Собор Липецких святых

Служба священномученику Петру (Звереву), архиепископу Воронежскому

Текст утвержден Священным Синодом
Русской Православной Церкви
28 декабря 2017 года (журнал № 131)

Ме́сяца января́ в 25-й день
Священному́ченика Петра́, архиепи́скопа Воро́нежскаго

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 4:

Прииди́те, хвалу́ воздади́м Го́сподеви Бо́гу на́шему,/ па́мять святи́теля Его́ прославля́юще,/ служи́теля ве́рна, па́стыря непоро́чна,/ испове́дника и му́ченика Христо́ва тве́рда:/ той бо, сло́во Госпо́дне соблю́д,/ вся до конца́ претерпе́/ и Це́ркви Ру́сстей похвала́ и сла́ва яви́ся./ Его́же мо́щи святы́я лобыза́юще,/ моли́тву к нему́ простира́ем:/ огради́ нас, священному́чениче Пе́тре, заступле́нием твои́м// и испроси́ нам у Го́спода ве́лию ми́лость.

От младе́нства позна́в Христа́, богоблаже́нне,/ во́лю свою́ Тому́ предаде́,/ на ка́мени за́поведей Его́ вся созида́я:/ те́мже ка́мень ве́ры Христо́вы во дни гоне́ний яви́лся еси́,/ первоверхо́вному апо́столу Госпо́дню подобообра́зен быв./ Моли́ся, архиере́ю Бо́жий, не оскуде́ти ве́ре на́шей// и Правосла́вию сохрани́тися в земли́ на́шей.

Защи́тителю Це́ркве Правосла́вныя,/ наро́да ру́сскаго, скорбьми́ обурева́емаго, уте́шителю,/ в час лю́тых испыта́ний тве́рдо Христа́ испове́дал еси́,/ священному́чениче сла́вне Пе́тре,/ заступи́ и ны́не сро́дники твоя́/ те́плою твое́ю к Бо́гу моли́твою,/ уте́ши стра́ждущия ду́ши на́ша// и от ра́спрей и раско́лов Це́рковь Ру́сскую благонаде́жно огради́.

И́ны стихи́ры, глас 5:

Боже́ственней слу́жбе зело́ прилежа́, священноде́йствителю,/ со благогове́нием ве́лиим Престо́лу Госпо́дню предстоя́л еси́,/ о всем ми́ре же́ртву благоприя́тну Бо́гу принося́,/ и моли́твою твое́ю благомо́щною укроти́ти преще́ние Бо́жие умоля́л еси́,// на ми́лость к па́дшим созда́нием Го́спода приклоня́я.

Па́стырь до́брый яви́лся еси́, о́тче Пе́тре,/ на па́жити доброде́телей ева́нгельских воспитова́я па́ству свою́/ и глаго́лом Боже́ственным ра́достно внима́я,/ о ко́емждо овча́ти душе́ю боле́зновал еси́./ Испроси́ у Го́спода, моли́твенниче боголюбе́зне,/ Оте́честву на́шему мир и благоде́нствие,/ ве́рным лю́дем на враги́ ви́димыя и неви́димыя одоле́ние,// и душа́м на́шим спасе́ние.

В ми́ре ско́рбни бу́дете, рече́ Госпо́дь,/ предвозвеща́я ра́дость Небе́сную./ Сие́ вои́стину на тебе́ испо́лнися, священному́чениче,/ я́ко ско́рби мно́гия о Го́споде,/ я́же претерпе́л еси́ в житии́ твое́м,/ в ра́дость ве́чную души́ твое́й преложи́шася./ Испроси́, страстоте́рпче, и нам/ си́лу вся за Христа́ претерпе́ти,// и спасе́ние душа́м стяжа́ти.

Моли́тва пла́менная се́рдцу твоему́ усво́ися, досточу́дне,/ си́лу и кре́пость ти содева́ющи,/ му́дрость ду́ху твоему́ и любо́вь Боже́ственную да́рующи,/ те́мже трудо́в изря́дных де́латель показа́лся еси́,/ и ны́не на Небесе́х моле́нием твои́м// вся ко спасе́нию благопотре́бная нам испроси́.

Сла́ва, глас 2:

Па́ству Воро́нежскую/ от поруга́ния и разделе́ния ре́вностно храни́л еси́, святи́телю,/ и Оте́честву твоему́ в годи́ну лю́тую ве́рен до конца́ яви́лся еси́./ На вся́ком же ме́сте служе́ния твоего́, достоблаже́нне,/ вся укрепля́л еси́ словесы́ ве́чными пропове́дания Христо́ва,/ се́рдце испо́лнено любве́ лю́дем простира́я:/ мно́зем бо градо́м и ве́сем/ святи́тельство твое́ ко утвержде́нию во и́стине послужи́ло есть./ Те́мже и ото́ком Солове́цким, кро́вию му́чеников но́вых напое́нным,/ иде́же вене́ц му́ченический чу́дному житию́ твоему́ сплете́н бысть,// архипа́стырь нарече́ся.

И ны́не, Богоро́дичен: Пре́йде сень зако́нная:

Вход. Проки́мен дне. И чте́ния 3 му́ченическая.

На лити́и стихи́ра хра́ма, и священному́ченика, глас 7:

Пропове́дника изя́щнаго/ и священнотаи́нника Христо́ва пе́сньми восхва́лим:/ той бо, песнь воспева́я своему́ Влады́це,/ пла́мень се́рдца в поуче́ниих о́гненных излива́л есть,/ возжига́я ду́ши ве́рою/ и собира́я ста́до Бо́жие, от неве́рных расхища́емое./ Те́мже моли́твою твое́ю укрепи́, святи́телю,/ ве́рныя, собла́знами ве́ка сего́ смуща́емыя,/ и враги́ ви́димыя и неви́димыя прожени́// си́лою Боже́ственнаго Ду́ха.

Осужде́ние прие́м судо́м непра́ведным и беззако́нным,/ в вы́шних оправда́ние обре́л еси́, блаже́нне./ Дерзнове́ние ве́лие име́я ко Влады́це,/ оправда́нием Госпо́дним научи́ ны, избра́нниче Христо́в,/ да, во и́стинных путе́х ходи́ти тща́щеся,// Того́ благоутро́бием всеми́лостивно оправди́мся.

Сла́ва, глас 1:

Исполне́ние любве́ Христо́вы стяжа́л еси́, боголюбе́зне,/ устна́ма пра́ведныма и се́рдцем непоро́чным Го́спода испове́дуя,/ пра́во пра́вил еси́ сло́во и́стины,/ си́лу вра́жию безстра́шно сокруша́я./ Те́мже на спасе́ния стези́ наста́ви нас, святи́телю,// и в Ца́рствие Бо́жие прему́дре упра́ви.

И ны́не, Богоро́дичен, глас то́йже:

Небе́сных чино́в ра́дование,/ на земли́ челове́ков кре́пкое предста́тельство,/ Пречи́стая Де́во,/ спаси́ ны, и́же к Тебе́ прибега́ющия:/ я́ко на Тя упова́ние по Бо́зе,// Богоро́дице, возложи́хом.

На стихо́вне стихи́ры, глас 1:

Ве́ру Христо́ву пропове́дуя, апо́столом подобообра́зен был еси́,/ и ча́шу страда́ний, по словеси́ Госпо́дню,/ я́коже ти́и, да́же до конца́ испи́вый,/ венце́м нетле́нным со о́ными увенча́лся еси́, архипа́стырю,/ и, досто́йно прие́м Небе́сную сла́ву,// украше́ние Це́ркве Ру́сския яви́лся еси́.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

К высоте́ святи́тельстей му́ченичества добро́ту приложи́л еси́/ и испове́дничества красото́ю посреде́ тьмы неве́рия в земли́ на́шей возсия́л еси́,/ победи́вый си́лу вра́жию И́менем Христа́, сме́рти Победи́теля,/ и себе́ не пощади́л еси́ ра́ди Живу́щаго во ве́ки,/ те́мже блаже́нства ве́чнаго от Того́ сподо́бился еси́,// Пе́тре достоблаже́нне.

Стих: Честна́ пред Го́сподем// смерть преподо́бных Его́.

О сла́ве фаво́рстей незаходи́мей ду́хом пламене́я,/ Голго́фы Госпо́дни о́браз в се́рдце при́сно носи́л еси́, страстоте́рпче,/ в Голго́фе А́нзерстей кончи́ну му́ченическую прия́ти сподо́бился еси́,/ е́юже, спаси́тельную же́ртву Христо́ву пропове́дав,// Кро́вию А́гнчею убели́л еси́ ри́зы своя́.

Сла́ва, глас 8:

О́браз Христа́ воскре́сшаго/ пред очи́ма души́ твоея́/ при́сно име́л еси́, святи́телю,/ и глаго́лы испыту́ющия Госпо́дни: лю́биши ли Мя,/ к первоверхо́вному апо́столу рече́нныя,/ в се́рдце твое́м благогове́йно храни́л еси́./ Си́ми словесы́ к подвиго́м ве́ры воздвиза́емь,/ ре́вностию ве́лиею по Бо́зе распаля́лся еси́,/ те́мже упаси́ ду́ши на́ша, па́стырю святы́й, о́тче Пе́тре,/ да не погубя́т нас хи́щныя стра́сти,// и от Го́спода да не отлуча́т во ве́ки.

И ны́не, Богоро́дичен: Безневе́стная Де́во:

Тропа́рь, глас 4:

Ве́рою пла́менною апо́столу Петру́ подо́бяся,/ ра́достию страда́ния за Христа́ претерпе́ти изво́лил еси́,/ святи́телю о́тче Пе́тре,/ ка́меню тве́рдый Це́ркве Правосла́вныя,/ со испове́дники и страстоте́рпцы ру́сскими во мра́це беззако́ний доброде́тельми сия́яй,/ моли́ся с ни́ми о нас,// архиере́ю Бо́жий, священному́чениче пресла́вне.

На у́трени

По 1-м стихосло́вии седа́лен, глас 3:

Егда́ Ца́рствие Бо́жие возвеща́л еси́ велегла́сно,/ проника́я вну́тренняя челове́ков о́гненными словесы́,/ в пла́мене души́ твоея́ ражда́ющимися,/ в Ду́се Свя́те и́стину Христо́ву лю́дем пропове́дал еси́, о́тче Пе́тре,/ се бо дар апо́стольскаго благове́стия чу́дно в тебе́ яви́ся.

Сла́ва, и ны́не, Богоро́дичен, глас то́йже:

Немо́лчная уста́ апо́столом,/ си́ла духо́вная святи́телем,/ Мари́е, Ма́ти Бо́жия,/ вся́цей души́, тружда́ющейся Бо́гу, Предста́тельница Благода́тная,/ немоту́ нечу́вственных душ на́ших разреши́,/ благоуха́нием Боже́ственнаго Ду́ха исполня́ющи,/ да от се́рдца избыва́юще моли́твенными воздыха́нии,/ устна́ма ра́дости хвалу́ Госпо́дню возвеща́ем неуста́нно.

По 2-м стихосло́вии седа́лен, глас 8:

Ду́шу свою́ не прия́л еси́ всу́е, святи́телю,/ николи́же в беззако́ния ру́це свои́ простира́я,/ свят житие́м твои́м яви́лся еси́, преподо́бне,/ тем и же́ртва твоя́ свя́та Бо́гу бысть,/ И́же от горы́ кра́ниевы прие́м ю́ непоро́чну,/ в го́ру Боже́ственную Свою́ возведе́ тя,/ в приосене́нныя ча́щи Небе́сныя сла́вы.

Сла́ва, и ны́не, Богоро́дичен, глас то́йже:

Печа́лей утоле́ние,/ скорбе́й отгна́ние яви́лася еси́, Влады́чице Пречи́стая,/ ра́дости Небе́сныя нело́жное обетова́ние,/ печа́ль и скорбь земну́ю святи́теля Петра́ наве́ки утоли́вшая/ и во о́бласть ра́дости приснотеку́щия того́ прие́мшая./ Печа́ли души́ моея́ всеще́дрою добро́тою Твое́ю утоли́, молю́ Тя,/ наше́ствия творя́щих ей боле́знь изба́ви/ и от огня́ ве́чнаго неврежде́нну сохрани́.

Велича́ние:

Велича́ем тя,/ священному́чениче Пе́тре,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный:

Бог нам прибе́жище и си́ла.

Го́споди, воздви́гни си́лу Твою́ и прииди́, во е́же спасти́ нас.

Глаго́лах о свиде́ниих Твои́х пред цари́ и не стыдя́хся.

Вси язы́цы обыдо́ша мя и и́менем Госпо́дним противля́хся им.

Тебе́ ра́ди умерщвля́емся весь день, вмени́хомся, я́ко о́вцы заколе́ния.

Кре́пость моя́ и пе́ние мое́ Госпо́дь и бысть мне во спасе́ние.

По полиеле́и седа́лен, глас 8:

Христа́ распя́таго еди́ным Го́сподем и Бо́гом испове́дуя,/ во вну́тренних души́ твоея́ о́браз Его́ свя́то соблюда́л еси́, священному́чениче Пе́тре,/ до часа́ сме́ртнаго креста́ твоего́ не оставля́я, страстоте́рпче,/ и я́ко а́гнец заколе́ния вмени́лся еси́,/ вся побежда́я си́лою Возлю́бльшаго тя./ Сего́ ра́ди ото́ка А́нзерскаго освяще́ние и Це́ркве Ру́сския похвала́ высо́кая яви́лся еси́.

Сла́ва, и ны́не, Богоро́дичен, глас то́йже:

Предста́тельнице те́плая и Засту́пнице усе́рдная,/ в годи́ну безбо́жия от коне́чныя поги́бели зе́млю Ру́сскую/ всемо́щным хода́тайством к Сы́ну Твоему́ изба́вльшая,/ и ны́не не оста́ви нас моли́твами Твои́ми,/ Влады́чице Богоро́дице.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Из глубины́ взыва́л еси́ ко Го́споду, священному́чениче:/ гото́во се́рдце мое́, Бо́же, гото́во се́рдце мое́,/ по во́ли Твое́й сотвори́ со мно́ю./ Сего́ ра́ди благода́тию в тебе́ животворя́щею/ не себе́ живя́ше, о́тче, но Влады́це и Творцу́ твоему́,/ вся ко спасе́нию ста́да Христо́ва му́дрствуя и де́я./ Престо́лу сла́вы Бо́жия ны́не предстоя́, преподо́бне,/ моли́ Боже́ственною ми́лостию избра́нных ча́сти нам сподо́битися// и мзду ве́рных восприя́ти в день пра́веднаго воздая́ния.

Кано́н священному́ченика, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Сло́во прему́дрости Госпо́дни испроси́вше,/ просла́вим по достоя́нию ди́внаго в ли́це святы́х Петра́ достоблаже́ннаго,/ святи́теля, му́ченика же и испове́дника,/ во дни гоне́ния по́двигом до́брым просия́вшаго/ и зало́г Христо́в до после́дняго издыха́ния неврежде́нно сохра́ньшаго.

От ю́ности благонра́вными роди́тели твои́ми благоче́стию науча́емь,/ о́браз Христо́в любо́вию в се́рдце твое́м носи́л еси́, свя́те Пе́тре,/ та́же и, доброде́телем ева́нгельским подража́ти тща́ся,/ в стра́се Бо́жии возраста́л еси́.

Чи́стым се́рдцем да́ры благода́ти во мно́жестве прие́м,/ предызбра́ние твое́ от Бо́га оправда́л еси́, святи́телю,/ пра́востию же ду́ха и дея́ний угоди́в Избра́вшему тя,/ вои́стину ца́рское свяще́ние яви́лся еси́.

Богоро́дичен: Спа́са и Изба́вителя во утро́бе де́вственней вмести́вшая, Животода́вца Ма́ти Чи́стая;/ к Тебе́ у́бо в моли́твах прибега́ем, Богоизбра́нная Мари́е,/ Твои́м предста́тельством к животу́ ве́чному упра́ви нас,/ во е́же спасти́ся нам.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Ре́вность Петро́ву по Бо́зе стяжа́в, святи́телю,/ соиме́нник тому́ достосла́вен яви́лся еси́/ и, я́коже той, в лови́тву спасе́ния Бо́жия челове́ки управля́л еси́,/ воспреща́я си́лам вра́жиим, хотя́щим ду́ши людски́я погуби́ти.

Учи́тель духо́вный и нача́льник оби́телем и́ноческим был еси́, достоблаже́нне,/ благоче́стию и́стинному неле́ностне науча́я,/ и, во́ины росси́йския во бране́х ми́лостивно утеша́я,/ пропове́дник ре́вностный Сло́ва Бо́жия яви́лся еси́,/ пита́я ду́ши от жи́тницы Христо́вы.

Жезл святи́тельский от десни́цы Ти́хона Святе́йшаго,/ Первопресто́льника Росси́йскаго и испове́дника сла́внаго,/ досто́йно восприя́л еси́, блаже́нне Пе́тре,/ и, си́лою свы́ше оболки́йся, ни́вы Христо́вы де́латель му́дрый яви́лся еси́,/ плод творя́ в терпе́нии и Творца́, Господи́на жа́твы, воспева́я немо́лчно.

Богоро́дичен: Приклони́ благоутро́бие Царя́ Небе́снаго к нам, гре́шным, Пресвята́я Де́во,/ и душ на́ших ху́дость обнови́ всеси́льною держа́вою Твое́ю,/ тех стро́потная покая́нием исправля́ющи и доброде́тельми исполня́ющи,/ да Ца́рству Бо́жию, прише́дшу в си́ле,/ угото́виши их неврежде́нны.

Седа́лен, глас 2:

Ве́руяй в Мя, рече́ Госпо́дь, дела́, я́же Аз творю́, и той сотвори́т./ Те́мже ве́ра твоя́ ве́лия, святи́телю Пе́тре, и сло́во, е́же со вла́стию/ мно́ги заблу́ждшия, преда́ния церко́вная отве́ргшия и ло́жными нововвожде́ньми прельсти́вшияся/ в Це́рковь Правосла́вную па́ки приведо́ша./ Сего́ ра́ди вопие́м ти:/ моли́ся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен, глас то́йже:

Блаже́нство и́стинныя ве́ры явля́еши нам, Богоро́дице,/ Твое́ю благода́тию ве́ру нам приложи́, Пренепоро́чная,/ терпе́нием снабдева́ющи,/ я́ко да вся возмо́гше ве́рою/ и то́ю упова́ние спасе́ния иму́ще,/ услы́шим глас Небе́снаго Влады́ки глаго́люща:/ ве́ра ва́ша спасе́ вы.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Во дни богоборе́ний лю́тых яви́ Госпо́дь земли́ Ру́сстей ве́рныя служи́тели Своя́,/ и́же, стра́ха вра́жия не устраши́вшеся,/ ду́ши своя́ за о́вцы слове́сныя полага́ху,/ я́коже и Петр, священнострада́лец Солове́цкий,/ Небе́сному Архиере́ю подо́бяся.

Священному́чениче досточе́стне, святи́телю Моско́вскому Петру́ тезоимени́те,/ ты, жезл архипа́стырский прие́м,/ в вертогра́де Госпо́днем, я́коже о́ный, усе́рдно потруди́лся еси́, сло́во и́стины исправля́я,/ се бо и́стинен Зва́вый тя, Пребыва́яй во ве́ки.

Слу́жбу Боже́ственную все́ю душе́ю возлюби́в, досточу́дне,/ со ве́лиим тща́нием сию́ благогове́йне соверша́л еси́/ и, ни еди́ному словеси́ слух се́рдца своего́ затворя́я,/ псалмопе́нию любо́вию навы́кл еси́.

Лю́дем ве́рным ра́дость приноси́л еси́,/ и́же, с тобо́ю вку́пе Бо́га славосло́вяще, утеше́ние в ско́рбех обрета́ху./ Ты же, и в заточе́нии сый, с соу́зники твои́ми же́ртву благодаре́ния Бо́гу приноси́л еси́,/ престо́л живы́й Трапе́зы Госпо́дни собо́ю явля́я.

Богоро́дичен: Я́ко боговмести́мое Жили́ще, Та́йне Сове́та Преве́чнаго послужи́ла еси́, Пречи́стая Де́во,/ Тобо́ю бо даде́ся нам Заве́та Но́ваго Пода́тель благ и кро́ток,/ любо́вию спаси́тельною зако́на сме́рти у́зы разруши́вый.

Песнь 5

Ирмо́с: Ты, Го́споди мой,/ Свет в мир прише́л еси́,/ Свет святы́й, обраща́яй из мра́чна неве́дения,// ве́рою воспева́ющия Тя.

Духо́вным о́ком созерца́яй Го́спода воскре́сшаго/ и серде́чным слу́хом вне́мляй Боже́ственным глаго́лом,/ сла́достию любве́ Христо́вы исполня́лся еси́, о́тче Пе́тре,/ и па́ству твою́ му́дре упра́вил еси́.

К тебе́, стяжа́вшему Христа́ в се́рдцы свое́м,/ мно́жество взыску́ющих Его́, я́ко ко вмести́лищу благода́ти Бо́жия, прихожда́ху/ и утеше́ние в ско́рбех во святы́ни любве́ твоея́ обрета́ху.

По́двиг и́ноческий всем се́рдцем возлюби́в,/ посту́ и моли́тве, терпе́нию и нестяжа́нию усе́рдно прилежа́л еси́, священному́чениче Пе́тре,/ Вы́шним же изволе́нием по́двиг ве́лий испове́дничества подъе́м,/ му́ченически житие́ твое́ на ото́це А́нзерстем сконча́л еси́.

Богоро́дичен: Богора́дованною душе́ю гла́су Арха́нгельскому вне́мшая/ и ра́дость ми́ру Христа́ несказа́нно ро́ждшая, Богоро́дице Мари́е,/ всех родо́в весе́лие яви́лася еси́, Влады́чице./ Простри́ над все́ми земноро́дными Покро́в Твой держа́вный/ и мене́ утеше́ния и ра́дования о Тебе́ сподо́би, Ма́ти Бо́жия,/ я́ко да ублажа́ю Тя.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Мно́гим уго́дником Бо́жиим собесе́дник бы́ти сподо́бился еси́, Пе́тре:/ ста́рцем оби́тели О́птинския и Диве́евским ста́рицам,/ та́же и вели́кому па́стырю Кроншта́дтскому Иоа́нну,/ и́хже наставле́ния и моли́твы/ в по́двизе кре́стнем тя укрепля́ху.

Тьма, в ню́же погрузи́ся земля́ Ру́сская отступле́нием от Бо́га и ве́ры ослабле́нием,/ не возмо́же объя́ти све́та Бо́жия, во и́стинных Его́ свети́льницех горя́щаго./ Ты же, священному́чениче Пе́тре, еди́н от сих избра́нных,/ учине́нных во мра́це беззако́ния пропове́дати Христа́ на спасе́ние мно́гим.

Благода́тию Бо́жиею и вели́чием ду́ха твоего́/ люде́й, во узи́лищах с тобо́ю су́щих, утеша́л еси́, присноблаже́нне,/ и, немо́лчныма устна́ма Христа́ пропове́дуя,/ из глубины́ неве́дения их возводи́л еси́/ и све́том И́стины просвеща́л еси́.

Богоро́дичен: Пресвята́я Влады́чице, Ма́ти Бо́га на́шего,/ Свет живота́ нам всесве́тло возсия́вшая,/ сподо́би нас по сло́ву Сы́на Твоего́/ мир и любо́вь между́ собо́ю име́ти/ и научи́ печа́ли на́ша на Го́спода возлага́ти,/ во е́же спасти́ся нам.

Конда́к, глас 8:

Во святи́тельстве твое́м до́бре подвиза́лся еси́, богому́дре,/ и му́ченичества венце́м све́тло украси́лся еси́,/ преще́ния враго́в Христо́вых не устраши́вся,/ страда́ньми твои́ми ото́ки Солове́цкия освяти́л еси́,/ сего́ ра́ди Си́лы Небе́сныя удиви́шася терпе́нию твоему́,/ мы же с ве́рою и любо́вию притека́ем ко святы́м моще́м твои́м, досточу́дне./ Ны́не со все́ми новому́ченики Це́ркве Ру́сския/ моли́ о нас Христа́ Бо́га, всеблаже́нне Пе́тре, да зове́м ти:/ Ра́дуйся, о́тче приснопа́мятне,// земли́ Воро́нежския в ве́ре утвержде́ние.

И́кос:

Соверше́н быв в ре́вности по Бо́зе и любви́ Боже́ственней, святи́телю,/ благода́тию ди́вная дела́ в простоте́ и кро́тости серде́чней соверша́л еси́,/ служи́телю Госпо́день и́стинен,/ и, по́двиг архипа́стырский со усе́рдием исполня́я,/ па́ству Христо́ву в Ду́се Бо́жии возраща́л еси́,/ си́лою же и чистото́ю ду́ха твоего́ вра́жиим си́лам противоста́в,/ свеща́ горя́щая во тьме безбо́жия яви́лся еси́, богоизбра́нне о́тче,/ и за Христа́ и ве́ру пра́вую гоне́ния и му́ки претерпе́л еси́./ Ники́ими же скорбьми́ от любве́ Бо́жия отлучи́вся,/ смерть Его́ ра́ди в приобре́тение себе́ вмени́л еси́/ и, вене́ц нетле́нен от Христа́ Бо́га в Ца́рствии Небе́снем восприе́м,/ священному́ченик и страстоте́рпец до́блий яви́лся еси́,/ Це́ркве Ру́сския ди́вная похвало́ и неувяда́емая сла́во./ Моли́ся о нас ко Го́споду, всеблаже́нне Пе́тре, да зове́м ти:/ Ра́дуйся, о́тче приснопа́мятне,/ земли́ Воро́нежския в ве́ре утвержде́ние.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:// благослове́н еси́ в хра́ме сла́вы Твоея́, Го́споди.

Ве́лию любо́вь ко святи́телем Воро́нежским Митрофа́ну, Ти́хону и Анто́нию име́я,/ в ме́сте по́двигов святи́тельства их труд подъя́л еси́, достоблаже́нне Пе́тре,/ и гра́ду Воро́нежу ра́дость ве́лию яви́л еси́,/ утвержде́ние и благода́тную по́мощь подава́я.

В стеня́щем мо́ри безбо́жия земли́ Ру́сския,/ тве́рдый ото́к благода́ти яви́лся еси́, святи́телю Пе́тре,/ иде́же бо мно́жится грех, та́мо и благода́ть изоби́лует,/ излива́ющися ще́дро на спасе́ния ча́ющих.

Ре́вностию о до́ме Госпо́дни снеда́емь,/ отсту́пником, преда́ния церко́вная отверга́ющим/ и нововведе́ния льсти́вая вводя́щим, противоста́л еси́, о́тче Пе́тре,/ и, Предте́чевым гла́сом к покая́нию заблу́ждшия приводя́,/ мно́гия о́вцы во огра́ду церко́вную возврати́л еси́.

Богоро́дичен: Исто́чник любве́ Бо́жия/ испо́лни во оскудева́ющих сердца́х на́ших, Благода́тная Мари́е,/ теплото́ю Ма́терних Твои́х моли́тв согре́й хла́дность моле́ний на́ших/ и до конца́ не оста́ви нас,/ в ми́ре житие́ на́ше соблюда́ющи,/ и к Ца́рству Сы́на Твоего́ прему́дре нас уготовля́ющи.

Песнь 8

Ирмо́с: Ру́це распросте́р Дании́л,/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы взыва́юще:// благослови́те, вся дела́ Госпо́дня, Го́спода.

Мно́гажды искуше́ние темни́цею и у́зами прия́л еси́,/ от беззако́нник му́чимь бе боле́зньми и гла́дом, скорбьми́ и непра́вдами лю́тыми./ Оба́че стра́ха их не устраши́лся еси́, страстоте́рпче,/ и любо́вь твоя́ к Бо́гу николи́же преста́,/ страда́ния же твоя́ ве́ре твое́й утвержде́ние де́яху/ и му́ки безви́нныя дая́ху души́ возвыше́ние.

Во святы́х ото́цех Солове́цких верх подвиго́м твои́м обре́теся, священному́чениче,/ ты бо, зва́ние архиере́йское благогове́йно храня́ и заточе́нных в Бо́зе утвержда́я,/ архиепи́скоп Солове́цкий нарече́н бысть ве́рными соу́зники твои́ми, Пе́тре,/ я́коже и брат твой во Христе́, священному́ченик Иларио́н богоблаже́нный.

Во удале́нии от па́ствы твоея́ в заточе́нии ти бы́вшу,/ востаю́щия на тя наве́ты вра́жия сокруша́л еси́ моле́нием приле́жным, любе́зная же ча́да твоя́, я́же отлуче́на от тебе́ теле́сне, во еди́нем ду́се совоку́плена с тобо́ю бя́ху/ и во и́стинных путе́х Госпо́дних хожде́ние при́сно творя́ху.

Тро́ичен: Благослови́м Тя, Всеси́льне Го́споди, Бо́же Вседержи́телю,/ Присносу́щне О́тче,/ Сло́ве Бо́жий, нас ра́ди плоть прие́мый,/ и Ду́ше Всесвяты́й Животворя́щий,/ Тро́ице Единосу́щная и Неразде́льная,/ воспева́ем Тя со стра́хом и вопие́м:/ благослови́те, вся дела́ Госпо́дня, Го́спода.

Богоро́дичен: Сло́во от нача́ла бы́вшее,/ ко спасе́нию ми́ра плоть прия́ло есть от Тебе́, Богоневе́сто,/ и дарова́ Ду́ха ра́зума в сердца́ на́ша,/ я́ко да, оправда́ние прие́мше от слове́с любве́,/ во избы́тце се́рдца излива́ющихся,/ глаго́лов неизрече́нных слы́шателие при́снии яви́мся,/ с небе́сными ли́ки воспева́юще:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от Несеко́мыя Горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́,/ тем, веселя́щеся,// Тя, Богоро́дице, велича́ем.

Всем житие́м Твои́м ве́рность Христу́ показа́в,/ се́рдце, любве́ испо́лнено, со благодаре́нием ко Го́споду простира́л еси́, священному́чениче Пе́тре,/ те́мже с Вы́шними чи́ны ны́не пред лице́м Госпо́дним предстои́ши/ и со все́ми святы́ми Бо́га хвале́бными пе́сньми прославля́еши.

Боже́ственныя слу́жбы отлуче́н быв/ и скорбьми́ мно́гими истязу́емь,/ моли́твою и богомы́слием жа́жду души́ твоея́ утоля́л еси́, о́тче Пе́тре,/ те́мже открове́ние Ду́ха дарова́ ти словеса́ богому́драя/ ко прославле́нию первонача́льника Солове́цкаго, Ге́рмана преподо́бнаго.

Лю́тою боле́знию уязви́вся/ и страда́ния тя́жкая претерпе́в, присноблаже́нне,/ сме́ртию всехва́льною просла́вил еси́ Го́спода./ Те́мже и Той ублажи́ тя в Це́ркви святы́х,/ явле́нии чу́дными назна́меновав души́ твоея́ свя́тость,/ и мо́щи честны́я твоя́ в поклоне́ние и почита́ние свяще́нное нам ми́лостивно оста́ви.

Богоро́дичен: Па́че всех земноро́дных страда́ние в любви́ ко Го́споду позна́вшая,/ се́рдце любве́ испо́лнено простри́ нам, Ма́ти Де́во,/ в печа́лех на́ших немощству́ющим и в боре́ниих изнемога́ющим,/ уте́ши ду́ши на́ша в та́йне промышле́ния О́тча,/ я́ко да путе́м страда́ний о Христе́ в любо́вь Его́ Боже́ственную вни́дем/ и ра́дости Небе́сныя хода́тайством Твои́м неотлуче́ни яви́мся.

