́лнце, вели́чием по́двигов твои́х возсия́л еси́, о́тче преподо́бне, и, све́том доброде́телей озари́в преде́лы земли́ Ру́сския, преше́л еси́ к Све́ту Невече́рнему, те́мже вопие́м ти: просвети́ на́ша помышле́ния и на путь покая́ния наста́ви.

Сла́ва, и ны́не, пра́здника.

На хвали́тех стихи́ры, глас 1.

Подо́бен: Небе́сных чино́в:

Небе́сных чино́в дости́гл еси́/ и венце́м безсме́ртия украси́лся еси́,/ и́мже увязе́ тя десни́ца Всевы́шняго,/ по́двигов ра́ди, я́же на земли́ подъя́л еси́,/ Исаа́кие, преподо́бне о́тче наш,// моли́ о душа́х на́ших.

Тве́рдым щито́м ве́ры/ и кре́пкою броне́ю пра́ведности/ угаси́л еси́ стре́лы разжже́нныя лука́ваго/ и све́тлым мече́м благоче́стия/ пле́велы страсте́й посе́кл еси́, во́ине Христо́в Исаа́кие,// и ны́не спобо́рствуй нам си́лу вра́жию прогна́ти.

О́тче преподо́бне Исаа́кие,/ благода́ти сосу́де избра́нный,/ ты, еле́ем моли́тв умягча́я грехо́вныя ра́ны чад свои́х,/ к подвиго́м благоче́стия тех подвиза́л еси́,/ и́стинней любви́ к Бо́гу и бли́жнему науча́я,// те́мже не оста́ви и нас попече́нием твои́м.

Сла́ва, глас 3:

Днесь све́тло сия́ет па́мять твоя́,/ о́тче наш Исаа́кие,/ а́нгельским бо украси́вся благоле́пием,/ па́стырь изря́ден мона́хом яви́лся еси́/ и, благоче́стием пресве́тло просия́в,/ богому́дрием всех притека́ющих к тебе́ озари́л еси́./ Те́мже и ны́не просвети́ нас,/ чту́щих святу́ю па́мять твою́,/ и научи́ благоче́стно почита́ти// Тро́ицу Святу́ю и Неразде́льную.

И ны́не, пра́здника.

Славосло́вие вели́кое, и отпу́ст.

На Литурги́и слу́жба пра́здника, и преподо́бнаго.

Служба священномученику Павлину, архиепископу Могилевскому

Текст службы утвержден на заседании Священного Синода 25 августа 2022 года (журнал № 78).

Месяца октября в 21-й день

Священномученика Павлина, архиепископа Могилевскаго

На малей вечерни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Смире́н, незло́бив, кро́ток и прост быв,/ священному́чениче Павли́не,/ я́ко а́нгел, на земли́ пожи́л еси/ и, муче́нием путь сконча́в,/ зе́млю кро́тких насле́довал еси́./ Моли́ о душа́х наших.

Ве́рою и благоче́стием/ от ма́терних пеле́н обогати́лся еси́/ и, Христа́ всем сердцем возлюби́в,/ в Саро́вскую пу́стынь всели́лся еси́,/ идеже, усердно подвизаяся,/ сама́го себе́ со вся́ким смире́нием ста́рцем подклони́л еси./ Сего́ ра́ди тя, святе Павли́не, ублажа́ем.

Во времена́ гоне́ний лю́тых в земли нашей/ яви́ тя Госпо́дь, преди́вне Павли́не,/ свети́льника пресветлаго,/ благоче́стием сия́юща/ и любо́вию ча́да церко́вная согрева́юща./ Сего́ ра́ди тя прославля́ем.

Твоему́ добродетельному житию,/ Павли́не досточудне,/ а́нгели удиви́шася,/ в телеси́ бо сый,/ безпло́тным подража́ти потща́лся еси́/ и, ум твой ко Христу возвы́сив,/ прему́дрость боже́ственную измлада возлюбил еси́./ Сего́ ра́ди тя почита́ем.

Слава, глас 5.

Подо́бен: Ра́дуйся:

Уподо́бился еси́, Павли́не священному́чениче,/ преподо́бным и богоносным отце́м/ Серафи́му в Диве́еве ди́вному/ и Феодо́сию в Киеве достохва́льному,/ от ю́ности бо твоея́ и́го благое на ра́мена взем,/ любо́вию Христо́вою распали́лся еси́/ и, я́ко звезда́, на тве́рди церко́вней во дни гоне́ния безбо́жнаго просия́л еси́,/ ве́рныя на путь спасе́ния наста́вляя/ и во благочестии утверждая./ Последи же, от беззако́нник приим непра́ведное убие́ние,/ себе́ сама́го в жертву живую принесл еси́./ Ны́не же, предстоя́ престо́лу Царя́ Небе́снаго,/ моли́ спасти́ся душа́м наши́м.

И ны́не, Богоро́дичен, глас то́йже:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние многих прегреше́ний, мо́лимся.

На стихо́вне стихи́ры, глас 6.

Подо́бен: Тридне́вен:

О́браз Христо́ва милосе́рдия па́стве твоей яви́л еси́,/ Павли́не досточудне,/ си́рых и вдови́ц быв заступник,/ ны́не же во све́тлостех святы́х и нас помяни,/ чту́щих с любовию па́мять твою́.

