Дще́рь отцу́ сокрове́нно бдѣ́нiе, и попече́нiе о не́й отгоня́етъ со́нъ: во ю́ности свое́й да не когда́ презрѣ́етъ и сожи́телствующи [съ му́жемъ], да не когда́ возненави́дѣна бу́детъ:

въ дѣ́вствѣ да не когда́ оскверни́тся и во о́тчихъ ея́ непра́здна бу́детъ, и съ му́жемъ су́щи да не когда́ престу́питъ и сожи́телствующи да не когда́ непло́ды бу́детъ.

Надъ дще́рiю безсту́дною утверди́ стра́жу, да не когда́ сотвори́тъ тя́ обра́дованiе враго́мъ, бесѣ́ду во гра́дѣ и отлуче́наго от люді́й, и посрами́тъ тя́ въ наро́дѣ мно́зѣ.

Не взира́й на добро́ту вся́каго человѣ́ка и посредѣ́ же́нъ не сѣди́:

от ри́зъ бо исхо́дитъ мо́лiе, и от жены́ лука́вство же́нское.

Лу́чше зло́ба му́жеска, не́жели добродѣ́телная жена́, и жена́ посрамля́ющая въ поноше́нiе.

Помяну́ у́бо дѣла́ Госпо́дня, и я́же ви́дѣхъ, повѣ́мъ: во словесѣ́хъ Госпо́днихъ дѣла́ его́:

со́лнце просвѣща́я на вся́ призрѣ́, и сла́вы его́ испо́лнено дѣ́ло его́.

Не сотвори́ ли святы́мъ Госпо́дь повѣ́дати вся́ чудеса́ его́, я́же утверди́ Госпо́дь Вседержи́тель, утверди́тися всему́ во сла́вѣ его́?

Бе́здну и се́рдце изслѣ́дова и въ кова́рствѣхъ и́хъ размы́сли: разумѣ́ бо Госпо́дь вся́ко вѣ́дѣнiе и призрѣ́ на зна́менiе вѣ́ка,

возвѣща́я мимоше́дшая и бу́дущая и открыва́я слѣды́ та́йныхъ:

не пре́йде его́ вся́ко помышле́нiе, не утаи́ся от него́ ни еди́но сло́во.

Вели́чiя прему́дрости своея́ украси́: и́же е́сть пре́жде вѣ́ка и во вѣ́къ,

ни приложи́ся, ни ума́лися и не востре́бова ни еди́наго совѣ́тника.

Ко́ль вся́ дѣла́ его́ вожделѣ́нна, и да́же до и́скры е́сть ви́дѣти.

Вся́ сiя́ живу́тъ и пребыва́ютъ во вѣ́къ во всѣ́хъ тре́бованiихъ, и вся́ послу́шаютъ.

Вся́ сугу́ба, еди́но проти́ву еди́наго: и не сотвори́ ничто́же ску́дно.

Еди́но от еди́наго утверди́ блага́я: и кто́ насы́тится, зря́ сла́ву его́?