Свети́лен:

Я́ко свеща́ всесве́тлая, благода́ть Бо́жия извну́трь просвеща́ше тя, святи́телю Пе́тре,/ сего́ ра́ди избра́н бысть от Бо́га свиде́тельствовати о Све́те/ и просвеща́ти тьму неве́рия в лю́дех обраще́нием к ве́ре Христо́вой./ Просвети́ у́бо и на́шу те́мность духо́вную/ и ду́ши, сном ле́ности отягче́нныя, пробуди́,/ и ко Го́споду сердца́ на́ша обрати́.

Сла́ва, и ны́не, Богоро́дичен:

Свет открове́ния язы́ком ро́ждшая, Всесве́тлая Богоневе́сто,/ во све́те повеле́ний Бо́жиих ходи́ти нас наста́ви,/ я́ко да, до́брая творя́ще в нем,/ сла́ву Отца́ Небе́снаго умно́жим в челове́цех,/ да и Той испо́лнит ны/ Боже́ственнаго сия́ния всепобежда́ющия Своея́ любве́.

На хвали́тех стихи́ры, глас 8:

Небе́снаго Ца́рствия жи́телю,/ Боже́ственных благ соприча́стниче,/ Престо́лу Вы́шняго предстои́ши, священному́чениче Пе́тре,/ о до́льнем Оте́чествии твое́м моли́, блаже́нне,/ безчи́сленными по́двиги святы́х Его́ просла́вленнем./ Твои́ми бо и тех моли́твами/ ча́ем лю́тыя сме́рти избе́гнути// и ча́сти избра́нных Госпо́дних сподо́битися.

Ми́ру распя́ся и вся, я́же в ми́ре, презре́,/ я́звы Госпо́дни на те́ле и в се́рдце при́сно носи́л еси́, о́тче:/ о Христе́ страда́ния в ра́дость души́ твое́й вменя́хуся,/ и смерть Его́ ра́ди безсме́ртие тебе́ сотвори́./ Гра́ду Воро́нежу сла́ва и утвержде́ние быв, архипа́стырю,/ Голго́фы Ру́сския же́ртва богоуго́дна яви́лся еси́,// отсю́ду же и во оби́тели ве́чныя душе́ю возлете́л еси́.

Егда́ гоне́ния от безбо́жных зе́млю Ру́сскую постиго́ша/ и чрез о́ная испыта́ние ве́ры твоея́, священному́чениче, прии́де,/ тогда́ с ка́федры архиере́йския изгна́ние/ и с па́ствою твое́ю разлуче́ние му́жественне претерпе́л еси́/ и письмены́ свои́ми лю́ди воро́нежския/ неуста́нно в любви́ Бо́жией наставля́л еси́,/ от нея́же ни скорбь, ни теснота́, ни гоне́ния, ни глад// ника́коже возмо́же тебе́ разлучи́ти.

Пра́ведность души́ твоея́ возлюби́ Госпо́дь,/ сего́ ра́ди ра́зум свят и по́двиг кре́пок дарова́ ти,/ благода́тию и ми́лостию Свое́ю вы́ну посеща́я./ Ты же, и во у́зах сый,/ ве́рою и тве́рдым упова́нием жив был еси́, священному́чениче,/ благове́стием и же́ртвою хвале́ния непреста́нно Бо́га прославля́я,/ И́же, соверша́яй тя во вся́цем де́ле бла́зе,/ к ли́ку избра́нных Свои́х причте́// и сла́вою нетле́нною тебе́ просла́ви.

Сла́ва, глас 5:

Излия́ся благода́ть во устна́х твои́х, о́тче Пе́тре,/ е́юже пра́вде Бо́жией побе́ду соде́ловал еси́,/ глаго́лы бо жи́зни ве́чныя дарова́ни тебе́ бы́ша открове́нием Христо́вым/ к разуме́нию слы́шавших/ и ко спасе́нию по словеси́ твоему́ ве́ровавших,/ к низложе́нию сопроти́вных,/ не могу́щих глаго́лом сим противоста́ти./ Се бо Сло́во Бо́жие суди́ти и́мать вселе́нней в пра́вду:/ зло́бе гре́шных запрети́ти наве́ки,// сыново́м же ми́ра обетова́нное Ца́рство дарова́ти.

И ны́не, Богоро́дичен, глас то́йже:

Утоли́ боле́зни/ многовоздыха́ющия души́ моея́,/ утоли́вшая вся́ку слезу́ от лица́ земли́./ Ты бо челове́ком боле́зни отго́ниши,/ и гре́шных ско́рби разруша́еши:/ Тебе́ бо вси стяжа́хом наде́жду и утвержде́ние,// Пресвята́я Ма́ти Де́во.

На литурги́и

Блаже́нны от кано́на песнь 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106 (гл. 21, ст. 12-19). Прича́стен: В па́мять ве́чную бу́дет пра́ведник:

Моли́тва

О досточу́дне Пе́тре, священному́чениче сла́вный, еди́н от со́нма новому́чеников Солове́цких и всея́ земли́ Ру́сския, гра́ду Воро́нежу похвало́, па́стырю ди́вный ста́да Христо́ва, ве́рный служи́телю Бо́жий, защи́тителю ре́вностный Це́ркве Правосла́вныя! Все житие́ твое́ любве́ ко Го́споду и страда́ний о Христе́ испо́лнено бысть, ты бо, мно́гая муче́ния, боле́зни и ско́рби, изгна́ния и заточе́ния Его́ ра́ди претерпе́в, испове́дник безстра́шен яви́лся еси́ и венце́м нетле́нныя твоея́ сла́вы Це́рковь Ру́сскую украси́л еси́. Вся преда́в в ру́це Бо́жии, до́блественне служе́ние твое́ на земли́ соверши́л еси́ и на Голго́фе А́нзерстей кончи́ну му́ченическую прия́ти сподо́бился еси́, богоблаже́нне. Ны́не к Небе́сному ли́ку причте́нный, и вене́ц му́ченический за Христа́ прие́мый, со мно́гими жи́тели Го́рняго Иерусали́ма в Ца́рстве Боже́ственныя любве́ пребыва́еши. О блаже́нне о́тче наш Пе́тре, помози́ нам хра́мину се́рдца своего́ незапусте́вшу храни́ти, научи́ нас ра́дость во страда́ниих о Христе́ обрета́ти, озари́ путь наш кре́стный сия́нием твоея́ святы́ни. Бу́ди и ны́не нам утвержде́ние в ве́ре, да, прише́д, обря́щет ю́ Госпо́дь не уга́снувшу в сердца́х на́ших. Умоли́ Творца́ вся́ческих дарова́ти нам си́лу и кре́пость, да, не устраши́вшеся стра́ха лука́ваго, испове́даем тве́рдо Христа́ Спа́са на́шего и Его́ милосе́рдием ча́сти злых да изба́вимся в день стра́шный воздая́ния, и в ра́дость ве́чную всели́мся, сла́вяще о всем Вседержи́теля Бо́га, и твое́ благода́тное к Нему́ о нас предста́тельство во ве́ки веко́в. Ами́нь.

И́на моли́тва

О свяще́нная и многострада́льная главо́, земны́й а́нгеле и Небе́сный челове́че, священному́чениче и чудотво́рче Пе́тре, архиере́ю Бо́жий! Ты в годи́ну лю́тых гоне́ний яви́лся еси́ я́ко церко́вное свети́ло и и́стинныя ве́ры утвержде́ние, зане́ пред богобо́рцы дерзнове́нно Христа́ испове́дал еси́, и я́ко кади́ло благово́нное, в же́ртву Бо́гу себе́ прине́сл еси́. Яви́ нам, смире́нным и гре́шным, ко святы́м моще́м твои́м притека́ющим, многомо́щное твое́ заступле́ние, и вку́пе со все́ми святы́ми, во ото́цех Солове́цких просия́вшими, испроси́ у Го́спода вся́кий дар, коему́ждо благопотре́бен ко спасе́нию. Се бо грех на́ших ра́ди не и́мамы дерзнове́ния ко Го́споду и Влады́це на́шему, и пра́ведный гнев Его́ на ны наведо́хом, и вся́кия ми́лости Его́ недосто́йны сотвори́хомся. Те́мже, не сме́юще возвести́ очеса́ на́ша к высоте́ Небе́сней, ниже́ моле́бный глас ко Го́споду, се́рдцем сокруше́нным и смире́нным ду́хом тебе́ моли́твенника благоприя́тнаго к Нему́ предлага́ем, и про́сим тя со усе́рдием ве́лиим: бу́ди засту́пник и хода́тай наш пред Бо́гом, Судие́ю Пра́веднейшим, се бо вы́ну прогневля́ем Его́ согреше́нии мно́гими. Ны́не у́бо, во сла́ве Небе́сней пребыва́я и с ли́ки святы́х непреста́нно славосло́вя Пресвято́е И́мя Го́спода, при́зри на нас, гре́шных, и изба́ви всех, ве́рою несумне́нною к Бо́гу приходя́щих, от вся́ких бед, наве́тов и прило́гов диа́вольских. Укроти́ во́лны страсте́й и искуше́ний, востаю́щих на ны, да ра́ди святы́х твои́х моли́тв не обы́мет нас напа́сть, и не поги́бнем в пучи́не грехо́вней и в ти́не страсте́й на́ших. Вознеси́, богоно́сне о́тче наш, сие́ ма́лое моле́ние недосто́йных раб твои́х Влады́це Христу́, да утверди́т зе́млю на́шу в пра́вой ве́ре и благоче́стии, Це́рковь Святу́ю да сохрани́т непреобори́му от ересе́й и раско́лов, и соблюде́т невреди́му от вся́каго зла. Испроси́ у великодарови́таго Христа́ Бо́га на́шего скорбя́щим утеше́ние, неду́гующим исцеле́ние, оби́димым заступле́ние, па́дшим во грехи́ покая́ние и возста́ние, стра́ждущим от бесо́в ско́рое свобожде́ние, от Це́ркве Христо́вы отпа́дшим вразумле́ние и на путь спасе́ния обраще́ние. Ты му́ченически ду́шу твою́ за ве́ру положи́л еси́, да́руй и нам му́жество подража́ти тебе́, да ничто́же в жи́зни сей вре́менней возмо́жет отлучи́ти ны от любве́ Бо́жия. О святи́телю Христо́в, огради́ и укрепи́ моли́твами твои́ми град сей, да процвете́т в нем ре́вность ко спасе́нию и благоче́стие. Ты, непреста́нно о часе́ сме́ртнем па́мять име́вый и благу́ю часть избра́нных Бо́жиих от Го́спода получи́вый, сподо́би и нас в ми́ре и покая́нии живо́т свой сконча́ти, и Ца́рствия Бо́жия насле́дники бы́ти, иде́же ты водворя́ешися со А́нгелы и все́ми святы́ми, хваля́ Бо́га в Тро́ице сла́вимаго, Отца́, и Сы́на, и Свята́го Ду́ха, во ве́ки веко́в. Ами́нь.

Служба сщмч. Агафангелу исповеднику, митрополиту Ярославскому

Текст службы утвержден на заседании Священного Синода 25 августа 2022 года (журнал № 78).

Месяца октября в 3-й день

Святителя Агафангела, исповедника, митрополита Ярославскаго

На велицей вечерни

На Господи, воззвах: стихиры, глас 8.

Подобен: О, преславнаго чудесе:

Святителю Христов Агафангеле,/ исповедниче твердый Церкве Русския,/ ты, от утробы матере Богом избран быв,/ в день Воздвижения Креста Господня родился еси/ и, крест свой мужественне взем,/ усердно Христу последовал еси,/ души же своея отвергнувся,/ тесным житием и многими подвиги/ соблюл еси ю в живот вечный.

Богомудре отче Агафангеле,/ ты, яко звезда пресветлая,/ от востока даже до запада/ землю Русскую озарил еси,/ молитвами бо слезными и смирением,/ слова Божия проповеданием/ многия люди ко Христу привел еси/ и отец чадолюбивый им явился еси./ Темже и велий в Царствии Небеснем нареклся еси.

Святителю отче Агафангеле,/ благовестниче неустрашимый,/ ты, мужество и мудрость сочетая,/ на всяк день душу свою за овцы полагал еси/ и, яко добрый воин Христов,/ изгнания и темничная заточения,/ поношения и болезни лютыя/ мужественне претерпел еси/ и венца Небеснаго сподобился еси.

Святителю отче Агафангеле,/ ты, яко злато в горниле, огнем искусився страдания,/ со дерзновением отверзл еси уста,/ во еже обличити отступники/ предания церковная попирающия/ и нововведения льстивая вводящия,/ темже небо благодарственно прият тя,/ идеже ныне древа жизни наслаждаешися/ и прославляеши Христа, Бога нашего.

Слава, глас тойже:

Егда Церковь Русская/ богоборческими гонении люте обуревашеся,/ тогда святитель Агафангел страж неусыпный тоя явися,/ по вся дни произволением за Христа умирая,/ темже, жизнь вечную наследовав,/ ныне в сонме новомученик Российских на Небеси ликует,/ прославляя Отца и Сына и Святаго Духа,/ Троицу Единосущную и Нераздельную.

И ныне, Богородичен: Царь Небесный:

Вход. Прокимен дне. И чтения 3 исповедническая:

1. Похваляему праведнику: (главы 4, 6, 7 и 2)

2. Праведницы во веки живут: (главы 5 и 6)

3. Праведник, аще постигнет скончатися: (глава 4)

На литии стихира храма и святаго стихиры, глас 1:

Преподобен и незлобив,/ домоправитель верный и мудрый,/ пастырь добрый, душу свою за овцы Христовы полагаяй,/ исповедник твердый и истинный хранитель церковных преданий/ явился еси, святителю Агафангеле,/ себе самаго во образ верным чадом Церкве Русския подавая.

Супружницы и сына во единочасие лишився,/ Божие посещение уразумел еси,/ святителю Христов Агафангеле,/ и, призвание на путь иноческий,/ такожде и дар слова от Господа восприем,/ проповеданием и учением сторицею той преумножил еси/ и, светильник целомудрия елеем милости исполнив,/ с мудрыми девами в Чертог Небесный вшел еси.

Слава, глас 6.

Подобен: Все отложше:

Стойте и держите предания церковная,/ неленостно поучал еси паству,/ святителю отче Агафангеле,/ егда же в место обители Спасовы/ безбожными заключен был еси,/ тогда вернии людие на дворе церковнем собирахуся,/ да поне издалеча видением лика твоего утешатся./ Темже и ныне предстани в помощь нам,/ празднующим любовию святую память твою.

И ныне, Богородичен, глас и подобен тойже:

Величаем Тя вси, Пренепорочную/ Матерь Бога нашего,/ Юже освяти Дух Пресвятый./ Ты бо еси, Богородице,/ Оружие наше и Стена,/ и Святей Руси Заступница,/ к Тебе ныне прибегаем,/ Тя на молитву призываем,/ да избавиши нас/ от врагов наших.

На стиховне стихиры, глас 2:

Приидите, празднолюбцы,/ воспоим святителя Агафангела достоблаженнаго,/ учителей печать и страдальцев единонравна,/ Христа ради вся во уметы вменившаго,/ велелепием исповедания Церковь Русскую украсившаго,/ ныне же в Царствии Небеснем Бога воспевающаго.

Стих: Ты иерей во век/ по чину Мелхиседекову.

Приидите, архиереи и священницы,/ святителя Господня песньми почтим,/ той бо, подвиг страдания и исповедничества подъем/ и последи благочестно пожив,/ жертву безкровную благоговейне приношаше,/ паству свою Хлебом Жизни питая/ и Христа Бога усердно умоляя,/ да простится грех богоборчества народа нашего.

Стих: Исповемся Тебе, Господи,/ всем сердцем моим.

Приидите, любострадальцы,/ прославим Агафангела освященнаго,/ той бо, яко раб благий и верный,/ данный ему талант благочестия/ исповеданием Христа преумножи,/ темже в радость Господа вниде/ и, велие дерзновение от Него восприем,/ молится о земли нашей/ и о верою чтущих память его.

Слава, глас 6:

Возлюбил еси Бога паче живота/ и ближняго своего, яко себе,/ во главу угла благо Церкве Святыя поставляя/ и предания святых отец неизменно хранити повелевая,/ сквозе огнь и воду страданий по Христе прошел еси/ и ныне вечнаго покоя наслаждаешися,/ святителю Агафангеле, отче наш.

И ныне, Богородичен: Творец и Избавитель мой, Пречистая:

На благословении хлебов тропарь, глас 2:

По вся дни Бога ради умервщляемь,/ святителю и исповедниче Христов Агафангеле,/ во время безбожных гонений лютых/ попечение о Церкви Русской от святителя Тихона приял еси/ и, наветы диавольския разорив,/ корабль церковный мудре/ силою возлюбившаго тя Господа управил еси./ Егоже моли даровати нам мир и велию милость.

На утрени

На Бог Господь: тропарь святителя дважды. Слава, и ныне, Богородичен.

По 1-м стихословии седален, глас 7:

Во плоти ходяй, не по плоти воинствовал еси, святителю Христов Агафангеле, и благодатию Божиею вся до конца претерпел еси, покры бо тя в тайне Лица Своего Господь, Егоже моли помиловати нас в День Судный.

Слава, и ныне, Богородичен:

Ты Предстательница теплая и Заступница христиан еси, Богородице Дево, Всепетая Владычице, темже со всеми святыми земли Русския, моли Сына Твоего и Бога в День Судный обрести нам велию милость.

По 2-м стихословии седален, глас 2:

Во дни брани и нестроений народных, святителю отче Агафангеле, ты именем Христовым воины русския увещал еси, еже Отечеству верно служити, веру Православную незыблему хранити и живот свой за други своя полагати, да в житии сем плод вечный обрящут.

Слава, и ныне, Богородичен:

Воистину Богородицу Тя исповедуем, Владычице, Ты бо Бога неизреченно родила еси, Крестом смерть разоршаго и к Себе святых соборы привлекшаго, с нимиже моли спасти землю Русскую, яко та есть удел Твой.

Величание:

Величаем тя,/ священноисповедниче Агафангеле,/ и чтим святую память твою,/ ты бо молиши за нас/ Христа, Бога нашего.

Псалом избранный:

1. Священницы Твои облекутся правдою, и преподобнии Твои возрадуются.

2. Повем имя Твое братии моей, посреде Церкве воспою Тя.

1. Приидите, чада, послушайте мене, страху Господню научу вас.

2. Возненавидех церковь лукавнующих, и с нечестивыми не сяду.

1. Яко ревность дому Твоего снеде мя, и поношения поносящих Тя нападоша на мя.

2. За словеса устен Твоих аз сохраних пути жестоки.

1. Искусил мя еси, и не обретеся во мне неправда.

2. Правдою Твоею избави мя и изми мя.

1. Погна враг душу мою, посадил мя есть в темных.

2. Изведи из темницы душу мою, исповедатися имени Твоему.

1. Бог мой еси Ты, и исповемся Тебе всем сердцем моим.

2. Глаголах о свидениих Твоих пред цари, и не стыдяхся.

1. Благо есть исповедатися Господеви и пети имени Твоему, Вышний.

2. Пойте Господеви, преподобнии Его, и исповедайте память святыни Его, во всех людех чудеса Его.

По полиелеи седален, глас 2:

Отверзошася ти врата правды, святителю Агафангеле всехвальне, и ныне, вшед в ня, Господеви исповедуешися, хвалу Ему в церкви преподобных возсылая, и кадило молитв священных Престолу Его вознося. Темже помяни чада Церкве Русския, любовию чтущия Тя.

Слава, и ныне, Богородичен:

Ко образу Толгския иконы Пресвятыя Богородицы с верою припадая, Агафангеле премудре, о спасении земли нашея Пречистую усердно умолял еси и тако верныя поучал еси: не имамы иныя надежды во обстояниих, разве предстательства Богоматере.

Степенна: 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Евангелие от Луки, зачало 64.

По 50-м псалме стихира, глас 6:

Нашедшу на тя Духу Святому,/ святителю отче Агафангеле,/ во дни гонений лютых в земли Русской/, старец сый, телом немощный и притрудный,/ духом неколеблен явился еси,/ заточения, изгнания и болезни,/ глад и мраз претерпевая,/ яко истинный свидетель Христов./ Темже ныне, Престолу Божию предстоя,/ моли помиловатися душам нашим.

Канон, глас 8, егоже краегранесие: Претерпевый до конца, той спасен будет.

Песнь 1

Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Положивый в сокровищницу Церкве Русския плод устен, исповедающих имя Божие, святителю отче Агафангеле, приими днесь, яко лепту, пение от души, благих вдовствующия.

Ревностию по Бозе бездну гонений немокренно прешел еси, святе Агафангеле, и ныне молитвами твоими на неуклонное исповедание веры нас утверди, воспевающих и поющих в сердцах наших Господеви.

Егда дадеся ти благодать не точию во Христа веровати, но и по Нем пострадати, святителю славне, ты путем скорбным безбоязненно пешешествовал еси, верным образ быв. Темже и вниде во врата Небесная.

Богородичен: Твоего чрева Плод, Богоневесто, земныя вся от клятвы избавляет, темже благословенна Ты в родех, Пречистая Владычице.

Песнь 3

Ирмос: Утверждей на камени веры,/ на сем созижду Мою Церковь, рекий, Господи,/ спаси мя, вопиюща:/ Ты еси, Христе, Сын Бога Живаго,/ и в Тебе утвердися дух мой.

Егда восташа врази и отступницы на святыни земли Русския,/ тогда ты учаше неложно, богомудре Агафангеле,/ како подобает в Дому Божии жити,/ яже есть Церковь Бога Жива,/ столп и утверждение истины.

Речи безумныя слышав, яко несть Бог, приидите, и отставим вся праздники Божия, прещения гордых не убоялся еси, отче Агафангеле, чада церковная к единению веры призывая.

Паству твою апостольски поучал еси, святителю Агафангеле, повелевая отлучатися всякаго брата, безчинно ходяща, в научения странна и различна не прилагатися, но благодатию сердца утверждати.

Богородичен: Едина словом Слово плотию рождшая, Чистая, избави сетей вражиих души наша и утверди на камени Божественных хотений, яко на Тя упование возложихом.

Седален, глас 4:

Взирая на Начальника и Совершителя веры Иисуса, верою немощи превозмогл еси, святителю Агафангеле, в темницах и изгнании терпеливодушно пребывая, беды от гонителей, беды от лжебратии терпя. Темже и жизнь вечную восприял еси.

Слава, и ныне, Богородичен:

К Заступнице земли нашея, Приснодеве Богородице, ныне притецем и к первописанней иконе Ея припадем, с верою зовуще из глубины души: о, Мати Божия, спаси землю Русскую, исцели болезни ея и верныя люди утеши.

Песнь 4

Ирмос: Ты моя Крепость, Господи,/ Ты моя и Сила,/ Ты мой Бог, Ты мое Радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Виждь враги моя, яко умножишася и туне возненавидеша мя, вопиял еси псаломски, Агафангеле крепкодушне, сохрани душу мою и избави мя, яко Тебе ради претерпех поношение, и прославлю силу Твою, Человеколюбче.

Исповедал еси, отче Агафангеле, Христа пред отступники и гонители, мужественне воспевая: страха вашего не убоимся, ниже смутимся, яко с нами Бог, Господа же Бога нашего, Того освятим, и Той будет нам в страх.

Имене Своего ради в скорбех сохрани тя Христос Бог мышцею Своею высокою, тебе взывающу: яко аще не Господь бы был в нас, внегда востати человеком на ны, убо живых пожерли быша нас. Ныне же силу Его воспеваем.

Богородичен: Доброту Иаковлю, красную Тя, Всечистая, Едину обрет от века Пребезначальное Слово, и вселився в Тя, обнови человеческое естество, Егоже моли от всякия мне избавитися скорби.

Песнь 5

Ирмос: Яко Бога иного, Блаже,/ паче Тебе, не знаем,/ к Тебе, Свету Незаходимому, от нощи утренююще,/ воспеваем Тя, Человеколюбче.

Отлучен быв телом, но не душею, от паствы твоея, исповедниче Христов, по вся дни тую в сердце своем носил еси, последуя Господу Человеколюбцу.

Кую измену даст человек за душу свою? Сие слово Господне в сердце храня, житие непорочное и исповедание чистое Спасителю в дар принесл еси.

О всяцей скорби Бог не остави тебе, да возможеши сущия в скорбех утешати, и гонящия благословляти, словом, житием, любовию образ верным подавая.

Богородичен: Направи стопы моя к покаянию, Путеводительнице христианом, Богородице Чистая, яко да из тьмы греховныя исход обрящу.

Песнь 6

Ирмос: Иону в ките, Господи,/ единаго вселил еси,/ мене же, связаннаго мрежами вражиями,/ яко от тли онаго спаси.

Целомудрием Христовым, святителю Агафангеле, во узах сый, лжемудрие гонителей обличил еси, яко слово Божие не вяжется.

Аще благая прияхом от руки Господни, злая ли не стерпим, взывал еси, святителю, да сынове Божии обретемся.

Ты, Господи, нам Прибежище и Сила, в тесноте темничней вопиял еси, богомудре, егда бо немощствуем, тогда о Господе сильни есмы.

Богородичен: Освяти ум мой и просвети сердце мое, Пресвятая Мати Божия, и одержащих мя зол измени, христиан Заступнице.

Кондак, глас 4:

Исполняя во плоти твоей лишение скорбей/ за Тело Христово, еже есть Церковь,/ страждующим чадом Ея милостию и смирением,/ преподанием мира и мудростию послужил еси,/ сего ради на свещнице архиерейстем,/ яко светильник горяй и светяй, возсиял еси/ и мощи твоя граду Ярославлю/ во утверждение даровал еси,/ святителю Агафангеле, отче наш.

Икос:

К Церкви и земли Русской любовию распалаяся, неверие и зловерие со дерзновением обличал еси, чада церковная повиноватися и покарятися законным пастырем поучая. Темже, страдания по Христе волею на рамо взем, силу мучительскую силою Христовою препобедил еси. И ныне, во Царствии Божии веселие вкушая за лета, в няже видяше злая, поминай любовию чтущих тя, святителю Агафангеле, отче наш.

Песнь 7

Ирмос: Божия снисхождения/ огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.

Имея щит веры Христовы, стрелы разжженныя мучителей отразил еси, святителю, вопия: аще бо паки возможете и паки побеждени будете, аз же благословлю Бога отец наших.

Со беззаконными вменився, на путь нечестивых не ступил еси и, ненавидимь Господа ради быв, любовию сердце утвердил еси, воспевая Богу отец наших.

Паче силы гонительми отягощаемь, легкое иго Христово подъял еси, мудре, и посреде мятежа и браней земных покой обрел еси, воспевая Богу отец наших.

Богородичен: Агнца зрящи неправедне на Древе воздвизаема, Многопетая Агница плачущи восклицаше, матерски слезящи и долготерпение Того пояше.

Песнь 8

Ирмос: Нечестия органы иную песнь,/ благочестия же благовещаннии пояху гусли:/ благословите, дела Господня, Христа во веки.

Силою многою глаголы вечныя благовествовал еси, святителю: се, Господи, удаляющии себе от Тебе погибнут, людие же вернии исповедятся Тебе во веки.

Едем мысленный в узилище обрет, исповедниче славный, реку учений Божественных из него извел еси, да омоется лице земли Русския от нечестия во веки.

Написуя верным благочестивно разум Божественный, Святаго Духа трость явился еси, Емуже со Отцем и Сыном исповедаешися во веки.

Богородичен: Безсмертнаго Бога рождшая, течение смертное укротила еси, темже умертви, Чистая, страсти телесе моего, да Тя славлю во веки.

Песнь 9

Ирмос: Благословен Господь, Бог Израилев,/ воздвигнувый рог спасения нам/ в дому Давидове, отрока Своего,/ в нихже посети нас Восток с высоты/ и направил ны есть на путь мира.

Узы твоя поминающия и любовию чтущия память твою, вечных и нерешимых уз избавити молися Христу, святителю Агафангеле, яко ходатай еси теплый о чадех Церкве Русския.

Дар молитвы терпением в скорбех стяжав, о умирении Церкве Русския по вся дни Бога умолял еси, отче Агафангеле. И ныне благословящия о тебе Господа помяни.

Единаго Бога возлюбив, священное служение исповеданием запечатлел еси и, яко клас зрелый земли Русския, в Небесных житницех упокоился еси, славне Агафангеле.

Богородичен: Тя верою поющия просвети, Всенепорочная, просвещением Сына Божия, из Твоея прошедшаго утробы, и тьмы нас несветимыя изми Твоим предстательством.

Светилен:

Представил еси себе жертву живу Богови, святу, благоугодну, в словеснем служении и исповедании, святителю Агафангеле, и тако просветися свет твой на Святей Руси, яко да славит выну о тебе Отца Небеснаго.

Слава, и ныне, Богородичен:

Свет от Света миру рождшая, Пречистая, светлости святых сподоби люди земли Русския, Тебе почитающия и молебное пение Тебе приносящия: не забуди нас, рабов Твоих, Едина Благословенная.

На хвалитех стихиры, глас 4:

Досточудне святителю Агафангеле,/ ты в годину гонений на Церковь Русскую/ столп Православия исповеданием Христа явился еси,/ узами и изгнанием, яко злато в горниле, искушаемь,/ в мире благочестне скончался еси/ и благоуханием святых мощей верныя возвеселил еси./ Ныне же с лики ангельскими Бога величаеши. (Дважды).

Егда безбожие плени землю Русскую,/ премножество силы Божия проповедал еси, Агафангеле всехвальне,/ гонимь, но не оставляемь,/ низлагаемь, но не погибаяй,/ в терпении мнозе, бдениих и пощениих,/ во благости, любви нелицемерной и словеси истины/ спасение Руси на камени веры Православныя возвещая.

По слову Господню врази твоя возлюбил еси,/ образ страждущим людем Русским являя,/ святителю Агафангеле,/ кленущия тя благословляше,/ ненавидящим тя добро творяше/ и о гонящих тя моляшеся,/ яко да всыновления сподобишися Отцу Небесному,/ Егоже ныне во славе восхваляеши.

Слава, глас 8:

Святителю и исповедниче Христов Агафангеле,/ ты первее паству Ярославскую/ от омофора святителя Тихона приял еси/ и добре сию упасл еси./ Последи же, волю Первосвятителя исполняя,/ попечение о всей Церкви Русской подъял еси/ и тому во дни гонений безбожных спострадал еси./ Темже ныне купно с ним Престолу Божию предстоиши,/ моляся о душах наших.

И ныне, Богородичен:

Владычице, приими молитвы раб Твоих/ и избави нас/ от всякия нужды и печали.

Славословие великое и отпуст.

На Литургии

Блаженны от канона, песни 3-я и 6-я. Прокимен, глас 7: Изведи из темницы душу мою/ исповедатися имени Твоему. Стих: Гласом моим ко Господу воззвах. Апостол ко Евреем, зачало 334. Аллилуиа, глас 2: Праведнии исповедятся имени Твоему/ и вселятся правии с лицем Твоим. Стих: Господи, Господи, сило спасения моего, осенил еси над главою моею в день брани. Евангелие от Матфеа, зачало 38. Причастен: Пойте Господеви преподобнии Его и исповедайте память святыни Его.

Молитва

О, Богомудре святителю и исповедниче Христов Агафангеле, измлада возжелевый служити олтарю Господню! Ты, первее люди Сибирския и Прибалтийския в стране нашей архипастырским служением добре управив, последи Ярославстей пастве дарован был еси, во время же богоборческих гонений заветом первосвятителя Тихона попечение о Русской Церкви приял еси. Тогда, священное исповедание, яко забрало, восприим, уста богохульная дерзновенно заградил еси и безплотныя враги посрамил еси, чада церковная поучая предания святых отец соблюдати, единство святыя веры в союзе братскаго мира хранити и пастырем законным повиноватися. Темже, заточения, изгнание и многая лишения за имя Христово претерпев, блаженства изгнанных правды ради сподобился еси и ныне с ликом новомученик и исповедник Российских Престолу Пренебесному предстоиши. Темже моли Всеблагаго Бога, да сохранит Церковь Русскую от ересей, расколов, нестроений и гонений, да возродится земля наша святым покаянием и да прославят вернии людие ея единым сердцем и едиными усты Дивнаго во святых Своих Бога, Отца и Сына и Святаго Духа во веки веков. Аминь.