Стих: Свяще́нницы Твои́ облеку́тся в правду/ и преподобнии Твои возрадуются.

Образ злострада́ния и терпе́ния показал еси,/ Павли́не терпеливодушне,/ и, яко твердый свидетель истины,/ поруга́ния, изгна́ния и ну́ждную смерть претерпе́л еси́./ Моли́ о душа́х на́ших.

Стих: Честна́ пред Го́сподем/ сме́рть преподо́бных Его́.

О́бразом Креста́ Животворя́щаго/ се́рдце твое́ утверди́в,/ богому́дре Павлине,/ к страда́нием му́жески вда́лся еси́,/ темже дерзновение улучив ко Господу,/ моли́ спасти́ся душам нашим.

Сла́ва, глас и подо́бен то́йже:

О́браз был еси́ твоему́ ста́ду,/ священномучениче Павли́не,/ сло́вом, житие́м, любо́вию, ду́хом, ве́рою, чистото́ю,/ сего́ ра́ди, имя добраго пастыря стяжав,/ Христа́ Пастыренача́льника моли́ о нас,/ па́мять твою́ верно соверша́ющих.

И ны́не, Богоро́дичен, глас и подо́бен то́йже:

О́браз Твой святы́й почита́ем,/ Богоро́дице Де́во Пречи́стая,/ и Боже́ственному Младе́нцу,/ во объятиих Твоих сущу, покланя́емся,/ моля́ще о спасе́нии душ на́ших.

Тропа́рь писан на велицей вечерни

На велицей вечерни

Блаже́н муж: 1-й антифо́н. На Го́споди, воззва́х: стихи́ры, глас 6.

Подо́бен: Все отло́жше:

И́же хо́щет по Мне ити́, глаго́лет Христо́с,/ да во́змет Крест и Мне да после́дствует,/ ты же, священному́чениче Павли́не,/ от ю́ности и́го благо́е на ра́мена взем,/ ми́ра отве́рглся еси́,/ те́мже, по достоя́нию святи́тельства са́ном почте́н быв,/ Це́ркви Русской во времена́ гоне́ния безбо́жнаго послужи́л еси́/ и венце́м муче́ния украси́лся еси́./ Сего́ ра́ди тя прославля́ем.

Твои́х доброде́телей, отче Павли́не,/ па́мять ны́не ве́рных сердца весели́т,/ ты бо, в безме́рнем смире́нии нището́ю обогати́вся,/ многими подвиги просиял еси/ и, Христа́ всем се́рдцем возлюби́в,/ и́стинный пастырь Бо́га Вы́шняго яви́лся еси,/ те́мже, святи́тельства оде́ждею по достоя́нию украшен,/ кро́вию му́чения сию́ обагри́л еси́./ Моли́ о душа́х на́ших.

Егда́ боже́ственное рачение на́йде на тя, богому́дре,/ тогда́ плотско́е мудрова́ние духу покори́л еси́/ и, во оби́тель Саро́вскую всели́вся,/ мно́гия труды́ поне́сл еси́,/ дарами же духовными украсився,/ яко свети́льник пресветлый на све́щнице церко́внем поста́влен был еси/ и, во святи́тельстве досточе́стно пожи́в,/ муче́нием путь сконча́л еси./ Моли́ спасти́ся душам нашим.

Люты́ ско́рби, но сла́док рай,/ боле́зненны труды́, но блаже́нно восприя́тие,/ си́це глаго́лал еси́, терпеливодушне Павлине,/ егда́ от ме́ста на место́ от беззако́нных гони́мь быва́ше/ и па́ствы твоея́ разлучашеся,/ темже, и в хла́дней земли Сиби́рстей путь твой сконча́в,/ убие́ние от непра́ведных прия́л еси́,/ обаче теплоту́ блаже́нства ве́чнаго обрел еси./ Моли́ и нам черто́га Христо́ва сподобитися.

Сла́ва, глас 8:

Ра́дуйся, пу́стынь Саро́вская благознамени́тая,/ ра́дуйтеся, преде́лы Костромски́я и Яросла́вския,/ ра́дуйся, Москво́ первопресто́льная и честна́я оби́тель Новоспа́сская,/ я́ко воспита́ли есте́ граждани́на Ца́рства Небе́снаго,/ но́ваго священному́ченика, блаже́ннаго Павли́на,/ му́жа избранна и соверше́нна,/ и́же, любо́вию, прему́дростию и благоче́стием просия́в,/ подвиги своими Церковь Русскую украсил есть./ Темже, вернии, с любовию тому возопиим:/ о́тче всеблаже́нне, моли́ся о нас,/ всечестну́ю твою па́мять соверша́ющих.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния.

Дея́ний святы́х апо́стол чте́ние (глава́ 4; 1-12):

Во дни о́ны, глаго́лющим же апо́столом к лю́дем,/ наидо́ша на ни́х свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пя́ть./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою, или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть Ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го Имене под небесе́м, да́ннаго в челове́цех,/ о не́мже подоба́ет спасти́ся нам.

Дея́ний святы́х апо́стол чте́ние (глава́ 4; 13-22):

Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о Имени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о Имени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ изцеле́ния.

