Азбука веры » Би́блия » Сiра́хъ » гл.37

Сiра́хъ, Глава 37

Толкования

Толкования главы

Толковая Библия А.П. Лопухина

37:1

37:2

37:3

см.:Иак.3:15;

37:4

см.:Сир.6:7;

37:5

37:6

37:7

37:8

37:9

37:10

37:11

37:12

37:13

37:14

37:15

см.:Сир.6:35;

37:16

см.:Сир.6:17;

37:17

37:18

см.:3Цар.12:7;

37:19

37:20

см.:Сир.38:22;

37:21

см.:Притч.18:21;

37:22

37:23

37:24

37:25

37:26

см.:Сир.4:16;

37:27

37:28

37:29

см.:Прем.8:9;

37:30

37:31

см.:1Кор.6:12;1Кор.10:23;

37:32

см.:Сир.31:19;

37:33

37:34

Церковнослав. (рус. дореф.)

Языки

Вся́къ дру́гъ рече́тъ: содружи́хся ему́ и а́зъ. Но е́сть дру́гъ и́менемъ то́чiю дру́гъ.

Печа́ль не пребыва́етъ ли до сме́рти, прiя́тель и дру́гъ претворя́яйся во врага́?

О, лука́во помышле́нiе, отку́ду извали́лося еси́ покры́ти су́шу ле́стiю?

Прiя́тель о весе́лiи дру́жни сра́дуется, а во вре́мя ско́рби проти́венъ бу́детъ:

прiя́тель со дру́гомъ тружда́ется чре́ва ра́ди и проти́ву бра́ни во́зметъ щи́тъ.

Не забу́ди дру́га въ души́ твое́й и не не помина́й его́ во имѣ́нiи твое́мъ.

Вся́къ совѣ́тникъ возно́ситъ совѣ́тъ, но е́сть совѣща́яй о себѣ́ самѣ́мъ.

От совѣ́тника храни́ ду́шу твою́ и разумѣ́й пе́рвѣе, что́ ему́ потре́ба: са́мъ бо себѣ́ совѣщава́етъ:

да не когда́ возложи́тъ на тя́ жре́бiй и рече́тъ ти́: до́бръ пу́ть тво́й: и ста́нетъ пря́мо, ви́дѣти, что́ сбу́дется тебѣ́.

Не совѣщава́й съ подзира́ющимъ тя́ и от зави́дящихъ ти́ скры́й совѣ́тъ:

со жено́ю о ревну́ющей е́й и со страшли́вымъ о бра́ни, съ купце́мъ о мѣ́нѣ и со купу́ющимъ о прода́жи, со зави́дливымъ о благодаре́нiи

и съ неми́лостивымъ о поми́лованiи, съ лѣни́вымъ о вся́цѣмъ дѣ́лѣ

и съ нае́мникомъ годовы́мъ о соверше́нiи, съ рабо́мъ лѣни́вымъ о мно́зѣ дѣ́ланiи.

Не внемли́ си́мъ о вся́цѣмъ совѣща́нiи,

но то́кмо съ му́жемъ благоговѣ́йнымъ при́сно бу́ди, его́же а́ще позна́еши соблюда́юща за́повѣди Госпо́дни,

и́же душе́ю свое́ю по души́ твое́й, и а́ще согрѣши́ши, споболи́тъ съ тобо́ю.

И совѣ́тъ се́рдца уста́ви, нѣ́сть бо ти́ вѣ́рнѣе его́:

душа́ бо му́жа возвѣща́ти нѣ́когда бо́лѣе обы́че, не́жели се́дмь блюсти́телiе высо́цѣ сѣдя́щiи на стра́жи.

И о всѣ́хъ си́хъ помоли́ся вы́шнему, да упра́витъ во и́стинѣ пу́ть тво́й.

Нача́токъ вся́каго дѣ́ла сло́во, и пре́жде вся́каго дѣ́ланiя совѣ́тъ.

Слѣ́дъ измѣне́нiя серде́чна лице́. Четы́ри ча́сти происхо́дятъ: добро́ и зло́, живо́тъ и сме́рть: и облада́яй и́ми всегда́ язы́къ е́сть.

Е́сть му́жъ хи́тръ и наказа́тель мно́гимъ, а свое́й души́ неключи́мь е́сть.

Е́сть умудря́яйся въ словесѣ́хъ ненави́димь: се́й вся́кiя пи́щи лише́нъ бу́детъ:

не дана́ бо бы́сть ему́ от Го́спода благода́ть, я́ко вся́кiя прему́дрости лише́нъ бы́сть.

Е́сть прему́дръ свое́й души́, и плоды́ ра́зума его́ во устѣ́хъ вѣ́рны.

Му́жъ прему́дръ лю́ди своя́ нака́жетъ, и плоды́ ра́зума его́ вѣ́рны.

Му́жъ прему́дръ испо́лнится благослове́нiя, и ублажа́тъ его́ вси́ зря́щiи.

Живо́тъ му́жа въ числѣ́ дні́й: а дні́е Изра́илевы безчи́сленни.

Прему́дрый во свои́хъ лю́дехъ наслѣ́дитъ вѣ́ру, и и́мя его́ жи́во бу́детъ во вѣ́къ.

Ча́до, въ животѣ́ твое́мъ искуси́ ду́шу твою́ и ви́ждь, что́ е́й зло́ е́сть, и не да́ждь е́й.

И́бо не вся́ всѣ́мъ на по́льзу, и не вся́ка душа́ во все́мъ благоволи́тъ.

Не пресыща́йся во вся́цѣй сла́дости и не разлива́йся на [разли́чiе] бра́шна,

и́бо во мно́зѣхъ бра́шнахъ неду́гъ бу́детъ, и пресыще́нiе прибли́житъ да́же до холе́ры:

пресыще́нiемъ бо мно́зи умро́ша, внима́яй же приложи́тъ житiе́.