Служба иже во святых отцу нашему Николаю, митрополиту Алма-Атинскому и Казахстанскому, исповеднику

На малой вечерни

На Господи, воззвах: стихиры поем на 4, глас 8-й

Прежде век Сый, Боже,/ времена и веки сотворивый/ и вся в мудрости Твоей устроивый,/ Церковь на земли противу зла воинствующую/ многоразличною благодатию Твоею облагодетельствовал еси,/ даровав в последния сия времена Казахстанской митрополии,/ дивнаго иерарха и исповедника,/ Николая, новаго чудотворца,/его же память днесь благочестно совершающе,/ всесвятое Имя Твое поем и славим.

От века и до века Ты еси, Царю и Господи,/ Пресущественное Естество, в Троице певаемое Ипостасей,/ преестественно Себе даровавший присно тя вожделевшему,/ исповеднику Твоему Николаю,/ Казахстанския митрополии священноначальнику,/ их же и паству свою Тя, Присносущнаго, знати научи,/ его же молитвами,/ неизреченнаго зрения Твоего сподоби ны, Человеколюбче.

Триипостастный, Владыко,/ Отче, Сыне, и Душе Святый,/ Едино Божество и Царство,/ от небесных чинов ангельских воспеваемый,/ приими и наше из глубины сердца приносимое Тебе благохваление/ и мольбами святителя и исповедника Твоего Николая,/ подаждь и нам в сонме ликующих угодников и ангелов Твоих/ воспевати Тя во веки.

Слава, глас 2-й

Возсия днесь память,/ Казахстанскаго чудотворца/ святителя Николая,/ просвещающа и вразумляюща благочестивых собрание,/ иже во всем житии бысть непоколебимый столп благочестия,/ нищих защититель и болящих немздоприемный врач,/ к свету богопознания всех приводяй,/ да из глубины души в радости вопиют:/ Боже наш Триипостастный,/спаси души наша благоволением Твоим,/ да величаем Тя во веки.

И ныне. Богородичен глас тойже.

На стиховне стихиры, глас 5-й

Приидите, христоименитии людие,/ восхвалим христоподражательнаго отца и пастыря нашего,/ небесное добродетелей богатство на земли стяжавша/ и горняго Отечества о Христе Духом Святым достигша,/ иже молит Всесвятую Божественную Троицу,/ спастися душам нашим.

Стих: Священницы Твои облекутся в правду,/ и преподобнии Твои возрадуются.

Святаго Православия проповедниче,/ Христа Бога, во плоти пришедша грешныя спасти,/ во вся концы Казахстанския митрополии вествовал еси/ и в скорбех и печалех чад церковных пребывающих,/ благодатию Божиею, в тебе сущею, исцелял еси./ Тем же молим Тя, святителю Николае, исповедниче Христов,/ молися Господеви,/ паству твою неодоленну в злоключениях сотворити/ и небеснаго блаженства сподобити.

Стих: Блажен муж, бояйся Господа,/ в заповедех Его восхощет зело.

Любви Божественней всем сердцем и душею соединился еси,/ временная и тленная вся презрел еси./ Безбожие и обновленческое злочестие искореняя,/ утверждал еси народы во истиннем благочестии пребывати,/ да в скоротечнем земнем житии евангельскою правдою поживше,/ Отечества Горняго унаследят./ Тем же непрестай о нас Небеснаго Домовладыку молити,/ да предстательством Пречистыя Матери Своея,/ подаст нам в скорбех утешение и исправление жития,/ и всерадостнаго века наследие.

Слава и ныне, Богородичен глас тойже

Тропарь, глас 7-й

Яко светозарное светило,/ лучами Божественных дарований сияющее,/ яви тя Солнце Правды Христос Бог наш,/ тьму безбожия и злонравия далече отгоняюща,/ и зарями богопознания осияюща вопиющих верно:/ Радуйся, святе Николае,/ Христов исповедниче и Казахстанский чудотворче.

Слава и ныне, Богородичен: глас тойже:

На велицей вечерни

Блажен муж: 1-й антифон.

На Господи, воззвах: стихиры на 8, Глас 4-й

Семя благодати Божия,/ благонравием родительским всеянное в сердце твоем,/ соблюл еси боголюбиве/ и от юности всею душею и крепостию твоею Христу прилепился еси,/ злостраданием и темничным томлением,/терпением и кротостию,/ и молитвами непрестанными Тому угодил еси,/ и ныне усердно Господу помолися,/ спастися душам нашим.

Отрясл еси, яко ленностный сон, мирская треволнения/ и Божию указанию последуя,/ иноческих ради доблестей/ в преславную Нилову пустынь пришел еси./ В ней же, иго Христово на рамо восприим,/ желательно Тому сораспялся еси,/ Помошницу имея Того Рождшую Приснодеву Всемирную Заступницу,/ Николая чудотворца имя, яко миро, свыше излиянное, прияв,/ в житии твоем сему уподобился еси/ и ныне с ним молися о нас Господеви,/ спастися душам нашим.

Во благочестии угодникам Божиим ревностно подражая,/ в мале был еси верен/ и великия чести архиерейския благодати удостои тя Господь,/ о спасении душ людских вручая тебе попечение,/ еже благоплодно в самоотверженном житии совершив, вшел еси в радость Господа Своего,/ идеже предстоя Ему с соборы святых/ моли, спастися душам нашим.

На тебе, святе, утвердися истина Господня,/ усты пророка предреченная:/ праведник, яко финикс процветет/ и яко кедр, иже в Ливане, умножится./ Тем же, яко древо благосеннолиственное и многоплодное/ в Церкви явился еси,/ источая притекающим к тебе благодати Божия струю животочную/ и моляся о спасении душ наших.

Божественною благодатию Святаго Духа просветився,/ святителю Николае преславне,/ в гонениях от безбожных венец чистаго исповедничества за Христа доблественне стяжав,/ сликовен новомученником Российским явился еси,/ с ними же, по отшествиии престолу Владычню предстоя,/ несозданным Светом Трисолнечным озаряем,/ молися Господеви спастися душам нашим.

От земных на небесная,/ яко небопарный орел, пречудне, востекл еси,/ но и паству твою благодатными дарами не оставил еси,/ в Царстве неизреченныя славы Божия/ со дерзновением сию воспоминаеши/ и молишися спастися душам нашим.

Просветися житие твое/ христоподражательными светлостьми,/ лжеименнаго разума тьму отгоняя./ Тем же, яко светозарное светило Казахстанския митрополии явился еси,/ святителю и исповедниче Христов Николае,/ верныя ко обретению Царства Божия право путеводя,/ вселился еси, идеже сияет Свет Единосущныя Троицы./ Темже светозарную твою память совершающе, приснопамятне,/ ходатая и заступника тя почитаем.

По достоянию о тебе радуется/ мучеников и исповедников светоявленное собрание,/ небесных чинов лики,/ апостолов и святителей огнезрачное сословие,/ преподобных богоносцев полче/ и священныя митрополии твоея паства/ восхваляюще Триединаго Бога, дивнаго во святых Своих/ и вопиюще тебе таковая:/ Радуйся, святе Николае,/ Христов исповедниче и Казахстанский чудотворче.

Слава, глас 8-й:

Весь исполнен быв любве Божественнныя,/ явился еси Святаго Духа нерукотворенный храм,/ дарами благодати преукрашенный:/ душу бо твою за врученное ти стадо, полагая/ и всем духовне во всем угождая,/ не своея, но ближняго пользы искал еси,/ да всяко некия спасеши./ Не забуди ныне и нас, в добродетели убогих/ и твоего наставления ищущих, да зовем ти:/ Радуйся, святе Николае, Христов исповедниче/ и Казахстанский чудотворче

И ныне, Богородичен, глас тойже:

Царь Небесный за человеколюбие на земли явися/ и с человеки поживе,/ от Девы бо Чистыя плоть приемый/ и из Нея прошедый с восприятием,/ Един есть Сын, сугуб естеством,/ но не Ипостасию./ Темже, совершенна Того Бога/ и совершенна Человека воистинну проповедающе,/ исповедуем Христа Бога нашего:/ Егоже моли, Мати Безневестная,/ помиловатися душам нашим.

Вход. Прокимен дне. И чтения.

Притчей чтение (главы 10, 3 и 8):

Память праведнаго с похвалами,/ и благословение Господне на главе его. / Блажен человек, иже обрете премудрость, / и смертен, иже уведе разум. / Лучше бо сию куповати,/ нежели злата и сребра сокровища. / Честнейшая же есть камений многоценных,/ все же честное недостойно ея есть./ Долгота бо дней и лета живота в деснице ея,/ в шуйце же ея богатство и слава. / От уст ея исходит/ правда,/ закон же и милость на языце носит./ Послушайте убо мене, о чада, / честная бо реку, / и блажен человек, иже пути моя сохранит: / исходи бо Мои — исходи живота,/ и уготовляется хотение от Господа. / Сего ради молю вас / и предлагаю мой глас сыновом человеческим, / яко аз, премудрость, устроих совет / и разум, и смысл аз призвах. / Мой совет и утверждение,/ мой разум, моя же крепость. / Аз мене любящия люблю, / ищущии же мене обрящут благодать./ Разумейте убо, незлобивии, коварство,/ ненаказаннии же, прилагайте сердца./ Послушайте мене и паки, честная бо реку,/ и отверзу от устен правая,/ яко истине поучится гортань мой,/ мерзки же предо мною устны лживыя. / С правдою вси глаголы уст моих: /ничтоже в них стропотно, ниже развращенно. / Вся права суть разумевающим / и проста обретающим разум./ Научаю бо вас истине,/ да будет о Господе надежда ваша, /и исполнитеся Духа.

Премудрости Соломоновы чтение (глава 10):

Уста праведнаго каплют премудрость, / устне же мужей мудрых ведят благодать./ Уста мудрых поучатся премудрости,/ правда же избавляет от смерти. / Скончавшуся мужу праведну не погибнет надежда, / сын бо праведен рождается в живот / и во благих своих плод правды обымет./ Свет праведным всегда/ и от Господа обрящут благодать и славу./ Язык мудрых добрая свесть,/ и в сердце их почиет мудрость./ Любит Господь преподобная сердца,/ приятни же ему вси непорочнии в пути./ Мудрость Господня просвещает лице разумнаго./ Постигает бо желающия ю,/ прежде даже, разумети ю, / и удобь узрится от любящих ю./ Утреневавый к ней не утрудится,/ и бдяй ея ради вскоре без печали будет./ Яко достойных ея сама обходит ищущи, / и во стезях ея является им благоприемне. / Мудрости никогдаже одолеет злоба. / Сих ради и рачитель бых доброты ея/ и возлюбих ю, и поисках от юности моея./ И взысках невесту привести себе, / яко всех Владыка возлюби ю./ Таинница бо есть Божия хитрости / и обретательница дел его. / Труды ея суть добродетели,/ целомудрию же и разуму та учит, правде и мужеству, / ихже потребнее ничтоже есть в житии человеком./ Аще же и многаго искусства желает кто, / весть древняя и быти хотящая разсмотрит. / Свесть извития словес и разрешения гаданий,/ знамения и чудеса проразумеет и сбытия времен и лет,/ и всем советник есть благ,/ яко безсмертие есть в ней и благославие во общении словес ея./ Сего ради беседовах ко Господу и помолихся Ему, / и рех от всего сердца моего: / Боже отцев и Господи милости, / сотворивый вся словом Твоим / и мудростию Твоею устроивый человека,/ да владеет бывшими от Тебе тварми,/ и да управит мир в преподобии и правде. / Даждь ми Твоему престолу приседящую премудрость/ и не отлучи мене от отрок Твоих,/ яко аз раб Твой и сын Рабыни Твоея./ Посли ю с Небес от святаго жилища Твоего/ и от Престола славы Твоея,/ да сущи со мною научит мя,/ что благоугодно есть пред Тобою./ И наставит мя в разум и сохранит мя в славе своей./ Помышления бо смертных вся боязлива/ и погрешительна умышления их.

Премудрости Соломоновы чтение (глава 4):

Похваляему праведнику возвеселятся людие,/ безсмертие бо есть память его,/ яко от Господа познавается и от человек,/ и угодна Господеви душа его./ Возлюбите убо, о, мужие, мудрость и поживете,/ восхощите ея и наказами будете,/ начало бо ея любы и соблюдение закона. / Почтите премудрость, да во веки царствуете. / Возвещу вам и не скрыю от вас тайн Божиих: / яко Той мудрости Наставник есть и мудрых Исправитель, / и всякому смыслу и делу Хитрец./ И всем смыслом научит мудрость,/ есть бо в ней дух разумен и свят и сияние света присносущнаго / и образ благости Божия./ Та други Божия и пророки устрояет,/ благолепнейши же есть солнца и паче всякаго сотворения звезд,/ свету сосуждаема, обретается первейши. / Та угождающих ей от болезней избави и настави на стези правыя,/ даде им разум имети свят и сохрани я от ловящих и подвиг крепок подаде им. / Да разумеют вси, яко сильнейши всего есть благочестие/ и никогдаже преможет злоба мудрости,/ ниже прейдет злыя обличающи суд./ Рекоша же в себе, помысливше неправедно:/ насильствуем праведному и не пощадим преподобства его, / ни усрамимся седин старости многолетны./ Будет бо нам крепость закон и уловим праведнаго, / яко неугоден нам есть и противится делом нашим / и поносит нам отпадение закона / и обличает нам согрешения наказания нашего./ Возвещает нам разум имети Божий/ и отрока Господня себе именует. / Бысть нам на обличение помышлением нашим, / и тяжек нам есть и видим, / яко неподобно иным житие его и изменены стези его, / в поругание вменихомся ему / и удаляется от путей наших, яко от нечистот, / и блажит последняя праведных./ Увидим убо, аще словеса его истинна суть,/ искусим яже сбываются ему./ Руганием и мукою истяжем его,/ да разумеем кротость его / и искусим беззлобство его, / смертию безобразною осудим его,/ будет бо посещение от словес его./ Сия помыслиша и прельстишася, / ослепи бо я злоба их / и не разумеша таин Божиих, / и не разсудиша, яко Ты еси Бог Един,/ живота имеяй и смерти власть, / и спасаяй во время скорби, и избавляяй от всякаго зла. / Щедр и Милостив и дая преподобным Своим благодать,/ и Своею мышцею гордым противляяся.

На литии стихиры, глас 1-й:

Радостно днесь ликовствует богоспасаемый град Алма-Ата/ и с ним вси концы священныя Казахстанския митрополии соторжествуют,/ память совершающе Боголюбезнаго святителя и исповедника Николая,/ узы и темницы за Христа мужественне претерпевшаго,/ и соборища нечестивых себе отлучившаго,/ на небеси днесь со Христом, Царем вечным, царствующа,/ и на земли благодатию Христовою чудодействующа./ Темже, к честней раце его верно притекающе,/ исцеление душам и телесам нашим улучаем/ и, светом богопознания просвещаеми, глаголем:/ сподоби нас даров небесных, святе,/ и христоименитое православных стадо твое сохрани,/ спасение подавая душам нашим.

Приидите восхвалим всечестнаго архипастыря/ и богоноснаго отца нашего,/ венцем чистаго исповедничества преукрашеннаго/ и Христу Подвигоположнику нашему во славе незаходимей предстояща,/ в сонме светозарных избранников присно радующася./ Тем же, на земли память его восхваляюще, во умилении воспоим:/ Радуйся, служителю Божий, гонения правды ради смиренно претерпевый;/ Радуйся, розго винограда Христова, мног плод в пособие православным творящая;/ Радуйся, града Алматы славо и ограждение;/ Радуйся, всех градов и весей Казахстанских неусыпный страже и теплый хранителю;/ Радуйся, святе Николае,/ Христов исповедниче и Казахстанский чудотворче.

Днесь вернии, всепразднственно ликовствуем,/ во псалмех и песнех Господеви поюще/ и чтуще Того служителя благоприятна,/ добродетельми сияюща и сердца наша небесными зарями просвещающа,/ и единомудренно воспевающе того, песнь тако рцем:/ Радуйся, архипастырю благосердый,/ любовию и кротостию вся покрываяй;/ Радуйся, Владыко прелюбимый, бедствующия защищаяй;/ Радуйся, милостивый скорбящим помощниче./ Радуйся, ищущим спасения готовый споспешниче;/ Радуйся, святе Николае, Христов исповедниче и Казахстанский чудотворче.

Слава, глас 6-й:

Имуще сердце твое, яко добрую почву,/ к восприятию семене Слова Божия всегда отверстым,/ неуклонно шел еси по стопам Христа, зовуща:/ аще, кто хощет в след Мене идти,/ да отвержется себе и возмет крест свой,/ и в след Мене да идет./ И венцем добропобедным чистаго исповедничества от Него украшенный,/ Того, яко Подвигоположника и Судию,/ яко Мздовоздаятеля и яко Милостива,/ моли спастися душам нашим.

И ныне, Богородичен или Крестобогородичен, глас той же:

Что зримое видение,/ еже Моима очима видится, о, Владыко?/ Содержай всю тварь, на древо воздвижен быв,/ и умираеши, всем подавая жизнь,/ Богородица, плачущися, глаголаше,/ егда узре на Кресте возносима/ из Нея неизреченно возсиявшаго/ Бога и Человека.

На стиховне стихиры, глас 2-й.

Яко, Богом данный,/ от родителей Феодосием нареченный,/ тезоименитому мученику в истом исповедании Христа Бога подражал еси,/ и премногая дарования Божественная стяжав,/ у престола огнезрачнаго Святыя Троицы предстоиши,/ моляся о спасении нашем.

Стих: Праведник, яко финикс процветет, яко кедр иже в Ливане умножится.

Яко миро, свыше излиянное,/ имя новое во иночестве восприял еси,/ пророчески на служение твое указующее, святе Николае исповедниче Христов,/ и народа множества/ христоподражательною кротостию и любовию в послушание Богу преобрел еси,/ со апостолы и Николаем Угодником/ в невечернем дни Царствия Божия, радуяся, водворяешися,/ моляся о спасении нашем.

Стих: Насаждени в дому Господни/ во дворех Бога нашего процветут.

Видяще, в немногих храмех,/ подобно оазисам в бескрайней безбожия пустыне стоящих,/ паству твою у источников истиннаго богопочитания пиющую воду живу,/ усердно сию посещал еси,/ апостолом Христовым соревнуя,/ назидая в вере, укрепляя в надежде и утверждая в любви./ И по отшествии твоем в небеснем всевеселом воздаянии пребывая,/ наследие твое не оставил еси,/ моляся о спасении душ наших.

Слава, глас 3-й:

Церкви Христовы столпе непоколебимый,/ отеческих преданий истинный хранителю,/ веры православныя исповедниче благочестивый,/ Казахстанския митрополии похвало и утверждение, святе Николае,/ всех нас, память твою светоявленную совершающих,/ поминай богоприятными твоими молитвами,/ да прославим Спаса, тя прославившаго,/ дивнаго во святых Своих, Бога нашего.

И ныне, глас той же, Богородичен:

Призри на моления Твоих раб, Всенепорочная,/ утоляющи лютая на ны возстания, всякия скорби нас изменяющи: / Тя бо Едино твердое и известное утверждение имамы/ и Твое предстательство стяжахом,/ да не постыдимся, Владычице, тя призывающии,/ потщися на умоление Тебе верно вопиющих:/ Радуйся, Владычице, всех Помоще, Радосте и Покрове/ и Спасение душ наших.

Или Крестобогородичен, глас той же:

Видящи Тя распинаема Христе,/ Тебе рождшая, вопияше:/ что странное еже вижу таинство, Сыне Мой?/ Како на древе умираеши, плотию повешен,/ Жизни Подателю?

Тропарь, глас 7-й

Яко светозарное светило,/ лучами Божественных дарований сияющее,/ яви тя Солнце Правды Христос Бог наш,/ тьму безбожия и злонравия далече отгоняюща,/ и зарями богопознания осияюща вопиющих верно:/ Радуйся, святе Николае,/ Христов исповедниче и Казахстанский чудотворче.

На Бог Господь, тропарь глас – 7-й:

По 1-м стихословии, седален глас 1:

Адаманта веры благоразумнаго, страдальца Христова и исповедника доблественнаго, днесь вернии благоговейно любовию почтим, великаго во смирении иерарха, кроткаго во архиереях святителя, неумолкаемаго Евангельския благодати провозвестника, призывающа нас внити в радость Господа Своего и пети Тому научающа: прославляяй святых Своих, Господи, слава Тебе.

Слава, и ныне, Богородичен, глас 1-й:

Из Тебе, Пречистая Богородице, возсия нам Жизнодавец и Господь всех, не оставль Отеческих недр, сниде на землю и спасение роду человеческому дарова и от тли на нетление возведе зовущия: Радуйся, Всенепорочная Дево Богородице, Надеждо и Предстательство Тебе поющих.

По 2-м стихословии седален, глас 5-й:

Обновленческаго суесловия возгнушався, истинным последовал еси Евангельским заповедем, преблаженне святителю Николае, богомудре, и митрополию Казахстанскую во отеческом древнем благочестии утвердил еси, да христоименитых людей множество во единодушии православно славят Троицу Единосущную, Юже моли спастися душам нашим.

Слава, и ныне, Богородичен:

Имамы Тя к Богу истинную Предстательницу, раби твои, Всенепорочная, дерзновение бо к Нему, яко к Сыну Своему, имаши. Темже со архангелом вопием Ти верно: Благословен, Пречистая , Плод чрева Твоего.

Величание:

Величаем тя, Христов исповедниче, святителю Николае, и чтим болезни и труды твоя, имиже трудился еси во благовестии Христове.

Псалом избранный:

По полиелее седален; глас 4-й:

Весь еси, блаженне отче, в вышних присно во обителех райских, в селениях праведников водворяешися, но и нас, паству твою, со страстьми и похотьми и духами злобы поднебесными непрестанно брань ведущую, не оставляеши, и, тебе тепле почитающия, наставляеши к разуму Божественному и деланию усердному заповедей Христовых, и всякая благополезная прошения наша исполняеши, подвизая пети тебе: Радуйся, святе Николае, Христов исповедниче и Казахстанский Чудотворче.

Слава, и ныне, Богородичен:

Едина верным заступление явилася еси, Всенепорочная, от Твоих бо Приснодевственных кровей воплотися Слово Божие, советом Отчим и, земная с небесными совокупив, в древнее отечество земнородным вход устрои. Сего ради молим Тя, Всеблагая, не лишенны нас сотвори Сына Твоего и Бога нашего царствия, яко да поем Твое величие.

По 50-м псалме стихира глас 6-й.

Веселися и красуйся град Алма-Ата/ торжествуй и радуйся Казахстанская митрополия / светло совершая благолепную память архипастыря своего,/ Христова исповедника блаженнаго Николая, / скорбящим сострадательнаго утешителя, / обидимых теплаго заступника,/ болящих безмездна врача, веры и благочестия образа чиста,/ молящегося о спасении душ наших.

Канон.

Припев: Святителю и исповедниче Христов Николае, моли Бога о нас.

Песнь 1-я

Ирмос: Поим Господеви,/ проведшему люди Своя сквозе Чермное море,/ яко Един славно прославися.

Песньми прехвальными восхвалим, вернии, всеславную память исповедника Христова и архипастыря нашего Богоноснаго святителя Николая, Подвигоположника Сладчайшаго Господа Иисуса, величающе.

Любовию христоподражательною во изгнании, правды ради, победил еси беззаконнующих неистовство и напасть, и явился еси добропобедный исповедниче Христов, приснопамятне Николае, отче наш блаженне.

Великая сила благодати Божия в великих лишениях, прещениях же и глумлениях от безбожных тобою, страдальче, наследована бысть, ею же в земном служении твоем и по отшествии в небесные кровы верным токи целебныя источаеши, святе Николае, Казахстанския митрополии Похвало и Украшение.

Богородичен: Милостива мне, Всемилостивая Мати, Сына Твоего и Бога нашего сотвори, Пренепорочная, в судный день страшнаго мя осуждения избавляющи.

Песнь 3-я

Ирмос: Ты еси утверждение/ притекающих к Тебе, Господи,/ Ты еси Свет омраченных,/ и поет Тя дух мой.

Вседержителя силою духовною укрепляемь, мудре, в кротости и смирении вся злоключения терпя, крепость злобы древняго злоначальника низложил еси, Христа поя во веки.

Исповедничества чистаго и доблестнаго венцем преукрашенный во страданиях твоих, апостольских учений и отечественных догмат хранитель верный в Церкви явился еси, рассеянныя чада церковныя во едино стадо собирая, да в скорбех и радостех Христа поют во веки.

Яко же солнце незаходимое, лучами любве Божия сияющее, явился еси страждущим чадам церковным, яростию бури безбожнаго злочестия по обширным просторам Казахстанским рассеянным. Их же сердца и души духовно возгревая подвизал еси, хвалебно пети Христа во веки.

Богородичен: Изми мя, Всенепорочная, грехов лютых бури и вихря помыслов нещадно уму моему находящих избави мя, Пречистая.

Седален, глас 8-й.

Чистотою душевною и телесною сияя, терпением в гонениях и лишениях мужествовав, прегордаго Велиара главу сокрушил еси, ни ласками, ни ложными прещении, ни благовидными предлогами богоборцев ни себе, ни паству твою обманути не попустил еси, Богомудре, святую веру непорочно храня, и Богу до конца угодил еси. Сего ради от Него чудесы при жизни и нетлением по смерти почтен еси, яко причастник Божия Благодати.

Слава, глас той же:

Во святительстве исповеднически благочестно пожил еси, словесныя Христова стада овцы словом увещавая и делом назидая, и во изгнании неправедном, благодаряще Бога и огнем любве неугасимыя к Нему пламенея победоносным венцем от Христа Подвигоположника достойне увенчан, молися паствы твоея спасти люди, любовию память твою почитающия.

И ныне, Богородичен:

Человек враждующих озлобления и демонская злоухищренная стреляния угасила еси, Всенепорочная, ходатайством твоим благомощным к Сыну Твоему и Богу нашему, тако и нам, во обстояниях невидимыя брани сущим, душам спасение и телесное здравие подаждь, присно блажащим Тя и добротолюбием воинствующим во славу Рождшагося от Тебе.

Песнь 4-я

Ирмос: Услышах, Господи,/ смотрения Твоего таинство,/ разумех дела Твоя, и прославих Твое Божество.

Жизнь твоя, вся духу Божию всецело открытая, разруши лукавых духов и безбожных хулителей хитросплетения тщетныя и путь прав многим, ищущим спасения яви.

Благаго Бога во всем житии твоем подражатель явился еси, священноначальниче и исповедниче Христов Николае, милость и любовь нелицемерныя и ко всем равныя Духом Святым стяжал еси, поминая и творя реченное: возлюбиши искренняго своего, яко сам себе.

Изволением Божиим и избранием святейшего Патриарха Алексия архипастырем Казахстанския митрополии, поставляешися досточудне и наставник, иже ко спасению, пастве твоей многострадальней во утешение даруешися, непрелестным путем верности Святей Невесте Божией церкви Христовой, вводя стадо твое во ограду Небесную.

Богородичен: Яко же престол огнезрачен, носиши Солнце Правды, Богоблагодатная Владычице, Его же моли спасти мя, греховною тьмою обложеннаго.

Песнь 5-я

Ирмос: От нощи неведения/ Боговедением просветивый концы,/ просвети мя утром человеколюбия Твоего, Господи.

Обновленцев, одержимых лестию всеведения и гордынею усовершенствования церкви, яко волки, во облике овец пришедшия, прозрел еси, к свету отцепреданныя православныя веры паству твою наставлял еси Богомудре, за еже и страдания претерпел еси, и от Бога, яко исповедник истинен, прославлен еси, святе Николае.

Благочестия рвением распалаемь, поругания и досады, заточения и изгнания претерпел еси, поминая Господа и Спаса неповинныя страсти, нашего ради спасения претерпевшаго. Сего ради того помощию победил еси враги видимыя и невидимыя на тя вооружившиеся, ухищрения тех сокрушил еси и паству твою во правоверии утвердил еси, собою образ показуя, и путь ко спасению возвещая и от злых пременение подавая.

Непрестанно врученное ти наследие церковное в Духе Святом о Христе поучая, на живоносных закона Божия и любве пажитях словесное стадо твое упасл еси и богоприятным молитв твоих кадилом вся пределы Казахстанския облагоухал еси, да явится во стране сей благоприятен плод спасительнаго сеяния Христова и пшеница добрая усокровиществуется во хранилища Небеснаго Домовладыки.

Богородичен: Предстательницу непостыдну и Заступницу тверду имуще Тя, Пречистая, неудобства всякого избавляемся и печали, и огорчения.

Песнь 6-я

Ирмос: Молитву пролию ко Господу/ и тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.

Кротких глагол твоих вещании и образом добродетельнаго жития твоего, святе, обширная паства твоя поучашася в Духе Божественном тобою мертвой убо быти греху, живой же Господеви, да и на небеси в блаженней вечности с тобою в радости Божественней водворится, священнотаинниче.

По стопам апостолов Христовых непорочно ходяща, зряху тя духовныя чада твоя, священноначальниче Николае, отче наш, и пророчества дар в тебе видяще и сокровище исцелений недугов душевных и телесных, тя знающе с верою и любовию притекаху к тебе, яко врачу скоромилостиву.

В преддверии испытания Церкви своея устрояет тя Господь архиереем быти, святителям древним земли русския добрыми и благими нравы подобна, да, егда буря безбожия, попущением Его, сокрушати будет видимые и незримые храмы, на песце самомнения и превозношения сооруженныя, утвердиши в терпении иже на недвижемем камени веры тверды и смирения духовное свое строение возвигоша.

Богородичен: Буря безмерных согрешений смущает помраченный ум мой, Богоневестная Дево, и во глубину отчаяния погрузити тщится. Но ты, Всеблагая и Многомилостивая яко благих виновная, даждь ми тихия покаяния пристани благоуспешно достигнути.

Кондак, глас 8-й.

Избранный от Предвечнаго Архиерея и Церкви Зиждителя, данный Казахстану ходатаю изрядный и заступниче пречудный, святителю Николае, ублажая подвиги и труды твоя, любве ради Господа тобою подъятыя, восхваляем дивнаго во святых Своих Бога нашего, давшаго тебе благодать величия Своего и научившаго нас любовию пети тебе: Радуйся, святе Николае, Христов исповедниче и Казахстанский чудотворче.

Икос:

Пение благодарственное Пресвятей Троице вси православные, на обширных Казахстанских просторах живущия, взывают, яко благоволи даровати нам тебе, святе, пастыря добра и молитвенника благомощна, и притекающе к раце святей твоей, усердно просят: моли о нас Всеблагаго Бога, да, яко Судия и Мздовоздаятель праведнейший, не отвратит лица Своего от нас недостойных, присно согрешающих и преогорчевающих благоуторобие Его, но, яко Отец чадолюбивый накажет ны зде, во временнем житии нашем, да, отвергше тленная и временная, обрящем нетленная и вечная, благодарне вопиюще тебе таковая:

Радуйся, яко адамант точилом язв и болезней испытанный.

Радуйся, яко злато в горниле огненных искушений очищенный.

Радуйся, прещений лютых не убоявыйся.

Радуйся, и самыя смерти не устрашивыйся.

Радуйся, странствия Владычня и безсмертныя трапезы Его приобщивыйся.

Радуйся, яко звездо лучезарная, над Казахстанскою страною возсиявый.

Радуйся, во вся концы ея свет благодати Божия пролиявый.

Радуйся, благий вертоградарю, сад веры благочестивыя во стране сей насадивый.

Радуйся, поточе сладости, водою благочестия паству твою напоивый.

Радуйся, миром Христовым и богоприятных молитв твоих кадилом просторы Казахстанския облагоухавый.

Радуйся, яко Божию изволению последуя, инославныя мусульмане тебе со усердием служаху.

Радуйся, яко и ты онем любовию теплою всегда благодеял еси.