Дея́ний святы́х апо́стол чте́ние (глава́ 4, 23-31):

Во дни о́ны, отпуще́на бы́вша апо́стола приидо́ста ко свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во изцеле́ния,/ и зна́мением и чудесе́м быва́ти Именем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

На лити́и стихи́ра хра́ма и свята́го, глас 2.

Подобен: Ки́ими похва́льными венцы́:

Ки́ими похва́льными венцы́/ увязе́м Павлина священному́ченика,/ мона́хов похвалу́,/ святи́телей добро́ту,/ ве́ры столпа́ непреобори́маго,/ от ю́ности прему́дрость возлюби́вшаго/ и во благоче́стии неле́ностно потруди́вшагося?/ Сего́ бо вои́стину досто́йно/ безсме́ртныя сла́вы венце́м/ венча́ет Христо́с Бог наш,/ име́яй ве́лию мило́сть.

Ки́ими духо́вными пе́сньми/ ублажи́м достосла́внаго Павли́на/ страда́льца твердейшаго,/ Правосла́вия побо́рника,/ в после́дняя ле́та нам дарова́ннаго,/ благоче́стия учи́теля,/ покая́ния пропове́дника,/ на путь спасе́ния наставля́ющаго?/ Его́же моли́твами/ враго́в шата́ния, Христе́, низложи́,/ име́яй ве́лию ми́лость.

Ки́ими пе́сненными добро́тами/ воспои́м Христо́ва уго́дника,/ сиро́т питателя,/ ю́ных наста́вника,/ в милосе́рдии Небе́сному Отцу́ подража́вшаго,/ кла́дязь любве неисчерпа́емый,/ ми́лостыни ре́ку незави́стну,/ Це́рковь Ру́сскую веселя́щую тече́ньми словес своих?/ Его́же молитвами и предста́тельством/ спаси́ отечество наше, Христе́ Бо́же,/ имеяй велию милость.

Сла́ва, глас 6:

Мно́ги ско́рби претерпе́л еси́,/ достоблаже́нне Павли́не священному́чениче,/ те́мже по достоя́нию вшел еси́ в Ца́рство Небе́сное,/ иде́же в ли́це новому́ченик Це́ркве Ру́сския,/ славою Горнею озаряемь,/ по́честь побе́ды твоего́ страда́ния прие́млеши./ Моли́ спасти́ся душам нашим.

И ны́не, Богоро́дичен, глас тойже: Богородице, Ты еси Лоза истинная:

На стихо́вне стихи́ры, глас 2.

Подо́бен: Егда́ от Дре́ва:

Святи́тельства престо́л украша́я доброде́тельми,/ во времена́ лю́тая в земли́ нашей,/ богохрани́мому гра́ду Ку́рску посыла́ешися,/ я́ко ми́рный а́нгел, Павли́не всече́стне,/ еже кро́тостию и любо́вию людем послужити,/ ча́да церко́вная сло́вом Бо́жиим наставити/ и еле́ем милосе́рдия духо́вныя я́звы их исцелити./ Уврачуй и на́ша стру́пы греховныя, цели́телю изря́дный.

Стих: Свяще́нницы Твои́ облеку́тся в пра́вду/ и преподо́бнии Твои́ возрадуются.

Щито́м ве́ры, Павли́не многострада́льне,/ разли́чная ухищре́ния богобо́рцев отрази́л еси́/ и, темни́чныя у́зы претерпе́в,/ Пе́рмския земли́ архипа́стырь наре́клся еси́,/ насле́дник священнострада́льца Андрони́ка быв./ Темже, па́ству расточе́нную/ ти́хим гла́сом любве́ собра́в,/ по достоя́нию нарече́ние до́браго па́стыря прие́млеши,/ и нас во еди́но ста́до Христо́во собери,/ молитвами твоими, священному́чениче преславне.

Стих: Честна́ пред Го́сподем/ сме́рть преподо́бных Его́.

Спасения души взыскуя,/ вослед Христу смиренно последовал еси,/ Иже и постави тя архипастыря гра́да Калу́ги,/ священномучениче Павли́не преславне,/ моли́твы чи́стое зерца́ло,/ ми́лостыни усе́рдный пода́телю/ и пе́ний церко́вных изря́дный люби́телю!/ Ты же, Боже́ственныя Та́йны всеблагогове́йне совершая,/ ве́рныя люди со Христо́м соединя́л еси/ и заблуждшия на путь истинный наставлял еси./ Те́мже, лико́м небе́сным совокупи́вся,/ моли́ спастися душа́м на́шим.

Сла́ва, глас 8:

Нището́ю духо́вною обога́тився,/ себе́ сама́го Бо́гу соверше́нно пре́дал еси́,/ доброхва́льне святи́телю Павли́не,/ и, я́ко звезда́ пресве́тлая,/ от восто́ка земли́ на́шея к за́паду дости́гл еси́./ Обаче, на престо́ле Могиле́встем доброде́тельми просия́в,/ па́ки сове́том безбо́жных на восто́к гони́мь быва́ше,/ иде́же в преде́лех Сиби́рских луче́й твои́х сия́ние за́йде./ Освяти́ и на́ша ду́ши/ све́том страда́ний твои́х, достосла́вне.

И ны́не, Богоро́дичен, глас то́йже: Безневе́стная Де́во:

Тропа́рь, глас 4:

От ю́ности желание к Богу возложив,/ на пажитех мона́шеских упа́слся еси́/ и, многия добродетели стяжав,/ архипа́стырь слове́сных овец явился еси,/ ихже до́бре упа́с,/ мно́гия ско́рби от богобо́рцев претерпе́л еси́/ и, муче́нием путь сконча́в,/ Царствие Небесное наследовал еси,/ священному́чениче Павли́не,/ моли́ Христа Бога/ спасти́ся душа́м на́шим.

Ин тропа́рь, глас 2:

Ве́ры Правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священномучениче Павлине,/ па́ству твою́ до́бре упа́сл еси́/ и в хладней Сиби́ри му́ченическую сме́рть прия́л еси́./ Ны́не же, в ве́чней сла́ве пребыва́я,/ моли́ спасти́ся душа́м на́шим.

На утрени

На Бог Госпо́дь: тропа́рь священному́ченика два́жды. Сла́ва, и ны́не, Богородичен.

По 1-м стихосло́вии седа́лен, глас 7:

Гоне́ния лютая претерпева́я, си́це безбо́жным глаго́лал еси́, священному́чениче Павли́не: путь наш кре́стный есть, оба́че стра́ха ва́шего и са́мыя сме́рти не убои́мся, я́ко Кресто́м упова́ем дости́гнути Небе́снаго Ца́рствия, его́же обеща́ Христо́с всем лю́бящим Его́. Два́жды.

Сла́ва, и ны́не, Богородичен, глас то́йже:

Ны́не ли́цы новому́ченик со а́нгелы славосло́вят Тя, Влады́чице, све́тлостей со́лнечных превы́шшую, Похвалу́ всея́ вселе́нныя, Сло́во Бо́жие во чре́ве прии́мшую и Ра́дость ми́ру ро́дившую. С нимиже и мы вопием: ра́дуйся, спасе́ния на́шего Хода́таице.

По 2-м стихосло́вии седа́лен, глас 5:

Изгна́ния, узи́лища и безве́стную кончи́ну прови́дев, блаже́нне Павли́не, ко Подвигополо́жнику Христу́ со упованием крепким взыва́л еси́, да в терпе́нии путь твой испра́вит, сове́ты нечести́вых разори́т, Це́рковь же святу́ю во благоче́стии сохрани́т. Темже моли́ спасти́ся душа́м на́шим. Два́жды.

Сла́ва, и ны́не, Богородичен, глас то́йже:

Милосе́рдия твоего́ пучи́ну кто испове́сть, Де́во Пренепоро́чная, Засту́пнице на́ша и Упова́ние, непосты́дная Наде́ждо христиа́н, скорбя́щих Ра́досте и всех, су́щих на земли́, пресве́тлая Добрόто? Покры́й нас боже́ственным предста́тельством Твои́м, Пречи́стая Богоро́дице, Влады́чице.

Велича́ние:

Велича́ем тя,/ священному́чениче Павли́не,/ и чтим честна́я страда́ния твоя́,/ я́же за Христа́/ претерпе́л еси́.

Ино велича́ние:

Величаем тя,/ священномучениче Павлине,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси языцы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиеле́и седа́лен, глас 8:

Егда́ богобо́рцы, я́ко во́лцы лютии, на Це́рковь Христо́ву в Ру́сстей земли́ восста́ша, тогда, священному́чениче Павли́не, я́ко пастырь до́брый, ду́шу твою́ за о́вцы слове́сныя пололожи́л еси́. И ныне моли́ Христа́ Пастыренача́льника, да спасе́т ста́до Свое́ от волко́в, губя́щих е́. Два́жды.

Сла́ва, и ны́не, Богородичен, глас то́йже:

Безневе́стная Ма́ти, Пречи́стая Госпоже́, Де́во Богоро́дице! Моли́ся Сы́ну Твоему́ и Бо́гу на́шему, да не отврати́т от нас Ли́ка Своего́, но да просвети́т сердца́ на́ша, омраче́нная страстьми́, и поми́лует нас по велицей Своей милости.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Луки́, зача́ло 67.

По 50-м псалме́ стихи́ра, глас 6:

Прииди́те, мучениколю́бцы,/ дне́сь духо́вне возвесели́мся,/ па́мять соверша́юще сла́внаго Павли́на,/ но́ваго священнострада́льца,/ сей бо, зе́млю Русскую доброде́тельми просвети́в,/ я́ко благово́нное приноше́ние Го́сподеви возложи́лся есть:/ ве́ру Христо́ву пред нечести́выми власти́тели испове́да/ и ду́шу свою́ за па́ству положи́,/ ны́не же престо́лу Святы́я Тро́ицы предстои́т/ и мо́лится о душа́х на́ших.

Кано́н Пресвяты́я Богоро́дицы, со ирмосо́м на 6 и священому́ченика на 8, глас 3.

Пе́снь 1

Ирмо́с: Фарао́ни колесни́цы глубино́ю покры́в, Го́споди,/ мо́ре разве́ргл еси́/ и спасл еси́ пе́сньми пою́щия Тя/ лю́ди изра́ильтеския.