Радуйся, святе Николае, Христов исповедниче и Казахстанский чудотворче

Песнь 7-я

Ирмос: От Иудеи дошедше, отроцы/ в Вавилоне иногда/ верою Троическою в пламень пещный попраша, поюще:/ отец Боже, благословен еси.

В гонениях лютых искушен быв, по слову апостольскому, искушаемым Богодарованный помощник явился еси, многострадальне. Иереям, в темнице смертною мукою томящимся, в сонном видении представ, утешение и ободрение духовное и телесное подал еси, наставляя их со упованием пети: отец наших Боже, благословен еси.

Фарисейскаго обновленческаго нечестия отвергшися, Христово смирение всегда во уме и сердце твоем имел еси и единство церковное нерушимо хранил еси, священноначалию истинному всегда сыновнее послушание воздавая, тем же и нас в кротости и смирении утверди, да до скончания жития своего сынами и дщерьми Единыя, Святыя, Соборныя, Апостольския Церкви Христовы будем и блажества вечнаго с тобою, пастырю наш, наследницы явимся, поюще: отец наших Боже, благословен еси.

Человеколюбцу Богу прилежно молитвы вознося Заступницу Усердную рода христианского Матерь Божию всегда помощницей имея, ищущим избавления от телесных недугов прежде духовную пищу предлагал еси, наставляя из глубины души радостно пети: отец наших Боже, благословен еси.

Богородичен: Пресвятая Дево и Пренепорочная Мати, Бога плотоносна на спасение мира рождшая, от грехов всяческих и скорбных обстояний, яко Скоропослушница чтущия Тя спасая, о Тебе вопиющия: отец наших Боже, благословен еси.

Песнь 8-я

Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы благословите,/ священницы, воспойте,/ людие, превозносите во вся веки.

С ревностью равноапостольною разсеянную по казахстанским просторам боголюбивую паству твою посещая, непрестанно во благочестии сию наставлял еси и в терпении утверждая, научал едиными усты и единым сердцем воспевати: отроцы благословите, священницы воспойте, людие, превозносите Христа во веки.

Щедраго и всемилостиваго Господа рабе благий и верный и служителю благоприятный был еси, присноблаженне святителю и исповедниче Христов Николае. Научи и нас, в добродетели убогих, течение жития своего в трезвении, послушании и благочестии проходити, в чистоте сердца принося хвалебную песнь: отроцы благословите, священницы воспойте, людие, превозносите Христа во веки.

Богородичен: Тя, красную Палату и всечестный Сосуд всех Царя, Пресвятая Владычице, воспеваем, спасеннии Тобою, Дева Чистая, да и нас храмы быти нерукотворенны и к Тебе Рождшемуся и очистившему всякую скверну и злобу сопротивную явиши поющия: отроцы благословите, священницы воспойте, людие, превозносите Христа во веки.

Песнь 9-я

Ирмос: Устрашися всяк слух/ неизреченна Божия снизхождение,/ яко Вышний волею сниди даже и до плоти,/ от девическаго чрева быв Человек,/ Темже Пречистую Богородицу, вернии, величаем.

Постничества и воздержания правило нерушимо храня, непрестанно молитвою и чистотою сердца Христа Распята и Воскресша в себе живуща со Отцем и Духом Святым имел еси и во ограду избранников Пречистыя Матери Его себе вчинил еси, блаженне Николае. Темже по отшествии твоем Всеблагая Вратарница, двери райския верным отверзающая, во Иерусалим новый и вечный вход отверзла ти, да со всеми святыми Единосущныя Троицы державу поеши радостно во веки.

Легко, яко орел, крылома веры чистыя и благочестия непорочнаго небесную высоту достигл еси, Богоносе отче Николае, почесть горния славы прияв от Судии Праведнейшаго и Мздовоздаятеля. Но, любве ради несокрушимыя к пастве твоея, показа нам Господь цельбоносныя мощи твоя, источаюшия исцеления с верою к ним приходящим. Тем же молим, помяни нас, верою и любовию чтущих тя, да выну всесветлую и всечестную пямять твою достойно ублажаем.

Аще и малое от убогаго усердия приносимое тебе ныне, святе, благохваление приими, яко же две лепты оныя вдовицы прият Христос Господь, и нелишенны нас сотвори твоих благодеяний и даров и прегрешениям нашим прощение у Господа испроси, да тя прославим, милостиве, во веки.

Богородичен: Пощади и помилуй падшее создание Твое, Спасе, Рождшую Тя Матерь сохранив неврежденну, и благомощными ея молитвами, егда сядиши судити всяческим, вечнаго осуждения избави мя, яко Безгрешен и яко Милостивый Бог и Человеколюбец.

Светилен, глас 7-й:

Боготочною кровию, на Кресте излиянною, и тою искупившаго падшее создание Свое от греха, проклятия и вечныя смерти, верою зря волею распеншагося за ны Владыку и Подвигоположника нашего и усердне к Нему любовию горя, всем житием твоим провещал еси: мне, еже жити – Христос, а смерть - приобретение Христа, Ему же на небесех во славе вечней предстоя, моли спастися благочестно ти воспевающим: Радуйся, святе Николае, Христов исповедниче и Казахстанский чудотворче.

Слава, и ныне, Богородичен.

По Бозе упование имуще на Тя, Пречистая Богородице, молимся Ти прилежно, ко иже из Тебе Рождшемуся мольбами, невредимы сохрани нас и спаси души наша.

На хвалитех стихиры, глас 2-й

Киими похвалами/ воспоем в добродетелях преславна иерарха,/ венцем чистаго исповедничества украшеннаго,/ болезнующих телом и душею покаянием врачующа,/ милостями и человеколюбием дарованными от Бога,/ Его же непрестанно подражая,/ молит подати нам велию милость.

Киими песненными добротами/ восхвалим архипастырских исправлений красоту./ Столпа Церкви непоколебима,/ Православия исповедника истиннаго,/ богоподражательным своим житием Казахстанския митрополии просветившаго концы,/ его же, яко вернаго служителя прослави Христос Бог,/подающий нам велию милость.

Киими благогласными словесы/ ублажим богоноснаго святителя и отца нашего Николая,/ за Христа мужественна страдальца,/ за паству свою дерзновенна ходатая,/ безбожия и злонравия обличителя,/ чудеса преславна силою Божиею совершающа/ и подающа от Христа Бога велию милость

Слава, глас 4-й:

Евангельских учений рачителя/ и страстем невинным Христа, Агнца Божия, подражателя,/ днесь обстояще священную раку,/ токи благодати приемлем независтно/ и, верою торжествующе, благодарне к нему взываем, глаголюще:/ Радуйся, Христов исповедниче, святе Николае,/ яко во тленнем сем житии/ нетленная благодати Божия/ в делании заповедей Христовых приобщивыйся/ и со апостолы, пророки, мученики и иерархи/ в Небеснем Царстве сликовствующим явивыйся,/ молися Господеви непрестанно/ благословение и мир Отечеству нашему даровати/ и душам нашим велию милость.

И ныне, Богородичен, глас тойже:

Богородице, всех Царице,/ православных христиан Похвало и непостыдное Упование еретичествующих раскольническая шатания разори,/ и благодатию Сына Твоего озари сердца,/ под вседержавный покров Твой притекающих.

Славословие великое. Тропарь.

Слава и ныне, Богородичен , глас 7:

Яко нашего воскресения сокровище,/ на Тя надеющиеся, Всепетая,/ от рова и глубины прегрешений возведи,/ Ты бо повинныя греху спасла еси,/ рождшая Спасение наше,/ Яже прежде рождества Дева, и в рождестве Дева,/ и по рождестве паки пребываеши Дева.

Отпуст.

Источник: Митрополия.кз

Служба священномученику Кириллу (Смирнову), митрополиту Казанскому

Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

Месяца ноября в 7-й день

священномученика Кирилла, митрополита Казанскаго

На велицей вечерни

Блажен муж: 1-й антифон. На Господи, воззвах: стихиры, глас 8.

Подобен: О, преславнаго чудесе:

Приидите, вернии, почтим святителя Кирилла,/ благочестия твердаго поборника,/ светильника земли Русския,/ во стране пустынней днесь почившаго,/ иже, тяготу дел и горечь страданий отложив,/ на Небеси Присноживущему взывает:/ утверди, Господи, Церковь Русскую/ и низложи шатания врагов Ея,/ да людие, ходящии во тьме, видят свет велий.

Мир дольний ущедряя,/ Христос со Отцем и Духом Святым/ обитель творит во избранных Своих,/ ихже весь мир недостоин есть;/ темже избраннаго от мира воспоим,/ Кирилла, священномученика богоприятна,/ иже, сердце освятив страданием,/ тече на мучение за Церковь Христову,/ юже не возмогут врата адова одолети.

Иоанну, чудотворцу Кронштадтскому,/ иноков и пастырей наставнику,/ пение надгробное принесл еси,/ святителю Кирилле, кроткий послушниче,/ последи же, яко мученик истинный,/ Небеснаго чертога достигл еси/ и тамо отца духовнаго во славе узрел еси,/ веселящася с новыми мученики и глаголюща:/ се аз и дети, яже ми даде Бог.

Небесных граждан любителя/ прославляет тя ныне страна Тамбовская,/ в ней бо добре потрудился еси,/ святителю Кирилле, смиренный пастырю,/ и апостола ея, Питирима чуднаго,/ в лице святых прославил еси,/ Феофана же богомудраго почитая,/ тому духовне подражал еси,/ сего ради с ними купно ликуеши.

Ины стихиры, глас 6.

Подобен: Все отложше:

Отцы Собора Церкве Русския,/ Духом Святым водими,/ поставляют на престол первосвятительский/ смиреннаго Тихона, архипастыря добраго,/ не самовластием того облекающе,/ но знамение победы Божия являюще./ Темже лик новых мученик/ патриаршим именем украсися/ и в земли Русской возсия пресветло,/ от нихже и святитель Кирилл, митрополит Казанский,/ днесь нами прославляется,/ яко веры неусыпный страж/ и хранитель Дома Господня.

Светлое торжество града Казани приспе,/ с нимже вси гради земли нашея радуются/ и вся Церковь Русская красуется/ в памяти святителя Кирилла,/ архипастыря преизящнаго/ и мученика добропобедна,/ посту, молитве и богомыслию прилежащаго,/ кровию своею священную одежду обагрившаго/ и от страдания в Божественную славу пришедшаго,/ идеже со всеми святыми,/ предстоит Престолу Святыя Троицы/ и молится даровати душам нашим/ мир и велию милость.

Любодружное святое единство/ всеусердно возлюбив от юности,/ мужественне к страданию потекл еси,/ со други разлучаяся,/ обаче, ангельския крепости исполнен,/ изгнание, яко жительство безмолвное, вменил еси/ и тесное жилище, яко Горницу Сионскую,/ идеже, неустанно моляся/ и словом истины заблуждшия назидая,/ во единомыслие церковное многия привел еси/ и яко един от древних отцев просиял еси,/ величие веры являя,/ священномучениче Кирилле досточудне.

Кия страдания претерпел еси,/ киими добротами обогатился еси,/ кия венцы от Бога приял еси,/ священномучениче Кирилле терпеливодушне?/ Непостижно есть любящим тя:/ како, подобострастен нам быв человек,/ уз мирских до конца совлеклся еси/ жития ради крестнаго?/ Како, скорбьми отвсюду утесняемь,/ Именем Господним вся победил еси,/ призывая Его со дерзновением многим?/ И ныне помолися о нас, угодниче Христов,/ чтущих святую память твою.

Слава, глас тойже:

Слово Господне услышал еси,/ святителю отче Кирилле:/ Царство Мое несть от мира сего,/ темже, к стопам Владычним любовию устремився,/ яко бисер многоценный,/ учение Христово обрел еси,/ во уничижениих и скорбех земных сокровенное./ Ныне же, мучения багряницею украшенный,/ Престолу Божию во славе предстоиши/ и светом Небеснаго блаженства/ верныя люди озаряеши.

И ныне, Богородичен, глас тойже: Кто Тебе не ублажит, Пресвятая Дево:

Вход. Прокимен дне. И чтения 3 мученическая.

На литии стихира храма.

Слава, глас 2:

Не вы Мене избрасте, но Аз вы избрах,/ сие слово Господне на тебе исполнися,/ святителю Кирилле, отче наш,/ Создатель бо твой Господь украси тя даровании/ и Церкви Своей в час испытания яви яко истины поборника,/ в раи же светлости всели тя, подая веселие вечное,/ зане во странствии земнем Того возлюбил еси/ всем сердцем, еже очистити потщался еси,/ всею душею, юже за други твоя положил еси,/ всею мыслию, еюже Слову Божию прилежал еси./ Молися о нас, да со избранными сопричтени будем.

И ныне, Богородичен.

На стиховне стихиры, глас 5.

Подобен: Радуйся:

Радуйся, святителю Кирилле преславне,/ Вышняго Царствия наследниче/ и Небесному Владыце Господу/ в скорбех и гонениих подобниче:/ Сей бо, крова на земли не имея,/ поругание и смерть лютую прият безчестно,/ ты же зиму и зной пустыни терпел еси,/ таже пищи, сна лишение и со злодеи заточение,/ еще же во узах от града во град прехождение/ и от судей лукавых изречение,/ яко повинен есть смерти./ Темже, яко дар Небесный, восприим страдания,/ Христа приобрел еси,/ Подающаго миру велию милость.

Стих: Праведник яко финикс процветет,/ яко кедр, иже в Ливане, умножится.

Радуйся, святителю Кирилле всечестне,/ истины твердый исповедниче,/ ты бо, веры поругание видев,/ пред гонители со дерзновением рекл еси:/ сие, очима нашима зримое,/ скорбь есть Церкве, но не смерть Ея,/ воля Божия несть человек деяние,/ но попущение, к покаянию зовущее;/ обаче силен Бог простити грехи наша/ и Церкви Своей даровати житие мирно и безпечально./ Темже, ныне благоденствующи,/ паства Всероссийская взывает ти:/ испроси нам веру тверду и велию милость.

Стих: Насаждени в Дому Господни/ во дворех Бога нашего процветут.

Из глубины темничныя взывая,/ сице вещал есть святитель Кирилл пречудный:/ не от мира Церковь Православная,/ мир апостольски освящающая,/ но Тело Христово, Духом созидаемое,/ Царствие Божие, с Небесе сшедшее,/ и причастники Божественнаго естества нас творящее,/ Матерь, чада на служение братолюбное воздвизающая/ и ко спасению их наставляющая,/ и како сия земных ради благ от Небесныя славы отступит?/ Темже да неколеблема пребудет в служении Церковь Русская,/ Ейже молитвами новых мученик подает Христос/ благостояние и велию милость.

Слава, глас тойже:

О, чада светообразная церковная!/ Веселитеся днесь в памяти святителя честнаго,/ сей бо, во свете невечернем Богу предстоя, взывает:/ призри, Боже, с небесе на Землю Русскую,/ аще и попраша люди ея иногда труды/ и течения слез преподобных Твоих,/ но крове ради пролитыя новых мученик/ возстави землю сию и приведи воспевати:/ Светодавче Господи, слава Тебе.

И ныне, Богородичен, глас тойже: Храм и Дверь еси:

На благословении хлебов, тропарь святаго дважды, и Богородице, Дево: единожды.

Тропарь святаго, глас 3:

Велика в скорбех утешителя/ обрете тя Церковь Русская, святе Кирилле,/ ты бо, в годину гонения чашу страданий прием,/ жаждущия правды воедино собрал еси,/ яко орел небесный под криле птенцы своя,/ и вся научил еси/ веры доброму исповеданию./ Темже в лице новых мученик/ Престолу Божию предстоиши,/ моляся о чтущих любовию память твою.

Ин тропарь, глас 5:

Якоже солнце светозарное,/ возсия днесь память твоя, святителю Кирилле,/ лучами благодати озаряющи верных сердца/ к прославлению дивнаго во святых Своих Бога,/ даровавшаго тебе крепость во исповедании и терпение в скорбех./ Темже молим тя:/ не премолчи о нас ко Господу/ и избави от всякаго зла,/ Церковь Русскую от раздоров и нестроений сохрани,/ мир мирови испроси/ и душам нашим велию милость.

На утрени

На Бог Господь: тропарь священномученника дважды. Слава, и ныне, Богородичен.

По 1-м стихословии седален, глас 4:

Тайну велиих подвигов твоих, святителю, о сем познахом: яко от юности словеса евангельская, яко сребро разженно, прилежно в сердце слагая, вседушне Христа возлюбил еси. Темже и Церкви Православней чрез все житие усердне послужил еси и славы Небесныя сподобился еси.

Слава, и ныне, Богородичен:

Пристанище нам, обуреваемым, буди, Пресвятая Владычице, не имамы бо крепости и произволения тверда не стяжахом. Обаче уповаем молитвами Твоими пути спасительнаго не уклонитися и завет святителя Кирилла исполнити:/ аще кто хощет Горняго Иерусалима достигнути, всяку язву страстнаго сердца из корене мужески да исторгнет.

По 2-м стихословии седален, глас 2:

Егда время исповедания чадом Церкве Русския наста, тогда смерти никакоже устрашился еси, священномучениче добропобедне, залог Царствия Небеснаго в сердце имея. Темже и ныне смертию смерть Поправшаго во Царствии Небеснем духовне созерцаеши.

Слава, и ныне, Богородичен:

Воспоим, людие, помощь и заступление Девы Чистыя, поминающе отец наших, присно в бедах и напастех пред Нею с мольбою припадающих и зрак чудотворнаго Ея образа в сердце носящих.

Величание:

Величаем тя,/ священномучениче Кирилле,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси языцы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиелеи седален, глас 5:

Кий образ в сердце твоем зрел еси, святителю, от беззаконных убиваемь? Сына ли Божия, на Кресте висяща во тьме часа шестаго? Стефана ли, о убийцех молящася: не постави им, Отче, греха сего? Церковь ли Русскую, смутою терзаему? Обаче в руце Божии вся предал еси, взывая: спаси, Спасе, души верно покланяющихся Тебе.

Слава, и ныне, Богородичен:

Что Тя наречем, Богородице? Пристанище ли духовное, Рай сладости Небесныя или Ходатаицу жизни некончаемыя? Вся бо имущи, едина Непорочная и Добрая в женах, о нас молися Христу Богу спастися душам нашим.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Целомудрия от юности исполнен,/ страданьми горькими и молитвами слезными/ во глубину смиренномудрия снизшел еси/ и терпение твердое богоподражательное стяжал еси./ Темже и плод красный любве Христовы принесл еси,/ еюже воспламени сердца наша,/ святителю Кирилле, богомудре.

Канон, глас 1.

Песнь 1

Ирмос: Поим, вси людие,/ от горькия работы фараони Израиля Изменшему/ и во глубине морстей ногами немокрыми Наставльшему/ песнь победную,/ яко прославися.

Припадем, братие, ко Господу, промышление творящему о Церкви Своей Святей, Емуже новии мученицы и исповедницы Русстии воспевают непрестанно песнь победную, яко прославися.

Воспоим, братие, Церкве Русския украшение, святителя Кирилла богомудраго, от юности Христа возлюбившаго и чистотою жития Бога прославившаго.

Прославление святителя Питирима в Церкви Русстей трудами твоими свершися, преславне Кирилле, темже ныне купно с ним чадами ея прославляешися.

Богородичен: Дево Чистая, примирения Скиние, Небо Божие на земли и ко граду Небесному Лествице! Прозябением Твоим от неплодове мир возвеселися, темже молимся: подаждь благоплодие земли Русстей, уделу Твоему избранному.

Песнь 3

Ирмос: Утверди мене, Христе,/ на недвижимом камени заповедей Твоих/ и просвети мя светом лица Твоего:/ несть бо свят, паче Тебе,/ Человеколюбче.

Утвердил еси сердце твое, святе Кирилле, мирови умрети и, ангельским образом украсився, воззвал еси Христу: Твой есмь аз, спаси мя, Едине Человеколюбче.

В бдениих и пощениих страстьми обнищав, богатство дарований духовных приял еси. Темже и нас от страстей избави молитвами твоими, Кирилле многострадальне.

Одежду священную кровию украсив, блаженне Кирилле, в Церковь Небесную священно вшел еси, идеже, Святей Троице предстоя, взываеши: несть свят, паче Тебе, Человеколюбче.

Богородичен: Чудно Твое, Богоотроковице Марие, во храм Господень вхождение, Храм бо явилася еси Богу, темже и приведутся девы вслед Тебе: души взыскующих спасение.

Ин кондак, глас 3:

Столп и жертва Церкве Христовы быв,/ сию непоколебиму от искушений лукаваго премудро соблюл еси/ и, козни вражия твердым умом разорив,/ едину Церковь апостольскую проповедал еси,/ Кирилле богоблаженне,/ святителей Русских похвало,/ моли спастися душам нашим.

Седален, глас 2:

Сердце твое, святителю Кирилле, горе устремляемо, чисто приражений страстных показася, сего ради помышления световидная породи. Уста же твоя восприяша глагол Божий, яко меч духовный, во еже враги расточити и стадо Христово укрепити.

Слава, и ныне, Богородичен:

Светоносная Слова Палато, Ковчеже, позлащенный Духом, явилася еси, Пресвятая Дево. Темже молим Тя: вкупе со святыми сродники нашими Христу молися, от страстей очистити православно Богородицу исповедающих Тя.

Песнь 4

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом - познаешися,/ внегда приити времени - покажешися./ Слава силе Твоей, Господи.

Сердце сокрушенно и умиления исполнено имея, узким и скорбным путем неотступно шествовал еси, отче Кирилле. Темже и рова страстей избегл еси и яко град, на горе стояй, явился еси.

Святительства ризу светлу сохранил еси и овцы словесныя добре упасл еси, иже, чуждаго гласа не послушавше, тебе последоваша. К сим же и нас сопричти, поющих: слава Господу, дивному во святых Своих.

Молитвою усердною дух твой к Богу воскрилял еси, святителю, труды ко трудом на всяк день прилагая, да процветет, яко крин, Земля Русская. Юже и ныне соблюди от гордых супостат невоевану молитвами твоими.

Богородичен: Дверь Небесная явилася еси, Дево, вход отверзающи Архиерею Великому Христу, нас ради Небеса прошедшему. Темже глас ангельский Тебе взываем: радуйся, Благодатная, Господь с Тобою.

Песнь 5

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего Богоразумия/ православно поющих Тя.

Кто изъяснит красоту души твоея, блаженне Кирилле, и кто изследит еже ко грешным твое милосердие, о нихже и ныне неотступно молишися Христу: спаси и помилуй, Господи, православно поющих Тя.

Дадеся тебе благодать от Бога благолепно погребсти тело праведнаго Иоанна Кронштадтскаго, пастыря Всероссийскаго; с нимже ныне моли Христа, еже светом любве просветити нас, православно Его почитающих.

Слово Божие и писания отеческая предпочел еси мудрости века сего, святителю, сего ради, божественным отцам во всем последовав, ныне молишися Христу: светом любве Твоея, Господи, просвети православно поющих Троицу Единосущную.

Богородичен: Яко дождь на руно низшед, во утробу Девичу вселился еси, Христе, и паче солнца миру возсиял еси, Свете Разума, и яко Младенец на руку Девы Матере положился еси, Слове Божий. Ея же молитвами просвети сердца пощих Тя.

Песнь 6

Ирмос: Обыде нас последняя бездна,/ несть избавляяй,/ вменихомся, яко овцы заколения,/ спаси люди Твоя, Боже наш,/ Ты бо крепость немощствующих и исправление.

Егда бездна страдания обыде землю нашу, тогда со слезами молился еси, святителю, о безвинно убиенных и о спасении людей Российских, взывая: милостив буди нам, Боже, Ты бо крепость немощствующих и исправление.

Святаго Патриарха Тихона чадо послушное быв, волю того всеусердно исполнити потщался еси, сего ради непреткновенно и Царства Небеснаго достигл еси, идеже о спасении людей Российских молиши: милостив нам буди, Боже, Ты бо крепость наша и исправление.

Со апостолы и мученики, со святители и преподобными, яко верный ученик Христов, вселился еси, святе Кирилле. Сего ради и ныне призри от святаго жилища твоего на нас, спасение улучити чающих и вопиющих: спаси люди Твоя, Боже наш, Ты бо крепость немощствующих и исправление.

Богородичен: Егоже старец Симеон прият на руки своя, Того, Владычице Чистая, моли о нас, яко Сына Твоего, да милость обрящем егда приидет на облацех судити миру всему, Ты бо еси упование христианом, Богородице Дево.

Кондак, глас 5:

Лучезарною твоею благодатию нас просвети,/ поющих мужества твоего крепость,/ яже воителем тьмы бе неприступна,/ и молитвами твоими Церковь Русскую в единомыслии утверди/ и от бед отечество наше огради,/ святителю Кирилле, мучениче славный.

Икос:

Егда все житие твое Богу предал еси, тогда прият тя Господь, яко ковач железо, в руце Свои и в горниле страданий искуси тя. Сего ради даровася тебе сила и благодать, крепость и премудрость, и, яко свет, пред человеки дела твоя просветишася в похвалу Пресвятыя Троицы. И ныне молитвами твоими Церковь Русскую в единомыслии утверди и от бед отечество наше огради, святителю Кирилле, мучениче славный.

Песнь 7

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты, пояху/ и благословляху, глаголюще:/ благословен Бог отец наших.

Прежде Креста преобразися Господь пред ученики Своими. Ты же, отче, в светозарный день Преображения во узы заключен быв, отселе восхождение на крест начал еси, небоязненно глаголя: благословен Бог отец наших.

Во узилищи мрачнем пение победное Христу воспел еси, исповедниче славне: блажени изгнани правды ради. Темже умудри и нас во всяцей скорби Царю небесе и земли достойно воспевати: благословен Бог отец наших.

В темнице хладней Пасху поюще и Господа очима веры зряще, во узах сущии с тобою, святе Кирилле, дивляхуся благоговеинству служения твоего. Темже, на муки и смерть уготовани, Христу глаголаху: подавай нам истее Тебе причащатися в невечернем дни Царствия Твоего.

Богородичен: Осудися на Крест Судия живых и мертвых, безчестие претерпе Царь Славы, смерти вкуси Иже Даруяй мирови жизнь. Сего ради, уяснивше страшное сие смотрение, грехов оставление просим улучити нам молитвами Твоими, Дево Пречистая.

Песнь 8

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

Смиренномудраго Тихона патриарха сотаинник и Петра крепчайшаго сострадалец явился еси, отче Кирилле богоблаженне, и ныне с сими Небесныя славы наслаждаешися, Христа, мир от тли греховныя спасшаго, превознося во веки.

Веру непорочну сохраньше, исповедницы мнози прихождаху к тебе, Кирилле богомудре: Афанасий и Дамаскин, святителие славнии, Александр преподобный и друзии, да купно с тобою расточенныя люди Церкве Русския соберут, Христа превозносяще во веки.

Твое крестоносное в вере стояние единство Церкве Русския сохрани, имя бо твое, в молитвах по всей Руси купно возносимое, разделение соедини, сомнение умири и любовь умножи.

Богородичен: Радость Воскресения Сына Твоего первее прияла еси, Богомати, Той бо обетование даде учеником Своим: паки узрю вы и возрадуется сердце ваше. Молися, Госпоже, и нам Владычния радости сподобитися.

Песнь 9

Ирмос: Неизглаголанное Девы таинство:/ Небо бо Сия, и Престол Херувимский/ и светоносный чертог показася/ Христа Бога Вседержителя./ Сию благочестно яко Богородицу величаем.

Издетска Крещение водою и Духом приим, последи же кровию своею исполнил и совершил еси е, да в ризу белую за Слово Божие убиенных облечешися и новую песнь на земли живых Христу воспоеши.

Егда приспе час кончины твоея, страха мучителей безбожных не устрашился еси и равноангельное житие смертию мученическою запечатал еси. Сего ради со ангельскими лики ныне Христа созерцаеши.

Мзды своея не лишается, иже чашу воды ученику подаде. Сего ради рцы нам, отче святый, кую мзду Евдокия, печальница твоя, улучила есть, вся тяготы с тобою понесшая? Вемы бо, яко в лице мученик Христу предстоит.

Богородичен: К жизни присносущней на объятиих Сына Твоего возшедшая, Пречистая, матернима Твоима рукама в вечныя кровы о имени Его пострадавшия прияла еси. Темже и нас в час кончины нашея милостивно срящи.

Светилен, глас 6:

Пресветлым лицем и милостивным оком призри на чада твоя, благоговейно совершающая память твою, святителю, и Света Подателя моли спасти и просветити души наша.

Слава, и ныне, Богородичен:

Стена и покров буди нам, Владычице, да Тобою прейдем стену, юже суета житейская воздвиже. Не презри, Чистая, моления нашего, молитвенника бо на сие, Кирилла славнаго, Тебе предлагаем.

На хвалитех стихиры, глас 4.

Подобен: Дал еси знамение:

Служения иго Божественное/ и бремя еже о Христе страдания,/ радуяся, подъял еси,/ святителю Кирилле терпеливе,/ оттуду и дар приял еси,/ еже звездою путеводною Церкви быти/ и истину, яже есть Христос, явити./ Егоже и мы воспомянем глас:/ иго Мое благо и бремя Мое легко есть.

Радость воскресения возвещая/ и благодарение за вся Богу воздая,/ Безкровную Жертву в темнице приносил еси,/ святителю Кирилле священне,/ соузницы же твоя воспеваху пение Воскресшему Христу,/ неприступным светом блистающему/ и страждущим о Имени Его рекущему:/ радуйтеся и веселитеся,/ яко мзда ваша многа на Небесех.

Мудростию свыше осолен и со единомудрыми мирствуяй,/ святаго Патриарха преемник духовный был еси,/ святителю Кирилле всечестне./ С нимже имеяй един дух во двою телесу/ и еже о Церкви помышление едино,/ единства Ея и истины ради смерть приял еси,/ завет Пастыреначальника Христа исполнив:/ имейте соль в себе/ и мир имейте между собою.

Светлостию братолюбия увенчан и святому Патриарху последуя,/ смертию за Христа усовершился еси,/ святителю Кирилле всехвальне./ Петру же крепчайшему спострадав,/ о нем и о Церкви слезно молился еси,/ с нимже ныне на Небеси радуяся,/ поминай паству Всероссийскую, тебе поющую:/ больше сия любве никтоже имать,/ да кто душу положит за други своя.

Слава, глас 1:

Кто возможет священства высоту разумети:/ како перстен человек, служитель Божий бывает/ и Огнь Божественный в причащение верным подает,/ Таинство совершая, всех сокровищ вышшее,/ и милостивно обязует струпы людей согрешающих,/ в сердце нося предания апостольская и отеческая?/ Сего ради, святителю Кирилле, Церкве Русския похвало,/ испроси пастырем земли нашея, еже в правду облещися,/ людем же учению сих прилежно внимати,/ да будет едино стадо и един Пастырь Христос.

И ныне, Богородичен, глас тойже:

Успение Твое, Пречистая,/ апостольский лик песньми почти/ и ангелы крилы покрываху священное тело Твое;/ страдальцем же Христовым, от беззаконных тайно убиенным,/ в местех пустынных и непроходных/ никтоже от человек пение надгробное сотвори,/ обаче Ты Сама предстала еси, Владычице,/ со ангельскими доброгласными чинми./ И ныне вси концы земнии/ новых мучеников прославляют/ во храме Господни, во дворех Бога нашего.

Славословие великое. Ектении. И отпуст.

На Литургии

Блаженна от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28-39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106, (21, 12-19). Конец: В терпении вашем стяжите души ваша: Причастен: В память вечную будет праведник:

Молитва

О, пречудный святителю Кирилле, новых мученик и исповедник украшение, святаго Патриарха Тихона верный последователю и Церкве Русския великое светило! По имени твоему тако и житие твое бысть, ты бо в Дому Божии сладостию словес церковных воспитанный, в юных летех благодать священства приял еси и паству твою богоугодно жити поучал еси. Помози ныне пастырем Церкве нашея в сердцах своих дар любве Христовы возгревати, отроки настави, еже в кротости и смирении возрастати, и вся люди православныя научи силу благочестия благими делы стяжевати.