Сло́ва служи́теля и свиде́теля, Павли́на славнаго, жити́я кра́сная исправле́ния и честна́я страда́ния пода́ждь ми, Сло́ве, в пе́снех досто́йно восхвали́ти.

Твои́ми моли́твами, священному́чениче, напра́ви ум мой, мно́гими по́мыслы расточе́нный, да просла́влю тя, мно́гими скорбьми́ во Ца́рствие Небе́сное вше́дша.

Роди́телей благоче́стивых до́брый и избра́нный плод яви́вся, блаже́нне Павли́не, от ю́ности всем се́рдцем твои́м и помышле́нием Бо́га возлюби́л еси.

Богоро́дичен: А́нгелов Влады́чице, Пресве́тлая Похвало́ и де́вственная Сла́во! На Тя наде́ющеся, при́сно зове́м: радуйся, Невесто Неневестная!

Пе́снь 3

Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

Жела́нием кра́йним влеко́мь, дом роди́тельский остави́ти потща́лся еси́, боголю́бче, сего́ ра́ди, о́трок сый, в дому́ Бо́жии водвори́лся еси́, при́сно поя́: не́сть свят, не́сть пра́веден, па́че Тебе́, Го́споди.

А́нгел земны́й и небе́сный челове́к яви́лся еси́, богому́дре, те́мже, оби́тели Саро́вския дости́г, в служе́ние бра́тии сам себе́ пре́дал еси́, ра́дуяся и воспева́я: не́сть свят, не́сть пра́веден, па́че Тебе́, Го́споди.

Лука́ваго ко́зни постиго́ша тя, до́бре послу́шниче, ты же, на гро́бе преподо́бнаго Серафи́ма сле́зы пролия́в, во смире́нии Бо́гу возопи́л еси́: не́сть свят, не́сть пра́веден, па́че Тебе́, Го́споди.

Богоро́дичен: Честне́йшую Херуви́м и сла́внейшую су́щи Серафи́м, Де́ву Пречи́стую воспои́м и Ро́ждшемуся из Нея́ возопии́м: не́сть свят, не́сть пра́веден, па́че Тебе́, Го́споди.

Седа́лен, глас 8:

Мно́гими доброде́тельми обогати́лся еси́, свя́те Павли́не: кро́тостию, смире́нием и любо́вию, нищелю́бием и долготерпе́нием, си́ми же, да́нный тебе́ тала́нт стори́цею умножи́в, Боже́ственных Та́ин непоро́чный служи́тель яви́лся еси́, те́мже врата́ Небе́сная отверзо́шася тебе́, и в ра́дость вшел еси́ Го́спода Твоего́. Его́же моли́ и нас Ца́рствия Небе́снаго сподо́бити. Два́жды.

Сла́ва, и ны́не, Богородичен, глас то́йже:

Во гла́сех пе́ний вопие́м Ти, Влады́чице А́нгелов: непреста́нно моли́ся о нас, стихи́ями ми́ра се́го одержи́мых и грехо́м порабо́тившихся; да восста́нем от паде́ния и в покая́нии к Сы́ну Твоему́ припаде́м, вопию́ще: помяни́ нас, Го́споди, во Ца́рствии Твое́м.

Пе́снь 4

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на сме́рть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Па́жити мона́шеския, я́ко пчела́ трудолю́бная облете́л еси́, отче Павли́не, иде́же мед духо́вный собра́в, со́ты души́ твоея́ ра́зумом просвещенным, я́ко некта́ром, испо́лнил еси́, по́я: сла́ва си́ле Твое́й, Го́споди.

Влады́це Христу́ сам себе́ пре́дал еси́, Павли́не блаженне, и, да́нный ти тала́нт трудолю́бно умно́жив, во оби́телех Костромски́х и Яросла́вских до́бре пожи́л еси́, благода́рственно воспева́я: сла́ва си́ле Твое́й, Го́споди.

И́ноческаго жития́ ревни́телю, святе Павли́не! Ты, мал нарече́н быв, ве́рен Богови пребы́л еси́, темже, и над мно́гими поста́влен, во смире́нии вели́чие явил еси, глаго́ля: сла́ва си́ле Твое́й, Го́споди.

Богоро́дичен: Е́дина Чи́стая и Пречи́стая Ма́ти Де́во! Моли́твы на́ша приими́ и Сы́на Твоего́ умоли́ пода́ти нам прегреше́ний проще́ние, непреста́нно вопию́щим: сла́ва си́ле Твое́й, Го́споди.

Пе́снь 5

Ирмо́с: К Тебе́ у́тренюю, всех Творцу́,/ преиму́щему всяк ум ми́рови,/ зане́ свет повеле́ния Твоя́,/ в нихже наста́ви мя.

Новоспа́сская оби́тель вельми́ тобо́ю хва́лится, Павли́не всече́стне, ты бо в той, я́ко свети́льник на све́щнице, посреде́ сто́льнаго гра́да доброде́тельми просия́л еси́.

Му́дростию украше́н, я́ко седи́ною, во младости твоей кро́ток и смире́н пребы́л еси́, достохва́льне Павли́не. Те́мже, богосло́вия уче́нию навы́к, Прему́дрости Ипоста́сней служи́тель изря́ден яви́лся еси.

Че́стен и чист в житии́ твое́м был еси́, святе Павли́не, сего́ ра́ди, свяще́нства са́ном по достоя́нию украси́вся, па́стве моско́встей па́стырь до́брый яви́лся еси́ и наста́вник ю́ношам преизяще́н.

Богоро́дичен: Никто́же притека́яй к Тебе́, посра́млен от Тебе́, Де́во, исхо́дит, но про́сит заступле́ния и благода́ть прие́млет незави́стно.

Пе́снь 6

Ирмо́с: Возведи́ от тли мя, Го́споди Бо́же мой,/ Ио́на вопия́ше,/ и аз вопию́ Ти:/ из глубины́ изба́ви мя, Спа́се, мно́гих мои́х зол/ и к Све́ту Твоему́, молю́ся, наста́ви.

Челове́че Бо́жий и служи́телю ве́рный, святе Павли́не! Ты, яко преподо́бен, незло́бив и безскве́рнен, во́лею Бо́жиею гра́ду Ку́рску архипа́стырь посыла́ешися, да упасе́ши о́вцы слове́сныя па́жити Христо́вы.

Вменя́я вся уме́ты бы́ти, да Христа́ приобря́щеши, наипа́че же па́ству твою́ усво́иши Христу́, трудолю́бен де́латель, отче Павли́не, яви́лся еси́, Боже́ственная соверша́я, и пропове́дуя, и моля́ся на всяк час Бо́гу.

Жа́ждати пра́вды Бо́жия не преста́л еси́, блаже́нне Павли́не, те́мже, а́ки еле́нь на исто́чники водны́я, во святы́я оби́тели гра́да Пути́вля прите́кл еси, и́ноческаго жития́ и́стинный люби́телю.

Богоро́дичен: О, Ма́ти Преблага́я, сла́вныя оби́тели Гли́нския Похвало́! Моли́твами Твои́ми не преста́й покрыва́ти вся ве́рныя от вра́жия наве́та и озлобле́ния.

Конда́к, глас 3:

Апо́столов насле́дниче/ и святителей украшение,/ Павли́не досточудне,/ ны́не Це́рковь Ру́сская тя досто́йно воспева́ет,/ ты бо глаголы жизни вечныя небоя́зненно возвеща́л еси́/ и, Христа́ пред отсту́пники че́стне испове́дав,/ кро́вию твое́ю во Свята́я Святы́х вшел еси́./ Моли спастися душа́м на́шим.

И́кос:

Многообра́зны по́двизи и приско́рбно житие́ твое́ бысть, священному́чениче: от ю́ности бо крест на ра́мена взем, Христу́ после́довал еси́, Иже, ви́дев твое́ благо́е изволе́ние, па́стыря слове́сным овца́м тя поста́ви. Егда́ же прии́де о́гненнаго испыта́ния час и во́лцы лютии ста́до Христо́во обступи́ша, ты, преще́ний мучи́телей не убоя́вся, я́ко па́стырь до́брый, ду́шу за па́ству поло́жил еси́. Сего́ ра́ди воспева́ем тя си́це:

Ра́дуйся, от ю́ности всего себе Го́сподеви всеце́ло возложи́вый;

ра́дуйся, благослове́ние ма́тере твоея́ восприе́мый.

Ра́дуйся, мона́шества русскаго розго́ добропло́дная;

ра́дуйся, послуша́ния цве́те неувяда́емый.

Ра́дуйся, прему́дрости боже́ственныя стяжа́телю;

ра́дуйся, просвеще́ния духо́внаго насади́телю.

Ра́дуйся, ста́да Христо́ва па́стырю до́брый;

ра́дуйся, архие́рею всечестны́й.

Ра́дуйся, Це́ркви Ру́сстей в гоне́ниих послужи́вый;

ра́дуйся, за ве́ру Христо́ву да́же до кро́ве пострада́вый.

Ра́дуйся, вдов и сиро́т пита́телю;

ра́дуйся, благоче́стия ревни́телю.

Ра́дуйся, Павли́не, па́стырю до́брый и му́чениче преславный.

Пе́снь 7

Ирмо́с: Тебе́, во огни́ ороси́вшаго о́троки богосло́вившия/ и в Де́ву нетле́нну все́льшагося,/ Бо́га Сло́ва пои́м,/ благоче́стно пою́ще:/ благослове́н Бог оте́ц на́ших.

Преще́ний богобо́рцев не убоя́вся, непрекло́нен пребы́л еси́, отче Павли́не, те́мже во узи́лище непра́ведно влеко́мь и заключа́емь, сердцем умиленным вопия́л еси: благослове́н Бог оте́ц на́ших.

Утверди́л еси́ но́зе твои́, терпеливоду́шне Павлине, на ка́мени за́поведей Христо́вых, сего ради не убоялся еси́, егда́ власти́телие нечести́вии ополчишася на тя, обаче глаголал еси: благослове́н Бог оте́ц на́ших.