Ты, святителю Кирилле, правило монашескаго жития явился еси, архиереев похвала и градовом в вере утверждение. Сего ради споспешествуй иноком в дусе и истине ревностно подвизатися, архипастыри научи слово правды Христовой в мире сем непорочно хранити. Заступи страну нашу от нашествия иноплеменник, грады и веси ея от всяких бед сохрани, домы миром огради и вся чада ея заблуждшая на путь покаяния настави. Вемы воистинну и усты исповедуем, яко можеши испросити у Великодаровитаго Бога, елика хощеши, ты бо правды ради изгнание и заточение претерпети сподобился еси и посреде злостраданий и крайния нищеты богатство благодушия явил еси, ты и веру Православную пред сильными мира сего небоязненно исповедал еси. Вразуми нас, в добродетелех убогих, земному богатству сердца не прилагати и укрепи нас, немощных, в час испытания веру во Христа сохранити. И якоже во истине стоял еси, егда вознесошася до небес и низпадоша до бездн волны смут церковных, тако умудри и нас прилежно вере нашей поучатися и в разум истины восходити, избирающе правая, благая и полезная. Ты смерть за Христа приял еси, яко венец праведнаго жития твоего, тако направи и нас не прилеплятися славе и довольству века сего, но почести вышняго звания искати, да твоими отеческими молитвами возможем земное наше житие без порока прейти, христианскую кончину улучити и сподобитися в Царствии Небеснем купно с тобою прославляти Отца и Сына и Святаго Духа, Троицу Единосущную во веки веков. Аминь.

Служба священномученику Мисаилу, епископу Рязанскому

Текст утвержден Священным Синодом
Русской Православной Церкви
28 декабря 2017 года (журнал № 131)

Ме́сяца ию́ня в 10-й день
Свята́го священному́ченика Мисаи́ла, епи́скопа Ряза́нскаго

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 1:

Днесь, ве́рнии лю́дие, соше́дшеся,/ священному́ченика Мисаи́ла па́мять почти́м/ и пе́сньми духо́вными того́ восхва́лим,/ и́же, по́двигом жития́ своего́ путь спасе́ния нам указу́я,/ лю́тую тьму безбо́жия посрами́л еси́// и свети́льник пресве́тлый земли́ Ряза́нския показа́лся еси́.

От ю́ности усе́рдно Христу́ после́довав,/ доброде́телей све́тлостию украси́лся еси́,/ добропобе́дне о́тче Мисаи́ле,/ и, во́ли наста́вника твоего́ Патриа́рха Ни́кона повину́яся,/ архиере́й дре́вняго гра́да Ряза́ни был еси́,/ словеса́ же Ева́нгельскаго уче́ния неве́рным пропове́дуя,// ча́шу страда́ний, ра́дуяся, испи́л еси́.

Стрело́ю неми́лостивно ураня́емь,/ зе́млю на́шу кро́вию твое́ю освяти́л еси́/ и, вене́ц сла́вы от Христа́ прие́м,/ вся Небе́сная весе́лием испо́лнил еси́./ Те́мже, священному́чениче Мисаи́ле,/ Го́сподеви приле́жно моли́ся,/ да сохрани́т Оте́чество на́ше в ми́ре и благоде́нствии// и спасе́т ду́ши на́ша.

Сла́ва, глас 6:

Ра́дуются днесь лю́дие гра́да Ряза́ни,/ те́плаго моли́твенника име́юще,/ и благодаре́ние Го́споду возсыла́ют,/ пе́сньми духо́вными восхваля́юще/ ди́внаго уго́дника Бо́жия,// священному́ченика Мисаи́ла пресла́внаго.

И ны́не, Богоро́дичен.

Вход. Проки́мен дне. И чте́ния три священному́ченику.

На лити́и стихи́ра, глас 3:

Днесь наста́ свяще́нное твое́ торжество́,/ священному́чениче Мисаи́ле,/ в не́мже твори́м свяще́нную па́мять твою́/ и прославля́ем Христа́ Бо́га,/ в ве́ре тя укрепи́вшаго ко просвеще́нию язы́ков./ Моли́ся, свя́те, приле́жно о нас,// да и мы благода́тию Христо́вою просвети́мся.

Сла́ва, глас то́йже:

Кре́постию непобеди́мою препоя́сався,/ неве́дущих И́стины со дерзнове́нием просвеща́л еси́,/ святи́телю до́блий,/ не забу́ди и нас, сро́дников твои́х,// почита́ющих свяще́нную па́мять твою́.

И ны́не, Богоро́дичен:

Све́том Твои́м нас озари́,/ Всенепоро́чная Де́во,/ ро́ждшая Свет Непристу́пный,/ просвети́ ду́ши на́ша, Влады́чице,// спаси́ и поми́луй род наш.

На стихо́вне стихи́ры, глас 8:

А́нгелов собесе́дниче,/ священному́чениче Мисаи́ле,/ песносло́вие на́ше приими́,/ Христа́, Со́лнце Пра́вды незаходи́мо, име́я во уме́ и се́рдце,/ просвеща́юща тя Све́том Боже́ственным./ Те́мже к тебе́ усе́рдно ны́не прибега́ем,/ да твои́ми моли́твами// просвети́т Госпо́дь ду́ши на́ша.

Стих: Честна́ пред Го́сподем// смерть преподо́бных Его́.

Дерзнове́ние ко Го́споду име́я,/ благода́ть и ра́дость ве́рным да́руеши,/ вся́ку беду́ отъе́млеши/ и бу́рю душе́вную утиша́еши./ Те́мже, святи́телю Христо́в Мисаи́ле,// моли́твами твои́ми умири́ ду́ши на́ша.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Свети́льника тя, свя́тче Бо́жий, позна́хом,/ сия́юща де́лом и сло́вом,/ ревни́теля ве́ры и благоче́стия па́ствы твоея́,/ те́мже у́бо просвети́ сердца́ на́ша све́том богове́дения,// да тя при́сно ублажа́ем.

Сла́ва, глас 6:

Священному́чениче Мисаи́ле,/ ты, тече́ние жи́зни до́бре соверши́в,/ ве́ру пра́вую соблю́л еси́,/ сего́ ра́ди Христо́с Бог наш/ венча́ тя све́тлым венце́м/ и Небе́сное насле́дие дарова́.// Того́ моли́ спасти́ся душа́м на́шим.

И ны́не, Богоро́дичен.

Тропа́рь, глас 5:

Богому́дре о́тче Мисаи́ле,/ архиере́ев сла́во и си́рых защи́тниче,/ безбоя́зненный пропове́дниче уче́ния Боже́ственнаго,/ ты, в ве́ре пра́вей сердца́ притека́ющих к тебе́ утверди́в/ и свяще́нную оде́жду в кро́ви муче́ния омочи́в,/ я́ко му́ченик и па́стырь до́брый яви́лся еси́./ Моли́ся приле́жно Влады́це Христу́// о спасе́нии душ на́ших.

НА У́ТРЕНИ

По 1-м стихосло́вии седа́лен, глас 1:

Священному́чениче Мисаи́ле,/ притека́ющии к свято́му о́бразу твоему́/ и лобыза́ющии ма́нтию твою́, обагре́нную кро́вию,/ хва́лят тя, с любо́вию ублажа́юще./ Те́мже не преста́й моли́тися о нас ко Пресвя́тей Тро́ице,/ прося́ оставле́ния грехо́в и спасе́ния душа́м на́шим.

Сла́ва, и ны́не, Богоро́дичен:

Спаси́ ны, Пречи́стая,/ волну́ющихся страстьми́ жите́йскими,/ и окорми́ к ти́хому приста́нищу Твоему́, Богоблагода́тная.

По 2-м стихосло́вии седа́лен, глас 6:

Тя па́стыря до́браго и учи́теля изря́дна ве́мы,/ священному́чениче Мисаи́ле./ Ны́не, предстоя́ Престо́лу Влады́чню,/ моли́ся при́сно о всех нас.

Сла́ва, и ны́не, Богоро́дичен:

О Све́та прия́телище,/ Богора́дованная Влады́чице,/ святи́телем вои́стину утвержде́ние/ и преподо́бным похвало́!/ Спаси́ ны от бед и обстоя́ний,/ воспева́ющих Тя, Многопе́тую.

Велича́ние:

Велича́ем тя,/ священному́чениче Мисаи́ле,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный: Бог нам прибе́жище и си́ла:

По полиеле́и седа́лен, глас 8:

Во е́же Оте́честву на́шему в ми́ре и благоде́нствии пребыва́ти, моли́ся, священному́чениче Мисаи́ле,/ и приими́ на́ше благода́рное пе́ние,/ от усе́рдия ны́не тебе́ приноси́мое.

Сла́ва, и ны́не, Богоро́дичен:

Песносло́вяще, Чи́стая, из утро́бы Твоея́ вопло́щшагося,/ Тя славосло́вим, я́ко Бо́жию Ма́терь.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Благоче́стно пожи́в, я́ко святи́тель,/ па́ству Ряза́нскую зело́ возлюби́л еси́/ и, путь спасе́ния неве́дущим указу́я,/ до́брый па́стырь ста́ду твоему́ яви́лся еси́,/ вене́ц же му́ченический за Христа́ прие́м,/ кро́вию твое́ю зе́млю обагри́л еси́./ И ны́не предстоя́ Престо́лу Сла́вы,/ не забу́ди сро́дников твои́х// и моли́ся о душа́х на́ших.

Кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Лю́дие христоимени́тии земли́ Ряза́нския,/ спра́зднуйте с на́ми торжество́ церко́вное,/ па́мять священному́ченика Мисаи́ла соверша́юще,/ да его́ моли́твами в ве́ре правосла́вней утверди́мся.

Мисаи́ле чу́дне и архиере́ю сла́вне,/ ста́до Христо́во, я́ко па́стырь до́брый, упа́сл еси́, ду́шу свою́ за него́ полага́я,/ моли́ся приле́жно о душа́х на́ших.

Житие́м непоро́чным и благоче́стием твои́м возсия́л еси́, свя́те Мисаи́ле,/ и, ре́вностию по Бо́зе распаля́емь, поклоне́ние тва́ри упраздни́л еси́,/ моли́ся о чту́щих тя благоче́стно,/ да в любви́ Бо́жией пребу́дем.

Богоро́дичен: А́нгели лику́ют на Небеси́, ви́дяще о́браз Твой, Пречи́стая,/ принесе́нный из Му́рома во град Ряза́нь первосвяти́телем Васи́лием,/ и́же, пучи́ну ре́чную с ним безбе́дно преплы́в,/ благослове́ние па́стве Ряза́нстей дарова́л есть.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Прииди́те, лю́дие Ряза́нстии,/ па́стыря до́браго, ду́шу свою́ за лю́ди положи́вшаго, почти́м и с любо́вию ему́ возопии́м:/ святи́телю Мисаи́ле, предста́тельствуй о нас пред Бо́гом,/ во е́же спасти́ся нам.

Христа́, А́гнца Бо́жия, измла́да возлюби́в/ и всего́ себе́ в послуша́ние наста́внику твоему́ вручи́в,/ архипа́стырь добр гра́ду Ряза́ни показа́лся еси́, Мисаи́ле пресла́вне./ Помози́ и нам от си́лы в си́лу восходи́ти.

Му́дрость Бо́жию разуме́в,/ я́ко пра́веден Госпо́дь и пра́вды возлюби́,/ И́стине был еси́ служи́тель ве́рный,/ Мисаи́ле священному́чениче./ И ны́не о нас приле́жно моли́ся.

Богоро́дичен: О Пренепоро́чная Де́во, Ма́ти Творца́ вся́ческих,/ Спаси́теля ми́ра неизрече́нно ро́ждшая!/ Того́ моли́ спасти́ся душа́м на́шим.

Седа́лен, глас 4:

Огнь Боже́ственныя любве́ в се́рдце свое́м име́я/ и чистоту́ стяжа́в серде́чную, адама́нте ве́ры Христо́вы,/ научи́ нас ше́ствовати путе́м спасе́ния.

Сла́ва, и ны́не, Богоро́дичен:

Богора́дованная Влады́чице,/ ро́ждши Спа́са Христа́, Бо́жию Си́лу и Бо́жию Прему́дрость,/ спаси́ град сей и лю́ди, на Тя упова́ющия.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.

Христа́ да восхва́лим, ве́рнии,/ святи́теля ди́внаго яви́вшаго,/ моля́щася о душа́х на́ших.

Я́ко свети́ло небе́сное, Мисаи́ле чу́дне и архиере́ю сла́вне,/ кро́вию твое́ю свиде́тельство Сло́ва Бо́жия просия́./ Моли́ся приле́жно о нас.

Любо́вь к Бо́гу стяжа́в и Пастыренача́льнику Христу́ подража́я,/ па́стырь до́брый яви́лся еси́, святи́телю Мисаи́ле./ Моли́ся о нас, да любо́вию Ева́нгельскою обогати́мся.

Богоро́дичен: Изба́ви от бед к Тебе́ прибега́ющих, Ма́ти и Де́во Пречи́стая,/ Христа́ Бо́га ро́ждшая,/ моля́щи Того́ спасти́ ду́ши на́ша.

Песнь 5

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Лю́ди, не ве́дущия Го́спода, неле́ностно просвеща́л еси́, святи́телю,/ Отца́ и Сы́на и Ду́ха Свята́го,/ Еди́наго Бо́га в Трие́х Ли́цех, пропове́дуя.

Наста́вника тя и моли́твенника те́пла иму́ще, священному́чениче Мисаи́ле,/ мо́лимся ти усе́рдно:/ не забу́ди нас, сро́дников твои́х,/ избавля́я от наве́т вра́жиих и вся́кия печа́ли.

Благода́рное пе́ние, тебе́ приноси́мое, святи́телю Мисаи́ле, не пре́зри,/ но приими́ и ра́дости духо́вныя испо́лни сердца́ моли́твенник твои́х,/ Христа́ приле́жно о нас умоля́я.

Богоро́дичен: Ра́дуйся, Ра́досте на́ша,/ покры́й нас от вся́каго зла/ честны́м Твои́м покро́вом.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Ра́зум име́яй Бо́гом просвеще́нный,/ до́брый де́латель за́поведей Христо́вых яви́лся еси́, свя́те Мисаи́ле,/ и ду́шу твою́ Бо́гу прине́сл еси́,/ я́ко же́ртву чи́сту и непоро́чну.

Смире́нием се́рдца украси́вся,/ во оби́тели Небе́сныя вшел еси́, священному́чениче,/ иде́же нас помяни́, почита́ющих тя при́сно.

Любо́вь ко Христу́ Пастыренача́льнику запечатле́л еси́ кро́вию твое́ю/ и ду́шу, я́ко же́ртву чи́стую, Бо́гу прине́сл еси́,/ путь спасе́ния нам указу́я.

Богоро́дичен: Ма́ти Све́та яви́лася еси́, Влады́чице,/ Те́мже моли́м Тя, Богоневе́сто:/ озари́ ду́ши на́ша Све́том Сы́на Твоего́.

Конда́к, глас 5:

Весели́тся ра́достне Це́рковь Ру́сская,/ во обре́тении честны́х твои́х моще́й,/ священному́чениче Мисаи́ле,/ ты бо, заве́т Пастыренача́льника исполня́я/ и о лю́дех, не ве́дущих Го́спода, се́рдцем боле́знуя,/ ду́шу твою́ за па́ству положи́л еси́./ И нам простри́ ру́ку по́мощи хода́тайством твои́м// и упра́ви наш путь ко спасе́нию.

И́кос:

Ди́внаго уго́дника Бо́жия просла́вим,/ и́же, от ю́ности Христа́ возлюби́в,/ Тому́ рабо́тати пла́менне вожделе́/ и, путь ве́рным освяща́я,/ ра́ною сме́ртною уязви́ся./ Те́мже вси зове́м ему́:/ Ра́дуйся, во смире́нии Ду́хом Христо́вым обогати́выйся;/ ра́дуйся, во свиде́тельстве Сло́ва Бо́жия любо́вь Христо́ву яви́вый./ Ра́дуйся, в уране́нии твое́м не устраши́выйся;/ ра́дуйся, священному́чениче Мисаи́ле, помо́щниче наш,/ упра́ви наш путь ко спасе́нию.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Па́стырю до́брый, ду́шу свою́ за о́вцы положи́вый, священному́чениче Мисаи́ле,/ моли́твами твои́ми помози́ па́стырем ста́до Христо́во упасти́,/ да приведу́т его́ во оби́тели ве́чныя, во е́же зва́ти:/ благослове́н Бог оте́ц на́ших.

Не преста́й, святи́телю, моли́тися о сро́дницех твои́х,/ во е́же нам по за́поведем Госпо́дним ходи́ти, зову́ще:/ благослове́н Бог оте́ц на́ших.

Ре́вностию по Бо́зе распаля́емый, святи́телю Христо́в Мисаи́ле,/ па́ству свою́ поуча́л еси́,/ да оста́вят вси нече́стие и да пою́т:/ благослове́н Бог оте́ц на́ших.

Богоро́дичен: Всепе́тая Ма́ти,/ приими́ мольбы́ упова́ющих на Тя,/ да с Тобо́ю воспева́ем Го́спода во ве́ки.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Днесь пресве́тло озаря́емся, пречу́дный Мисаи́ле,/ творя́ще па́мять твою́ ве́рно, песнь отроко́в пою́ще:/ вся дела́, благослови́те, по́йте Го́спода.

Бо́дренным ума́ трезве́нием и те́плым ко Христу́ моле́нием, свя́те Мисаи́ле,/ ду́шу твою́ устроя́л еси́, непреста́нно поя́:/ вся дела́, благослови́те, по́йте Го́спода.

Огне́м духо́вным, су́щим в тебе́, блаже́нне Мисаи́ле,/ пла́мень грехо́вный в душа́х ве́рных в ро́су претворя́шеся./ Те́мже, ра́дуяся на Небесе́х со святи́телем Васи́лием, взыва́еши:/ вся дела́, благослови́те, по́йте Го́спода.

Богоро́дичен: Чи́стую сла́вно почти́м, Де́ву Богоро́дицу,/ я́ко свет сердца́м на́шим/ и покро́в всеси́льный от напа́стей вра́жиих.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Хва́лится тобо́ю, священному́чениче Мисаи́ле, град Ряза́нь,/ име́я тя моли́твенника и хода́тая пред Бо́гом,/ Его́же моли́ спасти́ся душа́м на́шим.

Предстоя́ у Престо́ла Царя́ Сла́вы, священному́чениче,/ проле́й те́плую моли́тву о нас ко Го́споду/ и испроси́ нам ве́лия ми́лости.

По́двиг твой, святи́телю, зерца́ло благ ве́чных яви́ся,/ я́ко ду́шу свою́ положи́л еси́ за дру́ги своя́,/ те́мже помози́ нам за́поведи Госпо́дня испо́лнити.

Богоро́дичен: Взыва́ем вси к Тебе́, Цари́це Небе́сней:/ Ма́ти Бо́жия,/ спаси́ род христиа́нский.

Свети́лен:

Сла́внаго священному́ченика Мисаи́ла пе́сньми восхва́лим,/ я́ко ду́шу свою́ за лю́ди положи́вшаго/ и све́том ве́ры Христо́вы их просвети́вшаго.

Сла́ва, и ны́не, Богоро́дичен:

Пресвята́я Влады́чице,/ просвети́ нас Све́том Сы́на Твоего́/ и спаси́ ду́ши на́ша.

На хвали́тех стихи́ры, глас 8:

Дерзнове́ния Боже́ственнаго испо́лнився, священному́чениче Мисаи́ле,/ Кресто́м Христо́вым вооружи́лся еси́/ и, пострада́в да́же до кро́ве,/ и́стину свята́го Ева́нгелия пропове́дал еси́,/ просвеща́я вся концы́// во спасе́ние душ на́ших.

Свя́тче Бо́жий Мисаи́ле,/ предстоя́ ны́не Престо́лу Госпо́дню,/ мир ми́ру моли́твами твои́ми испроси́// и душа́м на́шим ве́лию ми́лость.

Моли́ Христа́ Бо́га на́шего,/ священному́чениче Мисаи́ле,/ о всех нас, соверша́ющих па́мять твою́,/ ве́рою и любо́вию тя призыва́ющих,// да спасе́т ду́ши на́ша.

Сла́ва, глас то́йже:

Прииди́те, лю́дие па́ствы Ряза́нския,/ просла́вим в пе́снех и пе́ниих духо́вных/ священному́ченика Мисаи́ла,/ те́плаго к Бо́гу предста́теля// и моли́твенника о душа́х на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

НА ЛИТУРГИ́И

Блаже́нны от кано́на свята́го, песнь 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных. Апо́стол ко Евре́ем, зача́ло 334. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 67. Прича́стен: В па́мять ве́чную бу́дет пра́ведник:

Моли́тва

О, избра́нниче и уго́дниче Христо́в, священному́чениче Мисаи́ле, Це́ркве Ру́сския сто́лпе непоколеби́мый и сро́дников твои́х предста́телю и наста́вниче! Ты, от ю́ности Христа́ возлюби́в и Тому́ рабо́тати пла́менне вожделе́в, пропове́дал еси́ Ева́нгелие лю́дем, не ве́дущим и́стины, и, стрелы́ летя́щия не убоя́вся, да́же до кро́ве пострада́л еси́ и путь ве́рным освяти́л еси́. Ны́не у́бо при́зри на нас, умиле́нною душе́ю и сокруше́нным се́рдцем тя призыва́ющих, и утверди́ в ве́ре святе́й, научи́ нас всегда́ твори́ти во́лю Бо́жию и храни́ти за́поведи Госпо́дня. Бу́ди, о́тче, па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да предста́тельством твои́м ве́ра правосла́вная утвержда́ется во Оте́честве на́шем и непреста́нно сла́вится в нем и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.

Служба Собору Липецких святых

Текст утвержден Священным Синодом
Русской Православной Церкви
29 июля 2017 года (журнал № 65)

Ме́сяца сентября́ в 10-й день
Всех святы́х, в земли́ Ли́пецкой просия́вших

На ма́лей вече́рни

На Го́споди, воззва́х: стихи́ры святы́х, глас 1.

Подо́бен: Небе́сных чино́в:

Небеса́ ны́не ра́дуются/ и земля́ с челове́ки весели́тся,/ днесь бо земля́ Ли́пецкая/ соверша́ет торжество́ святы́х свои́х,/ и́хже моли́твами и предста́тельством Богоро́дицы// Це́рковь и страну́ на́шу в ми́ре соблюди́, Многоми́лостиве.

Небе́снии на́ши предста́телие,/ от дре́вних лет да́же и до ны́не просия́вшии,/ прииди́те, ста́ните посреде́ нас неви́димо,/ предначина́юще торжество́ и пе́ние,/ и ра́дости духо́вныя испо́лните// ваш пра́здник любо́вию соверша́ющих.

Небе́снаго Ца́рствия зве́зды пресве́тлыя,/ земна́го Оте́чества кре́пцыи засту́пницы,/ святи́и вси, в земли́ Ли́пецкой просия́вшии,/ и ны́не ча́да ва́ша собери́те к торжеству́,/ вас бо моли́твенники те́плы// ко Го́споду и Богоро́дице стяжа́хом.

Небе́сным чино́м подо́бницы/ и земноро́дным ко спасе́нию наста́вницы,/ собо́ре святы́х Ли́пецких,/ моли́те за ны, ве́рою к вам прибега́ющия,/ я́ко на вас упова́ние// по Бо́зе и Богоро́дице возложи́хом.

Сла́ва, и ны́не, пра́здника, глас то́йже:

Кто дово́льно по досто́инству пе́ти возмо́жет,/ от А́нны неизре́ченно младе́нствующую Де́ву?/ го́ры у́бо и хо́лми, сла́дость иска́пайте днесь,/ всех бо Жи́знь и Очище́ние млеко́м пита́ется,// Богоро́дица Чи́стая.

На стихо́вне стихи́ры священному́ченика Уа́ра, глас 7:

Презре́в вре́менная,/ святы́й священному́чениче Уа́ре,/ и на суди́щи му́жески испове́дав Христа́,/ вене́ц му́ченический от Него́ прия́л еси́/ и ны́не, име́я дерзнове́ние,/ Того́ моли́, я́ко Бо́га Всеси́льна,/ па́ству Ли́пецкую утверди́ти// и мир умири́ти.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Всехва́льне священному́чениче Уа́ре,/ ничто́же тя разлучи́ от любве́ Христо́вы:/ ни сро́дство, ни дру́жество, ни благ земны́х обеща́ние,/ ни заточе́ния и сме́рти преще́ние,/ я́ко бо сокро́вища му́ки вмени́в,/ Христу́ сораспя́лся еси́,// Того́ моли́ спасти́ ду́ши на́ша.

Стих: Честна́ пред Го́сподем// смерть преподо́бных Его́.

Священному́чениче Уа́ре богому́дре,/ а́нгеле Це́ркве Ли́пецкия,/ тя ни земля́ потаи́ла есть,/ ни зло́ба люде́й богопроти́вных сокры́ла есть,/ но отверзо́шася тебе́ ра́йския две́ри,/ и в со́нме новому́ченик Христу́ предсто́иши,/ моли́ за па́ству твою́,// ве́рою твоя́ страда́ния почита́ющую.

Сла́ва, новому́чеников, глас 2.

Подо́бен: Ки́ими похва́льными венцы́:

Ки́ими похва́льными венцы́/ увязе́м новому́ченики Христо́вы?/ разделе́нныя телесы́ и совоку́пленныя ду́хом,/ новозакла́нныя а́гнцы от земли́ Ру́сския:/ о́ви у́бо без ми́лости убие́ни бы́ша,/ о́ви же во изгна́ниих и темни́цах безве́стно умро́ша:/ сих бо вои́стину досто́йно безсме́ртныя сла́вы венцы́ венча́ет Христо́с Бог наш,// име́яй ве́лию ми́лость.

И ны́не, пра́здника, глас то́йже:

Днесь Всенепоро́чная Чи́стая произы́де от непло́дове,/ днесь вся́ческая ра́дуются в Тоя́ рождестве́./ Ада́м уз разреша́ется,/ и Е́ва кля́твы свободи́ся,/ Небе́сная вся веселя́тся,/ и мир челове́ком да́руется./ Мы же, славосло́вяще, вопие́м:/ сла́ва в Вы́шних Бо́гу, и на земли́ мир,// в челове́цех благоволе́ние.

Тропа́рь святы́х, пи́сан на вели́цей вече́рни.

Сла́ва, и ны́не, пра́здника.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8: пра́здника 3, и святы́х 5.

Стихи́ры святы́х, глас 1.

Подо́бен: О, ди́вное чу́до:

О, ди́вное чу́до!/ Собо́р святы́х в земли́ Ли́пецкой явля́ется днесь/ и моли́твенницы к Бо́гу те́плии святи́и сро́дницы нам быва́ют,/ весели́теся, гра́ди и ве́си земли́ на́шея,/ гра́жданы возрасти́вшия Небе́снаго Ца́рствия;/ возопии́м, ве́рнии, таковы́я иму́ще в беда́х засту́пники:/ собо́ре святы́х, ра́дуйся,/ предста́тельством бо ва́шим Госпо́дь подае́т лю́дем Свои́м// спасе́ние и ве́лию ми́лость.

О, ди́вное чу́до!/ В земли́, я́же дре́вле пуста́ и окра́инна бысть,/ иде́же неве́рных и разбо́йник шата́ния,/ иде́же непоко́рство и нра́вы же́стоки,/ та́мо ра́йская жизнь процвете́ от преподо́бных и святы́х Твои́х, Го́споди,/ ти́и бо ожесте́вшая людска́я сердца́ теплото́ю ве́ры оживи́ша,/ плодоно́сны сия́ соде́лаша/ и при́сно мо́лят Тя, Христе́,// пода́ти нам ве́лию ми́лость.

И́ны стихи́ры, глас 3:

Святи́телей Христо́вых Ти́хона и Уа́ра,/ Ли́пецкия земли́ украше́ния, днесь воспои́м:/ пе́рваго, я́ко основа́ние,/ ду́хом любве́ Христо́вы ча́да Це́ркве породи́вшаго,/ втора́го же, я́ко увенча́ние,/ во дни гоне́ний па́ству от раско́ла и собла́знов сохра́ньшаго,/ ти́и бо в со́нме святи́телей земли́ Ли́пецкия,/ мо́лят Христа́ Бо́га// Оте́честву своему́ в ми́ре спасти́ся.

А́нгельскаго жития́ возжеле́вше,/ преподо́бнии отцы́ и ма́тери на́ша,/ Иларио́не затво́рниче, Иоа́нне блаже́нне,/ ста́рицы Да́рие и Серафи́мо,/ и вси, в земли́ на́шей преподо́бно пожи́вшии,/ вы уте́шителие и наста́вницы лю́дем яви́стеся,/ неду́гов цели́телие, бесо́в прогони́телие// и моли́твенницы о душа́х на́ших.

Святы́х новому́чеников и испове́дников па́мять пра́зднующе,/ прииди́те, вси лю́дие, почти́м:/ архипа́стыри и па́стыри,/ мона́хи и мирски́я,/ му́жы и жены́ немощны́я,/ ти́и бо, руга́ния и ра́ны ни во что́же вмени́вше/ и по́двигом до́брым подвиза́вшеся,/ подо́бницы страсте́м Спа́са Христа́ яви́шася,// ны́не же мо́лятся о душа́х на́ших.

Сла́ва, глас 5.

Подо́бен: Ра́дуйся, Живоно́сный Кре́сте:

Ра́дуется днесь оби́тель Задо́нская,/ благослове́нием Богома́тере осене́нная,/ и свети́льником вели́ким Ти́хоном просла́вленная,/ с не́юже ликовству́ют и про́чия оби́тели земли́ Ли́пецкия,/ подви́жников и ста́рцев мно́жество возрасти́вшия./ Мы же, днесь слу́жбу соверша́юще/ и гробо́м святы́х оте́ц и ма́терей на́ших/ любе́зно покланя́ющеся, мо́лимся:/ упоко́й, Го́споди, послужи́вшия Тебе́ ве́рно/ и моли́твами их це́рквам благостоя́ние да́руй// и душа́м на́шим мир и ве́лию ми́лость.

И ны́не, пра́здника, глас 2:

Что шум пра́зднующих быва́ет?/ Иоаки́м и А́нна торжеству́ют та́йно,/ ра́дуйтеся с на́ми, глаго́люще, Ада́ме и Е́во, днесь:/ я́ко и́мже дре́вле преступле́нием затвори́ша рай,/ плод благосла́вен нам даде́ся,/ Богоотрокови́ца Мари́я,// отверза́ющи его́ всем вход.