Моли́твою, покая́нием и посто́м укрепля́емь, в темни́це, а́ки в затво́ре, пребы́л еси́ и, сию́ духовную наставницу наре́кл еси; Крест же из хле́ба себе сотвори́в, со упованием на Него взирал еси, вопия: благослове́н Бог оте́ц на́ших.

Богоро́дичен: Де́ву Пренепоро́чную, Всечестны́й Крест слеза́ми омочи́вшую, во страда́ниих твои́х за Христа призва́в, святе Павли́не, взывал еси: благослове́нна Ты жена́х, Всенепоро́чная Влады́чице.

Пе́снь 8

Ирмо́с: На престо́ле Херуви́мсте Носи́маго,/ свяще́нницы, по́йте,/ лю́дие, превозноси́те во вся ве́ки.

Любве́ твоея́, я́же ко Христу́, ни ско́рбь, ни теснота́, ни гоне́ние, ни глад, ни са́мая сме́рть, святе Павли́не, угаси́ша. Сего́ ра́ди возглаша́л еси́: свяще́нницы, по́йте Го́сподеви, лю́дие, превозноси́те Его во вся ве́ки.

Испове́данием и́стинным, отче Павли́не, украси́л еси́ престо́л святи́тельский Пе́рмския земли́, иде́же безбо́жною руко́ю убие́н бысть пламенноре́вностный святи́тель Андрони́к, небоя́зненно глаго́лавый: свяще́нницы, по́йте Го́сподеви, лю́дие, превозноси́те Его во вся ве́ки.

Вся подаде́ тебе́ Дух Святы́й, Его́же де́йствие бога́тно во свяще́нней хирото́нии прия́л еси́, отче Павли́не, те́мже гра́ду Калу́зе, я́ко ми́рный а́нгел, в лю́тая времена́ явился еси, ве́рных воздвиза́я пе́ти: превозноси́те Го́спода во вся ве́ки.

Богоро́дичен: Вели́чия Твоя́, Де́во, кто испове́сть? Кий язы́к изочте́т мно́жество щедро́т Твои́х? Оба́че, дерза́юще, во смире́нии глаго́лем: Богоро́дицу по́йте, и превозноси́те во вся ве́ки.

Пе́снь 9

Ирмо́с: Тя, Неискусобра́чную Богоро́дицу,/ в па́мяти святы́х велича́ем,/ я́ко ро́ждшую Спасе́ние душ на́ших.

Па́влу апо́столу подо́бяся, кова́рствия беззако́ннующих претерпе́л еси, свя́те Павли́не, и от Ура́льских гор даже до Бе́лыя Руси проше́л еси́, иде́же нечести́вых сове́том па́ки во у́зы заключе́н бы́сть, за е́же зва́ти тебе́: Христе́, Ты еси́ Спасе́ние душ на́ших.

Безве́стную свою кончи́ну прови́дел еси́, священномучениче Павли́не, и гроб твой неве́домь досе́ле пребы́сть. Оба́че Бо́гу пути́ твоя́ и сконча́ние ве́домы, Ему́же Единому от ю́ности твоея́ служи́л еси́, взыва́я: Христе́, Ты еси́ Спасе́ние душ на́ших.

Стра́нен быв на земли́ и в хла́дней земли́ Сиби́рстей путь сконча́в, Небе́снаго Оте́чества дости́гл еси́, блаженне Павлине, идеже ве́чную сла́ву восприим, при́сно глаго́леши: Христе́, Ты еси́ спасе́ние душ на́ших.

Богоро́дичен: Тьму́ разори́ страсте́й мои́х, Преблага́я Влады́чице, к Тебе́ бо, прибега́я, молю́ся и велича́ю, я́ко ро́ждшую Христа, спасе́ние душ на́ших.

Свети́лен:

Егда́ над оте́чеством на́шим тьма огусте́ и о́блацы безбо́жия скры́ша Со́лнце Пра́вды, ты, святи́телю Павли́не, лю́ди русския небоя́зненно сло́вом истины просвеща́л еси и, страда́ния подъем, Све́та Невечерняго достигл еси. Низпосли́ лучи́ благода́ти твоея́ и нам, во тьме страсте́й седя́щим.

Сла́ва, и ны́не, Богородичен:

Све́тлая и пресве́тлая Присноде́во Влады́чице! Осия́й нам Свет от светле́йшаго ли́ка Твоего́, да исцели́мся от неду́гов на́ших и страсте́й, и сла́вим Тя, яко всея́ тва́ри Превы́шшую.

На хвали́тех стихи́ры, глас 8.

Подо́бен: Что вас нарече́м:

Что тя нарече́м, Павли́не?/ А́нгела ли, зане́ от ю́ности избра́л еси́ чи́стое житие́?/ Христолюбца ли, я́ко крест подъя́л еси́ на ра́мена своя?/ Во́ина ли, я́ко на мир сей и диа́вола вооружился еси́?/ Страда́льца ли, я́ко кро́вь за Христа излия́л еси́?/ Мно́гая твоя́ имена́ и бо́льшая дарова́ния./ Моли́ спасти́ся душа́м на́шим.

Что тя, Павли́не, возъименуем?/ Отца́ ли преподо́бнаго, я́ко до́бре подвиза́лся еси́?/ Сокро́вище ли Ду́ха, я́ко стяжа́л еси́ Прему́дрость?/ Свети́льника ли, я́ко просвети́л еси́ лю́ди русския?/ Свиде́теля ли И́стины, я́ко пред безбо́жными Христа́ испове́дал еси́?/ Ны́не с новому́ченики Це́ркве нашея Престо́лу Бо́жию предстои́ши./ Моли́ спасти́ся душа́м на́шим.

Ка́ко тя, Павли́не, просла́вим?/ Па́стыря ли до́браго, я́ко положи́л еси́ ду́шу за о́вцы своя?/ Апостола ли, яко благоверию паству учил еси?/ Служи́теля ли Та́ин Боже́ственных, я́ко да́нный тебе́ Зало́г сохрани́л еси́?/ Испове́дника ли тве́рда, я́ко поноше́ния и изгна́ния подъя́л еси?/ Сего ради блаже́нство ве́чное восприе́млеши./ Мо́ли спасти́ся душа́м на́шим.

Ка́ко тя, Павли́не, воспоим?/ Челове́ка ли Бо́жия, зане́ я́ко стра́нник пожи́л еси́?/ Нищелю́бца ли, я́ко вдов и сирот препита́л еси́?/ Благове́стника ли, я́ко Христа́ пропове́дал еси́?/ Миротво́рца ли, я́ко па́ству братолю́бию поучал еси́?/ Ны́не на Небесе́х в ли́це сыно́в Бо́жиих ра́дуешися./ Помина́й нас, ве́рою чту́щих всечестну́ю па́мять твою́.

Сла́ва, глас 2:

Егда́ в земли́ нашей безу́мнии гони́телие,/ братоуби́йством и зло́бою ды́шуще,/ на Це́рковь Христо́ву восста́ша,/ ты, священному́чениче Павли́не,/ кро́ткими словесы́ па́ству увеща́л еси́/ Бо́га всем се́рдцем возлюби́ти/ и бли́жним любо́вию послужи́ти,/ нечести́вых же сове́тов отбега́ти/ и всяко злым не прилепля́тися./ Те́мже, во изгна́ние и узи́лища по́слан бы́в,/ страда́ния и ну́ждную сме́рть претерпе́л еси́,/ ны́не же, Престо́лу Бо́жию предстоя,/ моли́ спасти́ся душам нашим.

И ны́не, Богородичен, глас то́йже:

Все упова́ние на́ше на Тя возлага́ем,/ Де́во Богороди́тельнице,/ с новому́ченики и испове́дники Церкве Русския/ моли́, во еже спасти́ся нам.

Славосло́вие вели́кое. И отпуст.

На Литургии

Блаже́нна от кано́на, пе́сни 3-я и 6-я. Проки́мен глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евреем, зача́ло 334. Аллилу́иа, глас 2: Свяще́нницы Твои́ облеку́тся в пра́вду/ и преподо́бнии Твои́ возра́дуются. Стих: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Иоанна, зача́ло 36. Прича́стен: В па́мять ве́чную бу́дет пра́ведник:

Моли́тва

О, священному́чениче Христо́в Павли́не! Услы́ши сле́зныя моли́твы и воздыха́ния наша, в сокруше́нии се́рдца и смире́нии ду́ха тебе́ приноси́мыя. Се бо беззако́нии омрачи́хомся, и сего́ ра́ди беда́ми, я́ко ту́чами обложи́хомся. Ты же, я́ко си́льный, понеси́ не́мощи на́ша, не отлуча́йся от нас ду́хом, да не разлучи́мся и мы от любве́ Бо́жия, я́же при́сно в се́рдце твое́м живя́ше. При́зри ми́лостиво на люди, предстоя́щия и моля́щияся пред свято́ю ико́ною твое́ю, и проше́ния коего́ждо, я́же ко спасе́нию, испо́лни. Ве́руем бо, я́ко ты, за Це́рковь Христо́ву во оте́честве на́шем пострада́вый, ве́лие дерзнове́ние и́маши ко Го́споду. Умоли́ бла́гость Его́, да укрепи́т ны в единомы́слии, наипа́че же в непоколеби́мом испове́дании Христа́ Иису́са, Сы́на Бо́жия, во пло́ти прише́дшаго, распя́тие и сме́рть претерпе́вшаго, погребе́ннаго и воскре́сшаго, ко Отцу́ возшедшаго и паки гряду́щаго со сла́вою суди́ти живы́м и ме́ртвым. Мо́лим тя, свя́те: предста́тельствуй пред Бо́гом за ны и за вся правосла́вныя христиа́ны, да соблюде́т Госпо́дь землю Русскую в ми́ре и благоде́нствии, архипа́стырем и па́стырем пода́ст духо́вное трезве́ние и ре́вность о спасе́нии вруче́нныя им па́ствы, прави́телем – суд и пра́вду, и всем нам – братолю́бие и любо́вь.

О, ми́лостиве страдальче! Испроси́ у Бо́га Ми́лостиваго боля́щим исцеле́ние, скорбя́щим утеше́ние, оби́димым заступле́ние, оби́дящим ми́рное устрое́ние. Да, твое́ю по́мощию спаса́еми, восхва́лим вси Подвигополо́жника Христа́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Всесвяты́м, Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.