Вход. Проки́мен дне. Чте́ния 3.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х./ Да позна́ете и ве́руете Ми/ и разуме́ете, я́ко Аз есмь,/ пре́жде Мене́ не бысть ин Бог, и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Иису́са, сы́на Сира́хова, чте́ние (глава́ 44, 1-14):

Восхва́лим у́бо му́жи сла́вны и отцы́ на́ша в бытии́./ Мно́гу сла́ву созда́ Госпо́дь в них вели́чием Свои́м от ве́ка./ Госпо́дствующе во ца́рствиих свои́х/ и му́жие, имени́ти си́лою, сове́тующе ра́зумом свои́м,/ провеща́вшии во проро́чествах,/ старе́йшины люди́й в сове́тех/ и в ра́зуме писа́ния люди́й./ Прему́драя словеса́ в наказа́нии их,/ и́щуще гла́са мусики́йска и пове́дающе по́вести во писа́ниих:/ му́жие бога́тии, обдарова́ни кре́постию,/ ми́рно живу́ще в жили́щих свои́х./ Вси си́и в ро́дех просла́влени бы́ша/ и во днех их похвала́./ Суть от них, и́же оста́виша и́мя, е́же пове́дати хвалы́:/ и суть, и́хже несть па́мяти, и погибо́ша, я́ко не су́щии,/ и бы́ша, я́ко не бы́вше, и ча́да их по них./ Но си́и му́жие ми́лостивии,/ и́хже пра́вды не забве́ны бы́ша:/ с се́менем их пребу́дет до́брое насле́дие,/ исча́дия их в заве́тех:/ оста́ся се́мя их, и ча́да их по них:/ до ве́ка пребу́дет се́мя их,/ и сла́ва их не потреби́тся:/ телеса́ их в ми́ре погребе́на бы́ша,/ а имена́ их живу́т в ро́ды./ Прему́дрость их пове́дят лю́дие,/ и похвалу́ их испове́сть Це́рковь.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие — сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки. / Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ра хра́ма, и новому́чеников, глас 6:

А́ще и разоре́ни бы́ша хра́ми/ и оби́тели и́ноческия от рук беззако́нных,/ и вси, хотя́щии благоче́стно жи́ти, гони́ми бы́ша,/ оба́че не оскуде́ земля́ Ру́сская испове́дники но́выми,/ и́же от всех преде́л ея́/ благоуха́ние по́двигов свои́х/ и кровь страда́ния Бо́гу принесо́ша./ И ны́не, просла́вльшему их Христу́ предстоя́ще,/ мо́лятся приле́жно о нас,// любо́вию соверша́ющих све́тлое их торжество́.

Сла́ва, глас то́йже:

Благослове́н еси́, Го́споди Бо́же оте́ц на́ших,/ спаса́яй упова́ющия на Тя,/ И ны́не не отста́ви ми́лости Твоея́ от нас,/ возлю́бленных Твои́х ра́ди,/ даждь сла́ву и́мени Твоему́, Го́споди,/ и да разуме́ют вси,/ я́ко Ты еси́ Госпо́дь Бог еди́н// и сла́вен по всей вселе́нней.

И ны́не, пра́здника, или́ Богоро́дичен, глас то́йже:

Благослове́нна еси́, Влады́чице,/ Держа́вная Засту́пнице ро́да на́шего,/ страда́льцев утвержде́ние и ве́рных похвало́./ И ны́не не отста́ви ми́лости Твоея́ от нас,/ спаса́ющи рабы́ Твоя́ от вся́ких лю́тых,/ да сла́вится свято́е и благослове́нное и́мя Твое́// по всей Ру́сстей земли́.

На стихо́вне стихи́ры святы́х, глас 2.

Подо́бен: До́ме Евфра́фов:

Земле́ Придонска́я,/ гра́де дре́вний Е́льче,/ не ктому́ нарече́шися непло́ды,/ се бо ве́лий сонм святы́х твои́х,// я́коже плод кра́сный, Спа́су прино́сится.

Стих: Го́споди Го́сподь наш,// я́ко чу́дно и́мя Твое́ по всей земли́.

Ди́вен Бог во святы́х Свои́х,/ в ко́емждо обновля́яй дарова́ния,/ и́миже Це́рковь украша́ется,/ и во всех Еди́н Сый,// прославля́емый во ве́ки.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Прииди́те, ве́рнии,/ просла́вим любо́вию/ избра́нныя от ро́да на́шего,/ предстоя́щия за ны Христу́// и Оте́чество от бед избавля́ющия.

Сла́ва, глас и подо́бен то́йже:

Свят еси́,/ О́тче, Сы́не и Ду́ше,/ во святы́х почива́яй/ и те́ми прославля́емый// челове́ком во спасе́ние.

И ны́не, пра́здника, глас и подо́бен то́йже:

Храм Бо́жий,/ Еди́на Богоро́дица,/ от непло́дове/ и неражда́ющия происхо́дит,// и ра́дуется Ада́м взыва́я.

Или́ и́на стихи́ра пра́здника, глас то́йже. Самогла́сен:

Пронарече́нная всех Цари́ца,/ Бо́жие оби́телище,/ от непло́дныя днесь утро́бы про́йде, А́нны сла́вныя,/ Присносу́щнаго Существа́ Боже́ственное пребыва́лище,/ Е́юже безсту́дный ад попра́ся,/ и всеро́дная Е́ва в тве́рдую жизнь вво́дится./ Той досто́йно возопии́м:// блаже́нна Ты в жена́х, и Плод чре́ва Твоего́ благослове́н.

Тропа́рь собо́ра святы́х, глас 4:

Днесь ра́дуется све́тло Ли́пецкая земля́,/ прославля́ющи святы́я своя́,/ ве́рно Го́сподеви послужи́вшия/ и Це́рковь Ру́сскую украси́вшия./ О преди́внии сро́дницы на́ши,/ святи́телие, преподо́бнии, новому́ченицы и испове́дницы,/ в по́двизех и страда́ниих Бо́гу угоди́вшии/ и о́браз благоче́стия в житии́ нам показа́вшии,/ Оте́чество на́ше соблюди́те в ми́ре и благоде́нствии/ и на пути́ земна́го стра́нствия на́шего/ те́плии засту́пницы и споспе́шницы бу́дите,/ посреде́ искуше́ний же и бед// к ве́чному Оте́честву нас приводя́щии.

А́ще изво́лит настоя́тель твори́ти бде́ние, на благослове́нии хле́бов тропа́рь собо́ра святы́х, два́жды, и тропа́рь пра́здника, еди́ножды. А́ще полиеле́й, тропа́рь святы́х, еди́ножды. Сла́ва, тропа́рь священному́ченика Уа́ра. И ны́не, пра́здника.

Тропа́рь священному́ченика Уа́ра, глас 4:

Правосла́вныя ве́ры ревни́телю,/ раско́лов искорени́телю и безбо́жия обличи́телю,/ моли́твою и трудо́м Творцу́ твоему́ да́же до кро́ве послужи́л еси́,/ пе́рвый святи́телю Ли́пецкий Уа́ре,// о нас Христу́ Бо́гу моли́ся.

На у́трени

На Бог Госпо́дь: тропа́рь пра́здника, еди́ножды, и собо́ра святы́х, еди́ножды. Сла́ва, священному́ченика Уа́ра. И ны́не, пра́зника.

По 1-м стихосло́вии седа́лен новому́чеников, глас 4:

Чу́до ве́лие яви́ся нам в после́дния дни, я́ко моли́твами но́вых му́чеников призре́ Госпо́дь на смире́ние на́ше и возвели́чи Це́рковь Ру́сскую, воспева́ющую Бо́га, ди́внаго во святы́х Свои́х.

Сла́ва, и ны́не, пра́здника, глас то́йже:

Иу́до, велича́йся, и да весели́тся Дави́д: Ада́ме, обнови́ся, и да крепи́тся Леви́й, от ни́хже мне роди́ся Христо́с. Дви́гни цевни́цу, песнопи́сче, и глаго́ли: кто есть роди́вшаяся, Ю́же нарица́еши Дщерь? Пита́тельница есть Жи́зни на́шея, Ма́ти Христа́ Бо́га.

По 2-м стихосло́вии седа́лен святы́х, глас 8:

Апо́столов пропове́данием и отце́в догма́ты, преподо́бных терпе́нием и кро́вию новому́ченик утверди́вшеся, ве́рнии, мо́лим Ти ся, Всеще́дрый Бо́же: Це́рковь Ру́сскую необори́му сохрани́ до сконча́ния ве́ка.

Сла́ва, и ны́не, пра́здника (зри ни́же пи́сан),

или́ Богоро́дичен Страстны́я ико́ны, глас 8:

Днесь велича́ет ра́достно Спаси́теля Ли́пецк град, я́ко свет со́лнечный восприе́м чудотво́рную Твою́ ико́ну, Влады́чице Богоро́дице, и с любо́вию сла́вит Тя, Ма́терь Бо́жию,/ и ми́лости и цельбы́ Твоя́, на нас излия́нныя, я́ко повеле́ла еси́ обнести́ о́браз Твой чудотво́рный о́крест гра́да Ли́пецка, да очи́стится святы́нею Твое́ю возду́х от я́зи смертоно́сныя, и да возблагодаря́т вси лю́дие неизрече́нную любо́вь Святы́я и Неразде́льныя и Живонача́льныя Тро́ицы.

Или́ пра́здника, глас то́йже:

Обнови́ся, Ада́ме, ра́дуйся, Е́во, весели́ся, Дави́де, благоду́шствуй, А́нно, и́бо Ма́ти Зижди́теля твоего́ ражда́ется пресла́вно; лику́ет, обно́вльшися, вся земля́ и ра́дуется, оде́яна во оде́жду; всяк язы́к, лику́я, да вопие́т ны́не Мари́и: блаже́н дом Дави́дов, я́ко пита́ет Пита́тельницу Жи́зни на́шея.

Велича́ние:

Велича́ем вас,/ вси святи́и, в земли́ Ли́пецкой просия́вшии,/ гра́ды и ве́си на́ша доброде́тельми ва́шими озари́вшии// и о́браз спасе́ния нам светоявле́нно показа́вшии.

И́но велича́ние:

Велича́ем вас,/ вси святи́и, в земли́ Ли́пецкой просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние.

Возвеселя́тся вси упова́ющии на Тя, во век возра́дуются, и всели́шися в них.

И похва́лятся о Тебе́ лю́бящии и́мя Твое́.

Сей род и́щущих Го́спода, и́щущих лице́ Бо́га Иа́ковля.

Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их.

Изочту́ их, и па́че песка́ умно́жатся.

По полиеле́и седа́лен новому́чеников, глас 4:

Ева́нгельскаго се́яния плод стори́чный яви́шася му́ченицы, от преде́л земли́ на́шея в жи́тницу Небе́сную со́браннии, тех моли́твами в ми́ре глубо́це Це́рковь и страну́ на́шу Богоро́дицею соблюди́, Многоми́лостиве.

Сла́ва, и ны́не, пра́здника,

или́ Богоро́дичен Еле́цкия ико́ны, глас 4:

Днесь све́тло красу́ется дре́вний град Еле́ц, помина́я сла́вное чу́до Пресвяты́я Богоро́дицы: егда́ бо на сто́гнах первопресто́льныя Москвы́ ико́ну Ея́ чу́дную лю́дие моско́встии срета́ху, тогда́ Сама́ Влады́чица, на горе́ Аргама́чстей во гра́де Ельце́, на сре́тение нечести́вому Тамерла́ну изше́дши, гро́зное его́ наше́ствие вспять обрати́. Сего́ ди́внаго явле́ния изображе́ние на новопи́санней ико́не зря́ще и Засту́пницу на́шу за вся благодея́ния благодаря́ще, уми́льно Ей взыва́ем: не оста́ви нас, Ма́ти Бо́жия.

Степе́нна, 1-й антифо́н 4-го гла́са. Проки́мен, глас 4: Ра́дуйтеся, пра́веднии, о Го́споде,// пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя. Вся́кое дыха́ние: Ева́нгелие от Матфе́я, зача́ло 10.

По 50-м псалме́ стихи́ра, глас 6:

(Творе́ние святи́теля Афана́сия Ковро́вскаго)

Ежеле́тнюю па́мять днесь/ святы́х сро́дников на́ших соверша́юще,/ досто́йно сия́ да ублажи́м./ Ти́и вои́стину вся блаже́нства Госпо́дня проидо́ша:/ обнища́вше бо ду́хом, обогати́шася/ и, кро́тцы бы́вше, зе́млю кро́тких насле́доваша;/ пла́кавше, уте́шишася;/ алка́вше пра́вды, насы́тишася;/ ми́ловавше, поми́ловани бы́ша;/ чи́сти бы́вше се́рдцем, Бо́га я́коже мо́щно узре́ша;/ миротвори́вше, Боже́ственнаго сподо́бишася сыноположе́ния;/ гони́ми же и му́чими пра́вды ра́ди и благоче́стия бы́вше,/ на Небесе́х ны́не веселя́тся и ра́дуются,/ и приле́жно мо́лятся Го́сподеви// поми́ловатися Оте́честву на́шему.

Кано́н пра́здника на 6, и святы́х на 8, глас 8.

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́, я́ко Изба́вителю на́шему Бо́гу,// я́ко просла́вися.

Припе́в: Вси святи́и земли́ Ли́пецкия, моли́те Бо́га о нас.

Прииди́те, ве́рнии, согла́сно возвели́чим собо́р святы́х, от дре́вних родо́в и доны́не в земли́ на́шей Бо́гу послужи́вших и при́сно со А́нгелы Того́ воспева́ющих: я́ко просла́вися.

Васи́лия, пе́рваго архипа́стыря Ряза́нскаго, по вода́м ди́вно прише́дшаго, Ио́ну, Феодори́та и Мисаи́ла, от язы́к убие́ннаго, Филаре́та же, Гаврии́ла и Меле́тия, по́слежде в Ряза́ни епи́скопствовавшия, я́ко святи́тели земли́ на́шея днесь ублажи́м.

Святи́телю о́тче Алекси́е, Моско́вский чудотво́рче, Руси́ Правосла́вныя свети́льниче, град Еле́ц благослове́нием твои́м утверди́вый, ны́не и нас от бед, скорбе́й и боле́зней сохрани́.

Митрофа́не, архипа́стырю гра́да Воро́нежа, па́стве твое́й, царю́ и Оте́честву трудолю́бно служа́, преще́ния госуда́рева не убоя́лся еси́ и и́долы упраздни́л еси́, Еди́ному Бо́гу поя́: я́ко просла́вися.

Питири́ме, а́нгеле Це́ркве Тамбо́вския и ди́вный святи́телю, ни́вы Христо́вы де́лателю, язы́ческих обы́чаев и раско́ла искорени́телю, ны́не тя почита́ющим благослове́ние и мир подава́й.

Богоро́дичен: Прииди́те, собери́теся, правосла́внии лю́дие, в пречестны́й храм Всенепоро́чныя Влады́чицы и возопи́йте, уми́льно моля́щеся, к честно́му Ея́ о́бразу взира́юще: Богоро́дице Безневе́стная, восхваля́ющия Тя спаса́й.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.

Ти́хоне, свети́льниче Воро́нежский, Еле́цкий и Задо́нский, па́стырем наста́вник, си́рым и убо́гим оте́ц яви́лся еси́, кро́тостию а́нгельскою и моли́твою чистоту́ стяжа́в, уте́шитель и моли́твенник был еси́ к тебе́ притека́ющим.

Святи́телю Анто́ние, любому́дрия и смире́ния о́бразе, в пеще́ры Ки́евския, я́ко во учи́лище духо́вное, от ми́ра прите́к, та́мо небе́сныя жи́зни навы́кл еси́, на ка́федру же земли́ Воро́нежския возведе́н, мо́щи святи́теля Митрофа́на обрести́ сподо́бился еси́. С ни́мже вку́пе тя прославля́ем.

Святи́тели прему́дрыя Инноке́нтия Херсо́нскаго, златоу́ста Це́ркве Ру́сския, и Феофа́на, затво́рника Вы́шинскаго, благоче́стия учи́тели и чистоты́, я́ко цве́ты благоуха́нныя земли́ на́шея Бо́гу в моли́тву прино́сим.

Прииди́те, лю́дие, преподо́бныя отцы́ и ма́тери на́ша восхва́лим, и́же, а́нгельски во пло́ти пожи́вше и моли́твами свои́ми Небеса́ к земли́ приклони́вше, ны́не предста́тельствуют пред Бо́гом о спасе́нии душ на́ших.

Иларио́на преподо́бнаго воспои́м, стра́нника на земли́ и прише́льца, в де́брех и верте́пех скита́вшагося, последи́ же в затво́ре, в поще́нии и слеза́х по вся дни Бо́гу предстоя́вшаго и ны́не све́том дарова́ний духо́вных нас озаря́ющаго.

Богоро́дичен: Всечестну́ю и чудотво́рную ико́ну Влади́мирскую, я́ко заступле́ние кре́пко и сте́ну неруши́му, ру́сстии лю́дие стяжа́хом, те́мже и мо́лим Ти ся, Присноде́во, побе́ду на враги́ Оте́честву на́шему дарова́ти.

Конда́к и и́кос пра́здника.

Седа́лен святы́х, глас 4:

И́же доброде́телей подви́жницы, от Ли́пецкия земли́ возсия́вше, я́ко и́стиннии во́ини Христа́ Бо́га, во вся́ком чи́не и вся́ким по́двигом Тому́ угоди́вше, Ду́ха Свята́го сосу́ди честни́и яви́стеся, Его́же де́йствием све́тло укра́шени, ве́рныя ко спасе́нию наставля́ете, но, я́ко иму́ще дерзнове́ние ко Святе́й Тро́ице, помина́йте земно́е Оте́чество ва́ше и не забу́дите посеща́ти ча́да своя́, ве́рою и любо́вию вас почита́ющая.

Сла́ва, и ны́не, пра́здника:

От ко́рене Иессе́ева, и от чресл Дави́довых, Богоотрокови́ца Мариа́м, ражда́ется днесь нам: ра́достию бо ра́дуются вся́ческая и обновля́ются. Сра́дуйтеся ку́пно, не́бо и земля́; восхвали́те Ю́, оте́чествия язы́к. Иоаки́м весели́тся, и А́нна торжеству́ет, зову́щи: непло́ды ражда́ет Богоро́дицу, и пита́тельницу Жи́зни на́шея.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог.// Сла́ва си́ле Твое́й, сла́ва снизхожде́нию Твоему.

Ли́пецкия земли́ украше́ние, ста́рче Амвро́сие, Иларио́ном затво́рником благослове́нный, и преподо́бне Некта́рие, от гра́да Ельца́ во оби́тель О́птину благода́тию при́званный, Оте́чества ва́шего не забу́дите.

Иоа́нна Сезе́новскаго блаже́ннаго, нра́вом младе́нствовавша, умо́м же му́жа соверше́нна ве́дуще, Христо́ви де́вство свое́ сохра́ньша и Тому́ сораспя́вшася во́лею, со Иларио́ном Троеку́ровским и подви́жники Задо́нскими и Еле́цкими, ве́рнии, вси похва́лим.

Да возра́дуется ны́не Шо́вская весь, моли́твами Иоа́нна блаже́ннаго добропло́дна я́вльшися, из тоя́ бо изы́де Силуа́н, ди́вный подви́жник горы́ Афо́нския, и́же, плач Ада́мов в се́рдце свое́ восприе́м, о спасе́нии ми́ра при́сно моля́шеся.

Послуша́ния та́йну позна́вши, Да́рие преподо́бная, от у́тра жития́ твоего́ да́же до ве́чера де́лания сего́ не оста́вила еси́, те́мже с наста́вником твои́м Иоа́нном тя ублажа́ем.

Пе́рвую игу́мению Сезе́новскую Серафи́му почти́м, и́нокиням му́друю наста́вницу, к лю́дем Бо́жиим в любви́ не оскудева́ющую.

Богоро́дичен: Дави́д пред киво́том ликовству́ет, леви́ти же благогове́йно слу́жат, мы же Тя, Богороди́тельнице Чи́стая, усе́рдно мо́лим, гла́сы моле́бными приле́жно вопию́ще: ра́дуйся, Засту́пнице гра́да на́шего.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// И́мя Твое́ имену́ем.

Егда́ пре́дал еси́ нас, Влады́ко, в ру́ки враго́в беззако́нных и ме́рзких отсту́пников, смире́ни бы́хом по всей земли́ грех ра́ди на́ших, тогда́ ве́рнии сы́ны и дще́ри Ру́сстии всех Соде́теля и Спа́са Тя испове́даху и кровь свою́ непоро́чно Тебе́ принесо́ша во всесожже́ние и же́ртву прия́тну.

Иоа́нна Царскосе́льскаго, я́ко нача́ток новому́чеников Це́ркве Ру́сския, земля́ Данко́вская прино́сит Ти, Го́споди, свое́ порожде́ние. Того́ моли́твами злове́рие и собла́зны от нас отжени́.

Воро́нежския и Задо́нския земли́ первому́ченик яви́лся еси́, Ти́хоне свяще́нне, по соверше́нии бо Безкро́вныя Же́ртвы сам, я́ко а́гнец, пожре́н был еси́ и, от слуг сатани́нских на Ца́рских врате́х хра́ма обе́шен, во врата́ Ца́рствия Небе́снаго невозбра́нно вшел еси́.

Петра́ священному́ченика, ка́меня ве́ры и чистоты́ сокро́вище, уста́вов же церко́вных блюсти́теля до́бляго днесь воспои́м, во у́зах Солове́цких па́ствы своея́ любо́вию не оста́вивша и ны́не во святы́х моще́х па́ки к нам возврати́вшася.

Заха́рие сла́вный, по святи́тели Петре́ епи́скопский жезл и терно́вый вене́ц прие́мый, от мо́ря Бе́лаго до пусты́нь Казахста́нских му́ченическими стопа́ми проше́л еси́, та́мо и смерть вкуси́л еси́. Ны́не па́ки нас собира́еши, глаго́ля: да бу́дем вси еди́ни о Го́споде, в сем бо спасе́ние на́ше.

Богоро́дичен: Ны́не у́бо приступи́те с весе́лием, богоизбра́нное ста́до, ру́сстии собо́ри, ко Пречи́стей Бо́жией Ма́тери и честны́й Ея́ о́браз любе́зно приими́те, се бо Исто́чник Неисчерпа́емый, боже́ственныя во́ды неоску́дно точа́щий, Ю́же, ве́рнии, пое́м и велича́ем.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:// возведи́ от тли живо́т мой, Благоутро́бне Го́споди.

Пе́рвый святи́телю Ли́пецкий Уа́ре, па́ствы своея́ утвержде́ние, столпа́ души́ твоея́ ничто́же поколеба́ти возмо́же, в любви́ бо Спа́са Христа́ утвержде́н быв, Того́ да́же до сме́рти не отре́клся еси́.

Святи́телю Се́ргие, гра́ду Ельцу́ украше́ние, у́зы Караганди́нския любве́ твоея́ не связа́ша, та́мо бо па́ству твою́ и убие́нныя за Христа́ моли́твенно помина́ше, за сие́ и на смерть осужде́н был еси́.

Священному́чениче Кири́лле, Це́ркве Ру́сския сла́во, Патриа́рха Ти́хона ве́рный сподви́жниче, ты, в стране́ Тамбо́встей Христу́ послужи́в, святи́теля ея́ Питири́ма чу́днаго в ли́це святы́х просла́вил еси́. С ни́мже тя ны́не благогове́йно почита́ем.

Святи́теля Дими́трия, па́ству Тамбо́вскую от лжеуче́ний но́вых сохра́ньшаго и за Христа́ смерть претерпе́вшаго, со Амвро́сием преподобному́чеником и ины́ми страда́льцы днесь ублажи́м.

Мака́рие священному́чениче, убива́ющих тя благослови́вый, Серафи́ме, лжепа́стырей обличи́телю, Нико́лае, кро́ткий испове́дниче и чудотво́рче, Еле́цкую зе́млю окормля́вшии, омофо́ром моли́тв ва́ших нас покрыва́йте.

Богоро́дичен: Се ны́не весе́лие приближа́ется и скорбь потребля́ется, ве́рнии же спаса́ются и, я́ко от исто́чника, ра́дость почерпа́юще, уми́льно воспева́ют: ра́дуйся, Чи́стая Влады́чице, спасе́ния на́шего Глави́зно.

Конда́к, глас 3:

Ны́не Це́рковь Ру́сская/ прославля́ет собо́р святы́х земли́ Ли́пецкия,/ Престо́лу Пресвяты́я Тро́ицы предстоя́щих/ и о спасе́нии на́шем при́сно хода́тайствующих,/ и́мже и мы благода́рственная пе́ния прино́сим и согла́сно вопие́м:/ ра́дуйтеся, преди́внии чудотво́рцы// и те́плии о нас пред Бо́гом моли́твенницы.

И́кос:

Егда́ разделя́ше Вы́шний язы́ки и разсе́я сы́ны Ада́мовы, тогда́ поста́ви преде́лы язы́ков и вся́кому ме́сту, гра́ду и стране́ А́нгелы Храни́тели дарова́. Той же, я́ко Промысли́тель и Всеблаги́й Бог, Ду́хом любве́ Своея́ созида́яй Це́рковь Ру́сскую, моли́тву святы́х сро́дников на́ших о земне́м Оте́честве ны́не прие́млет и нас со А́нгельскими си́лами собира́ет в торжестве́ их согла́сно пе́ти: ра́дуйтеся, преди́внии чудотво́рцы и те́плии о нас пред Бо́гом моли́твенницы.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:// благослове́н еси́, Бо́же оте́ц на́ших.

О любе́зная чето́, еди́н дух во двою́ телесу́ иму́щая, священному́чениче Ти́хоне и Хиони́е испове́днице, за Христа́ пострада́вшии, о́браз честна́го супру́жества нам яви́ли есте́.

Се́ргие правдолюби́ве, испове́дниче Христо́в, во у́зах Солове́цких мно́гая страда́ния претерпе́вый, по́слежде град Лебедя́нь служе́нием твои́м освяти́вый, помина́й любо́вию чту́щия тя.

О, мно́гаго долготерпе́ния твоего́, священному́чениче Михаи́ле! Егда́ бо су́щий с тобо́ю в заточе́нии разбо́йник му́чаше тя и власы́ главы́ твоея́ исто́рже, ты сего́, кро́тостию твое́ю к покая́нию обрати́в, ева́нгельски прости́л еси́ и от ка́зни изба́вил еси́.

Алекса́ндре, па́стырю ве́рный, со диа́коном Михаи́лом, Ли́пецкия земли́ прозябе́ние! Вы, во у́зах Караганди́нских та́йно моли́твы твори́вше, за сие́ и убие́ние прия́сте. Ны́не же, я́ко а́гнцы новозакла́ннии, Христу́ принесо́стеся.

Уче́нии и де́лы Христа́ пропове́давше, па́стырие свяще́ннии Алекса́ндре, Се́ргие, Михаи́ле, Алекса́ндре, Васи́лие, Исма́иле, Михаи́ле, Иоа́нне, Нико́лае и ини́и, и́хже имена́ Бо́гу ве́дома, да́же до сме́рти Спа́су после́довасте и зе́млю на́шу кро́вию свое́ю обагри́сте.

Богоро́дичен: Приими́ мольбы́ раб Твои́х, Пречи́стая Де́во Богоро́дице, и бу́рю лю́тых страсте́й моли́твами Твои́ми утиши́ и сове́ты враго́в проти́вных разжени́, напа́дающих на ста́до Твое́, Всенепоро́чная Влады́чице.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки.

Преподо́бне Гео́ргие испове́дниче, от земли́ Еле́цкия я́ко оре́л возлете́вый, под кро́вом ста́рцев О́птинских воспита́нный, и благода́ть ста́рчества от них восприе́мый, нас, чад твои́х, крила́ми любве́ и моли́тв покры́й.

Преподобному́чениче Васи́лие, Покро́вскаго монастыря́, и́же в Данко́ве, священноархимандри́те, моли́твами твои́ми укрепи́ благоче́стно подвиза́ющихся во оби́телех святы́х.

Преподобному́чениче Пантелеи́моне, дре́внему цели́телю и врачу́ тезоимени́те, со ста́рцы О́птинскими моли́ Многоми́лостиваго Бо́га от страсте́й и неду́гов нам исцели́тися.

Под кро́вом святы́я оби́тели Задо́нския обе́ты мона́шеския прине́с, Фео́доре любоче́стне, сия́ до конца́ соблю́л еси́, изгна́ние же, заточе́ние и смерть претерпе́в, ны́не у Престо́ла Бо́жия моли́твы о нас непреста́нно возно́сиши.

Му́ченицы святы́я А́нну и Евфроси́нию, в земли́ Лебедя́нстей до́мы и ча́да ма́лая Христа́ ра́ди оста́вльшия, вку́пе с му́ченицами Ната́лиею, Алекса́ндрою и Ната́лиею, на страда́ния и смерть себе́ угото́вльшия, с ни́ми же и Ната́лию преподобному́ченицу от гра́да Ельца́, я́ко неве́сты Христо́вы сла́вныя днесь ублажи́м.

Богоро́дичен: Ка́ко Тя, Де́во, по достоя́нию воспои́м, По́мощь тве́рдую, Храни́тельницу жи́зни на́шея и Хода́таицу непрело́жну к Сы́ну Твоему́ и Бо́гу на́шему. Его́же воспева́ем и превозно́сим во ве́ки.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я,// непреста́нно велича́ем.

Любо́вию Христо́вою па́ству свою́ объе́млюще, святи́телие богому́дрии, Ду́ха еле́й в сосу́дех се́рдца стяжа́ли есте́, оби́тельми же и хра́мы зе́млю на́шу украси́вше, плод духо́вный в ней возрасти́ли есте́. Те́мже любо́вию вас велича́ем.

Пло́ти, ми́ру и диа́волу не порабо́тавше, преподо́бнии, любо́вию к Бо́гу распя́ли есте́ плоть со страстьми́ и похотьми́ и, чи́сте Чи́стому предстоя́ще, при́сно мо́лите о спасе́нии на́шем.

Ми́ру, горды́нею одержи́мому, посмея́вшеся, блаже́ннии Христа́ ра́ди юро́дивии, и му́дрость ве́ка сего́ презре́вше, та́йны ве́ка гряду́щаго от Бо́га позна́сте и на неви́димыя враги́ си́лу прия́сте. Огражда́йте нас при́сно моли́твами ва́шими.

Зло́бы богопроти́вныя не убоя́вшеся, новому́ченицы и испове́дницы сла́внии, страда́нием и сме́ртию воскре́сшаго Христа́ пропове́дасте, любо́вию побе́ду прие́мше, и нас люби́ти враги́ своя́ научи́те.

Песнь благода́рную от нас приими́те, Сио́на Го́рняго гра́ждане, зе́млю на́шу имены́ и по́двиги ва́шими, я́ко Не́бо соде́лавшии, любо́вию к Бо́гу и бли́жним согре́йте хла́дная сердца́ на́ша и ко спасе́нию напра́вите моли́твами ва́шими.

Богоро́дичен: Ра́дости Хода́таице, да́руй нам ра́зум, е́же вопи́ти Тебе́, Богоро́дице Чи́стая: ра́дуйся, Храни́тельнице на́ша, держа́во и огражде́ние, и спаси́тельное прибе́жище.

Свети́лен святы́х:

Я́ко благоуха́нныя цве́ты ра́йския,/ вся святы́я, в земли́ Ли́пецкой ди́вно прозя́бшия/ и Це́рковь Ру́сскую изря́дно украси́вшия, днесь почти́м/ и Бо́га, просла́вльшаго их, велегла́сно просла́вим.

Сла́ва, свети́лен священному́ченику Уа́ру.

Подо́бен: Черто́г Твой:

Черто́г Твой ви́дев, Спа́се, украше́нный,/ священному́ченик Уа́р му́жественне подвиза́ся/ и, ри́зою святи́тельства облече́н,/ кро́вию муче́ния украси́ся./ Того́ моли́твами, Христе́, просвети́ и спаси́ ны.

Сла́ва, и ны́не, пра́здника: От непло́дныя днесь А́нны цвет произы́де Богоро́дица:

На хвали́тех стихи́ры на 6: пра́здника 3 и святых 3.

Стихи́ры святы́х, глас 4.

Подо́бен: Дал еси́ зна́мение:

Избра́ннии от Бо́га святи́и сро́дницы на́ши,/ в ми́ре пожи́вшии,/ оба́че не от ми́ра су́щии,/ вы есте́ соль земли́ на́шея,/ ва́ми бо гра́ди и ве́си на́ша освяща́ются,/ пути́ стро́потныя исправля́ются,/ заблу́ждшия к покая́нию обраща́ются/ и вси́ прославля́ют ди́внаго во святы́х Свои́х Иису́са Всеси́льна,// Спа́са душ на́ших. Два́жды.

И́же ча́да похваля́ет,/ весели́т отца́ их,/ та́ко и святы́я прославля́яй/ Бо́га сла́вит в них почива́юща/ и Це́рковь те́ми украша́юща./ Те́мже, бра́тие, любо́вию просла́вим святы́я земли́ на́шея,/ я́ко сы́ны и дще́ри Отца́ Небе́снаго,// ко Оте́честву ве́чному нас возводя́щия.

Сла́ва, глас то́йже:

Святи́телие, преподо́бнии и пра́веднии,/ блаже́ннии, испове́дницы и му́ченицы,/ имено́ваннии и безыме́ннии,/ явле́ннии и неявле́ннии,/ я́коже отре́би ми́ру бы́сте/ и попра́ние сыно́м ве́ка сего́,/ оба́че, сла́ву мно́гу от Бо́га прие́мше,/ любо́вию вас пою́щия не пре́зрите,/ расточе́нныя собери́те, па́дшия возста́вите,// вы бо есте́ Святы́я Руси́ утвержде́ние.

И ны́не, пра́здника, глас то́йже:

Всеми́рная ра́дость от пра́ведных возсия́ нам,/ от Иоаки́ма и А́нны Всепе́тая Де́ва,/ я́же премно́гия ра́ди чистоты́ храм Бо́жий одушевле́нный быва́ет,/ и еди́на вои́стину Богоро́дица познава́ется./ Тоя́ моли́твами, Христе́ Бо́же,/ мир ми́ру низпосли́,// и душа́м на́шим ве́лию ми́лость.

Славосло́вие вели́кое. И отпу́ст.

На Литурги́и

Блаже́нны от кано́на пра́здника, песнь рядова́я на 4, и святы́х, песнь 6-я на 4. Проки́мен святы́х, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Сохрани́ мя, Го́споди, я́ко на Тя упова́х. Апо́стол ко Евре́ем, зача́ло 329 (гл. 11, ст. 23 – гл. 12, ст. 2). Да́же до: Взира́юще на Нача́льника ве́ры и Соверши́теля Иису́са. Аллилу́ия, глас 4: Бо́же, уши́ма на́шима услы́шахом и отцы́ на́ши возвести́ша нам. Стих: Спасл еси́ нас от стужа́ющих нам и ненави́дящих нас посрами́л еси́. Ева́нгелие от Матфе́я, зача́ло 11. Прича́стен: Благоволи́т Госпо́дь в лю́дех Свои́х, и вознесе́т кро́ткия во спасе́ние.

Моли́тва

О, святи́и сро́дницы на́ши, трудолю́бне подвиза́вшиися, се́мя сло́ва Бо́жия в земли́ на́шей возрасти́вшии, и плод кра́сный доброде́телей Бо́гу прине́сшии! Ны́не призыва́ем вас, уго́дницы Бо́жии, и́же пусты́ни Казахста́нския, брега́ Беломо́рския, о́стровы Солове́цкия и ины́я преде́лы по́двиги и страда́нии свои́ми освяти́вшии, ны́не же в Го́рнем Иерусали́ме Тро́ице Святе́й предстоя́щии. Ве́мы бо, ве́мы, я́ко любы́ ва́ша николи́же преста́нет. Сего́ ра́ди, дерза́юще, мо́лим вас: бу́дите нам наста́вницы ко спасе́нию, испроси́те у Всеще́драго Бо́га на́шего всяк дар, коему́ждо благопотре́бен, наипа́че же дар смире́ния и любве́, да тем Христо́ви и друг дру́гу служа́ще, в братолю́бии соедини́мся и ку́пно с ва́ми просла́вим Отца́, и Сы́на, и Ду́ха Свята́го. Ами́нь.

Служба преподобному Нектарию Оптинскому

Текст утвержден Священным Синодом
Русской Православной Церкви
17 июля 2020 года (журнал № 34)

Ме́сяца апре́ля в 29-й день

Преподо́бнаго Некта́рия О́птинскаго

Обре́тение же честны́х моще́й его́ ме́сяца ию́ля в 3-й день

На ма́лой вече́рни

На Го́споди, воззва́х: стихи́ры, гла́с 1:

Богому́дре о́тче Некта́рие,/ по́двиг служе́ния бли́жнему/ во оби́тели О́птинстей досто́йно поне́сл еси́/ и, бре́мя го́рестей людски́х на ра́мо возложи́в,/ путь приско́рбный до конца́ претерпе́л еси́,/ те́мже, я́ко и́стинный раб Христо́в,/ вене́ц пра́вды от Бо́га прия́л еси́./ Того́ моли́ дарова́ти нам// мир и ве́лию ми́лость.

Преподо́бне о́тче Некта́рие,/ я́ко пчела́ в са́де духо́внем,/ некта́р прему́дрости оте́ческия собра́л еси́,/ сего́ ра́ди, дар разсужде́ния от Бо́га прие́м,/ та́йны серде́чныя прозрева́л еси́/ и, любо́вию Христо́вою распала́емь,/ с ве́рою к тебе́ притека́ющих// к по́льзе душе́вней наставля́л еси́.

Блаже́нне о́тче Некта́рие,/ пе́рвее потща́лся еси́ во смире́нии утверди́тися,/ я́ко основа́нии вся́кия доброде́тели,/ и, дре́вним отце́м подо́бяся,/ и́ноческия обе́ты до конца́ испо́лнил еси́./ Ны́не же с ни́ми ку́пно Бо́га прославля́я,// мо́лишися о душа́х на́ших.

Сла́ва, гла́с 2:

Прииди́те, ве́рнии,/ преподо́бных отце́в О́птинских возлюби́вшии,/ припаде́м к моще́м смире́ннаго ста́рца Некта́рия,/ и́же мно́гими доброде́тельми в житии́ просия́./ Ны́не же, со все́ми святы́ми Единосу́щную Тро́ицу прославля́я,// подае́т нам мир и ве́лию ми́лость.

И ны́не, пра́здника, или́ Богоро́дичен.

На стихо́вне стихи́ры преподо́бнаго, глас 4:

Преподо́бне о́тче Некта́рие,/ всего́ себе́ в по́двиг послуша́ния вдав,/ се́рдцем Го́сподеви прилепи́лся еси́,/ бде́нием же, посто́м и моли́твою ре́вностне подвиза́яся,/ стра́сти грехо́вныя препобеди́л еси́/ и, ду́шу свою́ слеза́ми мно́гими очи́стив,/ сосу́д Бо́жия благода́ти досто́ин яви́лся еси́./ Сего́ ра́ди моли́, о́тче преподо́бне,// спасти́ся душа́м на́шим.

Стих: Честна́ пред Го́сподем// смерть преподо́бных Его́.

О́гненных искуше́ний не чужда́яся,/ но смире́нно приобща́яся страсте́м Христо́вым,/ долготерпели́ве о́тче Некта́рие,/ злосло́вимый о и́мени Христо́ве,/ не стыди́лся, но ра́дости исполня́лся еси́,/ да в явле́ние сла́вы Его́/ возвесели́шися ра́достию соверше́нною,// прославля́я Бо́га за вся.

Стих: Блаже́н муж, боя́йся Го́спода,// в за́поведех Его́ восхо́щет зело́.

О ча́дех свои́х до́брое попече́ние име́я,/ богому́дре о́тче Некта́рие,/ в годи́ну лю́тых испыта́ний/ от Це́ркве и́стинныя, а́ще и пору́гана бысть,/ не отлуча́тися наставля́л еси́/ и покланя́тися Го́сподеви в Ду́се и И́стине/ о́бразом жития́ твоего́ поуча́л еси́,// хра́мы нерукотворе́нныя в сердца́х смире́нных прему́дро созида́я.

Сла́ва, гла́с 2:

Посети́л ны есть Восто́к с высоты́,/ многоцеле́бныя мо́щи Некта́рия преподо́бнаго,/ я́ко би́сер безце́нный, нам да́руя./ Те́мже с весе́лием притеце́м к ра́це его́/ и с любо́вию поклони́мся,/ песнь псало́мскую вопию́ще:/ ди́вен Бог во святы́х Свои́х, Бог Изра́илев,// да́руяй ми́рови ве́лию ми́лость.

И ны́не, пра́здника, или́ Богоро́дичен, глас то́йже.

Тропа́рь зри на вели́цей вече́рни.

На вели́цей вече́рни

На Го́споди, воззва́х: стихи́ры пра́здника, и преподо́бнаго, глас 8:

Кто возмо́жет воспе́ти досто́йно/ труды́ и по́двиги преподо́бнаго Некта́рия О́птинскаго:/ подви́жника смиренному́драго,/ наста́вника любвеоби́льнаго/ и па́стыря до́браго,/ му́жа прозорли́ваго/ и ве́ры правосла́вныя испове́дника тве́рдаго?/ Его́же те́плыя моли́твы о нас/ ми́лостивно приими́, Го́споди,// в воню́ благоуха́ния духо́внаго.

Про́мыслом Бо́жиим направля́емь,/ во оби́тель О́птинскую,/ по́двиги де́лания мона́шескаго сла́вно просия́вшую,/ преподо́бне о́тче Некта́рие, прите́кл еси́,/ иде́же от богому́дрых отце́в/ сугу́бую благода́ть духо́внаго разсужде́ния восприя́л еси́,/ е́юже бли́жним и да́льним усе́рдно послужи́л еси́,/ в тя́жкую годи́ну гоне́ний на Це́рковь Ру́сскую// спасе́ние им устроя́я.

От Нача́льника тишины́/ любо́вь к тишине́ восприе́м,/ о́тче Некта́рие преподо́бне,/ те́лом затвори́лся еси́ от ми́ра бушу́ющаго,/ душе́ю же от попече́ний жите́йских упраздни́лся еси́,/ умо́м потруди́вся взыска́ти ме́сто серде́чное,/ и та́мо обре́т сладча́йшаго Иису́са,// позна́л еси́ тишину́ Боже́ственную.

Безмо́лвия и́стиннаго взыску́я,/ о́тче Некта́рие преподо́бне,/ от ми́ра многомяте́жнаго те́лом и душе́ю затвори́лся еси́,/ умо́м же к де́ланию многотру́дному прилежа́,/ сладча́йшаго Иису́са, я́ко тишины́ Нача́льника, позна́л еси́./ Его́же моли́, блаже́нне,/ воздвиза́емую напа́стьми бу́рю прейти́// и житие́ на́ше в ми́ре и покая́нии сконча́ти.

И́ны стихи́ры преподо́бнаго (на обре́тение моще́й), глас 5:

Богоблаже́нне ста́рче Некта́рие,/ свети́льниче ста́рчества О́птинскаго,/ луча́ми благода́ти облиста́й твою́ оби́тель,/ удобри́ доброде́тельми ме́сто упокое́ния твоего́/ и, я́ко смоко́вница до́брая,/ насажде́нная в О́птине пу́стыни,/ ду́ха сла́достными плоды́ напита́й нас,// обре́тение моще́й твои́х че́стно пра́зднующих.

Всепра́зднственная па́мять твоя́, Некта́рие преподо́бне,/ возвесели́ всю зе́млю Ру́сскую,/ и собо́ры мона́шествующих подви́же к похвале́нию:/ блаже́н еси́, Христу́ рабо́тав/ и вра́жию обличи́в си́лу,/ полки́ де́монския прогна́л еси́/ и безбо́жная уста́ загради́л еси́,// венце́м Небе́сным увенча́нный.

О́тче Некта́рие, свеще́ боже́ственная,/ на све́щнице церко́внем поста́влен,/ све́том Христо́вым ве́рныя просвети́л еси́/ и, тьму бесо́вскую и пре́лесть потреби́в,/ нощь безбо́жия разсе́ял еси́./ Те́мже Христа́ Бо́га моли́, блаже́нне,/ обре́тение моще́й твои́х све́тло пра́зднующим,// дарова́ти мир и ве́лию ми́лость.

Сла́ва, гла́с 5:

Проро́ческим да́ром укра́шенный,/ я́ко ма́слина плодови́тая процве́л еси́/ и ве́рная ча́да твоя́ пи́щею духо́вною напита́л еси́;/ зло́ба же безбо́жных изгна́нию предаде́ тя,/ иде́же блаже́нно почи́в,/ рая́ Боже́ственнаго дости́гл еси́./ Вре́менем же преше́дшим,/ боголюби́вии лю́дие, обре́тше мо́щи твоя́ честны́я,/ с пе́нием во оби́тель О́птинскую возврати́ша./ Те́мже, богоно́сне о́тче наш Некта́рие,/ посети́ ны́не собо́ры пра́зднующих// и к ра́це моще́й твои́х с ве́рою притека́ющих.

И ны́не, пра́здника, или́ Богоро́дичен, глас то́йже: В Чермне́м мо́ри:

Вход. Проки́мен дне. И чте́ния преподо́бническая.

На лити́и стихи́ра хра́ма, и преподо́бнаго стихи́ры, глас 1:

Не от себе́ проро́чествуя,/ но от Ду́ха Свята́го просвеща́емь,/ богому́дре Некта́рие,/ словеса́ благода́тная глаго́лал еси́,/ и́ноком и миря́ном во́лю Бо́жию возвеща́я/ и на путь спасе́ния всех наставля́я./ И ны́не моли́, преподо́бне о́тче,// о спасе́нии душ на́ших.

Во́ли Бо́жией после́дуя/ и повеле́нию преподо́бных ста́рцев О́птинских,/ чу́дне я́вльшихся, повину́яся,/ во времена́ тя́жких испыта́ний в земли́ на́шей/ столп благоче́стия и му́дрый наста́вник лю́дем яви́лся еси́./ И ны́не, блаже́нне о́тче Некта́рие,/ помина́й ча́да твоя́,// любо́вию тя почита́ющия.

Гла́с 2:

А́ще и ненауче́н быв от ю́ности,/ кни́жную прему́дрость возлюби́л еси́/ и, ре́вностне оте́ческому уче́нию внима́я,/ та́же и многообра́зную му́дрость челове́ческую позна́ти потща́лся еси́,/ богому́дре о́тче Некта́рие./ Сего́ ра́ди мно́гия привле́кл еси́ во огра́ду церко́вную,/ бу́йство про́поведи уче́ния Христо́ва// сочетава́я с прему́дростию богодарова́нною.

Сла́ва, гла́с 4:

Открове́ния Бо́жия тебе́ я́влена бы́ша,/ богому́дре о́тче Некта́рие,/ бу́дущая бо я́ко настоя́щая созерца́я,/ гряду́щая земли́ Ру́сския и Це́ркве ея́ возвеща́л еси́,/ дре́вним проро́ком подо́бяся,/ и́хже соприча́стника яви́ тя Госпо́дь,// я́ко тайнозри́теля суде́б Бо́жиих.

И ны́не, пра́здника, или́ Богоро́дичен, глас то́йже:

Что ты, сме́рте, вопие́ши?/ Что стене́ши, а́де?/ Притупи́ся жа́ло ва́ше, и побе́да ва́ша исчезе́,/ я́ко Сын Бо́жий, Сын Де́вы быва́ет,/ и от ва́шея вла́сти свобожда́ет// всех ве́рных чад Свои́х.

На стихо́вне стихи́ры, глас 1.

Подо́бен: Небе́сных чино́в:

Доброде́лание вседе́тельное возлюби́в,/ ве́тхое и плотско́е мудрова́ние отве́ргл еси́,/ богоблаже́нне о́тче Некта́рие,/ и в ле́поту Ду́ха вои́стину обле́клся еси́,/ ум Христо́в стяжа́в,/ мона́хов преизря́ден наста́вник был еси́./ Посети́, преподо́бне, тя сла́вящих,// и грехопаде́ний лю́тых изба́ви.

Стих: Честна́ пред Го́сподем// смерть преподо́бных Его́.

Ста́рчества О́птинскаго благово́нный цве́те,/ доброде́тельми, я́ко цве́ты, украси́лся еси́,/ Боже́ственный некта́р сохраня́я в се́рдце твое́м,/ тем напои́л еси́ и́ноков сосло́вия,/ и всем, приходя́щим к ра́це моще́й твои́х,/ исцеле́ния подае́ши оби́льне,/ смрад греха́ отгоня́я, о́тче Некта́рие,// чудоде́йственниче пресла́вный.

Стих: Блаже́н муж, боя́йся Го́спода,// в за́поведех Его́ восхо́щет зело́.

Мона́шествующим удобре́ние,/ ни́щим покро́в и убо́гим заступле́ние,/ ве́рным тве́рдое приста́нище/ и стра́ждущим ми́ро боже́ственное/ яви́ся чудоде́йственная ра́ка моще́й твои́х,/ блаже́нне о́тче Некта́рие./ Те́мже моли́ся Христу́ Бо́гу,// да спасе́т ду́ши на́ша.

Сла́ва, гла́с 3:

Что нарече́м тя, Некта́рие богодухнове́нне?/ О́браз ли мона́шескаго де́лания,/ я́ко мно́гим и́ноком пра́вило яви́лся еси́?/ Богому́дра ли отца́ духо́внаго,/ я́ко па́стырь до́брый ча́дом твои́м был еси́?/ Затво́рника, о ми́ре дерзнове́нно моля́щагося,/ я́ко бу́дущая ми́ра прозрева́л еси́?/ Ве́рна ли испове́дника Христо́ва,/ я́ко ско́рби и лише́ния мно́гия претерпе́л еси́?// Моли́ся, преподо́бне о́тче, о душа́х на́ших.

И ны́не, пра́здника, или́ Богоро́дичен, глас то́йже.

Тропа́рь, гла́с 3:

Чу́днаго Некта́рия в пе́снех духо́вных восхва́лим/ и благоче́стное житие́ того́ ублажи́м,/ я́ко мирско́е мудрова́ние посрами́/ и христолюби́вым лю́дем путь покая́ния показа́./ Сего́ ра́ди ны́не вопие́м:// ра́дуйся, о́тче богому́дре, ве́рным утвержде́ние.

Ин тропа́рь (на обре́тение моще́й), гла́с 1:

Твои́х моще́й обре́тение пра́зднующе,/ глас хвале́ния тебе́ прино́сим,/ моли́твенниче наш те́плый и ско́рый помо́щниче,/ богоблаже́нне ста́рче Некта́рие,/ боле́зни исцели́ и ско́рби потреби́,/ ве́лие бо и́маши ко Христу́ дерзнове́ние,/ уго́дниче Того́ изря́дный// и предста́телю за ны ми́лостивый.

На у́трени

По 1-м стихосло́вии седа́лен, глас 2:

Всесве́тлое торжество́ днесь и печа́ли премене́ние на ра́дость, скорбе́й бо потреби́тель и страсте́й свободи́тель мощьми́ свои́ми возврати́ся на ме́сто нача́льных по́двигов свои́х. Лику́й, пу́стыне О́птина, и наро́ди правосла́внии, весели́теся, я́ко во обре́тении и пренесе́нии моще́й ста́рца Некта́рия дарова́ Госпо́дь лю́дем Свои́м ве́лию ми́лость.

Сла́ва, и ны́не, пра́здника, или́ Богоро́дичен:

Тобо́ю, Ма́ти Де́во, всей вселе́нней возсия́ Свет Боже́ственный, Ты бо Зижди́теля всех родила́ еси́ Бо́га, Его́же моли́, Пречи́стая, низпосла́ти нам ве́лию ми́лость.

По 2-м стихосло́вии седа́лен, глас 6:

Си́лою слове́с твои́х, преподо́бне Некта́рие, суему́дрие нечести́вых обличи́л еси́ и ве́рныя, просвети́в богому́дрыми при́тчами, соу́зом любве́ Боже́ственныя связа́л еси́, и ве́рою и наде́ждою утверди́л еси́. Те́мже сохрани́ от ко́зней вра́жиих невреди́мы па́мять твою́ све́тло пра́зднующих и любо́вию пою́щих по́двиги твоя́.

Сла́ва, и ны́не, пра́здника, или́ Богоро́дичен:

Егда́ време́н исполне́ние прии́дет, и не́бо я́ко сви́ток свие́тся, и вси гре́шнии воспла́чутся, не посрами́ тогда́ мене́, Богома́ти, но Твои́ми мольба́ми сохрани́ от ве́чныя сме́рти.

По полиеле́и седа́лен, глас 6:

Во времена́ гоне́ний восприе́мый благода́ть служе́ния ста́рческаго, бу́йством про́поведи послужи́л еси́ всем ве́рным, прозира́я та́йны сокрове́нныя, и во́лю Бо́жию лю́дем возвеща́я: преподо́бне о́тче наш Некта́рие, моли́ Всеми́лостиваго Иису́са о спасе́нии душ на́ших.

Ин седа́лен преподо́бнаго (на обре́тение моще́й), глас то́йже:

Ско́ро притеце́м, о бра́тие, и со умиле́нием припаде́м к ра́це ди́внаго и смире́ннаго ста́рца, преподо́бнаго и богоно́снаго Некта́рия, той бо и ны́не источа́ет да́ры благода́тныя от свои́х многоцеле́бных моще́й и любо́вию объе́млет чад свои́х, ве́рою к нему́ притека́ющих.

Сла́ва, и ны́не, пра́здника, или́ Богоро́дичен:

Луча́ми Твоего́ све́та, Пречи́стая, ду́шу мою́, лежа́щую в ро́ве поги́бельнем, просвети́, и враги́ сокруши́, ко греху́ мя влеку́щия, да, огради́вся преподо́бнаго Некта́рия моли́твами и покро́вом Твои́м, Богоро́дице, пою́ Сы́на Твоего́ держа́ву.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Ми́ра мяте́ж возненави́дев,/ преподо́бне о́тче Некта́рие,/ того́ со тща́нием удали́лся еси́,/ повеле́нием же Госпо́дним/ отвори́л еси́ ми́ру две́ри ке́лии мона́шеския,/ я́же не вмеща́ше приходя́щих к тебе́,/ оба́че в се́рдце твое́м, любо́вию отве́рстом,/ не те́сно им бя́ше./ Сего́ ра́ди зове́м ти:/ ра́дуйся, благоуха́ние ра́йское,// моли́твенниче о душа́х на́ших.

Кано́н преподо́бнаго, его́же краегране́сие: Некта́р Боже́ственный обре́тше, ра́достно воспои́м. Глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́ еди́ному Влады́це.

Некта́рие о́тче, го́речь отыми́ страсте́й и Боже́ственную сла́дость усто́м пода́ждь, пе́сненно воспе́ти твое́ всечестно́е преставле́ние.

Ева́нгельскою лозо́ю процве́л еси́, о́тче, и, то́ки чуде́с источи́в, умиле́нием напои́л еси́ ча́да твоя́, приснопа́мятне.

Красне́йшее твое́ торжество́ вся собра́ во оби́тель тебе́ любе́зную по́чести тебе́ возда́ти пе́сненно, Христо́в уго́дниче Некта́рие.

Терпя́ потерпе́л еси́ ско́рби и озлобле́ние врага́ и во изгна́нии му́жественно подвиза́лся еси́. Сего́ ра́ди внят Госпо́дь моли́тве твое́й и по сме́рти свободи́ тя от плене́ния.

Богоро́дичен: А́нгелов песнь еси́ и земны́х хвале́ние, бесо́в посрамле́ние и ве́рных вене́ц, Мари́е Де́во, Тя сла́вящия спаса́й.

Песнь 3

Ирмо́с: Сочини́ мя, Го́споди,/ си́льным люде́й Твои́х,/ опоясу́я си́лою,/ и лу́ки ра́тников сокруши́,// и нищеты́ моея́ рог возвы́си.

Раче́нием всесвяты́м распала́емь, раче́ния греха́ отврати́лся еси́ и, тьму страсте́й разгна́в и де́монскую зло́бу посрами́в, запина́тель зми́я яви́лся еси́, всему́дре Некта́рие.

Боже́ственное любому́дрие возлюби́л еси́ и му́дрость ми́ра пости́гл еси́, венце́м смиренному́дрия увенча́вся, Некта́рие богому́дре.

О́птинский небосво́д озари́л еси́, я́ко звезда́ в нощи́, и мощьми́ твои́ми, о́тче преподо́бне, я́ко о́блаком све́тлым, осени́л еси́ собра́ние ве́рных.

Жела́нием в го́рняя ум впери́л еси́ и земна́я преоби́дел еси́, блаже́нне, в по́двизех не пощади́в те́ло, ни ду́шу твою́, сего́ ра́ди, живоно́сную ме́ртвость стяжа́в, то́ю живи́ши ме́ртвыя душе́ю.

Богоро́дичен: Е́ва разреша́ется кля́твы, и враг закля́тый связу́ется, Рождество́м бо Твои́м, Влады́чице Чи́стая, жи́знь ве́чная возсия́, тля потреби́ся и ве́рным отра́да дарова́ся.

Конда́к и и́кос пра́здника.

Ин конда́к преподо́бнаго (на обре́тение моще́й), глас 4:

Обре́тение святы́х моще́й твои́х пра́зднуем днесь,/ богоблаже́нне ста́рче Некта́рие:/ утоли́ боле́зни на́ша, мо́лим тя,/ и печа́ли мглу грехо́вную разве́й,/ благомо́щными твои́ми моли́твами,/ у Христа́ Бо́га испроси́в нам мир// и ве́лию ми́лость.

Седа́лен, глас 6:

Внима́я словесе́м Госпо́дним, преподо́бне, кро́тости и смире́нию се́рдца научи́лся еси́ и, ничи́мже смуща́емый, поко́й в души́ твое́й обре́л еси́, те́мже и, отроча́ти ма́лому подо́бяся, согреша́ющих исправля́л еси́ ду́хом кро́тости и бли́жняго с любо́вию наставля́л еси́. Сего́ ра́ди моли́ся, блаже́нне, и подража́ющим ти простоты́ и незло́бия дости́гнути.

Ин седа́лен преподо́бнаго (на обре́тение моще́й), глас 4:

Предыди́те, лю́дие, с весе́лием и возра́дуйтеся, се бо ди́вный ковче́г гряде́т, одушевле́н доброде́телию, мо́щи блаже́ннаго ста́рца Некта́рия, и́же те́плыми свои́ми моли́твами к Бо́гу утеше́ние подае́т пра́зднующим сие́ торжество́.

Сла́ва, и ны́не, пра́здника, или́ Богоро́дичен:

Ты еди́на во всех ро́дех, Де́во Пречи́стая, Ма́ти яви́лася еси́ Бо́жия. Ты Божеству́ была́ еси́ Жили́ще, Всенепоро́чная, не опа́льшися Огне́м непристу́пнаго Све́та. Те́мже Тя вси ублажа́ем и мо́лим, Мари́е Богоневе́сто: сотвори́ ны жили́ща Ду́ха Свята́го.

Песнь 4

Ирмо́с: Богоно́сный Ду́хом Святы́м просвети́вся проро́к Авваку́м,/ в после́дняя Твое́ прише́ствие прови́дев, вопия́ше:/ внегда́ прибли́житися ле́том, позна́ешися:/ внегда́ приити́ вре́мени, яви́шися.// Сла́ва си́ле Твое́й, Го́споди.

Светоно́сная ра́ка твоя́, я́ко ка́мень драги́й, сия́ет чудесы́ и благода́тных исцеле́ний испуща́ет лучи́, всебога́те Некта́рие, с ве́рою к тебе́ притека́ющим.

Треволне́ния страсте́й уставля́еши и тишину́ Иису́сову подае́ши, о́тче Некта́рие преподо́бне, я́ко Того́ ве́рный раб быв и благода́ти сосу́д испо́лненный.

Внегда́ прибли́жишася ле́та, позна́лся еси́, уго́дниче Бо́жий Некта́рие, из-под спу́да возсия́в мощьми́ благода́тными, и тьму неве́рия разори́л еси́ кре́постию Го́спода твоего́.

Е́ллинское мудрова́ние посрами́л еси́ и, юро́дством благослове́нным прикры́вся, вне Христа́ и́щущих му́дрость обличи́л еси́, небе́сный у́ме, Некта́рие, тайнове́дче блаже́нный.

Богоро́дичен: На река́х ско́рби пла́кахом и избавле́ния ча́яхом, Всеми́лостивая Ма́ти Спа́са, внегда́ прии́де по́мощь Твоя́, я́же стра́стнаго плене́ния свободи́ ны.

Песнь 5

Ирмо́с: Мрак души́ моея́/ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,// да у́тренюя сла́влю Тя.

На тебе́ показа́ ми́лость Свою́ Госпо́дь и вся хоте́ния Своя́ в тебе́ испо́лни, ты бо муж пра́ведный яви́лся еси́, богому́дре о́тче, се́рдце чи́сто стяжа́в, многоразли́чными дарова́нии испо́лнено.

Испо́лни ра́дости собра́ние ве́рных, обстоя́щих ра́ку моще́й твои́х, преиспо́лнену благода́ти, свя́те Некта́рие, и осла́бу пода́ждь, и избавле́ние от лю́тых грехопаде́ний на́ших.

Иде́же упоко́ися те́ло твое́, столп благода́ти осиява́ет ве́рныя, и о́блак моли́тв твои́х, преподо́бне, ороша́ет всех притека́ющих и любо́вию мо́щи твоя́ лобыза́ющих.

О́птинская ра́дость ты еси́, о́тче Некта́рие, и приснопребыва́ющее ста́рцев весе́лие, вся печа́ли жите́йския моли́твою разве́явый и в смех претвори́вый де́монская нападе́ния.

Богоро́дичен: Боле́зни утоли́, Влады́чице Де́во, Врача́ челове́ком ро́ждшая, и огнь любосла́стный угаси́ одожде́нием цельбоно́сных моли́тв Твои́х, Всеще́драя, да́рующи лю́дем Твои́м ве́лию ми́лость.

Песнь 6

Ирмо́с: Во Исаа́це страсть прописа́вый,/ и во Ио́не погребе́ние прообразова́вый,/ и воскресе́ние всем подая́й,/ Тебе́ вопие́м с проро́ком:// от тли нас возведи́, Благоутро́бне Го́споди.

Ра́дости неизглаго́ланныя испо́лнил еси́, о́тче, оби́тель твою́ честны́х моще́й возвраще́нием, те́мже и чад твои́х немо́лчныя гла́сы приими́, вы́ну пою́щих твое́ из земны́х недр обре́тение.

Еже́ по о́бразу Христо́ву послуша́нию вда́лся еси́ и, всеме́рный иску́с проше́д и доброде́телию воскре́с, стра́сти погре́бл еси́, сла́вою ста́рчества украси́вся, Некта́рие.

Терпе́ние Анато́лиево и любо́вь Амвро́сиеву стяжа́в, кро́тости же и смире́нию Ио́сифа и Варсоно́фия до́блести подража́я, вся дарова́ния отце́в вмести́л еси́, преподо́бне.

Ше́ствуя неукло́нно святооте́ческою стезе́ю, прему́дре а́вво, го́рних оби́телей дости́гл еси́, оба́че и ны́не не оставля́еши моли́твами твои́ми бра́тию земны́я оби́тели твоея́, иде́же нача́ло подвиго́м полага́л еси́.

Богоро́дичен: Е́вино преслуша́ние испра́вила еси́, Пречи́стая Де́во Влады́чице, Арха́нгелова гла́са послу́шавши, се Раба́ Госпо́дня есмь, рекла́ еси́, и кля́тва прама́терня потреби́ся.

Конда́к, глас 8:

От ста́рцев смире́нных и богому́дрых, Амвро́сия и Анато́лия,/ от сея́ лучеза́рныя дво́ицы,/ восприя́л еси́ благода́ть окормле́ния ста́рческаго, благоуха́нне о́тче Некта́рие:/ сый свобо́ден от всех, всем себе́ порабо́тил еси́,/ тяготы́ мона́хов и миря́н поне́сл еси́,/ до конца́ испо́лнивый зако́н Христо́в,// от Него́же прия́л еси́ вене́ц нетле́нный.

И́кос:

Я́ко Елиссе́й от Илии́ чрез ми́лоть сугу́бую благода́ть улучи́, та́ко ты, богому́дре о́тче Некта́рие, чрез свои́х боже́ственных наста́вников свы́ше дар ста́рческаго служе́ния восприя́л еси́ и в тя́жкое вре́мя гоне́ний на ве́ру Христо́ву ученико́м свои́м и всем, и́щущим духо́внаго наставле́ния, усе́рдно послужи́л еси́, с ни́миже досто́йно тя восхваля́ем: Ра́дуйся, смире́нный носи́телю ста́рческия благода́ти; ра́дуйся, па́стырю до́брый слове́сных ове́ц. Ра́дуйся, учи́телю кро́тости и незло́бия; ра́дуйся, кре́пкий испове́дниче Христо́в. Ра́дуйся, малоду́шныя наста́вивый ко спасе́нию кре́стным сло́вом; ра́дуйся, неутвержде́нныя отврати́вый от ересе́й и раско́лов. Ра́дуйся, бу́йством про́поведи му́дрость ми́ра сего́ посрами́вый; ра́дуйся, в не́мощи ди́вную си́лу Бо́жию яви́вый. Ра́дуйся, свети́льниче, во тьме горя́й и светя́й; ра́дуйся, сто́лпе ве́ры правосла́вныя. Ра́дуйся, оте́ческих преда́ний храни́телю; ра́дуйся, сотаи́нниче собо́ра ста́рцев благода́тных. Ра́дуйся, ста́рче Некта́рие, О́птинская похвало́.

Песнь 7

Ирмо́с: Бо́жия снизхожде́ния/ огнь устыде́ся в вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.

Радостотво́рный пра́здник днесь, и печа́ли прогна́ние, и скорбя́щим утеше́ние и отра́да: мо́щи блаже́ннаго Некта́рия с на́ми пребыва́ют, те́мже да́руется всем оби́льно весе́лие.

Ад челюстьми́ свои́ми тя не сокруши́, а́ще и сокры́то бысть под земле́ю честно́е те́ло твое́, оба́че уста́ на́ша испо́лнишася песнопе́ний, егда́ благовре́менне, ста́рче Некта́рие, из недр земны́х мо́щи святы́я яви́л еси́.

Да́же до после́дних земли́ простре́ся сла́ва твоя́, преподо́бне, те́мже от се́вера и ю́га, за́пада и восто́ка ча́да твоя́ прихо́дят поклони́тися моще́м, вопи́юще: благослове́н еси́, Бо́же оте́ц на́ших.

О́птинский столп ты еси́, и сла́вы ста́рчества вене́ц благоуха́нный, во оби́тель твою́ возврати́лся еси́, и приложи́вся ко отце́м, возвесели́л еси́ небе́сных, Некта́рие, и земноро́дных обра́довал еси́, вопию́щих: благослове́н еси́, Бо́же оте́ц на́ших.

Богоро́дичен: Све́щнице Свещи́ Боже́ственныя, я́же есть Сын Твой, прише́дый пло́тию в мир, мрак плотска́го мудрова́ния потреби́, Пресвята́я, и Ду́ха огнь в сердца́ земноро́дных всели́, благослове́н еси́, А́вво О́тче, вопию́щих.

Песнь 8

Ирмо́с: Мусики́йским орга́ном согласу́ющим,/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вяху во вся ве́ки.

Тро́ицы уго́дниче всеблаги́й, пе́сненныя приими́ венцы́, я́же ча́да твоя́ сплето́ша тебе́ усе́рдием, и небе́сных венце́в сподо́би нас, любо́вию воспева́ющих тя.

Нечести́выя сове́ты разори́л еси́, ми́ра посрами́в плотско́е мудрова́ние; благоче́стие же возвести́л еси́, преподо́бне, и богому́дренно утверди́л еси́, в простоте́ Христо́ве и благода́ти.

О тебе́ хва́лимся, и о тебе́ пое́м, я́ко оте́ц еси́ наш чадолюби́вый, не оста́вил еси́ нас си́рых, ниже́ оби́тель твою́, но возврати́лся еси́ в ню мощьми́, Некта́рие преподо́бне.

Вели́ка обре́те тя помо́щника в беда́х земля́ Ру́сская и оби́тель О́птинская, в не́йже по́двигом многообра́зным подвиза́вся, и юро́дства и́го подъе́м, Некта́рие ста́рче, врага́ обличи́л еси́, и малоду́шныя утверди́л еси́.

Богоро́дичен: О́блаче све́тлый, Со́лнце Христа́ нося́й, Всепе́тая и Пречи́стая Де́во, мглу греха́ разве́й мольба́ми твои́ми, да озаря́еми луча́ми Сы́на Твоего́, воспое́м Тя и ублажи́м во вся ве́ки.

Песнь 9

Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока своего́:/ в ни́хже посети́ нас восто́к с высоты́,// и напра́вил ны есть на путь ми́ра.

Сла́достно благоуха́ют мо́щи твоя́, присноблаже́нне ста́рче Некта́рие, по́двигом бо всему́дрым подвиза́вся, в ме́ру отце́в твои́х дости́гл еси́, и сочета́лся еси́ с ни́ми в духо́вный соу́з, сего́ ра́ди тя велича́ем.

Посети́л еси́ нас, из юдо́ли подзе́мныя светоявле́нно возвы́сився, те́мже от но́щи страсте́й изба́ви, блаже́нне, притека́ющия к ра́це моще́й твои́х, и благоче́стно ти покланя́ющияся.

О, возвраще́ния твоего́ к нам! Нищету́ обогати́л еси́ на́шу многоце́нным би́сером, моще́й твои́х предложе́нием, и ку́плю спасе́ния де́яти помога́еши, тя велича́ющим, прему́дре Некта́рие.

И ду́хом пребу́ди с на́ми, Некта́рие, те́лом благоуха́нным почти́вый О́птину, и пресла́достным одари́ утеше́нием пра́зднующих собра́ние, де́монов же прогони́ и стра́сти вся́ческия отжени́ жезло́м твои́м па́стырским.

Богоро́дичен: Мари́е Де́во, А́нгелы све́тлы посли́, умири́ти мир и в душа́х смяте́ние, и мра́чныя полки́ бесо́вския потреби́, Богора́дованная, Ты бо еси́ Небе́сных и земны́х Цари́ца Всепобеди́тельная.

Свети́лен:

Заверши́л еси́ чреду́ ста́рцев ди́вных из среды́ оби́тели О́птинския, преподо́бне ста́рче Некта́рие, преукра́шенный доброде́тельми мона́шескими, те́мже украси́л еси́ не́бо О́птины, я́ко при исхо́де ве́чера, егда́ не́бо украша́ется свети́лом нощны́м.

Ин свети́лен (на обре́тение моще́й):

Светолу́чное принесе́ние твои́х моще́й, я́ко обре́тение би́сера драгоце́ннаго, удивля́ет и весели́т собра́ние ве́рных, и безбо́жных помрача́ет собо́рища, озаря́юще смы́слы нас пою́щих тя, Некта́рие.

Сла́ва, и ны́не, пра́здника, или́ Богоро́дичен:

Украша́яй исхо́ды у́тра и ве́чера, ду́шу Твою́, Де́во, украси́ ле́потою неизъясни́мою, сего́ ра́ди во утро́бу Твою́ всели́ся Кра́сный добро́тою па́че сыно́в челове́ческих, и еле́ем ра́дости Тя пома́за па́че всех земноро́дных.

На хвали́тех стихи́ры пра́здника. И преподо́бнаго стихи́ры, глас 6:

Не скры́л еси́ в зе́млю/ сребра́ Господи́на твоего́,/ ниже́ истощи́л еси́ на земна́я попече́ния/ ще́дро ти да́нныя Бо́гом тала́нты,/ но те́ми приобре́л еси́/ сокро́вище многоце́нное,/ его́же тля не тлит, и не снеда́ет ржа,/ ниже́ подко́пывают та́тие,/ оба́че в живо́т ве́чный простира́ется,/ и весе́лием неоскудева́емым/ весели́т благо́е се́рдце// о Бо́зе Спа́се свое́м.

По обе́ту мона́шескому,/ нищету́ сохрани́в, преподо́бне,/ мно́гия обогати́л еси́:/ а́лчущия пита́я сло́вом и́стины,/ жа́ждущия напая́я вода́ми благода́ти,/ стра́нныя наставля́я на путь спасе́ния,/ наги́я покрыва́я любо́вию,/ больны́я исцеля́я от язв душе́вных и теле́сных,/ ю́зники изводя́ из темни́цы страсте́й./ Сего́ ра́ди унасле́довал еси́, Некта́рие,/ Ца́рствие, ве́рным угото́ванное// от сложе́ния ми́ра.

А́ще и в не́мощех и боле́знех/ изнемога́л еси́, о́тче Некта́рие,/ оба́че в гоне́ниих и ско́рбех/ со креста́ служе́ния ста́рческаго не сшел еси́,/ Распе́ншемуся за всех земноро́дных подража́я;/ кроме́ утеше́ния и наставле́ния не оста́вил еси́/ ве́рных чад твои́х, преподо́бне,/ я́ко си́ла Бо́жия// в не́мощи соверша́ется.

Плоть распя́в со страстьми́ и похотьми́,/ потща́лся еси́, о́тче Некта́рие,/ до конца́ испо́лнити во́лю Бо́жию;/ те́мже ны́не, го́рния трапе́зы наслажда́яся,/ с преподо́бными сотаи́нники О́птинскими/ пие́ши пи́во но́вое,// исполня́ющее сердца́ ва́ша весе́лием ве́чным.

И́ны стихи́ры преподо́бнаго (на обре́тение моще́й), глас 2:

Заря́ гряде́т духо́вная,/ стецы́теся, празднолю́бцы,/ свети́льники возжига́йте душе́вныя,/ еле́ем братолю́бия наполня́юще,/ угото́вайте и фимиа́м хвалы́:/ се бо мощьми́ свои́ми Некта́рий блаже́нный во оби́тель О́птинскую возвраща́ется/ и в го́рнем мо́лит приле́жно Бо́га// о спасе́нии душ на́ших.

О, чу́до пресла́вное!/ Сла́ву мудреца́ юро́д прие́млет,/ и мра́чный гроб а́ки престо́л ца́рский быва́ет,/ сме́ртное же те́ло я́ко пала́та нетле́ния,/ и разоре́нная оби́тель па́ки востае́т,/ во е́же ду́ши челове́ческия к Бо́гу призыва́ти:/ та́ко устроя́ет Дух Святы́й,// во Святы́х свои́х почива́яй.

Некта́рие, ста́рче благи́й,/ духо́вный пир сотвори́л еси́/ во обре́тении моще́й твои́х, пресла́вне;/ то́ки благода́ти и струи́ исцеле́ний источа́еши/ и вино́ умиле́ния, ду́ши веселя́щее,/ и ду́хом свои́м сопрису́тствуеши нам,/ вся возвыша́я к высоте́ духо́вней,// е́же Христа́ прославля́ти.

Сла́ва, преподо́бнаго, глас 7:

От земли́ возвыша́яй убо́га,/ от гно́ища возставля́яй ни́ща,/ Святы́й Изра́илев, Христо́с Бог наш, посрами́ прему́дрость ми́ра сего́/ и избра́ в насле́дие ве́чное/ худоро́дная и уничиже́нная,/ да обличи́т греха́ студ,/ чудоде́йствуя во избра́нных Свои́х/ и посыла́я их, я́ко проро́ки, в мир,/ наста́вити лю́ди на путь святы́х,// е́же есть смиренному́дрие.

И ны́не, пра́здника, или́ Богоро́дичен, глас то́йже.

На Литурги́и

Блаже́нна пра́здника, и от кано́на преподо́бнаго, песнь 6-я. Проки́мен пра́здника, и преподо́бнаго, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия пра́здника, и преподо́бнаго, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен пра́здника, и преподо́бнаго: В па́мять ве́чную бу́дет пра́ведник, от слу́ха зла не убои́тся.

Моли́тва

О преподо́бне и богоблаже́нне о́тче Некта́рие, присносве́тлый свети́льниче ста́рчества О́птинскаго! Юро́дство подъе́мый и безу́мие ми́ра обличи́вый, от богобо́рных злоключе́ния до́бльственне претерпе́вый и блаже́нства изгна́нных ра́ди Го́спода Иису́са вкуси́вый. При́зри ны́не с Небесе́ и от ра́йскаго са́да к нам прини́кни. Возвы́си на́ше мудрова́ние от земны́х попече́ний и о Небе́снем жи́тельстве помышля́ти научи́. Я́ко боже́ственными доброде́тельми себе́ украси́вый и от плодо́в ра́йских сла́дости насы́тивыйся, треволне́ния страсте́й исхити́ и го́рькаго грехолю́бия нас изба́ви всеизря́дным твои́м предста́тельством. В ве́ре правосла́вней до после́дняго издыха́ния утверди́ ны стоя́ти и по оте́ческим стопа́м умудри́ нас ходи́ти. Го́спода Бо́га умоли́, богому́дре о́тче, от кова́рных сете́й гряду́щаго анти́христа нас изба́вити, да ми́рное и благоче́стное житие́ в ве́це сем сконча́ем и ра́йских селе́ний по твои́м моли́твам насле́дити сподо́бимся, иде́же ку́пно с тобо́ю и со все́ми ста́рцы О́птинскими воспое́м и просла́вим Безнача́льную и Неразде́льную и Единосу́щную Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.

Служба святителю Антонию, архиепископу Воронежскому и Задонскому

Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

Месяца декабря в 20-й день

святителя Антония, архиепископа Воронежскаго и Задонскаго

На велицей вечерни

Блажен муж: 1-й антифон. На Господи, воззвах: стихиры на 8: предпразднства Рождества Христова 3 и святителя 5, глас 2.

Подобен: Киими похвальными:

Киими похвальными венцы/ увязем святителя Антония,/ от юности всею душею Бога взыскавшаго/ и паче всего службу церковную возлюбившаго,/ тихостию нрава и смирением украшеннаго,/ града Воронежа похвалу/ и Русския земли светильника,/ егоже избра Христос Бог наш,/ имеяй велию милость. (Дважды)

Киими достойными песньми/ прославим святителя Антония,/ мира тленнаго отрекшагося,/ постника, не токмо телом, но и душею,/ узким путем заповедей Господних шествовавшаго,/ града Воронежа похвалу/ и Русския земли светильника,/ емуже благодать дарова Христос Бог наш,/ имеяй велию милость.

Киими церковными хвалами/ воспоим святителя Антония,/ словом Божиим ум питавшаго/ и подвиги святых отец волю свою укрепльшаго,/ молитвою сердечною чувства освятившаго,/ града Воронежа похвалу/ и Руссския земли светильника,/ егоже просвети Христос Бог наш,/ имеяй велию милость.

Киими песненными гласы/ воспоим святителя Антония,/ пастыря монашествующих изряднаго,/ во игуменстве своем/ всем всяко послужившаго,/ града Воронежа похвалу/ и Русския земли светильника,/ егоже умудри Христос Бог наш,/ имеяй велию милость.

Слава, глас 8:

Что тя наречем, святителю Антоние;/ монахов ли украшение,/ яко целомудрием, нищетою и послушанием себе украсил еси;/ архиереев ли похвалу,/ яко свет твой пред человеки просиял еси;/ святителей Митрофана и Тихона достойнаго преемника,/ яко светильник земли Воронежския явился еси./ Сего ради со дерзновением молися Христу Богу/ о спасении душ наших.

И ныне, предпразднства, глас тойже: Восприими, Вифлееме:

Вход. Прокимен дне. И чтения три святительская.

На литии стихира храма.

Слава, святителя Антония, глас 3:

Отче, святителю Антоние,/ ты во дни смертоносныя язвы и глада губительнаго/ Господа прилежно умолял еси,/ о еже отступити прещению сему лютому./ И ныне моли всемилостиваго Бога,/ еже избавитися нам от губительнаго поветрия, на ны движимаго,/ таже огненнаго запаления/ и неистовства водныя стихии,/ глада и иных бед, по грехом нашим находящих на ны;/ да дарует Господь молитвами твоими/ людем православным и всей земли Русской/ мир и велию милость.

И ныне, предпразднства от стиховны, глас 2: Се, время приближися:

На стиховне стихиры предпразднства со стихи их, глас 2.

Аще кроме праздника, стихиры святителя, глас тойже.

Подобен: Доме Евфрафов:

Дом добродетелей/ и обитель Святаго Духа/ явился еси, святе Антоние,/ Воронежская похвало/ и Церкве Русския украшение.

Стих: Священницы Твои облекутся в правду/ и преподобнии Твои возрадуются.

Пастырю добрый/ и молитвенниче присный,/ святе Антоние,/ огради стадо твое/ от волков, губящих е.

Стих: Восхвалятся преподобнии во славе/ и возрадуются на ложах своих.

Бедствующих помощниче,/ во узах томящихся укрепление,/ святче Божий Антоние,/ не престай молитися/ о призывающих тя.

Слава, глас 1:

Приидите, вернии, прославим Господа,/ даровавшаго нам угодника Своего,/ святителя Антония,/ иже по преставлении от земных к Небесным/ чудесы паче луч солнечных сияет/ и всем всяко ко благу способствует:/ болящия исцеляет,/ бедствующия спасает,/ скорбящия утешает,/ путешествующия сохраняет,/ немощныя в вере укрепляет,/ неверующия вразумляет,/ злонамеренныя наказует,/ небрегущия о законе и правде обличает/ и молится о спасении душ наших.

И ныне, предпразднства, глас тойже: Предпразднуим, людие, Христово Рождество:

Тропарь, глас 4:

Предивнаго селения Божия Матере житель сый,/ кротостию и смирением изрядно украшаемь,/ граду Воронежу третие светило благодати явился еси,/ святых Митрофана и Тихона сонаследниче,/ святителю отче наш Антоние,/ моли Милостиваго Бога,/ граду твоему мир даровати,/ Отечеству нашему утверждение/ и душам верных спасение.

Слава, и ныне, предпразднства, глас тойже: Готовися, Вифлееме:

На утрени

На Бог Господь: тропарь предпразднства, дважды. Слава, святителя. И ныне, предпразднства.

По 1-м стихословии седален, глас 1:

Аще и сокровени быша подвиги твоя, святе Антоние, обаче подвижницы Христови яко угодника Божия тя почитаху, свет бо доброты души твоея преславно просиял есть.

Слава, и ныне, предпразднства глас тойже: Приклонивый Небеса:

По 2-м стихословии седален, глас 4:

Ангелов собеседник и святых подражатель был еси, святе Антоние, темже мудрость и благочестие твое в мире просияша, аще и добродетели своя от людей евангельски сокрывал еси.

Слава, и ныне, предпразднства глас тойже: Радуйся, Сионе:

Величание:

Величаем тя,/ святителю отче Антоние,/ и чтим святую память твою,/ ты бо молиши о нас/ Христа Бога нашего.

Псалом избранный: Услышите сия, вси языцы:

По полиелеи седален, глас 3:

Днесь святитель Антоний у престола Божия вкупе с Митрофаном и Тихоном и всеми святыми земли Воронежския за ны предстоит Святей Троице; днесь во храмех архиереи и священницы ликовствуют и вси вернии радости исполняются, тии бо молят усердно о нас Превечнаго Бога.

Слава, и ныне, предпразднства.

Таже, степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Иоанна, зачало 35 (от полу).

По 50-м псалме стихира, глас 6:

Святителю отче Антоние,/ пастырю добрый и мудрый,/ града Воронежа похвало,/ и Церкве Русския украшение,/ скорый пред Богом ходатаю о пастве твоей,/ моли спастися душам нашим.

Канон предпразднства со ирмосом на 6 и святаго на 8, глас 1.

Песнь 1

Ирмос: Песнь победную поим вси Богу,/ сотворшему дивная чудеса мышцею высокою/ и спасшему Израиля,/ яко прославися.

Даждь ми слово, Христе Боже, воспети достойно святителя Воронежскаго Антония, иже днесь купно с нами Рождество Твое песньми предпраздственными славословит.

От земнаго священства род свой ведя, святе Антоние, измлада душею к Небесным обителем устремился еси. Сего ради Бог сохрани тя во всех путех твоих.

Еще отрок сый, святе Антоние, мудрость книжную возлюбил еси, темже и в словесех Господних со тщанием поучался еси.

Богородичен: Едеме, украсися, Евфрафа бо Создателю уготовася, родитися хотящу от Девы Матере в вертепе Вифлеемстем за благоутробие многое.

Песнь 3

Ирмос: Камень, егоже небрегоша зиждущии,/ сей бысть во главу угла:/ той есть Камень,/ на Немже утверди Церковь Христос,/ юже от язык искупи.

Тихостию нрава и смирением украшен, святе Антоние, Смирницким во училищи духовнем наречен был еси, да по житию прозвание твое будет.

От юности Богу всем сердцем служити восхотев, святе Антоние, в обитель первоначальников жития монашеского на Руси притекл еси и, мира отрекся, преподобнаго Антония имя восприял еси.

Жития и творения святых отец, яко путь к Солнцу Правды Христу, возлюбил еси, писания же мирская, яко тьму и суесловие, отвергл еси, святе Антоние.

Богородичен: Гряди, Исаие, возопий: се Дева имать во чреве Избавителя мира и родит в вертепе, и нарекут Раждаемаго Еммануил, еже есть сказаемо: с нами Бог.

Кондак и икос предпразднства.

Седален святаго, глас 8:

Стопам преподобнаго Антония последовал еси, блаженне, той бо в пещере Киевстей начало русскому монашеству положи; ты же, от силы в силу восходя, блюститель Ближних пещер и игумен Лавры Печерския нареклся еси.

Слава, и ныне, предпразднства, глас тойже: Из чрева прежде век:

Песнь 4

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом - познаешися,/ внегда приити времени - покажешися./ Слава силе Твоей, Господи.

Преподобным отцем Печерским наследуя, подвигами воздержания, поста и молитвы просиял еси, святе Антоние, разумом же богопросвещен, братию ко спасению наставлял еси.

Предстательством Пресвятыя Богородицы укрепляемь, блаженне Антоние, яко искусный кормчий Лаврою Печерскою право правил еси, темже и благоволение Александра Благословеннаго стяжал еси.

Хранитель паствы Воронежския Божиим изволением поставлен был еси, святе Антоние, да ветхая обновиши, немощная укрепиши, благая удобриши, омертвелая отсечеши.

Богородичен: В вертепе убозем родитися нас ради, Бог Сый, изволил еси, обнищав, Блаже, нашею нищетою за милосердие и, из Девы прошед, воплощен, пребыв един Сын из Отца Предвечен.

Песнь 5

Ирмос: Твой мир даждь нам,/ Сыне Божий:/ иного бо, разве Тебе бога не знаем,/ Имя Твое именуем,/ яко Бог живых и мертвых еси.

Труды велия на земли Воронежстей уготованы быша тебе, святителю Антоние, якоже в видении чуднем показа ти Господь, темже, со упованием руку на рало возложил еси.

Службу Божию неотступно совершал еси, святителю Антоние, паству Воронежскую словом благодатным ко спасению назидая.

Милостынею никогдаже оскудевая, богомудре Антоние, имущих стяжание многое праведно расточати то поучал еси, наипаче же сущим в темницах питатель и утешитель был еси.

Богородичен: Бог человеком подобен быв из Тебе, Младенец нас ради раждается, Богоневесто, и пребывает весь неизменен, и во плоти видится Бог вочеловечивыйся.

Песнь 6

Ирмос: Пророка Иону подражая, вопию:/ живот мой, Блаже, свободи из тли/ и спаси мя, Спасе мира, зовуща: слава Тебе.

Во дни смертоносныя язвы и глада губительнаго паству твою призывал еси, отче Антоние, усердно Богу молитися и Святых Таин приобщатися, да помиловани будут.

Преподобный старец Серафим яко великаго архиерея Божия почиташе тя, святителю Антоние, ты же, в любви Христовой с ним пребывая, преставление его к Богу духом провидел еси.

Яко наставника искусна почитаху тя, святителю Антоние, Георгий Затворник, старец Муромский Антоний, служка Серафимов Николай и мнози инии, на нихже явлены быша чрез тебе чудеса и знамения Божия.

Богородичен: Украсися, Вифлееме, уготовися Евфрафо: без матере бо от Отца и без отца Материю Сын чревоносится и раждается, спасая ны.

Кондак, глас 3:

Днесь земля Воронежская веселия исполняется,/ во иерарсех великаго Антония память чествующи:/ той бо любовию Христовою воспламенився,/ молитвами, бдением и пощением обитель Духа Святаго себе сотвори,/ от Негоже вразумляемь,/ паству церковную премудре упасл еси;/ мы же, таковаго ходатая ко Христу Богу имуще,/ с верою и любовию вопием:/ радуйся, святителю Антоние,/ теплый о нас пред Богом предстателю.

Икос:

Ангелом подражателя и паствы Воронежския любвеобильнаго архипастыря, святителя Антония, песньми прославим, вернии, иже, от юности Христа всем сердцем возлюбив, добронравное житие явил еси и многия люди на путь истины наставил еси. Емуже днесь по достоянию приносим похвалы сия:

Радуйся, яко от младенства храму Господню прилежал еси;

радуйся, яко мудрость Божию паче суемудрия мира возлюбил еси.

Радуйся, от юности обеты монашеския избравый;

радуйся, иноков обители Печерския добре управивый.

Радуйся, пастыри премудре наставляяй;

радуйся, яко и паству твою словом истины питаяй.

Радуйся, яко святителя Митрофана на земли прославил еси;

радуйся, яко святителя Тихона мощи нетленныя обрел еси.

Радуйся, яко во дни язвы и глада Бога умолил еси;

радуйся, яко всем призывающим тя скорый помощник явился еси.

Радуйся, верныя чудесы твоими укрепляяй;

радуйся, неверныя к Богу обращаяй.

Радуйся, святителю Антоние, теплый о нас пред Богом предстателю.

Песнь 7

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты, пояху/ и благословляху, глаголюще:/ благословен Бог отец наших.

Воистину Ангел паствы Воронежския был еси, святителю Антоние, крилами молитвы твоея ю ограждая и неотступно к Богу взывая: призри с небесе, Боже, и виждь и посети виноград сей, егоже насади десница Твоя.

В милосердии, молитве и терпении пастыри утверждал еси, святителю Антоние, да, яко ревностнии служителие и строителие Тайн Божиих, добрый ответ дадут на Страшном Судище Христове.

Сугубое попечение о младости неразумней имея, отче Антоние, поучением кротким и любовию в юных сердцах страх Господень насаждал еси.

Богородичен: Пророком древле прореченный, приближается мне Младенец, из Девы рождейся, радуется Адам и прамати Ева болезней разрешися и сликовствует Давид, раждающия отец.

Песнь 8

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

Святителя Митрофана, архипастыря Воронежскаго, всем сердцем почитая, нетленныя мощи его обрести потщался еси, отче Антоние, и яко новаго заступника земли Русския того прославил еси.

О монашестем жительстве ревнуя, святителю Антоние, обитель Благовещения Пресвятыя Богородицы во граде Воронеже основал еси, идеже и честныя мощи святителя Митрофана, яко драгоценное сокровище, положил еси.

Телом болезнуя, святителю Антоние, возжелел еси ради спасения души в Лавру Печерскую удалитися, обаче, святителя Митрофана явлением вразумляемь, даже до смерти паству Воронежскую не оставил еси.

Богородичен: Звезда возсия, Христос от Иакова, и волсви стекаются во град Вифлеем пети, чествовати и поклонитися Ему, рожденному из ложесн Чистыя Богородицы.

Песнь 9

Ирмос: Живоприемный Источник приснотекущий,/ светоносный светильник благодати,/ храм одушевленный, сень пречистую,/ Небесе и земли пространнейшую,/ Богородицу, вернии, величаем.

На конец дний твоих, святе Антоние, дарова ти Господь обрести мощи святителя Тихона, да явлен будет на свещнице Воронежстей пред очию всех, яко светильник веры и добрых дел.

Подвигом добрым подвизался еси, течение жития твоего непостыдно скончав, веру соблюл еси, святителю Антоние, сего ради уготова ти Господь венец правды.

Се ныне время благоприятно, се ныне день спасения! Паства Воронежская и вся Церковь Русская радуется, святителя Антония молитвенным предстательством и чудесы Богом прославленнаго, достойно величающи.

Богородичен: Радуйся, Чистая, Божий граде одушевленный, в Немже Бог вместитися благоволи, не оставль бо горних, к Тебе сниде, яко дождь на землю, Богородительнице, и во граде Вифлееме Младенец раждается.

Светилен:

Светлостию добродетелей просияв, в месте светле, идеже празднующих глас непрестанный и безконечная сладость зрящих лика Христова доброту неизреченную, вселился еси, святче Антоние, ходатаю наш пред Богом непостыдный.

Слава, и ныне, предпразднства: Украсися, Вифлееме:

На хвалитех стихиры на 8: предпразднства 4 и святителя 4, глас 5.

Подобен: Радуйся, Живоносный Кресте:

Радуйся, святителю Антоние,/ архипастырю предивный Церкве Русския,/ яко по вся дни жития твоего,/ трудом, молитвою и неленостным попечением/ ревностно паству твою охранял еси/ и повеленная ти от Господа со усердием исполнял еси,/ благая терпеливне возращаяй,/ негодная же искореняяй./ И ныне не престай молитися Христу Богу нашему/ даровати нам велию милость. (Дважды)

Радуйся, святителю Антоние,/ архипастырю добрый земли Воронежския,/ ты бо, болезнуя о пастве твоей, Бога умолял еси,/ да дарует ти помощники верныя,/ служители Христовы и строители Таин Божиих,/ с радостию бдящия о душах христианских,/ путеводствующия люди в Царство Небесное./ И ныне не престай молитися Христу Богу нашему/ даровати нам велию милость.

Радуйтеся, святителие тричисленнии,/ Митрофане, Тихоне и Антоние,/ столпи благочестия и закона Божия проповедницы,/ пастырие и учителие богодухновеннии,/ путеводителие в Царствие Небесное,/ земнаго Отечества нашего заступницы,/ земли Воронежския утверждение,/ всея Руси чудотворнии молитвенницы./ Молитеся Христу Богу нашему,/ даровати нам велию милость.

Слава, глас 5:

Вострубим трубою песней,/ прославим святителя Антония:/ архипастыри и священницы, монаси и простии,/ старцы и юнии, мужие и жены,/ нищии и богатии,/ властителие и иже под властию сущии,/ скорбящии и радующиися,/ всех бо созывает наш архипастырь добрый,/ даровати коемуждо по сердечному прошению,/ мир и велию милость.

И ныне, предпразднства, глас 6: Зависть же и огнь:

На Литургии

Блаженны от канона предпразднства, песнь 3 и святителя песнь 6. Прокимен, глас 1: Уста моя возглаголют премудрость/ и поучение сердца моего разум. Стих: Услышите сия, вси языцы, внушите вси, живущии по вселенней. Апостол ко Евреем, зачало 318. Аллилуиа, глас 2: Уста праведнаго поучатся премудрости/ и язык его возглаголет суд. Стих: Закон Бога его в сердце его и не запнутся стопы его. Евангелие от Иоанна, зачало 36. Причастен: В память вечную будет праведник:

Молитва

О, святителю отче наш Антоние, пастырю добрый, чудотворче изрядный и молитвенниче предивный! Ты во дни земнаго жития твоего нищетою духовною, кротостию и чистотою сердца себе украсив, жаждою правды, милостынею и плачем покаянным заповеди Евангельския исполнил еси. Дух мирен стяжав и даже до конца дней твоих ближним послужив, Богу угодил еси и Царствия Небеснаго достигл еси.

Ныне же, со святителями Воронежскими Митрофаном и Тихоном Престолу Божию предстоя, моли Пресвятую Троицу паству твою добре управити и всем вся, яже ко спасению полезная, подати. Испроси у Отца Небеснаго, Врача душ и телес, болящим исцеление, скорбящим и озлобленным утешение, грешным покаяние, неведующим вразумление. Моли Сына Божия, Господа нашего Иисуса Христа, отроки в страсе Божии наставити и в целомудрии возрастити, юныя во благочестии утвердити, старыя без попечения не оставити. Умоли и Духа Святаго Утешителя Животворящаго Церкви Православней в единстве сохранятися, пастырем ревность о спасении пасомых даровати, да людие в вере, надежди и любви Божией утвердятся и славится от всех пречестное и великолепое Имя Пресвятыя Троицы, Отца и Сына и Святаго Духа, ныне и присно и во веки веков. Аминь.